IBUOTIKỌ UKPEPN̄KPỌ 23
“Yak Ẹnam Enyịn̄ Fo Asana”
“O Jehovah, enyịn̄ fo ebịghi ke nsinsi.”—PS. 135:13.
ỌYỌHỌ IKWỌ 10 Kwọ Itoro Nọ Jehovah Abasi Nnyịn!
SE IDIKPEPDE *
1-2. Mme n̄kpọ ewe ẹnen̄ede ẹbehe Mme Ntiense Jehovah?
NDIWỤT ke Jehovah enyene unen ndikara onyụn̄ odot ndikere enyịn̄ oro edi ata akpan n̄kpọ emi ebehede nnyịn mfịn. Nnyịn Mme Ntiense Jehovah imesima ndineme mme n̄kpọ emi.
2 Se ikpepde ke Bible anam ikụt ke ana ẹnam enyịn̄ Abasi asana. Imokụt n̄ko ke ana ẹwụt ke Jehovah odot ndikara, m̀mê ke usụn̄ emi enye akarade ọfọn akan. N̄kpọ mbiba emi ẹdi akpan n̄kpọ. Edi ndi mmọ ẹdi nsio nsio n̄kpọ? Ihih.
3. Enyịn̄ Jehovah esịne nso?
3 Enyịn̄ Jehovah esịne kpukpru n̄kpọ emi aban̄ade Abasi nnyịn, onyụn̄ esịne nte enye akarade. Ntre edieke idọhọde ke ndinam enyịn̄ Jehovah asana edi akpan n̄kpọ akan, ọwọrọ idọhọ n̄ko ke ana ẹwụt ke nte Jehovah akarade ọfọn akan. Jehovah edi Akakan Andikara, ndien enyịn̄ esie anam ẹkụt nte ukara esie etiede.—Se ekebe emi “ Nso ye Nso Isịne ke Akpan N̄kpọ Emi Ebehede Nnyịn?”
4. Nso ke Psalm 135:13 etịn̄ aban̄a enyịn̄ Abasi? Mme mbụme ewe ke idibọrọ ke ibuotikọ emi?
4 Enyịn̄ Jehovah inyeneke mbiet. (Kot Psalm 135:13.) Nso inam enyịn̄ Abasi enen̄ede edi akpan n̄kpọ? Ini ewe ke ẹkebem iso ẹbiat enyịn̄ oro? Didie ke Abasi anam enyịn̄ esie asana? Didie ke ikeme ndin̄wam ẹnam enyịn̄ Abasi asana? Ẹyak ibọrọ mme mbụme emi.
SE INAMDE ENYỊN̄ EDI AKPAN N̄KPỌ
5. Nso ke ndusụk owo ẹkeme ndibụp mmọ ẹma ẹkop ke ana ẹnam enyịn̄ Abasi asana?
5 “Yak ẹnam enyịn̄ fo asana.” (Matt. 6:9) Jesus ọkọdọhọ ke akpana emi etiene esịne ke mme akpan n̄kpọ emi iben̄ede ke akam. Nso ke ikọ Jesus oro ọwọrọ? Ndinam n̄kpọ asana ọwọrọ nditre ndiyak ẹsabade n̄kpọ oro m̀mê ndiyak ndek otụk. Ndusụk owo ẹkeme ndibụp ẹte: ‘Enyịn̄ Jehovah asasana nan̄a, ntak oyomde ẹfiak ẹnam asana-a?’ Man ibọrọ mbụme emi, oyom ifiọk mme n̄kpọ emi enyịn̄ adade aban̄a.
6. Nso inam enyịn̄ edi akpan n̄kpọ?
6 Enyịn̄ esịne n̄kpọ akan se ẹwetde ke n̄wed m̀mê se ẹkotde owo. Bible ọdọhọ ete: “Ọfọn ndimek eti enyịn̄ akan ediwak inyene.” (N̄ke 22:1; Eccl. 7:1) Nso inam enyịn̄ enen̄ede edi akpan n̄kpọ? Enyịn̄ esịne utọ owo emi andikere enyịn̄ oro edide m̀mê se mme owo ẹsikerede ẹban̄a enye. Ntre nte ẹwetde enyịn̄ m̀mê nte ẹsikotde inen̄ekede idi akpan n̄kpọ. Se inen̄erede idi akpan n̄kpọ edi se mme owo ẹsikerede ini mmọ ẹkụtde m̀mê ẹkopde enyịn̄ oro.
