SAWO DIA WEKELO 26
“Nyokalole le mi”
“Nyokalole le mi, ko dimi layokalola le nyu.”—MAL. 3:7.
OSAMBO 102 ‘Tokimanyiya wanɛ wele wɛɔdu’
AWUI WAYƆTƐKƐTAMA *
1. Ngande wayaoka Jehowa etena kakalola ɔkɔkɔ ande ɔmɔtshi wakashishɔ?
OKO wakatasɛdingola lo sawo dietshi, Jehowa ndjaɛdikaka la olami w’ɔlɔlɔ w’ɛkɔkɔ wayakiyanya la ngandji tshɛ dikambo di’ɔkɔkɔ ande tshɛ. Ndo nde nyangaka ɔkɔkɔ tshɛ wamboshishɔ. Jehowa akatɛ ase Isariyɛlɛ wakayanganya la nde ɔnɛ: “Nyokalole le mi, ko dimi layokalola le nyu.” Sho mbeyaka dia nde ekɔ lo ntetemala ndjaoka woho akɔ waamɛ, nɛ dia nde mbutaka ɔnɛ: “Dimi haatshikitana.” (Mal. 3:6, 7) Yeso akate dia Jehowa ndo andjelo mongaka l’ɔngɛnɔngɛnɔ etena kakalola kaanga okambi Ande ɔtɔi wakashishɔ le Nde.—Luka 15:10, 32.
2. Kakɔna kayangaso nsɛdingola lo sawo nɛ?
2 Nyɛsɔ tɔsɛdingole wɛɛla esato wa Yeso waka epole ɔsɛkɛ l’ohomba wa nkimanyiya wanɛ wakayanganya la Jehowa. Tayɔsɛdingola waonga amɔtshi shikaa weso l’ohomba dia nkimanyiya ɛkɔkɔ wakashishɔ dia nkalola le nde. Ndo tayɔsɛdingola nto lande na kele ekɔ ohomba mbidja welo dia nsukɛ wanɛ wambɔla lo nyuma.
NYANGA OKENGA WAKASHISHƆ
3-4. Lande na kakayange la yambalo tshɛ womoto lɔtɛkɛtshiwɔ lo Luka 15:8-10 okenga ande wa drakimɛ wakashishɔ?
3 Sho pombaka mbidja welo dia ntana wanɛ walanga nkalola le Jehowa. Lo wɛɛla ɔmɔtshi wele lo Evanjiliɔ wa Luka, Yeso akalembetshiya woho wakayange womoto ɔmɔtshi ɛngɔ kɛmɔtshi ka nɛmɔ kakashishɔ, mbuta ate okenga wa drakimɛ. Wɛɛla ɔnɛ kotolaka yambalo yaso lo oyangelo wakasalema.—Adia Luka 15:8-10.
4 Yeso akalembetshiya woho wakayaoke womoto ɔsɔ etena kakandɛnyi okenga wa drakimɛ wa nɛmɔ wakashishɔ. Lo nshi ya Yeso, ondo ambutshi amɔtshi wa wamato w’ase Juda wakashaka ɔna womoto ekenga dikumi wa drakimɛ lushi la diwala diande. Ondo okenga wakashishɔ ɔsɔ waki l’atei w’ekenga dikumi ɛsɔ. Womoto ɔsɔ aki l’eshikikelo ɔnɛ okenga ɔsɔ wakakɔ l’odihe. Diakɔ diele, nde akahɛtsha tala ndo akayange, koko nde kɔmɛna ndooko ɛngɔ. Ondo tala diande di’esɔ kɔpɛtaka dimɛna dia nde mɛna okenga wa tshitshɛ ɔsɔ wa mfɛsa. L’ekomelo, la yambalo tshɛ nde akɔmbɛ luudu l’otondo. Nde akɔmbɛ mindo, ko lo ditshu nde akɛnyi okenga ande wa drakimɛ wa nɛmɔ angayima l’osase wa tala. Ɔsɔ aki dui di’ɔngɛnɔngɛnɔ efula! Nde akelɛ angɛnyi ndo asukanyi ande dia ndjowatɛ losango l’ɔngɛnɔngɛnɔ lɔsɔ.
