1. Buidi Yave kambelanga mu thangu wumueka mu bisadi biandi kamvutuka kubue nsadila?

DEDI BO tumuenini mu dilongi diviokizi, Yave wukifuanikisa banga nsungi wumbote wu mamemi, kibila nandi wumvuanga nkinza kadika kisadi kiandi. Mvandi wuba sadisanga mu thangu bamvekuka mu zinzila ziandi. Yave wukamba basi Isaeli bantatuka: “Vutukanu kuidi minu ayi minu Yala vutuka kuidi benu.” Ayi befu tuzabizi ti mawu mvandi Yave kantomba kuidi bisadi biandi bubu, buawu katubila: “Minu yisa baluka ko.” (Malaki 3:6, 7) Yesu wutuba ti Yave ayi zimbasi ku diyilu, bankuangalalanga beni mu thangu Wumueka mu bisadi bi Yave wuba wuvonga kamvutuka kubue nsadila.—Luka 15:10, 32.

2. Mbi tunkuiza tubila mu dilongi adidi?

² Mu dilongi adidi, mvandi tunkuiza tubila binongu bitatu Yesu kata bimmonisa buidi tulenda tatukila Yave. Mvandi tunkuiza tubila zikhadulu tufueti kuna muingi kusadisa batu batatuka Yave kuvutuka kuidi nandi. Bosi tunkuiza mona ndandu mbi tulenda baka befu kusadisa batu bavonga mu kiphevi bavutuka kuidi Yave.

3-4. Kibila mbi nkieto bantubila mu Luka 15:8-10, kaviokisila thangu yiwombo muingi kubila lubongo luandi luzimbala?

³ Tufueti vanga mangolo muingi kubakula batu bantomba kuvutuka kuidi Yave. Mu kinongo Yesu kata kidi mu buku yi Luka, nandi wutubila matedi nkieto wumueka wuba bila lubongo luandi luzimbala. Kinongo akiokio kituvanga kukuituka, kibila nkieto beni wuviokisa thangu yiwombo muingi kubila—lubongo luzimbala.—Tanga Luka 15:8-10.

⁴ Yesu wusudikisa buidi nkieto beni kabela bo kabakula lubongo luandi luzimbala. Bo Yesu kaba va ntoto, zingudi ziwombo babe vananga kumi di zimbongo zi bisengu kuidi bana bawu mu kilumbu ki dikuela. Ayi ḿba lubongo beni luawu nkieto beni kazimbisa. Nkieto beni wutuba ti lubongo luandi  lubua va tsi. Diawu katatikila muinda muingi kulutomba, vayi kheti bobo kasa lubakula ko. Minda babe sadilanga mu thangu beni, misa ba ko kiezila kiwombo muingi kafika bakula lubongu beni luzimbala. Diawu kabakila makani ma kukombula nzo yoso. Ayi bo kavanga mawu, nandi wubakula lubongo beni ayi wuyangalala beni. Buawu katumisina bakundi bandi ayi batu baba kalanga yandi va nsengi muingi kuba vana zitsangu zimboti.

5. Kibila mbi vantombulu mangolo muingi kusadisa batu bavonga mu kiphevi?

⁵ Kinongo Yesu kata, kimmonisa ti befu kuzimbisa kiuma ki luvalu, tufueti vanga mangolo muingi kubakula kiawu. Bobuawu mvandi, mangolo mantombuluanga muingi kusadisa batu batatuka kimvuka ki Yave. Ayi ḿba ku kizunga bankalanga zikhomba badi kuna basa bazaba ko. Vayi bankaka mu zikhomba aziozio bavonga mu kiphevi batidi beni kuvutuka kuidi Yave ayi kunsadila va kimueka na zikhomba zinkaka zikuikama. Vayi lusalusu luitu bantomba.

