1. ¿La makgkatsi Jehová akxni tantum xborrego tiku xtsankganit lakgtaspitpara?

CHUNA la akxilhwi kʼartículo nema titaxtulh, Jehová xtachuna la chatum xmapuchwayanina borregos tiku kuentajkatlawa xborregos chu putsa tiku tsankganit. Akgtum kilhtamaku, kawanilh israelitas tiku xtamakgatlinikgonit: «Kakilakgtaspitparatit, chu akit nakkalakgtaspitparayan». Chu katsiyaw pi la uku chuntiya makgkatsi, xlakata xla wan: «Ni ktalakgpali» (Mal. 3:6, 7). Nachuna, Jesús lichuwinalh pi Jehová chu ángeles lu lipaxuwakgo akxni tantum borrego nema xtsankganit lakgtaspitpara (Luc. 15:10, 32).

2. ¿Tuku nalichuwinanaw kʼuma artículo?

² Kʼuma artículo, naʼakxilhaw pulaktutu parábolas tuku kalichuwinalh Jesús, nema kinkamasiyaniyan la nakamakgtayayaw tiku tamakgatlinikgonit Jehová. Naʼakxilhaw tuku tayat talakaskin nalimasiyayaw xlakata tlan nakamakgtayayaw nalakgtaspitparakgo Jehová chu tuku xlakata xlakaskinka naliskujaw nakamakgtayayaw tiku xlajwanankgo.

3, 4. ¿Tuku xlakata puskat tiku talichuwinan kLucas 15:8-10 lu liskujli naputsa tumin nema xmakgatsankganit?

³ Talakaskin lu naliskujaw xlakata nakaputsayaw tiku lakgtaspitputumparakgo Jehová. Anta kʼEvangelio xla Lucas, lichuwinan akgtum parábola niku Jesús lichuwinan chatum puskat tiku putsa tuku lu xtapalh nema makgatsankganit: akgtum tumin xla dracma. Tuku masiya uma parábola wa pi uma puskat lu palha liskujli xlakata natekgsa (kalikgalhtawakga Lucas 15:8-10).

⁴ Kxkilhtamaku Jesús, akxni lakpuskatin judías xtamakgaxtokgkgo, makgapitsi xnatsetnikan xkamaxkikgo akgkaw tumin xla dracma. Max wa uma tumin xla plata nema xmakgatsankganit  puskat tiku lichuwinankan kparábola. Komo max anta makgxtakgli kkatutsu, mapasi akgtum limakgskgon xla aceite chu tsuku akxilha katutsu, pero ni tekgsa. Max uma limakgskgon ni liwana makaxkgakge xlakata natekgsa xtumin. Wa xlakata tsuku kapalhnan kxlikalanka xchik. Akxni mamakxtumi pokgxni, akxilha pi wi tuku skgo: ¡wa xtumin! Jesús lichuwinan pi lu skaya makgkatsi chu lipaxuwa, asta katasani xʼamigas chu tiku lakatsu katawi xlakata nakawani pi tekgsli xtumin.

5. ¿Tuku xlakata talakaskin lu naliskujaw nakaputsayaw tiku tamakgatlinikgonit Jehová?

⁵ Xparábola Jesús kinkamasiyaniyan pi lu talakaskin palha naliskujaw xlakata naputsayaw tuku tsankganit. Xtachuna kitaxtu akxni kaputsayaw tiku tamakgatlinikgonit Jehová. Max lhuwata kata nialh kinkatatamakxtumikgoyan kcongregación. Max alakatanu niku ankgonit latamakgo, niku natalan ni kalakgapaskgo. Pero max makgapitsin la uku lu lakgtaspitputumparakgo Jehová. Akxtum kataskujnaniputumparakgo Jehová xnatalankan, pero maklakaskinkgo pi kakamakgtayaw.

6. ¿La tlan namakgtayanankgo putum congregación xlakata nakaputsakan tiku tamakgatlinikgonit Jehová?

⁶ ¿Tiku tlan namakgtayanankgo xlakata nakaputsakan tiku tamakgatlinikgonit Jehová? Putum congregación, tiku xalak xfamilia, lakgkgolotsin, precursores chu tiku publicadores. ¿Wi tiku xalak kifamiliajkan o kiʼamigojkan tamakgatlininit Jehová? ¿Tekgsnitaw tiku tamakgatlininit Jehová akxni lichuwinanaw Dios niku lhuwa titaxtukan o akxni anaw kʼakgatunu chiki? Komo uma lataman nakinkawaniyan niku wi xchik chu tuku wanikan, tlan nakawaniyaw lakgkgolotsin xalak congregación, komo kkinkachikinkan mastakan talakaskin.

