TANE MEKUN 23
“Epi Hmitrötr La Ëje i Nyipë”
“Iehova fe, uti hë epine palua la [ëje] i [nyipë].”—SAL. 135:13, MN.
NYIMA 10 Atrunyi Iehova Jë Akötresi Së!
MEKUN KA TRU *
1-2. Nemene la lue ewekë hna wangatrune hnene la itre hlue i Iehova?
NYIPIEWEKË tro sa sajuëne la musi cile i Iehova me atrune la ëje i Nyidrë. Celë hi lue ewekë lai hne së hna ajane troa ithanatan ke, itre hlue i Iehova hi së. Ngo hapeu, ka ce tro kö la lue ewekë celë? Eje hi.
2 Atre hi së laka, nyipiewekë troa ahmitrötrëne la ëje i Akötresie, me jelethoine la itre hna qaja göi Nyidrë. Ketre, atre hi së laka, ka lolo la musi cile i Akötresie. Eje hi, nyipiewekë tro sa wangatrune la lue ewekë celë.
3. Nemene la aliene la ëj hna hape, “Iehova”?
3 Ame la ëj, “Iehova” tre, kola qaja hnyawa la pengöi Akötresie, tune la aqane musi Nyidrë. Matre, ame la easa qaja ka hape, ka nyipiewekë troa ahmitrötrëne la ëje i Akötresie, easë fe hi lai a sajuëne la musi cile i Nyidrë. Ketre, ame la ëj, “Iehova” tre, kola qaja la aqane musi Nyidrë, Akötresie Ka Tru Trenge Men.—Wange ju la hna eköhagen hna hape, “Itre Götranene La Ketre Hnying Ka Sisitria.”
4. Nemene la hna qaja ngöne Salamo 135:13 göne la ëje i Akötresie, nge nemene la itre hnying hne së hna troa sa?
4 Ka draië catre kö la ëje i Iehova hune la itre xaa ëj. (E jë la Salamo 135:13.) Pine nemen? Eu la kola pane silitrengathoine la ëje i Iehova? Nemene la aqane ahmitrötrëne Akötresieti la ëje i Nyidrë? Nge nemene la aqane tro sa cilëgöline ej? Easa troa sa la itre hnying celë.
ENYIPIEWEKËNE LA ËJ
5. Nemene la hna hnyingën hnei itre xan?
5 “Epi hmitrötr la ëje i nyipë.” (Mat. 6:9) Öni Iesu ka hape, ketre ewekë lai ka sisitria nyine tro sa sipone ngöne la thith. Nemene la aliene la hnaewekë celë? Ame la easa ahmitrötrëne la ketre ewekë, tre, easa thel matre tro ej a porop me wië. Maine jë tro itre xan a hnying ka hape, “Tha ka hmitrötre hë me wië la ëje i Akötresie?” Qëmekene troa sa la hnying, loi e tro sa pane atre la aliene la ëje celë.
6. Pine nemene matre ka nyipiewekë la ëj?
6 Ame la ëj, tre, tha ene hmekuje kö la troa qaja maine cinyanyine la itre mataitus. Öni Tusi Hmitrötr: “Loi e troa ajane la hlemu loi hune la ite mo ka nyimute.” (Ite Edomë 22:1; Ate cai. 7:1) Pine nemene matre ka nyipiewekë la ëj? Pine laka, ka ce tro memine la aqane hlemu ne la atr ka xome la ëje cili, ene la aqane goeë angeic hnei itre xan. Eje hi, sisitria catre kö la aqane goeëne la ketre atr hnei itre xan, hune la aqane troa qaja maine cinyanyine la ëje i angeic.
7. Pine nemene matre kola qaja angazone la ëje i Akötresie?
7 Ame la itre atr a silitrengathoi Iehova, tre, angatre hi lai a qaja angazon me adrone la ëje i Nyidrë. Celë hi lai ka traqa ekö ngöne la gatran e Edena. Hna nyiqane silitrengathoi Akötresie me qaja angazo Nyidrë kowe la itre atr. Tro sa pane ce wang la ka traqa ekö.
AQANE NYIQANE SILITRENGATHOINE LA ËJE I IEHOVA
8. Nemene la hna atre hnei Adramu me Eva, nge nemene la lue hnying hna amejën?
8 Atre hi Adramu me Eva laka, Iehova la ëje i Akötresie, nge Nyidrëti la Atre Xup me qeqe ne mel. Ketre, lue trefën ka pexeje nyidro, nge hnei Iehova hna ami nyidro troa lapane la Paradraiso. (Gen. 1:26-28; 2:18) Ngo hapeu, hnei nyidroti kö hna lapa mekune la itre ewekë hna kuca hnei Iehova? Hnei nyidroti kö hna acatrene la ihnim me hni ne ole i nyidroti koi Iehova? Hna sa la lue hnying celë ngöne la kola tupathi nyidro hnene la ithupëjia me Akötresie.
