STADI 23
“Plis Yu Mekem We Nem Blong Yu i Tabu”
“Jehova, nem blong yu bambae i stap olwe.”—OL SAM 135:13, NW.
SINGSING 10 !Yumi Presem Jehova!
BIGFALA TINGTING *
1-2. ?Wanem tufala samting we ol Witnes blong Jehova oli laekem blong tokbaot?
TUFALA samting we i impoten tumas long yumi tede, hemia hae rul blong Jehova mo tabu nem blong hem. Yumi ol Witnes blong Jehova, yumi laekem tumas blong tokbaot tufala samting ya.
2 Yumi evriwan i wantem luk se Jehova i tekemaot doti we ol man oli sakem long nem blong hem. Yumi save tu se Jehova i mas pruvum se rul blong hem i beswan. Tufala poen ya i impoten tumas long yumi. ?Be tufala i defdefren? Nogat.
3. ?Wanem i joen wetem nem blong Jehova?
3 Blong talem stret, evri samting long saed blong Jehova i joen wetem nem blong hem, hemia i minim hae rul blong hem tu. Taswe, blong Jehova i tekemaot doti we ol narafala oli sakem long nem blong hem, hem i mas pruvum se rul blong hem i beswan. Nem blong Jehova i joen wetem fasin blong hem blong rul.—Yu luk bokis ya “ Mekem Nem Blong God i Tabu—Ol Impoten Samting We Oli Joen Wetem.”
4. ?Ol Sam 135:13 i talem wanem long saed blong nem blong God, mo wanem ol kwestin we bambae yumi tokbaot?
4 Nem ya Jehova i spesel. (Ridim Ol Sam 135:13, NW.) * ?From wanem nem ya i impoten tumas? ?Olsem wanem samfala oli sakem doti long nem ya? ?Olsem wanem God i stap mekem nem blong hem i tabu? ?Mo olsem wanem yumi save leftemap nem ya? Bambae yumi tokbaot ol kwestin ya.
NEM I IMPOTEN
5. ?Maet samfala oli talem wanem long saed blong nem blong God?
5 “Plis yu mekem we nem blong yu i tabu.” (Mat. 6:9) Jisas i soemaot se i impoten blong mekem nem blong God i tabu, from we hemia fas samting we hem i tokbaot long prea blong hem. ?Be ol tok ya i minim wanem? Mekem wan samting i tabu i minim karemaot doti long hem. Maet samfala oli talem se: ‘Be nem blong Jehova i tabu finis.’ Bifo we yumi tokbaot samting ya, yumi mas tingbaot from wanem nem i impoten.
6. ?Wanem i mekem se nem i impoten?
6 Wan nem i no minim wan wod nomo we yu talem o raetem long pepa. Makem samting we Baebol i talem, i se: “I moa gud blong gat gudnem i winim we yu kam rijman.” (Prov. 22:1, NW; Pri. 7:1) Long olfala hanraet blong Baebol, “gudnem” i sem mak long “nem.” ?From wanem nem i impoten olsem? From we nem i joen wetem fasin blong man, mo tingting we ol narafala oli gat long hem. Taswe i no fasin blong talem mo raetem wan nem we i impoten. Be samting we ol narafala oli tingbaot taem oli harem o ridim nem ya, hemia nao i impoten.
7. ?Olsem wanem samfala oli spolem nem blong God?
7 Taem ol man oli giaman long saed blong Jehova, oli wantem mekem ol narafala oli tingting nogud long hem. Hemia i spolem nem blong Jehova. Fastaem we samfala oli spolem nem blong God, hemia long garen blong Iden. Bambae yumi tokbaot samting ya, mo lesen we yumi lanem.
FASTAEM WE SAMFALA OLI SAKEM DOTI LONG NEM YA
8. ?Adam mo Iv i save wanem, mo wanem ol kwestin we yumi save askem?
