1. Yehova onoonela sai vaavo mutthu aarimenle onihokolowela awe wa yena?

MWAHA ovinre, nihoona wira Yehova onniilikanyiha ni makampusi ooloka onikhapelela oratteene khula epwittipwitthi awe. Nave onnaavya khula epwittipwitthi erimenle. Biibiliya onihimya wira Yehova aahaaleela aIsarayeli yaarimenle wira: “Muhokoloweleke wa miyo, ni miyo kinohokolowela wa nyuwo”. Ninnikupali wira Yehova oniphavela wira ale ahiyale omukokhorela ahokolowele wa yena. Ninsuwela sai? Ninnisuwela eyo, okhala wira Yehova onihimya wira “nkinirukunuwa nnákhala ottharuwa”, eyo piiyo, Yehova khoturukeyale. (Mal. 3:6, 7) Yesu aahimmye wira Yehova ni malaikha annihakalala vanceene vaavo mutthu aarimenle onihokolowela awe wa Yehova.—Luka 15:10, 32.

2. Mwaha ola, ninrowa othokorerya exeeni?

² Vano nrowe nithokorerye malikanyiho a Yesu, yaawo anrowa oniixuttiha itthu sinceene sinrowa onikhaliherya waakhaliherya ale ahiyale orowela mithukumano ni olaleerya wira ahokolowele wa Yehova. Nave ninrowa woona mikhalelo ninreerela ahu okhalana wira naakhaliherye atthu awo ohokolowela wa Yehova. Ohiya-vo, nnimoona wira ninniphwanya ohakalala vaavo nnaakhaliherya ahu ale ahiyale orowela mithukumano ni olaleerya.

3-4. Xeeni muthiyana onilavuliwa Luka 15:8-10, aavya awe oratteene musurukhu awe?

³ Nihaana wiimananiha vanceene wira naaphwanye ale aniphavela ohokolowela wa Yehova. Nlikanyiho aalavunle awe Evangelyo ya Luka, Yesu aahimulavula muthiyana aarimeeliwe musurukhu wa faita yinceene wiihaniwa edrakima. Okathi ninrowa ahu othokorerya nlikanyiho nla, ninrowa owehexexa wiimananiha wa muthiyana ole ophavela musurukhu awe.—Mmusome Luka 15:8-10.

⁴ Yesu ahooniherya mukhalelo ni moonelo wa muthiyana ole vaavo aavya awe musurukhu awe waarimenle. Mahiku a Yesu, okathi muthiyana a wIsarayeli aatheliwa awe, okathi mukina maama awe aaninvaha inoota muloko (10) sa musurukhu wiihaniwa edrakima. Musurukhu ole wa edrakima waari wa efaita yinceene mwaha woowi muthiyana ole aavahiwe ni maama awe. Muthiyana ole aanikupali wira musurukhu awe waamorenle  vatthayani. Nto owo aahipattiha muthuko onaavya opuro wotheene, masi khaaphwannye. Moottharelana, owo aahoona wira makhura yaari muxamaniiyani mwawe yaahala vakhaani omala, nto khiyaarowa ophiyerya okathi aarowa awe oviriha ophavelaka musurukhu awe waarimenle. Nuumala-vo, owo onnivela mpaani motheene aavyaka musurukhu awe. Wanikisa waya, omwaleelaka ni muthuko awe onniweha waaryaka vatthayani musurukhu awe wa efaita yinceene. Owo onnihakalala vanceene okhala wira oophwanya musurukhu awe! Nto onnaathukumanya apatthani awe ni anamwaattamanani awe wira aaleele ihapari iyo soohakalaliha.

