1, 2. ¿Kuna pä toqet parlañas Jehová Diosan Testigonakapar wal gustistu?

 JEHOVÁ DIOSAJJ taqe kun gobernañatak derechoniwa, sutipas jachʼañchatäñaparakiwa, mä arunjja santot uñjatäñapawa, ukanakaw jiwasatakejj wali importantejja. Jehová Diosan Testigonakaparojja, uka pä toqet parlañajj wal gustistu. Ukampis uka toqenakat parlktan ukhajja paypachatpuni parlañaw wakisi.

² Diosan sutip qʼomachaña wakisitapsa, Diosajj taqe kun gobernañatak derechonïtap uñachtʼayañ wakisitapsa taqeniw yateqawaytanjja. Ukhamasti uka pä toqet yatjjataskakiñajj wali importantewa.

3. ¿Jehová Diosan sutipat parlkasajj kuna toqetsa parlaskaraktanjja?

³ Diosan sutipat parlkasajja, Jupajj kunjam Diosasa uka toqetwa parlasktanjja, ukatjja Diosajj kunjamsa gobierni ukamppachatwa parlaskaraktanjja. Ukhamasti, Diosan sutip qʼomachañaw jukʼamp wakiskiri sasinjja, Diosan gobiernopajj taqet sipansa jukʼamp sumätap uñachtʼayañaw wakisi saskaraktanwa. Diosan sutipampi, kunjamtï Jupajj taqe kun gobiernki ukampejja janiw yaqha yaqhäkiti (“ Kunanak qhanañchañas wakisi” sat recuadro uñjjattʼäta).

4. 1) Salmo 135:13 qellqatajj ¿Diosan sutipat kamsisa? 2) ¿Kuna jisktʼanakarus aka yatichäwin qhanañchaskañäni?

⁴ Diosan Jehová sutipjamajj janiw yaqhajj utjkiti (Salmo 135:13 liytʼañataki). ¿Kunatsa uka sutejj wali importantejja? ¿Kunjamsa Diosan sutipajj qʼañuchat uñjasïna? ¿Kunsa Diosajj sutip qʼomachañatak luri? ¿Kunjamsa jiwasajj Diosan sutip qʼomachatäñapatak yanaptʼsna? Aka yatichäwinwa uka jisktʼanakar qhanañchaskañäni.

5. Diosan sutipajj santot uñjatäñapawa sasin parlir istʼasajja, ¿kunsa maynejj jisktʼasispa?

⁵ Kunanakat orasiñas jukʼamp wakiskiri uka toqet parlkasajja,  Jesusajj akham sänwa: “Sutimajj jachʼañchatäpan” sasa (Mat. 6:9). ¿Uka arunakajj kamsañsa muni? Jachʼañchatäpan sasinjja, santot uñjatäpan, qʼomachatäpan, mä arunjja jan kuna qʼañunïpan sañwa munaski. Ukampis inas maynejj akham jisktʼaschispa: “Niyakejjay Diosan sutipajj santo, qʼoma, jan qʼañuni ukhamächejja, ¿kunatsa santot uñjatäñapajj wakisi?” sasa. Uka jisktʼar qhanañchañatakejja, mä sutejj kamsañsa muni ukwa amuytʼañasa.

6. ¿Kunatsa mä sutejj wali importantejja?

⁶ Mä sutejja janiw kunjamatï qellqaski kunjamatï arsuski ukakïkiti. Uka toqet Biblian akham siwa: “Walja qollqenïñata sipansa, jukʼamp askiwa suma jaqeta uñtʼatäñajja [jan ukajj mä suma sutinïñajja]” sasa (Prov. 22:1; Ecl. 7:1). ¿Kunatsa mä sutejj wali importantejja? Maynin sutipajja, jupajj kunjam jaqet uñtʼatasa ukwa uñachtʼayaraki, ukatwa sutejj wali importantejja. Sutisajj kunjam qellqañasa, kunjam arsuñasa ukajj janiw importantëkiti, jan ukasti sutis istʼasasa uñjasas kunsa jaqenakajj jiwasat amuyapjje ukaw jukʼamp importantejja.

7. ¿Kunjamsa jaqenakajj Diosan sutip qʼañuchapjje?

⁷ Jehová Diosat kʼarinak parlapki ukhajja, jan wali Diosatwa jupar uñjayapjje, mä arunjja sutipwa qʼañuchapjje. Edén jardinanwa Diosan sutipajj nayrïr kutin qʼañuchat uñjasïna, jan wali Diosäkaspas ukham uñjatarakïnwa. Kunatï Edén jardinan paskäna ukat kunsa yateqsna uk yatjjatañäni.

