1, 2. Ka bián tema uágubei hínsiñe lan woun wagía gefentiña luagu Heowá lun wayanuhan?

LIRICHA Bungiu lun larúeihan luma lun inebewalá liri ligía katei súdinitimati le lunbei gabaroun wamani. Hínsiñeti houn gefentiña luagu Heowá hayanuha luagu lubuidun tema le. Layanuhaña san sügǘ le luagu bián katei le ámuñegueinarügüti luáriuagua? Uá, mítaranti.

² Sun wagía furendeihadiwa mégeiwa lan lun larumadahóuniwa liri Bungiu luma lun larufudúniwa liricha lan Heowá lun larúeihan buídutimabei. Súdini lun gabaroun wamani bián katei le.

3. Ka uma gani lan liri Heowá?

³ Le linarün katei, gániti liri Heowá luma sun katei le ladügübei, ligaburi larúeihan laganagua. Ligíati, ánhawa ariñaga súdini lan lun larumadahóun liri Bungiu, wariñaguña giñe mosu lan larufudúniwa ligaburi lan larúeihan Heowá buídutimabei. Gániti liri luma ligaburi layusuruni lubafu luagu ligía lan Íñugutimabei lidan sun ubóu (ariha huméi rekuáduru “ Ámuñegueinarügü sügǘ lun laransehóuniwa”).

4. a) Ka lariñagubei Sálumu 135:13 luagu liri Bungiu? b) Kaba álügüdahani wóunaba lidan arütíkulu le?

⁴ Wéiriti lisudinin liri Heowá (aliiha huméi Sálumu 135:13). Ka adügübei lun súdini lan? Ka furumiñeti iyeeni ariñawagúbei luagu iri le? Ka ladügübei Bungiu lun inebewalá liri? Ani ida luba wídehan lun inebewalá? Lóunabuba álügüdahani le, lidan arütíkulu le.

5. Dan le layanuhóun luagu ladügǘn liri Bungiu sándume, ka álügüdahani gayaraabei ladügüni somu gürigia?

⁵ Ariñagati Hesusu aba lan lídangiñe katei le súdinitimabei le gayaraabei wamuriahani luma Bungiu lidan wafurieidun, anihán: “Inebewalá biri” (Mat. 6:9). Ka mini lubéi dimurei burí le? Lun inebewalá o sándubei lan aban katei mini lan lun harumabei lan. Gayaraati lálügüdagun somu gürigia lungua: “Ma sánduhali liri Heowá ani haruma ligía? Kati uagu lunti lubéi lun wadügün lun sandu lan?” Lun lafuranguagüdüniwa saminaü le, lunti wasaminarun luagu ka lan mini lubéi iri le.

6. Ka uagu súdini lubéi aban lubuidun iri?

⁶ Aban iri mámarügü aban dimurei le gayaraabei labürüdǘn o liridún. Ariñagatu Bíbülia: “Buítimati lun ladimurehoun buidu luagu gürigia sügǘ lau gama lan saragu golu luma pülata” (Ari. 22:1; Apur. 7:1). Ka uagu buídutima lubéi? Ladüga, lunti giñe wasaminarun luagu le haritagubei amu hawagu ha gíribalin iri, mini lan, layanuhóun buidu luagu aban gürigia. Ligíati mama ligaburi labürüdǘn iri súdinitimabei ni liridún, le súdinitimabei le hasaminarubei gürigia dan le harihini iri bürüwañu luma dan le haganbuni.

7. Ida liña hawiyeduni gürigia liri Bungiu?

⁷ Dan le hayanuhan gürigia iyeeni luagu Heowá hayanuhaña wuriba luagu lubuidun liri, o hadügüña lun lawiyedún liri. Le furumiñeti iyeeni le adimurehóubei luagu liri Bungiu luma luagu lubuidun ligaburi, gumeseti lidan fuluri-agei Edén. Ariha waméi ka lan gayaraabei wafurendeirun lídangiñe sügǘ ligía.

8. a) Ka lasubudirubei Adán tuma Ewa? b) Ka álügüdahani lunbei ladügǘn?

