EMHUOGHAẠPH ITUUGHẠ PHỌ 23
“Eegu Erolonaạn Ḍien Phọ Anạ”
“Sey Zihova, aḍien phọ anạ edi ghan bịn k’agee-pọ.”—PS. 135:13.
AḌUỌR PHỌ 10 Praise Jehovah Our God!
OGHAẠPH OOKARAGH *
1-2. Ighẹn araghaạph kụ imhạn maạr iboom esi Abugbaanhaạn AZihova?
OGHAẠPH odi ni dị amhạn maạr iboom aḅilhẹ ugbolhomaam iyira ḍio arodon—oghaạph phọ amoọgh maạr oḍighinhom r’elhiom itooghị phọ Enhaạn ḅilhẹ r’ogbạ omheremhị aḍien phọ odị. Idiphọ Abugbaanhaạn AZihova, riḅeraạn ghan ni iyira oghaạph ilọ iphigh araghaạph phọ iphẹn phọ. Toroboiperolbọ, ku/miịn elhiom itooghị phọ Enhaạn r’ogbạ omheremhị aḍien phọ odị idiphọ iyạl araraạr dị egbaranhaạn.
2 Oomo ayira olegheri ni mọ ewạ ni oḅaalhamhị aḍien phọ Enhaạn. Yira motuughạ ni kẹn olegheri mọ elhiom itooghị phọ Enhaạn obobọ eten phọ epẹ dị ratooghị ghan bọ kụ inhighẹ epelheghiom. Iduọn kụ iḍighi kụ ekpeanhaạn ni dị yira kolọgh eegu oḅilhẹ ozuumaam ongọ iyạl phọ araghaạph phọ iphẹn phọ.
3. Aḍien phọ Zihova emoọgh muḅọph r’eeghe?
3 Okạr agey, aḍien phọ Zihova eḅaramaạm torobọ iyaạr dị egbolhomaam Enhaạn phọ ayira ḅilhẹ r’eten itooghị phọ odị. Esi iduọn phọ, eḍighi maạr dị yira oḅẹm mọ oḅaalhamhị aḍien phọ Enhaạn kụ iḍighi iyaạr dị emhạn maạr epelheghiom, pọ yira roḅẹm ghan kẹn mọ ekpeanhaạn ni dị yira komạ oḍeenhaan mọ eten itooghị phọ odị kụ inhighẹ epelheghiom. Aḍien phọ aZihova emoọgh ni muḅọph r’eten itooghị phọ odị, idiphọ Uw-emhoọgh itooghị dị apelheghiom.—Miịn igbe phọ “ Araraạr Phọ Ogbogh Oghaạph Phọ Aphamhanhạm Bọ.”
4. Ika kụ idị aPsalm 135:13 eghaạph ilọ aḍien phọ Enhaạn, kụ ighẹn asipuru kụ edị yira kopanyanhaạn siẹn emhuoghaạph phọ ephẹn phọ?
4 Aḍien phọ Zihova egbatanhaạn ni. (Bạl Psalm 135:13.) Eeghe kụ iḍighi kụ aḍien phọ Enhaạn emhạn bọ maạr iboom? Pụr amem kụ edị ophụr bọ ophuẹ ḍien phọ Enhaạn? Ika kụ idị Enhaạn eḅaalhamhị bọ ḍien phọ odị? Ḅilhẹ ika kụ idị yira kotue ologhonhaạn ḍighaạgh oḅaalhamhị ḍien phọ Enhaạn? Ooḅeghiọn ophogh ophanyanhaạn asipuru phọ iphẹn phọ.
IDỊ AḌIEN EMHẠN MAẠR
5. Eeghe aḍipuru kụ edị eeni abuniin awe kopuru mem dị rokaạph ilọ oḅaalhamhị aḍien phọ Enhaạn?
5 “Eegu eroIonaạn ḍien phọ anạ.” (Mat. 6:9) Epẹ kụ iyaạr dị aZizọs aḍighi eḅẹl siphẹ iiḅereghị phọ. Kuolọ ikpo onhụ phọ aZizọs iphẹn phọ remạ ghan eeghe? Olhọgh eegu obobọ oḅaalhamhị phọ remạ ghan oḍighi idị ketọl dọl iigbia, obobọ esererẹ. Kuolọ abuniin awe otue ni opuru mọ, ‘Aḍien phọ aZihova i/ḍighi iigbia, i/ḅaạl obobọ i/sererẹ ḍughụm?’ Orue ophagharanhaạn, ewạ mọ yira olhegheri iyaạr dị aḍien eru.