8. 1) ¿Kunsa Adanampi Evampejj Diosat yatipjjäna? 2) ¿Kuna jisktʼanakas utjaspa?

⁸ Adanampi Evampejja Diosan Jehová sutip yatipjjänwa. Jupanakajja, Diosajj taqe kun luratapsa, jupanakar vida churatapsa, mä suma paraíso churatapsa, mä perfecto esposo, mä perfecta esposa churatapsa yatipjjarakïnwa (Gén. 1:26-28; 2:18). Ukampis ¿kunanaktï Jehová Diosajj jupanakatak lurkäna ukanakat lupʼisipkakïnti? ¿Diosar jukʼamp munasiñatakisa, yuspärañatakisa chʼamachasisipkakïnti? Janiw ukham lurapkänti, Diosan enemigopajj jupanakar yantʼkäna ukhaw ukajj qhan uñjasïna.

9. 1) Génesis 2:16, 17; 3:1-5 textonakarjamajja, ¿Diosajj Adanampir Evampir kamsänsa? 2) ¿Kunjamsa Supayajj Diosan arunakap mayjtʼayäna?

 ⁹ (Génesis 2:16, 17; 3:1-5 liytʼañataki). Supayajj mä asiru taypiw akham sasin Evar jisktʼäna: “¿Ukhamajj Diosajj sapjjtamti: ‘Janiw kawkïri qoqan achunakapsa manqʼapjjätati’ sasa?”. Ukham jisktʼasajja, Supayajj jan amuykañakwa Diosar kʼarintäna. Diosajj janiw ukham siskänti, mä sapa alin frutapatakwa jan manqʼapjjañapäkänti. Adanampi Evampejja, manqʼañatakejj kunayman frutanakanïpjjänwa (Gén. 2:9). Cheqas Jehová Diosajj taqe kasta frutanakwa manqʼasipjjañapatak churäna. Adanampi Evampejj mä alitakwa jan manqʼapjjañapäkänti. Ukhamasti, Supayajj ukham jisktʼasin kunatï cheqäkäna ukwa mayjtʼayaskäna, Diosajj janis wajjtʼasirïkaspa ukhamwa amuyayäna. Inas Evajj ‘¿cheqapuniti Diosajj kunatï sumäki ukanakat jarkʼaspachïtu?’ sasin jisktʼaschïna.

10. 1) ¿Kunjamsa Supayajj Diosar cheqak kʼarintäna? 2) ¿Kunarus ukajj Evar puriyäna?

¹⁰ Supayajj Evar ukham jisktʼäna ukhajja, Evajj Jehová Diosar istʼaskakïnwa. Ukatwa kuntï Diosajj siskäna ukanak Supayar qhan säna. Ukatsti ‘uka fruta alirojj janiw llamktʼapjjañajäkiti (arktʼapjjañäjti), ni manqʼapjjañajäkisa, jan istʼapkirista ukhajj jiwapjjeristwa’ sasaw sarakïna. Ukatsti Supayajj cheqakwa akham säna: “Janiw ukajj cheqäkiti, kʼariwa. Janiw jiwapkätati” sasa (Gén. 3:2-4). Ukham sasajja, Supayajj Diosaruw kʼarintaskäna, mä arunjja Diosajj kʼarinaksa jupanakar siskaspa ukhamwa Evar säna. Ukhamatwa Supayajj kʼarisitap laykojj Diablor tukjjäna. Evajja Supayar creyisajj engañjataw uñjasïna (1 Tim. 2:14). Jehová Diosar confiyañat sipansa, Evajj Supayaruw jukʼamp confiyäna. Ukatwa Diosar jan istʼjjänti, jan manqʼañapäkäna uka frutsa manqʼantäna. Ukatjja Adanaruw churarakïna (Gén. 3:6).

11. ¿Adanampi Evampejj kunsa lurapjjañapäna, ukampis kuns lurapjjäna?

¹¹ Evajj Supayar kamsañapänsa uk amuytʼañäni. Akham sañapänwa: “Janiw jumarojj uñtʼksmati, Jehová Dios Awkijarukiw uñtʼta, Juparojj munastwa, confiyaraktwa. Jupaw nayarus esposojarus taqe kun churapjjetu. ¿Kamisarak Diosat jan walinak parljjätasti? ¡Saram akat Supaya!” sasa. Ukham saspäna ukhajja, Diosar taqe chuyma munasitapa confiyatapwa uñachtʼayaspäna, Jehová Diosas walpun kusisispäna (Prov. 27:11). Ukampis janiw Evasa ni Adanasa Awkipar taqe chuyma munasipkänti. Ukatwa Diosan sutipat jan saytʼasipkänti.

