CHIIYO 26
“Amujokele Kulindime”
“Amujokele kulindime, eelyo andime ndilaboola kulindinywe.”—MALK. 3:7.
LWIIMBO 102 “Mweelede Kubagwasya Aabo Batajisi Nguzu”
ZITAYIIGWE *
1. Jehova ulimvwa biyeni kuti muntu wakatachili kumubelekela waboola lubo nguwe?
MBULI mbutwakabona muchiiyo chakayinda Jehova ulikozyanisya amweembeli uulikabotu ulaandaba ambelele zyakwe. Jehova ulayilanguula mbelele yakwe kuti yasweeka. Jehova wakabuzya maIsrayeli bakali baleka kumukomba kuti: “Amujokele kulindime, eelyo andime ndilaboola kulindinywe.” Nikuba mazubaano uyanda kuti bantu batachimubelekeli baboole kuli nguwe nkaambo wakaamba kuti: “Tandicinci pe.” (Malk. 3:6, 7) Jesu wakaamba kuti Jehova abangelo balabotelwa kuti umwi wabakombi bakwe wakasweekede waboola kuli Jehova.—Lk. 15:10, 32.
2. Tulalanga-langa muchiiyo eechi?
2 Atulange-lange zikozyano zyaJesu zitatu zyaambuula atala ambutukonzya kugwasya bantu batachikombi Jehova. Mpawo tulalanga-langa buntu mbutweelede kuba aabo kuti tukonzye kugwasya mbelele zisweekede kuti ziboole kuli nguwe. Alubo tulayiya kuti kubeleka changuzu mukugwasya bantu batachichiti kabotu mubukombi kupa kuti tubotelwe.
KUYANDUULA MALI YAKASWEEKA
3-4. Nkamboonzi mwanakazi waambidwe muli Luka 15:8-10 naakabeleka changuzu kuti ayanduule mali yakwe yakasweekede?
3 Tweelede kubeleka changuzu kuti tuyanduule bantu bayanda kuboola kuli Jehova. Muchikozyano chilembedwe muli Luka, Jesu wakaambuula atala amwanakazi wakasweekelwa amali yakwe yansiliva iiyandikana loko. Nchituyanda loko muchikozyano eechi nkuti wakayiyanduula biyeni mali yakwe.—Bala Luka 15:8-10.
4 Jesu wakaamba mbaakalimvwa mwanakazi ooyu chiindi naakajana mali yakwe iiyandikana loko yakasweekede. Chiindi Jesu naakali aanyika, banakazi bachiJuda bakali kupa mwanaabo musimbi tumali twansiliva tuyandikana tuli 10 buzuba naachada. Amwi mali yamwanakazi ooyu yakasweeka yakali kuyandikana nkaambo yakali imwi yamali njaakapedwe abanyina naakachada. Mwanakazi ooyu wakali kuyeeyela kuti mali eeyi yakawida aansi mung’anda. Wakalayita lambe lyakwe mpawo wakatalisya kwiiyanduula pesi taakayibona pe. Amwi lambe lyakwe teelyakali kumunika kabotu kuti akonzye kubona kamali kaniini. Wakazootanyela ng’anda yakwe yoonse. Kumamanino wakazooyijana mali yakwe mumuseele ngwaakatanyela. Wakabotelwa loko! Wakayita beenzinyina abasimayakilane kuti ababuzye makani aaya mabotu.
5. Nkamboonzi nitweelede kubeleka changuzu kuti tuyanduule bantu batachichiti kabotu mubukombi?
5 Mbuli mbutwabona muchikozyano chaJesu, kuyanda kuti tubeleke changuzu kuti tukonzye kujana chintu chasweeka. Munzila iikozyenie, tweelede kubeleka changuzu kuti tuyanduule bantu batachiliswaanizyi ambungano. Kulakonzeka kuti kwayinda minyaka myiingi kabataliswaanizyi pe ambungano. Amwi bakalongela kubusena bupya nkubatazibidwe pe abakwesu. Tweelede kuba aachoonzyo chakuti bakwesu batachichiti kabotu mubukombi balaachiyandisyo chakubweeda kuli Jehova. Bayanda kukomba Jehova kabalaamwi abakombinyina pesi bayanda lugwasyo lwesu.
