AWTIK POU ÉTIDYÉ 23
« Fò non a-w vin sen ! »
« O Jéova, non a-w la pou touttan » (SÒM 135:13).
KANTIK 10 Louons Jéhovah, notre Dieu !
ON TI LIDÉ ASI SA NOU KAY VWÈ *
1-2. Ki kèsyon ki vréman enpòwtan pou sèwvitè a Jéova ?
NI 2 KÈSYON ki ka konsèwné-nou : « Ès sé Bondyé ki andwa gouvèné ? » é « Kijan i ka fè non a-y vin sen ? ». Antankè sèwvitè a Bondyé, nou enmé palé dè sé sijé-lasa ki vréman entérésan é ki enpòwtan toubònman. Men èskè sé 2 sijé diféran ki pa ni ayen a vwè yonn èvè lòt ? Awa !
2 Nou ja byen konprann kè fò non a Bondyé vin sen. Nou sav osi kè fò toutmoun sav kè sé Jéova ki andwa gouvèné, kivédi fò toutmoun vwè kè sé méyè dirijan nou pé ni. Fò-nou pran tan ègzaminé sé 2 kèsyon-lasa byen menm.
3. Ka nou ka touvé adan non a Bondyé, « Jéova » ?
3 Adan non a « Jéova », nou ka touvé tousa ki anrapò èvè-y, kivédi, jan-la i ka gouvèné la adan osi. Kifè, lè nou ka di kè sa ki pi enpòwtan sé kè non a Bondyé vin sen, sé konsi nou ka di kè i andwa gouvèné (gadé ti karé-la « On sijé enpòwtan ki ni plizyè kèsyon adan-y »).
4. Ka Sòm 135:13 ka di anrapò èvè non a Bondyé, é a ki kèsyon nou ké réponn adan awtik-lasa ?
4 Non a Bondyé sé on non ki vréman èspésyal (li Sòm 135:13). Ka ki ka fè kè i enpòwtan konsa ? Kitan yo manti asi-y pou prèmyé fwa ? Kijan Bondyé ké fè non a-y vin sen ? É ka nou pé fè pou nou édé-y défann-li ? Nou ké réponn a sé kèsyon-lasa.
ON NON KI ENPÒWTAN TOUBÒNMAN
5. Ki kèsyon sèwten moun pé ka pozé-yo ?
5 « Fò non a-w vin sen » (Mat. 6:9). Jézi di kè fò-nou priyé pousa pas sé yonn adan sé biten pli enpòwtan la. Men ka sé pawòl-lasa vé di ? Fè on biten vin sen, sé fè-y vin pwòp. Ni dé moun ki ké di : « Men piskè non a Bondyé ja sen, poukwa fò i vin sen ankò ? Pou réponn a kèsyon-lasa, fò-nou chèché a sav ki valè on non pé ni.
6. Ka ki ka fè kè on non ni valè ?
6 On non a pa enki déotwa lèt kè ou ka mèt yonn dèyè lòt asi on fèy oben kè ou ka di an bouch a-w. Mi sa Labib ka di : « Préféré ou ni on bon répitasyon [oben sèlon nòt-la : « on non »] ki ou ni onpakèt richès » (Pwov. 22:1 ; Ékl. 7:1). Alò, ka ki ka fè kè on non ni tousa valè ? Pas non a on moun ka fè-w sonjé kijan dè moun i yé é sa lézòt ka di asi-y. Kifè, sa ki pli enpòwtan, a pa jan non-la ka maké oben jan yo ka di-y men sé sa ki ka vin an lèspri a toutmoun lèwvwè yo ka tann non-lasa oben lè yo ka vwè-y maké on koté.
7. Kijan sèwten moun ka sali non a Bondyé ?
7 Lèwvwè moun ka di bétiz asi Jéova, yo ka sali répitasyon a-y, kifè, yo ka sali non a-y osi. Prèmyé fwa on moun di bétiz asi Bondyé é éséyé sali répitasyon a-y sé té adan Jadendédèn-la. An-nou vwè ka ki pasé é ka sa ka aprann-nou.
PRÈMYÉ FWA YO SALI NON A BONDYÉ
8. Ka Adan é Èv té konnèt é ki kèsyon nou pé pozé-nou ?
8 Adan é Èv té sav kè non a Bondyé sé té Jéova. Yo té konnèt onlo biten enpòwtan asi-y osi. Pa ègzanp, yo té sav kè sé li ki kréyé toutbiten, kè sé-y ki ba-yo lavi, é kè sé-y ki ba-yo on bèl koté pou yo rété. Yo té sav osi kè sé-y ki té mayé-yo ansanm é kè moun-la yo té mayé èvè-y la té pawfè (Jén. 1:26-28 ; 2:18). Men ès yo té’é kontinyé sèvi èvè sèwvo a yo ki té pawfè pou réfléchi asi tousa Jéova té fè ba yo ? « Jéova » sé on non ki ka rèprézanté on moun ; ès yo té’é kontinyé fè lanmou a yo é rèkonésans a yo grandi pou moun-lasa ? Yo réponn on mannyè ki klè a sé kèsyon-lasa lèwvwè lènmi a Bondyé tanté-yo.