12. ¿Kunjamsa Supayajj Evar pächasiyäna, kunsa Adanampi Evampejj jan lurapkäna?

¹² Kunjamtï uñjaniwayktanjja, ‘Diosajj suma Awkïpachati janicha’ sasaw Evajj pächasjjäna, Supayajj ukham pächasiyasaw Jehová Diosan sutip qʼañuchäna. Adanampi Evampejj  janiw Diosan sutipat saytʼasipkänti. Antisas Supayar creyisaw Awkip contra saytʼasipjjäna. Jichhürunakanjja Supayajj ukhamarakiw kʼarinak parlasajj Diosan sutip qʼañuchaski, ukatwa Supayar istʼirinakajj Jehová Diosamp gobernatäñ jan munapkiti.

13. Kuna toqetsa Bibliajj parli uk amuytʼañatakejja, ¿kunjamsa Ezequiel 36:23 textojj yanaptʼistu?

¹³ Kʼarintapkäna ukhajja ¿ukhamakti Jehová Diosajj jaytäna? Janiwa. Supayajj kuntï Edén jardinan siskäna ukajj kʼarïtap uñachtʼayañatakejj kunsa Jehová Diosajj luräna ukajj Bibliankiwa (Gén. 3:15). ¿Kuna toqetsa Bibliajj parli? Kunjamsa Jehová Diosajj Yoqapan amparapankki uka Reinop toqejj sutip qʼomachani, aka oraqerus suman jakasiñampi, cheqapar uñjatäñampi apanini uka toqetwa Bibliajj parli. Kunjamsa Jehová Diosajj sutip qʼomachani uk sum amuyañatakejj Bibliaw yanaptʼarakistu (Ezequiel 36:23 liytʼañataki).

14. ¿Kunjamsa Jehová Diosajj sutip qʼomachi?

¹⁴ Jehová Diosajj kuntï amtki uk jan phoqañapatakejja, Supayajj taqe kunwa luri, ukampis inamayakiw ukanak luri. Bibliajja, Jehová Diosajj kunjam Diosasa ukwa qhanañchi, ukatsti jupjam suma Diosajj jan utjatapwa qhanañcharaki. Cheqas Dios contra saytʼir Supayasa, jupjam luririnakasa, walpun Jehová Diosarojj chuym ustʼayapjjäna (Sal. 78:40). Ukampis Jupajj yatiñampi, pacienciampi, ukhamarak cheqapar taqe kun uñjasaw sutip qʼomachi. Taqe chʼamani Diosätapsa kunaymanitwa uñachtʼayaraki. Yamas luratanakapanwa wali munasirïtapajj qhan amuyasi (1 Juan 4:8). Jehová Diosajj sutip qʼomachaskakiwa.

15. ¿Kunjamsa Supayajj Diosan sutip qʼañuchaskaki, jaqenakajj Supayar creyisajj kunsa lurapjje?

¹⁵ Jichhürunakanjja, Supayajj Diosan sutip qʼañuchaskakiwa. Jehová Diosajj janis chʼamanïkaspa, janis cheqapar uñjirïkaspa, janis yatiñanïkaspa, janis munasirïkaspa ukhamwa jaqenakar engañji. Sañäni, Diosajj janis  utjkaspa ukhamwa jaqenakar amuyayañ muni. Diosar creyipki ukanakarojja, Diosan leyinakapajj janis walïkaspa, janis phoqañjamäkaspa ukhamwa amuyayaraki. Yamas jan sinttʼasiri Diosäkaspasa, jaqenakarojj infiernonsa nakhaykaspa ukhamwa yatichi. Uka kʼarinak creyiri jaqenakajja, janiw Diosampi apnaqatäñ munapkiti. Supayajj utjaskakini ukhajja, Diosat kʼarinak parlaskakiniwa, jiwasarus Diosat jitheqtayañwa munarakistani. ¿Supayajj Diosat jitheqtayistaniti?

