1-2. Ki keksoz ki vreman enportan pour Temwen Zeova?

I ANNAN de keksoz vreman enportan ki nou bezwen reflesir lo la. Sa se drwa Zeova pour dirize e sanktifikasyon son non. Konman Temwen Zeova, nou kontan koz lo sa bann size enteresan. Me i enportan pour nou konpran ki sanktifikasyon non Bondye e son drwa pour dirize i de size ki relye avek kanmarad.

² Nou tou nou’n aprann ki non Bondye i devret ganny sanktifye akoz tou bann move keksoz ki’n ganny dir lo li. Nou’n osi aprann ki tou dimoun i bezwen rekonnet ki fason dirize Zeova i sa enn ki pli bon. Alor, tou le de keksoz i vreman enportan. Me eski drwa Zeova pour dirize ek sanktifikasyon son non i de diferan keksoz? Non.

3. Ki non Zeova i enkli?

³ Non Zeova i enkli tou sa ki i annan pour fer avek nou Bondye e sa i enkli son fason dirize. Nou konnen ki sa keksoz pli enportan, i pour elimin tou repros ki’n ganny anmennen lo non Bondye. Sa i osi vedir ki nou aksepte ki fason dirize Zeova i sa enn ki pli bon. Alor, nou konpran ki sanktifikasyon non Zeova i relye avek lafason ki i dirize konman Souvren Tou Pwisan.​—Vwar bwat “ Bann diferan laspe en keksoz vreman enportan.”

4. Ki Psonm 135:13 i dir konsernan non Bondye e ki kestyon nou pou reponn dan sa lartik?

⁴ Non Zeova i vreman spesyal. (Lir Psonm 135:13.) Akoz non Zeova i sitan enportan? Ki mannyer son non ti ganny sali? Ki mannyer Bondye i sanktifye son non? Ki mannyer nou, nou kapab ede defann son non? Annou reponn sa bann kestyon.

5. Ki serten i kapab demande ler zot tande ki non Bondye i bezwen ganny sanktifye?

⁵ “Ki ou non i ganny sanktifye.” (Mat. 6:9) Zezi ti dir ki sa i devret enn bann keksoz pli enportan ki nou priy lo la. Ki Zezi ti pe esey dir? Ler nou sanktifye en keksoz sa i vedir ki nou fer li sen, prop oubyen pir. Me serten i kapab demande, ‘Eski pa non Zeova i deza sen, prop e pir?’ Pour nou kapab reponn sa kestyon, nou bezwen reflesir lo kwa ki enplike dan en non.

6. Kwa ki fer en non sitan enportan?

⁶ En non pa zis en mo ki’n ganny ekrir lo papye oubyen ki ganny prononse. Labib i dir: “Vo mye en bon non ki larises.” (Prov. 22:1, NWT; Ekle. 7:1, NWT) Akoz en non i sitan enportan? Parski i enplik en repitasyon setadir lafason ki lezot i vwar sa enn ki annan sa non. Alor, i pa lafason ki en non i ganny ekrir oubyen ganny prononse ki enportan. Sa ki pli enportan i sa ki lezot i mazinen ler zot vwar oubyen zot tann sa non.

7. Ki mannyer dimoun in sali non Bondye?

⁷ Ler dimoun i dir bann mansonz lo Zeova, zot pe esey sali son repitasyon. Ler zot sali son repitasyon, zot pe sali son non. Premye fwa ki non ek repitasyon Zeova ti ganny sali ti dan zarden Edenn. Annou vwar ki nou kapab aprann avek sa ki ti arive.

8. Ki Adan ek Ev ti konnen e ki lezot kestyon nou kapab demande?

⁸ Adan ek Ev ti konnen ki non Bondye i Zeova e zot ti osi konn bokou keksoz enportan lo li. Par egzanp, zot ti konnen ki Zeova i zot Kreater, ki i’n donn zot lavi, en zoli landrwa pour reste ek en konzwen parfe. (Zen. 1:26-28; 2:18) Me eski zot ti pou kontinyen servi zot lespri parfe pour medit lo tou sa ki Zeova in fer pour zot? Eski zot ti pou kontinyen ranforsi zot lanmour ek lapresyasyon pour Zeova? Larepons ti vin evidan ler lennmi Bondye ti teste zot.