9. Sèlon Jénèz 2:16, 17 é 3:1-5, ka Bondyé di prèmyé misyé-la é prèmyé madanm-la, é ki mansonj Satan éséyé fè rantré an tèt a yo ?
9 (Li Jénèz 2:16, 17 é 3:1-5.) Satan sèvi èvè on sèwpan pou di Èv : « Ès vréman Bondyé di kè zò pa ni dwa manjé adan tout pyébwa ki an jaden-la ? » Dèyè do a kèsyon-lasa té ni on manti ki té byen kaché kon lèwvwè on moun ka mèt pwazon asi on bèl mòso pen pou tchouyé rat. An réyalité, Bondyé té di-yo kè yo té pé manjé fwi a tout sé pyébwa-la sòf fwi a onsèl. É a pa onsèl pyébwa ki té ni an jaden-la ! Té ni tout kalité pyébwa (Jén. 2:9). Jéova sé on Bondyé ki donan menm ! Pa ni pon dout asi sa ! Sé vré, Jéova té entèwdi Adan é Èv manjé adan onsèl pyébwa, men li Satan, a pa sa i di adan kèsyon-la i pozé la. Sa i di la té ka bay lenprésyon kè Bondyé pa té donan. Pétèt Èv di an tchè a-y : « Bondyé konsa i bizwen anpéché-nou ni on bon biten ! »
10. Kijan Satan sali non a Bondyé, é ki rézilta sa bay ?
10 Lèwvwè Satan pozé kèsyon-lasa, Èv té ka obéyi Bondyé toujou. Lè i réponn Satan, i di-y ègzaktèman sa Bondyé té di Adan. I jous di-y kè fò pa yo té touché pyébwa-la. Èv té sav byen kè si yo pa té kouté, li é mari a-y té’é mò pas Jéova té ja avèti-yo. Men Satan di-y konsa : « Zò pé ké pon mò » (Jén. 3:2-4). A moman-lasa, Satan di franchman kè Jéova sé on mantè. Sé konsa Satan vin Dyab, kivédi, on moun ki ka manti asi ondòt pou fè-y ditò. Satan kouyonné Èv a san pou san ; i kwè Satan (1 Tim. 2:14). I té ni plis konfyans adan Satan ki adan Jéova. É akòz dè sa, i pran pli mové désizyon on moun pé pran : i pa kouté Jéova. I manjé adan fwi a pyébwa-la Bondyé té di-y pa mannyé la. Aprésa, Adan fè menm biten ki-y (Jén. 3:6).
11. Ka Adan é Èv té’é pé fè men ka yo fè an réyalité ?
11 Pran on tan pou réfléchi asi sa Èv té dwèt di Satan. Imajiné i té di-y : « An pa konnèt-vou mwen ! Men an konnèt Pap’an mwen, Jéova. An enmé-y é an ni konfyans adan-y. Tousa nou ni, mwen é Adan, sé-y ki ban-nou-y. Poukwa ou ka malpalé-y konsa ! Pa rété la ! » A pa ti kontan Jéova té’é kontan tann pitit a-y di kè i enmé-y é kè i vé rété fidèl a-y ! (Pwov. 27:11). Men malérèzman, Èv pa té ni on lanmou sensè pou Jéova é Adan nonplis. Konm yo pa té enmé Jéova asé, lè Satan di bétiz anlè Jéova, yo pa défann Pap’a yo.
12. Kijan Satan mété dout an lèspri a Èv é kijan pou Adan é Èv té réyaji ?
12 Kon nou ni lokazyon vwè, Satan koumansé pa mété dout an lèspri a Èv. I chèché a mété an tèt a-y kè Bondyé sé on mové Papa. Sé konsa i koumansé sali répitasyon a Jéova. Malérèzman, Adan é Èv pa défann non a Bondyé. Yo té préféré kouté Satan é yo rèbélé-yo kont Pap’a yo. Jòdijou, Satan ka aji menmjan-la. I ka manti anlè Bondyé pou sali répitasyon a-y. Si on moun ka kwè adan sé mansonj-lasa, pétèt kè i pé’é dakò pou lésé Jéova gouvèné-y.