6. Mbi kadika mutu mu kimvuka kafueti vanga na kudengana khomba wumana vonga mu kiphevi?

⁶ Banani balenda sadisa kubakula batu bavonga mu kiphevi? Befu boso—bakulutu, mintuami ntuala, basi dikanda, ayi minsamuni mioso mu kimvuka—balenda sadisa kuba bakula. Ngiewu, widi na nkundi voti muisi dikanda wuvonga mu kiphevi? Bo wunsamuna mu nzo ka nzo voti mu nzila, mbi fueti vanga ngie kudengana khomba wumana vonga mu kiphevi? Yuvula khomba beni ti nandi kalenda kikinina bantala ku nzo’andi. Na kukikinina, buna nzabikisa ti ngiewu wulenda sadisa mu kusudikisa bakulutu ba kimvuka vama kankalanga voti kuba vana thalu’andi yi nsinga mayo.

7. Mbi ngie belonguka mu mambu khomba bantedilanga Thomas katuba?

⁷ Mbi bakulutu ba kimvuka bafueti vanga muingi kubakula batu bavonga mu kiphevi batidi kuvutuka kuidi Yave? Tala kifuani ki yaya Thomas, * nkulutu wumueka wunkalanga ku Espanha. Nandi wusadisa 40 ma zikhomba baba bavonga mu kiphevi bavutuka mu kimvuka. Nandi wutuba: “Theti, minu yinkuvulanga minsamuni mu kimvuka boti bazebi mutu wubika kulandakananga zikhutukunu ayi yiba kuvulanga boti bazebi kuma nandi kankalanga. Bawombo mu kimvuka ba kunzabikisanga mambu minu yintomba, kibila bawu mvawu batidi kuba sadisa. Ayi bo yaba kuendanga mu zinzo zi zikhomba aziozio bavonga mu kiphevi, minu yiba kuvulanga matedi bana bawu ayi bankaka va dikanda. Kibila bawombo mu zikhomba aziozio, babe natanga bana bawu mu zikhutukunu ayi bawombo mu bana beni baba minsamuni. Diawu, alolo luidi luaku lumboti muingi kuba sadisa bavutuka kusadila Yave.”

8. Mu kinongo Yesu kata kidi mu Luka 15:17-24, buidi tata kayambila muan’andi wuba wuzimbala bo kavutuka?

⁸ Zikhadulu mbi tufueti kuna boti tutidi kusadisa batu bavonga mu kiphevi bavutuka kuidi Yave? Mona mbi tulenda longuka mu kinongo Yesu kata mu matedi muana wuzimbala. (Tanga Luka 15:17-24.) Yesu wusudikisa ti bo muana beni kabaka makani ma kuvutuka ku nzo, tat’andi wuyangalala beni. Ayi bo kammona, nandi wuduma ayi wumbumbakana. Mu kuvanga mawu, nandi wumonisa kuidi muan’andi ti wukhidi kunzolanga. Kilunzi ki muana beni kiba kumfundisa ayi nandi waba mona ti kasa ba ko wufuana muingi kutambula luzolo lu tat’andi. Mawu mavanga tata kumona kiadi muan’andi ayi wuvanga mamoso kanunga muingi kummonisa ti baboso ku nzo baba kunzolanga. Diawu kamvangila nkungi ayi kamvanini bikhutu bithalu.

9. Zikhadulu mbi tufueti kuna muingi kusadisa zikhomba bavonga mu kiphevi bavutuka kuidi Yave? (Tala tsielu yintuba: “ Buidi bu Kusadisila Batu Bavonga mu Kiphevi Batidi Kuvutuka Kuidi Yave?”)

 ⁹ Yave nandi Tata bamfuanikisa mu kinongo akiokio. Nandi wunzolanga beni zikhomba zitu bavonga mu kiphevi ayi tidi bawu bavutuka kuidi nandi. Mu kulandakana kifuani ki Yave, befu tulenda ku basadisa bavutuka kuidi Yave. Vayi muingi tununga kuvanga mawu tufueti monisa mvibudulu, kiadi ayi luzolo. Vayi kibila mbi tufueti bamonisina zikhadulu aziozi? Ayi buidi tulenda vangila mawu?

