1. Yehova ali waiunvua siani musita mubombi wakiba wazeezele lwali watendeka kabili kumubombela?

NGA VITWAKIMONA mu lyasi lyakipita, Yehova ali waipalania ni musuungi aweeme ali waemena buino mikooko yakue. Kabili ali wakeba kila mukooko azeezele. Yehova waabalandile eevi Baisraeli baali bamusiile: “Buelele kuli neene, ni neene nakaba kubuelela kuli mwemue.” Ni loonu, tumanine nangue ali waiunvua enka evio, paantu alandile eevi: “Neene nsiizi kwaluluka.” (Mal. 3:6, 7) Yesu waalandile nangue, Yehova ni bamalaika bali baunvua nsaansa ikata musita mubombi Wakue umo wakiba wazeezele lwali wabuela kuli Weene.​—Luk. 15:10, 32.

2. Tuli kumona ki mu leeli lyasi?

² Loonu, tumone byakumuenako bitatu byaalandile Yesu bili byatusambilizia vyakukwasia baalia baamusiile Yehova. Tuli kumona mibeele kampanda itupalile kuya twali nayo, eevi tukwasie mikooko izeezele ibuele kuli weene. Kabili tuli kumona juu ya ki tupalile kwikwinda eevi kubakwasia baalia basiizi kubomba babuele kuli weene.

3-4. Juu ya ki mwanakazi aziimbuilue mu Luka 15:8-10 wakeba wapoozeleko saana maano drakma yakue izeezele?

³ Tupalile kukita maka eevi kubakeba baalia batonene kubuela kuli Yehova. Mu kipalo kili mu Nsimiko yakue Luka, Yesu waalondoluele mwanakazi umo vyakebele kintu kampanda kya mana kibanga kyazeezele​—lufalanga lwa kingolongolo lwa drakma. Mu ozo mufuano, tuli kupooza maano ku nkebelo.​—Soma Luka 15:8-10.

⁴ Yesu walondolola vyaunvua mwanakazi musita lwapata lufalanga lwa mana lwa kingolongolo lwa drakma lwakiba lwazeezele. Mu nsiku yakue Yesu, musita mukaziana lwaali waupua, mama wakue waali wamupeela kafunda ka nfalanga likumi (10) ya bingolongolo bya drakma. Paange keekio kingolongolo kyabanga wakeba, kibanga kyafumine mu kafunda ka evio. Mwanakazi wainika nangue kingolongolo kyaponene pansi. Pakaako, waleemia  katendeele ni kukeba pa mbali yakue, inzi waandua kupata. Paange katendeele kakue te kali mukufumia lubuto lukata eevi kumukwasia apate kingolongolo kyakue kiniini kya libue lya nfalanga. Kupuako, wapianga nsesi yonse wapoozeleko saana maano. Mu lufunko lwakolonghania, wamonamo drakma yakue ya mutengo, yali mukubeeka na lubuto lwa katendeele. Emue, ezio nsaansa yaunvua ozo mwanakazi! Wabakuuta beenakue ni bekazi nakue eevi ababuile ezio mpunda iweeme.

5. Juu ya ki kunti kyakola kupata baalia baalekeele kubomba pamo ni kilonghaano?

⁵ Nga vitwamona mu kipalo kyakue Yesu, iloombele kukita maka saana eevi kupata kintu kampanda kizeezele. Enka evio, tupalile kukita maka eevi kupata baalia baalekeele kulonghaana ni kusimikila. Paange ntangia lubaalekeele kubomba pamo ni fwefue, te pasyapitile miaka ingi. Paange baakukiile kale ku nkeende kubasimaninue na balupua ba kooko. Inzi kufikiila leenu, kakiine bamo pakati kabo, batonene kumubuelela Yehova. Batonene kumubombela Yehova pamo ni lupua lwabo lwa bapupi bakisinka, inzi iloombele tubakwasie.

