1. Мар шӧдэ Иегова, куке ужась-тыршисез со доры берытске?

 КЫЗЬЫ ми эскеримы кылем статьяын, Иегова ассэ ӵошатэ пудо возьмасен, кудӥз туж сюлмаське котькуд ыжез сярысь. Одӥгез соос пӧлысь ышиз ке, Инмар сое утчалоз. Иегова вераз Израиль калыклы, кудӥз солэсь палэнскиз: «Мон пала берытске, соку Мон тӥ пала берытско». Ми тодӥськомы, Иегова аслаз ужась-тыршисьёсыз шоры азьло сямен ик учке шуыса, малы ке шуоно со вера: «Мон уг вошъяськиськы» (Мал. 3:6, 7). Иисуслэн верамезъя, Иегова кылчинъёсыныз ӵош шумпотэ, куке ужась-тыршисьёсыз пӧлысь одӥгез ке но со доры берытске (Лука 15:10, 32).

2. Мае ми эскеромы та статьяын?

² Ойдолэ эскеромы Иисуслэсь куинь мадёнъёссэ, кудъёсыз валаны юртто, кыӵе юрттэт кулэ Иеговалэсь палэнскемъёслы. Ми вераськомы со сярысь, кыӵе сямъёс милемлы кулэ, ышем ыжъёслы Инмар доры берытскыны юрттон понна. Озьы ик ми адӟомы, макем бадӟым шумпотон басьтомы, тодытэмысь дугдэм вын-агайёслы но сузэр-апайёслы юрттӥмы ке.

3, 4. Малы кышномурт, кудӥз сярысь Лукалэсь 15:8—10 вераське, сокем тыршыса утчаз ышем драхмазэ?

³ Милемлы туж тыршоно утчаны соосты, кинъёслэн Иегова доры берытскемзы потэ. Лукалэсь ӟеч иворын гожтэмын Иисуслэн мадёнэз. Отын вераське кышномурт сярысь, кудӥз утча туж дуно ышем коньдонзэ, драхмазэ. Та мадён саклыкмес висъя утчанлы. (Лыдӟе Лукалэсь 15:8—10.)

⁴ Иисус вера, мар шӧдэ кышномурт, кудӥз шедьтэ солы туж дуно потӥсь драхмаез. Иисус улон нуналъёсы Израильысь куд-ог анайёс нылъёссылы сюанзы дыръя дас драхма кузьмало  вал. Ышем коньдон та кузьым пӧлысь луыны быгатӥз. Кышномурт малпа, коньдонэз выж вылэ усиз шуыса. Со лампазэ ӝуатэ, ваньзэ котыр учке, но номыре уг шедьты. Пичи азвесь коньдонэз шедьтон понна, солэн лампаез сокем югыт уг пишты, вылды. Соин ик со туж тыршыса быдэс корказэ ӵуже. Но тани, тузон пӧлысь со адӟе туж дуно драхмазэ, кудӥз лампалэн пиштэмез улсын чиля. Сое шедьтыса, со туж шумпотэ! Кышномурт эшъёссэ но бускельёссэ ӧте, соослы шумпотонзэ веран понна.

5. Малы куддыръя секыт шедьтыны вын-агайёсты но сузэр-апайёсты, кудъёсыз тодытон уже пыриськемысь дугдӥзы?

⁵ Кызьы адӟиське Иисуслэн мадёнысьтыз, ышем арбериез шедьтон понна, туж тыршыны кулэ. Озьы ик милемлы но туж тыршоно луоз, вылды, тодытон уже пыриськемысь дугдэм вын-агайёсты но сузэр-апайёсты шедьтон понна. Оло нош, соос трос аръёс талэсь азьло ини милемын кусып воземысь дугдӥзы яке кошкизы отчы, кытын вын-агайёс но сузэр-апайёс соосын тодмо ӧвӧл. Озьы ке но юн осконэн вераны луэ, ӵапак али соос пӧлысь кинлэн ке но туж потэ Иегова доры берытскемез. Соослэн азьло сямен вын-агайёсынызы но сузэр-апайёсынызы ӵош Инмарлы ужамзы-тыршемзы потэ, нош соослы милям юрттэтмы кулэ.

6. Кызьы кенешысь ваньзы утчаны быгато вын-агайёсты но сузэр-апайёсты, кудъёсыз тодытон уже пыриськемысь дугдӥзы?

