NKHANI YAKUSAMBIRA 26
“Welerani kwa Ine”
“Welerani kwa ine, ndipo ine niwelerenge kwa imwe.”—MAL. 3:7.
SUMU 102 ‘Wovwirani Awo Ŵakukhumbikwira Wovwiri’
CHILATO CHA NKHANI IYI *
1. Kasi Yehova wakujipulika wuli para muteŵeti wake wawelera kwa iyo?
NGA umo tikadumbiskirana mu nkhani iyo yajumpha, Yehova wakujiyaniska na muliska muwemi uyo wakupwelelera chomene mberere yake yiliyose. Wakupenja waliyose uyo wazgeŵa. Yehova wakaphalira Ŵaisrayeli awo ŵakamuleka kuti: “Welerani kwa ine, ndipo ine niwelerenge kwa imwe.” Tikumanya kuti Yehova wachali kujipulika nthena chifukwa iyo ‘wakusintha chara.’ (Mal. 3:6, 7) Yesu wakati Yehova na ŵangelo ŵakukondwa chomene para yumoza mwa ŵateŵeti ŵake wawelera kwa Iyo.—Luka 15:10, 32.
2. Kasi tiwonenge vichi mu nkhani iyi?
2 Tiyeni sono tiwone ntharika zitatu za Yesu izo zikulongora umo tingawovwilira awo ŵalopwa mwauzimu. Tiwonenge mikhaliro iyo tikwenera kuŵa nayo kuti tovwire mberere zakuzgeŵa kuti ziwelere kwa Yehova. Tiwonengeso kuti tiŵenge ŵakukondwa chomene para tikuyezgayezga kovwira awo ŵalopwa mwauzimu.
KUPENJA NJAWARA YAKUZGEŴA
3-4. Chifukwa wuli mwanakazi uyo wakuzunulika pa Luka 15:8-10 wakapenja makoramakora dirakima lake ilo likazgeŵa?
3 Tikwenera kulimbikira chomene kuti tisange awo ŵakukhumba kuwelera kwa Yehova. Mu ntharika iyo yili mu buku la Makani Ghawemi la Luka, Yesu wakalongosora za mwanakazi uyo wakapenjanga ndalama yanjawara yakuchemeka dirakima iyo yikazgeŵa. Njawara iyi wakayiwonanga kuti njakuzirwa chomene. Ntharika iyi yikulongora kuti mwanakazi uyu wakalimbikira chomene kupenja njawara yake.—Ŵazgani Luka 15:8-10.
4 Yesu wakalongosora umo mwanakazi uyu wakajipulikira wati wayisanga dirakima yake. Mu nyengo ya Yesu, nyengo zinyake mama para mwana wake wakutengwa, wakamupanga madirakima 10. Panji njawara iyi yikaŵa yakuzirwa chomene ku mwanakazi uyu chifukwa chakuti ŵakamupa mbamama ŵake. Mwanakazi uyu wakaghanaghananga kuti njawara yawa mu nyumba. Wakakozga nyali na kupenjapenja, kweni wakayisanga yayi. Wakawona kuti ungweru wa nyali yake ukaŵa wakukwana yayi kuti wasange njawara yake. Paumaliro, wakaphyera nyumba yose. Wakalisanga dirakima lake lakuzirwa mukati mu fuvu ilo wakaphyera mu nyumba. Wakakondwa chomene. Wakachema ŵabwezi ŵake na ŵazengezgani ŵake kuti waŵaphalire nkhani yiwemi iyi.
5. Chifukwa wuli pakukhumbikwa kulimbikira kuti tisange awo ŵalopwa mwauzimu?
5 Nga umo tawonera mu ntharika ya Yesu, pakukhumbikwa kulimbikira chomene kuti tisange chinthu icho chazgeŵa. Mwakuyana waka, tikwenera kulimbikira kuti tisange ŵanthu awo ŵalopwa mwauzimu. Nyengo zinyake pangaŵa kuti pajumpha vyaka vinandi kufuma apo ŵakalekera kuwungana nase. Nyengo zinyake ŵangasamira ku chigaŵa icho ŵabali na ŵadumbu ŵakuŵamanya yayi. Kweni tikukayika yayi kuti ŵanyake mwa ŵanthu aŵa sono ŵakukhumba nadi kuwelera kwa Yehova. Ŵakukhumba kuteŵetera Yehova pamoza na ŵabali na ŵadumbu. Kweni kuti ŵachite ivi ŵakukhumbikwira wovwiri withu.