5. Xeeni vanireerela aya wiimananiha wira naaphwanye ale ahiyale orowela mithukumano ni olaleerya?

⁵ Nlikanyiho na Yesu ninniniixuttiha wira vaavo ennirimeela aya etthu ya faita yinceene, ninniimananiha vanceene wira niphwanye etthu eyo. Mwa enamuna emosaru, nihaana wiimananiha vanceene wira naaphwanye ale ahiyale orowela mithukumano ni olaleerya. Woonasa wene, soovira iyaakha sinceene mutthu owo ohiyale ene orowela mithukumano ni olaleerya. Nave pooti wira mutthu owo oothaamela muttetthe mukina. Nto woonasa wene, anna ni arokora a muttetthe owo, khanimusuwela. Nave ninnikupali wira atthu akina ahiyale orowela mithukumano ni olaleerya, anniphavela ohokolowela wa Yehova. Awo anniphavela otthikela omurumeela Yehova vamosa ni anna ni arokora, masi khaniwerya opaka eyo ahikhaliheriwe.

6. Miloko sotheene sinrowa okhaliherya sai owaavya ale ahiyale orowela mithukumano ni olaleerya?

⁶ Owaavya ale ahiyale orowela mithukumano ni olaleerya muteko waawaani? Owo muteko wa atthu otheene a mmulokoni, waahela muhina axitokweene, mapioneero, anamalaleerya ni ale arina mmusi wala mpatthani aya ohiyale orowela mithukumano ni olaleerya. Niireke ookhala mmusi wala mpatthani anyu ohiyale orowela mithukumano ni olaleerya? Munrowa opaka exeeni akhala wira munnimphwanya mutthu ohiyale orowela mithukumano ni olaleerya, vaavo munilaleerya anyu empa ni empa aahiiso mapuro oowaatta atthu? Akhala wira mutthu owo onniphavela, munvekeleke nummuru nawe aahiiso opuro onikhala awe. Nuumala-vo, mwaavahe nummuru nlo axitokweene a muloko anyu aahiiso muloko waattamenle.

7. Ntakiheryo na mutokweene oniihaniwa Thomas, ninniixuttiha exeeni?

⁷ Axitokweene tarina muritti muulupale woowaavya ale ahiyale orowela mithukumano ni olaleerya. Anrowa owerya sai ovara muteko owo? Nkahaya nwehe ele ohimmye awe mutokweene oniihaniwa Thomas, * yoowo onikhala wEspanha ni aakhalihenrye atthu anivikana 40 ohokolowela wa Yehova. Thomas onihimya so: “Etthu yoopacerya kaapaka aka, waari waakoha anna ni arokora akhala wira yaanisuwela opuro yaakhala aya anna ni arokora ale ahiyale orowela mithukumano ni olaleerya. Nave kaanaakoha anamalaleerya akhala wira annimusuwela mutthu ohiyale orowela mithukumano. Atthu anceene a mmulokoni yaanikhaliherya, maana yaanisuwela wira yaanikhaliherya owaavya anna ni arokora ahiyale orowela mithukumano ni olaleerya. Nto okathi kaaxukurya aka anna ni arokora yaahiyale orowela mithukumano ni olaleerya, kaanaakoha ihaali sa anaaya ni amusi aya. Anna ni arokora akina yaanaakuxa anaaya arowaka omithukumanoni. Akina anaaya yaari anamalaleerya oohipatisiwa. Nave anamwane awo, ahaana okhaliheriwa ohokolowela wa Yehova”.

