EKICWEKA C’OKWEGA 23
‘Izina ryawe ryezibwe’
‘Ayi [Yehova], izina ryawe rigumaho ebiro byona.’—ZAB 135:13.
ECESHONGORO CA 10 Himbisa Yehova, Ruhanga Waitu!
EMPINYE *
1-2. Ni ziha nyegesa ez’omugasho munonga aha Bahamya ba Yehova?
EBI bicweka ni eby’omugasho munonga ahakuba twena ekibuzo c’okushagika obutegeki bwa Yehova n’okweza izina ryeye nikitukwaho. Itwe Abahamya ba Yehova nitushemererwa munonga twaba turi kuganira n’abantu ahari ezo nyegesa. Konka shi obutegeki bwa Yehova n’okweza ezina ryeye byine ahu biri kubuganira? Yego.
2 Twena tushemerire kugira eki twakora kugira ngu izina rya Ruhanga ryezibwe. Nambwenu tukamanya ku oku Yehova ari kutegeka ari byo biri kukirayo oburungi. Ebi bicweka byombi bitwinire omugasho munonga.
3. Izina rya Yehova niritwariramu enki?
3 Kumanya izina rya Ruhanga Yehova, nibitwariramu kushagika obutegeki bweye. Obwe rero twagamba ku kiri ec’omugasho kweza izina rya Yehova, nambwenu nituba tushemerire kwereka ku obutegeki bweye ari bwo buhikire. Izina rya Yehova ryine akakwate n’oburyo bweye bw’okutegeka.—Reba akashanduku akari kugira ngu: “ Ebintu eby’omugasho munonga.”
4. Omuri Zaaburi ya 135:13 nihagamba ki ah’izina rya Yehova, kandi shi ni biha bibuzo ebi twaza kushwijuma?
4 Izina rya Ruhanga ni ery’omutano. (Shoma omuri Zaaburi ya 135:13.) Ni enki ekiri kutuma izina rya Yehova ryaba ery’omugasho munonga? Ni bata oku ryajumirwe aha murundi g’okubanza? Ni bata oku Ruhanga ari kuryeza? Kandi shi ni bata oku turi kubasa kweza izina ryeye? Reka tushwijume ebyo bibuzo.
OMUGASHO GW’IZINA RYA RUHANGA
5. Ni enki eki abantu abamwe bari kwebuza, bahurira ku izina rya Ruhanga rishemerire kwezibwa?
5 ‘Izina ryawe ryezibwe.’ (Mat 6:9) Yesu akagamba ku eco kiri ekintu c’omugasho omu bi tushemerire kuta omu shara zitu. Konka shi ebyo bikaba nibimanyisa ki? Kweza ekintu nikimanyisa kukiboneza. Abamwe nibabasa kwebuza ngu: ‘Konka shi izina rya Yehova tiriri kutura riri eriri kwera?’ Kugira ngu tutunge ecokugarumu c’eco kibuzo tushemerire kutekateka aha ki eryo zina riri kumanyisa.
6. Ahabw’enki izina riri ery’omugasho munonga?
6 Kumanya izina ry’omuntu nibikira aha kurigamba ninga kurihandika kusha. Yetegereze eki Bibuli eri kugamba: ‘Izina rirungi ni ery’okwetengwa okukira itungo ryingi.’ (Enf 22:1; Mub 7:1) Ahabw’enki izina riri ery’omugasho munonga? Ni ahabw’okuba nirikuhiisa ekitinisa, kandi rituma abantu bamanya owu ori we. Obwe rero kumanya izina ry’omuntu, ninga shi kumanya oku riri kugambwa, tikiri kumara; ahobwe ec’omugasho ni eki abantu bari kutekateka bareba ninga bahurira eryo zina.
7. Ni bata oku abantu bajumire izina rya Ruhanga?
7 Abantu ku bari kugamba ebishuba ahari Yehova, nibaba bashisha ekitinisa ceye. Kandi ku bari kushisha ekitinisa ceye, nibaba bajuma izina ryeye. Kujuma izina rya Ruhanga aha murundi g’okubanza bikatandikira omu musiri gwa edeni. Reka tushwijume oku izina rya Ruhanga ryajumirwe.
OKU IZINA RYA RUHANGA RYAJUMIRWE AHA MURUNDI G’OKUBANZA
8. Ni enki eki Adamu na Eva babire bari kumanya ge, kandi shi nibituma twayebuza biha bibuzo?
8 Adamu na Eva bakaba nibamanya ge izina rya Yehova, n’ebiri kurikwataho byona. Bakaba nibamanya ku ni Omuhangi, owabahire amagara agahikirire, kandi ku ari we owabahire eka ndungi, ni okugamba Paradiso. (Kut 1:26-28; 2:18) Mbwenu shi, bakakoresa obwenge bwabo obwabire buhikirire bari kutekateka aha bintu byona ebi Yehova yabahire? Mbehi bakagumya rukundo yabo kandi bayereka ku nibasima Yehova? Ebyokugarukamu by’ebyo bibuzo bikarebeka ge obu omwangi wa Ruhanga yabagerize.
