1. A gu dzipwa kharini Jehovha tepo khiyo mweyo nya dzinvuta dzaye yi bweleyago gwaye?

KHA nga hi si wonidego ga ndrima yi vbindridego, Jehovha dzi fananiside ni muhavisi nya wadi a khathalago khu mweyo ni mweyo nya dzinvuta dzaye. Nigu a ngu vbwetedzeya dzatshavbo dzinvuta dzi dzimedego. Jehovha embede vaIsrayeli va nga ba va mu digide, khuye: “Wuyani gwangu eni nyi na wuya gwanu.” Ethu hi ngu dziti gu khethu Jehovha a nga gu dzipwa khu ndziya yayimweyo kholu wari khuye: “Kha nyi vbindrugedzi.” (Mal. 3:6, 7) Jesu ganede gu khuye Jehovha ni dzingilozi va ngu tsaka ngudzu tepo khiyo gimwegyo nya sithumi Saye gi bweleyago Gwaye. — Luka 15:10,32.

2. Ginani hi na bhulago khigyo avba nya ndrima yeyi?

² Hongoleni hi wona sipimaniso siraru sa Jesu si hi hevbudzago edzi hi nga phasago khidzo ava va dzi hambanisidego ni Jehovha. Hi na bhula gambe khu makhalelo hi yedego gu manega nawo gasi gu phasa dzinvuta dzi dzimedego gu bweleya ga Jehovha. Nigu hi na bwe hi wona gu khethu khu ginani si gu sadi gu dzi garadza gasi gu phasa vale va vbedego tshivba.

3-4. Nyamayi a khumbugwago omu ga Luka 15:8-10, vbwetedzede kharini drakima yaye yi nga ba yi dzimede?

³ Gu vbwetega hi dzi garadza ngudzu gasi hi mana ava va vbwetago gu bweleya ga Jehovha. Omu nya gipimaniso gi lovidwego omu nya Ivhangeli ya Luka, Jesu o yeyedza edzi nyamayi nyo khaguri a vbwetedzeyago khidzo gilo nya lisima ngudzu gi dzimedego gu gu gingerengere nya drakima. Giyeyedzo gegi gi ngu ndrindra gupima gwathu ganiolu ngudzungudzu guvbwetedzeya gakone. — Leri Luka 15:8-10, khavba nya tshamuselo wa vbavbatshi.

⁴ Jesu o yeyedza edzi a dzipwidego khidzo nyamayi yoyo tepo a manidego drakima yaye yi nga ba yi dzimede. Matshiguni ya Jesu, so wonegisa gu khatshi gyo tshuka gyagadzyana gi tshadha mamayi wagyo a di gu gi ninga likhumi singerengere nya drakima khu litshigu nya mutshadho. Adzina drakima yeyi yi diri ni lisima kholu  yi diri mweyo nya dzile nya likhumi a ningidwego khu mamayi waye litshigu nya mutshadho. Nigu uye a di gu tiyisega gu khuye drakima yi thegide vbavbatshi. Khu kharato, a di khondrisa kandriya gasi gu yi khedza, ganiolu a si yi woni. Kandriya yaye kha ya nga ba yi wona gwadi gasi gu wona gingerengere nya gidugwana nya drakima. A di hegisa khu gu vbiyela nyumbani gwatshavbo. Tepo a nga wola ndzilo a di yi wona na yi gu ketiga. A di huye hefu! A rana dzipari ni vavhizinyu gasi gu ta va bhuleya mahungu yaya nyo tsakise.

5. Khu ginani si nga garadzago gu mana vale va emidego gu dzi tshanganisa ni libandla?

⁵ Kha nga hi si wonidego ga gipimaniso gya Jesu, gasi gu mana gilo gi dzimedego, gu vbwetega hi dzi garadza. Khu ndziya nyo fane, gasi hi mana ava va digidego libandla si nga lomba gu hi dzi garadza ngudzu. Si nga gira na gu vbindride myaga na va emide gu dzi tshanganisa ni ethu. Si nga gira gambe na va fulugide omu va nga ba va vbanya umo va ya vbanya wulangani va si tidwigo khu vandriyathu va vbanyago umomo. Ganiolu, vambe vakone va ngu dzina gu bweleya ga Jehovha. Avo va ngu dzina gu thumeya Jehovha ni vandriyawe va liphuvboni ganiolu vo vbweta giphaso gyathu.