8 Adam mo Iv i save nem blong God, mo tufala i save plante impoten samting long saed blong Jehova. Tufala i save se hem i wokem evri samting, hem i givim laef long tufala, wan naes Paradaes blong stap long hem, mo wan gudfala mared. (Jen. 1:26-28; 2:18) ?Olsem wanem? ?Bambae tufala i gohed blong tingting dip mo stap glad long ol samting ya we Jehova i givim? ?Bambae tufala i gohed blong lavem God ya we nem blong hem Jehova? Ansa blong ol kwestin ya i kamaot klia taem enemi blong God i traem tufala.
9. Folem Jenesis 2:16, 17 mo 3:1-5, ?Jehova i talem wanem long Adam mo Iv? ?Olsem wanem Setan i twistim trutok?
9 Ridim Jenesis 2:16, 17 mo 3:1-5. Setan i yusum wan snek blong toktok long Iv. Hem i askem long Iv se: “?Olsem wanem long frut blong ol tri long ples ya? ?I tru we God i blokem olgeta se i tabu, yutufala i no save kakae, no i no tru olsem?” Long kwestin ya, Setan i giaman, mo i pulum Iv blong i stat blong tingting nogud long God. Stret samting we God i talem, se tufala i save kakae frut blong olgeta tri long garen, wan nomo i tabu. I gat plante defdefren kaen tri we tufala i save kakae frut blong olgeta. (Jen. 2:9) Yes, Jehova i glad blong givim plante kakae long tufala. Hem i makemaot wan tri nomo we tufala i no mas kakae frut blong hem. Taswe, Setan i twistim trutok. Hem i givim tingting se God i no glad blong givim ol kakae long tufala. Maet Iv i ting se: ‘?Olsem wanem? ?God i no wantem givim ol gudfala samting ya long mi?’
10. ?Olsem wanem Setan i sakem doti long nem blong God, mo wanem i kamaot from?
10 Taem Setan i askem kwestin ya, Iv i stap obei yet long Jehova. Iv i talem klia ol tok we God i bin talem long tufala. Mo hem i ademap se tufala i no mas tajem tri ya. Hem i save gud woning we God i givim se sipos tufala i no obei, bambae tufala i ded. Be Setan i talem se: “Yutufala i no save ded.” (Jen. 3:2-4) Bifo Setan i givim tingting nomo se Jehova i giaman, be naoia hem i talem stret. Hem i sakem doti long nem blong Jehova, from we hem i talem se Jehova i wan man blong giaman. Long taem ya, Setan i kam devel, o man blong spolem nem blong narafala. Hem i trikim gud Iv, mo Iv i bilivim giaman tok blong hem. (1 Tim. 2:14) Iv i trastem Setan moa i bitim we hem i trastem Jehova. Taswe i isi nomo blong hem i mekem wan desisen we i nogud tumas, hemia se bambae i no moa obei long Jehova. Hem i kakae frut we Jehova i putum tabu long hem, mo biaen hem i givim sam long Adam tu.—Jen. 3:6.
11. ?Adam mo Iv i sud mekem wanem?
11 Iv i sud talem long Setan se: “Mi mi no save yu, be mi save Papa blong mi Jehova, mi trastem hem, mo mi lavem hem. Hem i givim evri samting long mi mo Adam. Mi no wantem harem ol tok blong yu. !Yu gowe!” !Jehova bambae i glad tumas sipos hem i harem gel blong hem i talem ol tok olsem, we i soemaot se hem i lavem Jehova! (Prov. 27:11) Be Iv i no lavem Jehova, mo Adam tu i no lavem Jehova. From samting ya, tufala i no leftemap nem blong Papa blong tufala, taem Setan i sakem doti long nem ya.
12. ?Olsem wanem Setan i mekem se Iv i gat tu tingting? ?Adam mo Iv i no mekem wanem?
12 Olsem yumi tokbaot finis, fastaem Setan i mekem se Iv i gat tu tingting. Hem i pulum Iv blong i tingting nogud long God blong hem we nem blong hem Jehova. Biaen, Adam mo Iv i lesin long Setan. Tufala i no leftemap nem blong Jehova, be tufala i agensem Papa blong tufala. Tede tu, Setan i yusum giaman trik ya. Hem i sakem doti long nem blong Jehova blong agensem hem. Taem ol man oli bilivim ol giaman tok blong Setan, i isi blong oli agensem rul blong Jehova.