10. Kibila mbi tufueti monisina mvibudulu mu thangu tunsadisa mutu wuvonga mu kiphevi?

¹⁰ Tufueti monisa mvibudulu kuidi zikhomba zivonga mu kiphevi, kibila thangu yiwombo yintombulu muingi mutu kavutuka kuba wukinda mu kiphevi. Zikhomba ziwombo baba bavonga mu kiphevi batuba ti mu kibila ki mvibudulu yi bakulutu ba kimvuka ayi batu bankaka mu kimvuka, buawu to banungina kubue vutuka kusadila Yave. Khomba yimueka wunkalanga ku Asia bantedilanga Nancy, wusonika: “Nkundi’ami wu kimvuka wutsadisa beni. Nandi waba kukhiebanga buka khomb’andi wu kilezi. Nandi wuba kuthebulanga moyo zithangu zioso tuba viokisanga yandi va kimueka. Nandi waba kukhuwanga mu mvibudulu mu thangu yiba kunzabikisanga mabanza ma tsi ntim’ami ayi nandi kabasa monanga ko boma mu kuphana malongi. Bukiedika, nandi wumonisa ti wuba nkundi wumboti widi wukubama muingi kutsadisa yosokua thangu.”

11. Kibila mbi tufueti monisinina kiadi bo tunsadisa batu badi mu kiunda?

¹¹ Kumona kiadi voti kukitula va kibuangu ki batu badi mu kuinda; yidi phila yimboti yi  kuba sadisila. Bankaka mu zikhomba aziozi bavongila mu kiphevi, mu kibila ki mambu khomba yinkaka mu kimvuka kamvangila. Ayi mu kibila akiokio bammonanga nkaku kuvutuka mu kimvuka ki Yave. Diawu vantombuluanga mutu wukubama muingi kuba kuwa ayi kuvisa mabanza mawu. (Yakobi 1:19) Mawu María, khomba yimueka wuba wuvonga mu kiphevi katuba: “Minu yaba tombanga nkundi wumboti muingi kukhuwa, kudila yama ayi kuthuadisa.”

12. Mu phila mbi luzolo lu Yave luididi banga nsinga?

¹² Kibibila kindedikisa luzolo lu Yave banga nsinga. Mu phila mbi? Tala kifuani akiki: yindulabu ti ngie widi mu kudiama mu ḿbu, mutu wunkaka widi mu buatu na ku kukuba kivukusulu voti kikhutu bamvuatanga muingi mutu kabika sinda mu nlangu, bukiedika ti ngie wunkuiza yangalala kibila kiawu kinkuiza kusadisa wutatamana va mbata nlangu. Vayi kheti bobo, wusa botuka ko mu ziphasi mu kibila ki kiozi ki nlangu, nzala ayi zimfu zilenda ku kuvanga phasi. Diawu, muingi ka kusadisa mu phila yimboti, vantombulu nandi widi mu buatu ka kukuba mvandi nsinga ayi ka kutitika muingi wuvuka. Diawu Yave katubila mu matedi basi Isaeli bantatuka: “Yitatamana kuba tuadisa mu minsinga mi luzolo.” (Hosea 11:4) Mabanza amomo, mawu mvandi Nzambi kadi bubu kuidi bisadi biandi bavonga ayi badi mu kutovuka mu kibila ki ziphasi zi luzingu. Yave wuntomba bawu bazaba ti nandi wuba zolanga ayi tidi bavutuka mu mioko miandi. Diawu, Yave kalenda ku kusadila muingi kuba sadisa kumona luzolo luandi.

13. Buidi kifuani ki Pablo kimmonisina ti luzolo luitu, lulenda sadisa batu bavonga mu kiphevi kuvutuka kuidi Yave?

 ¹³ Nkinza beni kukambanga batu bavonga mu kiphevi ti Yave wuba zolanga ayi befu mvitu tuba zolanga. Pablo tutubidi mu dilongi dibedi, wuba wuvonga mu 30 ma mimvu wutuba: “Kilumbu kimueka, bo yaba basika ku nzo, minu yidengana na khomba yimueka yinkieto weka nkulutu. Nandi wukhindisa mu kukoluka yami mu luzolo. Minu yitona kudila buka muana kilezi. Minu yikamba khomba beni ti ḿba Yave nandi wumfila muingi kukoluka yami. Ayi tona mu kilumbu beni, minu yibaka makani ma kubue sadila Yave.”