9. Tukuratize ebiri kugambwa omu Kutandika 2:16, 17 na 3:1-5, ni enki eki Yehova yagambire Adamu na Eva, kandi shi ni bata oku Sitaane yatumire babanganisa ahari Yehova?
9 Shoma omu Kutandika 2:16, 17 na 3:1-5. Sitaane akakoresa enjoka yabuza Eva ngu: Mbehi ‘ni ec’amazima, Ruhanga akagira ngu mutarirya aha muti gona og’omuri eki kibanja?’ Sitaane akabuza ekibuzo ecabire kirimu ebishuba kandi ekirimu nk’oburogo obutari kurebwa butunu. Ruhanga akaba yabagambire ku bashemerire kurya ebijuma by’ebiti byona, kureka eby’ekiti kimwe kusha. Adamu na Eva bakaba bari kubasa kurya ebijuma by’ebiti ebitari bimwe by’omu musiri gwa Edeni. (Kut 2:9) Mazima Yehova akaba yabahire byona ebiri kumara. Konka, Ruhanga akaba yabazibire kurya aha bijuma by’ekiti kimwe. Konka ekibuzo eki Sitaane yababurize kikatuma batekateka ku hariho ekintu kirungi eki Yehova yabimire. Sitaane akebereka ku Ruhanga atari kubakunda na kace. Eva nabasa kuba yagumizemu ari kwebuza ngu: ‘Mbehi hine ekintu kirungi eki Ruhanga yatwimire?’
10. Ni bata oku Sitaane yajumire izina rya Ruhanga, kandi shi ebyo bikarugamu enki?
10 Eva akaba acari omwesigwa ahari Yehova obu Sitaane yamuburize eco kibuzo. Ecokugarukamu eki yahire Sitaane kikereka ku yabire acayijuka eki Ruhanga yabagambire. Akagumizamu ari kumugambira ngu Ruhanga akabagambira ngu eco kiti batarinakikwataho. Akaba ari kumanya okurabura kwa Ruhanga okuri kugira ngu ku barimugomera baryafa. Konka Sitaane akamugarukamu ngu: ‘Okufa ko, buzima timurifa.’ (Kut 3:2-4) Sitaane tarabagambire butunu ku Yehova yababihire. Obu yagambire Eva ku Yehova ari omubihi, akaba yajuma izina rya Ruhanga. Eco kikatuma Sitaane yaba omubi ninga shi ori kurwanisa Ruhanga. Eva akesiga Sitaane. (1 Tim 2:14) Akesiga Sitaane omu mwanya g’okwesiga Yehova. Eco kikatuma Eva yakora ensharamu mbi munonga. Akasharamu kugomera Yehova. Akahika narya aha bijuma by’ekiti eki Yehova yabire amuzibire kurya. Bwanyima yahaho Adamu na we yarya.—Kut 3:6.
11. Ni enki eki abazire bitu ab’okubanza bakozire, kandi shi ni enki ecabaremire kukora?
11 Tekateka aha bwire obu Eva yamazire ari kuganira na Sitaane. Ka tugire ngu kuri Eva yagarukiremu Sitaane ngu: “Iwe tindi kukumanya, konka nimanya Tata Yehova, nimukundira kimwe kandi nimwesiga. Ni we owatuhire ebintu byona ebi twine. Mbwenu iwe ori kumugambaho kubi? Iroko nduga omu misho!” Mbehi nobasa kwehuriza oku ebyo bigambo birungi byabire birayereke Yehova ku omuhara weye Eva ari kumukunda munonga kandi ku ari kumwesiga! (Enf 27:11.) Konka Adamu na Eva bakaba batari kukunda Yehova ninga ngu bamwesige. Eco kikatuma batabasa kurwanirira izina rya Yehova ahari Sitaane.
12. Ni bata oku Sitaane yabibire omu bwenge bwa Eva okubanganisa, kandi shi ni enki eki Adamu na Eva baremirwe kukora?
12 Nk’oku twakireba Sitaane akabiba omu bwenge bwa Eva okubanganisa. Sitaane akabuza omu muringo oguri kutuma Eva yabanganisa yaba Yehova ari omuzire murungi. Eco kikatuma Adamu na Eva baremwa kuhisa izina rya Yehova ekitinisa. Bakashagika Sitaane rero baba abagomi ahari Yehova. Sitaane na hati nakoresa obwo buryo. Natahirira izina rya Yehova ari kurijuma. Abantu abari kwikiriza ekishuba ca Sitaane nikiba corobi kureka kushagika obutegeki bwa Yehova obuhikirire.
