ICIPANDE CA KUSAMBILILAMO 23
“Ishina Lyenu Libe Ilya Mushilo”
“Mwe Yehova, ishina lyenu lya muyayaya.”—AMALU. 135:13.
ULWIMBO 10 Lumbeni Yehova, Lesa Wesu!
IFYO TWALASAMBILILA *
1-2. Milandu nshi iyacindama sana ku Nte sha kwa Yehova?
KWALIBA imilandu iyacindama sana iyatukuma muno nshiku, e kutila insambu Yehova akwata isha kuteka ku muulu na pano isonde, e lyo no kulenga ishina lyakwe ukucindikwa. Fwe Nte sha kwa Yehova twalitemwa ukulanda pali iyi milandu iyacindama sana. Bushe paliba ubupusano pa nsambu Lesa akwata isha kuteka ku muulu na pano isonde e lyo na pe shina lyakwe ukucindikwa? Awe.
2 Ifwe bonse twali-imwena ukuti ishina lya kwa Lesa lifwile ukulengwa ukuba ilya mushilo. Na kabili twalisambilila ukuti, tufwile ukulenga abantu baishiba ukutila Yehova e walinga ukuteka ku muulu na pano isonde, kabili imitekele yakwe e yawamisha. Kanshi iyi milandu yonse ibili yalicindama.
3. Finshi fyabimbwamo mwi shina lya kwa Yehova?
3 Na kuba mwi shina lya kwa Yehova mwabimbwa fyonse pali Lesa, ukubikako fye ne mitekele yakwe. Kanshi nga twalanda ukuti ukufumya umuseebanya pe shina lya kwa Lesa e kwacindama sana, ninshi tulelanda no kuti calicindama sana ukulenga abantu baishiba ukuti imitekele ya kwa Yehova e yawamisha. Ishina lya kwa Yehova lyalikuma sana imitekele yakwe apo ni Kateka wa maka yonse kabili uwapulamo.—Moneni akabokoshi akaleti “ Ifyaba mu Mulandu Uukalamba.”
4. Finshi Amalumbo 135:13 yalanda pe shina lya kwa Lesa, kabili mepusho nshi twala-asuka muli cino cipande?
4 Ishina Yehova lyali-ibela icine cine. (Belengeni Amalumbo 135:13.) Cinshi calenga ishina lya kwa Lesa libe ilyaibela? Cali shani pa kuti ishina lya kwa Lesa lisebanishiwe pa muku wa kubalilapo? Bushe Lesa alenga shani ishina lyakwe ukuba ilya mushilo? Kabili finshi twingacita pa kuti tulenge ishina lya kwa Lesa ukuba ilya mushilo? Natwasuke aya mepusho.
ICILENGA ISHINA UKUCINDAMA
5. Finshi nalimo bamo bengepusha nga baumfwa ukuti ishina lya kwa Lesa lilingile ukulengwa ukuba ilya mushilo?
5 “Ishina lyenu libe ilya mushilo.” (Mat. 6:9) Yesu alandile ukuti ukupepela ishina lya kwa Lesa ukuba ilya mushilo kwaba pa fintu ifyacindama sana ifyo tulingile ukulapepela. Ni mwi aya mashiwi Yesu alandile yalola? Ukulenga icintu caba ica mushilo kwalola mu kucilenga ukuba ica busaka nelyo icasanguluka. Na lyo line bamo kuti baipusha ukuti, ‘Bushe ishina lya kwa Yehova talyaba kale ilya mushilo, ilya busaka, kabili ilyasanguluka?’ Pa kwasuka ici cipusho, tulingile ukutontonkanya pa fyabimbwa mwi shina.
6. Cinshi cilenga ishina ukuba ilyacindama?
6 Ishina lyalicila pa filembo tubomfya pa kulilemba nelyo ifyo lishimbulwa. Baibolo itila: “Cawama ukusala ishina ilisuma ukucila ifyuma ifingi.” (Amapi. 22:1; Luk. Mil. 7:1) Cinshi ishina lyacindamina sana? Ni co lisanshamo ifyo abantu batontonkanya pa mwine we shina nelyo ifyo bamwishiba. Kanshi ifyo ishina lilembwa nelyo ifyo lishimbulwa tafyacindama sana. Lelo icacindama sana fintu abantu batontonkanya nga baumfwa ilyo ishina.