7. Didie ke ẹbiat Abasi enyịn̄?
7 Ke ini mme owo ẹsude nsu ẹdian Jehovah, mmọ ẹdomo ndinam mme owo ẹkere ndiọi n̄kpọ ẹban̄a enye. Oro esinam mme owo ẹduọhọ Abasi ẹnyụn̄ ẹbiat enye enyịn̄. Akpa ini emi ẹkebiatde Abasi enyịn̄ ẹnyụn̄ ẹnamde ẹkere ndiọi n̄kpọ ẹban̄a enye ekedi ke In̄wan̄ Eden. Ẹyak ise se ikemede ndikpep mban̄a oro.
AKPA INI EMI ẸKEBIATDE ABASI ENYỊN̄
8. Nso ke Adam ye Eve ẹkediọn̄ọ? Mme mbụme ewe ke ikeme ndibụp?
8 Adam ye Eve ẹma ẹdiọn̄ọ enyịn̄ Jehovah, ẹnyụn̄ ẹdiọn̄ọ mme akpan n̄kpọ emi ẹban̄ade Andikere enyịn̄ oro. Mmọ ẹma ẹdiọn̄ọ ke Enye edi Andibot, ke Enye ọkọnọ mmimọ uwem, ye ediye Paradise emi mmimọ idụn̄de. Adam ama ọdiọn̄ọ n̄ko ke Enye ọkọnọ imọ mfọnmma an̄wan, Eve onyụn̄ ọdiọn̄ọ ke Enye ọkọnọ imọ mfọnmma ebe. (Gen. 1:26-28; 2:18) Edi ndi mmọ ẹyeka iso ẹtie ẹkere kpukpru n̄kpọ emi Jehovah akanamde ọnọ mmọ? Ndi mmọ ẹyeka iso ẹma ẹnyụn̄ ẹkọm Andikere enyịn̄ oro? Ẹma ẹkụt ibọrọ mme mbụme emi ini asua Abasi okodomode mmọ.
9. Nso ke Jehovah ọkọdọhọ Adam ye Eve ke Genesis 2:16, 17 ye 3:1-5? Didie ke Satan okoyụrọde se Jehovah eketịn̄de?
9 Kot Genesis 2:16, 17 ye 3:1-5. Satan ama ada urụkikọt obụp Eve ete: “Nte enen̄ede edi akpanikọ ke Abasi ọkọdọhọ mbufo ẹkûdia kpukpru eto ke in̄wan̄ emi?” Ukem nte ibọkn̄kpa ekemede ndidịbe ke udia, mbụme oro ama esịne nsu kiet emi ọsọn̄de ndidiọn̄ọ. Abasi ọkọdọhọ mmọ ẹdia kpukpru mfri eto ke in̄wan̄ oro, edi akpan mmọ eke eto kiet. Ediwak nsio nsio mfri ẹma ẹdu ke in̄wan̄ oro se Adam ye Eve ẹkpekediade. (Gen. 2:9) Oro owụt ke Jehovah atat ubọk etieti. Edi ama enyene eto kiet emi Abasi ọkọdọhọde mmọ ẹkûdia mfri esie. Ọwọrọ mbụme Satan oro ama oyụrọde se Jehovah eketịn̄de. Enye akanam etie nte Jehovah itatke ubọk. Ekeme ndidi Eve ama ekere ete: ‘Okûdi enyene eti n̄kpọ emi Abasi mînọhọ mi?’
10. Didie ke Satan akabiat Abasi enyịn̄ idịpke inua? Nso ke oro akada edi?
10 Ini Satan okobụpde mbụme oro, Eve okosụk ososụk ibuot ọnọ Jehovah. Enye ama ọdọhọ Satan ibet oro Abasi ọkọnọde mmọ; ibet oro ama onyụn̄ an̄wan̄a Eve. Enye ama akam ọdọhọ n̄ko ke ẹkedọhọ mmimọ ikûtụk eto oro. Enye ama ọdiọn̄ọ ke Abasi ọkọdọhọ ke mmimọ ikpadia mfri eto oro, ke iyakpa. Edi Satan ama ọdọhọ enye ete: “Mbufo idikpaha.” (Gen. 3:2-4) Satan ikanamke n̄kpọ n̄kari n̄kari aba. Enye ama abiat Abasi enyịn̄ idịpke-dịp inua aba, onyụn̄ ọdọhọ Eve n̄kpọ emi anamde etie nte Jehovah edi osu nsu. Ntem ke Satan akakabade devil, m̀mê ọdọk-edidọk. Satan ama enen̄ede abian̄a Eve; Eve ama enịm se Satan etịn̄de. (1 Tim. 2:14) Enye ama enịm ikọ Satan akan eke Jehovah. Oro ama anam emem Eve utom ndibiere ndisọn̄ ibuot ye Jehovah; ata akpatre idiọk n̄kpọ ke enye ekebiere oro. Enye ama adia mfri eto oro Jehovah akakpande enye ndidia. Ekem enye ama ọnọ Adam etiene adia.—Gen. 3:6.
