1. Unfa Jehovah ta fii te wan dinima fëën di an bi ta dini ën möön, ko ta dini ën baka?

KUMAFA u bi si a di woto di pasa, nöö Jehovah ta tei hënseei maaka ku wan bumbuu sikapuma di ta luku hiniwan u dee sikapu fëën a wan lobihati fasi. Jehovah ta suku hiniwan sikapu fëën di lasi. A bi piki dee Isaëli sëmbë dee bi go disëën, taa: „Un toona ko a mi, nöö mi o toona ko a unu tu.” Wë u sabi taa Jehovah ta pakisei sö jeti, u di a bi taki taa: „Ma tooka” (Mal. 3:6, 7). Jesosi bi taki taa Jehovah ku dee ëngëli ta wai seei te de si unfa wan dinima u Jehovah di bi lasi, toona ta ko nëën baka.​—Luk. 15:10, 32.

2. Andi woo luku a di woto aki?

² Boo luku dii woto di Jesosi bi konda, di ta lei u unfa u sa heepi wan sëmbë di an ta peleiki möön. Woo taki u wantu fasi di u musu abi fuu sa heepi dee sikapu dee lasi. Woo si tu unfa woo piizii seei te u ta mbei möiti u heepi dee sëmbë dee an ta peleiki möön u de toona ko a Jehovah.

3-4. Faandi mbei di mujëë bi suku di möni fëën finifini, te u luku Lukasi 15:8-10?

³ U musu mbei taanga möiti fuu feni dee sëmbë dee kë toona ko a Jehovah baka. A wan woto di Lukasi bi sikifi, Jesosi bi taki soni u wan mujëë di bi ta suku wan soofu möni fëën di bi lasi. Di woto aki ta mbei u si unfa di mujëë bi suku di möni tjika.​—Lesi Lukasi 15:8-10.

⁴ Jesosi bi taki unfa wan mujëë bi fii di a feni di soofu möni fëën di bi lasi. A di pisiten di Jesosi bi dë a goonliba aki, so juu wan mama bi ta da wan mujëë mii fëën söwan teni soofu möni a di daka di a o tööu. Kandë di möni aki bi dë wan u dee soofu möni, di di mujëë aki mama bi dëën tu. Di mujëë bi ta hoi taa di möni kai a goon. Fëën mbei a bi sëndë faja a di wosu, ta suku ën  a hii kamian, ma an bi sa feni ën. Kandë di tamundu fëën an bi ta sëndë faja dëën tjika faa bi sa si di soofu möni fëën. Te u kaba fëën a bi ta bai hii di wosu ta suku di möni. Hën a ko si di möni ta koti faja njëinjëin. A bi musu u fii bunu seei di a feni ën! Di mujëë aki ta kai dee mati fëën, ku dee sëmbë dee ta libi ka a ta dë, u de ko sabi unfa soni waka.

5. Faandi mbei u musu mbei taanga möiti fuu sa feni dee sëmbë dee an ta peleiki möön?

⁵ U ta lei a di woto u Jesosi aki taa, te u lasi wan soni, nöö u musu mbei taanga möiti fuu sa feni ën. Sö nöö u musu mbei taanga möiti fuu sa feni dee baaa ku dee sisa dee an ta peleiki möön, nasö dee an ta ko a komakandi möön. Kandë sömëni jaa longi kaa de an ta nama ku u möön. Kandë de foloisi go libi a wan kamian ka dee baaa ku dee sisa an sabi de. Ma an dë u taki taa nöunöu so u dee baaa ku dee sisa dee an ta peleiki möön, kë toona ko a Jehovah baka. De kë toona dini Jehovah ku dee woto dinima fëën baka, ma de abi heepi fanöudu.

6. Unfa hii sëmbë a di kemeente sa heepi u suku dee sëmbë dee an ta peleiki möön?

⁶ Ambë sa heepi u suku dee sëmbë dee an ta peleiki möön? Wë hii u tuu sa du di soni aki. Dee gaanwomi, dee pionili, dee famii u di sëmbë seei, ku hii dee woto peleikima u di kemeente sa heepi u suku dee sëmbë dee an ta peleiki möön. I abi wan mati fii, nasö wan famii fii di an ta peleiki möön u? I miti wan sëmbë di an ta peleiki möön di i go peleiki a sëmbë pisi, nasö di i go peleiki a kamian ka hia sëmbë ta waka pasa u? Hakisi di sëmbë ee a bi o kë fii da dee gaanwomi di tëlëfön nöbu fëën, nasö ee i sa piki dee gaanwomi naasë a ta libi, u de sa ko luku ën.