7. Bushe abantu baseebanya shani ishina lya kwa Lesa?
7 Abantu nga balelanda ifya bufi pali Yehova, kuti balenga abantu bambi balatontonkanya ifyabipa pali ena. Kabili ici kuti calenga balapeela Lesa imilandu no kuseebanya ishina lyakwe. Umuku wa kubalilapo ishina lya kwa Lesa lyaseebanishiwe, ni mwi bala lya Edeni. Lekeni tulande pa fyo tusambililako kuli ifi ifyacitike.
IFYO ISHINA LYA KWA LESA LYASEEBANISHIWE PA MUKU WA KUBALILAPO
8. Finshi Adamu na Efa baishibe, kabili mepusho nshi twingepusha?
8 Adamu na Efa balishibe ukuti ishina lya kwa Lesa ni Yehova, kabili balishibe ifishinka ifyacindama pali ena. Balishibe ukuti Yehova e Kabumba, e wabapeele ubumi, e wabapeele icifulo icisuma ico baleikalamo, kabili e wabofishe. (Ukute. 1:26-28; 2:18) Nomba bushe bali no kutwalilila ukutontonkanya pa fisuma fyonse ifyo Yehova abacitile? Bushe bali no kutwalilila ukutasha Yehova no kumutemenwako? Amasuko kuli aya mepusho yalishibikwe ilyo umulwani wa kwa Lesa abeseshe.
9. Nga fintu Baibolo ilanda pa Ukutendeka 2:16, 17 na 3:1-5, finshi Yehova aebele Adamu na Efa, kabili Satana alengele shani batendeka ukutontonkanya ukuti Lesa taba bwino?
9 Belengeni Ukutendeka 2:16, 17 na 3:1-5. Satana aipwishe Efa ukuti: “Bushe ca cine Lesa amwebele ukuti mwilalyako ku muti onse uwa mwi bala?” Pa kumwipusha abomfeshe insoka no kulenga camoneka kwati e yalelanda. Mu cipusho aipwishe mwali ubufi, kabili calengele Efa atendeka ukumona kwati Lesa taba bwino. Na kuba Lesa abebele ukutila kuti balya ku muti onse uwa mwi bala, ukufumyako fye umuti umo. Kanshi Adamu na Efa balikwete imiti iingi iyo bali no kulalyako. (Ukute. 2:9) Ukwabula no kutwishika Yehova ni kapekape. Na lyo line, kwali fye umuti umo uo Lesa akenye Adamu na Efa ukulyako. Kanshi icipusho Satana aipwishe calengele camoneka kwati Lesa te kapekape. Nalimo Efa aletontonkanya ukuti kwali fimo ifisuma ifyo Lesa ashalefwaya ukubapeela.
10. Bushe Satana aseebenye shani ishina lya kwa Lesa, kabili finshi fyafuminemo?
10 Ilyo Satana aipwishe ici cipusho, ninshi Efa acili uwa cishinka kuli Yehova. Pa kwasuka Satana, Efa alandile filya fine Yehova abebele. Alundilepo no kuti tabalingile ukukumyako kuli ulya muti. Alishibe no kuti bali no kufwa nga tabakonkele ifunde Lesa abapeele. Lelo Satana amwebele ukuti: “Ukufwa tamwakafwe.” (Ukute. 3:2-4) Pali iyi inshita Satana tapitile na mu mbali pa kubepa ubufi. Aliseebenye ishina lya kwa Lesa ilyo aebele Efa ukuti Yehova wa bufi. Ifi Satana acitile fyalengele aba kaseebanya nelyo uwa lwambo. Efa balimubepele ica kuti alisumine ifyo Satana alandile. (1 Tim. 2:14) Alicetekele sana Satana ukucila ifyo acetekele Yehova. Ici calengele Efa asalepo ukucita icintu icalubana nga nshi. Asalilepo ukukanaumfwila Yehova no kulya icisabo ico abaleseshe. Lyena apeeleko Adamu.—Ukute. 3:6.