7. ¿Tuku masiyaniyan tuku lichuwinan chatum kgolotsin tiku wanikan Thomas?

⁷ ¿Tuku xlitlawatkan lakgkgolotsin xlakata tlan nakatekgskgo tiku lakgtaspitputumparakgo Jehová? Kaʼakxilhwi tuku lichuwinan chatum kgolotsin xalak España tiku wanikan Thomas. * Xla kamakgtayanit liwaka 40 natalan nalakgtaspitparakgo Jehová. Xla wan: «Pulana, kkakgalhskin natalan tiku max katsikgo niku wi xchikkan tiku tamakgatlinikgonit Jehová. O kkakgalhskin publicadores komo lakapastakkgo chatum tala tiku nialh an ktamakxtumit. Natalan lu makgtayanamputunkgo akxni kkaskiniyaw xtamakgtaykan. Alistalh, akxni klakgapaxialhnan chatum tala tiku tamakgatlininit Jehová, kkgalhskin xpalakata xkamanan o xtalilakgapasni. Makgapitsin tiku tamakgatlikgonit xkalinkgo xkamanankan ktamakxtumit, chu umakgolh max na xlichuwinankgo Dios. Nachuna tlan nakamakgtayakan nalakgtaspitparakgo Jehová».

8. Chuna la wan Lucas 15:17-24, ¿la likatsinilh chatum tlat xkgawasa tiku nitlan limakgkatsilh tuku xtlawanit?

⁸ ¿Tuku tayat kilimasiyatkan komo kamakgtayaputunaw tiku lakgtaspitputumparakgo Jehová? Kaʼakxilhwi tuku kinkamasiyaniyan parábola xla kgawasa tiku xtsankganit (kalikgalhtawakga Lucas 15:17-24). Jesús lichuwinan pi uma kgawasa lilakpuwan tuku xtlawanit chu taspitpara kxchik. Xtlat lakapala an paxtokga chu xatapaxuwan akgpixtiya xlakata nalimasiyani pi chuntiya paxki. Uma kgawasa lu nitlan limakgkatsi tuku tlawalh chu lakpuwan pi nialh lakgchan xkgawasa nalitaxtu. Xtlat lu lakgalhaman xkgawasa akxni akxilha pi xla nitlan limakgkatsi tuku xtlawanit. Wa xlakata tlawa akgtum paskua chu wan pi kamalhakgeka lu xatlan lhakgat. Chuna limasiyani pi makgamakglhtinan chuna la xkgawasa chu ni chuna la chatum skujni.

9. ¿Tuku tayat kilikgalhitkan xlakata nakamakgtayayaw nalakgtaspitparakgo Jehová tiku tamakgatlinikgonit? (Kaʼakxilhti recuadro « La nakamakgtayayaw tiku taspitputumparakgo»).

 ⁹ Jehová xtachuna la uma tlat tiku lichuwinan parábola. Lu kapaxki kinatalankan tiku tamakgatlikgonit chu lakaskin pi kalakgtaspitparakgolh. Komo nastalaniyaw xliʼakxilhtit, tlan nakamakgtayayaw nataspitparakgo. Xlakata tlan natlawayaw talakaskin namakgkatsiyaw tuku makgkatsikgo, nakalimasiyaniyaw tapaxkit chu ni nakgalhkgalhiyaw pi lakapala natatliwakglhkgo. ¿Tuku xlakata maklakaskinaw umakgolh tayat, chu la tlan nalimasiyayaw?

10. ¿Tuku xlakata talakaskin ni nakgalhkgalhiyaw pi lakapala natatliwakglhkgo tiku tamakgatlinikgonit Jehová xlakata tlan nakamakgtayayaw?