7. Andi i ta lei a di soni di wan gaanwomi de kai Thomas bi taki?

⁷ Andi dee gaanwomi sa du u de heepi dee sëmbë dee an ta peleiki möön u de toona ko a Jehovah? Luku andi wan gaanwomi de kai Thomas * bi taki. A ta libi a Sipanjöluköndë, nöö a heepi söwan 40 baaa ku sisa u de toona ko a Jehovah baka. Thomas bi taki taa: „Di fosu soni di mi ta du, hën da mi ta hakisi tookatooka baaa ku sisa di sa sabi, u de piki mi naasë di sëmbë ta dë nöunöu. Nasö mi ta hakisi dee peleikima ee de sabi wan sëmbë di an ta ko a komakandi möön. Gaansë u dee sëmbë u di kemeente ta wai taa deseei sa heepi tu. Baka di dë, te mi go luku dee baaa ku dee sisa dee an ta peleiki möön, nöö mi ta hakisi de fa u dee mii u de ku dee woto sëmbë u de. So u dee baaa ku sisa di an ta peleiki möön, bi abi di guwenti u tja dee mii u de ko a komakandi fosu, nöö a kan taa dee mii aki bi dë peleikima fosu. Deseei dë u heepi tu u de toona ko a Jehovah.”

8. Te u luku di woto di sikifi a Lukasi 15:17-24, nöö unfa di tata bi libi ku di womi mii fëën di di womi mii bi lei taa a ta tjali u di soni di a du?

⁸ Un fasi u musu abi ee u kë heepi dee sëmbë dee kë toona ko a Jehovah baka? Boo luku andi u sa lei a di woto di Jesosi bi konda u di womi mii di bi go kumutu nëën mama ku hën tata wosu. (Lesi Lukasi 15:17-24.) Jesosi bi taki unfa di womi mii bi ko fusutan bakaten taa a bi mbei wan föutu, hën a toona ko baka. Di tata bi kule go miti di womi mii fëën, hën a baasëën duu sö, u lei ën taa a lobi ën. Háti u di womi mii bi ta fon mën tee u di soni di a du, nöö a bi ta fii kuma an fiti u di tata si ën kuma miii fëën möön. Tjali u di womi mii bi kisi di tata di di womi mii bi ta konda dëën unfa a bi ta fii. Hën di tata hopo du soni u lei di womi mii fëën taa a wai taa a toona ko. Di tata an bi libi ku ën kuma hën da saafu fëën, ma a bi libi ku ën u lei ën taa hën da wan mii fëën di a lobi tee. Di tata bi hoi wan gaan piizii da di mii fëën u lei ën taa a lobi ën,  söseei taa a wai taa a toona ko. Boiti di dë, a bi da di womi mii fëën hansehanse soni u bisi tu.

9. Un fasi u musu abi fuu sa heepi dee baaa ku dee sisa dee an ta peleiki möön u de toona ko a Jehovah? (Luku di pisi „ Dee soni dee i sa du u heepi dee sëmbë dee kë toona ko a Jehovah”.)

⁹ Jehovah dë kuma di tata a di woto aki. A lobi dee baaa ku dee sisa fuu dee an ta peleiki möön, nöö a kë u de toona ko nëën. Ee u djeesi Jehovah a di fasi fa a ta du soni, nöö u sa heepi dee sëmbë aki u de toona ko baka. Fuu sa du di soni aki, nöö u musu abi pasensi, u musu abi tjalihati u sëmbë, söseei u musu abi lobi. Faandi mbei u musu lei taa u abi dee fasi aki, nöö unfa u sa du ën?

10. Faandi mbei u musu abi pasensi fuu sa heepi wan sëmbë faa toona ko a Jehovah?

¹⁰ U musu abi pasensi, u di a ta tei ten u wan sëmbë sa toona ko a Jehovah baka. Sömëni u dee baaa ku dee sisa dee an bi ta peleiki möön bi taki taa a bi dë u dee gaanwomi ku woto baaa ku sisa ko luku de sömëni pasi, ufö de bigi dini Jehovah baka. Wan sisa de kai Nancy, di ta dë a Asia, bi taki taa: „Di dë di mi ku wan sisa u di kemeente bi dë gaan mati bi heepi mi gaanfa seei. A bi lobi mi, nöö a bi ta si mi kuma hën gaan sisa. A bi ta mbei mi mëni unfa a bi ta suti te mi ku ën bi ta du soni makandi. A bi ta haika mi ku pasensi te mi bi ta konda dëën unfa mi ta fii, nöö an bi ta fëëë u da mi lai te a bi dë fanöudu tu. A bi lei taa a bi dë wan tuutuu mati u mi, di bi dë kabakaba u heepi solanga mi bi abi ën fanöudu.”