8. Nlikanyiho na Yesu nri Luka 15:17-24, paapa aamuthokorenrye sai mwanawe?

⁸ Mikhalelo xeeni ninreerela ahu okhalana wira naakhaliherye ale ahiyale orowela mithukumano ni olaleerya ohokolowela wa Yehova? Vano nrowe niwehe itthu nniixutta ahu ni nlikanyiho na Yesu na mwaana oohiiwananeya aakhumme etthoko ya anamuyari awe. (Mmusome Luka 15:17-24.) Yesu aahitthokiherya okathi mwaana ole oonale awe wira aari mulolo ni aahaana ohokolowela etthoko ya anamuyari awe. Nuumala omoona mwanawe, paapa awe ahimutthimakela ni aahimukhupaarela omooniheryaka wira aanimphenta vanceene. Okhala wira mwaana ole aaniivaha nthowa mwaha wa itthu aapanke awe, owo oona wira khaaphwanela-tho wiihaniwa mwanawe paapa ole. Nuumala omwiiwa olavulaka moonelo ni muupuwelo awe, paapa ole aahimoonela othunku mwanawe. Paapa  ole onnipaka etthu wira omooniherye mwanawe wira onnaakheliwa mwaha wootthikela owaani. Nave paapa ole khonrowa omuthokoreryaka ntoko namuteko, masi ntoko mwaana onimphenta awe. Wira ooniherye wira aanimphenta mwanawe ni aanimwaakhela ni matata manli, paapa ole aahiruma wira mwaana ole owarihiwe ikuwo sooreera ni aahipaka efesta.

9. Mikhalelo xeeni ninreerela ahu okhalana wira naakhaliherye ale ahiyale orowela mithukumano ni olaleerya ohokolowela wa Yehova? (Nwehe ekaaxa eni: “ Moota Wowaakhaliherya Ale Aniphavela Ohokolowela wa Yehova.”)

⁹ Yehova ori ntoko paapa a nlikanyiho na Yesu. Tthiri Yehova onnaaphenta anna ni arokora ahiyale orowela mithukumano ni olaleerya, yaawo aniphavela ohokolowela wa yena. Nimutakihaka Yehova, nnoowerya waakhaliherya anna ni arokora awo ohokolowela mmulokoni. Nto wira nipake eyo, nihaana opixa murima, owoonela othunku, waamorela ikharari ni waaphenta. Xeeni vanireerela aya okhalana mikhalelo iyo? Ninrowa owerya sai okhalana?

10. Xeeni vari aya vooloka opixa murima vaavo nnaakhaliherya ahu ale yaahiyale orowela mithukumano ni olaleerya otthikela omurumeela Yehova?

¹⁰ Nihaana opixa murima, mwaha woowi pooti ovira okathi wira ale yaahiyale orowela mithukumano ni olaleerya ahokolowele wa Yehova. Atthu anceene yaahiyale orowela mithukumano ni olaleerya, ahimmye wira yaahixukuriwa ikwaha sinceene ni axitokweene ni anna akina a mmulokoni ahinatthi otthikela omurumeela Yehova. Murokora oniihaniwa Nancy, yoowo onikhala oSul wa wÁsia olempe so: “Mpatthani aka muulupale a mmulokoni ookikhaliherya vanceene. Owo ori ntoko muulupale aka kiyaraniwe aka erukulu emosa. Aahikuupuxerya okathi woohakalaliha naavaanela ahu khalai. Nave aahikiwiriyana moopixa murima vaavo kaamuleela aka moonelo ni muupuwelo aka. Ohiya-vo, khoovelenle okivaha miruku. Owo ahooniherya wira aari mpatthani aka eekeekhai ni aaphavela okikhaliherya khula okathi kaaphavela aka”.

11. Xeeni vari aya vooloka omoonela othunku mutthu aanyoonyihiwe?

 ¹¹ Mutthu oriipiwe murima onlikana ni mutthu orina nikhwatta noowereya vanceene. Masi othunku onlikana ni murette onvoliha nikhwatta yoowo onimukhaliherya mutthu okhala saana. Atthu akina ahiyale orowela mithukumano ni olaleerya anniwanana muupuwelo woohiloka mwa iyaakha sinceene mwaha woowi yaahinyoonyihiwa ni munna wala murokora a mmulokoni. Nto muupuwelo owo pooti owiiriha ohihokolowela wa Yehova. Maana akina anuupuwela wira yaathokoreriwe moohixariya. Nto, atthu awo ahaana owiriyaniwa oratteene ni ophavela osuwela moonelo ni muupuwelo aya. (Yak. 1:19) Murokora oniihaniwa María, yoowo aahiyale orowela mithukumano ni olaleerya ohimmye so: “Kamphavela mutthu aarowa okiwiriyana oratteene, okimaaliha ni okivaha malakiheryo yaarowa okikhaliherya”.

