1-2. Jehovachea Sakxeank kosle vixoi chodd mhotvache zaun asat?

AIZ amchea mukhar don ekdom mhotvache vixoi asat. Te mhunnttlear—Devacho raz-odhikar ani tachem nanv povitr korop. Ami Jehovache Sakxi zal’lean amkam oslea vixoi-ancher ulounk avoddtta. Devacho raz-odhikar ani tachem nanv povitr korop he don veg-veglle vixoi zaun asat kai? Na.

² Devachem nanv povitr korop gorjechem mhunn amkam sogleank kollon ailam. Tea bhair, Jehovacho raz-odhikar vo tachi raz cholounchi rit sogleam-von bori mhunn dakhoun diunchea vixim pasun ami xikleant. Tor he donui vixoi mhotvache asat.

3. Jehovachea nanvant kitem mellon asa?

³ Jehova Devachea nanvant tachi raz chounchi rit ani tachea vixim asa tem soglem mellon asa. Tor Jehovachem nanv povitr korop sogleam-von mhotvacho vixoi mhunn ami sangtat zalear, Jehovachi razvottki cholounchi rit sogleam-von bori asa mhunn dakhoun divop gorjechem asa mhunn pasun ami sangtat. Jehovachem nanv ani Sorvpodvedar Sorvespor zaun to jea toren apli razvottki choloita, hanchea modem ek lagincho sombond asa.—“ Eka Mhotvachea Vixoi-ant Kitem Mellon Asa” hem boks polloiat.

4. Devachea nanva vixim Stotr 135:13 kitem sangta, ani hea lekhant ami khoinchea prosnanche zobab polloitolim?

⁴ Jehovachem nanv ekdom khas zaun asa. (Stotr 135:13 vachat.) Devachem nanv itlem mhotvachem kiteak? Tachem nanv poile pavtt fott marun koxem pidd’ddear kelem? Dev aplem nanv koxem povitr korta? Ani Devachem nanv povitr korunk ami koso tenko diunk zata? Ami atam hea prosnanche zobab polloum-ia.

5. Devachem nanv povitr korchea vixim thoddim kitem chintunk puro?

⁵ “Tujem nanv povitr zaum.” (Mt. 6:9) Him utram mhunnon magnneant kitem ekdom gorjechem mhunn Jezun dakhoun dilem. Punn Jezuchea utrancho orth kitem? Kitem tori povitr korop mhunnche ti vost nitoll vo nirmoll korop. Punn thoddim ghoddie chintint, ‘Jehovachem nanv povitr, nitoll ani nirmoll na kai?’ Hacho zobab mellonk eka nanvant kitem mellon asta tem ami pollounk zai.

6. Ek nanv kiteak mhotvachem zaun asa?

⁶ Ek nanv mhunnttlear, kagdar boroilolem vo ucharlolem fokot ek utor nhoi. Hea vixim Bible kitem sangta tacher dhean diat: “Girestkaie poros, borem nanv vinchun kadd.” (Mho. 22:1; Up. 7:1) Ek nanv itlem mhotvachem kiteak? Karonn eka munxa vixim dusrim kitem chintat tem tachea nanvant mellon asa. Tor ek nanv koxem boroitat vo koxem uchartat tem mhotvachem nhoi. Punn tem nanv dusrim eka kagdacher vachtat vo aikotat tednam tea munxa vixim kitem chintat tem mhotvachem.

7. Lokamnim Devachem nanv koxem pidd’ddear kelam?

⁷ Jehova vixim lok fott sangtat tednam to vaitt korta hem chintop tim dusreanchea monant ghaltat. Ani lok vaitt zatat tem polloitat tednam tachem karonn Dev mhunn sangtat ani tachem nanv pidd’ddear kortat. Oxench, Devachem nanv Eden bagent poile pavtt pidd’ddear zalem. Hantuntlean ami kitem xikonk zata tem polloum-ia.

8. Adanv ani Eve kitem zannam aslim, ani ami khoinche prosn vicharunk zata?

⁸ Devchem nanv Jehova ani tachea vixim zaite mhotvache vixoi Adanv ani Eve zannam aslim. Udharonnak, to tancho Rochnnar, tannem tankam jivit dil’lem, ravonk ek Sobit zago dil’lo ani ek poripurnn kazari sangati dil’lo mhunn tim zannam aslim. (Ut. 1:26-28; 2:18) Punn Jehovan tanchea pasot jem kitem kel’lem tacher niall korunk tim aplem poripurnn mon uzar kortolim kai? Jehova pasot tim aplo mog ani upkariponn vaddoitolim kai? Devachea dusmanan tanchi porikxa keli tednam hea prosnanche zobab spoxttponni kollon aile.

9. Utpoti 2:16, 17 ani 3:1-5-a pormonnem, Jehovan poilea zoddpeak kitem sanglem, ani Soitanan sot koxem lipoilem?

 ⁹ Utpoti 2:16, 17 ani 3:1-5 vachat. Ek sorop uloita toso dakhoun Soitanan Evek ek prosn vicharlo: “Bhagentlea sogllea zhaddanchim follam khai nakat mhonn Devan tumkam sanglam tem khorem?” Ho prosn vicharun Soitan Deva vixim fott uloilo ani Eve Deva vixim vaitt chintunk lagli. Khorem mhunnttlear, bagent aslolo ekuch rukh soddun soglea rukhanchim follam tanchean khaunk zata mhunn Devan tankam sanglolem. Adanv ani Eve bagentlea veg-vegllea rukham thaun follam khaunk xoktalim. (Ut. 2:9) Hoi, Jehova ek udar kallzacho Dev. Punn ekach rukhachem foll khainaka mhunn Devan Adanv ani Evek sanglolem. Tor Soitanan to prosn vicharun sot lipoilem. Dev udar kallzacho nhoi oxem tannem dakhoun dilem. Tednam Even ghoddie chintlem astolem, ‘Dev mhojea thaun kitem tori borem lipoita kai?’