⁸ Subudi lumuti meha Adán tuma Ewa liri Heowá, luma luagu amu burí katei le súdinitimabei luagu, subudi hamuti meha giñe Heowá lan Adügübalin sun katei ani ru ligía ibagari houn, adüga ligía lun hawinwandun lidan aban lubuidun fuluri-agei luma lun hawinwandun sin figóu keisi maríeitiña (Agu. 1:26-28; 2:18). Gama lumoun, hasigiruba meha san asaminara hulili luagu sun le adüga láalibei Heowá hawagu? Hasigiruba meha san abuiduragüdei ínsiñeni le hasandirubei luagu luma heteingiradi? Arihúati furangu dan le lóuchaguniña lágani Bungiu.

9. Según Agumesehani 2:16, 17 luma 3:1-5, ka lariñagubei Heowá lun Adán tuma Ewa, ani ida liña lésegeruni Satanási inarüni?

 ⁹ (Aliiha huméi Agumesehani 2:16, 17 luma 3:1-5). Lau layusurun Satanási aban hewe adügati álügüdahani tun Ewa, lariñaga tun: “Lariñahare lubeiti Bungiu hun lun meigin humá tídangiñe tin ni aban tídangiñe tídibu wewe ya fuluri-ágeirugu?” Lau sumadi aban layusurun aban álügüdahani lun leyeedunu. Le buga lariñagubei Bungiu houn, gayara lan heigin tídangiñe tin furumiñeguarügü tídibu wewe, ánhounti to lamidanguaboun fuluri-agei, ariñagati lun meigin hamá tídangiñe. Másiñati anuhoun lan meha saragu tin tídibu wewe le ñéingiñe lubéi gayara lan hanúadahan (Agu. 2:9). Arufudati le mangi lan Heowá. Gama lumoun wéridi lumuti Heowá Adán tuma Ewa lun meigin hamá tídangiñe tin aban tídibu wewe. Ligíati, lau álügüdahani le ladügübei Satanási aba lésegeruni inarüni ani aba ladügün lun larihín hangi lan Bungiu. Másiñati álügüdagua tan Ewa tungua anhein mabusenrun lubéi Heowá katei buiti houn.

10. Ka iyeeni lariñagubei Satanási luagu liri Bungiu, ani ka asuseredubei?

¹⁰ Dan le ladügünbalin Satanási álügüdahani tun Ewa, aganbameme táagili Heowá. Ligía aba lubéi táguyuguagüdüni dimurei le lariñagubei Heowá tun furangu. Ani ariñagayatu lun Mafia ni lan lun haguurun luagu tin wewe tuguya. Subudi tumuti ariñagaali lan buga Heowá houn ánhaña lan maganbadi hóunweguba lan. Ábati míbeeli lan lariñagun Satanási tun, ariñagarügaali: “Móunwegunbadün” (Agu. 3:2-4). Aban óunwenbu iyeeni lira luagu liri Bungiu, le linarün katei, lariñaguña luagu ye lan Bungiu. Ítarati aban liabin Satanási lun Mafia lan, aban marasualuguti. Aba teyeedún Ewa sunsuinagubei ani afiñetu lun Satanási (1 Tim. 2:14). Afiñetu lun Satanási mama lun Heowá, adügati katei le lun tadügün katei le wuribatimati: maganbadi tan lun Bungiu luma lun teigin tídangiñe tin tídibu wewe to uéigiñeboun teweridirúa. Lárigiñe aba tíchugun tídangiñe furuda lun Adán (Agu. 3:6).

11. Ka hamuga lunbei ladügüni Adán tuma Ewa?

¹¹ Samina wamá murusun ida liña lan hamuga tóunabuni Ewa Satanási. Lun hamuga tariñagun lun ítara: “Ibidiñetibu nun, ánheinti Heowá le núguchi subuditi nun, hínsiñeti nun ani afiñetina luagu. Ligía íchugubalin sun le númabei luma le lúmabei Adán woun. Ida luba biabin lun bayanuhan wuriba luagu? Ígirabana nungua!”. Ma hamuga lugundan Heowá lun hamuga arufuda tan liráü ínsiñeni lun lau dimurei kei burí le (Ari. 27:11). Ni tuguya ni Adán masandiruntiña ínsiñeni le inarüniti luagu Heowá. Ligíati midin habéi luéigiñe lóubadina Heowá le Háguchi.