9. Dapre Zenez 2:16, 17 ek 3:1-5, ki Zeova ti dir Adan ek Ev e ki mannyer Satan ti fer zot mazin an mal lo Zeova?

 ⁹ Lir Zenez 2:16, 17 ek 3:1-5. Satan ti servi en serpan pour koz avek Ev e i ti demann li: “Eski Bondye in vreman dir: Ou pa devre manz tou bann fri lo bann pye ki dan zarden?” Dan sa kestyon ki Satan ti demande, i ti annan en mansonz ki ti fer Ev konmans mazin dan en move fason lo Bondye. An realite, Bondye ti’n dir ki zot kapab manz fri dan tou pye dibwa eksepte enn. Adan ek Ev ti kapab manz fri dan en kantite varyete pye. (Zen. 2:9) Pa Zeova i vreman zenere! Me Zeova ti’n dir ki i annan en pye ki Adan ek Ev pa ti annan drwa manz son fri. Alor, sa kestyon ki Satan ti demande ti donn Ev lenpresyon ki Bondye pa ti zenere. Ev ti’n kapab mazinen, ‘Eski Bondye pe priv mwan en bon keksoz?’

10. Ki mannyer Satan ti sali non Bondye e ki ti arive apre?

¹⁰ Ler Satan ti demann sa kestyon, Ev ti ankor pe obei Zeova. I ti dir Satan egzakteman sa ki Bondye ti’n dir. Ev ti osi dir ki zot pa ti devret ni menm tous sa pye. I ti konnen ki Bondye ti’n dir ki si zot dezobei, zot pou mor. Me Satan ti dir: “Zot pa pou mor.” (Zen. 3:2-4) Aprezan Satan ti pe nepli kasyet son lentansyon, i ti pe sali non Bondye e dir ki Zeova in koz manti. Alor, Satan ti vin Dyab, ki vedir enn ki fer kalonmni. Ev ti vreman ganny anbete, i ti krwar sa ki Satan ti’n dir li. (1 Tim. 2:14) I ti annan plis konfyans dan Satan ki dan Zeova. Sa ti fer li pli fasil pour Ev fer sa pli move desizyon. I ti deside dezobei Zeova. I ti manz sa fri ki Zeova ti’n defann li manze e apre i ti donn en bout Adan.​—Zen. 3:6.

11. Ki Adan ek Ev ti’n kapab fer e ki zot pa ti arive fer?

¹¹ Mazin lo sa ki Ev ti’n devret dir Satan. Meton Ev ti’n dir en keksoz koumsa: “Mon pa konn ou me mon konn mon Papa, Zeova. Mon kontan li e mon annan konfyans dan li. Tou sa ki nou annan, nou de Adan, Zeova ki’n donn nou. Ki lodas ou annan pour vin dir sa bann move keksoz lo li? Sorti la, ale!” Sirman Zeova ti pou’n kontan pour tann son fiy ki i kontan dir sa bann parol ki montre ki i fidel avek Li! (Prov. 27:11, NWT) Me ni Ev ni Adan pa ti annan lanmour fidel pour Zeova. Vi ki Adan ek Ev ti napa lanmour fidel pour zot Papa, zot pa ti defann Son non ler Satan ti sali non Bondye.

12. Ki mannyer Satan ti senm dout dan lespri Ev e ki Adan ek Ev pa ti fer?

¹² Parey nou’n vwar, Satan ti konmans senm dout dan lespri Ev par fer li annan dout konsernan si Zeova i en bon  Papa pour zot. Sa ti fer ki Adan ek Ev pa ti defann non ek repitasyon Zeova kont bann mansonz Satan. Zot ti fasilman ekout Satan e rebel kont zot Papa. Satan i servi bann menm teknik ozordi. I esey sali non Zeova. Dimoun ki krwar bann mansonz Satan, i fasilman ganny enfliyanse pour rezet Zeova konman zot dirizan.

13. Dapre Ezekyel 36:23, ki mesaz prensipal Labib?

¹³ Eski Zeova i aksepte sa bann mansonz san defann son lekor? Pa ditou! Labib antye i dir nou sa ki Zeova in fer pour montre ki bann move keksoz ki’n ganny dir lo li dan zarden Edenn, pa vre. (Zen. 3:15) Anfet, mesaz prensipal Labib i ki, Zeova i sanktifye son non atraver son Rwayonm ki ganny dirize par son Garson e i pou fer ki i annan ladrwatir ek lape lo later ankor. Dan Labib, i annan bann lenformasyon ki ed nou konpran ki mannyer Zeova i sanktifye son non.​—Lir Ezekyel 36:23, NWT. *

14. Ki mannyer lafason ki Zeova ti reazir anver sa rebelyon dan zarden Edenn in sanktifye son non?

¹⁴ Satan in fer tou sa ki i kapab pour anpes Zeova akonpli son plan. Me plizyer fwa Satan pa’n reisi. Labib i montre ki Zeova in fer e i prouve ki Zeova i vreman en Papa ki kontan nou e i sa pli bon dirizan. I vre ki ler Satan ek tou bann ki swiv li ti rebel kont Zeova, sa ti fer li soufer en kantite. (Ps. 78:40, NWT) Kantmenm sa, Zeova in demontre lasazes, pasyans ek lazistis ler i’n fer fas avek sa sityasyon. I’n osi montre ki i tou pwisan dan diferan fason. Me pli enportan, i’n demontre lanmour dan tou sa ki i fer.  (1 Zan 4:8) Zeova pa’n zanmen aret fer keksoz pour sanktifye son non.