6. Bantu bonse mu kilonghaano kunti bakwasia siani kukeba baalia baalekeele kubomba?

⁶ Ni baani bapalile kukwasia kukeba baalia baalekeele kubomba pamo ni kilonghaano? Fwe bonse​—bakote ba kilonghaano, bapainia, bantu ba mu lupua lwabo lwa kimubili ni bakasimika mu kilonghaano​—kunti twakwasia. Ati, uli ni kibuza ao muntu wa mulupua lobe waalukile asiizi kubomba? Eba, wakisaakaana kale na umo mu miilo ya kusimikila nsesi kwa nsesi ao kwa pa bantu bengi? Mubuile ozo muntu nangue kine watona akabe kwendelua, uli kusekelela kubapeela bakote ba mu kilonghaano kyobe nimero yakue ya telefone, ao kubalangilila kwali waikala.

7. Wasambilila ki kupitila milandu yakue mukote umo wa mu kilonghaano ali wakuutua Thomas?

⁷ Bakote i bali ni miilo ikilile ya kukeba baalia batonene kumubuelela Yehova. Inzi, kunti babakeba siani? Mona vyaalandile mukote umo ali wakuutua Thomas, * ali waikala mu kyalo kya Uhispania. Waakwasiizie kale Bakasininkizia bakilile pa 40 kubuela mu kilonghaano. Thomas walanda eevi: “Kya mambo, ndi naipuzia balupua ni bankazi paleepale kine bamanine ku nkeende kuli kwaikala baalia basiizi kabili kubomba. Ao ndi naipuzia bakasimika kine balangulukileko ni muntu kampanda asiizi kabili kulonghaana. Bengi mu kilonghaano, bali baunvua buino kukwasia paantu bali bamona nangue ni beene babiikua mu miilo ya kukeba. Kupuako, musita undi naendela balupua ni bankazi basiizi kubomba, ndi nabeepuzia palua aali ya baana babo ni ya bantu bange ba mu lupua lwabo. Bamo pakati kabo babanga baiza ni baana baabo ku kulonghaana, ni paange babo baana babanga bakasimika mu musita kampanda. Ni beene kunti bakwasiiwa eevi bamubuelele Yehova.”

8. Mu mufuano wa muana azeezele, ulondolwelue mu Luka 15:17-24, baba waamukitiile siani muana wakue waalapiile?

⁸ Ni mibeele ki itupalile kuya twali nayo kine tukebele kukwasia baalia batonene kumubuelela Yehova? Mona masomo kampanda atuli kuviinda kusambilila kupitila mufuano wakue Yesu wa muana waafumine ku nsesi. (Soma Luka 15:17-24.) Yesu walondolola ozo muana vyaafikiile kwinika nangue waakitile kilubo kikata ni kupingula kubuela kwabo. Baba wakue wakundukile lubilo eevi kumupokelela muana wakue ni kumukumbatila buino. Waakitile evio, eevi kumusininkiziizia muana wakue nangue amutonene. Kampingu kakue ozo muana kamwemiizie saana kabili waaimwene nangue tapalile kukuutua kabili muana wakue. Muana waamubuilile byonse byaali waaiunvuile, ni baba wakue waamunvuiliile nkumbu. Baba waakitile bintu  kampanda eevi kumusininkiziizia muana wakue nangue etabiilue kubuela mu nsesi apana nga muntu ezilesie kukubombela, inzi nga muana wakue watonene. Eevi kulangilila nangue waali wamutonene muana wakue kabili nangue waamupokeleele, ozo baba waateaniizie maliila kabili waamupeele ngubo iweeme, muana wakue waalapiile.

9. Ni mibeele ki itupalile kuya twali nayo kine tutonene kukwasia baalia basiizi kubomba kabili bamubuelele Yehova? (Mona kisanduku “ Vya Kukwasia Baalia Batonene Kubuela.”)

⁹ Mu ozo mufuano, Yehova ali nga ozo baba. Abatonene balupua ni bankazi betu basiizi kubomba, kabili atonene babuelele kuli weene. Kine twamupala Yehova kunti twabakwasia babuele. Eevi tuviinde kukita evio, tupalile kupembelela, kulangilila nkumbu ni ntono. Juu ya ki tupalile kulangilila ezio mibeele, kabili kunti twailangilila siani?

