1, 2. Һансы мөвзулар Јеһованын Шаһидләри үчүн һәмишә актуал олуб?

ЈЕҺОВАНЫН һакимијјәтинин бәраәт газанмасы вә адынын мүгәддәс тутулмасы мәсәләси бизим үчүн чох мүһүмдүр. Јеһованын Шаһидләри үчүн бу мөвзулар һәмишә актуал олуб. Гејд едәк ки, һакимијјәт вә адла бағлы мәсәлә фәргли мәсәләләр дејил.

² Һәр биримиз Аллаһын адынын бөһтандан тәмизләнмәли олдуғуну билирик. Бир шеји дә билирик: һәр кәс дәрк етмәлидир ки, Јеһованын һакимијјәти, јәни идарәетмә тәрзи алидир. Һәр ики мәсәлә олдугҹа өнәмлидир.

3. Јеһованын ады нәләри еһтива едир?

³ Јеһованын ады Онун һагда һәр шеји, о ҹүмләдән Онун идарәетмә тәрзини еһтива едир. Әҝәр Јеһованын адынын бүтүн бөһтанлардан тәмизләнмәсинин ән мүһүм мәсәлә олдуғуну гәбул едириксә, демәли, Онун һакимијјәтинин ән јахшы һакимијјәт олдуғуну да гәбул едирик. Јеһованын ады Онун Каинатын Һөкмдары кими идарәетмә тәрзи илә сых бағлыдыр. (« Мүһүм мәсәләјә аид мәгамлар» адлы чәрчивәјә бахын.)

4. Зәбур 135:13 ајәсиндә Аллаһын ады илә бағлы нә дејилир вә бу мәгаләдә һансы суаллара ҹаваб тапаҹағыг?

⁴ Јеһованын ады чох өзәлдир. (Зәбур 135:13 ајәсини охујун.) Нәјә ҝөрә бу ад белә ваҹибдир? Бу ада илк дәфә нә вахт бөһтан атылыб? Аллаһ Өз адыны неҹә мүгәддәс едир? Онун адыны неҹә мүдафиә едә биләрик? Ҝәлин бу суаллара ҹаваб тапаг.

5. Аллаһын адынын мүгәддәс тутулмасы илә бағлы һансы суал јарана биләр?

⁵ «Гој адын мүгәддәс тутулсун» (Мәт. 6:9). Иса бу  диләјин әсас диләкләрдән бири олдуғуну вурғуламышды. О, нәји нәзәрдә тутурду? Нәјисә мүгәддәс етмәк ону тәмиз, пак етмәк мәнасыны дашыјыр. Ола билсин, кимсә дүшүнә биләр: «Јеһованын ады онсуз да тәмиз вә пак дејил?» Бу суала ҹаваб тапмаг үчүн ҝәлин адын нә мәна дашыдығы һагда дүшүнәк.

6. Ады дәјәрли едән нәдир?

⁶ «Ад» дејиләндә садәҹә вәрәгә јазылан вә ја тәләффүз олунан һәрфләр топлусу нәзәрдә тутулмур. Мүгәддәс Китабда јазылыб: «Тәмиз ад бөјүк сәрвәтдән үстүндүр» (Мәс. 22:1; Ваиз 7:1). Нәјә ҝөрә ад бу гәдәр дәјәрлидир? Чүнки ад һәм дә репутасијаны, јәни бу ады дашыјан шәхслә бағлы ҹәмијјәтдә мөвҹуд олан рәји билдирир. Одур ки, ән өнәмлиси адын вәрәгдә неҹә ҝөрүнмәси вә ја неҹә сәсләнмәси јох, бу ады ешидәндә вә ја ҝөрәндә инсанларда јаранан тәәссүратдыр.

7. Инсанлар Аллаһын адына неҹә бөһтан атыр?

⁷ Инсанлар Јеһова һагда јаланлар данышанда Онун адыны бәднам едирләр, адына гара јахырлар. Јеһованын адына бөһтан илк дәфә бәшәр тарихинин әввәлиндә атылыб. Ҝәлин бу һагда әтрафлы данышаг.

8. Адәмлә Һәвва нәји билирди вә биздә һансы суаллар јарана биләр?

