1-2. Parsoalan aha do na ponting tumang bani Saksi Jahowa?

DONG sada parsoalan na ponting tumang, na markaitan hubani goran ni Jahowa ampa pamarentahan-Ni. Janah, markaitan do homa parsoalan ai hubanta. Halani ai, sihol do ganup Saksi Jahowa mambotoh parsoalan ai.

² Ganup hita domma mambotoh maningon ipapansing do goran ni Naibata. Ibotoh hita do homa pamarentahan ni Jahowa do na sidearan. Maningon dihut do homa hita mambuktihon ai. Halani ai, maningon idingat hita ma markaitan do haduasi parsoalan ai.

3. Markaitan hubani aha do goran ni Jahowa?

³ Sasintongni, goran ni Jahowa markaitan hubani aha pe na patuduhkon pasal-Si, tarmasuk cara-Ni mamarentah. Jadi anggo ihatahon hita ponting tumang do goran-Ni ipapansing, dos do ai hita mangkatahon ponting do homa ibuktihon hita pamarentahan-Ni do na sidearan. Jadi, markaitan do haduasi ai halani Ia do Raja na Tang Sitimbulan.​—Tonggor ma kotak “ Parsoalan na Sipontingan”.

4. Aha do na ipatugah Psalmen 135:13 pasal goran ni Naibata, janah sungkun-sungkun aha ma na laho iulas hita bani artikel on?

⁴ Humbani ganup goran, goran ni Jahowa do na sipontingan. (Basa Psalmen 135:13.) Mase ponting tumang goran ni Naibata? Sonaha mungkahni goran ai irisai? Sonaha Naibata papansingkon goran-Ni? Anjaha sonaha hita boi dihut papansingkon goran-Ni ai? Ulas hita ma balos ni sungkun-sungkun ai bani artikel on.

5. Dob manangar maningon ipapansing goran ni Naibata, aha do ra na isungkun halak?

⁵ Sanggah mangajarhon pasal tonggo, Jesus mangkatahon,  “Sai napapansing ma goran-Mu.” (Mat. 6:9) On patuduhkon ponting tumang do itonggohon hita hapansingon goran ni Naibata. Aha do maksud ni Jesus? Papansingkon artini mambahen gabe borsih. Tapi ra do adong halak na manungkun, ‘Mase pala ipapansing goran ni Naibata, ai domma pansing hinan?’ Laho mambotoh balosni ai, porlu do lobei ibotoh hita aha do kaitanni goran hubani sasahalak.

6. Mase ponting tumang goran ai?

⁶ Mase ponting tumang goran ai? Sanggah isobut sasada halak sada goran, na idingat halak na manangar sedo sonaha manuratkon atap pe sonaha mandilo goran ai. Tapi, pambahenanni ampa paruhuranni do na idingat halak. Halani ai ma ase ihatahon Bibel, “Harganan do goran na madear ase habayakon na buei.”​—Pod. 22:1.

7. Sonaha halak pabutakkon goran ni Naibata?

⁷ Bahat do halak na pararatkon ladung pasal Jahowa. Ai ma cara na ibahen sidea laho pabutakkon goran ni Naibata. Halani ai, bahat ma halak na marpingkir lang dear pasal-Si. Sasintongni i pohon Eden do parlobei sahali goran ni Naibata irisai. Eta ulas hita ma aha do na masa sanggah ai.

8. Aha do na domma ibotoh si Adam pakon si Hawa, janah aha do na porlu irimangi hita?

⁸ Domma ibotoh si Adam pakon si Hawa Jahowa do goran ni Naibata. Janah bahat do homa na ibotoh sidea pasal-Si. Umpamani, ibotoh sidea do anggo Naibata ai Panompa na mambere hagoluhan bani sidea, ianan na jenges, pakon pasangan goluh na sempurna. (1 Mus. 1:26-28; 2:18) Tapi, ai totap do ipingkirhon sidea ganup pambahenan ni Jahowa ai? Ai marusaha do sidea lambin mangkaholongi anjaha mangkargai-Si? Tarbalosi do sungkun-sungkun ai sanggah munsuh ni Naibata manlajou sidea.

9. Domu bani 1 Musa 2:16, 17 pakon 3:1-5, aha do na ihatahon Jahowa hubani si Adam pakon si Hawa, janah sonaha Sibolis mangoto-otoi sidea?

⁹ Basa 1 Musa 2:16, 17 pakon 3:1-5.  Marhitei ulog isungkun Sibolis ma si Hawa, “Adong do nani ihatahon Naibata, na so bulih panganon nasiam humbani sagala buah ni hayu na i pohon on?” Marusaha do Sibolis mangoto-otoi si Hawa ase marpingkir lang tongon bujur Naibata ai. Sasintongni, pitah sada buah humbani sada hayu do na lang boi ipangan sidea. Tapi sagala buah na dong i pohon ai, boi do panganon ni sidea. Tontu marragam do buah na mantin ijai. (1 Mus. 2:9) On patuduhkon bujur tumang do Jahowa bani sidea. Jadi humbani sungkun-sungkun ni Sibolis ai, taridah ma anggo ia mangoto-otoi si Hawa. Sihol do ia mambahen si Hawa marpingkir, ‘Ai dong do nani na lang ibere Naibata hubangku?’