10. Kupembelela kuli kwakwasia siani kine tukebele kumukwasia muntu atuuke kimupasi?

¹⁰ Tupalile kuya twasipikiziizie paantu eevi muntu atuuke kimupasi, ili yatwama musita. Bengi babanga balekeele kubomba, balanda nangue baatendekele kabili kumubombela Yehova kisia kwendelua lingi na bakote ni bangeko mu kilonghaano. Nancy, nkazi umo wa mu kyalo kya Asia, waleemba eevi: “Kibuza umo wa peepi mu kilonghaano waankwasiizie kakiine. Waandangiliile ntono kakiine nga evelia nkazi wane mukulu. Waandangulusiizie nsita iweeme itwali twapisia pamo. Waali wantuilizia wasipikiziizie musita unaali namubuila vinaali naiunvuile, kabili taali watiina kumpeela musoko. Waalangiliile kakiine nangue ni kibuza wakisinka kabili waali waiteaniiziesie kunkwasia nsita yonse.”

11. Juu ya ki tukabiile kuya twali ni nkumbu eevi tuviinde kukwasia muntu afiitilue?

¹¹ Nga evelia mafuta ali asubua pa kilonda,  nkumbu kunti yakwasia muntu atiokele mutima. Bantu bange basiizi kubomba, baaluviiziwe na kasimika kampanda mu kilonghaano miaka ingi yapitile, mpaka loonu bakisielesie bakisikile ni kufiitua. Kwiunvua evio, kuli kwapuisia nkulu yabo ya kukeba kubuelela kuli Yehova. Bange kunti baya batontonkania nangue baakitiilue bila nsaambu. Kunti baya bakabiile muntu wa kubatuilizia ni kwinika vibali mukwiunvua. (Yak. 1:19) María, nkazi asibanga wabomba kabili mu musita kampanda, walanda eevi: “Naali nakebele muntu ali kuya wantuiliziizie buino, wa kunti ankoselezie, kabili wa kunti antungulule.”

12. Ntono yakue Yehova ipaleene siani ni lukamba? Leeta mufuano.

¹² Bibilia ipalaniizie ntono yakue Yehova ni lukamba. Ntono yakue Yehova ipaleene siani ni lukamba? Tontonkania keeki kipalo: Tulande nangue kwasyala utotobele mu menda a mu lyezi, ni muntu kampanda wakupoozela kintu kya kuvwala kili kukukwasia te kuti wibile. Kakiine uli kutasia palua bobo bukwasi paantu keekio kintu kili kukukwasia usyale waeleela pa menda. Inzi te keekio sie bunke kili kuviinda kusuunga bukose bobe. Menda ali kasama ni mabimbi akata ali mukuiza, kabili kine te umwene buato bwakubutukilamo, bukose bobe kunti bwaaluka mu buavia. Iloombele muntu kampanda akupoozele lukamba kisia akukulile mu buato. Yehova waalandile eevi palua Baisraeli baamusiile: “Naatwaliliile kubakula na nkamba ya ntono.” (Hos. 11:4) Ni leenu, Leeza ali waiunvua enka evio palua baalia baalekeele kumubombela ni kwibila mu maavia ni kwema. Akebele bamane nangue abatonene kabili atonene kubakulila kuli weene. Ni Yehova kunti wakubombia eevi kubakwasia beyunvue nangue abatonene.

13. Mufuano wakue Pablo walangilila siani nangue ntono yeetu kunti yabakwasia bantu bange babuelele kuli Yehova?

 ¹³ Ni kintu kya mana kubasininkiziizia baalia basiizi kubomba nangue, Yehova abatonene kabili nangue ni fwefue tubatonene. Pablo, olia wakizimbulua mu lyasi lyakipita, waakitile miaka 30 walekeele kumubombela Yehova. Walanda eevi: “Busiku bumo lukele-keele, lunaali nafuma ku nsesi, nkazi umo aweeme, wa kikulu waansaangile ni kulanda ni neene mu nzila ya ntono. Naatendekele kulila nga mwanike. Naamuanine nangue, kyamoneka Yehova i wakutumanga eevi wize ulande ni neene. Ozo i musita unapinguile kumubuelela Yehova.”