14. Dedi bummonisina kinongu kidi mu Luka 15:4, 5, mbi nsungi wu mamemi kavanga bo kabakula dimemi diandi dizimbala?

¹⁴ Tufueti tatamana kusadisa ayi kubomba batu bavonga mu kiphevi, kheti bo bamvutuka mu kimvuka. Dedi muana wuzimbala mu kinongo Yesu kata, zikhomba aziozio baba bavonga mu kiphevi, ḿba bakhidi tovuka mu kibila ki mambu bavanga. Buawu, tufueti kuba sadisa bavutula kikundi kiawu na Yave. Mu kinongo ki dimemi dizimbala Yesu kata, nandi wusudikisa ti nsungi wu mamemi wubotula thangu ayi wuvanga mangolo muingi kutomba dimemi dizimbala. Ayi bo ka dibakula, kheti mu kuba wuvonga, nandi wu ditula va divangiti ayi wu divutula ku phaka kuba mamemi mankaka. Kibila wuzaba ti diaveka dilendi nunga ko kuvutuka ku phaka.—Tanga Luka 15:4, 5.

15. Buidi tulenda sadisila batu bavonga mu kiphevi batidi kuvutuka kubue sadila Yave? (Tala tsielu yintuba: “ Kilongulu Kinkinza.”)

¹⁵ Mangolu ayi thangu yintombulu muingi kusadisa batu bavonga mu kiphevi bavutuka kubue sadila Yave. Vayi mu lusalusu lu Yave,  diambu diandi ayi bilongulu tunsadilanga mu kimvuka, tuala nunga ku basadisa kukindisa diaka kikundi kiawu na Yave. (Loma 15:1) Buidi tulenda vangila mawu? Nkulutu wumueka wu kimvuka wutuba: “bawombo mu zikhomba aziozio baba bavonga mu kiphevi, ba kuvutuka kubue sadila Yave, bafueti bue longuka Kibibila na khomba yinkaka.” * Diawu, bika kumanga mu thangu ba kuvana kiyeku ki kulonguka Kibibila na khomba wuba wuvonga mu kiphevi. Nkulutu beni wubue tuba: “Khomba bamvana kiyeku akiokio, kafueti ba nkundi wumboti voti mutu khomba awowo wuba wuvonga mu kiphevi kamfiatilanga.”

16. Kifuani mbi kimmonisa ti zimbasi ba tusadisanga?

¹⁶ Bifuani biwombo bimmonisa ti zimbasi bansalanga yitu va kimueka muingi kutusadisa kubakula batu bavonga mu kiphevi batidi kuvutuka kuidi Yave. (Nzaikusu 14:6) Mawu mamonikina Silvio, khomba wuba wuvonga mu kiphevi wunkalanga ku Equador. Bo kabe sambila muingi Yave kansadisa kavutuka mu kimvuka, ava nandi kamanisa kusambila, bakulutu buadi bakokuta muelu wu nzo’andi. Bo baba koluka yandi, bawu bayangalala mu kuzaba ti nandi wuba wukubama muingi kutambula lusalusu babe kumvana.

17. Lusakumunu mbi tumbakanga bo tunsadisa batu baba bavonga mu kiphevi?

¹⁷ Mayandi mawombo tummonanga bo tunsadisa batu bavonga mu kiphevi kuvutuka kuidi Yave. Salvador, widi ntuami ntuala ayi wunsadisanga batu bavonga mu kiphevi, wutuba: “Yindilanga mu mayangi mu kuzaba ti Yave wutsadila muingi kusadisa mamemi mandi maba mazimbala mu nza yi Satana kuvutuka mu mioko miandi.”—Mavanga 20:35.

18. Boti ngie widi wuvonga mu kiphevi, lufiatu mbi ngie wulenda ba?

¹⁸ Boti ngie wubika kukutakana na dikabu di Yave, wulenda ba lufiatu ti nandi wukhidi kuzolanga ayi wuntomba ngie wuvutuka mu mioko miandi. Vayi vadi mua mambu wufueti vanga. Dedi tata mu kinongo Yesu kata, Yave mvandi tidi ngie wuvutuka mu mioko miandi ayi nandi widi wukubama muingi ku kuyamba mu mayangi.