10. Sonaha Sibolis pabutakkon goran ni Naibata, janah sonaha ma ujungni?

¹⁰ Mungkahni, unduk ope si Hawa bani Naibata. Tangkas do ipatugah ia aha do sasintongni na ihatahon Naibata. Nini si Hawa use anggo sidea lang boi manjamah pohon ai. Ibotoh ia matei do sidea anggo titah ai ilanggar. Tapi nini Setan ma, “Seng tongon matei nasiam.” (1 Mus. 3:2-4) Hunjon taridah ma ituduh Setan do anggo Naibata ai parladung. Gabe butak ma goran ni Naibata. Ijai ma Setan gabe Sibolis, artini sipanukas-nukasi atap pemfitnah. Hona paoto-oto do si Hawa. (1 Tim. 2:14) Halani porsayanan ia bani Sibolis marimbangkon bani Jahowa, ujungni sambor ma haputusan na ibahen ia. Lang be itangihon ia Jahowa, ipangan ma buah ai. Anjaha ibere homa hubani si Adam.​—1 Mus. 3:6.

11. Aha do namin na ibahen si Adam pakon si Hawa, tapi aha na do na ibahen sidea?

¹¹ Pingkirhon ma aha do namin na ihatahon si Hawa hubani Sibolis. Bayangkon ma ihatahon ia sonon, “Lang hutanda ise ho. Tapi hutanda do Jahowa, Bapangku ai. Holong anjaha porsaya do ahu hu Bani. Ganupan do ibere Ia hubangku pakon si Adam. Pamalo-malohon ho mangkatahon sonai. Laho ma ho ne!” Ambit sonai na ihatahon ia, tontu malas tumang uhur ni Jahowa! (Pod. 27:11) Tapi lang setia anjaha lang ihaholongi si Hawa Jahowa. Sonai homa si Adam. Halani ai, sanggah ifitnah Sibolis Jahowa, lang ibela sidea Ia.

12. Sonaha Sibolis mambahen bumbang uhur ni si Hawa, janah aha do na lang ibahen si Adam pakon si Hawa?

¹² Songon na dob iulas hita, i pohon Eden do mungkahni irisai Sibolis goran ni Jahowa. Marusaha do ia mambahen si Hawa ase marpingkir lang tongon Bapa na bujur Jahowa ai. Halani lang ibela si Adam pakon si Hawa goran ni Jahowa, gabe urah ma sidea ipengaruhi ase manlawan dompak Jahowa. Sonari, sonai do homa akal-akal na ibahen Sibolis. Ipararat ia do ladung pasal Jahowa laho pabutakkon  goran-Ni. Halani bahat halak na porsaya bani ladung ai, gabe urah ma sidea ipengaruhi ase lang mangihutkon titah ni Jahowa.

13. Domu bani Hesekiel 36:23, aha ma rimpunan ni ganup isi ni Bibel?

¹³ Ai sip dassa Jahowa sanggah irisai Sibolis goran-Ni? Lang. Ganup isi ni Bibel patugahkon aha do na dob ibahen Jahowa laho mambuktihon lang tongon na ihatahon Sibolis i pohon Eden ai. (1 Mus. 3:15) Sasintongni, rimpunan ni ganup isi ni Bibel ai ma ipapansing Jahowa do goran-Ni marhitei Harajaon na iparentah Anak-Ni. Anjaha bahenon-Ni do use ase dong hadameion i tanoh on. Janah halak parpintor do marianan ijai. Anggo ibasa hita Bibel, gabe iarusi hita ma sonaha Jahowa papansingkon goran-Ni.​—Basa Hesekiel 36:23.

14. Aha ma na ibahen Jahowa dobkonsi irisai goran-Ni i pohon Eden?

¹⁴ Marmasam do cara na ibahen Sibolis laho manlanglangi saud harosuh ni Jahowa. Tapi lang dong na marhasil. Bibel patuduhkon aha na ibahen Jahowa laho mambuktihon anggo Ia Bapa na parholong janah pamarentahan-Ni do na sidearan. Tongon, pusok do uhur ni Jahowa sanggah Sibolis ampa ganup na mangihutkonsi manlawan hu Bani. (Ps. 78:40) Hassi pe sonai, totap do Ia patuduhkon hasabaron, hapentaran, ampa hapintoron. Ipatuduh Ia do homa habanggalon kuasa-Ni. Na sipontingan taridah do holong-Ni ibagas ganup pambahenan-Ni. (1 Joh. 4:8) Jadi lang ongga marnasoh Jahowa laho papansingkon goran-Ni.

