1-2. Misawacayay Tamdaw ni Yihofa ciharatengay to maanan tosa kalimlaan a demak hani?

ANINI, pakaayni kitaanan iraay ko tosa kalimlaan a demak: Saka 1, misawacay to matatodongay ko saˈakawangay sapikowan a fadangalan ni Yihofa. Saka 2, patalahkal to fangcalay ko ngangan no Kawas. Malo Misawacayay Tamdaw ni Yihofa, ciharatengay kita toniya tosa demak. Mihaenay, oniya tosa demak iraay ko kalaliting han? Iraayto.

² Mafanaˈay kita, mapakaditay ko ngangan ni Yihofa misaaliay to kakoracen. Mafanaˈayho kita, iraay ko cisasaay to saˈakawangay sapikowan a fadangalan ni Yihofa, mihaenay o pakayraan Ningra a mikowan o sasawacayen to o sangaˈayay. O masakalimlaan koniya tosa a demak.

3. O fangcalay ngangan ni Yihofa mitaypiyaway to maanan hani? Mahawpay ko maanan hani?

³ O fangcalay ngangan ni Yihofa mitaypiyaway to kihcod Ningra, mahawpay ko pakayraan Ningra mikowan. Mihaenay, sapikoracaw to mapakaditay a fangcalay ngangan Ningra, sasawacayen to o sangaˈayay ko pakayraan Ningra a mikowan. Malo saˈakawangay a tatapangan, o pakayraan ni Yihofa mikowan milingatay to ngangan Ningra. (Nengnengen ko sapatongal lalakaw “ Milingatay to Patalahkal to Fangcalay Ngangan no Kawas a Demak.”)

4. (1) Pakayni ngangan no Kawas, ˈOlic 135:13 samaanay ko sowal hani? (2) Oniya lalakaw wa pacaˈof to maanan a salicay hani?

⁴ O Yihofa sanay a ngangan tada mikiriwiˈay.  (ˈOsien ko ˈOlic 135:13.) Hano kalimlaan koniya ngangan hani? I salakat samanay a mapakadit koniya ngangan hani? Sasamaan ko Kawas patalahkal to fangcalay ngangan Ningra? Sasamaan kita paˈading to fangcalay ngangan Ningra? Oniya lalakaw wa pacaˈof toniya salicay.

5. ‘Nanay patalahkalen ko fangcalay ngangan Iso,’ oniya sowal maharatengay no tamdaw ko maanan a salicay?

⁵ Pasifanaˈay ci Yis kitaanan itini satolon pasowal ci Yihofaan: ‘Nanay mapatalahkal ko fangcalay ngangan Iso.’ (Matay 6:9) Sowal ningra kalimlaan mihaen ko pitolon. Kawra ‘patalahkal malo fangcalay’ o maanan ko tatodong hani? Misowalan itini ‘fangcalay’ o makoracay, kasapaan, macingkiyatay. Harateng no roma tamdaw: ‘O Yihofa sanay a ngangan o makoracay sanay, hano patalahkalenho to fangcalay hani?’ Sapacaˈofaw toniya salicay, nengnengen ita mitaypiyaway koniya ngangan to manan.

6. Hano tada kalimlaan ko ngangan hani?

⁶ O cecay ngangan cowa ko pitilid anca piˈosi aca to pina tatilidan. Sowal no Fangcalay Cudad: ‘Mipiliˈ to hafay cowa pakafilo mipiliˈ to makapahay ngangan.’ (Taneng 22:1; Patnakay 7:1) Kalimlaan ko ngangan, mitaypiyaway to makapahay ngangan no tamdaw, o pinengneng no tao cingranan. Mihaenay, o cecay ngangan samanen mitilid ato samanen miˈosi cowa ko kalimlaan, sakakaay i, maˈaraw anca matengil no tamdaw koniya ngangan i, samanay ko pinengneng to cinganganay a tamdaw.

7. O ngangan no Kawas samanay mapakadit hani?

⁷ Misamangahay ko tamdaw a paoraf ci Yihofaan, mipalak to ngangan Ningra, pakaditay to ngangan Ningra. Oniya demak salakat itiniay i Itin a mifekad. Nengnengen ita, mikitini toniya demak mamananam ita ko manan.

8. (1) Ci Atam aci Ifa mafanaˈay to maanan hani? (2) Na ngangaˈay cangra samaan ko demak hani?