6. Kasi tose mu mpingo tingawovwirapo wuli kupenja awo ŵalopwa?
6 Kasi mbanjani ŵangawovwirapo kupenja ŵakulopwa? Tose tingawovwirapo kwali ndise ŵalara, ŵapayiniya, ŵamumbumba ya uyo walopwa, kweniso ŵapharazgi waka mu mpingo. Kasi muli na mubwezi panji wachibali wakulopwa? Kasi mungachita wuli usange mwakumana na wakulopwa para mukupharazga nyumba na nyumba panji ku malo uko kukusangika ŵanthu ŵanandi? Para wakukhumba kuti mukamupelekereko nambara panji adiresi yake ku ŵalara, mungamovwira.
7. Kasi mukusambirapo vichi pa ivyo wakayowoya mulara munyake zina lake Thomas?
7 Kasi ŵalara ŵangachita wuli kuti ŵasange ŵakulopwa awo ŵakukhumba kuwelera kwa Yehova? Wonani ivyo wakayowoya mulara munyake zina lake Thomas * uyo wakukhala ku Spain. Mulara uyu wawovwirapo ŵakulopwa ŵakujumpha 40 kuweleraso mu mpingo. Iyo wakuti: “Chakwamba, nkhufumba ŵabali na ŵadumbu ŵakupambanapambana usange ŵakumanyapo wakulopwa waliyose kweniso uko wakukhala pasono. Panji nkhufumba ŵapharazgi mu mpingo usange ŵakukumbuka waliyose uyo wakuwungana yayi pasono. Ŵanandi mu mpingo ŵakukondwa kovwirapo chifukwa nawo ŵakuwona kuti ŵakuchitako mulimo wakupenja ŵakulopwa. Para naŵayendera ŵakulopwa, nkhuŵafumba vyakukhwaskana na ŵana ŵawo na ŵabali ŵawo ŵanyake. Ŵakulopwa ŵanyake ŵakutemwa kwiza na ŵana ŵawo ku maungano, ndipo ŵana aŵa nyengo zinyake ŵakuŵa kuti ŵakaŵapo ŵapharazgi. Nawoso ŵakwenera kovwirika kuti ŵawelere kwa Yehova.”
WOVWIRANI ŴAKULOPWA KUWELERA KWA YEHOVA
8. Mu ntharika ya mwana wakuzgeŵa iyo yili pa Luka 15:17-24, kasi dada wakachita wuli na mwana wake uyo wakapera?
8 Kasi tikwenera kuŵa na mikhaliro wuli kuti tovwire awo ŵakukhumba kuwelera kwa Yehova? Wonani ivyo tikusambirako ku ntharika ya Yesu ya mwana wakuzgeŵa. (Ŵazgani Luka 15:17-24.) Yesu wakalongosora kuti paumaliro mwana uyu wakawamo kuti wakasankha makora yayi ndipo wakawelera ku nyumba. Dada wake wakamuchimbilira na kumuvumbatira mwachitemwa, kumusimikizgira kuti wakumutemwa. Mwana wakajipanga mulandu pa ivyo wakachita ndipo wakajiwonanga kuti ngwakwenelera chara kuchemeka mwana wake. Dada wake chitima chikamukora chomene mwana wati walongosora umo wakajipulikiranga. Pamanyuma dada wakachitapo kanthu kulongora kuti wamupokelera mwana wake. Wakamupokelera nga ngwantchito yayi. Kuti walongore nadi kuti wamupokelera mwana wake, dada wakanozga chiphikiro na kumupa mwana wake uyo wakazgeŵa vyakuvwara vyakutowa.
9. Kasi tikwenera kuŵa na mikhaliro wuli kuti tovwire ŵakulopwa kuwelera kwa Yehova? (Wonani bokosi lakuti “Umo Tingawovwilira Awo Ŵakukhumba Kuwelera kwa Yehova.”)
9 Yehova wali nga ni dada wa mu ntharika iyi. Wakuŵatemwa ŵabali na ŵadumbu awo ŵali kulopwa ndipo wakukhumba kuti ŵawelere kwa iyo. Para tingamuyezga Yehova, nase tiŵawovwirenge kuti ŵawelere kwa iyo. Kweni kuti tichite nthena, tikwenera kulongora kuzikira, lusungu na chitemwa. Chifukwa wuli tikwenera kulongora mikhaliro iyi, ndipo tingayilongora wuli?
10. Chifukwa wuli tikwenera kuzikira kuti tovwire uyo walopwa kuti wawelere kwa Yehova?
10 Tikwenera kuzikira chifukwa pakutora nyengo kuti munthu wawelere kwa Yehova. Ŵanandi awo ŵakaŵapo ŵakulopwa ŵakuzomerezga kuti ŵalara na ŵanji mu mpingo ŵakaŵayendera kanandi waka pambere ŵandawelere kwa Yehova. Mudumbu munyake zina lake Nancy, wa ku Southeast Asia, wali kulemba kuti: “Mubwezi wane mu mpingo ndiyo wakanovwira chomene. Wakanitemwanga nga kuti waka ndine mukuru wake. Wakanikumbuska vinthu viwemi ivyo tikachitirapo lumoza. Wakanitegherezganga chomene apo nkhalongosoranga umo nkhajipulikiranga, ndipo wakachedwa yayi kunipa ulongozgi. Wakalongora kuti ni mubwezi wanadi, wakunozgeka kovwira mu nyengo za suzgo.”