11. Finshi abafyashi besu aba kubalilapo balingile ukucita, lelo finshi bacitile?
11 Baleni tontonkanyeni ifyo Efa aali no kulanda kuli Satana. Elenganyeni ukuti alandile ifyapala ifi: “Nshakwishiba, lelo nalishiba Tata, Yehova. Nalimutemwa kabili nalimucetekela. E watupeela fyonse ifyo ine no mwina mwandi twakwata. Cinshi iwe wingalalandila ifyabipa pali ena? Fuma apa!” Ala Yehova nga alitemenwe icine cine ukumfwa amashiwi ayasuma ukufuma ku mwana wakwe umwanakashi uo atemenwe! (Amapi. 27:11) Lelo Adamu na Efa tabali aba cishinka kuli Yehova kabili tabamutemenwe sana. Ici calengele bafilwe ukucingilila ishina lyakwe ku waleliseebanya.
12. Bushe Satana alengele shani Efa ukulatwishika nga ca kuti Yehova ni Shifwe umusuma, kabili finshi Adamu na Efa bafililwe ukucita?
12 Nga fintu tumwene, pa kuseebanya ishina lya kwa Lesa Satana abalilepo ukulenga Efa alatwishika nga ca kuti Yehova ni Shifwe umusuma. Adamu na Efa tabacingilile ishina lya kwa Lesa ku bufi buntu Satana abepele. Ifi bacitile fyalengele baumfwila Satana no kupondokela Lesa. Ifyo Satana acitile pa kubepa Efa e fyo acita na muno nshiku. Alalanda ubufi pa kuti aseebanye ishina lya kwa Yehova. Abantu abacetekela ubufi ubo Satana abepa balakaana imitekele ya kwa Yehova iyalungama.
YEHOVA ALALENGA ISHINA LYAKWE UKUBA ILYA MUSHILO
13. Mashiwi nshi ayaba pali Esekiele 36:23 ayalenga twaishiba icikalamba ico Baibolo yonse ilandapo?
13 Bushe Yehova alekapo fye pali filya Satana aseebanya ishina lyakwe? Awe iyo! Ilyashi lyaba mu Baibolo yonse lilanda pa fyo Yehova acitapo pa kulanga ukuti filya Satana alandile mwi bala lya Edeni fya bufi. (Ukute. 3:15) Mu mashiwi fye ayanono kuti twatila icikalamba ico Baibolo ilandapo ca kuti: Yehova akabomfya Ubufumu ubutekwa no Mwana wakwe, ku kulenga ishina lyakwe ukuba ilya mushilo na ku kulenga pano isonde pa kabe abantu abalungama kabili aba mutende. Mu Baibolo mwaliba ifyebo ifingalenga twaumfwikisha ifyo Yehova akacita pa kulenga ishina lyakwe ukuba ilya mushilo.—Belengeni Esekiele 36:23.
14. Bushe ifyo Yehova acita pali filya baseebenye ishina lyakwe mu Edeni fyalenga shani lyaba ilya mushilo?
14 Satana alesha na maka yakwe yonse pa kuti acilikile ubufwayo bwa kwa Yehova. Lelo Satana alifilililwa fye. Ifyaba mu Baibolo filanga ifyo Yehova acita, filatulanga no kuti ni Shifwe uwaba no kutemwa kabili ni kateka musuma icine cine. Ukwabula no kutwishika Satana na bonse abamutungilila muli bucipondoka bwakwe balikalifya sana Yehova. (Amalu. 78:40) Nangu ca kuti balamukalifya alilanga ukuti wa mano, alitekanya, kabili wa mulinganya. Na kabili alilanga ukuti wa maka yonse mu nshila ishalekanalekana. Ne cacindama ca kuti alalanga ukutemwa muli fyonse ifyo acita. (1 Yoh. 4:8) Yehova alitwalilila ukubombesha pa kuti alenge ishina lyakwe ukuba ilya mushilo.