11. Faandi mbei u musu lei taa u ta fii ku wan sëmbë di lasi hati u di wan soni pasa di hati ën?

¹¹ Te i ta lei taa i abi tjalihati u wan sëmbë, nöö a ta dë kuma i ta buta wan deesi da wan kaskaasi fëën. Te u ta lei taa u abi tjalihati u wan sëmbë di hati fëën ta boonu, nöö u sa heepi ën faa fii  bunu. So u dee sëmbë dee an ta peleiki möön, ta dë sömëni jaa longi ku wan pen a de hati, u di wotowan a di kemeente bi du wan soni ku de di hati de. U dee soni aki mbei de an ta kë ko a Jehovah möön. So u dee sëmbë aki sa ta pakisei taa sëmbë an bi kuutu de a wan leti fasi. De ta abi wan sëmbë fanöudu di o haika de, söseei di o fusutan unfa de ta fii (Jak. 1:19). María, da wan sisa di an bi ta peleiki möön, söseei an bi nango a dee komakandi möön. A bi taki taa: „Mi bi kë u sëmbë haika mi, u de da mi taanga, u de da mi lai, söseei u de heepi mi.”

12. Faandi mbei u sa taki taa di lobi u Jehovah dë kuma wan tatai?

¹² Di Bëibel ta taki taa di fasi fa Jehovah lobi dee sëmbë fëën dë kuma wan tatai. Na un fasi di lobi u Gadu dë kuma wan tatai? Wë buta pakisei a di woto aki: Boo taa i ta dëdë a di ze, hën wan sëmbë di dë a wan boto dendu vinde wan vest da i nasö wan soni di sa hoi i a liba wata. Wë an dë u taki taa i bi o tei ën u bigi seei, u di di soni dë sa heepi i fii fika a liba wata. Ma wan soni di sa hoi i a liba wata an tjika. Di wata kötö, nöö ja o libi ee ja sa dou a di boto. Hën da i abi wan sëmbë fanöudu u vinde wan tatai da i, nöö a hai i tja ko a di boto. Jehovah bi taki u dee Isaëli sëmbë dee an bi ta dini ën möön taa: „Mi bi ta hai dee sëmbë u mi ku di tatai u lobi” (Hos. 11:4). Di wan seei fasi Jehovah ta fii da dee sëmbë dee an ta dini ën möön, di abi hia fuka ku bookohedi. A kë u dee lö sëmbë aki sabi taa a lobi de, söseei taa a kë u de ku ën ko dë mati baka. Wë Jehovah sa tei i fii lei dee sëmbë aki unfa a lobi de tjika.

13. Konda unfa soni ta waka te u ta lei taa u lobi dee baaa ku dee sisa fuu.

¹³ A dë fanöudu fuu lei dee sëmbë dee an ta peleiki möön, taa Jehovah lobi de, söseei taa u  lobi de tu. Wan baaa de kai Pablo, di u bi taki soni fëën a di woto di pasa, an bi ta peleiki möön söwan 30 jaa longi. Di baaa aki bi taki taa: „Wan daka, di mi bi kumutu a wosu, hën wan sisa di bi ko gaandi kaa, bi miti mi, hën a bi bigi fan ku mi. Di sisa aki bi abi suti fasi. Mi bi bigi këë kuma wan piki mii. Mi bi piki di sisa taa a bi djei kuma Jehovah bi mandëën faa ko fan ku mi. Di daka dë mi bi buta taa mi o toona ko a Jehovah.”