JEHOVA I MEKEM NEM BLONG HEM I TABU
13. ?Folem Esikel 36:23, ?wanem bigfala tingting blong Baebol?
13 ?Olsem wanem? ?Jehova i no mekem wan samting taem oli giaman blong spolem nem blong hem? !Si! Ful Baebol i tokbaot samting we Jehova i mekem, blong tekemaot doti we oli sakem long nem blong hem long garen blong Iden. (Jen. 3:15) Blong talem stret, bigfala tingting blong Baebol i olsem: Jehova bambae i yusum Kingdom we Pikinini blong hem i rul long hem, blong i mekem nem blong hem i tabu, mo blong putumbak pis mo stret fasin long wol. Baebol i givhan long yumi blong yumi kasem save olsem wanem Jehova bambae i mekem nem blong hem i tabu.—Ridim Esikel 36:23.
14. Afta we oli agensem Jehova long garen blong Iden, ?olsem wanem samting we hem i mekem i leftemap nem blong hem?
14 Bakegen mo bakegen, Setan i traehad blong blokem samting we Jehova i wantem. Be hem i no win. Baebol i tokbaot ol samting we Jehova i mekem, mo i soemaot se i no gat wan narafala we i olsem hem. I tru se Jehova i harem nogud tumas taem Setan i agensem hem mo plante narafala oli joen wetem Setan. (Sam 78:40) Be Jehova i mekem samting we i soemaot waes, longfala tingting, mo stret fasin. Mo tu, hem i soemaot paoa blong hem long plante rod. Antap moa, hem i soemaot lav long evri samting we hem i mekem. (1 Jon 4:8) Oltaem Jehova i stap wok blong mekem nem blong hem i tabu, hem i neva stop.
Setan i giaman long Iv long saed blong Jehova, mo hem i gohed nomo blong talem ol giaman toktok blong spolem nem blong God (Haf 9-10, 15) *
15. ?Olsem wanem Setan i stap sakem doti long nem blong God tede? ?Wanem i kamaot from?
15 Setan i stap gohed yet blong sakem doti long nem blong God. Hem i trikim ol man blong oli ting se God i no gat paoa, stret fasin, waes, mo lav. Hem i traem pulum ol man blong oli bilif se Jehova i no wokem evri samting. Mo sipos man i bilif long God, Setan i traehad blong mekem hem i ting se God i mekem i no stret, i blokem hem, mo i had tumas blong folem ol loa blong hem. Mo tu, hem i tijim ol man se Jehova i no gat sore, from we i bonem man long helfaea. Taem ol man oli bilif long ol giaman tok ya, i isi blong oli sakemaot rul blong Jehova. Setan bambae i gohed blong giaman long saed blong Jehova go kasem we Jehova i finisim hem. Bambae hem i traem winim yu tu. ?Bambae yu letem hem i winim yu?
YU TU YU GAT WOK BLONG MEKEM
16. ?Yu save mekem wanem samting we Adam mo Iv i no mekem?
16 Jehova i letem ol sinman oli givhan long hem blong i mekem nem blong hem i tabu. Taswe, yu yu save mekem samting we Adam mo iv i no mekem. Nating se ol man raonabaot long yu oli tok nogud long nem blong Jehova mo sakem doti long hem, be yu yu gat janis blong leftemap nem ya, mo talemaot long ol man se Jehova i tabu, i stret, i gud, mo i lavem yumi. (Aes. 29:23, NW) Yu save soemaot se yu wantem we hem i rul long yu. Yu save givhan long ol man blong oli kasem save se rul blong Jehova nomo i stret, mo bambae hem i mekem se i gat pis mo glad long wol.—Sam 37:9, 37; 146:5, 6, 10.
17. ?Olsem wanem Jisas i mekem ol man oli save nem blong Papa blong hem?