⁸ Адәмлә Һәвва Јеһованын адыны вә Онунла бағлы ваҹиб һәгигәтләри билирди. Мәсәлән, онлар Јеһованы һәр шеји јарадан, онлара һәјат, Ҹәннәт бағы вә камил һәјат јолдашы бәхш едән Аллаһ кими таныјырды (Јар. 1:26—28; 2:18). Бәс мүкәммәл зеһнә саһиб олан Адәмлә Һәвва Јеһованын бәхш етдији немәтләр һагда даима дүшүндү? «Јеһова» адыны дашыјан Варлыға мәһәббәт вә миннәтдарлыгларыны артырмаға давам етди? Аллаһын дүшмәни онлары сынајанда бу суалларын ҹавабы ајдын олду.

9. Јарадылыш 2:16, 17 вә 3:1—5 ајәләринә әсасән, Јеһова Адәмлә Һәвваја нә демишди, бәс Шејтан һәгигәти неҹә тәһриф етди?

⁹ Јарадылыш 2:16, 17 вә 3:1—5 ајәләрини охујун. Шејтан илан васитәсилә Һәввадан сорушду: «Доғруданмы, Аллаһ  сизә дејиб ки, бағдакы һәр ағаҹын мејвәсиндән јемәјәсиниз?» Бу суалда ҝөзәҝөрүнмәз зәһәрә бәнзәр бир јалан ҝизләнирди. Әслиндә, Аллаһ онлара демишди ки, һәр бир ағаҹын мејвәсиндән јејә биләрләр, ҹәми бириндән башга. Адәмлә Һәвванын ихтијарында нөвбәнөв ағаҹлар вар иди (Јар. 2:9). Јеһованын сәхавәтинә сөз ола билмәз. О, тәкҹә бир ағаҹын мејвәсиндән јемәји гадаған етмишди. Шејтанын суалы исә һәгигәти тәһриф едирди. О, елә тәәссүрат ојатды ки, ҝуја Аллаһ сәхавәтли дејил. Һәввада белә суал јарана биләрди: «Ҝөрәсән, Аллаһ биздән нәсә јахшы бир шеј ҝизләдир?»

10. Шејтан ачыг-ајдын Јеһованын адына неҹә бөһтан атды вә бу, нә илә нәтиҹәләнди?

¹⁰ Һәвва һәмин вахт һәлә дә Јеһоваја Һөкмдары кими јанашырды; о, Шејтана ҹавабында Јеһованын вердији ајдын ҝөстәриши тәкрарлады. Һәтта деди ки, о ағаҹа һеч тохунмамалыдырлар. Һәвва итаәтсизлијин өлүмлә нәтиҹәләнәҹәјини дә билирди. Амма Шејтан ҹавабында деди: «Јох, әсла өлмәзсиниз» (Јар. 3:2—4). Бајаг Јеһованы долајысы илә иттиһам едән Шејтан инди ачыг-ајдын Онун адына бөһтан атды, бир нөв Јеһованы јаланчы адландырды. Беләҹә, Шејтан «бөһтанчы» мәнасыны верән Иблис олду. Һәвва тамамилә алданды, о, Шејтана инанды (1 Тим. 2:14). Јеһовадан чох она етибар етди. Беләҹә, Һәвва верә биләҹәји ән јанлыш гәрары верди — Јеһованын итаәтиндән чыхараг гадаған едилмиш мејвәни једи. Сонра Адәмә дә верди (Јар. 3:6).

11. Адәмлә Һәвва нә етмәли иди?

¹¹ Ҝәлин бир анлыг дүшүнәк, Һәвва әслиндә неҹә ҹаваб вермәли иди? Тәсәввүр един ки, о, белә дејир: «Сәни һеч танымырам, амма Атамы, Јеһованы јахшы таныјырам, Ону севирәм вә Она етибар едирәм. Нәјимиз варса, һамысыны О вериб. Нә ҹүрәтлә Онун һагда белә пис данышырсан? Чых ҝет бурдан!» Ҝөрүн әзиз гызынын дилиндән бу ҹүр сөзләри ешитмәк Јеһоваја нә гәдәр хош оларды! (Мәс. 27:11). Амма нә Һәвванын, нә дә Адәмин Јеһоваја мәһәббәти јох иди. Буна ҝөрә дә һеч бири Ону мүдафиә етмәди.

12. Шејтан Һәвванын ағлына һансы шүбһә тохумларыны сәпди? Адәмлә Һәвва нәји етмәди?