6. Bantu boonse bamumbungano nga balagwasilizya biyeni kuyanduula bantu batachichiti kabotu mubukombi?
6 Mbaani beelede kuyanduula bantu batachichiti kabotu mubukombi? Toonse, chaamba kuti baalu, mapayona, bamumpuli abasikupupulula tulakonzya kuyanduula. Kuli mweenzinyokwe na naakuti bbululu wako utachichiti kabotu mubukombi? Kuli nwaakali waswaanana amuntu utachichiti kabotu na mubukombi chiindi nwaakali kukambawuka kung’anda ang’anda naakuti antanganana? Mupandulwide kuti, kuti kayanda kuswayigwa ulakonzya kubweza namba zyakwe zyafooni a-adilesi yakwe kuti ukazipe baalu.
7. Zyakaambwa aThomas zituyiisyaanzi?
7 Niinzi baalu nzibeelede kuchita kuti bakonzye kuyanduula bantu bayanda kuboola kuli Jehova? Atubone zyakaambwa awumwi mwaalu uutegwa Thomas * uukkala kuSpain. Thomas wakagwasya bantu bayinda ku40 kuti batalike lubo kuliswaanizya ambungano. Wakati: “Nga ndabuzya bakwesu abachizi kuti balikwiizi na kukkala muntu utachichiti kabotu mubukombi. Naakuti kubuzya kuti kuli ngubazi na utachichiti kabotu mubukombi. Biingi mumbungano nga bandigwasya nkaambo balizi kuti ambabo baliswaanizidwe mukuyanduula ooku. Alubo chiindi nindiswaya mukwesu naakuti muchizi utachichiti kabotu mubukombi nga ndabuzya kuti bali biyeni bana bakwe azibbululu zyakwe. Kulakonzeka kuti bantu aaba bakali kuza abana babo kumiswaangano alubo amwi bana aabo bakali baba basikupupulula. Ambabo ngabayanda kugwasigwa kuti baboole kuli Jehova.”
GWASYA BAKOMBI BAJEHOVA BAKASWEEKA KUTI BABOOLE
8. Kweendelana achikozyano chijanika muli Luka 15:17-24, wisi wakamujata biyeni mwanaakwe naakaboola?
8 Tweelede kuba abuntu buli biyeni kuti tugwasye bakombi baJehova batachichiti kabotu mubukombi? Atubone nzitwiiya muchikozyano chaJesu chamwana mulombe wakasweeka. (Bala Luka 15:17-24.) Jesu wakaamba kuti mwana ooyu wakazoobona kuti wakali wapambanisya mpawo wakabweeda kumuunzi. Wisi wakamuchijaanina mpawo wamukumbata akumutondeezya kuti wakachili kumuyanda. Alubo mulombe ooyu wakali kulilya moyo akulibona katacheeleli pe kujatwa mbuli mwana. Pesi wisi wakamweetelela mwanaakwe naakali kwaambuula mbaakali kulimvwa. Alubo wisi wakachita chimwi chintu chitondeezya kuti wakachili kumubona mbuli mwanaakwe kutali mubelesi. Wakamuchitila pobwe mpawo wakamupa zigogo zibotu kuti azwaate.
9. Mbuntuunzi mbutweelede kuba aabo kuti tugwasye bantu batachichiti kabotu mubukombi kuti baboole kuli Jehova? (Langa kabbokesi kati “ Mbutukonzya Kugwasya Bantu Bayanda Kuboola Kuli Jehova.”)
9 Jehova uuli mbuli wisi waambidwe muchikozyano chaJesu. Ulabayanda bakwesu abachizi batachichiti kabotu mubukombi alubo uyanda kuti baboole kuli nguwe. Tulakonzya kutobelezya chikozyano chaJehova kwiinda mukubagwasya kuti baboole. Pesi kuti tuchite oobo tweelede kuba amoyo mulamfu, lweetelelo aluyando. Nkamboonzi nitweelede kuba abuntu oobu alubo nga tulabutondeezya biyeni?
10. Nkamboonzi nitweelede kuba amoyo mulamfu kuti tugwasye muntu kuti aboole kuli Jehova?
10 Tweelede kuba aamoyo mulamfu nkaambo zitola chiindi kuti muntu asime lubo mubukombi. Biingi babantu bakatachili kuchita kabotu mubukombi bakaamba kuti bakazoosaanguna lubo kubelekela Jehova kabali baswayigwa twiingi abaalu abamwi bamumbungano. Umwi muchizi uutegwa Nancy uukkala kuAsia wakati: “Ndakagwasigwa amweenzuma wamumbungano ngutwakali kumvwanana loko. Wakali kundibona mbuli mwanikaakwe. Wakali kundiyeezya zintu zibotu nzitwakali kuchita chiindi. Wakali kundiswiilisisya nindakali kwaambuula mbundilimvwa alubo taakali kuwaya-waya pe kundibuzya nzindeelede kuchita. Wakatondeezya kuti mweenzuma wachoonzyo ulibambilide kundigwasya chiindi choonse.”
