1-2. Baikara bwaai aika rangi ni kakawaki irouia Ana Tia Kakoaua Iehova?

NI BOONG aikai, ti irekereke ma baika rangi ni kakawaki aika riain Iehova n tautaeka ao katabuan arana. Ngkai Ana Tia Kakoaua Iehova ngaira, ti kani mamaroroakin taekani baikai. Ma ti aki riai ni kaokoroa riain te Atua n tautaeka ao katabuan arana, bwa boni baika a titeboo.

² Ti bane n ataia ae e riai ni kaitiakaki aran te Atua mani kabuakakaana. Ti ataia naba ae e riai ni boutokaaki riain Iehova n tautaeka ke arona ni kairiri, bwa bon te kabanea n tamaroa. A rangi ni kakawaki baikanne ni kauoua.

3. Tera ae irekereke ma te ara ae Iehova?

³ Ni koauana, te ara ae Iehova e irekereke ma bwaai ni kabane aika kaineti ma Atuara, n ikotaki ma arona n tautaeka. Ngaia are ngkana ti taekinna bwa kaitiakan aran Iehova mani kabuakakaana bon te bwai ae moan te kakawaki, ti taekinna naba bwa e riai ni boutokaaki ana tautaeka Iehova bwa ngaia te kabanea n tamaroa. E rangi n irekereke aran Iehova ma arona n tautaeka ngkai te tia Tautaeka ae moan te mwaaka.​—Nora te bwaoki ae “ Kanoan Naba te Bwai ae Kakawaki.”

4. E kangaa Taian Areru 135:13 ni kabwarabwaraa aran te Atua, ao baikara titiraki aika ti na kaekai n te kaongora aei?

⁴ E rangi n okoro aran Iehova. (Wareka Taian Areru 135:13.) E aera ngkai e rangi ni kakawaki aran te Atua? E kangaa ni moani kabuakakaaki? E kangaa te Atua ni katabua arana? Ao ti na kangaa ni buoka kaitiakan arana? Ti na kaekai ngkai titiraki akanne.

5. Tera ae ti kona n iangoia ni kaineti ma katabuan aran te Atua?

⁵ “E bia katabuaki aram.” (Mat. 6:9) E taekinna Iesu bwa ti riai ni moanibwaia anne n ara tataro. Ma tera ae e nanonna? Katabuan te bwai teuana e nanonaki iai kaitiakana. A kona n iango ni kangai tabeman, ‘Tiaki bwa e a kaman itiaki ao n tabu aran Iehova?’ Ibukini kaekaan anne, ti riai n iangoia moa bwa tera ae irekereke ma te ara.

6. E aera ngkai e rangi ni kakawaki te ara?

⁶ Te ara bon tiaki tii manin koroboki aika koreaki n te beeba ao n taekinaki. Nora ana taeka te Baibara aei: “E riai riki rineakin te ara ae raoiroi nakon te kaubwai ae bati.” (TaeRab. 22:1; TeMin. 7:1) E aera ngkai e rangi ni kakawaki te ara? Ibukina bwa e irekereke ma taekan temanna, ke aroia tabemwaang n iangoa te aomata ane arana anne. Ngaia are e aki kakawaki aroni korean te ara ke aron taekinana, ma e kakawaki riki te baere a iangoia aomata ngkana a ongo ao n nora te ara anne.

7. A kangaa aomata ni kabuakakaa aran te Atua?

⁷ Ngkana a taekini keewe aomata ibukin Iehova, a boni kabuakakaa iai taekana. Ao ngkana a kabuakakaa taekana, a bon uaraoa iai arana. E moani kabuakakaaki aran te Atua ao taekana n te onnaroka are i Eten. Ti na nora reireiara n te bwai ane riki anne.