14. Kukoonkana ni mufuano uli mu Luka 15:4, 5, musuungi wakita siani kisia kupata mukooko wakiba wazeezele?

¹⁴ Baalia basiizi kubomba bakabiile tutwalilile kubakwasia. Kunti baya batiokele saana mutima nga olia muana wa mu olia mufuano waleetele Yesu. Kabili, paange te bakili peepi ni Yehova juu ya bintu bibakisaakaana nabio mu kyalo kyakue Sataana. Tupalile kubakwasia bakosie kabili kiketekelo kyabo muli Yehova. Mu kipalo kya mukooko azeezele, Yesu walondolola musuungi vyamutwama mukooko pa nkombe ni kumubuezia pa libumba lya mikooko inge. Musuungi wapisia kale nsita ingi wali mukukeba ozo mukooko azeezele. Inzi, wainika nangue apalile kumutwama ozo mukooko ni kumubuezia pa libumba lya mikooko inge paantu ozo mukooko tali na maka a kubuela mwine.​—Soma Luka 15:4, 5.

15. Kunti twaviinda siani kukwasia baalia batopele batonene kumubuelela Yehova? (Mona kisanduku “ Kiombo kya Mana.”)

¹⁵ Kunti kyaloomba musita ni maka eevi kukwasia bantu bange basiizi kubomba baviinde kwanzia butope bwabo. Inzi kupitila mupasi wakue Yehova, Mulandu wakue ni mpapulo ili yafumiiwa na kuteania kwakue, kunti twabakwasia  bakose kabili kimupasi. (Bar. 15:1) Kunti twakita siani evio? Mukote umo wa kilonghaano ali ni kibeelezio walanda eevi: “Bengi basiizi kubomba kabili, bakabiile kusambiliziiwa Bibilia kisia beene kupingula kumubuelela Yehova.” * Kansi, kine mukote wakulanda utendeke kusambilila na muntu waalekeele kubomba, upalile kwitabila wasaansamukile. Ozo mukote walanda kabili eevi: “Kasimika wa kutungulula leelio lisambililo lya Bibilia, apalile kuya waali kibuza aweeme, ali kuviinda kuswapilua na muntu asiizi kubomba kabili.”

16. Twamana siani nangue kunti twaswapila bamalaika batukwasie?

¹⁶ Bintu bingi byamwenue, bilangiliile nangue bamalaika bali babomba pamo ni fwefue eevi kutukwasia tupate baalia basiizi kubomba batonene kumubuelela Yehova. (Nfy. 14:6) Kyakumuenako, Silvio, lupua wa mu kyalo kya Équateur, waamuloombele Yehova atume muntu eze amukwasie kubuela mu kilonghaano. Musita lwaali wakilisie mukupepa, nkengele ya ku muliango wakue yaalilile. Bakote babili baali baimeene pa muliango. Mu ozo musita ubamwendeele, baali ni nsaansa ya kutendeka kumukwasia nga vyaali wakabiile.

17. Tuli twaiunvua siani kine twaviinda kukwasia baalia batopele kimupasi?

¹⁷ Tuli twaunvua saana nsaansa musita utuli twakwasia baalia batopele kimupasi bamubuelele Yehova. Mona vyalanda painia umo ali wapooza maano saana ku baalia basiizi kubomba: “Musita unge ndi naunvua nsaansa ikata ni kukolosia mensozi. Ndinaunvua buino saana kumana nangue, Yehova wapususia mukooko wakue umo watonene afume mu kyalo kyakue Sataana, kabili nangue nakiba ni lisyuko lya kubomba pamo ni Weene mu miilo yakue.”​—Miil Bat. 20:35.

18. Kine ni weewe ulekeele kumubombela Yehova, upalile kuya wamanine ki?

¹⁸ Kine ni weewe ulekeele kubomba pamo ni bantu bakue Yehova, mana nangue Yehova akikutonenesie. Atonene ubuele kuli weene. Upalile kukita maka eevi umubuelele. Nga olia baba wa mu mufuano wakue Yesu, Yehova akupembeleele umubuelele, kabili wakaba kukupokelela ni nsaansa.