5. Lande na kakokadiɔ monga wolo dia mbeya lɛnɛ ele wanɛ wakayanganya l’etshumanelo?
5 Oko wɛnyiso lo wɛɛla wa Yeso, nɔmbamaka dia mbidja welo dia mbishola ɛngɔ kɛmɔtshi kakashishɔ. Woho akɔ waamɛ mbele, sho pombaka mbidja welo dia mbeya lɛnɛ ele wanɛ wakayanganya l’etshumanelo. Mbeyaka monga ko ɛnɔnyi efula wambeta wahawayosangana kaamɛ la so. Vɔ koka kaanga ntshɔ lo dihole dikina lɛnɛ ele anangɛso wa lɛkɔ hawowaeye. Koko aha la taamu, anto amɔtshi l’atei wa wanɛ wambɔla lo nyuma nangaka nkalola le Jehowa. Vɔ nangaka kambɛ Jehowa kaamɛ la nkumbo k’atɛmɔdi wa mɛtɛ, koko vɔ wekɔ l’ohomba w’ekimanyielo kaso.
6. Waa na wakoka mbisha lonya dia nyanga wanɛ wambɔla lo nyuma?
6 Waa na wakoka mbisha lonya dia nyanga wanɛ wambɔla lo nyuma? Sho tshɛ, dikumanyi, ambatshi mboka, ase nkumbo ndo apandjudi wa l’etshumanelo, koka mbisha lonya dia mbayanga. Onde wɛ ekɔ l’ɔngɛnyi kana owotɔ wambɔla lo nyuma? Onde wɛ ambohomanaka l’onto ɔmɔtshi lambɔla lo nyuma l’esambishelo ka luudu la luudu kana l’esambishelo ka lo sɛkɛ? Naka onto ɔsɔ nangaka kosha adrɛsɛ kana numɛlɔ kande ka telefɔnɛ dia wɛ tosha dikumanyi dia l’etshumanelo kanyu, wɛ kokaka mbɔsa dia towasha.
7. Wetshelo akɔna wakondjayɛ oma lo kɛnɛ kakate ekumanyi kɛmɔtshi kelɛwɔ Thomas?
7 Naa wanya wakoka dikumanyi ntakola lo yoho ya laande dia mbishola wanɛ walanga nkalola le Jehowa? Tɔsɛdingole kɛnɛ kakate ekumanyi kɛmɔtshi kelɛwɔ Thomas, * kadjasɛ l’Espagne. Nde ambokimanyiya Ɛmɛnyi wa Jehowa ndekana 40 dia nkalola l’etshumanelo. Thomas mbutaka ate: “Dimi mimbolaka anangɛso l’akadiyɛso wotshikitanyi dia kana vɔ mbeyaka lɛnɛ adjasɛ anto wambɔla lo nyuma nshi nyɛ. Kana dimi mimbolaka apandjudi dia kana vɔ mbohɔka onto ɔmɔtshi lahayɔtɔ lo nsanganya. Anto efula wa l’etshumanelo kadimolaka la waangasanu nɛ dia vɔ lawɔ ndjaokaka dia wekɔ lo mbisha lonya l’oyangelo ɔsɔ. L’ɔkɔngɔ diko, etena kembolami anangɛso l’akadiyɛso wambɔla asɔ, dimi mbambolaka anawɔ ndo ewotɔ awɔ ekina. Anto amɔtshi wambɔla lo nyuma wakayaka l’anawɔ lo nsanganya, ndo ondo ana asɔ waki apandjudi l’etena kɛmɔtshi. Vɔ lawɔ koka kimanyiyama dia nkalola le Jehowa.”
TOKALOYA ANA W’APAMI LA WA WAMATO WA JEHOWA WAKASHISHƆ OYA L’ETSHUMANELO
8. Lo wɛɛla w’ɔna lakashishɔ wele lo Luka 15:17-24, kakɔna kakasalɛ papa ɔnande lakashishɔ lakayatshumoya?
8 Waonga akɔna wahombaso monga la wɔ dia nkimanyiya wanɛ walanga nkalola le Jehowa? Tende wetshelo wakokaso nkondja oma lo wɛɛla wa Yeso w’ɔna lakamɔ oma la ngelo. (Adia Luka 15:17-24.) Yeso akalembetshiya woho wakayoyatshumoya ɔna ndo wakandɔshi yɛdikɔ ya nkalola la ngelo. Papa akalawɔ dia tohomana l’ɔnande ndo akookumbatɛ dia mbɛnya ngandji. Nkum’otema k’ɔna ɔsɔ kakookiyanyaka ndo nde konanga mbelamɛ ɔna nto. Ɔna ɔsɔ akakɛnɛmɔla nsaki yande ndo she akawoke kandji. Oma laasɔ, she akatakola wanya amɔtshi shikaa dia nshikikɛ ɔnande dia nde ambolongɔma la ngelo, aha oko ose olimu, koko oko ose nkumbo lokama ngandji. Dia mɛnya dui sɔ, she akakongɛ fɛtɛ ndo akasha ɔnande lakayatshumoya ahɔndɔ w’amɛna.
