NGANI JAKULIJIGANYA 26
‘Awujile kwa Une’
“Naga jemanja mkuwujila kwa Une, Unesoni tinjiwujila kwa jemanja.”—MAL. 3:7.
NYIMBO NA. 102 “Twakamuchisyeje Ŵanganakola Machili”
YACHITULIJIGANYE *
1. Ana Yehofa akusapikana wuli mumtima mundu pawujile kwa jwalakwe?
MPELA mwatuyiwonele mungani jajipite jila, Yehofa akusalilandanya msyene ni jwakuchinga jwambone jwakusasamalila ngondolo syakwe syosope. Soni jwalakwe akusajisosaga jajisokonechele. Yehofa ŵasalile Aisalaeli ŵaŵalesile kumpikanila kuti, “Naga jemanja mkuwujila kwa Une, Une soni tinjiwujila kwa jemanja.” Tukusamanyililaga kuti jwalakwe akusayiwonaga myoyo mpaka apano, paja jwalakwe akusati, “Une jwangachenga.” (Mala. 3:6, 7) Yesu ŵasasile kuti Yehofa soni malayika gakusaŵa gakusangalala pandaŵi jawujile mundu kwa Yehofa.—Luk. 15:10, 32.
2. Ana chitukambilane chichi munganiji?
2 Kwende tulole ngani sitatu syagamba kuwanichisya syaŵasasile Yesu syampaka situjiganye yampaka tutende pakwakamuchisya ŵandu ŵalesile kumtumichila Yehofa. Chitukambilane ndamo sine syambone syatukusosekwa kola pakusaka kwakamuchisya ŵandu kuti awujile kwa Yehofa. Soni chitulole ligongo lyakwe tukusosekwa kulingalinga kwakamuchisya ŵandu ŵawujile munyuma.
KUSOSASOSA MBIYA JAJIJASICHE
3-4. Ligongo chichi jwamkongwe jwaŵamsasile Yesu pa Luka 15:8-10, ŵasosile mwakusamala mbiya jajajasiche?
3 Tukusosekwa kulimbichila kuti twapate ŵandu ŵakusachilila kuti awujile kwa Yehofa. Ngani jagamba kuwanichisya jaŵasasile Yesu mu Ngani Syambone sya m’buku ja Luka, ŵalondesisye yaŵatesile jwamkongwe jwine jwaŵasosaga mbiya jajajasiche. Mbali jakusosekwa mnope mu nganiji jaliji yaŵatite pakulimbichila jwamkongweju kuti ajipate mbiyajo.—Aŵalanje Luka 15:8-10.
4 Yesu jwasasile mwaŵapikanile jwamkongwe jwine jwaŵajisimene mbiya jajamjasiche. Mu ndaŵi ja Yesu, achakongwe ŵane ŵa Chiyuda ŵampaga mbiya mwanache jwawo jwamkongwe syakwana ma madalakima 10 pa lisiku lyakulombedwa. Komboleka kuti mbiyaji jaŵaga jakusosekwa mnope kwa mwanacheju. Jwamkongwe juŵamsasile Yesu jula jwaganisyaga kuti mbiyajo jigwilile pasi. Myoyo jwalakwe jwakolesisye nyali ni kutanda kusosasosa palipose, nambo nganajipata. Nyali jakwejo nganijikolelaga mwakwanila kuti akombole kujiwona mbiyajo. Pambesi pakwe, jwalakwe jwapyajisile mwakusamala mnope nyumba josopejo. Ligongo lya kuŵala kwa nyali, kaneko ŵajiweni mbiya jila mu luwundu paŵapyajilaga. Kusala yisyene, jwalakwe jwasangalele mnope. Mwamti ŵaŵilasile achimjakwe wosope kuti ŵasalile ngani jakusangalasyaji.