9. Thenge la Genese 2:16, 17 me 3:1-5, nemene la hna qaja hnei Iehova kowe lo lue pane trefën, nge nemene la trengathoi hna sil hnei Satana?
9 E jë la Genese 2:16, 17 me 3:1-5. Jëne la un, hnei Satana hna hnying koi Eva ka hape: “Hape u, ase hë ulatine hnei Akötesie, ka hape, The tro kö nyipoti a xeni qa ngöne la nöjei sinöe asëjëihë ne la hlapa?” Hetre trengathoi hna sil ngöne la hnyinge i Satana, kösë poizin hna juetrën. Öni Akötresie ka hape, ijije hi tro nyidroti a xeni la nöjei sinöe, ngo casi hi la sinöe hna wathebon. Pane mekune jë la etrune la nöjei pengöne sinöe e hnine la gatran Edena! (Gen. 2:9) Eje hi, Akötresieti ka hame Iehova. Hnei Nyidrëti hna wathebone koi Adramu me Eva troa xeni la ca sinöe. Ngo hnei Satana hna silitrengathoi ka hape, tha ka hame kö Iehova. Maine jë, hnei Eva hna hnying ka hape, ‘Iehova kö a cipa nyio la ketre ewekë ka lolo?’
10. Nemene la aqane adrone Satana la ëje i Akötresie, nge nemene la thangan?
10 Ame lo kola xötrei hnying hnei Satana, hnei Eva hna drei Iehova. Hnei angeic hna pane amexeje hnyawa lo hnei Akötresie hna wathebone koi Adramu. Hnei Eva fe hna qaja ka hape, tha tro kö a xeni la wene sinöe. Atre hi angeic laka, maine tro nyidroti a tha idrei, tro hë nyidroti a mec, tune lo hna amekötin hnei Iehova. Ngo öni Satana: “Tha trojë kö nyipo a mec.” (Gen. 3:2-4) Satana ha qaja amamane la mekuna i angeic, me adrone la ëje i Akötresie me qaja ka hape, ka thoi Nyidrë. E cili hi la angeic a nyi Diabolo me atre iaö. Eje hi, hna iaö Eva nge hnei angeic hna drei Satana. (1 Tim. 2:14) Hnei angeic hna mejiune koi Satana hui Iehova. Celë hi matre ka ngazo la aqane axecië mekune i angeic. Hnei Eva hna tha drei Iehova. Hnei angeic hna xen la wene sinöe hna wathebon, me hamën koi Adramu.—Gen. 3:6.
11. Maine ju, nemene la nyine tro Adramu me Eva a kuca, ngo nemene kö la hnei nyidroti hna kuca?
11 Pane mekune jë la nyine tro Eva a qaja koi Satana, ka hape: “Iehova casi hi la Kemeng hnenge hna hnim, nge thatre eö fe kö ni. Eni a mejiune koi Nyidrë. Qaathei Nyidrëti asë hi la nöjei ewekëng me Adramu. Hnauëne pena la eö a qaja angazo Nyidrë? Tro pi!” Drei la madrine i Iehova troa dreng la nekö i Nyidrëti e qaja amamane la ihnimi angeic, me mele nyipici koi Nyidrë! (Ite Edomë 27:11) Ngo tha celë kö la mekuna i Eva me Adramu! Pine laka, pëkö ihnimi nyidroti kowe la Keme i nyidro, matre tha hnei nyidroti kö hna cilëgöline la ëje i Iehova qa ngöne la itre trengathoi Satana.
12. Nemene la aqane iaö Eva hnei Satana, nge nemene la hna tha kuca hnei Adramu me Eva?
12 Tune la hne së hna ce wang, hnei Satana hna adrone la ëje i Iehova ngöne lo angeic a iaö Eva. Nge tha hnei Adramu kö me Eva hna cilëgöline la ëje i Nyidrë. Hnei nyidroti pe hna drei Satana me icilekeu memine la Keme i nyidro. Celë fe hi aqane ujë i Satana enehila. Angeic a adrone la ëje i Iehova me silitrengathoi Nyidrë. Ame la itre ka mejiune kowe la itre trengathoi Satana, tre, canga tro hi angatr a nuetrije la musi cile i Iehova.
