1-2. Na ulutaga cava era taleitaka na iVakadinadina i Jiova mera veivosakitaka?

E RUA na ile bibi e vauci keda tiko nikua—na veiliutaki cecere i Jiova kei na vakalasui ni veika e vakalewai kina. Eda dau taleitaka na iVakadinadina i Jiova meda veivosakitaka na ulutaga va qori. Ia e sega ni kena ibalebale qo meda vakaduiduitaka na veiliutaki cecere ni Kalou kei na vakarokorokotaki ni yacana. E dua tiko ga na kedrau ibalebale.

² Eda sa raica ni dodonu ga me vakarokorokotaki na yaca ni Kalou, me kua ni beitaki ena dua na ka. Eda kila tale ga ni vinakati me vakadinadinataki ni vinaka duadua na veiliutaki i Jiova. Qori e bibi sara ga vei keda, dodonu tale ga meda kauai kina.

3. Na cava e okati ena yaca i Jiova?

³ Na yaca Jiova e vauci kece kina na veika me baleta na Kalou, okati kina na ivakarau ni nona veiliutaki. Nida kaya gona ni bibi meda vakalasuya na veika e vakalewai kina na yaca i Jiova, eda vakaraitaka sara tiko ga ni dodonu me vakadinadinataki ni vinaka duadua na nona veiliutaki. E veisemati voleka na yacana kei na ivakarau ni nona veiliutaki, ni Kalou Kaukaua Duadua, e Turaga Cecere tale ga.—Raica na kato “ Ka e Okati ena iLe Bibi.”

4. E vakamacalataka vakacava na Same 135:13 na yaca ni Kalou? Na taro cava ena saumi?

⁴ E duatani na yaca i Jiova. (Wilika Same 135:13.) Na cava e rui bibi kina na yaca ni Kalou? A vakaucacataki vakacava ena imatai ni gauna? Ena vakarokorokotaka vakacava  na Kalou na yacana? Eda na tutaka vakacava? Meda sauma mada na vica na taro qori.

5. Na cava eda na rairai vaqaqa nida vakasamataka na vakarokorokotaki ni yaca ni Kalou?

⁵ “Me vakarokorokotaki na yacamuni.” (Maciu 6:9) Qori na ka e vakabibitaka o Jisu ena nona masu. Ia na cava e vakaibalebaletaka? Ni vakarokorokotaki e dua na ka, e kena ibalebale ni vakasavasavataki se me uasivi. Era na rairai vaqaqa eso, ‘Sega ni sa macala tu ga ni savasava na yaca i Jiova, e uasivi tale ga?’ Me saumi na taro qori, ena vinakati meda vakasamataka na veika e vauci ena dua na yaca.

6. E bibi vakacava na yaca?

⁶ Na yaca e sega ni vauci ga kina na kena ivolavolai se icavucavuti. Dikeva mada na ka e tukuna na iVolatabu: “Me digitaki na yaca rogo vinaka me kua na iyau levu.” (Vkai. 22:1; Dauv. 7:1) Na cava e vakabibitaki kina va qori na yaca? Ni vauci tiko kina na kena irogorogo e dua kei na ka era nanuma eso me baleti koya. E sega ni bibi sara na kena ivolavolai se kena icavucavuti—e bibi duadua o koya e vakatokai vua na yaca qori kei na nodra rai eso tale nira rogoca na yacana.

7. E vakarogorogocataki vakacava na yaca ni Kalou?

⁷ E vakarogorogocataki o Jiova ni vakatetei na itukutuku lasu me baleti koya. Ni yaco qori, e kena inaki ga me vakarogorogocataki na yacana. Na imatai ni gauna e yaco kina qori, oya ena itekitekivu ni bula ni kawatamata. Dikeva mada na ka e yaco.

8. Na cava erau kila o Atama kei Ivi? Na taro cava e basika?

⁸ Erau kila vinaka o Atama kei Ivi na yaca i Jiova, vaka kina na veika dina me baleti koya e vakatokai kina. Erau kila ni Dauveibuli, e ivurevure ni nodrau bula, e vakarautaka nodrau itikotiko ena Parataisi totoka, me rau isa ni vakawati uasivi tale ga. (Vkte. 1:26-28; 2:18) Vakacava, rau na vakayagataka tiko ga na nodrau vakasama uasivi me rau vakananuma vakatitobu na veika e cakava vei rau o Jiova? Rau na saga me rau lomani Jiova vakalevu, me rau dokai koya tale ga? E qai matata na kena isau ni temaki rau na meca ni Kalou.

9. Na cava e tukuna o Jiova vei rau na imatai ni veiwatini ena Vakatekivu 2:16, 17 kei na 3:1-5? E qaseqasetaka vakacava o Setani na nona taro?