6. Eeghe kụ reḍighi ghan iyaạr dị aḍien kemạn maạr?
6 Aḍien i/ḍighi oopho ekpo onhụ dị ogẹ esi bịn obobọ oghol oye. Lọgh elhegh mọ aBaibul phọ aḅẹm mọ: “Aḍigey aḍien kụ edị kosaḅạr kparipẹ r’eboom eelạ.” (Prov. 22:1; Eccl. 7:1) Eeghe kụ iḍighi kụ aḍien emhạn bọ maạr kipekipẹ? Loor esi dị eḅaramaạm ipẹ olhegheriom bọ oye phọ, ḅilhẹ r’ipẹ awe rootughiạn ghan bọ koghị esi opọ rameera bọ ḍien phọ. Esi iduọn phọ, eten phọ epẹ ogẹ bọ ḍien phọ obobọ oghol bọ kụ i/moọgh maạr oḍighinhom; iyaạr dị emhoọgh maạr oḍighinhom pọ ipẹ awe rootughiạn ghan bọ mem dị onhaghạn ḍien phọ.
7. Ika kụ idị awe mophuẹ ḍien phọ Enhaạn?
7 Mem lọ awe ogbaaghiọm okpẹ aZihova, p’iduọn phọ bidị ropuẹ ghan odọ phọ oye phọ odị aru bọ. Mem dị bidị oghaạph ikarạph araraạr oghị esi odị, p’iduọn phọ bidị rokparaghạ ghan ophuẹ aḍien phọ odị. Eḅẹl amem dị ogbaaghiọm ḍien phọ Enhaạn ḅilhẹ r’odọ oye phọ dị aru bọ iḍighi siphẹ oghoony phọ Iden. Omhiịn iyaạr dị yira otuughạ esi ipẹ emite bọ siphẹ oghoony phọ Iden.
IPẸ OPHỤR BỌ OGBẠ OPHUẸ ḌIEN PHỌ ENHAẠN
8. Adạm r’Iv ulhegheri ni eeghe, kụ ipẹ phọ ekọm eeghe asipuru kụ emiteom?
8 Adạm r’Iv ulhegheri ni ḍien phọ aZihova, ḅilhẹ r’igey dị emhạn maạr ilọ odọ phọ oye phọ Odị aru bọ. Bidị ulhegheri ni mọ odị kụ Olemhiạ phọ, angọ bọ bidị ghuḍum, imạ esi orọl, ḅilhẹ r’ogey olom obobọ anhịr. (Gen. 1:26-28; 2:18) Toroboiperolbọ, bidị ughiọm ni ghisigh osighẹ ilhoghi phọ abidị emhunhughan bọ, ogbirimaam ghan oomo ipẹ aZihova maḍighinhaan bọ bidị ḍughụm? Bidị ughiọm ni ghisigh olhọgh ghan ophophe ephomhoghiạn r’osereghiạn oghị esi Oye phọ rameera bọ ḍien phọ aḍiphẹ phọ ḍughụm? Ophagharanhaạn phọ amite ni mem mọ amulọgh ḍien phọ Enhaạn adẹgh bọ bidị aphogh.
9. Odaphạn Genesis 2:16, 17 r’3:1-5, eeghe kụ edị aZihova aḅenhị oḅẹl olom r’anhịr phọ, kụ ika kụ idị aSetan alhọgh okpẹ ipẹ Enhaạn eghaạph bọ?
9 Bạl Genesis 2:16, 17 r’3:1-5. ASetan aḍighi mudị ekarạph iyaạr kụ reḅạ kụ apuru Iv mọ: “Enhaạn akạr ri aḅẹm mọ nyinha ki/le eemuma oomo ireeny phọ edi bọ siẹn oghoony phọ ḍughụm?” Aḍipuru phọ aḍiphẹ phọ epamhanhạm okpẹ dị aaghiạn idiphọ okarạph ooghọ. Enhaạn aḅẹm mọ bidị olhe ni eemuma atorobọ oreeny emuton nyoniin. Ibadị inhọn iimuma imuza ni dị Adạm r’Iv m’ule. (Gen. 2:9) Okạr oghaạph, aZihova Enhaạn inmo. Toroboiperolbọ, Enhaạn agbiemhi ni Adạm r’Iv eniin eemuma siphẹ oghoony phọ dị odị amạ. Kụ iḍighi kụ aḍipuru phọ aSetan ilhọgh okpẹ ipẹ Enhaạn eghaạph bọ. Ikọm idị bidị ootughiạn mọ Enhaạn ra/nmo ghan inmo. Eeni kẹn Iv aatughiạn ghan mọ, ‘Emạ iyaạr edi ni dị Enhaạn aaghinhaạn nyodị.’