12. Nvahe ntakiheryo nnooniherya wira ophenta wa Yehova onoolikana ni mukhoi.

¹² Biibiliya onihimya wira enamuna Yehova onaaphenta awe atthu awe onoolikana ni mukhoi. Mwa enamuna xeeni? Nkahaya nwehe nlikanyiho nna: Nkahaya muupuwele mmireyale ene mphareya. Vano mutthu mukina onnoovonyeryani salva-vida. Tthiri nyuwo mwaamuxukhurela vanceene okhaliheriwa, maana eyo enimookhaliheryani owanana mawimpi wira moopowe. Masi salva-vida paahi khoniphiyerya wira moopowe. Akhala wira maasi khareere oriirya, nyuwo khimwaarowa woopowa akhala wira khamunrowa ophwanya ekalawa eniwoopola atthu animireya mmaasini. Nto ohaana okhala mutthu aarowa woovonyeryani mukhoi ni woopurulelani opuro eri ekalawa eniwoopola atthu animireya mmaasini. Yehova aahaaleela aIsarayeli yaarimenle wira: “Kàmwèttiha yowo ni mikhoyi sa omutthu, . . . ni mikhoyi sotthuna”. (Hos. 11:4, Biblya Exirima) Olelo-va Yehova onnaathokorerya mwa enamuna emosaru ale ahiyale omurumeela mwaha wa mixankiho. Maana Yehova oniphavela wira yooneke wira onnaaphenta ni omphavela waakhaliherya ohokolowela wa yena. Nave musuweleke wira Yehova pooti woorumeelani nyuwo wira owooniherye waaphenta wawe.

13. Ntakiheryo na Pablo nnooniherya sai wira ophenta pooti waakhaliherya akina ohokolowela wa Yehova?

 ¹³ Ti vooloka waakhaliherya ale ahiyale orowela mithukumano ni olaleerya wira Yehova onnaaphenta ni hiyo ninnaaphenta vanceene. Munna Pablo olavuliwe mwaha ovinre, aahiviriha iyaakha sinivikana 30 ohiyale ene orowela mithukumano ni olaleerya. Owo onihimya so: “Nihiku nimosa voosiisu, vaavo kaakhuma aka owaani kaahikumana murokora oowuuluvala, yoowo aakireerenle murima ni aakilavulinhe mwa enamuna yoophenta. Kaahipacerya wunla ntoko mwaana. Kaahimuleela wira vaakhala ntoko wira Yehova taamurumme olavula ni miyo. Nihiku nne, kaahilakela ohokolowela wa Yehova”.

14. Moovarihana ni nlikanyiho na Yesu nri Luka 15:4, 5, exeeni makampusi onipaka awe nuumala ophwanya epwittipwitthi awe yaarimenle?

¹⁴ Nuumala waaphwanya ale yaahiyale orowela mithukumano ni olaleerya, nihaana ovikaniha waakhaliherya ni waalipiha. Ntoko mwaana aarimenle a ntakiheryo na Yesu, pooti wira atthu awo anniivaha nthowa. Okhala wira yaaniirela mpantta olumwenku wa Satana, woonasa wene, waataana waya ni Yehova kholimpe ntoko khalai. Nto nihaana waakhaliherya olipiha omwaamini waya Yehova. Nlikanyiho na epwittipwitthi yaarimenle, Yesu ahooniherya moota makampusi onkapatta awe epwittipwitthi yaarimenle onaroiha nipuro siri aya sikina. Makampusi ole, aahiviriha okathi ni ikuru sinceene ophavelasaka epwittipwitthi ela yaarimenle. Owo onnisuwela wira epwittipwitthi awe enniphavela okhaliheriwa, okhala wira khereere okhulumuwa, eyo kherina ikuru wira etthike mekhaya, nto onnikapatta wira ottikixerye siri aya ipwittipwitthi sikina.—Mmusome Luka 15:4, 5.