⁸ Ci Atam aci Ifa mafanaˈay to ci Yihofa ko ngangan no Kawas, mafanaˈayho to adihayay pakayniay ci Yihofaan a demak. Mafanaˈay cangra, o misangaˈay a tatapangan ci Yihofa, pafeliay to ˈorip cangranan, makapahay  kitiraan ato malefotay a raramod. (Satapangan 1:26-28; 2:18) Kawra misaka dademakan nangra ko malefotay a ponoˈ midotim to nano demak ni Yihofa cangraanan, padadotocay a mitongal to olah ato piakoˈid ci Yihofaan hokira? Nengnengen ita tiya micada cangra to sakayhid i samanay ko harateng.

9. (1) Pakayni i Satapangan 2:16, 17; 3:1-5, palimoˈotan ni Yihofa ci Atam aci Ifa to manan hani? (2) Samanan ni Satan paira ko tatiihay a harateng ni Ifa to Kawas hani?

⁹ ˈOsien ko Satapangan 2:16, 17; 3:1-5. Pakaynian ni Satan i cecay ˈoner a pasowal ci Ifa: ‘Soˈlinay pasowal ko Kawas, cowa ka ngaˈay kamo komaen to losay no masakenaay a kilang han?’ Oniya salicay mahimeday ko pakaditay to Kawas a mangah, hato iraayto ko tatiihay harateng ni Ifa to Kawas. Soˈlinay i, sowal no Kawas, edengan o heci no cecay kilang cowa ka ngaˈay kaenen, o romaroma ngaˈayay, mihaenay adihayay ko papiliˈen ni Atam aci Ifa a losay. (Satapangan 2:9) Hinapaladaˈay ci Yihofa, o mikecengan Ningra ci Ataman aci Ifaan o losay aca no cecay kilang. Kawra o salicay ni Satan hato maˈidiay ci Yihofa, misatapang a miharateng ci Ifa alatek: ‘Soˈlinay miterekan no Kawas ko maanan ngaˈayay a dafong cakakahi pafeli takowanan hokira?’

10. Samanay ci Satan paihkal sa pakadit to ngangan no Kawas hani? Mikayatay koni to samanay a teloc hani?

¹⁰ Milicay ci Satan ci Ifaan i, kamayan midofdof ci Ifa to pikowan ni Yihofa, miliyaw a pasowal ci Satanan to sakeceng no Kawas, pasowal to cowa ko ngangaˈay cangra mitefing toya kilang. Mafanaˈay ci Ifa, misafelit to limoˈot no Kawas o sakapatay, kawra sanay ko sowal ni Satan: ‘Cowa ko mamapatay kamo.’ (Satapangan 3:2-4) Mihaen ko sowal ni Satan, cowato ko mahimeday, paihkal sanay a micihi to misamangahay ci Yihofa, mipalak to ngangan ni Yihofa, pakadit to ngangan Ningra. Mihaenay, malo ‘Akoma’ to ci Satan, o ‘mitonganganay.’ Pakasoˈlinay ci Ifa to sowal ni Satan, masongilaˈay a malipalaw. (1 Timoti 2:14) Ci Satan ko pakasoˈlinan ningra cowa ko ci Yihofa, telocto mararaway ko misaˈosian ningra. Mitowakangay cingra to Kawas, komaen to losay noya kilang, ikor pafelian ningra ko faˈinay a komaen.—Satapangan 3:6.

11. Tiya paoraf ci Satan ci Yihofaan i, na ngangaˈay ci Atam aci Ifa samaan pacaˈof ci Satanan? Kawra cowa pidemak cangra to maanan?

¹¹ Haratengen, na ngangaˈay ci Ifa a pacaˈof ci Satanan. Ngaˈay mihaen ko sowal ningra: “Cowa ka fanaˈ kako tisowanan, kawra mafanaˈay kako to Wama ci Yihofaan, tada maolahay kako Cingranan, pakasoˈlinay Cingranan. O kihcod ako aci Atam sahtoay o sapafeli Ningra. Hano timolo kiso paoraf Cingranan? Ka piliyas!” Ano madimadi ci Ifa ci Yihofaan, mihaen ko sowal, hahakowa ko kahemek ni Yihofa hani! (Taneng 27:11) Kawra awaay ko madimadiay a olah ni Ifa aci Atam ci Yihofaan, mihaenay cowa ka paˈading cangra to ngangan no Kawas.