9. Waonga akɔna wahombaso monga la wɔ dia nkimanyiya anto wambɔla lo nyuma dia nkalola le Jehowa? (Enda kiombo yele l’ɔtɛ a dui ɔnɛ: “ Woho wa nkimanyiya wanɛ walanga nkalola le Jehowa.”)
9 Jehowa ekɔ oko papa kele lo wɛɛla ɔnɛ. Nde mbokaka anangɛso l’akadiyɛso wambɔla lo nyuma ngandji ndo nde nangaka dia vɔ nkalola le nde. Lo mbokoya Jehowa, sho koka mbakimanyiya dia nkalola le nde. Dui sɔ tɔlɔmbaka dia sho monga la solo dia lotutsha, kɛtshi ndo ngandji. Lande na kahombaso nkɛnɛmɔla waonga asɔ, ndo ngande wakokaso nsala dui sɔ?
10. Lande na kahombaso monga la solo dia lotutsha dia nkimanyiya onto ɔmɔtshi dia ndjasukanya nto la Jehowa?
10 Ekɔ ohomba sho monga la solo dia lotutsha, nɛ dia mbɔsaka etena k’otale di’onto nkɔnɔ lo nyuma. Anto efula wakɔlɛ lo nyuma mbutaka dia vɔ wakayokalola l’ɔkɔngɔ wa dikumanyi l’ase etshumanelo akina mbaembola mbala la mbala. Kadiyɛso kɛmɔtshi kelɛwɔ Nancy, kadjasɛ lo sidɛ ɛstɛ ka Aziya, akafunde ate: “Ɔngɛnyi ɔmɔtshi wa ma ma wa l’etshumanelo akakimanyiya efula. Nde akambokaka ngandji oko enondo ande la womoto. Nde akambohola tena di’amɛna diakatetsha kaamɛ lo nshi yakete. Nde akapokamɛka la solo dia lotutsha tshɛ ndo nde komengengaka dia mbishami alako. Nde aki ɔngɛnyi w’oshika ndo akongaka etena tshɛ suke dia kimanyiyami.”
11. Lande na kahombaso monga la kɛtshi dia nkimanyiya onto ɔmɔtshi lele la lonyangu?
11 Etena kele onto ɔmɔtshi la lonyangu, lɔ koka mbosha kandji oko mpota; kɛtshi kekɔ oko okanga wa dimɛna wakoka nkimanyiya onto dia ndjaoka dimɛna. Mbeyaka monga ko anto amɔtshi wambɔla lo nyuma wekɔ lo diɛnɛ la lonyangu l’ɔtɛ wakasalɛ ase etshumanelo amɔtshi kɔlɔ. L’ɔtɛ wa dui sɔ, vɔ hawokombola nkalola le Jehowa. Amɔtshi koka mfɔnya ɔnɛ wakaasalɛ akambo aha la losembwe. Vɔ koka monga l’ohomba w’onto ɔmɔtshi layowahokamɛ ndo layoshihodia tokanyi tawɔ. (Jak. 1:19) María, lakɔlɛ lo nyuma l’etena kɛmɔtshi mbutaka ate: “Laki l’ohomba w’onto lapokamɛ, lasamba, lambisha alako w’amɛna ndo lakimanyiya.”