8. Tera ae a ataia Atam ma Ewa, ao baikara titiraki aika rio iai?

⁸ A ataa aran Iehova Atam ao Ewa, n ikotaki ma koaua aika kakawaki ibukin Teuare arana anne. A ataia bwa te tia Karikiriki, Teuare angania te maiu, mwengaia ae tamaroa ae te bwaretaiti, ao tekatekaia n taanga ae kororaoi. (KBwaai 1:​26-28; 2:18) Ma te koaua bwa a na teimatoa ni kamanena aia iango ae kororaoi n iaiangoi raoi iai baike e karaoi Iehova ibukia? Te koaua bwa a na teimatoa ni karikirakea aia tangira ao aia kakaitau ibukin Teuare arana anne? A oti raoi aroaroia ngke a a kataaki iroun te tia kairiribai nakon te Atua.

9. Ni kaineti ma Karikani Bwaai 2:​16, 17 ao 3:​1-5, tera are e tuangia te moan taanga Iehova, ao e kangaa Tatan ni kabwaoua te koaua anne?

⁹ Wareka Karikani Bwaai 2:​16, 17 ao 3:​1-5. E kamanena te naeta Tatan n titirakina  iai Ewa ni kangai: “Te koaua ae e taku te Atua bwa kam na tai amwarake mani kain nako te onnaroka aei?” Iai te kewe ae aki otara i nanon te titiraki anne, ae ai aron te boitin ae karabaaki. E bon taekinna te Atua bwa a kona n amwarake man uaani kaai nako, ma tii teuana ae a na aki kanna. A boni bae n rangi ni bati aroka aika kakaokoro ake a kona n amwarake mai iai Atam ao Ewa. (KBwaai 2:9) Eng, e bon tituaraoi Iehova. Ma e katabuaka te kai ae tii teuana, bwa a na aki amwarake mai iai Atam ao Ewa. Ngaia are e kabwaoua te koaua ana titiraki Tatan. E kataia ni kairiia iai bwa a na iangoa te Atua bwa e aki tituaraoi. Tao e bae n iango ni kangai Ewa, ‘E taua te bwai ae raoiroi mairou te Atua?’

10. E kangaa Tatan n uaraoa aran te Atua, ao tera mwina?

¹⁰ N te tai anne, e teimatoa Ewa n iangoa Iehova bwa ana tia Tautaeka. E tuanga Tatan te baere e a tia n taekinna te Atua. E taekinna naba bwa a aki riai n ringa te kai anne. E ataa neiei ana kauring te Atua are a na boni mate ngkana a aki ongeaba. Ma e kaeka Tatan ni kangai: “Kam na bon aki mate.” (KBwaai 3:​2-4) E a aki manga karariki n taetae Tatan. E a bon taetae raoi ni kabuakakaa aran te Atua ao n tuanga Ewa bwa bon te tia kewe Iehova. Ngaia are e a riki Tatan bwa te riaboro ke te tia uarao. E boni burebureaki Ewa bwa e kakoauaa Tatan. (1Tim. 2:14) E onimakina riki Tatan nakon Iehova. Anne bukina are e a kai karaoa iai Ewa te motinnano ae moan te karuanikai. E baireia bwa e na aki ongeaba iroun Iehova. E kana uaan te kai are e katabuakaki iroun Iehova ao imwina riki e angan naba Atam.​—KBwaai 3:6.

11. Tera are a riai ni karaoia ara moani karo, ao tera are a kabwaka ni karaoia?

¹¹ Iangoia bwa tera ae e bon riai n taekinna Ewa nakon Tatan. Iangoia bwa aongkoa e taekina aei: “I aki kinako, ma I kinaa Tamau ae Iehova, ao I tangiria ma n onimakinna. E a tia n anganai ma Atam bwaai nako aika iai iroura. Antai ngkoe bwa ko na taetae ni kabuakakaa? Naako!” E na boni bae ni kimwareirei Iehova n ongo taeka akanne mairoun natina te aine ae tangiraki ae kakaonimaki ni koaua. (TaeRab. 27:11) Ma akea tangiran Iehova ni koaua iroun Ewa ao ai uana naba ma Atam. Ibukin anne, a a kabwaka ni kaitiaka taekan arana man uaraoana.