11. Nkamboonzi nitweelede kuba alweetelelo chiindi nitugwasya bantu bakataazikene?
11 Kuti muntu kakataazikene nga ulikumvwa kuchisa mbuli muntu ulaachilonda. Lweetelelo luli mbuli munsamu uukonzya kumusilika chilonda eecho. Bamwi bantu bakaleka kuliswaanizya ambungano kwachiindi chilamfu nkaambo umwi muntu wamumbungano wakabachitila zintu zitali kabotu. Eezi zilakonzya kupa kuti batabi achiyandisyo chakubweeda kuli Jehova. Bamwi nga bayeeya kuti teebakajatwa kabotu pe. Nga bayanda muntu ubaswiilisisya akumvwisisisya mbubalimvwa. (Jak. 1:19) Umwi muchizi uutegwa María wakatachili kuchita kabotu mubukombi wakati, “Ndakali kuyanda muntu uukonzya kundiswiilila, kunduumbulizya akundigwasya.”
12. Amba chikozyano chitondeezya Jehova mbabakwela bantu batachichiti kabotu mubukombi.
12 Bbayibbele likozyanisya luyando Jehova ndwalaalo kubakombi bakwe mbuli ntambo. Luyando lwaLeza lufanana biyeni antambo? Atubone chikozyano chitobela: Atuteedi wawida mulwizi muli maanzi atontola kali amayuwe miingi. Mpawo watalisya kubbila mumaanzi. Mpawo umwi muntu ulaabboti lilaafwiifwi wakuwaalila chimwi chintu kuchitila kuti ukonzye kwiibuka. Ulamulumba loko. Pesi uyanda chintu chitakugwasye kuti uzwe mumaanzi. Nkinkaako uyanda kuti bantu balimubboti bakuwaalile ntambo iitakugwasye kuti uzwe mumaanzi. Kali kwaambuula atala amaIsrayeli bakatachili kumubelekela Jehova wakati: “Ndakaluujisi kubakwela antambo . . . zyaluyando.” (Hos. 11:4) Nikuba mazubaano Jehova uchibakwela munzila iili boobo bantu bakaleka kumubelekela akaambo kamapenzi akukataazikana. Uyanda kuti bazibe kuti ulabayanda akuti uyanda kuti baboole kuli nguwe. Jehova ulakonzya kubelesya nduwe kuti abatondeezye luyando.
13. Aamba chikozyano chitondeezya kuti kubatondeezya luyando bamwi kulakonzya kupa kuti baboole kuli Jehova.
13 Kulayandikana kuti tubuzye bantu batachichiti kabotu mubukombi kuti Jehova ulabayanda akuti andiswe tulabayanda. Pablo wakaambwa muchiiyo chakiinda wakakkala kwaminyaka yiinda ku30 katachiti kabotu mubukombi. Wakati: “Limwi zuba kuseeni kandili kuzwa aang’anda ndakaswaanana awumwi muchizi wakomena alubo wakaambuula andime munzila yaluyando. Ndakalila mbuli mwana muniini. Ndakamubuzya kuti wakali watumwa aJehova kuti azoowambuule andime. Mpimpaawo mpundakayeeya kuti ndeelede kubweeda kuli Jehova.”
BELEKA CHANGUZU KUTI UGWASYE BATACHICHITI KABOTU MUBUKOMBI
14. Kweendelana achikozyano chijanika mulugwalo lwa Luka 15:4, 5, niinzi nchaakachita mweembeli chiindi naakajana mbelele yakwe yakasweekede?
14 Tweelede kuzumanana kugwasya bantu batachichiti kabotu mubukombi kuti twabajana. Mbuli mwana mulombe wakasweeka uuli muchikozyano chaJesu balakonzya kuti balikataazikene. Alubo balakonzya kuti tabachisimide mubukombi akaambo kazintu nzibakali kuswaana munyika yaSaatani. Tweelede kubagwasya kuti basime lubo mubukombi. Muchikozyano chambelele yakasweeka, Jesu wakapandulula mweembeli mbabweza mbelele akwiibikka aamakuko akwiitola kuzyeenzinyina. Mweembeli ooyu nga wabelesya manguzu achiindi kuyanduula mbelele yasweeka. Pesi nga wabona kuti weelede kwiinyampula akwiitola kuzyeenzinyina nkaambo nga tayichikwe manguzu pe akuti yiinke ayilikke.—Bala Luka 15:4, 5.