⁶ Кин утчаны быгатэ тодытон уже пыриськемысь дугдэм вын-агайёсты но сузэр-апайёсты? Ваньмы ми — тӧроос, пионеръёс, тодытэмысь дугдэмъёслэн ӵыжы-выжыоссы но мукет христианъёс. Вань-а тӥляд эшъёсты яке ӵыжы-выжыосты пӧлын соос, кинъёс кенешлэсь палэнскизы? Яке тӥ пумитады, вылды, сыӵе ивортӥсез, коркась корка ветлыса ӟеч иворез веракуды яке трос калыко интыосын тодытыкуды? Соку солы валэктэ: со пумит ӧвӧл ке, тӥ солэсь телефон номерзэ но адрессэ тӧроослы вераны быгатӥськоды, собере соос со доры лыктозы.

7. Малы дышетэ тӥледыз Томас нимо тӧролэн учырез?

⁷ Иеговалэсь палэнскемъёсты утчан понна тужгес но кыл куто тӧроос. Мар соос карыны быгато? Эскеромы Томас b нимо тӧролэсь учырзэ, кудӥз Испаниын улэ. Со кенеше берытскыны юрттӥз 40-лэсь но тросгес Адӟись-Ивортӥсьёслы. Томас вера: «Мон юасько пӧртэм вын-агайёслэсь но сузэр-апайёслэсь, тодо-а соос, кытын али уло тодытэмысь дугдэм ивортӥсьёс. Яке тунсыкъяськисько, тодо на-а соос кинэ ке, кин кенешлэн пумиськонъёсаз ветлэмысь дугдӥз. Тросэз шумпото, соос но сыӵе ивортӥсьёсты утчаны быгато шуыса. Берлогес, тодытон уже пыриськемысь дугдэм вын-агайёс но сузэр-апайёс доры лыктыса, мон соослэсь юалляськисько, кызьы уло соослэн нылпиоссы но мукет ӵыжы-выжыоссы. Куд-ог сыӵе христианъёс азьло кенешлэн пумиськонъёсаз нылпиосынызы ӵош ветлӥзы. Нош со нылпиос ивортӥсьёс вал, вылды. Соослы но юрттыны кулэ Иегова доры берытскыны».

8. Лукалэсь 15:17—24 гожтэмъя, кызьы ассэ возиз атай ӧпкелись пиеныз?

⁸ Кыӵе сямъёс милемлы кулэ, юрттон понна соослы, кинъёслэн Иегова доры берытскемзы потэ? Малпаськомы, малы милемыз дышетыны быгатэ Иисуслэн мадёнэз пи сярысь, кудӥз атай юртысьтыз кошкиз. (Лыдӟе Лукалэсь 15:17—24.) Иисус вераз, берлогес пилы визь пыриз но, со дораз берытскыны ужпум кутӥз шуыса. Пизэ адӟыса, атай солэн пумитаз потэ но бордаз ӟыгырске. Солэн потэ, пиез мед адӟоз шуыса, макем юн со сое яратэ. Нош егит пиез возьытлыкез йыръе. Со малпа, пиен лыдъяськыны ярамон ӧвӧл ни шуыса.  Атаез жаляса кылзэ сое но возьматэ, пиезлэн берытскемезлы шумпотэ шуыса. Со ассэ соин медоен кадь уг возьы, нош яратоно пиеныз кадь ассэ возе. Атай, пиезлы яратэмзэ возьматон понна, ческыт сиён-юон дася но пиезлы самой умой дӥськут вайыны косэ.

9. Кыӵе сямъёс милемлы кулэ, тодытэмысь дугдэм вын-агайёслы но сузэр-апайёслы Иегова доры берытскыны юрттон понна? (Учке « Кызьы юрттоно соослы, кинъёслэн выльысь Иеговалы ужамзы-тыршемзы потэ» рамкаез.)

⁹ Иеговаез ӵошатыны луэ та мадёнысь атаен. Со яратэ тодытэмысь дугдэм вын-агайёсмес но сузэр-апайёсмес, озьы ик солэн потэ, соос со доры мед берытскозы шуыса. Ми быгатӥськомы соослы юрттыны, Иеговалэсь адӟем кариськомы ке. Со понна милемлы кулэ чидан, гажан-жалян но яратон. Малы та сямъёс кулэ луо но кызьы ми соосты возьматыны быгатӥськомы?

10. Малы милемлы чидась луоно, куке кинлы ке Иегова доры берытскыны юрттӥськомы?