10. Ika kụ idị aSetan aghị onyen bịn aḅoroghom ḍien phọ Enhaạn, kụ ipẹ phọ ikọm eeghe kụ emiteom?
10 Mem mọ aSetan apuru bọ ḍipuru phọ, Iv alhegheri ni mọ aZihova kụ otooghiạ odị. Odị aphagharanhaạn Setan esi oḅenhị odị ipẹ Enhaạn eghaạph bọ. Odị aḅarạm mọ bidị ku/ḅọgh r’oḅọgh. Odị alhegheri ni mọ oḅaạr emhụ oghị esi iphụr arurụ phọ Enhaạn kekọm ḍuugh engọ bidị. Kụ aSetan aphagharanhaạn mọ: “Nạ ka/mugh.” (Gen. 3:2-4) Egi phọ aSetan o/ḍighinhom mun ikeḍi, kuolọ aghị onyen bịn aḅoroghom ḍien phọ Enhaạn, aḅenhị ghan Iv mọ aZihova ogbaạm okpẹ. Bịn aSetan aḍighi eru obobọ oye iḅoroghom. Ukạr kụ ookelheghi Iv, odị amheeraam ni Setan. (1 Tim. 2:14) Odị aḍuom ghụn olhoghi Setan kparipẹ r’aZihova. Bịn eḍighi idị Iv asopha osopha dị eeph iboom. Iv asopha oḅaạr emhụ oghị esi aZihova, bịn amhiigh olhe eemuma phọ aZihova agbiemhi bọ nyodị. Ipẹ reten bịn odị asighẹ iniin angọ aani Adạm.—Gen. 3:6.
11. Eeghe kụ idị oḅẹl odẹ r’onhiin phọ ayira muḍighi?
11 Legheri mọ Iv mutue ni aḅenhị Setan mọ: “Mị nyinhạ u/legheri, mị alegheri aZihova Odẹ phọ amhị, kụ mị apomoghiạn ni aḅilhẹ aḍuom nyodị olhoghi. Odị kụ ungọ iyoor torobọ iyaạr, uḍighi ika kụ nạ ragbaaghiọm bọ nyodị iduọn phọ? Ḍuạ siẹn!” P’eeghe idị olhoghi aZihova muḅaạl, onhaghạn ikpo onhụ phọ iphẹn phọ dị eḍuạ onhụ ooḅi onyanhị odị emite! (Prov. 27:11) Kuolọ Adạm r’Iv u/moọgh ephomhoghiạn oḅạr ukị esi aZihova. E/moọgh ephomhoghiạn oghị esi Odẹ phọ abidị, ikọm idị Adạm r’Iv opiọm ogbạ omheremhị aḍien odẹ phọ abidị.
12. Ika kụ idị aSetan azụph iikia olhoghi Iv, ḅilhẹ eeghe kụ edị Adạm r’Iv opiọm oḍighi?
12 Iduọn yira momhiịn bọ ni, aSetan amhiighom esi ozụph iikia olhoghi Iv. Odị aḍighi idị odị kaakia ilọ odọ phọ Oye phọ rameera bọ ḍien phọ, Zihova. Adạm r’Iv upiọm ni ogbạ omheremhị aḍien phọ aZihova. Bidị uuwelheghiạn siloor bịn eḍighi idị edughanhaan Setan ookelheghi abidị dị bidị koḅaạr emhụ okị esi Odẹ phọ abidị. ASetan raḍighinhom ghan kẹn iniin phọ ikeḍi phọ ḍio arodon. Odị rapuẹ ghan ḍien phọ aZihova esi oḅoroghom. Redughanhaan ghan ni we dị omheeraam okpẹ kirokirọ phọ aSetan oghel itọ elhiom eḍighinhom iyaạr phọ aZihova.
