1-2. Parsoalan aha do na massai rikkot di Sitindangi Ni Jahowa?

ADONG parsoalan na porlu tapikkirhon saonari, i ma taringot hak ni Jahowa lao mamaretta jala pabadiahon goarna. Ala Sitindangi Ni Jahowa hita, lomo do rohatta mangulas taringot on.

² Sude hita nungnga mamboto ikkon dipabadia do goar ni Debata. Jala nungnga taboto, ikkon tapatudu na dumenggan do cara ni Jahowa mamaretta. Alani i, massai rikkot do na dua i jala marhaitan do i.

3. Aha do na marhaitan tu goar ni Jahowa?

³ Sasittongna goar ni Jahowa marhaitan do tu sude taringot Ibana, tarmasuk ma i carana mamaretta. Jadi molo tahilala massai rikkot do pabadiahon goar ni Debata, berarti lomo do tong rohatta patuduhon holan Jahowa na tama mamaretta. Alana marhaitan do goar ni Jahowa tu carana mamaretta.​—Ida kotak “ Parsoalan na Rikkot.”

4. Aha do na didok di Psalmen 135:13 taringot Debata, jala sukkun-sukkun aha do na lao taulas di parsiajaran on?

⁴ Istimewa do goar ni Jahowa. (Jaha Psalmen 135:13.) Boasa massai rikkot goar ni Jahowa? Songon dia goar ni Jahowa dileai? Songon dia Jahowa pabadiahon goarna? Jala songon dia hita boi dohot pabadiahon goar ni Jahowa? Taulas ma akka sukkun-sukkun on.

5. Aha do na disukkun piga-piga halak taringot goar ni Jahowa?

⁵ Di tangiang ni Jesus, parjolo do didok ibana, “Sai dipabadia ma goarmu.” (Mat. 6:9) On patuduhon, na urrikkot asa tatangiakkon i ma pabadiahon goar ni Debata. Alai aha do lapatan ni hata ni Jesus on? Hata pabadiahon lapatanna mambahen badia manang ias. Adong do piga-piga halak na sukkun-sukkun rohana, ‘Nungnga badia be goar ni Jahowa i, jadi boasa pola ikkon dipabadia muse?’ Asa tadapot alusna, ikkon taboto do sadia rikkot goar i.

6. Boasa goar i massai rikkot?

⁶ Goar dang holan sada hata na boi disurat manang didokkon. Bibel mandok, “Argaan do [goar] na denggan sian hamoraon godang.” (Poda 22:1; Pjm. 7:1, Bibel siganup ari) Boasa goar i massai rikkot? Alana molo tabege sada goar, pasti gabe tapikkirhon do taringot halak nampuna goar i. Jadi na urrikkot dang songon dia goar i disuratton manang didokkon, alai aha do na dipikkirhon halak molo manjaha manang mambege goar i.

7. Songon dia akka halak mangaleai goar ni Jahowa?

⁷ Godang do halak na mangaleai goar ni Jahowa. Dipaboa nasida do gabus taringot Jahowa asa halak na asing gabe marpikkir na so denggan taringot Ibana. Di porlak Eden do parjolo sahali goar ni Jahowa dileai. Taida ma aha na boi taparsiajari sian peristiwa on.

8. Aha do na diboto si Adam dohot si Hawa, jala sukkun-sukkun aha do na boi tarimangi taringot nasida?

⁸ Diboto si Adam dohot si Hawa do molo goar ni Debata, i ma Jahowa. Jala godang do muse na diboto nasida taringot Ibana. Misalna, diboto nasida Jahowa do na manoppa nasida. Dilehon Jahowa do hangoluan dohot inganan na massai uli, jala dipasu-pasu Jahowa do parsaripeon ni nasida. (1 Mus. 1:26-28; 2:18) Alai toktong do dirimangi nasida sude naung dilehon Jahowa i? Marsitutu do nasida asa lam tamba holong dohot pangargaion ni nasida tu Jahowa? Boi do taboto alusna sian aha na diulahon nasida tikki diela-ela musu ni Debata.

9. Hombar tu 1 Musa 2:16, 17 dohot 3:1-5, aha do na diparettahon Jahowa tu si Adam dohot si Hawa, jala songon dia Sibolis mambahen ganggu roha ni nasida?