YEHOVA NAYEZA IZINA RYEYE
13. Ni bata oku omuri Ezekieli 36:23 hari kutwereka eki obutumwa bw’omuri Bibuli buri kufaho munonga?
13 Mbwenu shi kujuma izina rya Yehova bikamuzibira kuryeza? Ingaha! Bibuli yona neyereka eki Yehova yakozire ngu ayereke ku ebyagambirwe aha izina ryeye omuri Edeni biri ebishuba. (Kut 3:15) Mazima, omu bugufu nitubasa kugamba aha butumwa bw’omuri Bibuli ngu: Yehova nayeza izina ryeye birabire aha Bukama obwebembirwe Omwana weye, kandi nibwija kugaruraho okuhikirira n’obusinge omu nsi. Bibuli erimu obutumwa oburi kutukwasa kushoborocerwa oku Yehova ari kweza izina ryeye.—Shoma omuri Ezekieli 36:23.
14. Ni bata oku Yehova ari kugarukamu ekibuzo ekiri kukwata aha kweza izina ryeye ecabireho omu musiri gwa Edeni?
14 Sitaane nakora cona eki ari kubasa ngu ayemereze ekigendererwa ca Yehova. Konka Sitaane kuruga kare akaremwa tihine eki arihikaho. Bibuli netwereka oku Yehova ari kukora kandi netuhamiza ku hatariho ondijo ruhanga ori nka Yehova. Mazima, okugoma kwa Sitaane n’abari kumushagika nibishasha Yehova munonga. (Zab 78:40) Konka, eco kibuzo Yehova nakigarukamu omu muringo g’obwenge, ari kwehangana kandi omu buringaniza. Nambwenu nayereka amani geye agari kukirira kimwe omu buryo bwingi. Ekiri kukira byona, Yehova ebi ari kukora byona nabikora aha bwa rukundo. (1 Yoh 4:8) Yehova tarirekera aho kweza izina ryeye.
Sitaane akabiha Eva aha bikwatirine na Yehova kandi agumizemu kujuma Ruhanga (Reba paragurafu ya 9-10, 15) *
15. Ni bata oku Sitaane ari kujuma izina rya Ruhanga omuri obu bwire kandi shi ni enki ekiri kurugamu?
15 Na hati Sitaane acajuma izina rya Ruhanga. Natuma abantu babanganisa aha mani ga Ruhanga, oburinganiza bweye, obwenge bweye n’ahari rukundo yeye. Ecokureberaho: Sitaane nagezaho kwereka abantu ku Yehova atari Omuhangi. Kandi ku bari kwikiriza ngu Ruhanga ariho, nabwo Sitaane nagezaho kubereka ku kumwesiga n’emisinge yeye bitine mugasho. Nambwenu nayegesa abantu ku Ruhanga ari omugomi, ku ari koceza abantu omu muriro ogutari kurara. Kandi ku bari kwikiriza ebyo bishuba byeye, nikimworobera kubaretera kwanga obutegeki bwa Yehova obuhikirire. Sitaane aryaguma ajume izina rya Yehova oku ari kubasa kona, kuhisya aha kucwekerezibwa kweye. Mbehi aryagira eki yahikaho?
OMURIMO GWAWE OMU KUHIKIRIZA EKIGENDERERWA CA YEHOVA
16. Ni enki eki ori kubasa kukora ecaremire Adamu na Eva?
16 Yehova akikiriza abantu abatahikirire ngu bamukwase kweza izina ryeye. Obwe rero iwe nobasa kukora ecaremire Adamu na Eva. N’obu ori omu nsi ahu oyetorwirwe abantu abari kujuma izina rya Yehova, nobasa kurwanirira amazima ori kwereka abandi ku Yehova ari ori kwera, ku ahikirire, ku ari murungi, kandi ku ayine rukundo nyingi. (Isa 29:23) Nobasa kwereka ku ori kwenda ngu abe ari we wakutegeka. Nobasa kukikora ori kwikiriza ku oburyo bweye bw’okutegeka ari bwo buhikirire kandi ku juba aha buriretera abantu obusinge n’okushemererwa.—Zab 37:9, 37; 146:5, 6, 10.