12. Sha ɛnyɛlɔ kɛnya woho wele ngandji ka Jehowa kotolaka anto wambɔla lo nyuma dia nkalola l’atei w’ekambi ande.
12 Bible mbutaka dia ngandji koka Jehowa ekambi ande kekɔ oko oshinga kana ɔkɔdi. Lo woho akɔna wele ngandji ka Nzambi oko ɔkɔdi? Tɔsɛdingole ɛnyɛlɔ kɛnɛ: Tɔshi dia wɛ ambotambɛ lo ndjale ko onto ɔmɔtshi ambokokɛ djakɛtɛ ya ndjashimbɛ l’ashi. Lo mɛtɛ wɛ ayɔngɛnangɛna ekimanyielo kɛsɔ nɛ dia kɛsɔ ayokokimanyiya diaha wɛ dinda. Koko aha monga la djakɛtɛ tsho mbayokokimanyiya dia wɛ ntetemala nsɛna. Ashi wekɔ tshitshi, ndo wɛ hoka naka wɛ hɔtwɛ lo waato washimbɛwɔ anto. Wɛ ayonga l’ohomba w’onto ɔmɔtshi kookɛ ɔkɔdi ko kokotola oya lo waato washimbɛwɔ anto. Jehowa akate lo dikambo di’ase Isariyɛlɛ wakayanganya la nde ɔnɛ: “[Lak]atetemala mbakotola, la eshinga wa ngandji.” (Hɔs. 11:4) Nzambi ndjaokaka woho akɔ waamɛ ɛlɔ kɛnɛ lo dikambo di’anto wakatshike mbokambɛ ndo wadiɛnɛ l’ekakatanu ndo l’ekiyanu. Nde nangaka dia vɔ mbeya ɔnɛ nde mbaokaka ngandji ndo nangaka mbakotola oya le nde. Ndo Jehowa kokaka nkamba la yɛ dia nkɛnɛmɔla ngandji kande otsha le wɔ.
13. Kɔndɔla kɛnɛ kakakomɛ ɔnangɛso ɔmɔtshi kɛnya wolo wele la ngandji k’onto l’ɔnango.
13 Ekɔ ohomba nshikikɛ wanɛ wambola lo nyuma ɔnɛ Jehowa mbaokaka ngandji ndo sho lawɔ mbaokaka ngandji. Pablo, lakatatɛkɛtshi lo sawo dietshi, akɔlɛ lo nyuma ɛnɔnyi ndekana 30. Nde mbutaka ate: “La pindju kɛmɔtshi etena kakamayamɔka oma la ngelo, lakahomana la kadiyɛso kɛmɔtshi k’opalanga k’ɔlɔlɔ ndo nde akasawola la mi la ngandji tshɛ. Lakatatɛ ndela oko ɔna dikɛnda. Lakawotɛ dia akɛnama dia Jehowa mbakotome dia ndjosawola la mi. L’etena kɛsɔ mbakamɔshi yɛdikɔ ya nkalola le Jehowa.”
TOSUKE LA NGANDJI TSHƐ WANƐ WELE WƆDU
14. Lo ndjela wɛɛla wele lo Luka 15:4, 5, kakɔna kakasale olami w’ɛkɔkɔ etena kakandashola ɔkɔkɔ wakashishɔ?
14 Ekɔ ohomba sho sukɛka anto wambɔla lo nyuma mbala la mbala. L’ɛnyɛlɔ k’ɔna lakashishɔ la lo wɛɛla wa Yeso, vɔ koka monga la kandji lo tokanyi kayotshikala edja efula. Ndo ondo vɔ wekɔ wɔdu lo nyuma l’ɔtɛ w’awui waakomɛ l’andja ɔnɛ wa Satana. Sho pombaka mbakimanyiya dia vɔ nyomonga la mbetawɔ le Jehowa. Lo wɛɛla w’ɔkɔkɔ wakashishɔ, Yeso akɛnya woho wakɛmbɛ olami w’ɛkɔkɔ ɔkɔkɔ ande l’ahɛka ndo wakandokaloya lo lokoto. Olami w’ɛkɔkɔ aketsha wenya efula ndo akadje welo dia mbishola ɔkɔkɔ wakashishɔ. Nde akashihodia dia aki ohomba mbɛmba ndo mbokaloya lo lokoto, nɛ dia vɔ komonga la wolo wa nkalola vɔamɛ.—Adia Luka 15:4, 5.
15. Ngande wakokaso nkimanyiya anto wele wɔdu walanga nkalola le Jehowa? (Enda kiombo yele l’ɔtɛ a dui ɔnɛ: “ Ehomɔ k’ohomba efula.”)
15 Mbeyaka monga ohomba dia sho nkamba la wenya ndo la wolo aso dia nkimanyiya anto amɔtshi wakɔlɛ lo nyuma dia nkandola okakatanu wawadjɛ wekamu dia nkalola le Jehowa. L’ekimanyielo ka nyuma ka Jehowa, Ɔtɛkɛta ande ndo ekanda watondja okongamelo ande, sho koka mbakimanyiya dia nyomonga la lonyuma la wolo. (Rɔmɔ 15:1) Ngande wakokaso nsala dui sɔ? Ekumanyi kɛmɔtshi kele la diewo mbutaka ɔnɛ: “Anto efula wambɔla lo nyuma mongaka l’ohomba wa mbeka Bible l’ɔkɔngɔ wa vɔ mbɔsa yɛdikɔ ya nkalola le Jehowa.” * Diakɔ diele naka wambokɔlɔmba dia mbeka l’onto lambɔla lo nyuma, lande na kahayangɛnangɛna diɛsɛ sɔ? Ekumanyi kakɔ akate nto ate: “Opandjudi walɔmbɔla wekelo wa ngasɔ pombaka monga ɔngɛnyi wa dimɛna, onto lakoka ɔnɛ lambɔla lo nyuma mbɛkɛ otema.”