¹⁰ Talakaskin ni nakgalhkgalhiyaw pi lakapala natatliwakglhkgo xlakata nalin kilhtamaku pi uma lataman tlan natalalimpara Jehová. Lhuwa natalan tiku xtamakgatlinikgonit Jehová wankgo pi lakgkgolotsin chu amakgapitsin natalan xalak congregación makglhuwa kalakgapaxialhnankgolh xlakata tlan nalakgtaspitparakgo Jehová. Chatum tala xalak Asia tiku wanikan Nancy, lichuwinan: «Chatum tlan kiʼamiga xalak congregación lu kimakgtayalh. Lu xkimpaxki chu xtachuna la chatum xtala xkiliʼakxilha. Xkimalakapastaka tuku akxtum tlan xaktitaxtunitaw. Akxni xaklitachuwinan tuku xakmakgkatsi, liwana xkinkgaxmatni chu xkimaxki lakwan tastakyaw. Xlikana lu tlan amiga litaxtulh chu ankgalhin kimakgtayalh akxni xakmaklakaskin».

11. ¿Tuku xlakata talakaskin namakgkatsiyaw tuku makgkatsi tiku lipuwama?

¹¹ Makgkatsikan tuku makgkatsi achatum xtachuna la akgtum pomada nema kinkamakgtayayan namapaksayaw tuku nitlan makgkatsimaw.  Makgapitsin natalan tamakgatlinikgonit Jehová xlakata chatum tala nitlan kamamakgkatsinilh, chu akglhuwata kata nitlan makgkatsikgo. Wa xlakata nialh lakgtaspitputunkgo Jehová. Max amakgapitsin lakpuwankgo pi nitlan kalikatsinika. Max maklakaskinkgo pi wi tiku nakakgaxmatni chu nakaʼakgatekgsni tuku makgkatsikgo (Sant. 1:19). Chatum tala tiku makgas xtamakgatlininit Jehová wanikan María, lichuwinan: «Xakmaklakaskin tiku tlan xkinkgaxmatnilh, tiku xkimakgtayalh chu tiku xkimaxkilh lakwan tastakyaw».

12. ¿Tuku wamputun pi xtapaxkit Jehová xtachuna la kgantum tasiw?

¹² Biblia wan pi tapaxkit nema Jehová kakgalhini xlakskujnin xtachuna la kgantum tasiw. ¿Tuku xlakata? Kawiliw akgtum liʼakxilhtit. Kalilakpuwanti pi tajupi kʼakgtum lu xapulhman pozo. Lu pulhman uma pozo chu nila miʼakstu takuta. Talakaskin pi wi tiku namakaniyan kgantum tasiw xlakata tlan natakuta. Jehová lichuwinalh xpalakatakan israelitas tiku xtamakgatlinikgonit: «Chuntiya kkalilhtanktiyalh [...] tasiw xla tapaxkit» (Os. 11:4). Wa uma tuku Dios tlawaputun xpalakatakan tiku la uku tamakgatlinikgonit chu xtachuna la tajumakgo kʼakgtum pozo niku kgalhikgo lhuwa taʼakglhuwit chu tuku lilakgaputsakgo. Lakaskin kakatsikgolh pi lu kapaxki chu kamakgtayaputun xlakata nalakgtaspitparakgo. Chu xla tlan nakinkalimaklakaskinan xlakata nakalimasiyani xtapaxkit.

13. ¿La limasiya tuku titaxtulh Pablo pi kintapaxkitkan tlan nakamakgtaya tiku tamakgatlinikgonit Jehová xlakata nalakgtaspitparakgo?

¹³ Lu xlakaskinka pi liwana nakawaniyaw tiku tamakgatlinikgonit Jehová pi xla lu kapaxki chu nachuna akinin. Pablo, tiku lichuwinaw  kʼartículo nema titaxtulh, liwaka 30 kata xtamakgatlininit Jehová. Xla lichuwinan: «Akgtum kilhtamaku, akxni ktaxtulh kkinchik, chatum tala puskat tiku lina kata xatapaxuwan kintachuwinalh chu lu kilimasiyanilh tapaxkit. Ktsukulh tasa. Kwanilh pi Jehová xmalakgachanit xlakata nakintachuwinan. Uma kilhtamaku klakpuwa pi xakamapa lakgtaspita Jehová».