5. Ligongo chichi mpaka yiŵe yakusawusya kwapata ŵandu ŵaŵalesile kusongana ni mpingo?
5 Mwatuyiwonele m’chisyasyo cha Yesuchi, pakusasosekwa kulimbichila kuti uchipate chindu chachisoŵile. Mwakulandana ni yeleyi, tukusosekwa kulimbichila mnope kuti twapate ŵandu ŵaŵalesile kusongana. Komboleka kuti papitile yaka yejinji kutyochela pandaŵi jele jemanjaji ŵalesile kutenda yindu ni mpingo. Mwinesoni ŵasamile kumalo kwele abale ni alongo ngakwamanyilila. Nambope, mpaka tuŵe ŵakusimichisya kuti ŵane mwa jemanjaji akusasaka kuwujila kwa Yehofa. Jemanjaji akusasaka kumtumichila Yehofa yimpepe ni ŵandu ŵakwe ŵakulupichika, myoyo akusasosekwa kwakamuchisya.
6. Ana ŵandu wosope ŵamumpingo mpaka ajigale nawo mbali chamtuli pakusosasosa ŵandu ŵalesile kusongana?
6 Ana ŵani ŵakusosekwa kujigala mbali pakusosasosa ŵandu ŵaŵalesile kutenda yindu yimpepe ni mpingo? Wosopewe, chinga tuli achakulungwa ŵamumpingo, apayiniya, ŵamwiŵasa kapena ŵakulalichila ŵamumpingo mpaka tukamule nawo masengo gelega. Ana akwete mjawo kapena jwachibale juŵawujile munyuma? Ana pakwete pasimene ni mundu juŵalesile kusongana pandaŵi jiŵalalichilaga nyumba ni nyumba kapena pamalo gakusimanikwa ŵandu ŵajinji? Mpaka amsalile mundu jwasimene najojo kuti naga akusaka kuti jwine amjendele kumangwakwe, mpaka yiŵe chenene kuti ŵape nambala ja foni kapena adilesi jakwe kuti akapeleche kwa achakulungwa ŵamumpingo.
7. Ana tukulijiganya chichi pa yaŵaŵechete jwamkulungwa jwamumpingo jwine lina lyakwe Thomas?
7 Ana achakulungwa mpaka akamulichisye masengo matala gapi kuti ŵapate ŵandu ŵakusachilila kuwujila kwa Yehofa? Kwende tulole yaŵaŵechete jwamkulungwa jwamumpingo jwine lina lyakwe Thomas. * Jwalakwe akusatamaga ku Spain soni ŵakamuchisye ŵa Mboni ŵakwana 40 kuti awujile mumpingo. Thomas jwatite, “Chandanda ngusinawusya abale ni alongo ŵakumanyilila kumangwakwe kwa mundu jwangakwika kumisongano. Ndaŵi sine ngusinawusyasoni naga akumanyilila ya mundu jwalijose juŵalesile kwika kumisongano. Ŵandu ŵajinji mumpingo akusasangalala ligongo akusalipikana kuti akukamuchisya nawo pa masengoga. Panasimene abale kapena alongo ŵaŵalesile kusongana ngusinawusyaga mwayiŵelele yindu paumi wa ŵanache soni ŵachibale ŵawo. Ŵane ŵayikaga ni ŵanache ŵawo kumisongano, soni komboleka kuti pandaŵi jine ŵanacheŵa akaliji ŵakulalichila. Ŵanacheŵasoni mpaka asosekwe kwakamuchisya kuwujila kwa Yehofa.”
KWAKAMUCHISYA ŴANDU ŴA YEHOFA KUTI AWUJILE
8. Ana ngani jagamba kuwanichisya jiŵasasile Yesu pa Luka 15:17-24, jikulosya kuti mtati jwatesile yindu mwamtuli ni mwanache juŵalosisye kupitikuka mtima?
8 Ana tukusosekwa kola ndamo syapi kuti tukombole kwakamuchisya ŵandu kuwujila kwa Yehofa? Kwende tulole yampaka tulijiganye kutyochela pangani jagamba kuwanichisya jiŵasasile Yesu pakwamba ya mwanache juŵatyosile panyumba. (Aŵalanje Luka 15:17-24.) Yesu jwasasile kuti panyuma pakwe mwanacheju jwachenjile nganisyo ni kuganisya yakuwujila kumangwakwe. Pajwawujilaga kunyumba, babagwe ŵamwutuchile ni kumkumbatila mwakulosya kuti akumnonyela mnope. Mwanacheju jwalijimbaga magambo soni jwalipikanaga kuti ngakuŵajilwa kutendeledwa yindu mpela mwanache jwamwiŵasamo. Babagwe ŵamtendele chanasa ligongo lyakuti jwalondesisye mwakupikanila mumtima. Kaneko babagweŵa ŵamtendele yindu yakulosya kuti ampochele mwanachejo ngaŵa mpela jwaganyu nambo kuti ali jumo mwa ŵanache ŵakwe. Kuti yeleyi yiwonechele, nangoloju jwatesile pwando soni kumpa yakuwala yambone mwanache juŵalosisye kupitikuka mtima.