11. Chifukwa wuli tikwenera kuŵa ŵalusungu kuti tovwire awo ŵali kukhuŵara?
11 Lusungu luli nga ni munkhwala wankhongono, ndipo lungawovwira munthu uyo wali kulopwa chifukwa chakuti wakakhuŵara. Ŵakulopwa ŵanyake ŵakakhuŵazgika na munyake mu mpingo vyaka vyakumanyuma ndipo m’paka sono ŵachali ŵakukwiya. Pa chifukwa ichi, ŵakukhumba yayi kuwelera kwa Yehova. Ŵanji ŵakughanaghana kuti ŵali kuŵachitira mwambura urunji. Ŵanthu ŵanthena ŵangakhumbikwira munthu uyo wangaŵategherezga na kuŵapulikiska umo ŵakujipulikira. (Yak. 1:19) María, uyo wakaŵa wakulopwa panyengo yinyake, wakuti: “Nkhakhumbanga munthu uyo wanganitegherezga, kunipembuzga, na kunipa ulongozgi uwemi uwo unganovwira.”
12. Longosorani umo chitemwa cha Yehova chingawovwilira ŵakulopwa kuwelera kwa iyo.
12 Baibolo likulongosora kuti chitemwa icho Yehova wali nacho pa ŵanthu chili nga ni chingwe. Kasi chitemwa cha Yehova chili nga ni chingwe munthowa wuli? Wonani chiyelezgero ichi: Tiyelezgere kuti mwawira mu nyanja. Mu nyanja muli majigha ndipo maji ngakuzizima chomene. Mwamba kubira. Mbwenu pamanyuma munthu munyake uyo wali mu boti pafupi namwe wakumuponyerani chinthu chinyake kuti mukoreko mwakuti muleke kubira. Mungamuwonga chomene. Kweni kuti mupone pangakhumbikwiraso wovwiri unyake. Mukwenera kuwukamo mu maji. Ntheura mungakhumbikwira kuti munthu munyake mu boti wamuponyerani chingwe kuti chimovwirani kufika mu boti. Pakuyowoya vya Ŵaisrayeli awo ŵakapuluka, Yehova wakati: “Nkhaŵaguzanga . . . na vingwe vya chitemwa.” (Hos. 11:4) Chiuta wakujipulika nthena mazuŵa ghano na ŵanthu awo ŵali kuleka kumuteŵetera ndipo ŵakwenjerwa waka na masuzgo agho ŵakukumana nagho. Wakukhumba kuti ŵamanye kuti wakuŵatemwa, ndipo wakukhumba kuŵawovwira kuti ŵawelere kwa iyo. Yehova wangagwiliskira ntchito imwe kuti walongore chitemwa chake pa iwo.
13. Kasi ivyo vikamuchitikira Pablo vikulongora wuli kuti chitemwa chingawovwira ŵanji kuwelera kwa Yehova?
13 Ntchakuzirwa chomene kuŵaphalira ŵakulopwa kuti Yehova wakuŵatemwa ndipo nase tikuŵatemwa. Pablo, uyo tamuzunura mu nkhani iyo yajumpha, wakalopwa vyaka vyakujumpha 30. Iyo wakuti: “Mulenji unyake apo nkhafumanga panyumba, nkhakumana na mudumbu munyake muchekuru. Mudumbu uyu wakaŵa walusungu chomene ndipo wakayowoya nane mwachitemwa. Nkhamba kulira nga ni mwana. Nkhamuphalira kuti vikulongora kuti Yehova ndiyo wamutuma kuti wazakayowoye nane. Pa nyengo iyi ndipo nkhasankha kuwelera kwa Yehova.”
LUTILIRANI KOVWIRA ŴAKULOPWA
14. Kuyana na ntharika iyo yili pa Luka 15:4, 5, kasi muliska wakuchita wuli para mberere yakuzgeŵa wayisanga?
14 Para tasanga ŵakulopwa, tikwenera kulutilira kuŵawovwira. Nga ni mwana wakuzgeŵa wa mu ntharika ya Yesu, ŵangaŵa kuti ŵakujiwona ŵambura kwenelera ndipo ŵakusuzgika chomene maghanoghano. Ndipo ŵangaŵa kuti ŵali kulopwerathu mwauzimu chifukwa cha ivyo ŵasangana navyo mu charu cha Satana ichi. Tikwenera kuŵawovwira kuti ŵakhozge chipulikano chawo mwa Yehova. Mu ntharika ya Yesu ya mberere yakuzgeŵa, Yesu wakalongosora kuti muliska wakayinyamura mberere yake pa chiŵegha na kuyiwezgera pa mskambo. Pa nyengo iyi, muliska wakuŵa kuti wamalira kale nyengo yinandi na nkhongono zake pakupenja mberere yakuzgeŵa. Kweni wakumanya kuti wakwenera kuyinyamura chifukwa yilije nkhongono zakuti yiwelere ku mberere zinyake.—Ŵazgani Luka 15:4, 5.