12. Pairaan ni Satan ko kacisasa ni Ifa to maanan? Ci Atam aci Ifa cowa pisamaan to demak?

¹² Malengoay i fafekang, mikosaman ni Satan ko cisasaay sapalomaˈ i falocoˈ ni Ifa, cisasa  cingra to o ngaˈayay a Wama ci Yihofa hokira. Tiya mapaoraf ci Yihofa i, cowa paˈading ci Atam aci Ifa to ngangan Ningra, pakasoˈlinay ci Satanan a mitowakang to Kawas. Anini, misaka dademakan ni Satan ko malecaday a pakayraan, misamangah a mipaoraf ci Yihofaan, mihaen a pakadit to ngangan Ningra. Telocto i, malipalaway ko ˈalomanay, cato kakahi micada to pikowan no Kawas.

13. O Icikil 36:23 samanay paihkal to kalimlaan a harateng no Fangcalay Cudad?

¹³ Mapakadit ko ngangan no Kawas, pakiyadi hananay Ningra han? Cowa! Polong no Fangcalay Cudad mitadtaday, samaanay ci Yihofa misawacay to mararaway ko mangah ni Satan. (Satapangan 3:15) Ngaˈayay komoden ita a mitolas ko kalimlaan no Fangcalay Cudad: Wa pakaynien ni Yihofa i mikowanan no wawa Ningra a Hongti Kitakit a patalahkal to fangcalay ngangan Ningra, itini fafekang no sera paihkal to moecelay, patikol ko dipayal no hekal. Micekiw kita to Fangcalay Cudad, o mamafanaˈ to samanay ci Yihofa patalahkal to fangcalay ngangan Ningra.—ˈOsien ko Icikil 36:23.

14. Ci Satan ato kapot ningra paoraf ci Yihofaan, samanay ci Yihofa miˈading to ngangan no Niyah hani?

¹⁴ Miharatengay ci Satan to masakenaay a pakayraan miconged to sakalaˈosiaw no araaw ni Yihofa, kawra padotocay a pasokiyaw. Mifanaˈay ko Fangcalay Cudad kitaanan to midemakay ci Yihofa to maanan, oniya demak misawacayay to sidaˈitay a Wama ci Yihofa, o sangaˈayay a mikowanay. Ci Satan ato kapot ningra mitowakangay ci Yihofaan, paoraf Cingranan, pakasomaday Cingranan. (ˈOlic 78:40) Sapisaysayaw toniya demak, paihkalay ci Yihofa to kasapaan a taneng, mihadidiay ato masadafdafay, pakaynian Ningra i adihayay pakayraan paihkal to taˈangayay ˈicel Ningra. Sakakaay i, kihecod a demak Ningra paihkalay to olah Ningra. (1 Yohani 4:8) Soˈlinayto padadotocay ci Yihofa patalahkal to fangcalay ngangan Ningra.

15. Anini samaanay ci Satan pakadit no fangcalay ngangan ni Yihofa hani? Oniya demak samanay mifiyor i tamdaw hani?

¹⁵ Anini, padadotocay ci Satan pakadit no fangcalay ngangan ni Yihofa, papiharateng to  tamdaw to awaay ko ˈicel ato cowa ka sadafdaf ci Yihofa, halo awaay ko taneng ato awaay ko olah sanay. Tinakoen, papipasoˈlinen ningra ko tamdaw, cowa ko ci Yihofa ko misangaˈayay to kihcod. Ano pakasoˈlinay ko tamdaw to Kawas i, paorafay cingra to o cowa ka sadafdafay a Kawas Cingra, pakidemay ko saali to tamdaw. Sanayho cingra milasil, awaay ko olah ni Yihofa, pasemsemay to tamdaw i marengrengay ko namal a cikok. Ano pakasoˈlin ko tamdaw toniya mangah, pasangarayto micada to sakowan no Kawas. Salikor papalaˈafoen ni Yihofa ci Satan, kawra ˈayaw nonini, wa padadotocho ci Satan pakadit ci Yihofaan, sapikayhidaw tisowanan miliyas to Kawas. Wa samaan ko hademak iso hani?