15. Ninrowa waakhaliherya sai ale yaahiyale olaleerya ohokolowela wa Yehova? (Nwehe ekaaxa eni: “ Ekaruma ya Faita Yinceene.”)

¹⁵ Pooti ovira okathi munceene nimukhaliheryaka mutthu aahiyale orowela mithukumano ni olaleerya wira oxintte mixankiho sinimukhoottiherya otthikela omurumeela Yehova. Masi, nikhaliheriwaka ni ikuru sowaarya sa Yehova, Biibiliya ni iliivuru ninvahiwa ahu ni mutthenkeso wa Yehova, nnoowerya waakhaliherya olipiha  waataana waya ni Yehova. (aRom. 15:1) Ninrowa owerya sai opaka eyo? Mutokweene orina sookumanana sinceene ohimmye so: “Anna ni arokora anceene yaahiyale orowela mithukumano ni olaleerya ahaana otthikela osomihiwa Biibiliya”. * Nto akhala wira munnivekeliwa omusomiha munna wala murokora aahiyale orowela mithukumano ni olaleerya, muhaana weemererya akhala wira munoowerya. Nave mutokweene ole ohimmye so: “Namalaleerya onithanliwa omusomiha munna wala murokora owo aahiyale olaleerya ohaana okhala oopatthaneya wira ole onimusomiha awe okhaleke ootaphuwa”.

16. Ninsuwela sai wira ninnikhaliheriwa ni malaikha?

¹⁶ Sookhala sookhumelela sinceene sinooniherya wira malaikha anninikhaliherya waaphwanya ale yaahiyale orowela mithukumano ni olaleerya ohokolowela wa Yehova. (Wis. 14:6) Mwa ntakiheryo, munna aahiyale orowela mithukumano ni olaleerya oniihaniwa Silvio a wEcuador aahimuxonttela Yehova wira omurume mutthu orowa omukhaliherya ohokolowela wa Yehova. Ohinatthi omaliha ovekela yaahikhala atthu yaamana mukhora awe. Axitokweene anli yaahiphiya owannyawe ni yaari vamukhora. Okathi aavaanela awe ni axitokweene ale, moohakalaliha yaahilavula etthu yaamukhalihenrye Silvio.

17. Ninrowa okhala sai akhala wira noomukhaliherya mutthu ohokolowela wa Yehova?

¹⁷ Ninnihakalala vanceene omukhaliherya mutthu aahiyale orowela mithukumano ni olaleerya ohokolowela wa Yehova. Nkahaya nwehe ele ohimmye awe pioneero a vameekhaaya oniihaniwa Salvador, yoowo aamukhalihenrye mutthu aahiyale orowela mithukumano ni olaleerya. Owo onihimya so: “Vaavo kinimukhaliherya aka mutthu aahiyale orowela mithukumano ni olaleerya ohokolowela wa Yehova, kinnihakalala vanceene. Etthu enkihakalaliha, woona wira kikhaliheriwaka ni Yehova, koowerya omukhaliherya murumeyi awe okhuma olumwenku wa Satana ni otthikela mmulokoni”.—Mit. 20:35.

18. Akhala wira moohiya olaleerya ni orowela mithukumano, mukupaliki exeeni?

¹⁸ Akhala wira moohiya orowela mithukumano ni olaleerya, mukupaliki ni murima wotheene wira nlelo Yehova onnoophentani. Nave oniphavela wira muhokolowele wa yena. Nto muhaana opaka itthu sotheene muniwerya anyu wira muhokolowele wa Yehova. Ntoko paapa a nlikanyiho na Yesu, Yehova onnilipelela wira munoohokolowela wa yena. Mwiira siiso, owo onootthapa vanceene.