JÉOVA KA FÈ NON A-Y VIN SEN
13. Ézékyèl 36:23 ka palé dè mésaj-la ki pi enpòwtan la adan Bib-la. Ki mésaj ésa ?
13 Ou ka di Jéova ké pran yo manti asi-y é i ké rété la lébwa-kwazé ? Sa pé pa fèt anponjan ! Adan tout Bib-la, yo ka di-nou ka Jéova fè pou montré kè tout bétiz yo di asi-y adan Jadendédèn-la sé té mansonj (Jén. 3:15). An réyalité, adan Bib-la ni on mésaj ki pi enpòwtan. É si sé pou nou rézimé mésaj-lasa, mi sa nou té’é pé di : Jéova ka fè non a-y vin sen grasa wayòm-la Gason a-y ka dirijé la. É sa Jéova vé sé woumèt lapé é lajistis asi latè. Bib-la ka édé-nou konprann ka Jéova ka fè pou non a-y vin sen (li Ézékyèl 36:23).
14. Jan-la Jéova réyaji la lè yo ba-y do adan Jadendédèn-la ka fè non a-y vin sen. Kijansa ?
14 Satan ka fè tousa i pé pou i jouwé an travay a Jéova é anpéché-y réyalizé pwojé a-y. Men magré tousa i ja fè, sa pa’a maché. Labib ka montré kijan Jéova ka jéré sitiyasyon-la. É sa ka montré kè pa ni dé moun kon Pap’an nou Jéova. On biten ki klè sé kè lè Jéova ka vwè jan Satan ba-y do é kè dòt moun ka soutyenn-li, sa ka fè-y mal toubònman ! (Sòm 78:40). Magrésa, i toujou ka aji èvè sajès, èvè pasyans é èvè jistis. Anplisdisa, Jéova Toupuisan é i ka montré sa diféran mannyè. É sa ki pi enpòwtan ankò sé kè i montré lanmou a-y adan tousa i fè (1 Jan 4:8). Jéova pa jen arété travay pou non a-y vin sen.
Satan di Èv enpé mansonj asi Jéova, é aprésa, i pa jen arété manti anlè-y * (gadé sé paragraf 9, 10 é 15 la).
15. Kijan Satan ka sali non a Bondyé jòdijou é ka sa ka pòté ?
15 Jòdijou, Satan ka kontinyé sali non a Bondyé. I ka éséyé kouyonné moun. Yo sav kè Bondyé puisan, kè i jis, kè i saj é kè i plen lanmou. Men Satan bizwen fè-yo kwè kè a pa konsa Bondyé yé. Pa ègzanp, i bizwen fè-yo kwè kè a pa-y ki kréyé toutbiten. É lèwvwè on moun ka kwè an Bondyé, Satan bizwen fè-y kwè kè prensip a Bondyé pa jis é kè si i ka suiv-yo, sa ké anpéché-y viv. I jous ka anségné moun kè Jéova méchan toubònman é kè i ka fè moun brilé an lanfè. Si on moun ka kwè adan sé mansonj-lasa, sa ké pousé-y ba Jéova do é i pé’é vé lésé Jéova gouvèné-y. Touttan Bondyé po’o détwi-y, Satan ké fè tousa i pé pou sali non a Bondyé é pou fè-nou ba Jéova do. É vou, ès ou ké tchenbé ?
KI WÒL OU KA JOUWÉ ADAN GRAN KÈSYON-LASA
16. Ni on biten kè Adan é Èv pa rivé fè, men vou ou pé rivé fè-y. Ki biten ésa ?
16 Jéova vé fè non a-y vin sen. É i ka pèwmèt dé moun enpawfè pawtisipé adan sa. Donk vou, ou pé fè sa Adan é Èv pa rivé fè. Adan mond-la nou ka viv la, onlo moun ka sali non a Bondyé é yo ka di bétiz asi-y. Men, ou pé défann non a Bondyé é di moun kè Jéova sé on Bondyé ki sen, ki jis, ki bon é ki plen lanmou (Iz. 29:23). É ou pé montré toutmoun kè sé li ou chwazi konm chèf. Pa ègzanp, ou pé montré moun kè sé dominasyon a Bondyé tousèl ki jis é kè sé-y tousèl ki ké pé mèt lapé asi latè é mèt lajwa an tchè an nou (Sòm 37:9, 37 ; 146:5, 6, 10).
