1. Yehowa apushaa naminyi nsaa i muntu ayikalanga mulekye kumufubila alukiila kwadi?

ANKA bu byatwikeele balongye mu mwisambo ushaale, Yehowa epwandikisha na mulami a mikooko ebuwa apasukilaa mukooko waaye ooso. Na akimbi mukooko ooso upambukye. Yehowa balungwile bena Isaleele babaadi bakatukye kwadi’shi: “Alukiilaayi kwandi, ami naamu nealusha kwanudi.” Atushinguula’shi kwete nka kupusha byabya mwanda amba’shi: “Ami . . . ntshi mwalulukye’mi.” (Mal. 3:6, 7) Yesu bambile’shi Yehowa na ba mikeyilu abekalaa na muloo nsaa ayalukiila mufubi Aaye ayikalanga mulekye Kumufubila.​—Luk. 15:10, 32.

2. Myanda kinyi yatukyebe kutaluula mu uno mwisambo?

² Tubandeyi kutaluula nkindji isatu ya Yesu imene pa kukwasha booso balekye kufubila Yehowa. Atwisambila ingi ngikashi yatudi nayo lukalo bwa kukwasha mukooko ushimine bwashi walukiile kwadi. Atutaluula dingi bwakinyi bi na muulo bwa kwitatshisha bwa kukwasha booso babofule.

3-4. Bwakinyi mwana mukashi abadi batemune mu Luka 15:8-10 baadi akimbi ngofu ndalakume aaye baadi mushimine?

³ Abitungu tukite mwetu mooso bwa kupeta baaba abakumiina kwalukiila kwi Yehowa. Mu lukindji lwi mu Evanjile a Luka, Yesu badi mulonde mwanda wa mwana mukashi badi mushimishe lufwalanga lwa kyamo lwabetamina bu ndalakume. Mu luno lukindji, ki na muulo ukata nyi mushindo wa kimbi lufwalanga lushimine.​—Badika Luka 15:8-10.

⁴ Yesu alesha abipusha yawa mwana mukashi nsaa y’apete lufwalanga lwikeele lushimine. Mu mafuku a Yesu, abimweneka’shi bangi banyina bana bena Yuuda babaadi abapa bana babo bakashi ndalakume ekumi mwifuku dy’eyibakishi dyabo. Pangi luno lufwalanga lubaadi na muulo ukata kwadi mwanda abamupele lwanka kwi nyinaye  pa kwenda kwa ku bulunda. Yawa mwana mukashi baadi apwandikisha’shi lufwalanga ndupone mu nsenga. Nyi aye nkutembesha elampi bwa kukimba mbalo yooso, anka kushii kumona kintu. Mwimu ubaadi mwilampi dyaaye taubaadi umukwashe bwa kupeta etaata dibungi bwa kupeta dyadya ekuta dya kyamo nya. Ku nfudiilo, aye nkukomba mu nshibo ishima. Mwamwa mu nsenga ibaadi akombo, nyi mubaadi mupete lufwalanga lwaye lwa muulo, alupenyapenya kwitaata dy’elampi. Eshimba dibamwikiishe! Bayitamiine baloole baaye na ba nkungishanyi naaye bwa kusangala nabo pamune.

5. Bwakinyi mbilombene kwikala bukopo bwa kutundula mbalo i muntu mulekye kwibunga pamune na kakongye?

⁵ Muyile byatupusha mu lukindji lwa Yesu, abyataa nsaa ibungi bwa kupeta kintu kishimine. Bi mumune, abitungu twitatshishe ngofu bwa kutundula mbalo i muntu mulekye kwibunga na kakongye. Nkulombene kukila bipwa bibungi kasha baleka kwibunga netu. Mbalombene kwikala bende ku mbalo yabashabebauku kwi bakwabo ba mu kakongye ka yaya mbalo. Anka atushinkamisha’shi, binobinobangi ba kwabadi be nalukalo lwa kwalukiila kwi Yehowa. Be na lukalo lwa kufubila dingi Yehowa pamune na kifuko kyaaye kya balangwidi ba binyibinyi, anka be na lukalo lwa bukwashi.

6. Mushindo kinyi ulombene kukwasha bena kakongye booso mu kukimba kwa balungudi bash’abafubaa dingi na balekye kutwela mu bisangilo?