Satana alibepele Efa ubufi pali Yehova, kabili pa myaka iingi alitwalilila ukuseebanya Lesa (Moneni paragrafu 9, 10 na 15) *
15. Bushe Satana aseebanya shani ishina lya kwa Lesa muno nshiku, kabili finshi fifumamo?
15 Na muno nshiku mwine Satana alaseebanya ishina lya kwa Lesa. Alalenga abantu balamona kwati Lesa takwata amaka, taba no mulinganya, te wa mano, kabili takwata ukutemwa. Ku ca kumwenako, Satana alesha na maka ukulenga abantu balamona kwati Yehova te Kabumba. E lyo abantu nga basumina ukuti Lesa e ko aba, Satana alesha ukubalenga balamona kwati Lesa taba no mulinganya no kuti amafunde yakwe yalikosa. Alasambilisha na abantu ukuti Yehova munkalwe kabili aloca abantu mu mulilo. Abantu nga basumina ubu ubufi, balakaana ukunakila imitekele ya kwa Lesa iyalungama. Ilyo Satana bashilamonaula, akatwalilila fye ukuseebanya ishina lya kwa Lesa no kwesha ukutulenga twaleka ukubombela Yehova. Bushe amapange yakwe yakabomba?
IFYO MWINGACITA PA KULENGA ISHINA LYA KWA LESA UKUBA ILYA MUSHILO
16. Finshi mwingacita ifyo Adamu na Efa bafililwe ukucita?
16 Yehova alabomfya na bantu abashapwililika pa kulenga ishina lyakwe ukuba ilya mushilo. Kanshi imwe kuti mwacita ifyo Adamu na Efa bafililwe ukucita. Nangu ca kuti twikala mu calo umwaba abantu abaseebanya no kupontela ishina lya kwa Yehova, twalikwata ishuko lya kucingilila ili ishina. Kuti mwasambilisha abantu ukuti Yehova wa mushilo, alilungama, musuma, kabili aliba no kutemwa. (Esa. 29:23) Kanshi kuti mulecita ifilanga ukuti mulafwaya Yehova alemutungulula. Kabili kuti mulesambilisha abantu ukuti imitekele ya kwa Yehova e yalungama kabili e ikaleta umutende ne nsansa ku fibumbwa fyonse.—Amalu. 37:9, 37; 146:5, 6, 10.
17. Finshi Yesu alecita pa kulenga ishina lya kwa Wishi ukwishibikwa?
17 Nga tulecingilila ishina lya kwa Yehova ninshi tulepashanya Yesu Kristu. (Yoh. 17:26) Yesu talebomfya fye ishina lya kwa Wishi pa kulenga abantu balishibe, lelo alebasambilisha ne fyo Yehova aba. Ku ca kumwenako, Yesu alilungike abaFarise abalengele abantu balamona kwati Yehova munkalwe, alatweba ukucita ifintu ifyo tushingakumamo ukucita, tatusakamana, kabili takwata uluse. Yesu alyafwile abantu ukwishiba ukuti Wishi alalangulukilako, alitekanya, aliba no kutemwa, kabili aleleela. Na kabili alilengele abantu baishiba Wishi pantu alemupashanya muli fyonse ifyo alecita cila bushiku.—Yoh. 14:9.
18. Kuti twafumya shani umuseebanya no bufi pe shina lya kwa Yehova?
18 Nga filya Yesu alecita, na ifwe kuti twasambilisha abantu ukuti Yehova aliba no kutemwa kabili wa cikuuku. Nga tulecita ifi ninshi tulefumya umuseebanya no bufi pe shina lya kwa Yehova. Nga tuleafwa abantu ukwishiba ukuti ishina lya kwa Yehova lya mushilo, ninshi tulelenga ili ishina ukuba ilya mushilo. Na ifwe kuti twapashanya Yehova nangu ca kuti tatwapwililika. (Efes. 5:1, 2) Kanshi nga tulelanda no kucita ifingalenga abantu baishiba ifyo Yehova aba ninshi tulelenga ishina lyakwe ukuba ilya mushilo. Tulalenga ishina lya kwa Yehova ukucindikwa nga ca kuti tulelenga abantu baishiba icine pali ena. * Kabili tulalanga ukuti abantunse abashapwililika kuti batwalilila ukuba aba cishinka kuli Lesa.—Yobo 27:5.