15. Ki mannyer Satan pe sali non Bondye ozordi e avek ki rezilta?

¹⁵ Ozordi, Satan i ankor pe sali non Bondye. I esey fer dimoun krwar ki Bondye pa pwisan, pa zis, pa saz e ki i pa kontan nou. Par egzanp, Satan i esey fer dimoun krwar ki Bondye pa Kreater. Si dimoun i aksepte ki Bondye i egziste, Satan i esey fer zot krwar ki Bondye i enzis e ki Son bann standar i priv nou. I menm ansenny dimoun ki Zeova i en Bondye kriyel ki bril dimoun dan en lanfer dife. Ler zot krwar sa bann mansonz, i pli fasil pour zot rezet Zeova konman zot dirizan. Ziska ki Zeova i detri Satan, Satan pou kontinyen sali non Zeova e i pou esey fer ou rezet Zeova ou osi. Eski i pou reisi?

16. Ki ou kapab fer ki Adan ek Ev pa ti fer?

¹⁶ Zeova i permet bann imen enparfe ede sanktifye son non. Ou kapab fer sa ki Adan ek Ev pa ti fer. Menm si ou dan en lemonn kot dimoun i sali e koz an mal lo Zeova, ou annan sa loportinite pour dir laverite e defann non Zeova. Ou kapab dir dimoun ki Zeova i sen, drwat, bon e i kontan nou. (Iza. 29:23) Ou kapab montre ki ou anvi i vin ou Dirizan. Ou kapab ed dimoun konpran ki zis fason dirize Zeova ki vreman drwat e ki pou fer nou annan en lavi ere e anpe.​—Ps. 37:9, 37, NWT; 146:5, 6, 10.

17. Ki Zezi ti fer pour ed dimoun konn non son Papa?

¹⁷ Ler nou defann non Zeova, nou swiv legzanp Zezi Kri. (Zan 17:26) Zezi ti fer bann dimoun konn non son Papa par servi sa non e par defann repitasyon Zeova. Par egzanp, i ti montre ki sa ki bann Farizyen ti dir lo Zeova pa ti vre. Bann Farizyen ti fer dimoun krwar ki Bondye i kriyel, ekspekte tro bokou avek bann imen, ki i pa enterese avek zot e ki i san pitye. Zezi ti ed dimoun pour vwar ki son Papa i rezonnab, pasyan, i kontan zot e i kontan pardonnen. I ti osi ed dimoun pour konn Zeova par lafason ki i ti imit bann kalite Zeova dan son lavi toulezour.​—Zan 14:9.

18. Ki nou kapab fer pour montre ki sa bann move keksoz ki’n ganny dir lo Zeova pa vre?

 ¹⁸ Parey Zezi, nou kapab dir dimoun sa ki nou konnen lo Zeova e ansenny zot ki I en Bondye ki kontan nou e bon anver nou. Ler nou fer sa, nou montre ki sa bann move keksoz ki’n ganny dir lo Zeova, pa vre. Nou sanktifye non Zeova, nou fer sa non vin sen dan lespri ek leker bann dimoun. Nou osi kapab swiv legzanp Zeova. Sa i posib menm si nou enparfe. (Efe. 5:1, 2) Nou ede sanktifye non Zeova, ler nou parol ek aksyon i montre dimoun ki mannyer Zeova i vreman ete. Nou defann oubyen zistifye sa non ler nou ed dimoun pour konn laverite lo Bondye. * Nou osi montre ki bann imen enparfe i kapab fidel avek Bondye.​—Zob 27:5, NWT.

19. Ki mannyer Izai 63:7 i ed nou konnen kwa ki devret nou lobzektif prensipal ler nou pe ansenny lezot?

¹⁹ I annan en lot keksoz nou kapab fer pour sanktifye non Zeova. Ler nou ansenny laverite avek lezot, souvan nou met lanfaz lo lotorite Zeova e lo drwa Zeova pour diriz liniver. Par kont, menm si i enportan pour ansenny zot bann lalwa Bondye, nou lobzektif prensipal i pour ed zot aprann kontan Zeova nou Papa e pour reste fidel avek li. Alor nou bezwen met lanfaz lo bann zoli kalite Zeova, espesyalman lo bann kalite ki sa non Zeova i reprezante. (Lir Izai 63:7.) Dan sa fason, nou pe ed zot pour kontan Zeova e obeir li parski zot anvi fidel avek li.

20. Ki nou pou diskite dan sa lartik ki swiv?

²⁰ Me ki mannyer nou kapab fer sir ki nou konportman e sa ki nou ansennyen i anmenn loner lo non Zeova e i atir dimoun ver li? Dan sa lartik ki swiv, nou pou ganny larepons sa kestyon.