IEHOVA A AHMITRÖTRËNE LA ËJE I NYIDRË
13. Thenge la tusi Ezekiela 36:23, nemene la aliene la Tusi Hmitrötr?
13 Hapeu, Iehova kö a nue troa silitrengathoi Nyidrë? Waea! Tusi Hmitrötr a amamane la nöjei ewekë hnei Nyidrëti hna kuca matre troa ahmitrötrën la ëje i Nyidrë qa ngöne la itre trengathoi hna sil e Edena. (Gen. 3:15) Tusi Hmitrötr a amamane laka, Iehova a ahmitrötrëne la ëje i Nyidrë jëne la Baselaia hna musinëne hnene la Nekö i Nyidrë, nge aja i Nyidrë troa hamëne hmaca la meköt me tingeting e celë fen. Ej a xatua së troa trotrohnine la itre hna kuca hnei Iehova matre troa ahmitrötrëne la ëje i Nyidrë.—E jë la Ezekiela 36:23.
14. Nemene la aqane ahmitrötrëne Iehova la ëje i Nyidrë, ngöne la kola icilekeu e Edena?
14 Satana a kuca asë la hnei angeic hna atrein, matre troa sewe Iehova troa eatrëne la aja i Nyidrë. Ngo tha ie ju kö angeic. Tusi Hmitrötr a amamane hnyawa la hna kuca hnei Iehova. Nge celë hi ka anyipicine laka, pëkö ka tui Iehova. Eje hi, Iehova a akötr pine la hna icilekeu hnei Satana me itre sine xöle i angeic. (Sal. 78:40) Ame pe, ka inamacane Nyidrë, nge Nyidrëti a xomihni aqeany me meköt. Ketre, nyimutre la itre aqane huliwane Iehova la mene i Nyidrë. Nge kola mama la ihnimi Nyidrë ngöne la nöjei ewekë hnei Nyidrëti hna kuca. (1 Ioane 4:8) Tha cile kö Iehova troa ahmitrötrëne la ëje i Nyidrë.
Hnei Satana ekö hna silitrengathoi Iehova koi Eva, nge angeice fe a kuca tun enehila (Wange ju la paragarafe 9-10, 15) *
15. Nemene la aqane adrone Satana la ëje i Akötresieti enehila?
15 Satana palahi a adrone la ëje i Akötresieti enehila. Angeic a iaöne la itre atr matre tro angatr a luelu ka hape, ka trene men me meköt me inamacan me ihnimi Iehova. Angeic a uku angatr troa mekun ka hape, tha Iehova kö la Atre Xup. Nge Satana a thel tro la itre ka mejiune koi Akötresie a mekun laka, tha ka meköti kö la itre hna amekötin hnei Nyidrë, nge itre ej a hnöthe la mele i angatr. Satana mina fe a thoi ka hape, Akötresieti ka ngazo Iehova ke, Nyidrëti a dreuthetrij la itre atr ngöne la ifereno. Ame la itre ka mejiun kowe la itre trengathoi Satana, tre, canga saqe hi angatre nuetrije la musi cile i Iehova. Tro palahi Satana a silitrengathoi Akötresie me thel troa aiananyi së me Nyidrë, uti hë la ijine troa lep apatrenyi angeic. Hapeu, tro kö sa cile catr koi Satana?
NEMENE LA HNËQA SË?
16. Nemene la nyine tro sa kuca, lo hna thatreine kuca hnei Adramu me Eva?
16 Iehova a aijijëne la itre atr ka tha pexeje kö troa hane ahmitrötrëne la ëje i Nyidrë. Ijije hi tro sa kuca lo hna thatreine kuca hnei Adramu me Eva. Alanyimu enehila la itre atr ka silitrengathoi Akötresie me adrone la ëje i Nyidrë, matre ijije hi tro sa cilëgöline la nyipici me qaja kowe la nöjei atr ka hape, ka hmitrötr, me meköt me ihnimi Iehova. (Is. 29:23) Ijije fe tro sa sajuëne la musi cile i Nyidrë. Loi e tro sa qaja amamane ka hape, musi cile i Nyidrëti hmekuje hi la ka meköt, nge ka ijije troa hamën la tingeting me madrin kowe la itre atr.—Sal. 37:9, 37; 146:5, 6, 10.