11. Nso ke Adam ye Eve ẹkpekenam? Nso ke mmọ mîkanamke?
11 Kere se Eve ọkpọkọbọrọde Satan. Da nte ke Eve ama ọdọhọ Satan ete: “Ndiọn̄ọke fi, ndiọn̄ọ Jehovah Ete mi. Mmama enye nnyụn̄ mbuọt idem ye enye. Enye ọnọ mi ye Adam ebe mi kpukpru se inyenede. Asan̄a didie etịn̄ utọ idiọk ikọ oro ye Ete mi? Daha mi!” Ekpekenem Jehovah etieti ndikop edima eyen esie etịn̄de utọ ikọ oro man owụt ke imọ ima Ete imọ ata ima! (N̄ke 27:11) Edi Eve ikamaha Jehovah ata ima; Adam okonyụn̄ etie kpa ntre. Sia mmọ mîkamaha Ete mmọ ata ima, mmọ iketịn̄ke n̄kpọ ndomokiet ndidorode enye uyo ini Satan akabiatde enye enyịn̄.
12. Nso ke Satan akanam Eve eyịk? Nso ke Adam ye Eve mîkanamke?
12 Nte ima ikokokụt, akpa n̄kpọ emi Satan akanamde man abiat Jehovah enyịn̄ ekedi ndidomo ndinam Eve eyịk m̀mê Jehovah edi eti Ete. Edi Adam ye Eve ikodomoke ndidorode Jehovah uyo ini Satan osude utọ idiọk nsu oro odori Jehovah. Oro akanam emem mmọ utom ndikop uyo Satan nnyụn̄ nsọn̄ ibuot ye Jehovah. Ukem se Satan anamde mfịn edi oro. Enye osu nsu man abiat Jehovah enyịn̄. Isisọn̄ke mbon emi ẹnịmde nsu Satan ndisịn eti ukara Jehovah.
JEHOVAH ANAM ENYỊN̄ ESIE ASANA
13. Didie ke Ezekiel 36:23 anam ikụt akpan etop emi esịnede ke Bible?
13 Ndi Jehovah ododop ese nte ẹbiatde enye enyịn̄, inamke n̄kpọ ndomokiet? Ihih-o! Ofụri Bible etịn̄ se Jehovah anamde man owụt ke ndiọi n̄kpọ emi ẹketịn̄de ẹban̄a enye ke In̄wan̄ Eden ẹkedi nsu. (Gen. 3:15) Imekeme ndidọhọ ke akpan etop emi esịnede ke Bible edi ke Jehovah ada Obio Ubọn̄ emi Eyen esie akarade anam enyịn̄ esie asana, oyonyụn̄ anam edinen ido ye emem ẹfiak ẹdu ke isọn̄ emi. Enyene mme n̄kpọ emi Bible etịn̄de emi anamde an̄wan̄a nnyịn nte Jehovah anamde enyịn̄ esie asana.—Kot Ezekiel 36:23.
14. Didie ke nte Jehovah akanamde n̄kpọ ini ẹkesọn̄de ibuot ye enye ke In̄wan̄ Eden anam enyịn̄ esie asana?
14 Satan anam ofụri se enye ekekeme man se Jehovah aduakde okûsu. Edi Satan okpu, afiak okpu. Bible owụt se Jehovah anamde, oro owụtde ke enye enen̄ede edi edima Ete ye mfọnn̄kan Andikara. Imọdiọn̄ọ ke nsọn̄ibuot Satan ye eke kpukpru mbon oro ẹdade ye enye abiak Jehovah etieti. (Ps. 78:40) Edi se Jehovah anamde aban̄a oro owụt ke enye enyene ọniọn̄, enyene ime, onyụn̄ edi Abasi unenikpe. Jehovah onyụn̄ owụt akwa odudu esie ke usụn̄ emi owo mîkemeke ndibat. Edi se idide akpan n̄kpọ ikan edi ke kpukpru se enye anamde ẹwụt ke enye ama nnyịn. (1 John 4:8) Jehovah ke akaka iso ndinam enyịn̄ esie asana.