17. Ni bata oku Yesu yamanyisize abantu izina ry’Ishe?
17 Ku turi kweza izina rya Yehova nituba turi kutoreza ecokureberaho ca Yesu Kristo. (Yoh 17:26) Yesu akamanyisa abantu izina ry’Ishe atari okurikoresa kusha ahobwe ari n’okubegesa owu Yehova ari we by’amazima. Ecokureberaho: Akahabura Abafarisaayo ababire bari kukora eby’okushisha izina rya Yehova omu miringo etari kushushana kandi bari kukora ebintu ebitari kushemeza Ishe. Yesu akakwasa abantu kushoborocerwa ku Ishe ari omunyarukundo, ari kwehangana kandi ku ari kusaasira. Nambwenu akereka abantu ku Yehova ahikirire ari kwereka emitwarize nk’ey’Ishe omu kubaho kweye.—Yoh 14:9.
18. Ni bata oku turi kubasa kuhakanisa abari kujuma izina rya Yehova?
18 Nk’oku Yesu yakikozire, n’itwe nitubasa kuburira abantu, turi kubegesa kandi tubereka ku Yehova ayine embabazi na rukundo nyingi. Ku turakikore tusyoya, nituba twahakanisa abari kujuma izina rya Yehova. Nitweza izina rya Yehova kandi tukwasa abandi kuryeza omu bitekateko n’omu bikorwa. Nambwenu nitubasa kutoreza Yehova. N’obu tutahikirire eco nitubasa kukikora. (Efe 5:1, 2) Ebi turi kukora n’ebi turi kugamba nibituma abantu bayeza izina rya Yehova. Nitweza izina rya Yehova turi kukwasa abantu kumanya amazima ahari we. * Nambwenu nituba turi kwereka ku abantu abatahikirire bari kubasa kuguma bari abesigwa ahari Yehova.—Yob 27:5.
Nitwenda kukwasa abegi bitu kushoborocerwa ku Yehova ayine embabazi na rukundo nyingi (Reba paragurafu ya 18-19) *
19. Ni bata oku omuri Isaaya 63:7 hari kutwereka ekigendererwa eki turi kuba twine omu murimo g’okuburira?
19 Hariho ekindi kintu eki turi kubasa kukora ngu tweze izina rya Yehova. Twaba turi kwegesa abegi ba Bibuli, tushemerire kufa munonga aha butegeki bwa Yehova, turi kubereka ku ari we ohikire kutegeka ebintu byona eby’omu iguru n’eby’omu nsi. Konka twaba turi kwegesa abantu, ekigendererwa kitu kishemerire kuba kiri ec’okubakwasa kukunda Yehova n’okumwesigira kimwe. Nituba tushemerire kwereka emitwarize ya Yehova, kandi twegesa amazima agari kumukwataho. (Shoma omuri Isaaya 63:7.) Ku turabegese omuri ogo muringo, nikija kutuma bakunda Yehova kandi bamworobere ahakuba nibaba bari kwenda kuba abesigwa ahari we.
20. Ni enki eki turishwijuma omu kicweka ekirikurataho?
20 Ni bata oku emitwarize yitu n’oku turi kwegesa biri kutuma twayeza izina rya Yehova kandi bikatuma n’abandi baryeza? Ekicweka ekirikurataho kiryatuha ecokugarukamu c’eco kibuzo.
ECESHONGORO CA 2 Yehova Niryo Eiziina Ryawe
^ par. 5 Eki kicweka nikikwata aha bantu n’ahari ba marayika. Ahabw’enki eki kicweka kija kiri kwetengwa, kandi shi itwe ni guha murimo ogu twine? Kumanya ecokugarukamu c’eco kibuzo n’ebindi ebiri kushushana na co, nibyija kutukwasa kugumya obunywani bwitu na Yehova.
^ par. 18 Hakahwa obwire ebitabo byitu biri kwegesa ku izina rya Yehova ritashemerire kwezibwa. Ahabw’enki? Ni ahabw’okuba tihariho omuntu n’omwe owagambire ku Yehova atahikire kwetwa eryo zina. Konka omu ruterane rwa buri mwaka rw’omu 2017 bikashobororwa ge. Omwebembezi wa puroguramu akagamba ngu: “Kushaba ngu izina rya Yehova ryezibwe ti kibi ahabw’okuba izina ryeye rishemerire kwezibwa.”—Reba puroguramu ya tivi yitu y’omu Kokubanza 2018 ahari jw.org®. Ahari LIBRARY > TIVI YITU®.
^ par. 62 EBISHUSHANI: Sitaane akajuma Ruhanga ari kugambira Eva ku ari omunyabishuba. Hahwireho ebinyigana byingi, Sitaane ari kujanjaza ebishuba ahari Ruhanga, nk’enyegesa eri kugamba ku Ruhanga ari omugomi kandi ku atarahangire abantu.
^ par. 64 EBISHUSHANI: Mwenetata ari kwegesa omwegi wa Bibuli, konka ari kufa munonga aha mitwarize ya Ruhanga.