ƆNGƐNƆNGƐNƆ MONGAKA L’OLONGO NDO LA NKƐTƐ
16. Ngande weyaso ɔnɛ sho koka ndjaɛkɛ l’osukɔ w’oma l’olongo?
16 Awui efula wakakomɛ anto mɛnyaka dia andjelo wekɔ lo nkamba kaamɛ la so dia tokimanyiya dia mbishola wanɛ wambɔla lo nyuma walanga nkalola le Jehowa. (Ɛny. 14:6) Ɛnyɛlɔ, Silvio, lodjashi l’Équateur akalɔmbɛ l’otema ɔtɔi dia nkondja ekimanyielo dia nkalola l’etshumanelo. Etena kakandalɔmbaka, ngunga ka lo soko diande kakadama. Dikumanyi pende diaki lo soko diande. Etena kakawawembolaka, vɔ waki l’ɔngɛnɔngɛnɔ dia ntatɛ mbosha ekimanyielo kakinde l’ohomba.
17. Wahɔ akɔna wakondjaso lo nkimanyiya wanɛ wele wɔdu lo nyuma?
17 Tayonga l’ɔngɛnɔngɛnɔ efula dia nkimanyiya wanɛ wele wɔdu lo nyuma dia nkalola le Jehowa. Tende kɛnɛ kata Salvador, lele ombatshi mboka ladja welo wa laande dia nkimanyiya wanɛ wambɔla lo nyuma, nde mbutaka ate: “Lo tena dimɔtshi, dimi kɛdiaka asɔyi w’ɔngɛnɔngɛnɔ. Mbishakami ɔngɛnɔngɛnɔ w’efula dia mɛna dia Jehowa ambohandola ɔkɔkɔ ande ɔmɔtshi oma l’andja ɔnɛ wa Satana ndo Io woho wemi la diɛsɛ dia nkamba kaamɛ la nde olimu ɔsɔ.”—Ets. 20:35.
18. Naka wɛ ekɔ onto lambɔla lo nyuma, eshikikelo kakɔna kakokayɛ monga la tɔ?
18 Naka wɛ ambotshikaka nsangana kaamɛ l’ekambi wa Jehowa, kete onga l’eshikikelo dia Jehowa aakatetemala kooka ngandji. Nde nangaka dia wɛ nkalola le nde. Ayonga ohomba wɛ ntakola wanya amɔtshi dia nkalola le nde. Koko l’ɛnyɛlɔ ka papa ka lo wɛɛla wa Yeso, Jehowa ekɔ lo kokonga dia wɛ nkalola, ndo nde ayokolongola l’ɔngɛnɔngɛnɔ tshɛ.
OSAMBO 103 Alami wekɔ apami wele oko weshasha
^ od. 5 Jehowa nangaka dia wanɛ wahayosambisha ndo wahayɔtɔ nsanganya nkalola le nde. Sho kokaka nsala akambo efula dia nkeketsha wanɛ walanga mbetawɔ leeta la Jehowa l’ɔnɛ: “Nyokalole le mi.” Lo sawo nɛ, tayɔsɛdingola woho wakokaso mbakimanyiya dia nsala dui sɔ.
^ od. 7 Nkombo mɔtshi yakatshikitanyema.
^ od. 15 Anto amɔtshi wambɔla lo nyuma kokaka nkondja wahɔ lo mbeka tenyi dimɔtshi dia lo dibuku Woho wa ntshikala lo ngandji ka Nzambi, koko anto akina wakakondja wahɔ lo nyomɔsɛdingola totshapita ta lo dibuku Yasukanya la Jehowa. Kɔmite k’olimu ka l’etshumanelo mbayoshikikɛ onto akɔna ele l’akoka wa nɔmbɔla wekelo wa ngasɔ.
^ od. 68 ELEMBETSHIELO W’OSATO: Anangɛso asato wotshikitanyi washa ɔnangɛso lalanga nkalola le Jehowa ekimanyielo. Vɔ wekɔ lo nsala dui sɔ lo tetemalaka nsawola la nde, lo mboshikikɛ ɔnɛ vɔ mbookaka ngandji, ndo lo mbohokamɛka la yambalo tshɛ.
