1-2. Lok aryo mene ma pigi tek bot Lucaden pa Jehovah?

TYE lok aryo madongo ma wakemme kwede i kare-ni​—ilo twero me loc pa Jehovah malo ki lonyo nyinge. Macalo Lucaden pa Jehovah, wamaro nyamo lok i kom jami magi. Ento, tika ilo malo twero me loc pa Lubanga ki lonyo nyinge obedo jami aryo mapat adada? Pe.

² Wan ducu dong waniang ni omyero kilony nying Lubanga. Wapwonyo bene ni twero me loc pa Jehovah nyo yo me locce omyero kinyut ni en aye ber loyo. Pi meno, lok aryo magi ducu pigi tek.

3. Nying Jehovah kwako gin ango?

³ Ki lok ada, nying Jehovah kwako jami ducu madok i kom Lubangawa, kadiwa yo me locce. Pi meno, ka wawaco ni lonyo nying Jehovah aye lok ma pire tek loyo, nongo watye ka waco ni omyero kinyut ni yo me loc pa Jehovah aye ber loyo. Nying Jehovah kubbe ki yo me locce macalo Won Twer Ducu.​—Nen bok ma wiye tye ni “ Lok ma Pire Tek-ki Kwako Ngo?”

4. Jabuli 135:13 tito gin ango i kom nying Lubanga, dok lapeny mene ma wabigamogi i pwony man?

⁴ Nying man ni Jehovah pire tek adada. (Kwan Jabuli 135:13.) Ngo ma weko nying Lubanga pire tek tutwal? Kikwongo balo nyinge nining? Lubanga olonyo nyinge nining? Dok watwero konyo lonyo nyinge nining? Kong dong wanyamu lapeny magi.

5. Jo mukene gitwero pennye ki lapeny ango ka guwinyo ni nying Lubanga omyero kilony?

⁵ “Giwor nyingi maleng.” (Mat. 6:9) Yecu owaco ni man aye gin ma pire tek loyo ma omyero waleg pire. Ento lok  pa Yecu-ni tyen lokke ngo? Lonyo gin moni te lokke ni waweko bedo maleng, labongo cilo mo. Jo mukene gitwero penyo ni, ‘Ka nying Jehovah dong leng wa con, ci dok pingo mitte ni kilony?’ Me gamo lapeny meno, omyero watam i kom gin ma nying kwako.

6. Ngo ma weko nying moni pire bedo tek?

⁶ Nying pe obedo mere nyig lok ma kitwero coyone i karatac nyo lwongone alwonga keken. Nen kong gin ma Baibul waco: “Yer bedo ki nying maber, pien en aye ber kato lonyo madwong.” (Car. 22:1; Latit. 7:1) Pingo nying pire tek adada? Pien kwako kit ma jo mukene neno kwede ngat moni. Pi meno, kit ma nying moni kicoyo kwede nyo kilwongo kwede​—pire pe tek tutwal; gin ma pire tek aye ngo ma dano gitamo ka guneno nyo guwinyo nying meno.

7. Dano guloko lok goba i kom nying Lubanga nining?

⁷ Ka dano giwaco lok goba i kom Jehovah, nongo gitye ka mito ni jo mukene gutam jami maraco i kome. Man weko gicako kok i kom Lubanga kun gibalo nyinge. Tyen mukwongo ma ngat mo owaco jami maraco i kom Lubanga dok oweko dano gutamo jami maraco i kome obedo i poto me Eden. Nen kong gin ma wapwonyo ki i lok goba man.

8. Gin ango ma Adam ki Kawa onongo gingeyo, dok man kelo lapeny ango mukene?

⁸ Adam ki Kawa onongo gingeyo nying Jehovah, kacel ki jami mogo ma pigi tego madok i kome. Me labolle, gin onongo gingeyo ni en aye Lacwecgi, dok ni en aye ominigi kwo ki kabedo mamwonya me kwo iye, dok oribogi kacel i nyom ma roc mo pe iye. (Acak. 1:26-28; 2:18) Ento, tika onongo gibimedde ki lwodo jami ducu mabeco ma Jehovah otimo pigi? Tika gumedde ki dongo mar kacel ki pwocgi pi Jehovah? Lagam me lapeny magi onen ka maleng i kare ma lamone pa Lubanga otemogi.

9. Ma lubbe ki Acakki 2:16, 17 ki 3:1-5, gin ango ma Jehovah owaco ki luot mukwongo, dok Catan odwalo lok ada meno nining?