6. Sivbango satshavbo nya libandla si nga phasedzeya kharini gu vbwetedzeya ava va vbodego khu liphuvboni?

⁶ Khu mani a nga phasedzeyago gu vbwetedzeya ava va emidego gu dzi tshanganisa ni libandla? Hatshavbo — madhota, vapiyonero, valongo vaye ni vahuweleyi nya libandla. Ina u ni pari mwendro nongo a vbodego khu liphuvboni? U di nga mana muthu a vbodego khu liphuvboni thumoni nyo tshumayele khu ndranga ni ndranga mwendro nu gu thuma khu gikarinyana? Mu tshamuseye gu khuwe a gu ba a dzina gu endredwa khu madhota a nga gu ninga numeri yaye nya telefone gasi u ya ma ninga.

7. Ginani u gi hevbudego ga esi si ganedwego khu Thomas?

⁷ Madhota ma nga thumisa dzindziya muni nyo wonege gasi gu phasa vale va vbwetago gu bweleya ga Jehovha? Nga wona esi si ganedwego khu lidhota limwedo nyo pwani khu Thomas, * li vbanyago Espanha, li phasidego Dzifakazi nyo vbindre 40 gu bweleya libandlani. Lari khilo: “Nyo pheya khu gu wudzisa vandriyathu va tigo omu va nga fuluga vaya khala umo. Mwendro gu wudzisa vahuweleyi gukheni va nguti muthu a emidego guta mitshanganoni gani. Nya vangi libandlani va gu hlamula na va tsakide kholu va gu dzipwa na va gu patega navo omu nyo vbwetedzeye vathu vovo. Khu hwane, tepo nyi endreyago ndriyathu a vbodego khu liphuvboni nyo mu wudzisa khu sanana saye ni valongo vaye. Vambe va vbodego khu liphuvboni va di gu hongola ni sanana sawe mitshanganoni nigu iso adzina si di phede gu thuma kha nga vahuweleyi. Aniso gu vbwetega si phaswa gu bweleya ga Jehovha.”

8. Ga gipimaniso gi gomogo omu ga Luka 15:17-24, nya gyanana gi nga ba gi dzimede, papayi wagyo gi pharide kharini tepo gi dzi layidego?

⁸ Gasi gu phasa vale va dzinago gu bweleya ga Jehovha hi yede gu manega ni makhalelo muni? Wona esi u nga si hevbulago ga gipimaniso gya Jesu nya gyanana gi nga ba gi dzimede. (Leri Luka 15:17- 24.) Jesu tshamusede edzi gi hegisidego khidzo khu gu dzi laya gi hunga gu bweleya gaya. Tepo papayi wakona a nga wonago gyanana gyaye a di tutuma aya gi gumbareya, a gi yeyedza gu khuye a ngu gi haladza. Gyanana gile gi di gu dzipwa nandru nigu gi di gu dzipwa na gi si ninganedwi gambe khu gu khala gyanana gyaye. Hwane nyo ba gi ganede edzi gi nga bani gi dzipwa khidzo, papayi wagyo gi pwede wusiwana. Papayi wagyo yeyedzide khu sigiro saye gu khuye a ngu gi hakha nasiri kha nga githumi ganiolu kha nga givbango nya gigodwa gya ndrangani. Gasi gu gi yeyedza gu khuye a ngu gi haladza, a di lulamiseya buzo a bwe a gi ninga sombo nya lisima ngudzu gasi gi ambala.

9. Makhalelo muni hi yedego gu ma haguleya gasi gu phasa ava va vbodego khu liphuvboni gu bweleya ga Jehovha? (Wona kwadru “ Edzi hi nga phasago khidzo vale va vbwetegago gu bweleya ga Jehovha.”)

 ⁹ Jehovha a ngu fana ni papayi wa avba nya gipimaniso gegi. Uye a ngu va haladza ngudzu ava va vbodego khu liphuvbo nigu a gu vbweta gu khuye va bweleya gwaye. Ha gu pimedzeya Jehovha hi na si kodza gu va phasa gu bweleya. Gasi gu gira isoso, hi yede gu haguleya makhalelo nya nga gulaphisa-monyo, pweya-wusiwana, wuhindzi ni lihaladzo khu vambe. Khu ginani hi yedego gu yeyedza makhalelo yaya nigu hi nga si gira kharini?