16. Cowa piˈading ci Atam aci Ifa to ngangan ni Yihofa, kawra wa ngaˈay kiso midemak to maanan hani?

¹⁶ Pafelian ni Yihofa kita o cowa kalefot a tamdaw ira ko toki misarocod a patalahkal to fangcalay ngangan Ningra. Soˈlin cowa piˈading ci Atam aci Ifa to ngangan ni Yihofa, kawra o papakadangar kiso. Soˈlin ˈalomanay tamdaw no hekal pakaditay to fangcalay ngangan no Kawas, kawra o ngangaˈay kiso talaˈayaw, mihadak to soˈlinay kimad: O makoracay ci Yihofa, o moecelay, o ngaˈayay, matomesay to olah a Kawas. (Isaya 29:23) Wa ngaˈay midofdof kiso to sakowan Ningra, halo padama to tao mihapinang, edengan o sakowan ni Yihofa malefotay a moecel, edengan o sakowan ni Yihofa ko papaira to soˈlinay rihaday ato lipahak.—ˈOlic 37:9, 37; 146:5, 6, 10.

17. Samanay ci Yis padama to tamdaw mafanaˈ to ngangan no kakarayan Wama hani?

¹⁷ Miˈading kita to ngangan ni Yihofa, o minanamay ci Yis Kristoan. (Yohani 17:26) Ci Yis cowa ko piowaw aca ci Yihofaan, padamaayho to tamdaw cipinang to samanay a Kawas ci Yihofa. Tinakoen, harateng no Farisay tamdaw, pakidemay ko saali ni Yihofa, pasangaray a ingiden, awaay ko siniˈadaay falocoˈ sanay. Kawra pasowalan ni Yis ko tamdaw, makahiyay micaˈi to demak ko kakarayan a Wama, iraay ko mihadidiay, matomesay ko olah to tamdaw, makahiyayho misodod to tamdaw. Roma i, itini kalo kaˈorip ni Yis malefotay a paihkal to makapahay capeling no Kawas, pahapinang to tamdaw to masamaanay a Kawas ci Yihofa.—Yohani 14:9.

18. Samaan ko demak ita wa ngaˈay mitihdak to mangah, patalahkal to fangcalay ngangan no Kawas hani?

¹⁸ Wa ngaˈay kita malecad ci Yisan pasifanaˈ to  tamdaw mafanaˈ ci Yihofaan, padama cangranan mihapinang to sidaˈitay a Kawas ci Yihofa. Mihaen ko demak ita, wa ngaˈay mitihdak to mangah, patalahkal to fangcalay ngangan no Kawas, pahapinang to tamdaw to makoracay koniya ngangan. Soˈlin cowa ko malefotay kita, wa ngaˈay misaˈicel mitodong to makapahay capeling ni Yihofa. (Ifiso 5:1, 2) Tano sasowalen ato waywayan kita padama to tamdaw mihapinang to masamaanay a Kawas ci Yihofa, mihaen o patalahkalay to fangcalay ngangan Ningra. Mararaway ko pinengneng no ˈalomanay tamdaw ci Yihofaan, kawra wa ngaˈay kita mikorac to kadit no fangcalay ngangan no Kawas, hanaca ngaˈay misawacay, o cowa kalefot a tamdaw wa ngaˈay madimadi to Kawas. *—Yopu 27:5.

19. Itini Isaya 63:7 mahapinangay ita, pasifanaˈ to pacekiwan i, o sakakaay patosokan o maanan hani?

¹⁹ Wa ngaˈayho kita samaan ko demak a patalahkal to fangcalay ngangan no Kawas hani? Ano pasifanaˈ kita to pacekiwan i, marariday misaˈicel to iraay ko saˈakawangay sapikowan a fadangalan ni Yihofa, pasowal to pacekiwan iraay ko fadangalan ni Yihofa mikowan to coyoh ato tamdaw. Matatodongay koniya sowal. Pasifanaˈ to pacekiwan midofdof to sarikec ni Yihofa o kalimlaan, kawra sakakaay patosokan ita papadama to pacekiwan maolah ato madimadi ci Yihofaan. Mihaenay, saadihayen ita milengo ko mitemeray to falocoˈ a makapahay capeling ni Yihofa, pahapinang to pacekiwan tada sidaˈitay ko Kawas ci Yihofa. (ˈOsien ko Isaya 63:7.) Mihaen, wa maolahto ko pacekiwan ci Yihofaan, samanen makalimay saka madimadiaw a midofdof to sakowan ningra.

20. Dotoc a lalakaw wa milengo to maanan a salicay hani?

²⁰ Sasamaan kita ngaˈ pakayni capeling ato pipasifanaˈ no niyah a miˈading to ngangan ni Yihofa, padama to tamdaw miingid ci Yihofaan hani? Dotoc a lalakaw wa milengo toniya salicay.