⁶ Nanyi mulombene kukwasha mu uno mudimo wa kukimba balungudi bash’abafubu dingi na balekye kutwela mu bisangilo? Nnatwe booso​—bakulu, ba mbala-mashinda, bena kifuko, na balungudi ba mu kakongye. We na kuuku sunga mukwenu a mu kifuko mupwe kuleka kulungula na kutwela mu bisangilo su? We mufumankane na muntu shikwete kulungula dingi na kutwela mu bisangilo mu bulungudi boobe bwa ku nshibo na nshibo sunga poodi mu bulungudi bwa mbalo i bantu bebungi? Su yawa muntu akumiina nkulesha mbalo yadi mushaale sunga nkupa nimero yaye ya telefone, we mulombene kwibilungula bakulu ba mu kakongye kenu.

7. Nkinyi kibolongyela ku mayi a mungi mukulu abetaminaa bu Thomas?

⁷ Myanda kinyi ilombene kukita bakulubwa kuuka mbalo i bantu bashikwete kulungula dingi na balekye kutwela mu bisangilo be na lukalo lwa kwalukiila kwi Yehowa? Pusha abyakula ungi mukulu abetaminaa bu Thomas, * mushalele mu Espagne na mmukwashe ba Temwe bakile pa 40 bwa kwalukiila mu kakongye. Amba’shi: “Kumpala, nayipushaa bakwetu belekene su abauuku ma mbalo ashale balungudi bash’abafubaa dingi na balekye kutwela mu bisangilo. Sunga kwipusha balungudi su abauku muntu kampanda shikwete kutwela dingi mu bisangilo. Bantu bebungi mu kakongye abekalaa na muloo wa kukwasha, mwanda abapusha’shi uno mudimo ngwibatale. Kunyima, panende mu kutala mukwetu shikwete kulungula dingi, namwipusha pabitale bana baye na bangi bena kifuko naaye. Bangi babaadi abafiki na bana babo mu bisangilo, na bano bana babaadi babangye kukita bulungudi mu angi mafuku. Mpa n’abo dingi abitungu kwibakwasha bwabadya kwalukiila kwi Yehowa.”

8. Mu lukindji lwa mwana mushimine lwi mu Luka 15:17-24, nshe-mwana baadi mukitshine mwana aaye badi mwilangye kwishimba myanda naminyi?

⁸ Abitungu twikale na ngikashi kinyi bwa kukwasha baaba abakumiina kwalukiila kwi Yehowa? Pusha angi malongyesha atupete mu lukindji lwa Yesu lwa mwana mushimine. (Badika Luka 15:17-24.) Yesu apatuula bibadi bifikye mwana mu kushinguula’shi tayikalanga na binangu bibuwa na aye nkwata kitshibilo kya kwalukiila ku nshibo. Nshaye nkwenda lubilo mu kumukuukila na nkumukama kiipa, nkushinkamiisha mwana aaye’shi mmumufule. Kondo k’eshimba ka mwana kabaadi akamutopeka na tabaadi epusha bu abadi  balombeene kukitshina myanda kwi nshaaye bu mwana aaye nya. Nshe-mwana badi mwituule pa mbalo ya mwana nsaa ibaadi amulungula bibaadi mwishimba dyaaye. Nshe-mwana bakitshine myanda kampanda bwa’shi mwana epushe’shi balukiila kwabo, kushii bu mwina mudimo, kadi bu mwina kifuko sha kinemo. Bwa kumulesha’shi mumufule na’shi akumiinakumwalusha ku nshibo, nshe mwana batshile mpàngo ya kukita musangeelo na aye nkufwadika mwan’aaye belanga kwishimba bilamba bibuwa.

9. Ngikashi kinyi ayitungu’shi twikale nayo nsaa yatukwasha bantu bashikwete kulungula dingi bwa kwalukiila kwi Yehowa? (Tala kashibo akamba’shi: “ Mushindo wa kukwasha baba abakyebe kwaluka kwi Yehowa.”)

⁹ Yehowa e nka bi nshe-mwana a mu luno lukindji. Mmufule bakwetu bashikwete kulungula dingi na akumina’shi balukiile kwadi. Mu kwambula kileshesho kya Yehowa, abitungu twibakwashe bwa’shi balukiile kwadi. Bino abitekye kwikala na lwishinko, kwituula pa mbalo yaabo, na kwibalesha kifulo. Bwakinyi abitungu tuleshe ino ngikashi, na twi kwibikita naminyi?