¹² Ҝөрдүјүмүз кими, Шејтан әввәлҹә Һәвванын ағлына шүбһә тохумлары сәпди. Беләҹә, Һәвва Јеһованын јахшы Ата олдуғуна шүбһә етмәјә башлады. Сонра Адәм дә, Һәвва да Шејтанын мәнфур јаланлары гаршысында Јеһованын адыны мүдафиә етмәди. Онлар Шејтанын иттиһамларына гулаг асыб Аталарына гаршы гијам галдырды. Шејтан бу ҝүн дә ејни фәндләрдән истифадә едир. О, Јеһоваја бөһтан атыб адына гара јахыр. Шејтанын јаланларына алдананлар асанлыгла Јеһованын адил рәһбәрлијини рәдд едир.

13. Һизгијал 36:23 ајәсиндә Мүгәддәс Китабын баш мөвзусу неҹә вурғуланыр?

¹³ Бәс Јеһова бу бөһтанлар гаршысында сусур? Јох, әлбәттә ки! Мүгәддәс Китаб боју Јеһованын Әдән бағында Она атылан бөһтанларын јалан олдуғуну неҹә сүбут етдији ачыгланыр (Јар. 3:15). Мүгәддәс Китабын баш мөвзусуну јығҹам шәкилдә белә ифадә едә биләрик: Јеһова Оғлунун идарә етдији Падшаһлыг васитәсилә Өз адыны мүгәддәс едир вә јер үзүндә сүлһ вә салеһлији бәрпа едир. Кәламда јазыланлардан Јеһованын Өз адынын мүгәддәслијини һал-һазырда неҹә сүбут етдијини ҝөрүрүк. (Һизгијал 36:23 ајәсини охујун.)

14. Јеһованын Әдән бағында галдырылан үсјана вердији ҹаваб Онун адынын мүгәддәслијини неҹә сүбут етди?

¹⁴ Шејтан Јеһованын нијјәтинин һәјата кечмәсинин гаршысыны алмаг үчүн һәр шејә әл атыб! Амма ҹәһдләри һәр дәфә боша чыхыб. Мүгәддәс Китабдан Јеһованын неҹә даврандығыны ҝөрүрүк вә бу сүбут едир ки, Онун мисли-бәрабәри јохдур. Шүбһәсиз, Шејтанын вә онун тәрәфинә кечәнләрин үсјаны Јеһоваја бөјүк үрәк ағрысы вериб (Зәб. 78:40). Амма бу мәсәләнин һәллиндә Онун мөһтәшәм һикмәтини, сәбрини, әдаләтини вә мисилсиз ҝүҹүнү ҝөрмәк олар. Ән әсасы исә етдији һәр бир ишин өзәјиндә мәһәббәт дурур (1 Јәһ. 4:8). Бәли, Јеһова адынын мүгәддәслијини ҝөстәрмәк уғрунда даим мүбаризә апарыб.

15. Бу ҝүн Шејтан Аллаһын адына неҹә бөһтан атыр вә бу нәјә ҝәтириб чыхарыб?

¹⁵ Шејтан бу ҝүн дә Аллаһын адына бөһтан атыр. О, инсанларда Аллаһын ҝүҹүнә, әдаләтинә, һикмәтинә вә мәһәббәтинә шүбһә ојадыр. Мисал үчүн, Шејтан инсанлары инандырмаға чалышыр ки, дүнјаны Аллаһ јаратмајыб. Аллаһын варлығыны гәбул едәнләрә исә тәлгин едир ки, һәм Аллаһ, һәм дә Онун ганунлары сәрт вә әдаләтсиздир. Һәтта Аллаһын гәддар вә рәһмсиз олдуғуну, инсанлары ҹәһәннәм одунда јандырдығыны өјрәдир. Бу бөһтанлара инананлар  асанлыгла нөвбәти аддымы атыр — Јеһованын адил рәһбәрлијини рәдд едир. Шејтан тамамилә мәһв едиләнә гәдәр онун бөһтанларынын арды-арасы кәсилмәјәҹәк, о сизи дә јолдан чыхармаға чалышаҹаг. Бәс мәгсәдинә чатаҹаг?

16. Адәмлә Һәввадан фәргли олараг, сиз нә едә биләрсиниз?