15. Nga tulabagwasya biyeni bantu batachichiti kabotu mubukombi bayanda kuboola kuli Jehova? (Langa kabbokesi kati “ Chibelesyo Chigwasya Loko.”)
15 Tweelede kubeleka changuzu kuti tukonzye kugwasya bantu batachichiti kabotu mubukombi kuti babweede kuli Jehova. Pesi tulabagwasya kuti basime lubo mubukombi katugwasigwa amuuya uusalala, Jwi lyaLeza amabbuku agwisigwa ambunga. (Rom. 15:1) Nga tulazichita biyeni eezi? Umwi mukwesu waba achiindi kali mwaalu wakati, “Bantu biingi batachichiti kabotu mubukombi beelede kuyiisigwa lubo Bbayibbele kuti basala kubelekela Jehova lubo.” * Nkinkaako kuti wakumbilwa kuti wiiye amuntu utachichiti kabotu mubukombi weelede kuzumina amoyo woonse. Mwaalu ooyu wakayungizya kuti: “Sikupupulula uunga wapegwa mulimu ooyu weelede kuba mweenzinyina uulikabotu, muntu waangunukide kwaambuulaawe.”
KUBOTELWA KUJULU AANYIKA
16. Tuzizi biyeni kuti bangelo balatugwasya?
16 Kuli bumboni bwiingi butondeezya kuti bangelo balatugwasya kuti tugwasye bantu batachichiti kabotu mubukombi bayanda kubweeda kuli Jehova. (Ciy. 14:6) Muchikozyano, mukwesu uutegwa Silvio wakakomba amoyo woonse kakumbila kuti Jehova amugwasye kubweeda mumbungano. Naakachili kukomba, baalu babili bakakonkomona amulyango wakwe. Baalu aaba bakamupa lugwasyo ndwaakali kuyanda.
17. Tulimvwa biyeni kuti twagwasya muntu utachichiti kabotu mubukombi kuti aboole kuli Jehova?
17 Tuyoobotelwa kuti twagwasya bantu batachichiti kabotu mubukombi kuti babweede kuli Jehova. Umwi payona uutegwa Salvador alubo ubeleka changuzu kugwasya bantu batachichiti kabotu mubukombi wakati: “Chimwi chiindi nga yandeenda misozi akaambo kakubotelwa. Nga ndabotelwa loko kubelekaamwi aJehova kugwasya mbelele yakwe kuti izwe munyika yaSaatani akuti iboole kuli nguwe.”—Mil. 20:35.
18. Niinzi nzweelede kuziba kuti kutachiliswaanizyi abakombi baJehova?
18 Kuti kuli wakaleka kuliswaanizya abakombi baLeza, ziba kuti Jehova uchikuyanda. Uyanda kuti uboole kuli nguwe. Weelede kubeleka changuzu kuti ubweede kuli nguwe. Mbuli wisi waambidwe muchikozyano chaJesu, Jehova ulikulindide kuti uboole kuli nguwe alubo ulilibambilide kukutambula.
LWIIMBO 103 Beembezi Nzipego Mubantu
^ par 5 Jehova uyanda kuti bantu batachiliswaanizyi ambungano babweede kuli nguwe. Tulakonzya kubasungwaazya kuti bazumine kutamba kwaJehova kwakuti: “Amujokele kulindime.” Muchiiyo eechi tulabona mbutukonzya kubagwasya.
^ par 7 Amwi mazina akachinchwa.
^ par 15 Bamwi batachichiti kabotu mubukombi balakonzya kuyiisigwa zipanzi zyabbuku litegwa Mbutukonzya Kukkala Katuli Muluyando lwaLeza alubo bamwi balakonzya kugwasigwa mukulanga-langa zipanzi zyabbuku litegwa Amubaa Cilongwe a Jehova. Kkomiti Yamulimu Yambungano ilalanga-langa kuti ngwani weelela kuchitisya chiiyo eechi.
^ par 68 BUPANDULUZI BWAZIFANIKISYO: Bakwesu batatu basiyene balikugwasya mukwesu uyanda kuboola kuli Jehova. Bachita oobo kwiinda mukwaambuula aawe kababelesya fooni, kumutondeezya kuti balamuyanda akumuswiilizya naalikwaambuula mbalimvwa.