10. Lwishinko lwi na muulo kinyi mu kukwasha kwa muntu bwashi alukiile kwi Yehowa?

¹⁰ Abitungu’shi twikale na lwishinko, mwanda bwa’shi muntu alukiile kwi Yehowa abyata nsaa ibungi. Bangi bashibaadi abalungula dingi abashinkamisha’shi bwabadya kwalukiila, bakulu na bangi bena kakongye abadi bafikye mu kwibatala misusa ikile bungi. Mungi mukwetu mukashi abetamina bu Nancy a mu Asie amba’shi: “Loole ande a p’eshimba a mu kakongye ketu baadi munkwashe ngofu. Badi mu nfule nka bu taata ande. Baadi muntentekyeshe nsaa ikile buwa ibatudi atukisha naaye kumpala. Baadi anteemesha na lwishinko looso panaadi nalesha bi mwishimba dyande, na tabaadi ekaka bwa kumpa malango nya. Baadi muleshe’shi loole ebuwa ngofu, e kwanka bwa kunkwasha nsaa yandi na lukalo lwa bukwashi.”

11. Bwakinyi kwituula pa mbalo ya muntu kwi na muulo bwa kukwasha muntu abadi balwishishe?

 ¹¹ Kwituula pa mbalo ya muntu kwi nka bi bwanga bwi bukopo; nkulombene kupasha muntu mukalakashwe. Bangi bash’abafubaa dingi na balekye kutwela mu bisangilo, babaadi bebatape ku mashimba munda mwa bipwa kwi bangi bena kakongye na bakyabapusha nka byabya. Pa mwanda wa byabya, ta be na lukalo lwa kwalukiila kwi Yehowa. Mbalombene kupusha’shi mbebakitshine myanda ibubi. Lukalo lwabo ndwa muntu a kuteemesha bi mwishimba dyabo. (Shak. 1:19) María, shibaadi alungula dingi amba’shi: “Nadi na lukalo lwa muntu akunteemesha, andya kudidila, na a kunkunkusha.”

12. Tusha kileshesho akilesha mushindo wi kifulo kya Yehowa akikaka bantu kwadi.

¹² Bible alesha kifulo kya Yehowa bwa bantu baaye bu mooshi. Kifulo ky’Efile Mukulu ki bu mooshi naminyi? Banda kutala kino kileshesho: Banda kunangushena’shi bopono mu mwela ukata na muntu kampanda bakwele bidon bwashi tala otoma tupulu. Eyendo’shi osangeela bukwashi bwaye mwanda mbilombene nkupa mushindo odya kushaala mulengame kuunundu. Kadi penda bidon ta mbilombene nkukwasha bodya kupanda nya. Meema e mashika, na twe kwamba’shi bopanda su tobandjile kufika kwi bwato abufiki mu nkupaasha. Abitungu’shi muntu akutambikye mooshi bwadya nkwabula mu mema. Yehowa bambile bino pabitale bena Isaleele abaadi bapambukye kwadi: “Nádi namukakila kwandji . . . na [mooshi] wa kifulo.” (Os. 11:4, EEM) Efile Mukulu kwete kupusha nka byabya lelo uno pabitale baaba balekye kumufubila na bakalakashwe na myanda na twinyongoshi. Akumiina baukye’shi mmwibafule, na’shi lukalo lwaye ndwa kwibakaka kwadi. Yehowa mukumbene kufuba noobe bwa kwibalesha kyakya kifulo.

13. Mwanda wa Pablo aulesha naminyi’shi kifulo kyetu nkilombene kukwasha bangi bwabadya kwalukiila kwi Yehowa?

 ¹³ Bi na muulo bwa kushinkamiisha muntu shikwete kulungula dingi’shi Yehowa mmumufule na’shi mpa n’atwe twibamufule. Pablo, atutemwine mu mwisambo ushaale, baadi mulekye kulungula munda mwa bipwa bikile pa 30. Amba’shi: “Dingi efuku kunamashika, panaadi nakatuka kwande, naadi mufumankane na mungi mukwetu mukashi bapu kukula, aye nkwisamba nami na kalolo kooso. Nabangile kudila nka bu mwana mukinga. Namulungwile’shi napusha nka bu’shi Yehowa bamutumu bwadya kwisamba naami. Yaaya nsaa nyi inaadi mwate kitshibilo kya kwalukiila kwi Yehowa.”