¹⁶ Јеһованын изни илә гејри-камил инсанлар да Онун адынын мүгәддәс тутулмасында иштирак едир. Сизин Адәмлә Һәввадан фәргли давранмаг имканыныз вар. Аллаһын адына бөһтан атан, күфр едән инсанларын арасында јашасаныз да, һәгигәтин кешијиндә дуруб Јеһованын мүгәддәс, адил, кәрамәтли, мәһәббәтли Аллаһ олдуғуну бәјан едә биләрсиниз (Әшј. 29:23). Онун һакимијјәтини дәстәкләјә биләрсиниз. Бәјан едә биләрсиниз ки, јалныз Јеһованын идарәетмә тәрзи һәгигәтән адилдир, бәшәријјәтә сүлһ вә хошбәхтлик бәхш едәҹәк (Зәб. 37:9, 37; 146:5, 6, 10).

17. Иса Мәсиһ Атасынын адыны инсанлара неҹә ачды?

¹⁷ Јеһованын адыны мүдафиә едәндә биз Иса Мәсиһин нүмунәсини изләмиш олуруг (Јәһ. 17:26). Иса Мәсиһ инсанлара Јеһованын адыны ачырды, амма буну јалныз Аллаһын адыны чәкмәклә јох, һәмчинин Онун неҹә Аллаһ олдуғуну бәјан етмәклә едирди. Мисал үчүн, Јеһованы гәддар, тәләбкар, рәһмсиз Аллаһ кими таныдан фәрисиләрин тәлимләрини тәкзиб едирди. Инсанлара баша салырды ки, Аллаһ анлајышлы, сәбирли, мәһәббәтли вә бағышлајандыр. Атасынын хүсусијјәтләрини һәр саһәдә мүкәммәл шәкилдә әкс етдирмәси сајәсиндә дә инсанлар Аллаһы таныја билирди (Јәһ. 14:9).

18. Аллаһ һагда өјрәдилән тәлимләрин јалан вә бөһтан олдуғуну неҹә ҝөстәрә биләрик?

¹⁸ Мәсиһ кими, биз дә инсанлара Јеһова һагда билдикләримизи данышараг Онун нә гәдәр мәһәббәтли вә меһрибан Аллаһ олдуғуну өјрәдә биләрик. Бунунла инсанлар Аллаһ һагда өјрәдилән тәлимләрин јалан вә бөһтан олдуғуну баша дүшүр вә Аллаһын ады тәмизә чыхыр. Беләҹә, биз Аллаһын адыны мүгәддәс тутуруг. Бундан әлавә, Јеһоваја бәнзәмәјә чалышмалыјыг. Гејри-камил олсаг да, бу мүмкүндүр (Ефес. 5:1, 2). Данышыг вә  рәфтарымызла инсанлара Јеһованын әслиндә неҹә Аллаһ олдуғуну ҝөстәрәндә Онун адынын мүгәддәс тутулмасында пајымыз олур. Инсанларын Аллаһ һаггында јанлыш тәсәввүрләрдән гуртулмасына көмәк едәндә Онун адына бәраәт газандырмыш олуруг *. Һәмчинин ҝөстәририк ки, гејри-камил инсан Аллаһа садиг гала биләр (Әјј. 27:5).

19. Әшија 63:7 ајәсинә әсасән, тәлим верән заман әсас мәгсәдимиз нә олмалыдыр?

¹⁹ Биз бир шеј дә едә биләрик. Чох вахт биз инсанлара Мүгәддәс Китабдакы һәгигәтләри өјрәдәндә Аллаһын һакимијјәти, Онун Каинаты идарә етмәјә һүгугу чатдығы барәдә данышырыг вә бу, тамамилә дүздүр. Аллаһын гајда-ганунларыны өјрәтсәк дә, әсас мәгсәдимиз инсанлара Аллаһымыз Јеһоваја севҝи ашыламаг вә Она садиг галмаға көмәк етмәкдир. Бунун үчүн Јеһованын ҝөзәл хүсусијјәтләрини, бу адын Саһибинин неҹә ҝөзәл Варлыг олдуғуну вурғуламалыјыг. (Әшија 63:7 ајәсини охујун.) Бу ҹүр тәлим версәк, инсанлар Јеһованы севәҹәк вә Она садиг галмаг истәдикләри үчүн итаәт едәҹәкләр.

20. Нөвбәти мәгаләнин мөвзусу нә олаҹаг?

²⁰ Бәс ҝөрәсән, биз неҹә едә биләрик ки, давранышымыз вә вердијимиз тәлим инсанларда Јеһова һагда јахшы тәәссүрат ојатсын вә Она јахынлашмаларына көмәк етсин? Нөвбәти мәгаләдә бу суала ҹаваб тапаҹағыг.