 ⁹ Wilika Vakatekivu 2:16, 17 kei na 3:1-5. E vakayagataka o Setani e dua na gata me vosa vei Ivi, e taroga vua: “E kaya sara ga na Kalou mo drau kua ni kana mai na vunikau kece e tu ena were?” Na taro qori e vakavotui kina na lasu qaseqase e vaka na poisoni e vunitaki tu. A tukuna na Kalou ni rawa ni rau kana ena vunikau kece, vakavo ga e dua. E sega ni tukuni rawa na levu ni vunikau e rawa ni rau kana kina. (Vkte. 2:9) Dua dina na Kalou daulomasoli o Jiova. Ia e dua na vunikau e vakatabuya. Na taro gona i Setani e moica vaqaseqase na ka dina. E vaka me tukuna tiko ni sega ni daulomasoli na Kalou. E rairai vaqaqa gona o Ivi, ‘E bureitaka tiko vei au o Jiova e dua na ka vinaka?’

10. E vakaucacataka vakacava o Setani na yaca ni Kalou? Na cava e yaco kina?

¹⁰ Na gauna e taro kina o Setani, a kila tiko o Ivi ni nona iLiuliu o Jiova. E tukuna vei Setani na ka e vakarota vua na Kalou. E kaya mada ga ni sega ni dodonu me rau tara na vunikau vakatabui. E kila ni vakarota na Kalou ni rau na mate ke rau talaidredre. Ia e kaya o Setani: “Drau na sega dina ni mate.” (Vkte. 3:2-4) E sega wale ga ni tukuna o Setani ni lasu o Jiova. Qo sa vakaucacataka sara tiko ga na yaca ni Kalou ni tukuna tiko vei Ivi ni lasulasu o Jiova. E yaco kina o Setani me Tevoro, se dauvakaucaca. E vakacalai Ivi sara ga o Setani, mani vakabauti koya. (1 Tim. 2:14) Sa nuitaki Setani vakasivia, sega ni o Jiova. Oya na vuna e totolo kina nona vakatulewa ca o Ivi. E talaidredre vei Jiova ni kania na vuanikau e vakatabuya. Oti e solia tale ga eso vei Atama.—Vkte. 3:6.

11. Na cava a rawa ni rau cakava o Atama kei Ivi? Cava erau sega ni cakava?

¹¹ Vakasamataka mada na ka e dodonu me tukuna o Ivi vei Setani, vakacava ke tukuna qo: “Au sega ni kilai iko, au kilai Tamaqu ga o Jiova, au lomani koya, au nuitaki koya tale ga. E solia tu vei au kei Atama na ka kece. Sa dua na ka nomu mai via vakaucacataki koya? Lako tani!” Ena marau mada ga o Jiova ke rogoca ni vosa va qori na luvena yalewa lomani! (Vkai. 27:11) Ia e sega ni dei na loloma i Ivi se o Atama. Ni rau sega ni lomani Tamadrau, rau sega ni tutaka na yacana ni vakaucacataki.

12. E temaki Ivi vakacava o Setani me vakatitiqa? Na cava rau sega ni cakava o Atama kei Ivi?

¹² Eda sa raica mai nona temaki Ivi o Setani me vakatitiqa. E lomatarotarotaka kina o Ivi se mataqali Tama vakacava o Jiova. Rau mani sega ni tutaka o Atama kei Ivi na yaca i Jiova kei na kena irogorogo. E rawarawa sara nona vakacalai rau o Setani me rau talaidredre vua na Tamadrau. Qori na ivadi e vakayagataka tale ga o Setani nikua. E vakalewa na yaca i Jiova ni vakaucacataka.  O ira na vakabauta na lasu i Setani, e totolo wale ga nodra vakacalai mera cata na veiliutaki dodonu i Jiova.

13. E vakamacalataki vakacava ena Isikeli 36:23 na usutu ni iVolatabu?

¹³ Vakacava o Jiova, ena vakawalena na vakaucacataki ni yacana qai sega ni vakadodonutaka? Sega, ena yavala dina! E vakabibitaki sara ga ena iVolatabu na sala e vakadodonutaka kina o Jiova na vakalewai ni yacana mai na were o Iteni. (Vkte. 3:15) Eda rawa ni kaya ni qo e usutu ni iVolatabu: O Jiova e vakarokorokotaka na yacana ni vakayagataka nona Matanitu e veiliutaki kina na Luvena, me vakalesuya mai vuravura na lewadodonu kei na bula sautu. E volai ena iVolatabu na kena itukutuku meda kila na sala ena vakarokorokotaka kina o Jiova na yacana.—Wilika Isikeli 36:23.

14. E vakarokorokotaki vakacava na yaca i Jiova ena ka e cakava?

¹⁴ E saga ena nona igu kece o Setani me tarova na inaki i Jiova. Ia e guce tu ga nona sasaga. E vakaraitaka na iVolatabu na ka sa cakava o Jiova, e vakadinadinataka ni vinaka duadua nona veiliutaki. E macala ni rarawataka vakalevu nona talaidredre o Setani kei ira nona ito. (Same 78:40) Ia e laurai nona vuku, yalovosovoso, kei na lewadodonu ena ka e cakava ni vakalewai na yacana. E vakaraitaka tale ga na nona kaukaua ena levu na sala. E talei duadua ni laurai nona loloma ena ka kece e cakava. (1 Joni 4:8) E cakacaka tiko ga o Jiova me vakarokorokotaka na yacana.