16. Adanampit Evampit sipansa, ¿kunsa jiwasajj lursna?

¹⁶ Jehová Diosajja, sutip qʼomachañatakejj pantjasir jaqenakampiw yanaptʼayasi. Ukhamasti sapa mayniw kuntï Adanampi Evampejj jan lurapkäna uk lursna. Diosat jan walinak parliri, sutipat kʼarinak parliri jaqenak taypinsa jakaskstanjja, kunatï cheqäki ukjjat saytʼassnawa, mä arunjja Jehová Diosajj santötapa, taqe kun cheqapar uñjirïtapa, suma Diosätapa, wali munasirïtapwa jaqenakar yatiysna (Is. 29:23). Jupamp gobernatäñ munataswa uñachtʼayaraksna. Gobiernopakiw taqet sipansa cheqapar apnaqe, uka gobiernokiw suman jakasiña, kusisit jakasiña aka oraqer apanini sasaw jaqenakar yatiyaraksna (Sal. 37:9, 37; 146:5, 6, 10).

17. ¿Kunjamsa Jesusajj Diosan sutip jaqenakar uñtʼayäna?

¹⁷ Jehová Diosan sutipat saytʼasktan ukhajja, Jesucristotwa yateqasisktanjja (Juan 17:26). ¿Kunjamsa Jesusajj Diosan sutip jaqenakar uñtʼayäna? Sutipwa yatiyirïna, ukatsti kunjam Diosasa ukwa jaqenakar yaticharakirïna. Fariseonakajj Jehová Diosajj jan amuytʼirïkaspasa, chʼama lurañanak mayirïkaspasa, jan munasirïkaspasa, jan khuyaptʼayasirïkaspasa ukhamwa jaqenakar amuyayapjjäna. Ukampis Jesusajja, Jehová Diosajj amuytʼirïtapa, paciencianïtapa, wali munasirïtapa, khuyaptʼayasirïtapwa jaqenakar uñachtʼayäna. Jehová Diosajj kunja suma Diosasa ukjja, Jesusajj Awkipat yateqasis sarnaqasaw uñachtʼayäna, ukhamatwa Diosar uñtʼapjjañapatak jaqenakar yanaptʼäna (Juan 14:9).

18. Diosan enemigonakapajj kuntï parlapki ukajj jan cheqätap uñachtʼayañatakejja, ¿kunsa lursna?

¹⁸ Jiwasajj Jesusjamarakiw kuntï Jehová Diosat yatktan ukanak jaqenakar yatiysna,  ukatsti Diosajj kunja munasirisa, kunja suma chuymanisa ukwa yatiyaraksna. Ukham lurasaw kunanaktï enemigonakapajj Diosat parlapki ukanakajj kʼarïtap uñachtʼayañäni. Jaqenakar Diosan sutip santot uñjapjjañapatak yanaptʼasaw sutip qʼomachtanjja. Pantjasirïkstansa, Jehová Diosat yateqassnawa (Efes. 5:1, 2). Arunakasampi luratanakasampi Diosajj kunjamasa uk jaqenakar uñachtʼaytan ukhajja, Diosan sutipajj santot uñjatäñapatakiw yanaptʼasktanjja. Kunatï Diosat cheqäki uk yatichasaw sutip qʼomacharaktanjja. * Pantjasir jaqëkstansa, sum sarnaqasaw Diosan sutip jachʼañchtanjja (Job 27:5).

19. Isaías 63:7 textorjamajja, ¿Bibliat maynir yatichktan ukhajj kunas jukʼamp importantejja?

¹⁹ Maysa toqetjja, Diosan sutip qʼomachañatakejj ¿kunsa luraraksna? Jehová Diosakiw gobernañatak derechoni sasin Bibliat yatichktan ukhaw sutip qʼomacharaktanjja. Diosan leyinakap yatichañajj wakisirïkchisa, Jupar munasipjjañapataki, taqe chuyma servipjjañapatak yanaptʼañaw jukʼamp importantejja. Ukatwa yatichkasajj Jehová Diosajj kunja suma Diosasa, kunjam chuymanisa ukanak jukʼamp qhanañchañasa (Isaías 63:7 liytʼañataki). Ukham lurañäni ukhajja, jaqenakajj Jehová Diosar munasipjjaniwa, taqe chuyma munasipjjatapatwa Jupar istʼapjjarakini.

20. ¿Kuna toqetsa akjjar jutki uka yatichäwin yatjjataskañäni?

²⁰ Niyakejjay Diosan sutip jachʼañchañajj wali importantëchejja, ¿kunjamsa sarnaqatasampisa yatichatasampis jaqenakarojj Diosar jakʼachasipjjañapatak yanaptʼsna? ¿Kunjamsa sutip jachʼañcharaksna? Akjjar jutki uka yatichäwinwa uka toqet yatjjataskañäni.