10. Khu ginani gulaphisa-monyo gu gu ni lisima gasi gu phasa ava va vbodego khu liphuvboni?

¹⁰ Gu vbwetega hi laphisa monyo kholu si ngu dzega tepo gasi muthu a bweleya ga Jehovha. Nya vangi va nga ba va emide gu dzi tshanganisa ni libandla vari khavo va si kodzide gu bweleya hwane nyo ba va endredwe gunganigungani khu madhota ni simbe sivbango nya libandla. Ndriyathu nya nyamayi wa Asia, nyo pwani khu Nancy, wari khuye: “Pari yangu nya yikhongolo ya libandlani yi nyi phaside ngudzu. A di gu nyi haladza ngudzu kha nga ndriyangu nya koma. A di nyi dundrugisa dzitepo nyo tsakise ngudzu hi dzi vbanyidego gale yoyo. Nigu tepo khiyo nyi nga ba nyi ganeya edzi nyi nga ba nyi dzipwa khidzo a di gu nyi laphiseya monyo, a nyi engiseya gwadi a bwe a nyi ninga wusingalagadzi omu si nga ba si vbwetega. Uye yeyedzide gu khuye pari nya lisine yi dongidego gu phasa ni ga yevbini tepo.”

11. Khu ginani hi yedego gu pweya wusiwana vale va vbodego khu liphuvboni?

¹¹ Pweya-wusiwana wu ngu fana ni rendre nya tshivba kholu wu nga si kodza gu vbodzisa silondra sa monyoni. Vambe va di vbola khu liphuvboni kholu va gorosidwego khu gimwegyo nya sivbango nya libandla nigu kala olu va nga gu vbisega khiso. Khu gu ba va dzipwa kharato si ngu va  garadzeya gu bweleya ga Jehovha. Vambe va nga pimisa gu khavo kha va pharwa khu ndziya nyo lulame. Khu gighelo gyogyo, si nga gira na va vbweta muthu a na va engiseyago gwadi a bwe a pwisisa edzi va dzipwago khidzo. (Jak. 1:19) María a nga ba a vbode khu liphuvboni, wari khuye: “Nyi di gu vbweta muthu a nga hadzi nyi engiseya gwadi, nyi mu lileya a bwe a nyi phasa.”

12. Ninga giyeyedzo nya edzi lihaladzo la Jehovha li ndrindrago khidzo ava va digidego gu mu thumeya gasi va bweleya va ya dzi tshanganisa ni sithumi saye.

¹² Bhibhiliya yo fananisa lihaladzo la Jehovha khu vathu vaye ni ngodzi. Khu ndziya muni? Nga wona giyeyedzo gegi: Nga dundrugeya na wu gu dzama linene khavbovbo muthu nyo khaguri a gu rinyeya salva-vidas. Khu lisine, u di hadzi gi ninga lisima giphaso gyogyo kholu yi di hadzi gu gu delugisa u si dzami. Ganiolu, salva-vidas yonga kha yi na nga vbulugisa womi wago. Nigu mati ma ngu dzidziya, wa gu mba mana ngalava nya salva-vidas khu na nga vbuluga. Gu vbwetega gu moyo nya ava va gomogo ngalavani a gu rinyeya ngodzi gasi a gu ndrindra khiyo a gu phasa gu beya ngalavani. Jehovha ganede esi khu vaIsrayeli va nga ba va mu digide: “Nyi va gimbidziside khu dzingodzi nya . . . lihaladzo.” (Hos. 11:4) Muhuno, Nungungulu a gu dzipwa khu ndziya nyo fane khu vale va emidego gu mu thumeya va dzamago omu nya sigaradzo. Uye o vbweta gu khuye va dziti gu khavo a ngu va haladza nigu o vbweta gu khuye va bweleya gwaye. Nigu Jehovha a nga thumisa uwe gasi gu va yeyedza lihaladzo.

13. Ganeya giyeyedzo gi yeyedzago gu khigyo lihaladzo nya wundruye li na ni tshivba.

¹³ Si na ni lisima gu phasa ava va vbodego khu liphuvboni gu pwisisa gu khavo Jehovha a ngu va haladza nigu anethu hi ngu va haladza. Pablo a khumbugidwego avba nya ndrima yi vbindridego, a nga ba a vbode khu liphuvboni khu 30 myaga ni guvbindra, wari khuye: “Litshigu limwedo  ni dzimindru na nyi duga khu ndrangani nyi di tshangana ni moyo nya ndriyathu nya nyamayi a dandridego khu tanga a nga ganeya ni eni khu ndziya nya lihaladzo. Nyi di pheya gu liya nga gyanana. Nyi di mu embeya kheni khatshi Jehovha a di gu rumeya gasi guta ganeya ni eni. Khu tepo yoyo kamo nyi di hunga gu bweleya ga Jehovha.”