12. E kangaa Tatan ni kauekea te nanououa n ana iango Ewa, ao tera are a kabwaka ni karaoia Atam ma Ewa?

¹² N aron ae ti a tia n noria, e moana ana waaki Tatan mani kauekean te nanououa n ana iango Ewa. E kaira neiei bwa e na nanokokoraki n aroaron Teuare arana Iehova. A kabwaka Atam ao Ewa ni kaitiaka aran Iehova ao taekana. A boni kariaia bwa a na butimwaea ana iango Tatan ao ni karitei nakon Tamaia. E kamanenai naba aanga akanne Tatan ni boong aikai. E kabuakakaa  aran Iehova man arona n uaraoia. Naake a kakoauai ana kewe Tatan a boni kai burebureaki bwa a na rarawa nakon ana kairiri ae raoiroi Iehova.

13. E kangaa Etekiera 36:23 ni kaota oin te rongorongo n te Baibara?

¹³ Te koaua bwa e kariaia uaraoana Iehova ao e aki kaitiaka taekana? Tiaki ngaia anne! E kaatuuaki n rongorongon te Baibara ae bwanin taekan te baere e karaoia Iehova ibukini kaitiakan arana are kabuakakaaki i Eten. (KBwaai 3:15) Ni koauana, ti kona ni kakimototoa oin te rongorongo n te Baibara n aron aei: e katabua arana Iehova rinanon te Tautaeka n Uea ae kairaki iroun Natina, ao e kaoka te raoiroi ao te rau nakon te aonnaba. E kaotaki n te Baibara te rongorongo ae buokira n ataia bwa tera aron Iehova ni katabua arana.​—Wareka Etekiera 36:23.

14. E kangaa ni katabuaki aran Iehova man arona nakon te karitei are i Eten?

¹⁴ E karaoa ana kabanea ni konaa Tatan n tuka Iehova mani kakororaoan Ana kantaninga. Ma e teimatoa n aki nakoraoi ana waaki Tatan. E kaotaki n te Baibara te baere e karaoia Iehova, ae oti raoi iai bwa bon te Tama ae tatangira ao te tia Tautaeka ae akea n ai arona. E bon rawawata Iehova n ana karitei Tatan ma raona ake a tei n ana itera. (TaiAre. 78:40) Ma e kaitaraa te kangaanga anne ma te wanawana, te taotaonakinnano, ao te kaetitaeka ae riai. E a tia naba ni kaota mwaakana ae korakora n aanga aika bati. Ao ae kakawaki riki, a boto i aon te tangira bwaai nako ake e karaoi. (1Ioa. 4:8) E teimatoa Iehova ni mwakuria katabuan arana.

15. E kangaa Tatan ni kabuakakaa aran te Atua ni boong aikai, ao tera mwina?

¹⁵ E teimatoa naba ngkai Tatan ni kabuakakaa aran te Atua. E burebureiia aomata bwa a na aki kakoauaa ae e mwaaka te Atua, e kaetitaeka n te riai, e wanawana, ao e tatangira. N te katoto, e kataia Tatan ni kairiia aomata bwa a na kakoauaa ae bon tiaki te tia Karikiriki Iehova. Ao ngkana a kakoauaa te Atua aomata, e a manga kataia Tatan ni kairiia bwa a na kakoauaa ae a rangi  n tuamatoa ana tua te Atua ao a aki riai. E reireinia naba aomata bwa Iehova bon te Atua ae aki nananoanga ae e kakabuekiia aomata n te ai ni moone. Ngkana a kakoauai keewe akanne, a nang kai karaoa te mwaneka are imwina ae te rawa nakon ana tautaeka Iehova. E na bon teimatoa Tatan n uaraoa Iehova ni karokoa kamaunaakina, ao e na kataia naba ni katannakoko mairoun Iehova. Ma e na tokanikai?