⁹ Kwan Acakki 2:16, 17 ki 3:1-5. Catan  otiyo ki twol macalo lakub dwane me penyo Kawa lapeny ni: “Lubanga mono owacci, ‘Pe wucam nyig yat ducu ma tye i poto-ni’?” Catan openyo lapeny ma tye ki lok goba i kom Lubanga dok oweko Kawa ocako tam marac i kom Lubanga. Lubanga onongo owaco ni gitwero camo nyig yadi ducu ento acel keken aye myero pe gucam. Adam ki Kawa onongo gitwero camo kwai nyig yadi mapol mapatpat. (Acak. 2:9) Ada, Jehovah cinge yot. Kadi bed kit meno, Lubanga ogengo Adam ki Kawa ni pe gucam nyig yat ma i kom yat acel keken ma En oyero. Pi meno, lapeny pa Catan-ni odwalo lok ada woko. Catan oweko onen calo Lubanga cinge nwang. Twero bedo ni Kawa opennye ni, ‘Lubanga mono tye ka gengowa ki i gin mo maber?’

10. Catan obalo nying Lubanga atyer ka maleng nining, dok adwogine obedo ngo?

¹⁰ I kare ma Catan openyo Kawa lapeny meno, Kawa onongo pud tye lawiny bot Jehovah. En otito ki Catan kore ki kore gin ma Lubanga ociko. Dok omedo bene ni omyero pe gigud kom yat meno. En onongo ngeyo ni ka gituro cik pa Lubanga, ci gibito woko. Ento Catan owaco ki dako ni: “Pe wubito.” (Acak. 3:2-4) Catan onongo dong pe tye ka balo nying Jehovah lapiny lapiny. En oloko atyer, kun tito ki Kawa ni Jehovah obedo lagoba. Pi meno, Catan odoko lagoba, nyo labal nying. En obwolo Kawa dok Kawa oye lokke. (1 Tem. 2:14) En ogeno Catan makato Jehovah. Man oweko obedo yot adada ki Kawa me moko tam ma pud dong rac loyo. En oyero pe me winyo Jehovah. Kawa ocako camo nyig yat ma Jehovah ogengogi ni pe gucam-mi. I ngeye, en omiyo mogo bot Adam.​—Acak. 3:6.

11. Gin ango ma onongo myero lunyodowa mukwongo gutim?

¹¹ Tam kong manok i kom gin ma Kawa onongo myero owac ki Catan. Go kong ni en onongo owaco kit man: “An pe angeyo ngat ma in ibedo, ento angeyo Wora Jehovah, dok amare kun agene bene. En omiyo ki Adam kacel ki an jami ducu ma watye kwede. In dok itwero waco lok marac kit man i kome nining? Cit cen!” Cwiny Jehovah onongo pud dong bibedo yom ya, me winyo lok meno ki bot nyare ma lagen dok me amara! (Car. 27:11) Ento Kawa onongo pe ki mar matut ma kit meno pi Jehovah; dok Adam bene onongo pe ki kit mar acel-lu. Pien pe gubedo ki mar matut pi Wongi, Adam ki Kawa pe gucung matek i kare ma kitye ka balo nying Jehovah.

12. Catan okelo akalakala i tam pa Kawa nining, dok Adam ki Kawa pe gutimo gin ango?

¹² Kit ma waneno kwede, Catan ocako ki kelo akalakala i tam pa Kawa. En oweko Kawa ocako bedo ki akalakala ka ce Jehovah obedo Wego maber. Adam ki  Kawa pe gucwako Jehovah i kare ma Catan oloko lok goba i kome. Man oweko obedo yot botgi me winyo lok pa Catan dok gujemo i kom Wongi. Catan pud tiyo ki diro acel-li i kare-ni. En balo nying Jehovah ki loko lok goba. Yot adada bot jo ma giye goba pa Catan me kwero twero me loc pa Jehovah.

13. Ejekiel 36:23 nyuto lok ma pire tek loyo i Baibul nining?

¹³ Tika Jehovah kanyo balo nyinge lalingling labongo timo gin mo iye? Pe tye kit meno! Lok ducu ma i Baibul nyuto jami ma Jehovah otimo me nyuto ni lok goba ma kiloko i kome i pote me Eden pe tye ada. (Acak. 3:15) Ki lok ada, watwero dolo te kwena me Baibul wiye wiye ni: Jehovah bilonyo nyinge kun tiyo ki Kerre ma Wode aye lalocce me kelo kuc ki kit ma atir odoco i wi lobo. Baibul tye ki ngec ma konyowa me niang jami ma Jehovah otimo me lonyo nyinge.​—Kwan Ejekiel 36:23.

14. Kit ma Jehovah odok kwede i jemo i poto me Eden olonyo nyinge nining?

¹⁴ Catan otimo jami ducu ma en twero me gengo Jehovah cobo Yubbe. Ento Catan pe bitwero matwal. Lok ma tye i Baibul nyutiwa kit ma Jehovah odok kwede iye, dok moko ni pe tye ngat mo calo Lubanga Jehovah. Ki lok ada, jemo pa Catan ki jo ma gicwake ocwero cwiny Jehovah adada. (Jab. 78:40) Ento en odok i kom lok man ki ryeko, diyo cwiny, kacel ki ngolo kop atir. En bene onyuto tekone i yo mapol mapatpat. Ma dong pire tek loyo, mar mere onen i jami ducu ma en otimo. (1 Jon 4:8) Jehovah pud tye ka medde ki tic me lonyo nyinge.