14. Muyile lukindji lwi mu Luka 15:4, 5, mulami a mikooko bakitshi kinyi nsaa ibapete mukooko ushimine?

¹⁴ Abitungu tutungunukye na kukwasha na kunyingisha bakwetu bashikwete kulungula dingi na balekye kutwela mu bisangilo kunyima kwa kwimonena nabo. Anka bi mwana mushimine a mu lukindji lwa Yesu, mbalombene kwikala batapikye ku mashimba. Mbabofule mu kikudi bwa myanda yabadi bamone mu ndumbulwilo a Satana. Abitungu twibakwashe banyingishe lukumiino lwabo kwi Yehowa. Mu lukindji lwa mukooko ushimine, Yesu badi muleshe bibaadi mulami a mikooko mutwale mukooko kwipampa na kwiwalusha munkatshi mwa loombe. Mulami a mikooko mmupwe kukisha nsaa na bukome bwaye mu kukimba mukooko ushimine. Anka ashinkamisha’shi abitungu eutwale bwa kwenda nao mu kikutu, mwanda tawi na bukome bwaudya kwalukiila ao unabene nya.​—Badika Luka 15:4, 5.

15. Mushindo kinyi watudya kukwatshishena bantu balekye kulungula bwabadya kwalukiila kwi Yehowa? (Tala kashibo akamba’shi: “ Mukanda wi na muulo ukata.”)

¹⁵ Abitungu tutuushe nsaa na bukome bwetu bwa kukwasha baaba bashikwete kulungula dingi bwabadya kukambila kubofula kwabo. Anka  ku bukwashi bwa kikudi kya Yehowa, Eyi dyaaye, na mikanda yatupete mu kakongye, twi balombene kwibakwasha bwabadya kupetuula bukome bwa mu kikudi. (Lom. 15:1) Twi kwibikita naminyi? Mungi mukulu bapu kufuba mafuku ebungi amba’shi: “Bantu bebungi balekye kulungula be na lukalo lwa kulonga Bible kunyima kwa’bo kwata kitshibilo kya kwalukiila kwi Yehowa.” * Byabya, su bakuteka bwa kulonga Bible na muntu ayikalanga mulekye kulungula, we mulombene kukumina na muloo oso su we na mushindo wa kwibikita. Yawa mukulu amba dingi’shi: “Abitungu’shi mulungudi alongo naaye Bible ekale kuuku ebuwa, abadi balombeene kukulupila kwi yawa muntu ayikalanga mulekye kukita bulungudi.”

16. Mushindo kinyi watwiuku’shi twi balombene kukulupila bukwashi bwa ba mwikeyilu?

¹⁶ Myanda ibungi ikitshikye ayilesha’shi ba mwikeyilu bakwete kufuba pamune netu bwa kwitukwasha tupete balungudi bash’abafubu dingi na balekye kutwela mu bisangilo be na lukalo lwa kwalukiila kwi Yehowa. (Kibaf. 14:6) Bu kileshesho, Silvio, a mu Equateur, badi mwele luteko ngofu bwadya kwalukiila mu kakongye. Pabaadi kyele luteko, bakulu babidi abakokwele ku kibelo kyaaye. Nsaa ibabafikile kwadi, babaadi na muloo wa kubanga kumupa bukwashi bubaadi nabo lukalo.

17. Twi balombene kupusha naminyi kunyima kwa kukwasha muntu shalungulanga dingi?

¹⁷ Atupete muloo wibungi mu kukwasha kwa bantu babofule mu kikudi bwa kwalukiila kwi Yehowa. Pusha abyakula Salvador, mbala-mashinda apasukilaa bantu bashikwete kulungula dingi, amba’shi: “Ingi nsaa, abinyikelaa bukopo bwa kukutwa kudila. Napushaa muloo wa kunangushena’shi Yehowa mmwabule mukooko waaye wibuwa mu ndumbulwilo a Satana na ne mupete kinemo kya kufuba pamune Naaye mu uno mudimo.”​—Bik. 20:35.

18. Su we mulekye kwibunga na mwilo wa Yehowa, abitungu oshinkamishe kinyi?

¹⁸ Su boodi mulekye kwibunga na mwilo wa Yehowa, shinkamisha’shi enka mukufule. Akumina’shi walukiile kwadi. Abitungu okite myanda kampanda bwa kwalukiila kwadi. Byabya, anka bu yawa nshe-mwana a mu lukindji lwa Yesu, Yehowa atengyela’shi walukiile kwadi, na ekala na muloo ukata wa nkukuukila.