9. Ana tukusosekwa kola ndamo syapi kuti tukombole kwakamuchisya ŵandu ŵalesile kusongana ni mpingo kuti awujile kwa Yehofa? (Alole libokosi lyakuti “Kwakamuchisya Ŵandu Ŵakusaka Kuwujila.”)
9 Yehofa ali mpela mtati jwakumkolanga munganiji. Akusiŵanonyela abale ni alongo ŵaŵalesile kusongana soni akusasaka kuti jemanjaji awujile kwa jwalakwe. Mpaka twakamuchisye jemanjaji kuti awujile pakumsyasya Yehofa. Kuti yeleyi yikomboleche pakusasosekwa kuwusimana mtima, chanasa soni chinonyelo. Ana mpaka tulosye chamtuli ndamo syelesi soni ligongo chichi tukusosekwa kutenda yeleyi?
10. Ligongo chichi tukusosekwa kuwusimana mtima patukumkamuchisya jwine kuti awujile kwa Yehofa?
10 Tukusosekwa kuwusimana mtima ligongo pakusajigala ndaŵi kuti mundu awujile kwa Yehofa. Ŵandu ŵane ŵaŵalesile kutenda yindu yimpepe ni mpingo akusati pakusasosekwa kuti achakulungwa soni abale ni alongo ŵajendeleje jemanjaji kwa maulendo gejinji. Mlongo jwine lina lyakwe Nancy jwa ku Asia jwatite, “Mjangu jwapamtima jwine jwamumpingo mwetu ŵangamuchisyaga pa yindu yejinji. Soni jwalakwe ŵanonyelaga mpela kuti ali mkulugwangu. Ŵangumbusyaga mwayaŵelaga yindu pandaŵi jitwaŵaga yimpepe. Ŵambikanilaga mwakuwusimana mtima pangulondesya mwangupikanila mumtima soni jwalakwe nganawumilaga pakumba malangiso. Ŵaliji mjangu jwambone soni jwakoseka kungamuchisya ndaŵi jilijose.”
11. Ligongo chichi tukusasosekwa kuŵa ŵachanasa kuti tumkamuchisye mundu jwakuŵele?
11 Mundu patumbile ni chinechakwe yikusaŵa mpela akwete liŵanga lyakupweteka mnope. Myoyo chanasa chili mpela mtela wampaka ukamuchisye kuti apikaneje chenene. Ŵandu ŵane ŵaŵalesile kusongana akusaŵa kuti ŵakuŵele ni yaŵatendele mundu jwine mumpingo kwa yaka yejinji munyuma mwamti akulaga nayope mpaka apano. Ŵane mpaka aganisyeje kuti nganatendeledwa yindu mwachilungamo. Akusasaka mundu jwampaka ŵapikanileje pakuŵecheta soni kwapikanichisya mwakupikanila mumtima. (Yak. 1:19) María jwaŵawujile munyuma pandaŵi jine jwatite, “Namsosaga mundu jwampaka ambikanileje chenene panguŵecheta, jwampaka alimbikasye soni kumba malangiso gakamuchisya.”