15. Catan tye ka balo nying Lubanga i kare-ni nining, dok adwogine tye ningo?

¹⁵ Catan pud tye ka balo nying Lubanga wa i kare-ni. En yelle wek dano gubed ki akalakala i kom teko pa Lubanga, ryekone, marre, ki kite me ngolo kop atir. Me labolle, Catan temo bwolo dano ki waco ni Jehovah pe obedo Lacwec. Dok pi jo ma giye ni Lubanga tye, Catan tute wek  gunen cik ki rwom me kwo ma atir pa Lubanga ni diyo dano. En bene pwonyo dano ni Jehovah obedo Lubanga ma cwinye col dok ger, kun wango dano i mac me kapiny. Ka gin guye goba marac meno, ci doko yot botgi me kwero loc ma atir pa Jehovah. Ka Jehovah peya ojwero Catan, en pud bimedde ki tutene me balo nying Jehovah, dok bene bibedo ka yelle matek me loko tammi wek ikwer Jehovah woko. Tika tutene man binyako nyige?

16. Gin ango ma itwero timone ma Adam ki Kawa pe gutimo?

¹⁶ Jehovah oye ni dano ma gitye ki roc gukony lonyo nyinge. Pi meno, iromo timo gin ma Adam ki Kawa pe gutimo. Kadi bed ni ikwo i lobo ma opong ki jo ma gibalo nying Jehovah, in itye ki kare me tito lok ada bot jo magi​—ni Jehovah leng, kite atir, en ber, dok lamar. (Ic. 29:23) Itwero cwako locce. Iromo konyo dano me niang ni loc pa Jehovah keken aye tye atir dok bikelo kuc ki yomcwiny bot ginacweya ducu.​—Jab. 37:9, 37; 146:5, 6, 10.

17. Yecu oweko nying Wonne ongene nining?

¹⁷ Ka wacung matek pi nying Jehovah, ci nongo watye ka lubo lanen pa Yecu Kricito. (Jon 17:26) Yecu oweko nying Wonne ongene pe ki i tic kwede keken ento bene ki pwonyo dano ki kit pa Jehovah. Me labolle, en opwonyo gin mapat ki ma Luparicayo onongo gipwonyo ma weko dano neno Jehovah calo ngat ma ger, lagingi, bedo bor ki dano, dok pe lakica. Yecu okonyo dano me neno Wonne calo ngat ma niang, diyo cwinye, lamar, dok timo kica. En bene okonyo dano me ngeyo Jehovah ki lubo lanen pa Wonne macok adada i kwone me nino ducu.​—Jon 14:9.

18. Gin ango ma watwero timone me nyuto ni jami maraco ma jo ma gidag Lubanga giwaco i kome pe tye lok ada?

¹⁸ Calo Yecu, wan bene watwero nywako gin ma wangeyo madok i kom Jehovah, kun wapwonyo dano ni en lamar dok lakica. Ka wawoto ki timo meno, wajwayo goba ma kiloko i kom Jehovah dok wakonyo me lonyo nyinge. Walonyo nying Jehovah ki konyo jo mukene me neno nying meno calo gin maleng.  Wan bene watwero lubo lanen pa Jehovah. Man twerre kadi bed watye ki roc. (Ep. 5:1, 2) Ka lokwa ki ticwa nyuto ki dano ngat ma Jehovah obedo, ci wakonyo lonyo nyinge. Walonyo nying meno ki konyo dano me ngeyo lok ada madok i kom Lubanga. * Walonyo bene nying Jehovah ka wanyuto ni wan ma watye ki roc-ci watwero gwoko genewa.​—Yubu 27:5.

19. Icaya 63:7 konyowa nining me ngeyo tyen lok ma pire tek loyo me pwonywa?

¹⁹ Tye gin mukene ma watwero timone me lonyo nying Jehovah. Pol kare ka wapwonyo jo mukene lok ada me Baibul, wamaro nwoyo lok i kom twero pa Jehovah me loyo polo ki lobo. Ento, kadi bed pire tek me pwonyo dano cik pa Lubanga, yubwa ma pire tek loyo obedo me konyogi me maro Wonwa, Jehovah, ki me bedo lugen bote. Pi meno, omyero wanyut kit pa Jehovah mamwonya, dok wanyut ngat ma nying man ni Jehovah cung pire. (Kwan Icaya 63:7.) Ka wapwonyo kit meno, ci wakonyo jo mukene me maro Jehovah kacel ki winye pien gimito bedo lugen bote.

20. Gin ango ma wabinyamo i pwony ma lubo man?

²⁰ Ento i yo ma nining ma watwero weko kitwa kacel ki pwonywa bedo ma nyiko jo mukene cok ki Jehovah dok konyogi me tamo jami mabeco ka guwinyo nyinge? Pwony ma lubo man bigamo lapeny meno.