¹⁰ Милемлы чидась луоно, малы ке шуоно, Иегова доры берытскон понна, дыр кулэ. Тодытэмысь дугдэмъёс пӧлысь тросэз верало, тӧроос но мукет ивортӥсьёс соос доры трос пол ветлӥзы шуыса. Собере гинэ та ивортӥсьёс выльысь Иеговалы ужаны-тыршыны кутскизы. Азиысь Нанси нимо сузэр гожтӥз: «Кенешын мынам вал матысь эше, кудӥз мыным туж юрттӥз. Та сузэр монэ апайзэ кадь яратӥз. Со вералляз мыным со дыр сярысь, кудзэ ми ӵош ортчытъямы. Нош куке мынам сюлэмме усьтэме потэ вал, со монэ чидаса кылзылӥз но визь-кенеш сётылӥз. Та сузэр возьматӥз: со мон понна зэмос эш луэ, кудӥз котькыӵе дыре юрттыны дась».

11. Малы милемлы гажась-жалясь луоно, ӝоже усемъёслы юрттон понна?

¹¹ Гажан-жалян кужмо эмъюм выллем — со  вӧсь луэмез капчиятэ, куке кин ке сюлэммес вӧсь каре. Куд-ог христианъёс тодытэмысь но пумиськонъёсы ветлэмысь дугдӥзы, малы ке шуоно трос аръёс талэсь азьло соосты кенешын кин ке ӝоже уськытӥз но, та дырозь соос сюлмазы вожпотонэн уло. Соин сэрен соослы Иегова доры берытскыны секыт. Сыӵе ивортӥсьёс малпаны быгато, мукетъёсыз соосын асьсэды шонертэм возизы шуыса. Соослы эш кулэ, вылды, кудӥз соосты кылзоз но шӧдонъёссэс валалоз (Иак. 1:19). Мария, кудӥз кӧня ке дыр ӵоже кенеше ӧз ветлы, тодаз вае: «Мыным кулэ вал эш, кудӥз монэ кылзысал но буйгатысал, визь-кенеш но юрттэт сётысал».

12. Кызьы Иеговалэн яратонэз тодытэмысь дугдэм вын-агайёслы но сузэр-апайёслы кенеше берытскыны юрттэ? Вералэ пример.

¹² Библиын верамын, Иегова милемыз аслаз яратонэныз ас палаз кыске яке ас дораз вае шуыса. Кызьы со сое лэсьтэ? Пуктэ син азяды: тӥ мур гуэ усиды. Гу сокем мур, асьтэ понна тӥ отысь потыны но уд быгатӥське. Отысь потэмды луоз соку гинэ, куке кин ке тӥледлы гозы куштоз но тӥледыз отысь кыскыса поттоз. Иегова вераз израиль калык сярысь, кудӥз солэсь палэнскиз: «Герӟетъёсын-кусыпъёсын Мон соосты нуи, яратонлэн герӟетъёсыныз-кусыпъёсыныз» (Ос. 11:4). Туннэ но Инмарлэн сыӵе ик шӧдонъёсыз соос пумысен, кинъёс солы ужамысь-тыршемысь дугдӥзы но кинъёс шуг-секытъёссы но сюлмаськонъёссы пӧлы выемын. Соос шоры Иегова гуэ сюремъёс шоры кадь учке. Инмарлэн потэ: соос мед тодозы, со соосты яратэ но ас дораз ваемез потэ шуыса. Тон пыр Иегова соослы яратэмзэ возьматыны быгатэ.

13. Вералэ учырез, кудӥз возьматэ, кызьы асьмелэн яратонмы мукетъёсызлы Иегова доры берытскыны юрттэ.

¹³ Тодытэмысь дугдэм христианъёсты туж  кулэ оскытыны, Иегова соосты яратэ шуыса, озьы ик ми но соосты яратӥськомы шуыса. Пабло агай, кудӥз сярысь кылем статьяын вераськиз, тодытон уже 30-лэсь но тросгес аръёс ӵоже ӧз пыриськы. Со тодаз вае: «Одӥг пол ӵукна, дорысьтым потэм берам, монэн арлыдо сузэр лякытэн вераськыны кутскиз. Со мыным сокем шуныт кылъёс вераз, мон нылпи кадь бӧрдыны кутски. Мон верай солы, ачиз Иегова сое мон доры ыстӥз кадь шуыса. Ӵапак со дыре мон ужпум кутӥ Иегова доры берытскыны».

14. Мар каре вал пудо возьмась, ышем ыжзэ шедьтыса, Лукалэсь 15:4, 5 лыдэ басьтоно ке?