14. Guya khu Luka 15:4, 5, ginani a giridego muhavisi tepo a manidego nvuta yi nga ba yi dzimede?

¹⁴ Ambari hwane nyo ba va wide libandlani gu vbwetega hi simama gu va phasa ni gu va kutsa. Gufana ni gyanana gi nga ba gi dzimede avba nya gipimaniso gya Jesu, si nga gira na vapwa guvbisa nya gukhongolo ngudzu monyoni nigu gu nga dzegago tepo nyo laphe gasi gu vbola. Nigu si nga gira na va vbode khu liphuvboni khu mahungu nya esi va nga dzi bedzedzeya ga iso omu nya litigo leli la Sathani. Gu vbwetega hi va phasa gu tiyisa gukhodwa gwawe ga Jehovha. Avba nya gipimaniso nya nvuta yi nga ba yi dzimede, Jesu o yeyedza edzi muhavisi a yi pharago khidzo khu lihaladzo a yi bweledza tshambini. Muhavisi vbedzide tepo ni tshivba gasi a mana nvuta yi dzimedego. Ambari ulolo, a ngu dziti gu khuye yi ngu vbweta giphaso gyaye, khu kharato, o yi khusa kholu yi mwalo tshivba nyo vbohe yabune tshambini. — Leri Luka 15:4, 5.

15. Hi nga phasa kharini muthu a vbodego khu liphuvboni a vbwetago gu bweleya ga Jehovha? (Wona kwadru “ Ferameta yi phasago ngudzu.”)

¹⁵ Si na vbweta tshivba ni tepo gasi gu phasa ava va vbodego khu liphuvboni gu pala sigaradzo va tshanganago naso. Ganiolu khu gu phaswa khu liphuvbo nya guage la Jehovha, Lito laye ni mabhuku hi ma manago libandlani hi nga va phasa gu tiyisa wupari wawe ni Jehovha. (Rom. 15:1) Hi nga si gira kharini isoso? Lidhota limwedo li vidzidwego khu liphuvboni lari khilo: “Gutala nya ava va vbodego khu liphuvboni gu vbwetega va gimbidzisedwa  gihevbulo nya Bhibhiliya tepo va hungago gu bweleya ga Jehovha.” * Wa gu lombwa gu hevbula ni muthu nyo khaguri a vbodego khu liphuvboni, li hakhe lithomo lolo khu mandza mavili. Lidhota lile la gu bwe khilo: “Muhuweleyi a gimbidziseyago gihevbulo nya Bhibhiliya muthu a vbodego khu liphuvboni gu vbwetega a khala pari nya yadi gasi gihevbulo gyaye gi kodza gu mu tumba gi mu bhuleya ni gevbini.”

16. Ha gu dziti kharini gu khethu dzingilozi dzi ngu hi phasedzeya thumoni gwathu?

¹⁶ Singi siyeyedzo si yeyedzago gu khiso dzingilozi dzi ngu hi phasedzeya gu mana vathu va vbodego khu liphuvboni va vbwetago gu bweleya ga Jehovha. (Gutu. 14:6) Khu giyeyedzo, Silvio wa Equador, a di gombeya a lomba gu khuye Jehovha a rumeya muthu gasi a ta mu phasa gu bweleya libandlani. Na nga si vbedzi ni gu gira nombelo, madhota mavili ma di vboha gaya gwaye. Ndrani nya mabhulo yawe, avo va tsakisidwe khu gu mu phasa.

17. Hi na dzipwa kharini ha gu phasa muthu nyo khaguri a vbodego khu liphuvboni?

¹⁷ Hi na mana gutsaka nya gukhongolo tepo hi phasago ava va vbodego khu liphuvboni gu bweleya ga Jehovha. Nga wona esi si ganedwago khu piyonero moyo nyo pwani khu Salvador, a khathalago khu vale va vbodego khu liphuvboni: “Tepo nyi dundrugeyago khu vathu va nga ba va vbode khu liphuvboni ganiolu va widego ga Jehovha so nyi gira nyi thesa marongo khu gutsaka. Si ngu nyi tsakisa ngudzu gu dundrugeya khedzi Jehovha a vbulugisidego khidzo mweyo nya dzinvuta dzaye nyo golege ga litigo leli la Sathane ni guti gu kheni aneni nyi mu phasedzede avba nya thumo wowu.” — Mith. 20:35.

18. Wa gu ba u ri muthu u vbodego khu liphuvboni, u nga tiyisega khu ginani?

¹⁸ Wa gu ba u emide gu dzi tshanganisa ni vathu va Jehovha, tiyisega gu khuwe Jehovha a nga gu gu haladza ngudzu. A gu vbweta gu khuye u bweleya gwaye. Ganiolu gu vbwetega u gira silo nyo khaguri gasi gu bweleya gwaye. Ambari ulolo, gufana ni papayi wa avba nya gipimaniso gya Jesu, Jehovha o khala na dongide gasi gu gu hakha nigu a na gu hoyozeya khu mandza mavili.