16. Tera ae ko kona ni karaoia are a kabwaka ni karaoia Atam ao Ewa?

¹⁶ E kariaia Iehova bwa a na uataboa katabuan arana aomata aika aki kororaoi. Ko boni kona ni karaoa te baere a kabwaka ni karaoia Atam ma Ewa. E ngae ngke ko mena n te aonnaba ae onrake irouia aomata aika kabuakakaa ao ni kamatauningaa aran Iehova, ma ko boni kona ni kaitiaka taekan arana ao n tuangia aomata ae e tabu Iehova, e raoiroi, ao e tatangira. (Ita. 29:23) Ko kona ni boutokaa ana tautaeka. Ko kona ni buokiia aomata bwa a na ataia ae bon tii ana tautaeka ae raoiroi ao e na boni karekea te rau ao te kukurei nakoni baika karikaki ni kabane.​—TaiAre. 37:​9, 37; 146:​5, 6, 10.

17. E kangaa Iesu ni kaotiota aran Tamana?

¹⁷ Ngkana ti kaitiaka taekan aran Iehova, ti a kakairi n ana katoto Iesu Kristo. (Ioa. 17:26) E kaotiota aran Tamana Iesu tiaki tii mani kamanenaan te ara anne, ma man arona naba ni kaitiaka taekan Iehova. N te katoto, e kaitaraa aia reirei Baritaio ake a taekina Iehova n aanga aika kakaokoro bwa e iowawa, e tuamatoa, e raroa mairoura, ao e aki nananoanga. E buokiia aomata bwa a na kinaa Tamana bwa te Atua ae atataiaomata, e taotaonakinnano, ao e kabwarai buure. E buokiia naba bwa a na ataa Iehova man arona ni kakairi raoi n aroaron Tamana ni maiuna ni katoabong.​—Ioa. 14:9.

18. Ti na kangaa ni kaotia bwa a kewe kabuakakaan ao uaraoan Iehova?

¹⁸ N aron Iesu, ti kona n tataekina te bwai ae ti ataia ibukin Iehova n reireinia aomata bwa a na ataia ae bon te Atua ngaia ae tatangira ma n akoi. Ngkana ti karaoa anne, ti kaotia iai bwa a kewe kabuakakaan ao uaraoan Iehova. Ti katabua aran Iehova ni kairiia aomata bwa a na ataia ao n iangoia ae e tabu arana. Ti kona naba ni kakairi iroun  Iehova. E boni kona n riki anne e ngae ngke ti aki kororaoi. (IEbe. 5:​1, 2) Ngkana ti kaotia nakoia aomata n ara taeka ao n ara mwakuri bwa tera raoi aroaron Iehova, ti a buoka iai katabuan arana. Ti kaitiaka taekan te ara anne man arora ni buokiia aomata bwa a na ataa te koaua ibukin te Atua. * Ti kaotia naba iai bwa a boni kona aomata aika aki kororaoi ni kateimatoa etin aroia.​—Iobi 27:5.

19. E kangaa Itaia 63:7 ni buokira n ataa tiara ae kakawaki n ara angareirei?

¹⁹ Iangoa te reirei riki teuana ae kakawaki ae ti kona ni maiuakinna. Ngkana ti reireinia aomata koaua man te Baibara, n angiin te tai ti katuruturua riain te Atua n tautaeka, bwa bon iai riaina n tautaekana te iuniweeti, ao e bon eti anne. Ao e ngae ngke e kakawaki reireinakia ana tua te Atua, ma tiara ae kakawaki riki bwa ti na buokiia bwa a na karekea tangiran Iehova ae Tamara, ao ni kakaonimaki ni koaua nakoina. Ti riai ni katuruturui aroaron Iehova aika anainano ao ni kamataataa bwa aekakira raoi Teuare arana Iehova. (Wareka Itaia 63:7.) Ngkana ti angareirei n aron anne, ti na boni buokiia aomata bwa a na tangira Iehova ao n ongeaba irouna ibukina bwa a kani kakaonimaki ni koaua nakoina.

20. Tera ae ti na rinanona n te kaongora are imwina?

²⁰ Ma ti na kangaa n taraia raoi bwa aroarora ao ara angareirei e na aki kabuakakaaki iai aran Iehova ao e na katikiia aomata nakoina? E na kaekaaki anne n te kaongora are imwina.