14. Chuna la wan Lucas 15:4, 5, ¿tuku tlawa chatum xmapuchwayanina borrego akxni tekgsa xborrego nema xtsankganit?

¹⁴ Akxni taspitkgo tiku xtamakgatlikgonit, talakaskin pi chuntiya nakamakgtayayaw chu nakamakgpuwantiniyaw. Max lu nitlan makgkatsikgo, xtachuna la kgawasa tiku xtsankganit, tiku talichuwinan kxparábola Jesús. Chu, xlakata minkgoyacha kxkakilhtamaku Satanás, xlikana pi max xtakanajlakan lu taxlajwanikgonit. Wa xlakata, talakaskin nakamakgtayayaw namatliwakglhkgo xtakanajlakan. Anta kparábola xlakata borrego nema xtsankganit, Jesús lichuwinan pi mapuchwayanina chaxlin chu lin niku wilakgo amakgapitsi xborregos. Mapuchwayanina lhuwata kilhtamaku chu litliwakga maklakaskilh xlakata naputsa xborrego. Pero katsi pi xlimakgtayat xborrego nataspitpara xlakata ni kgalhi litliwakga xʼakstu nataspita (kalikgalhtawakga Lucas 15:4, 5).

15. ¿La tlan nakamakgtayayaw tiku taxlajwanikgonit chu lakgtaspitputumparakgo Jehová? (Kaʼakxilhti recuadro « Lu xatlan tamakgtay»).

¹⁵ Max talakaskin pi nalimaxtuyaw kilhtamaku chu litliwakga xlakata nakamakgtayayaw namatliwakglhkgo xtakanajlakan tiku xtamakgatlinikgonit Jehová (Rom. 15:1). Xlakata tlan natlawayaw, kgalhiyaw xʼespíritu Jehová, xTachuwin chu likgalhtawakga nema kinkamaxkiyan  xkachikin. ¿La tlan nakamakgtayayaw? Chatum kgolotsin lichuwinan: «Akxni lakkaxwilikgo nataspitparakgo, maklakaskinkgo pi chatum tala nakamakgtaya nalikgalhtawakgakgo Biblia». * Wa xlakata, komo chatum kgolotsin nakinkaskiniyan pi kamakgtayaw tiku tamakgatlininit Jehová, xatapaxuwan kamakgtayaw. Watiya uma tala lichuwinampara: «Tiku tamakgatlinikgonit Jehová maklakaskinkgo pi uma tala tiku nakamakgtaya chatum amigo nalitaxtu, tiku tlan nalipawankgo».

16. ¿Tuku likatsiyaw pi ángeles kinkamakgtayakgoyan?

¹⁶ Wi lhuwa liʼakxilhtit nema limasiya pi ángeles kinkamakgtayakgoyan nakatekgsaw tiku tamakgatlinikgonit Jehová chu lakgtaspitputumparakgo (Apoc. 14:6). Akgtum liʼakxilhtit, Silvio, tiku xalak Ecuador, tasaskinilh Jehová pi xmakgtayalh xlakata nataspitpara kcongregación. Akxni xtlawamajku xʼoración, makasanalh xtimbre. Chatiy lakgkgolotsin lakgapaxialhnankgolh. Xlakan xatapaxuwan maxkikgolh tamakgtay nema xmaklakaskima.

17. ¿Tuku tasikulunalin makglhtinanaw akxni kamakgtayayaw tiku taxlajwanikgonit xtakanajlakan?

¹⁷ Lu nakinkamakgapaxuwayan komo nakamakgtayayaw tiku taxlajwanikgonit xtakanajlakan xlakata nalakgtaspitparakgo Jehová. Kaʼakxilhwi tuku lichuwinan Salvador, chatum precursor tiku lu liskuja xlakata nakamakgtaya tiku tamakgatlinikgonit Jehová: «Lakgachunin nila ktayani chu ktsuku tasa xlakata lu kpaxuwa. Lu tlan klimakgkatsi pi Jehová lakgmaxtunit kxkakilhtamaku Satanás tantum xborrego chu pi kkgalhinit talakgalhaman nakmakgtaya» (Hech. 20:35).

18. Komo wix tamakgatlininita Jehová, ¿tuku liwana milikatsit?

¹⁸ Komo wix tamakgatlininita xkachikin Jehová, liwana kakatsi pi xla chuntiya paxkiyan chu lakaskin pi kalakgtaspitti. Xlikana, xlakata tlan nalakgtaspita wi tuku militlawat. Pero kalakapastakti tlat tiku lichuwinan parábola nema lichuwinalh Jesús. Jehová kgalhkgalhima pi wix nataspita kxfamilia, chu xatapaxuwan namakgamakglhtinanan.