17. Dapré Jan 17:26, ka Jézi fè pou fè moun konnèt non a Pap’a-y ?
17 Lè nou ka défann non a Jéova, nou ka imité Jézikri (Jan 17:26). Jézi fè moun konnèt non a Pap’a-y. Kijan i fè sa ? Non sèlman i sèvi èvè non a Pap’a-y, men anplisdisa, i défann répitasyon a-y. Pa ègzanp, i montré kè i pa té dakò ditou-ditou èvè sé Farizyen-la pas yo té ka fè Jéova pasé pou on Bondyé ki rèd, ki pa ni pon pityé, ki ka mandé-nou twòp é ki pa’a gè lésé moun vin zanmi a-y. Men li Jézi, èvè ègzanp-la i lésé ban nou la, i édé moun konprann kè Pap’a-y pa’a mandé-nou fè ayen ki two fò pou nou. I montré osi kè Pap’a-y ni pasyans, kè i plen lanmou é kè i toujou paré a padonné-nou. Anplisdisa, touléjou i té ka imité kalité a Pap’a-y on mannyè ki pawfè. Kifè, lè sé moun-la té ka vwè jan i ka aji sé konsi sé Jéova yo té ka « vwè » (Jan 14:9).
18. A pa ti manti yo ja manti asi Jéova ! Ka nou pé fè pou fè moun sav sa ?
18 Kon Jézi, fò-nou fè lézòt konnèt sa nou sav asi Jéova é fò-nou èspliké-yo kè i sé on Bondyé ki bon é ki plen lanmou. Konsa, nou ké fè moun konnèt tout manti yo manti asi Bondyé. Nou ké fè non a Bondyé vin sen pas nou ké édé sé moun-la konprann kè non a Bondyé sé on non ki sen. Anplisdisa, nou pé imité Jéova é nou pé rivé fè sa menmsi nou enpawfè (Éféz. 5:1, 2). Lè sa nou ka di é sa nou ka fè ka pèwmèt sé moun-la konprann kijan dè moun Jéova yé, nou ka travay pou fè non a Bondyé vin sen osi. Lè nou ka édé sé moun-la konnèt lavérité asi Bondyé, nou ka défann non a-y. É an menm balan-la, nou ka montré kè menmsi on moun enpawfè, i pé rété fidèl a Bondyé (Jòb 27:5).
Nou vé édé étidyan an nou konprann kè Jéova sé on Bondyé ki bon é ki plen lanmou * (gadé sé paragraf 18 é 19 la).
19. Izayi 63:7 ka édé-nou konprann ka ki pi enpòwtan lè nou ka anségné moun. Kijansa ?
19 Ni ondòt biten nou pé fè pou fè non a Bondyé vin sen. Lè nou ka anségné moun vérité ki an Bib-la, byensouvan nou ka di kè, konm Jéova sé Gran Mèt a linivè, sé-y ki andwa gouvèné. É sé lavérité ! Men, menmsi sa enpòwtan kè nou fè moun konnèt lwa a Bondyé, fò-nou sonjé kè sa ki pi enpòwtan sé édé sé moun-la enmé Jéova, Pap’an nou. Fò-nou édé-yo rété fidèl a-y osi. Pousa, fò-nou pran labitid palé dè bèl kalité a Bondyé ki atiré-nou kivédi fò-nou fè-yo sav kijan dè moun i yé é fò-nou montré-yo ké sa ka korèsponn èvè non-la i ka pòté la, Jéova (li Izayi 63:7). Si nou ka anségné sé moun-la konsa, nou ké édé-yo enmé Jéova é nou ké ba-yo anvi rété fidèl a-y.
20. Ka nou ké vwè adan awtik-la ki ka vin la ?
20 Konnyéla, ka nou pé fè pou nou sèten kè konduit an nou é ansègnman an nou ka ba Jéova glwa é ka ba moun anvi vin zanmi a-y ? Sé sa nou ké vwè adan awtik-la ki ka vin la.
KANTIK 2 Ton nom est Jéhovah
^ par. 5 Ni on kèsyon ki ka konsèwné toutmoun asi latè é tout sé zanj-la osi. Kilès ? Poukwa nou ka di kè kèsyon-lasa enpòwtan konsa, é ki wòl nou ka jouwé adan sa ? Si nou ka ègzaminé kèsyon-lasa byen konm i fo, sa ké édé-nou vin pibon zanmi èvè Jéova.
^ par. 61 SA NOU KA VWÈ ASI SÉ IMAJ-LA : Dyab-la manti anlè Bondyé lè i di Èv kè Bondyé sé on mantè. Aprésa, i kontinyé di bétiz asi-y. Pa ègzanp, i ka fè moun kwè kè a pa Jéova ki kréyé-nou é kè i sé on Bondyé ki méchan toubònman.
^ par. 63 SA NOU KA VWÈ ASI SÉ IMAJ-LA : On frè ka fè on étid é i ka palé dè kalité a Bondyé onlo.