 ⁹ Jaha 1 Musa 2:16, 17 dohot 3:1-5. Marhite ulok, disukkun Sibolis do si Hawa: “Tongon do didok Debata, na so jadi panganonmuna sian saluhut hau angka na di porlak on?” Sian sukkun-sukkun i, tarida do na margabus Sibolis taringot Debata. Lomo do rohana asa si Hawa gabe marpikkir na so denggan taringot Debata. Sasittongna, marragam do parbue ni hau na boi diallang si Adam dohot si Hawa. Jala holan sada do parbue ni hau na diparettahon Jahowa asa unang diallang nasida. (1 Mus. 2:9) Takkas ma Debata na burju do Jahowa i. Alai dibahen Sibolis ma sukkun-sukkun asa dirippu si Hawa dang tutu Jahowa i Debata na burju. Gabe sukkun-sukkun do ra roha ni si Hawa, ‘Ai adong do hape akka na denggan na so dilehon Jahowa tu au?’

10. Songon dia Sibolis mangaleai Debata, jala aha do akibatna?

¹⁰ Di mulana, dioloi si Hawa dope Jahowa. Diulangi ibana do muse paretta ni Debata tu nasida. Didok ibana gari manjama hauna pe dang boi. Alai didok Sibolis muse, “Ndang na tutu hamu mate.” (1 Mus. 3:2-4) Di tikki i, langsung do Sibolis mangaleai goar ni Jahowa. Didok ibana, pargabus do Jahowa i. I do alana gabe digoari ma ibana Sibolis, manang pangissaki. Olo muse do si Hawa dioto-otoi Sibolis. (1 Tim. 2:14) Gabe tu Sibolis i do ibana porsea, dang tu Jahowa. Gabe dibahen si Hawa ma keputusan na sala. Dang unduk be ibana tu Jahowa. Diallang ibana ma parbue ni hau na diorai i. Dung i, dilehon ibana ma i tu si Adam.​—1 Mus. 3:6.

11. Aha do na sasittongna ikkon diulahon si Adam dohot si Hawa, alai aha do na gabe diulahon nasida?

¹¹ Rimangi ma aha do na sasittongna ikkon didok si Hawa hian tu Sibolis. Bayakkon ma molo songon on hian alus ni si Hawa, “Ise haroa ho? Dang hutanda ho. Alai hutanda do Bapakku Jahowa. Holong jala pos do rohakku tu Ibana. Nungnga dilehon Ibana tu hami on sude. Boasa songon i dohononmu? Lao ho!” Tottu massai las do roha ni Jahowa molo songon i alus ni si Hawa! (Poda 27:11) Alai dang setia si Hawa tu Jahowa, songon i nang si Adam. Ala dang setia tu Jahowa, dang boi nasida pabadiahon goar ni Amana.

12. Songon dia do Sibolis marsitutu mambahen ganggu roha ni si Hawa, jala aha do akibatna?

¹² Songon naung taulas, marsitutu do Sibolis mambahen ganggu roha ni si Hawa. Dibahen ibana do asa dipikkir si Hawa, dang tutu Jahowa i Debata na burju. Akibatna, gabe dang boi si Adam dohot si Hawa pabadiahon goar ni Debata. Sibolis do na ditangihon nasida, jala mangalo do nasida tu Jahowa. Cara on ma na dipakke Sibolis sahat tu saonari. Dileai ibana do goar ni Jahowa. Ala porsea akka halak tu gabus ni Sibolis, gabe dialo nasida ma aturan na dibahen Jahowa.

13. Hombar tu Hesekiel 36:23, aha do pokok utama isi ni Bibel?

¹³ Na dipasombu Jahowa do goarna dileai? Daong. Sude isi ni Bibel paboahon songon dia Jahowa pabadiahon goarna sian gabus na didokkon Sibolis di porlak Eden. (1 Mus. 3:15) Gariada, on do pokok utama ni isi ni Bibel: Marhite Harajaon ni Debata na dipimpin Jesus, dipabadia Jahowa do goarna, jala bahenonna ma hatigoran dohot hadameon tu tano on. Sian sude isi ni Bibel i, gabe taattusi ma songon dia Jahowa pabadiahon goarna.​—Jaha Hesekiel 36:23.

14. Songon dia Jahowa pabadiahon goarna dung masa parsoalan di porlak Eden?

¹⁴ Marsitutu do Sibolis mangulahon manang aha pe asa dang boi Jahowa pasautton lomo ni rohana. Alai dang marhasil Ibana. Di Bibel, dipaboa do akka naung diulahon Jahowa, na patuduhon tutu do Ibana Ama na parholong jala Parhuaso na dumenggan. Tutu, massai haccit do roha ni Jahowa tikki Sibolis dohot na asing dang mangoloi Ibana. (Ps. 78:40) Nang pe songon i, sai dipatudu Jahowa do bisuk, hasabaron, dohot hatigoranna. Jotjot do dipatudu Ibana huasona. Jala na urrikkot, dipatudu Ibana do holongna di sude ulaonna. (1 Joh. 4:8) Jadi, toktong do dipabadia Jahowa goarna.