12. Ida liña libihin Satanási lun machourun tani Ewa aban lan Úguchili buiti Heowá, ani ka madügün lubéi Adán tuma Ewa?

¹² Kei le aubei warihei, gumeseti Satanási anabaguei liri Heowá lau ladügün lun machourun tani Ewa aban lan Úguchili buiti Heowá. Lárigiñe mídinti Adán tuma Ewa luéigiñe lóubadina  liri Heowá. Adügati le lun hafiñerun lun liyeeni Satanási luma lun hebedaagun lun Háguchi. Uguñe weyu, yúsuti Satanási aban katei ítarati. Aba hayanuhan wuriba luagu liri Heowá ani ábati lanügüniña ha afiñebaña lun liyeeni lun hamahadun lun lugumadin Heowá le richabei.

13. Ida liña larufuduni Esekiéli 36:23 uganu súdiniti le bürüwañubei tidan Bíbülia?

¹³ Awandati san Heowá lanabawagun liri, madügünga ligía ni katei? Uá. Afuranguagüda tumuti Bíbülia sun le adüga láalibei Heowá lun larufuduni le lan lariñagubei Satanási lidan fuluri-agei Edén iyeeni lan (Agu. 3:15). Sun uganu súdiniti le bürüwañubei tidan Bíbülia gayaraati lariñawagún lidan murusun dimurei: harumagüda lumuti Heowá liri lídangiñe Larúeihan le lúhaburugubei Lisaani ani giribugüda lumuti darangilaü luma irichaü ubouagun. Dariwati ariñahani tidan Bíbülia le lunbei líderaguniwa gunfurandei ida liña lan larufuduni Heowá larumadahani liri (aliiha huméi Esekiéli 36:23).

14. Ida liña larumadagüdüni Heowá liri lidan ligaburi lóunabun lun ebedaaguni le adügǘbei lidan fuluri-agei Edén?

¹⁴ Hóuchaali Satanási ladügüni sun liyaraati lun magunfulirun lani Heowá lisuini, gama lumoun, wuribati lidin lun. Arufuda tumuti Bíbülia ligaburi ladügüni Heowá katei ani ua lan ni aban kei ligía. Inarüni, adüga lan sun le adüga láalibei Satanási hama sun ha lúmagiñebaña lun tagaridun lanigi Heowá (Sal. 78:40). Lau sun lira, ahandiliha lumuti sun katei lau lichú aau, gaguraasuni luma lau irichaü. Arufuda lumuti giñe lanarime lubafu lidan saragu igaburi. Ani lau lira, arihúati línsiñegu Heowá lidan sun le ladügübei (1 Huan 4:8). Mararamungili lawadigimaridun Heowá lidan larumadagüdüni liri.

15. Ida liña anihamémegua lan Satanási awiyedei liri Bungiu lidan wadaani, ani ida liña lidin lun?

¹⁵ Lidan wadaani, aniheingua Satanási anabaguei liri Heowá. Álugati lun machourun hamá gürigia luagu lubafu Heowá, liricha, lichú-lau luma línsiñehabu. Kei hénpulu, adügati lun mafiñe hamá gürigia anihein lan Bungiu. Ánheinti añahein lubéi afiñetiña, álugati lun hafiñerun mabuidun lan lilurudun Bungiu  ani eredeha lániña luéi hadügüni le habusenrubei. Ani ínchaha lumutiña gürigia lun hasaminarun wuriba luagu Heowá, aban lan Bungiu le furundeti ani gudagüda lániña gürigia lidan máfiougati. Chóuruti ha lan afiñerubaña lun burí iyeeni le másiñati aba lan hasaminarun luagu amu burí katei ani aba hígiruni lilurudun Heowá le richabei. Kei le magumuchunwagili lan Satanási, anihamémegua lau iyeeni ani hóuchati lun ladisedagüdünibu luéi Heowá. Libihubei funa san Mafia le labusenrunbei?