15. Kasi tingawovwira wuli ŵakulopwa awo ŵawelera kwa Yehova? (Wonani bokosi lakuti “ Icho Chingaŵawovwira.”)
15 Tingakhumbikwira kumalira nyengo yinandi na nkhongono kuti tovwire ŵakulopwa kumarana na masuzgo agho ghakuŵawezgera nyuma. Ndipo na mzimu wa Yehova, Mazgu ghake, ndiposo mabuku ghithu, tingaŵawovwira kuti ŵaŵeso ŵakukhwima mwauzimu. (Rom. 15:1) Kasi tingachita wuli nthena? Mulara munyake uyo wateŵetera vyaka vinandi, wakuti, “Ŵakulopwa ŵanandi awo ŵaweleraso kwa Yehova ŵakukhumbikwira kusambiraso nawo Baibolo.” * Ntheura para mwapempheka kuti musambirenge na munthu wakulopwa, mukwenera kukondwa kuchita mulimo uwu usange mungafiska. Mulara uyu wakatiso, “Mupharazgi uyo wachitiskenge sambiro wakwenera kuŵa waubwezi, munthu uyo wakulopwa wangafwatuka nayo.”
CHIMWEMWE KUCHANYA NA PA CHARU CHAPASI
16. Kasi tikumanya wuli kuti ŵangelo ŵakutovwira?
16 Pali vyakuchitika vinandi ivyo vikulongora kuti ŵangelo ŵakovwira kusanga awo ŵakukhumba kuwelera kwa Yehova. (Chivu. 14:6) Mwachiyelezgero, Silvio, wa ku Ecuador, wakalomba chomene kuti wawelere mu mpingo. Apo wakaŵa wachali kulomba, ŵalara ŵaŵiri ŵakiza pa nyumba yake. Paulendo uwu, ŵalara ŵakakondwa chomene kumovwira.
17. Kasi tijipulikenge wuli usange tovwira ŵakulopwa?
17 Tiŵenge na chimwemwe chikuru para tovwirenge ŵakulopwa kuwelera kwa Yehova. Wonani ivyo wakayowoya Salvador, mupayiniya uyo wakuyezgayezga chomene kovwira ŵakulopwa. Iyo wakati: “Nyengo zinyake nkhuthiska masozi chifukwa cha chimwemwe. Nili wakukondwa chomene kuti nkhugwilira pamoza na Yehova kovwira ŵateŵeti ŵake kufumako ku charu cha Satana na kuwelera ku mpingo.”—Mil. 20:35.
18. Usange ndimwe wakulopwa, kasi mukwenera kumanya vichi?
18 Usange muli kuleka kuwungana na ŵanthu ŵa Yehova, manyani kuti Yehova wachali kumutemwani. Wakukhumba kuti muwelere kwa iyo, ndipo mukwenera kuyezgayezga kuchitapo kanthu kuti muwelere kwa iyo. Kweni nga ni dada wa mu ntharika ya Yesu, Yehova wakulindilira kuti muwelere kwa iyo, ndipo wazamuŵa wakukondwa kumupokelerani.
SUMU 103 Ŵaliska Ŵapelekeka Kuŵa Vyawanangwa
^ ndime 5 Yehova wakukhumba kuti awo ŵali kuleka kuwungana ŵawelereso kwa iyo. Tingachita vinandi kuti tovwire awo ŵakukhumba kuweleraso kwa Yehova. Mu nkhani iyi tiwonenge umo tingaŵawovwilira.
^ ndime 7 Mazina ghanyake ghasinthika mu nkhani iyi.
^ ndime 15 Ŵakulopwa ŵanyake ŵangawovwirika para mungasambira nawo mitu mu buku la Kasi Mungachita Wuli Kuti Mukhalilire mu Chitemwa cha Chiuta? Apo ŵanyake ŵangawovwirika para mungasambira nawo mitu yinyake mu buku la Sendelerani kwa Yehova? Komiti ya Uteŵeti ya Mpingo ndiyo yili na udindo wakusankha uyo wangasambira na ŵakulopwa.
^ ndime 68 MAZGU GHAKULONGOSORA VITHUZI: Ŵabali ŵatatu ŵakovwira mubali uyo wakukhumba kuwelera kwa Yehova. Munyake wamulembera meseji pa foni, munyake wakumusimikizgira kuti ngwakutemweka, kweniso munyake wakumutegherezga.