15. Songon dia Sibolis mangaleai goar ni Debata saonari, jala aha do pengaruhna?

¹⁵ Sai dileai Sibolis do goar ni Debata sahat tu saonari. Dioto-otoi ibana do godang halak asa porsea molo Debata i dang tutu marhuaso, tigor, marbisuk, jala parholong. Misalna, dibahen ibana do asa porsea halak dang Jahowa na manoppa hita. Jala molo adong pe halak na porsea adong Debata, dibahen ibana do asa dirippu nasida kaku do Debata i. Jala diajarhon ibana do tu akka halak molo Jahowa i kejam, lomo rohana manutung jolma di api naroko. Tikki adong halak na porsea tu gabus ni Sibolis i, gabe dang olo nasida manjalo uhum ni Jahowa na tigor. Sai toktong do Sibolis mangaleai goar ni Debata sahat tu na diripashon annon ibana. Jala hamu pe sai digugai ibana do asa mandao sian Jahowa. Marhasil do ibana?

16. Aha do na so diulahon si Adam dohot si Hawa alai boi diulahon hamu?

¹⁶ Dilehon Jahowa do kesempatan tu akka jolma na so sempurna asa pabadiahon goarna. Jadi, boi do hita mangulahon aha na so diulahon si Adam dohot si Hawa. Nang pe godang halak mangaleai jala paroa-roahon goar ni Jahowa, adong do kesempatan di hita lao paboahon tu nasida molo sasittongna Jahowa i badia, tigor, burju, jala parholong. (Jes. 29:23) Tapatudu ma na lomo do rohatta mamillit Jahowa asa gabe Pamimpin di hita. Taurupi ma akka halak asa mangattusi holan Jahowa do na tigor mamaretta, jala boi do Ibana parohon hadameon dohot las ni roha tu sude toppaanna.​—Ps. 37:9, 37; 146:5, 6, 10.

17. Songon dia Jesus pabadiahon goar ni Jahowa?

¹⁷ Molo tapabadia goar ni Jahowa, na maniru Jesus do hita disi. (Joh. 17:26) Dipatandahon Jesus do goar ni Amana tu akka halak. Ibana dang holan manjou goar ni Jahowa. Alai, dipaboa ibana Debata na songon dia do Jahowa i. Misalna, dipatudu ibana do na so setuju ibana tu halak Parise, na mangajarhon molo Jahowa i kejam, kaku, dang olo marale-ale tu jolma, jala dang marasi ni roha. Alai diajarhon Jesus do molo Jahowa i dang kaku, sabar, parholong, jala rade manalpuhon hasalaan. Jala, diurupi Jesus do akka halak asa mananda Jahowa marhite parniulaonna. Ditiru ibana do parange ni Amana di parngoluonna siganup ari.​—Joh. 14:9.

18. Songon dia hita patuduhon na so tutu sude gabus taringot Jahowa?

¹⁸ Songon Jesus, boi do tapaboa tu akka halak taringot Jahowa. Taajarhon ma molo Jahowa i burju jala parholong. Molo taulahon i, hita mangurupi akka halak asa dang be porsea tu sude gabus taringot Jahowa. Gabe tapabadia ma goarna, jala gabe denggan ma goarna i di pikkiran dohot di roha ni akka halak. Boi do tatiru parange ni Jahowa. Boi do taulahon i nang pe dang sempurna hita. (Eps. 5:1, 2) Molo tahatahon jala taulahon aha na dihalomohon Jahowa, boi do i pabadiahon goarna. Tapaboa ma hasittongan taringot Jahowa tu akka halak. Jala tabuktihon ma, boi do jolma na so sempurna toktong setia tu Debata.​—Job 27:5.

19. Songon na didok di Jesaya 63:7, aha do na urrikkot na ikkon taajarhon tu akka halak?

 ¹⁹ Adong muse na boi taulahon lao pabadiahon goar ni Jahowa. Molo taajarhon hasittongan taringot Bibel tu akka halak, hita patuduhon holan Jahowa do na tama mamaretta. Alai, na urrikkot dang holan paboahon taringot uhum ni Debata. Ikkon taurupi do akka halak asa makkaholongi Jahowa jala marsihohot tu Ibana. Ikkon takkas do tapaboa taringot parange na denggan sian Jahowa, jala Debata na songon dia do Ibana. (Jaha Jesaya 63:7.) Molo i do na taajarhon tu akka halak, gabe taurupi ma nasida asa makkaholongi Jahowa jala unduk tu Ibana.

20. Aha do na lao taulas di parsiajaran na mangihut?

²⁰ Akka parniulaonta dohot aha na taajarhon boi mambahen halak marpikkir molo Jahowa i Debata na burju. Gabe olo ma nasida marale-ale tu Jahowa. Taulas ma taringot on di parsiajaran na mangihut.