15. Sonari, aha do na ibahen Sibolis laho manrisai goran ni Naibata, janah sonaha ma ujungni?

¹⁵ Ronsi sonari, totap ope irisai Sibolis goran ni Naibata. Marusaha do ia mambahen ase halak lang porsaya anggo Jahowa ai Naibata Pargogoh na So Tarimbang, adil, pentar, janah parholong. Umpamani, marusaha do ia mambahen ase porsaya halak anggo Jahowa ai sedo  Panompa. Anggo adong halak na porsaya adong do Naibata ai, marusaha ma ia mambahen ase iahap sidea borat do titah-Ni janah lang adil Ia. Ipararat ia do ajaran na mangkatahon anggo Jahowa ai kejam janah manutung pardousa i apuy naraka. Anggo porsaya halak bani ladung ai, gabe lang ra sidea mangihutkon parentah ni Jahowa. Paima iripaskon Sibolis, totap do ipabutak ia goran ni Jahowa, janah marusaha do ia mambahen ase nasiam manlawan hu Bani. Ai marhasil do ia?

16. Sonaha nasiam patuduhkon anggo nasiam lang songon si Adam pakon si Hawa?

¹⁶ Marosuh do Jahowa ase manisia na lang gokan dear dihut papansingkon goran-Ni. Jadi boi do nasiam lang songon si Adam pakon si Hawa. Hassi pe bahat halak sonari na pabutakkon goran ni Naibata, boi do ipatugah nasiam anggo Jahowa ai Naibata na pansing, pintor, bujur, janah parholong. (Jes. 29:23) Boi do homa ipatugah nasiam pamarentahan-Ni do na sidearan. Janah pitah Ia do na boi parohkon hatuahon ampa hadameion hu tanoh on. Anggo ibahen nasiam sonai, on patuduhkon sihol do nasiam ase Ia na mamarentah i tanoh on.​—Ps. 37:9, 37; 146:5, 6, 10.

17. Aha ma na ibahen Jesus laho pabotohkon goran ni Jahowa?

¹⁷ Anggo dihut hita papansingkon goran ni Jahowa, dos do ai hita maniru Jesus Kristus. (Joh. 17:26) Marusaha do Jesus pabotohkon goran ni Bapani hubani ganup halak. Tapi sedo pitah ai. Iajarhon ia do homa sonaha do sasintongni paruhuran ni Bapani ai. Umpamani, hinan ibahen halak Parisei do ase iahap halak Jahowa ai kejam, kasar, lang urah idohori, janah lang paridop ni uhur. Tapi, ipatuduh Jesus ma lepak do ajaran ni sidea ai. Marusaha do Jesus mangurupi halak ase mambotoh sabar do Jahowa ai, parholong, janah ra manalpuhon hasalahan. Itiru ia do homa ganup paruhuran ni Bapani marhitei pambahenan ampa parsahapni. Halani ai, gabe ra ma halak dohor bani Jahowa.​—Joh. 14:9.

18. Sonaha hita boi dihut papansingkon goran ni Jahowa?

 ¹⁸ Hita pe boi do homa dihut papansingkon goran ni Jahowa marhitei patugahkon hasintongan pasal Naibata. Songon Jesus, patugah ma Naibata na parholong do Jahowa ai anjaha bujur. Urupi ma halak ase mambotoh pitah Jahowa dassa Naibata na pansing. Anggo ibahen hita sonai, gabe tarbukti ma ladung do na ihatahon Sibolis pasal Jahowa. Leganni ai, tiru ma paruhuran ni Jahowa. Hassi pe hita lang sempurna, boi do ihorjahon hita ai. (Ep. 5:1, 2) Jadi, marhitei parsahap ampa pambahenanta, boi do ipatuduh hita Naibata na sonaha do Jahowa ai. On patuduhkon dihut do hita papansingkon goran-Ni. Boi do homa ibuktihon hita anggo jolma na lang sempurna boi ‘totap setia’ hubani Naibata Jahowa.​—Job 27:5, NW.

19. Domu bani Jesaya 63:7, aha do na sipontingan ibahen hita sanggah mangajari halak?

¹⁹ Dong ope na boi ibahen hita laho papansingkon goran ni Jahowa. Sanggah hita mangajarhon hasintongan ni Bibel hubani halak, gati do iajarhon hita pitah Jahowa do na talup mamarentah. Sintong do ai. Tapi na sipontingan, urupi ma halak ase mangkaholongi Jahowa, Bapanta in janah setia hu Bani. Jadi, sobali mangajarhon pasal aturan ni Naibata, ponting tumang do hita mangajarhon pasal paruhuran-Ni na taridah humbani goran-Ni. (Basa Jesaya 63:7.) Anggo ibahen hita sonai, gabe tarojur ma halak ase mangkaholongi Jahowa janah unduk Bani.

20. Aha ma na laho iulas hita bani artikel na mangihut?

²⁰ Humbani pambahenanta ampa caranta mangajari halak, on boi mangurupi sidea ase mamingkirhon na madear pasal Jahowa sanggah itangar sidea goran ai isobut. On boi mangurupi sidea ase lambin orot bani Jahowa. Tapi sonaha carani? Ulas hita ma pasal ai bani artikel na mangihut.