Tulafwaya ukwafwa abasambi ba Baibolo ukwishiba ukuti Yehova wa cikuuku kabili aliba no kutemwa (Moneni paragrafu 18 na 19) *
19. Bushe amashiwi yaba pali Esaya 63:7 yalenga shani twaishiba ifyo tulingile ukubikako sana amano ilyo tulesambilisha abantu?
19 Kwaliba na fimbi ifyo twingacita pa kuti tulenge ishina lya kwa Yehova ukuba ilya mushilo. Nga tulesambilisha abantu icine ca mu Baibolo, ilingi line tulakomaila pa cishinka ca kuti Lesa e walinga ukuteka, kabili tulabeba no kuti alikwata insambu sha kuteka ku muulu na pano isonde. Ifi tubasambilisha fya cine. Nangu ca kuti calicindama ukusambilisha abantu amafunde ya kwa Lesa, ico tufwaisha kulenga abantu batemwa Shifwe Yehova kabili baba aba cishinka kuli ena. Kanshi tulingile ukulalanda sana pa mibele iisuma iya kwa Yehova pa kuti abantu beshibe ifyo Lesa umwine we shina lya kuti Yehova aba. (Belengeni Esaya 63:7.) Nga tulesambilisha abantu imibele ya kwa Yehova, tukalenga bakamutemwe kabili bakalemumfwila pantu bakalafwaya ukuba aba cishinka kuli ena.
20. Cipusho nshi tukasuka mu cipande cikonkelepo?
20 Nomba kuti twalenga shani ifyo tucita ne fyo tusambilisha abantu fyalenga bapalama kuli Yehova kabili balatontonkanya ifisuma pali ena nga baumfwa ishina lyakwe? Icipande cikonkelepo cikasuka ici cipusho.
ULWIMBO 2 Ni Mwe Yehova
^ para. 5 Mulandu nshi uwacindama sana ku bantunse na kuli bamalaika? Cinshi uyu mulandu wacindamina, kabili watukuma shani? Ukwishiba amasuko kuli aya mepusho na mepusho yambi ayakuma uyu mulandu kuti kwalenga bucibusa bwesu na Yehova bwakoselako.
^ para. 18 Inshita shimo mu mpapulo shesu twalelanda atuti ishina lya kwa Yehova talilingile ukucindikwa. Cinshi twalelandila ifi? Pantu takwali uwalandile ukuti Lesa tafwile ukukwata ishina lya kuti Yehova. Nomba ilyo kwali ukukumana kwa pa mwaka ukwa mu 2017, balilondolwele bwino umo calola ukulenga ishina lya kwa Lesa ukucindikwa. Munyinefwe uwali ceyamani pali uku kukumana alandile ukuti: “Caliba fye bwino ukulanda ukuti Yehova e walinga ukuteka no kulanda ukuti ishina lya kwa Lesa licindikwe, pantu ninshi tulefwaya ukuti ishina lyakwe libe ilya mushilo.”—Moneni programu ya JW Broadcasting iya mu January 2018. Kabiyeni pa jw.org®, e lyo mutinike apo balemba ati IMPAPULO > JW BROADCASTING®.
^ para. 62 UBULONDOLOSHI BWA CIKOPE: Kaseebanya aliseebenye ishina lya kwa Lesa ilyo aebele Efa ukuti Lesa wa bufi. Pa myaka iingi Satana alisabankanya ifisambilisho fya bufi, pamo nge cisambilisho ca kuti Lesa munkalwe ne ca kuti te wapangile abantunse.
^ para. 64 UBULONDOLOSHI BWA CIKOPE: Ilyo munyinefwe alesambilisha umuntu Baibolo alekomaila sana pa mibele ya kwa Lesa.