16. Amu luéi igaburi le larufudubei Adán tuma Ewa, ka gayaraabei wadügüni?

¹⁶ Ígirati Heowá lun híderaguni gürigia charatiña lun harumadahani liri. Ligíati kada aban hádangiñe gayaraati hadügüni le madügün lubéi Adán tuma Ewa. Íbini wawinwanduña lan lidan aban ubóu geyegu hau gürigia ha anabagubalin liri Heowá ani ayanuha hagía wuriba luagu, gachansintiwa lun woudin luéigiñe lóubadina inarüni: luagu sandu lan Heowá, richá lan, buidu lan ligaburi ani hínsiñehabu lan (Isa. 29:23). Gayaraati warufuduni busén wamá lun Warúeite lan luma lun wariñaguni houn gürigia larúeihanrügüñein lan richagua ani lanügüba lan darangilaü luma ugundani houn sun gürigia (Sal. 37:9, 37; 146:5, 6, 10).

17. Ka ladügübei Hesusu lun lasubudirúniwa liri Lúguchi?

¹⁷ Dan warumadahani liri Heowá, wáyeihañein Hesukrístu (Huan 17:26). Subudigüda lumuti Hesusu liri Lúguchi mámarügü lau layusuruni, subudigüda lumuti lau larufudahan ida liña lan Heowá. Kéiburi dan le hariñagubei fariséugu aban lan Bungiu le dǘgüdati hawagu gürigia Heowá, furundei lan ani magudemehabu lan, íderagua lumutiña Hesusu gürigia lun harihini richá lan Lúguchi, gaguraasun lan, hínsiñehabu lan ani gudemehabu ligía. Íderagua lumutiña giñe gürigia asubudirei Heowá lau lubuidun ligaburi lun wáyeihani ligaburi Heowá le Lúguchi lidan wabagari sagü weyu (Huan 14:9).

18. Ida luba warufuduni ye hamá láganigu Heowá?

¹⁸ Ítara kei Hesusu, gayaraati wayanuhan houn amu luagu le wasubudirubei luagu Heowá luma lun wayanuhan luagu línsiñehabu luma areida lan. Ítara liña warufuduni iyeeni lan le hadimurehabei láganigu ani ye hamá. Harumagüda wamuti liri Heowá ani íderagua wamutiña gürigia lun harihini kei aban iri sánduti.  Íbini chará wamá, gayaraati wáyeihani Heowá (Efe. 5:1, 2). Dan le larufuduni le wariñagubei luma le wadügübei ídatima liña lan Heowá, wídehaña lun larumadahóun liri. Ídehatiwa lun inebewalá liri Heowá lau wíderaguniña gürigia lun hesefurun luéi saminaü mabuidunti le hasaminarubei luagu. * Arufuda wamuti giñe inebelá liri Heowá woun dan le úaragua wamá íbini gafigoun wamá (Hob. 27:5).

19. Según Isaíasi 63:7, kátima wabusenrubei dan le wíchugun aturiahani tídangiñeti Bíbülia?

¹⁹ Anihein amu katei le gayaraabei wadügüni lun inebewalá liri Heowá. Dan le wíchugun aturiahani tídangiñeti Bíbülia súnwandan wayanuhan luagu liricha Bungiu lun larúeihan. Ani inarüni luagu garicha lan Heowá lun larúeihani Ubóu luma sun le geyegubei lau. Íbini súdini lan wayanuhan luagu lilurudun Bungiu, le súdinitimabei woun wíderaguniña gürigia lun hínsiñe lan Heowá, le Wáguchi houn luma lun úaragua hamá lun. Ligíati, mosu wayanuhan luagu lubuidun igaburi le luágubei Heowá (aliiha huméi Isaíasi 63:7). Ánhawa adügei le, hínsiñebei Heowá houn gürigia ani gaganbadibaña lun, lugundun busenbaña lun úaragua hamá lun.

20. Kaba álügüdahani ounabúa lidan leweñegua arütíkulu?

²⁰ Kei le aubei warihei luáguti le mini lubéi inebewalá liri Heowá, ida luba wachoururuni dandu lau wagaburi kei lau ligaburi warufudahan ru wamá inebesei lun liri Bungiu ani íderagua wamañame gürigia lun hayarafadun lun? Lóunabuba álügüdahani le lidan leweñegua arütíkulu.