17. Nemene la aqane qaja amamane Iesu la ëje ne la Keme i nyidrë?
17 Ame la easa cilëgöline la ëje i Iehova, easë hi lai a nyitipu Iesu. (Ioane 17:26) Hnei Iesu hna qaja la ëje i Iehova me cilëgöli Nyidrë. Hnei nyidrëti fe hna jelethoine la itre Faresaio ka qaja ka hape, Akötresieti ka calogitre Iehova me nanyi qaathe së. Hnei Iesu hna xatuane la itre atr troa trotrohnine laka, ka lolo la Keme i nyidrë, nge ka atreine xomihni aqeany, ka tru ihnimin nge ka nue la itre ngazo së. Hnei nyidrëti fe hna xatua angatr troa “öhnyi” Iehova. Hnei Iesu hna amamane hnyawa la itre thina i Iehova ngöne la mele i nyidrë.—Ioane 14:9.
18. Nemene la aqane tro sa jelethoine la itre trengathoi hna qaja göi Iehova?
18 Tui Iesu, loi e tro sa qaja koi itre xan la itre hne së hna atre göi Iehova laka, ka lolo Nyidrë nge ka tru ihnimin. Celë hi aqane tro sa jelethoine la itre trengathoi hna qaja göi Nyidrë. Ketre, ame la easa xatuane la itre atr troa metrötrë Iehova, easë hi lai a ahmitrötrëne la ëje i Nyidrë. Ngacama itre atr ka tha pexeje kö së, ngo ijije hi tro sa nyitipu Iehova. (Efe. 5:1, 2) Ame la easa amamane ngöne la aqane ithanata me aqane ujë së la nyipi pengöi Iehova, easë hi lai a ahmitrötrëne la ëje i Nyidrë. Nge ame la easa xatuane la itre atr troa nuetrij la itre ini ka thoi hna qaja göi Iehova, easa hi lai a cilëgöline la ëje i Nyidrë. * Ketre, easa amamane laka, ijije hi tro la itre atr ka tha pexeje kö a mele nyipici.—Iobu 27:5.
Easa ajane tro la itre ka ini tus a trotrohnin laka, ka lolo nge ka tru ihnimin Iehova (Wange ju la paragarafe 18-19) *
19. Thenge la Isaia 63:7, nemene la ka sisitria ngöne la easa cainöje trootro me inine la itre atr?
19 Hetre ketre nyine tro sa kuca matre troa ahmitrötrëne la ëje i Akötresie. Ame la easa cainöje trootro, easa amamane laka, ka meköti tro Iehova a mus ke, Ka Tru Trenge Men Nyidrë. Nge ka nyipici hi la mekun celë. Eje hi laka, ka nyipiewekë troa inine la itre hna amekötin hnei Akötresie. Ngo ame la ka sisitria, tre, troa xatua angatr troa hnimi Iehova, me mele nyipici koi Nyidrë. Celë hi matre nyipiewekë tro sa amamane la itre thina i Iehova memine la pengöi Nyidrë, tune la aliene la ëje i Nyidrë. (E jë la Isaia 63:7.) Aqane tro hi së lai a xatuane la itre atr troa hnimi Nyidrë me mele nyipici koi Nyidrë.
20. Nemene la hne së hna troa ce wang ngöne la ketre tane mekun?
20 Ame ngöne la ketre tane mekun, tro sa ce wang la aqane tro sa ahmitrötrëne la ëje i Akötresie me xatuane la itre atr troa easenyi koi Nyidrë, jëne la aqane ujë së me aqane hamë ini së.
NYIMA 2 Iehova La Ëje i Cilie
^ Nemene la hnying ka ketr la nöjei atr me nöjei angela asë? Pine nemene matre ka sisitria la hnying celë, nge nemene la nyine tro sa kuca? Nyipiewekë troa sa la lue hnying celë matre acatrene la aqane imelekeu së me Iehova.
^ Önine la itre itusi së ekö ka hape, tha nyipiewekë kö troa “ahmitrötrën” la ëje i Iehova. Pine nemen? Pine laka, pëkö ka qaja ka hape, tha meköti kö e troa hë Nyidrë tune lai. Ngo hna ahnyipixene la aqane trotrohnine së la mekun celë, ngöne lo icasikeu katru lo 2017. Önine lai ciaman: “Tha ka ngazo kö troa thith me sipone matre troa ahmitrötrëne me awiëne la ëje i Iehova.”—Wange ju la JW Télédiffusion ne Januare 2018 qene Wiwi. Tro jë ngöne jw.org®, BIBLIOTHÈQUE > JW TÉLÉDIFFUSION.