AZIHOVA RAḄAALHAMHỊ GHAN NI ḌIEN PHỌ ODỊ
13. Ika kụ idị Ezekiel 36:23 eghaạph eekaragh ḍikpanạ adom aBaibul phọ?
13 AZihova atọl li bịn aḅoorian esi oomo iphẹn rogbaaghiọm bọ nyodị ḍughụm? Eeye, odị o/ḅoorian! Oomo igẹ aBaibul phọ eḍeenhaan ni ipẹ aZihova maḍighi bọ ilọ oḅaalhamhị aḍien phọ odị aḍiẹn mophuẹ bọ siphẹ oghoony phọ Iden. (Gen. 3:15) Okạr oghaạph, yira kotue ni oḅẹm mọ ekpanhạ iyaạr dị aBaibul phọ rakaạph ghan pọ: AZihova maḅaalhamhị ḍien phọ odị dị eego esi Omhạr phọ odị Oọny phọ odị katooghị bọ, ḅilhẹ aḅulhemhi elhiom eḍighinhom iyaạr r’eephọ siẹn ade phọ. ABaibul phọ apamhanhạm ni iinhaghạn dị kilhoghonhaạn iyira ḍighaạgh onhaghanhạn ipẹ aZihova kaḅaalhamhị bọ ḍien phọ odị.—Bạl Ezekiel 36:23.
14. Ika kụ idị eten phọ epẹ aZihova amhegheron bọ aghị esi iḅạph phọ emite bọ siphẹ oghoony phọ Iden meḅaalhamhị ḍien phọ odị?
14 ASetan maḍighi ni oomo ipẹ odị katue bọ okikima arigbiom mọ aZihova dị ke/munughan. Kuolọ odị o/rue, kụ ka/tue ni bịn. Igẹ aBaibul phọ eḍeenhaan ni ipẹ aZihova maḍighi bọ oḅaalhamhị aḍien phọ odị, kụ iphẹn phọ eḍeenhaan ni mọ aZihova kụ Enhaạn r’otooghiạ dị anhighẹ apelheghiom. Okạr agey, iḅạph phọ aSetan ḅilhẹ r’oomo abuphẹ oḍighan bọ nyodị mekọm eboom eephina engọ aZihova. (Ps. 78:40) Ghalhamọ r’iduọn phọ ni, odị asighẹ osụ olhoghi, okparạm ḅilhẹ r’elhiom ooruẹn kụ apamạm iiḅaghamhị phọ iphẹn phọ. Odị aḅilhẹ kẹn ni aḍeenhaan iikpọ phọ odị reten dị ko/tue ogbi omuneni. Edị enhighẹ epelheghiom, ephomhoghiạn phọ odị eganana ni esi oomo areten phọ ipẹ odị razọ ghan bọ. (1 Jọn 4:8) AZihova o/phooghian omhiịn mọ odị aḅaalhamhị ni ḍien phọ odị.
ASetan agbạ okpẹ kụ aḅenhị Iv ilọ aZihova, kụ k’asiạ phọ Eru phọ akiọm ni ghisigh raḅoroghom ghan Enhaạn (Miịn siikpịgh phọ 9-10, 15) *
15. Ika kụ idị aSetan maḅoroghom ḍien phọ Enhaạn ḍio arodon, kụ mekọm eeghe kụ emiteom?
15 ASetan akiọm ni ghisigh raḅoroghom ḍien phọ Enhaạn ḍio arodon. Odị maakelheghi ibadị awe omheeraam mọ Enhaạn i/moọgh iikpọ, ra/soph ghan elhiom ooruẹn, o/sụ olhoghi, ḅilhẹ mọ o/mhoọgh ephomhoghiạn. Esi omaạm, aSetan rakparaghạ ghan oḍighi idị awe komeeraam mọ aZihova kụ Ko/lemhiạ phọ. Kụ eḍighi maạr dị awe omheeraam mọ Enhaạn edi ghan ni, aSetan rakparaghạ ghan oḍighi idị bidị komeeraam mọ Enhaạn ḅilhẹ r’asiigbu phọ odị resiphigha ghan we ḅilhẹ mọ i/kpeanhaạn. Odị aḅilhẹ kẹn ratughemhị ghan we omheeraam mọ aZihova aḍighi Enhaạn dị amhoọgh egbagarạ ekpom ḅilhẹ rapophoghị ghan we ooni aniạn. Mem dị bidị omheeraam iḅoroghom mọ iphẹn phọ, reḍighi ghan idị bidị kokel elhiom itooghị phọ aZihova.