¹⁴ Тодытон уже пыриськемысь дугдэм ивортӥсез шедьтэммы бере, милемлы азьланяз но солы юрттыны кулэ. Иисуслэн мадёнысьтыз атаез доры берытскем пи сямен, сыӵе христиан муртлэн сюлмыз куректыны быгатэ. Со кӧня ке дыр ӵоже Шайтанлэн дуннеяз улӥз бере, Иеговаен сокем матысь кусыпъёсыз солэн ӧвӧл ни, дыр. Ми солы юрттыны кулэ Иеговалы осконзэ юнматыны. Ышем ыж сярысь мадёназ Иисус вера, кызьы пудо возьмась ыжзэ кияз басьтэ но, пельпум вылаз ӝутыса, берен уллёе вае. Ыжзэ шедьтон понна, пудо возьмась трос дырзэ но кужымзэ быдтӥз ини. Озьы ке но со вала, ыжлэн уллёе берытскыны кужмыз ӧвӧл шуыса, соин ик со сое кияз кутыса вае. (Лыдӟе Лукалэсь 15:4, 5.)

15. Кызьы юрттыны луэ тодытэмысь дугдэм вын-агайёслы но сузэр-апайёслы, кудъёсызлэн Иегова доры берытскемзы потэ? (Учке « Туж кулэ луись юрттэт» рамкаез.)

¹⁵ Милемлы трос дыр но кужым кулэ луоз, вылды, тодытон уже пыриськемысь дугдэм ивортӥсьлы шуг-секытъёссэ вормыны юрттон понна. Нош святой духлы, Инмарлэн Кылызлы но Библия вылэ пыкиськыса гожтэм  публикациослы луыса ми юрттыны быгатӥськомы кенешлэсь палэнскемъёслы Иеговаен кусыпъёссэс тупатыны (Рим. 15:1). Одӥг агай, кудӥз кема дыр ӵоже тӧро луыса ужа-тырше, вера: «Тодытэмысь дугдэм вын-агайёс но сузэр-апайёс пӧлысь тросэныз, кудъёсыз ужпум кутӥзы нош ик Иеговалы ужаны-тыршыны, Библиез дышетыны кулэ c. Христиан мурт, кудзэ тӧроос сыӵе ивортӥсен Библиез дышетыны куризы, солы зэмос но оскымон эш луыны кулэ». Тӥледыз сыӵе дышетон ортчытыны куризы ке, тӥ шумпотыса соглаш кариськоды, дыр.

16. Кытысь ми тодӥськомы, кылчинъёс милемлы юрттыны быгато шуыса?

¹⁶ Трос учыръёс возьмато: кылчинъёс милемлы утчаны юртто тодытэмысь дугдэм вын-агайёсты но сузэр-апайёсты, кудъёсызлэн Иегова доры берытскемзы потэ (Усьт. 14:6). Тани одӥг учыр. Эквадорысь Сильвио агайлэн туж потэ вал кенеше берытскемез но, со Иеговалы ӟырдыт вӧсяськиз, юрттэт курыса. Вӧсяськыкуз солэн ӧсаз кин ке но жингыртӥз. Ӧс дорысь со адӟиз кык тӧроосты, кудъёсыз дась вал солы кулэ луись юрттэт сётыны.

17. Мае ми шӧдӥськомы, куке Иеговалэсь палэнскем вын-агайёслы но сузэр-апайёслы юрттӥськомы?

¹⁷ Иеговалэсь палэнскем вын-агайёслы но сузэр-апайёслы юрттон трос шумпотон вайыны быгатэ. Тани мар вера Сальвадор агай, кудӥз пионер луэ но туж тырше тодытэмысь дугдэм ивортӥсьёслы юрттыны: «Куддыръя шумпотэменым мынам бӧрдэме ик потэ. Мон туж шумпотӥсько: Иегова Шайтанлэн дуннеысьтыз одӥгзэ яратоно ыжзэ утиз но мыным дан сётӥз солэн ужаз пыриськыны!» (Ап. уж. 20:35).

18. Малы оскыны быгато тодытэмысь дугдэм вын-агайёс но сузэр-апайёс?

¹⁸ Тон тодытэмысь но кенешлэн пумиськонъёсаз ветлэмысь дугдӥд ке, оскы: Иегова тонэ азьло сямен ик яратэ. Солэн потэ, тон со доры мед берытскод шуыса. Зэм но, со понна тыныд аслыд но тыршыны кулэ. Нош Иегова, Иисуслэн мадёнысьтыз атай сямен, туж возьма тынэсьтыд берытскемдэ. Со туж шумпотоз, тон дорад бертӥд ке!