14. Andi di sikapuma bi du di a bi feni di sikapu di bi lasi, te u luku di woto di sikifi a Lukasi 15:4, 5?

¹⁴ Te u feni wan baaa nasö wan sisa di ko suwaki a di biibi, nöö u musu ta heepi ën go dou, söseei u musu dëën degihati go dou. A kan taa soni bi pasa di o ta toobi de u wan pisiten, leti kumafa soni bi dë da di womi mii u di woto di Jesosi bi konda. Söseei u di de bi dë a di goonliba u Saatan, mbei a sa dë taa de an bi dë mati u Jehovah möön. U musu heepi de u de ko abi wan taanga biibi baka. Di Jesosi bi da di woto u wan sikapu di bi lasi, hën a bi taki taa di sikapuma bi buta di sikapu fëën nëën ahömaun ta tja, nöö di sikapuma bi tjëën go ka dee woto sikapu dë. Di sikapuma aki bi lasi ten ku kaakiti kaa faa go suku di sikapu di bi lasi, ma tökuseei a sabi taa di sikapu o abi möön heepi fanöudu. A sabi taa di sikapu an taanga tjika faa waka go baka ka dee woto sikapu dë. Fëën mbei a ta hopo di sikapu tja.​—Lesi Lukasi 15:4, 5.

15. Unfa u sa heepi dee sëmbë dee ko suwaki a di biibi, ma dee kë bigi dini Jehovah baka? (Luku di pisi „ Wan gaan bunu wookolai”.)

¹⁵ Kandë woo abi hia ten ku kaakiti fanöudu fuu sa heepi wan sëmbë di ko suwaki a di biibi faa disa wan soni di ta mbei a taanga dëën faa bigi dini Jehovah baka. Ma u sa wooko ku di jeje u Jehovah, di Wöutu fëën, ku dee buku dee u ta feni a di ölganisaasi u Jehovah fuu heepi  dee sëmbë aki u de ko abi wan taanga biibi baka (Lom. 15:1). Unfa u sa du di soni aki? Wan baaa di dë gaanwomi wantu jaa kaa bi taki taa: „Te gaansë u dee baaa ku dee sisa di biibi u de bi ko suwaki, ta toona ko a Jehovah, nöö a ta dë fanöudu u wan sëmbë lei de soni u Bëibel.” * Fëën mbei te de hakisi i fii lei sö wan sëmbë soni u Bëibel, a bunu fii du ën ee i sa. Di gaanwomi aki bi taki tu taa: „Di peleikima di o lei di sëmbë soni u Bëibel, musu dë wan bunu mati u di sëmbë. Di sëmbë musu sa futoou ën, a musu sa konda unfa a ta fii dëën.”

16. Unfa u du sabi taa dee ëngëli o heepi u?

¹⁶ Sömëni woto dë di ta lei taa dee ëngëli ta wooko makandi ku u fuu sa feni dee baaa ku dee sisa dee ko suwaki a di biibi, ma dee kë bigi dini Jehovah baka (Ako. 14:6). Wan baaa de kai Silvio u di köndë Ekwadölu bi ko suwaki a di biibi, nöö a bi begi Jehovah taangataanga faa manda wan sëmbë ko nëën di sa heepi ën faa toona ko a di kemeente. Di a bi ta begi, hën a jei döö fëën naki. Di a go luku, hën a si tu gaanwomi ko luku ën. Di wan seei daka dë dee gaanwomi bi bigi heepi di baaa aki faa toona ko a Jehovah.

17. Unfa woo fii te u ta heepi dee sëmbë dee ko suwaki a di biibi?

¹⁷ Woo dë waiwai seei te u heepi wan sëmbë di bi ko suwaki a di biibi faa toona ko a Jehovah. Luku andi wan baaa de kai Salvador, di ta du di apaiti pioniliwooko, söseei di ta buta pakisei a dee sëmbë dee ko suwaki a di biibi, bi taki. A bi taki taa: „Te mi ta pakisei unfa dee sëmbë dee bi ko suwaki a di biibi bi toona ko a Jehovah, nöö mi ta wai gaanfa seei. Mi ta wai seei u di mi bi sa wooko makandi ku Jehovah u heepi wan u dee dinima fëën faa kumutu a di goonliba u Saatan, söseei faa toona ko a di kemeente.”​—Tjab. 20:35.

18. Fuun soni i sa dë seiki, ee i da wan sëmbë di ko suwaki a di biibi?

¹⁸ I da wan sëmbë di ko suwaki a di biibi ö? Wë ee sö a dë, tökuseei i sa dë seiki taa Jehovah lobi i jeti. A kë fii toona ko nëën. Ma a o dë fii mbei möiti fii toona ko nëën. Jehovah dë leti kuma di tata u di woto di Jesosi bi konda. Jehovah ta wakiti i fii toona ko nëën, nöö a o toona tei i ku wai seei a di wosu fëën.