IYAẠR DỊ NẠ AMHOỌGH OḌIGHI AANI SIẸN OGBOGH OGHAẠPH PHỌ OPHỌN PHỌ
16. Eeghe iyaạr dị Adạm r’Iv opiọm oḍighi kụ edị nạ katue aḍighi?
16 AZihova angọ ni ogẹl mọ omhạr awe oḍighan aani oḅaalhamhị ḍien phọ odị. Iduọn phọ pọ, nạ katue ni aḍighi ipẹ Adạm r’Iv opiọm bọ oḍighi phọ, ḍio arodon. Etigheri iduọn yira odi bọ aḅirinhi dị awe dị roḅoroghom ghan koḅilhẹ oopụ ḍien phọ aZihova omuza bọ, nạ amoọgh ni eepoogh omheerạ giph ogbạ ipẹ eru bọ inẹ omiteom—mọ aZihova aḍighi Enhaạn iigbia, amoọgh elhiom eḍighinhom iyaạr, anighẹ, aḅilhẹ amoọgh ephomhoghiạn. (Isa. 29:23) Nạ katue ni abakị aani itooghị phọ odị. Nạ katue ni amạ aḍeenhaan we mọ itooghị phọ aZihova bịn kụ inhighẹ ḅilhẹ mọ kesighẹ eephọ r’oḅaạl olhoghi kụ etuomnaan oomo olhẹm mọ.—Ps. 37:9, 37; 146:5, 6, 10.
17. Ika kụ idị aZizọs aḍighi idị awe kolegheri ḍien Odẹ phọ odị?
17 Mem dị yira ophẹl ḍien phọ aZihova pọ yira rodaphạn ghan eḍeenhaan phọ aZizọs Kraist. (Jọn 17:26) AZizọs o/ḍighi idị awe olhegheri ḍien odẹ phọ odị esi osighẹ ghan oḍighinhom bịn, kuolọ aghaạph ghan aphẹl aZihova ilọ odọ oye phọ odị aru bọ. Esi omaạm, adọl aghuḍum mọ odị igbatanhaạn ni r’aḍiphẹ abuọ aFarisi phọ oḍighi bọ idị awe osighẹ mọ aZihova agbagarạ, mọ rapuru ghan idị epel we oḍighi, akelhạn, ḅilhẹ kẹn mọ o/mhoọgh igbiririph. AZizọs alhoghonhaạn ḍighaạgh dị awe phọ komiịn Odẹ phọ odị idiphọ oye dị asụ olhoghi, rakparạm ghan, amhoọgh ephomhoghiạn, ḅilhẹ rasạr ghan kawilhenhaạn. Odị aḅilhẹ kẹn alhoghonhaạn ḍighaạgh dị awe komiịn aZihova, esi eten phọ epẹ odị akaraghị bọ aaghironhaan raagharạ Odẹ phọ odị siphẹ adọl aghuḍum mọ odị ḍio etum ḍio.—Jọn 14:9.
18. Ika kụ idị yira kotue bọ okirion okpẹ kirokirọ phọ ḅilhẹ r’iḅoroghom mọ roḅoroghom bọ ḍien phọ aZihova?
18 Idiphọ aZizọs, yira kotue ni okaạph oḅenhị aani bunhọn ipẹ yira olhegheri bọ ilọ aZihova, otughemhị we mọ Odị aḍighi Enhaạn ephomhoghiạn r’igbiririph. Yira oḍighi iduọn phọ, pọ yira kokirion ni okpẹ kirokirọ phọ ḅilhẹ r’iḅoroghom mọ roḅoroghom bọ aZihova, oḅaalhamhị ḍien phọ aZihova, oḍighi idị keḍighi ḍien iigbia siphẹ arokpom mọ r’ilhoghi phọ abidị. Yira kotue ni otuughaạny aani aZihova, etigheri iduọn yira u/munughan bọ. (Efẹ. 5:1, 2) Mem dị ikpo onhụ phọ ayira r’iḍighinhom araraạr phọ ayira eḍeenhaan we odọ oye phọ aZihova aru bọ, pọ yira rologhonhaạn ghan ḍighaạgh oḅaalhamhị aḍien phọ odị. Yira oḅilhẹ kẹn roḅaalhamhị ghan ḍien phọ aZihova mem dị yira olhoghonhaạn ḍighaạgh oolemhi aḍiitughiạn dị i/tu inẹ dị awe omhoọgh ilọ aZihova. * Ḅilhẹ kẹn yira roḍeenhaan ghan mọ awe dị u/munughan kotue ni opạm okparamhị omheeraam mọ abidị.—Job. 27:5.