Satan ama osu nsu ọnọ Eve aban̄a Jehovah, Devil ke onyụn̄ aka iso ndibiat Abasi enyịn̄ ke ediwak isua idahaemi (Se ikpehe 9-10, 15) *
15. Didie ke Satan abiat Abasi enyịn̄ mfịn? Nso ke oro anam mme owo ẹnam?
15 Satan osụk ababiat Abasi enyịn̄. Enye esidomo ndinam mme owo ẹyịk m̀mê Abasi enyene odudu, enyene ọniọn̄, ama mme owo, onyụn̄ edi Abasi unenikpe. Usụn̄ kiet edi enye ndisidomo ndinam mme owo ẹnịm ke idịghe Jehovah okobot kpukpru n̄kpọ. Edieke mme owo ẹnyụn̄ ẹnịmde ke Abasi odu, Satan esidomo ndinam mmọ ẹnịm ke nte Abasi anamde n̄kpọ ye mme owo ifọnke, ke nte Enye ọdọhọde idu uwem ọbọbọp owo. Enye akam ekpep mme owo ke Jehovah edi Abasi ibak emi esifọpde mme owo ke ikan̄ hell. Mme owo ẹma ẹnịm utọ ndiọi nsu oro, idisọn̄ke mmọ ndisịn eti ukara Jehovah. Satan edisụk ikaka iso ibiat Jehovah enyịn̄ tutu Jehovah osobo enye; enye oyonyụn̄ odomo ndinam fi ọkpọn̄ Jehovah. Ndi ayayak enye abian̄a fi?
NTE EMI EBEHEDE FI
16. Nso ke afo ekeme ndinam emi Adam ye Eve mîkanamke?
16 Kpa ye emi nnyịn mîfọnke ima, Jehovah ayak nnyịn itiene in̄wam inam enyịn̄ esie asana. Oro ọwọrọ ke imekeme ndinam se Adam ye Eve mîkanamke. Kpa ye oro ediwak owo ke ererimbot emi ẹsisụn̄ide enyịn̄ Jehovah ẹnyụn̄ ẹbiatde enye enyịn̄, afo emekeme ndinyene uko nnam mme owo ẹdiọn̄ọ akpanikọ ke Jehovah edi edisana, enen, ọfọn, onyụn̄ ama mme owo. (Isa. 29:23) Afo emekeme ndiwụt ke imoyom enye akara imọ. Emekeme ndin̄wam mme owo ẹkụt ke idụhe ukara ndomokiet emi ọfọnde nte ukara Jehovah, ke ukara esie kpọt edinam kpukpru owo ke isọn̄ ẹkop inemesịt ẹnyụn̄ ẹdu ke emem.—Ps. 37:9, 37; 146:5, 6, 10.
17. Didie ke Jesus akanam ẹdiọn̄ọ enyịn̄ Ete esie?
17 Ima inam mme owo ẹkụt ke se ẹtịn̄de ẹban̄a Jehovah inenke, Jesus Christ ke ikpebe oro. (John 17:26) Didie ke Jesus akanam ẹdiọn̄ọ enyịn̄ Ete esie? Enye ama esisiak enyịn̄ Ete esie onyụn̄ anam mme owo ẹdiọn̄ọ utọ owo emi Jehovah enen̄erede edi. Ke uwụtn̄kpọ, enye ama abiat nsio nsio n̄kpọ emi mme Pharisee ẹkekpepde, emi akanamde etie nte Jehovah oyom nnyịn inam se isọn̄de ikan nnyịn, ọsọn̄ ido, ikpereke nnyịn, isinyụn̄ ituaha owo mbọm. Jesus ama an̄wam mme owo ẹkụt ke Ete esie iyomke inam se isọn̄de ikan nnyịn, ke enye enyene ime, ama nnyịn, esinyụn̄ efen nnyịn. Enye ndikenen̄ede n̄kpebe mme edu Ete esie ke se enye akanamde ke usen ke usen ama an̄wam mme owo ẹkụt nte Jehovah etiede.—John 14:9.