12. Apeleche chisyasyo chakulosya mwakusatendela Yehofa pakwakamuchisya ŵandu kuti awujile kwa jwalakwe?
12 Baibulo jikusalandanya chinonyelo chakwete Yehofa kwa ŵandu ni lukonji. Ana chinonyelo cha Yehofa chikulandana ni lukonji m’matala gapi? Aganichisye ayi. Tuwanichisye kuti akutiŵila m’nyasa ni kaneko mundu jwine akwaponyela chakuwala chakamuchisya kuti akatiŵila. Mwangakayichila mpaka ayamichile ligongo lyakuti chakuwalachi mpaka chakamuchisye kuti akatiŵila mmesi. Nambotu chakuwalachi nganichiŵa chakulupwisye kuti akawa. Yili myoyo ligongo lyakuti mesi gakusasisima mnope mwamti kuti akawa, akusosekwa kwela liboti. Mpaka asosekwe mundu jwine kuti ŵaponyele lukonji ni kwawutila mwiboti. Pakwamba ya Aisalaeli ŵaŵamlesile Yehofa, jwalakwe ŵatite, “Nawutile jemanjajo kwa une mwachanasa soni mwachinonyelo.” (Hos. 11:4) Mlungu nganachenga, masiku agano akusapikanasoni myoyo ni ŵandu ŵalesile kumtumichila jwalakwe soni ŵakulagasika nganisyo ni ŵakusimana ni yakusawusya. Jwalakwe akusasakaga kuti ŵanduŵa amanyilileje yakuti Mlungu akusiŵanonyela soni kuti aŵe paunasi ni jwalakwejo. Yehofa mpaka ŵakamulichisye masengo wawojo kuti alosye chinonyelo chelechi.
13. Asale chisyasyo chakulosya kuti chinonyelo mpaka chakamuchisye ŵane kuwujila kwa Yehofa.
13 Yikusaŵa yakamuchisya kwasimichisya ŵandu ŵangakusasongana kuti Yehofa akusiŵanonyela soni kuti m’weji tukusitwanonyelagasoni. Pablo jwatusamsile mungani jajipite jila jwalesile kusongana kwa yaka 30. Jwalakwe jwatite, “Lisiku line kundaŵi panatyokaga kunyumba, nasimene ni mlongo jwine jwachikulile jwaŵayiche kuti awonegane ni une. Jwalakwe jwaŵechete ni une mwakunganichisya. Namsalile mlongoju kuti yawonekaga mpela Yehofa amtumisye kuti awonegane ni une. Pandaŵiji ni panaganisisye yakuwujila kwa Yehofa.”
KWAKAMUCHISYA MWACHINONYELO ŴANDU ŴAWUJILE MUNYUMA
14. Mwakamulana ni ngani jajikusimanikwa pa Luka 15:4, 5, ana jwakuchinga akusatenda wuli pajisimene ngondolo jajasokonechele?
14 Ŵandu ŵaŵawujile munyuma akusasosekwa kwakamuchisya ndaŵi syosope. Mpela mwanache jwamsokonechele juŵamsasile Yesu, jemanjaji mpaka alagasicheje nganisyo kwandaŵi jelewu. Ligongo lyakuti ŵalesile kutendela yindu yimpepe ni ŵandu ŵa Yehofa, jemanjaji mpaka awujile munyuma mwausimu. Tukusosekwa kwalimbikasya jemanjaji kuti amkulupilileje mnope Yehofa. Ngani jagamba kuwanichisya jakwamba ya ngondolo jesokonechele jaŵasasile Yesu, jalondesisye yakusatenda jwakuchinga pakujinyakula ngondolo kuti jijawule kwasili sine. Jwakuchingaju akusaŵa kuti ajonasile kala ndaŵi soni machili gakwe kuti ajipate ngondolojo. Nambope jwalakwe akusamanyilila kuti akusosekwa kujinyakula ligongo lyakuti nganijikola machili soni nganijiŵa jikombwele kwawula kwasili sijakwe.—Aŵalanje Luka 15:4, 5.
15. Ana mpaka twakamuchisye chamtuli ŵandu ŵawujile munyuma nambo ali ŵakusachilila kuwujila kwa Yehofa? (Alole libokosi lyakuti “Kabuku Kakamuchisya Mnope.”)
15 Mpaka pasosekwe ndaŵi soni machili kuti twakamuchisye ŵandu ŵaŵawujile munyuma ŵayikwasawusya kuti awujile kwa Yehofa. Nambo ni chikamuchisyo cha msimu wa Yehofa, Maloŵe gakwe, soni mabuku gatukusapochela kumpingo, mpaka twakamuchisye kuti aŵe ŵakulimbangana mwausimu. (Alo. 15:1) Ana mpaka tutende chamtuli yeleyi? Jwamkulungwa jwamumpingo jwine jwatite, “Ŵandu ŵajinji ŵakusawujila munyuma akusasosekwa kulijiganya Baibulo paganisisye yakuwujila kwa Yehofa.” * Paŵendedwe kuti amjiganyeje mundu juŵawujile munyuma, akusosekwa kuwuwona welewo kuti wuli upile wekulungwa. Jwalakwe jwajonjechesyesoni kuti, “Jwakutendesya lijiganyoli akusosekwa kuŵa jwakunguluchika soni jwakudalilichika.”