Ewạ mọ olhoghonhaạn ḍighaạgh buphẹ yira rotughemhị ghan bọ Baibul phọ olhegheri eegharạ igbiririph r’ephomhoghiạn phọ aZihova (Miịn siikpịgh phọ 18-19) *
19. Ika kụ idị Isaiah 63:7 ilhoghonhaạn iyira ḍighaạgh olhegheri ekpanhạ iyaạr dị yira kogbon siphẹ itughemhị phọ ayira?
19 Ooḅeghiọn enhọn iyaạr dị emhạn maạr dị yira kotue oḍighi, oḅaalhamhị aḍien phọ aZihova. Mem dị yira rotughemhị igey aBaibul phọ bunhọn, yira rogbor ghan koghaạph olhoghọm iiphaghamhiọm ilọ elhiom itooghị phọ Enhaạn, mọ aZihova kụ amhoọgh elhiom otooghị oomo isiẹn aḅirinhi phọ, kụ ipẹ kụ inẹ. Toroboiperolbọ, mem dị yira rokparaghạ otughemhị abidị iilhogh phọ Enhaạn, aḍiigbu ayira eḍighi ghụn olhoghonhaạn abidị ḍighaạgh dị bidị kopomhoghiạn aZihova Odẹ phọ ayira, ḅilhẹ oḅạr nyodị. Pọ iduọn phọ ewạ mọ yira omạ ghan omiteom imạ araagharạ phọ aZihova, oghaạph olhoghọm iiphaghamhiọm ilọ odọ Oye phọ rameera bọ ḍien phọ Zihova. (Bạl Isaiah 63:7.) Yira otughemhị eten phọ epẹ phọ, yira kologhonhaạn ni bunhọn ḍighaạgh ophomhoghiạn aZihova ḅilhẹ r’onhaghanhạn odị loor iduọn bidị rowạ bọ oḅạr odị.
20. Yira kooḅeghiọn eeghe emhuoghaạph phọ etum bọ siẹn?
20 Ika nuụn kụ edị yira komiịn bọ mọ aroozọ r’itughemhị phọ ayira eeghironhaan ni ḍien phọ aZihova, ḅilhẹ eḍighi idị abunhọn koḍuraan otuman aani nyodị? Emhuoghaạph phọ etum bọ siẹn kụ keeḅeghiọn ḍipuru phọ aḍiphẹ phọ.
AḌUỌR PHỌ 2 Jehovah Is Your Name
^ par. 5 Eeghe ephigh oghaạph kụ odianhaan ruukpaạny phọ r’omhạr awe? Eeghe kụ iḍighi kụ oghaạph phọ opọ phọ amhạn bọ ni maạr, ḅilhẹ eeghe kụ iḍighi kụ igbolhomaam aani bọ iyira? Olhegheri ophanyanhaạn asipuru phọ iphẹn phọ r’inhọn dị egbolhomaam aani oghaạph phọ ophọn phọ kilhoghonhaạn iyira ḍighaạgh okparamhị asiya phọ ayira r’aZihova.
^ par. 18 Eniin amem, arinyạ phọ ayira meghaạph ni mọ i/moghi dị koḅaalhamhị ḍien phọ aZihova loor esi dị oye k”oghaạph ghan mọ aZihova o/mhoọgh elhiom omheera aḍien phọ aḍiphẹ phọ. Toroboiperolbọ, mem mọ ophạm bọ ruupuruan alhạ lhạ lhạ phọ lhạ phọ 2017, uuḅenhion ni onhaghạn aḍughụm mọ opọ phọ. Otolhọm agadạ phọ aḅẹm mọ: “I/beeph oḅẹm mọ ooḅereghị ghan ilọ oḅaalhamhị aḍien phọ aZihova, loor esi dị emoghi ni ogbạ omheremhị odọ phọ oye phọ odị aru bọ.”—Miịn Brokastin aJanuary 2018 siphẹ jw.org®. Kiạ siphẹ LIBRARY > JW BROADCASTING®.
^ par. 62 ILỌ AFOTO: Eru phọ aḅoroghom Enhaạn esi oḅenhị Iv mọ Enhaạn ogbaạm okpẹ. Kụ k’asiạ phọ aSetan rapophe ghan itughemhị okpẹ kirokirọ, idiphọ itughemhị phọ eḅẹm bọ mọ Enhaạn aḍighi ogbagarạ oye ḅilhẹ mọ oye u/lẹm.
^ par. 64 ILỌ AFOTO: Onyọ umor dị ratughemhị ghan oye Baibul, akaạph ralọgh iiphaghamhiọm ilọ araagharạ phọ Enhaạn.