15. E vakaucacataka tiko vakacava o Setani na yaca ni Kalou nikua? Cava e yaco kina?

¹⁵ E vakaucacataka tiko ga o Setani na yaca ni Kalou nikua. E vakacalai ira e levu mera vakatitiqataka ni Kalou kaukaua o Jiova, e lewadodonu, e dauloloma. Kena ivakaraitaki, e saga o Setani mera vakabauta e levu ni sega ni Dauveibuli o Jiova. Ia ke ra mani vakabauta na Kalou, ena saga mera vakabauta tale ga ni sivia na ka e namaka, e sega ni vinaka. E vakavulica mada ga ni sega ni dauloloma o Jiova, e  Kalou ca ni dau vakamai ira na tamata e eli. Nira vakabauta na lasu qori, ena totolo ga nodra cata na veiliutaki dodonu i Jiova. Ena vakaucaca tiko ga o Setani me yacova ni vakarusai, ena temaki iko mada ga. Vakacava ena qaqa?

16. Na cava o rawa ni cakava?

¹⁶ E vakatara o Jiova meda vakaitavi tale ga na kawa ivalavala ca ena vakarokorokotaki ni yacana. O rawa sara ga ni cakava na ka erau sega ni cakava rawa o Atama kei Ivi. Eda bula tu qo ena vuravura era lewena e levu na dau vakaucacataka na yaca i Jiova, era beci koya tale ga. Ia o rawa ni vakayagataka na gauna qori mo vakamacalataka kina na ka dina—oya ni o Jiova e yalosavasava, yalododonu, vinaka, e dauloloma tale ga. (Aisea 29:23) O rawa ni tokona nona veiliutaki. O rawa sara ga ni tukuna yani ni qo duadua ga na veiliutaki e tutaka na lewadodonu, ena kauta tale ga mai na vakacegu kei na marau vei ira kece na ibulibuli.—Same 37:9, 37; 146:5, 6, 10.

17. E vakatakila vakacava o Jisu na yaca i Tamana?

¹⁷ Eda vakatotomuria na ivakaraitaki i Jisu Karisito nida tutaka na yaca i Jiova. (Joni 17:26) A vakatakila na yaca i Tamana ni vakayagataka, e vakavulica tale ga na veika me baleti koya. Kena ivakaraitaki, e vakadodonutaki ira na Farisi nira tukuna ni o Jiova e voravora, yalodredre, sega ni veikauaitaki se dau veivosoti. E vakavulica e levu mera kila ni dauyalorawarawa o Tamana, e dauvosovoso, dauloloma, dauveivosoti tale ga. E vukei ira mera kilai Jiova ni vakatotomuria vinaka na nona itovo ena nona bula e veisiga.—Joni 14:9.

18. Eda rawa ni vakadodonutaka vakacava na lasu me baleti Jiova kei na nona vakaucacataki?

¹⁸ Eda rawa ni vakatotomuri Jisu nida vakavulica na veika me baleti Jiova, oya ni Kalou dauloloma, e yalovinaka. Nida cakava qori eda vakadodonutaka na lasu e tukuni me baleti koya kei na nona vakaucacataki. Eda vakarokorokotaka na yacana, mera kila e levu ni savasava. Eda ivalavala ca, ia eda rawa ni vakatotomuri Jiova. (Efeso 5:1, 2) Nida vakaraitaka na veika dina me baleti Jiova ena noda vosa kei na itovo, eda sa vakarokorokotaka tiko na  yacana. Eda vakalasuya na veika e vakalewai kina na yacana nida vakavulici ira e levu mera kila na ka dina. * Eda vakaraitaka tale ga nida rawa ni yalodina na kawa ivalavala ca.—Jope 27:5.

19. E yaga vakacava na Aisea 63:7 meda kila kina na inaki levu ni noda veivakavulici?

¹⁹ Dikeva e dua tale na ka bibi eda rawa ni cakava. Nida veivakavulici, eda dau vakabibitaka na dodonu ni veiliutaki ni Kalou, ni tu vei Jiova na dodonu me liutaka na vuravura. E donu vinaka qori. E macala ni bibi meda vakavulica na lawa ni Kalou vei ira eso tale. Ia e bibi sara meda tuberi ira mera lomani Jiova na Tamada, mera yalodina tale ga vua. E vinakati gona meda vakabibitaka na itovo talei i Jiova kei na ka e kilai kina. (Wilika Aisea 63:7.) Nida veivakavulici va qori, eda sa vukei ira tiko mera lomani Jiova, mera talairawarawa nira via yalodina vua.

20. Na cava ena veivosakitaki ena ulutaga tarava?

²⁰ Eda na qarauna vakacava noda itovo kei na noda veivakavulici me vinaka kina na irogorogo ni yaca i Jiova, mera torovi koya kina eso tale? Ena saumi na taro qori ena ulutaga tarava.