KWINANI SONI PACHILAMBO CHAPASI PAKUSAŴA CHISANGALALO
16. Ana tukumanyilila chamtuli kuti malayika mpaka gatukamuchisye?
16 Yisyasyo ya ŵandu ŵajinji yilosisye kuti malayika gakusakamula masengo ni m’weji patukwakamuchisya ŵandu ŵaŵawujile munyuma ŵali ŵakusachilila kuwujila kwa Yehofa. (Chiw. 14:6) Silvio jwa ku Ecuador jwaŵendile kwa Yehofa mwakutyochela pasi pamtima kuti amtumichisye mundu kuti amkamuchisye kuwujila kwa jwalakwe. M’baleju paŵapopelaga kwayiche achakulungwa ŵamumpingo ŵaŵili. Achakulungwaŵa ali ayiche, ŵaliji ŵakusangalala kumkamuchisya jwalakwe.
17. Ana tuchipata chichi ligongo lyakwakamuchisya ŵandu kuti awujile kwa Yehofa?
17 Mpaka tuŵe ŵakusangalala patukwakamuchisya ŵandu ŵangakusasonganaga kuti awujile kwa Yehofa. Alole yaŵaŵechete mpayiniya jwaŵatesile yakomboleka kuti amkamuchisye mundu jwine juŵawujile munyuma. Jwalakwe jwatite, “Ndaŵi syejinji, ngusaŵa jwakusangalala mnope panayiweni kuti namkamuchisye mundu jwine kuwujila kwa Yehofa. Myoyo ngusasangalala panguganisya kuti Yehofa amkulupwisye mundu jwakusamnonyela ku chilambo cha Satanachi, soni kuti nakwete upile wakukamusyana ni Yehofa kuti munduju awujile.”—Mase. 20:35.
18. Naga wawojo ŵalesile kusongana, ana mpaka aŵe ŵakusimichisya ya chichi?
18 Naga alesile kutendela yindu yimpepe ni ŵandu ŵa Yehofa, mpaka aŵe ŵakusimichisya kuti Yehofa akusiŵanonyela. Jwalakwe akusachilila kuti wawojo awujilesoni. Mpaka asosekwe kulingalinga kuti awujile kwa jwalakwe. Nambo mwakulandana ni mtati jwaŵamsasile Yesu mungani jakuwanichisya jila, Yehofa akwajembecheya kuti awujile kwa jwalakwe, soni ali jwakusangalala kwapochela wawojo.
NYIMBO NA. 103 Ŵakuchinga Ali Mituka mwa Achalume
^ ndime 5 Yehofa akusaka kuti ŵandu wosope ŵaŵalesile kutendela yindu yimpepe ni mpingo awujile kwa jwalakwe. Mpaka tutende yejinji pakwalimbikasya ŵandu ŵali ŵakusachilila kupikanila kuŵilanga kwa Yehofa kwakuti, ‘Awujile kwa Une.’ Munganiji, chitulole yampaka tutende pakwakamuchisya jemanjaji kuti awujile kwa Yehofa.
^ ndime 7 Mena gane munganiji tugachenjile.
^ ndime 15 Ŵandu ŵane ŵaŵalesile kusongana mpaka twakamuchisye mwakwajiganya mbali sine sya m’buku ja Yampaka Atende Kuti Mlungu Ŵanonyeleje. Pele ŵane ayiweni kuti yili yakamuchisya kulijiganya mitwe jine ja m’buku ja Amŵandichile Yehofa. Komiti ja Undumetume ja Mpingo jikusosekwa kusagula jwali jwakuŵajilwa kuti amjiganyeje mundujo.
^ ndime 68 KULONDESYA YIWULILI: Abale ŵatatu akumkamuchisya m’bale jwakusaka kuwujila kwa Yehofa. Akutenda yeleyi mwakuŵechetana najo, soni kumsalila kuti akusamnonyela, soni kumpikanichisya chenene.