18. Didie ke ikeme ndiwụt ke ndiọi n̄kpọ emi ẹtịn̄de ẹban̄a Jehovah ẹdi nsu?
18 Ukem nte Jesus, imekeme ndidọhọ mme owo se idiọn̄ọde iban̄a Jehovah, ikpep mmọ ke Jehovah edi Abasi emi amade nnyịn onyụn̄ ọfọnde ido. Ima inam ntem, imanam ẹkụt ke ndiọi n̄kpọ emi mme asua ẹtịn̄de ẹban̄a Jehovah ẹdi nsu. Ima in̄wam mme owo ẹda enyịn̄ Jehovah ke edisana, imanam enyịn̄ oro asana. Imonyụn̄ ikeme ndikpebe Jehovah kpa ye oro nnyịn mîfọnke ima. (Eph. 5:1, 2) Ke ini se inamde ye se itịn̄de ẹnamde mme owo ẹkụt utọ Abasi emi Jehovah enen̄erede edi, iman̄wam ndinam enyịn̄ esie asana. Ima inam mme owo ẹdiọn̄ọ akpanikọ ẹban̄a Jehovah, iwụt ke enye odot ndikere enyịn̄ oro. * Imetiene inam enyịn̄ Jehovah asana edieke nnyịn emi mîfọnke ima isọn̄ọde ida ye Enye.—Job 27:5.
Iyom ndin̄wam mbon emi ikpepde Bible ẹkụt ke Jehovah ama nnyịn onyụn̄ ọfọn ido (Se ikpehe 18-19) *
19. Didie ke Isaiah 63:7 an̄wam nnyịn ifiọk se ikpenen̄erede ibehe nnyịn ini ikpepde mme owo Bible?
19 Yak ise n̄kpọ en̄wen emi ikemede ndinam man inam enyịn̄ Jehovah asana. Ima ikpep mme owo akpanikọ Bible, imesiwak ndisọn̄ọ ntịn̄ ke Jehovah odot ndikara ofụri ekondo; ata akpanikọ onyụn̄ edi oro. Kpa ye emi edide akpan n̄kpọ ndikpep mme owo ẹnịm ibet Abasi, se inen̄erede ibehe nnyịn edi ndin̄wam mme owo ẹma Ete nnyịn Jehovah ẹnyụn̄ ẹsọn̄ọ ẹda ye enye. Ana inam mme owo ẹdiọn̄ọ nti edu Jehovah, inen̄ede inam mmọ ẹkụt utọ Owo emi Jehovah edide. (Kot Isaiah 63:7.) Nnyịn ndinam emi ayan̄wam mmọ ẹma Jehovah ẹnyụn̄ ẹkop uyo esie ke ntak emi mmọ ẹyomde ndisọn̄ọ nda ye enye.
20. Nso ke idineme ke ibuotikọ emi etienede?
20 Didie ke ikeme ndikụt ete ke edu uwem nnyịn ye se ikpepde mme owo anam mmọ ẹkere nti n̄kpọ ẹban̄a enyịn̄ Jehovah, onyụn̄ anam mmọ ẹkpere enye? Iyọbọrọ mbụme emi ke ibuotikọ oro etienede.
ỌYỌHỌ IKWỌ 2 Jehovah Edi Enyịn̄ Fo
^ ikp. 5 Nso akpan n̄kpọ ibehe kpukpru mme angel ye mme owo? Nso inam enye edi ata akpan n̄kpọ ntre? Anam didie ebehe nnyịn? Ndidiọn̄ọ ibọrọ mme mbụme emi ye mme mbụme eken emi ẹsan̄ade n̄kpọ ye akpan n̄kpọ emi ẹyen̄wam nnyịn inen̄ede ikpere Jehovah.
^ ikp. 18 Ima isiwet ke mme n̄wed nnyịn ke ufọn idụhe ndidọhọ yak ẹwụt ke Jehovah enyene unen ndikere enyịn̄ oro sia idụhe eke afan̄ade oro. Edi ẹma ẹnam n̄kpọ emi enen̄ede an̄wan̄a ke mbono ofụri isua Watch Tower Bible and Tract Society of Pennsylvania eke 2017. Etieibuot okpokoro mbono oro ọkọdọhọ ete: “Idiọkke ndibọn̄ akam nte yak ẹnam mme owo ẹkụt ke Abasi enyene unen onyụn̄ odot ndikere Jehovah, sia ọfọn ẹtre ndibiat enye enyịn̄.”—Se edinam TV nnyịn eke January 2018 ke jw.org®. Ka SE ẸDỌN̄DE > EDINAM TV MME NTIENSE JEHOVAH.