17 Taem yumi leftemap nem blong Jehova, yumi folem eksampol blong Jisas Kraes. (Jon 17:26) Jisas i mekem ol man oli save nem blong Papa blong hem, taem hem i yusum nem ya Jehova, mo tu, taem hem i tijim olgeta long ol gudfala fasin blong Jehova. Ol Farisi oli mekem olsem se Jehova i strong tumas, i askem tumas samting long yumi, i stap longwe long yumi, mo i no gat sore. Be Jisas i givhan long ol man blong oli luksave se Papa blong hem i no strong tumas, hem i gat longfala tingting, i lavem ol man, mo i rere blong fogivim man. Mo tu, Jisas i folemgud fasin blong Papa blong hem, mo long rod ya hem i halpem ol man blong oli save Jehova.—Jon 14:9.
18. ?Olsem wanem yumi save agensem ol giaman toktok we i spolem nem blong Jehova?
18 Olsem Jisas, yumi save tokbaot Jehova long ol man, mo tijim olgeta se hem i kaen mo i lavem yumi. Taem yumi mekem olsem, yumi agensem ol giaman toktok we i sakem doti long nem blong Jehova. Yumi mekem nem blong hem i tabu long tingting mo hat blong ol man. Mo tu, yumi save folem fasin blong Jehova, nating se yumi sinman. (Efes. 5:1, 2) Taem ol toktok mo fasin blong yumi oli halpem ol man blong oli save Jehova, yumi stap givhan blong mekem nem blong hem i tabu. Yumi leftemap nem ya, taem yumi halpem ol man blong oli sakemaot ol giaman tingting long saed blong God. Mo yumi mekem nem blong Jehova i tabu taem yumi soemaot se ol sinman oli naf blong holemstrong long hem.—Job 27:5.
Yumi wantem halpem ol Baebol stadi blong oli kasem save se Jehova i kaen tumas mo i lavem yumi (Haf 18-19) *
19. ?Olsem wanem Aesea 63:7 i soemaot bigfala samting we yumi mas makem, taem yumi tijim ol man?
19 I gat wan narafala samting tu we yumi save mekem. Taem yumi tijim ol man long trutok blong Baebol, plante taem yumi makem se Jehova i gat raet blong rul, mo yumi tijim olgeta long ol loa blong hem. I tru se hemia i impoten, be bigfala samting we yumi wantem tijim ol man, hemia blong lavem Papa blong yumi Jehova, mo holemstrong long hem. Taswe yumi mas makem ol gudfala fasin blong hem, blong oli save gud God ya we nem blong hem Jehova. (Ridim Aesea 63:7.) Sipos yumi tijim ol man olsem, bambae yumi halpem olgeta blong oli holemstrong long Jehova mo obei long hem, from we oli lavem hem.
20. ?Long nekis stadi, bambae yumi tokbaot wanem?
20 ?Olsem wanem yumi save sua se ol tijing mo fasin blong yumi, oli stap pulum ol narafala blong oli tinghae long nem blong Jehova mo kam klosap long hem? Nekis stadi bambae i ansarem kwestin ya.
SINGSING 2 Nem Blong Yu Jehova
^ par. 5 Olgeta man oli mas save se Jehova God i gat raet blong rul, mo tu, yumi wantem tumas se hem i mekem nem blong hem i tabu. ?From wanem tufala samting ya i impoten, mo olsem wanem tufala i joen long laef blong yumi? Sipos yumi kasem save long ansa blong ol kwestin ya, bambae yumi fren moa wetem Jehova.
^ par. 4 Ol Sam 135:13, NW: “Jehova, nem blong yu bambae i stap olwe. Jehova, i stat long taem bifo i kam, ol man oli save nem ya.”
^ par. 62 OL PIJA: Setan i spolem nem blong God taem hem i talem long Iv se God i wan man blong giaman. Long ol handred yia we oli pas, Setan i leftemap ol giaman tijing ya, se God i no wokem man mo hem i no gat sore.
^ par. 64 OL PIJA: Brata we i mekem Baebol stadi i makem ol gudfala fasin blong God.