10. Soitanan fott marun Devachem nanv koxem pidd’ddear kelem, ani hacho porinnam kitem zalo?

¹⁰ Soitanan to prosn Evek vicharlo tednam ti Jehovak khalti asli. Karonn Jehovan sanglolem tem tinnem Soitanak spoxttponnim sanglem. Tea bhair, tea rukhak tannim hat pasun lavunk nozo mhunn tinnem sanglem. Tim Devachi adnea pallinant zalear tim mortolim mhunn pasun tika khobor asli. Punn Soitanan sanglem: “Tumi morchim nant.” (Ut. 3:2-4) Tor, hanga Dev fokot fott marunk xokta mhunn Soitan sangona, punn tannem fott marlea mhunn Evek sangon Soitanan Devachem nanv pidd’ddear kelem. Hea toren Soitan devchar vo fott marun nanv pidd’ddear korpi zalo. Eve Soitanachem aikon purnn toren fosli. (1 Tim. 2:14) Jehova poros tinnem Soitanacher chodd visvas dovorlo. Hea toren tinnem ekdom chukicho nirnnoi ghetlo. Jehovachem aikonchea bodlek tinnem Soitanachem aikolem. Jehovan khainaka mhunn sanglolem tem foll ti khaunk lagli ani uprant tinnem Adanvak pasun khaunk dilem.—Ut. 3:6.

11. Adanv ani Even kitem korunk zata aslem, punn tannim kitem korunk na?

¹¹ Even Soitanak kitem mhunnonk zai aslem tea vixim chintat. Tinnem Soitanak oxem mhunnonk zata aslem: “Tum konn to hanv noko. Punn hanv mhojea Bap Jehovak vollokhota. Tacho mog korta ani tacher mhaka visvas asa. Tannem mhaka ani Adanvak soglem dilam. Tachea vixim vaitt ulounk tum konn? Voch hanga thaun!” Aplea mogall dhuve thaun oslim utram aikol’lim zalear, Jehova kitlo khuxal zata aslo! (Mho. 27:11) Punn Evek ani Adanvak Jehovacho visvaxi mog naslo. Tankam oslo mog naslo dekhun, tanchea Bapaichem nanv pidd’ddear zata tem polloun tannim kainch korunk na.

12. Soitanan Evechea monant dubhav koxe ghatle, ani Adanv ani Even kitem korunk na?

¹² Ami atam meren polloil’lea bhaxen, Jehova khoroch ek boro Bapui nhoi mhunn Soitanan Evechea monant dubhav ghalun Jehovachem nanv pidd’ddear korunk suru kelem. Ani tea fotti vorvim Jehovachem nanv pidd’ddear  zatalem tednam Adanv ani Even kainch korunk na. Haka lagon Soitanachem aikon aplea Bapaichea add vochonk tankam sompem zalem. Soitan aiz pasun osleoch vatto uzar korta. To Jehova vixim fott sangon tachem nanv pidd’ddear korta. Ani je lok Soitanacheo fotti manun ghetat, tankam Devachea nitichea Rajea add vochonk sompem zata.

13. Ezekiel 36:23 Bible-acho mukhel sondex koso dakhoun dita?

¹³ Aplem nanv pidd’ddear zata tem polloun, Jehova kainch korcho na kai? Na, to kortoloch! Eden bagent aplea vixim sanglolem te, ek fott asli mhunn dakhounk Jehovan jem kitem kelam tea vixim amkam ak’khea Bible-ant vachunk melltta. (Ut. 3:15) Khorem mhunnttlear, Bible-acho mukhel sondex ami hea utramnim sangonk zata: Aplo Put choloita tea Rajea udexim Jehova aplem nanv povitr kortolo ani nitivontponn ani xanti prithumer porot haddttolo. Jehova aplem nanv koxem povitr kortolo tem somzonk Bible-ant mahiti dil’li asa.—Ezekiel 36:23 vachat.

14. Eden bagent aplem nanv pidd’ddear zalem tednam Jehovan jem kelem, tantuntlean tachem nanv koxem povitr zata?

¹⁴ Jehovachi khuxi addaunk, Soitanan apleachean zata tem soglem kelam. Punn Soitan portun-portun harla. Bible amkam Jehovan kitem kelam tea vixim sangta, ani to khoreanich ek mogall Bapui ani sogleam-von boro Raza hea vixim puravo dita. Soitan ani tache vatten aslole te, aplea add geleat mhunn Jehovak khub dukh zalam hem khorem. (St. 78:40) Punn aplem nanv povitr korun to zannvaien, pasiensan ani neai-an vagla. Ani apleak sogleam poros chodd xokti asa mhunn pasun tannem mezunk zaina titlea vattamnim dakhoilam. Ekdom mhotvachem mhunnttlear, to korta tea soglea kamamnim tacho mog dison ieta. (1 Juanv 4:8) Jehova aplem nanv povitr korunk vavrit asa.

15. Aiz Soitan fott marun Devachem nanv pidd’ddear koxem korta, ani hacho porinnam kitem zala?

¹⁵ Soitan aiz Deva vixim fott marun tachem nanv pidd’ddear korit asa. Devak xokti na, to neai korina, taka zannvai na, ani taka mog na mhunn lokanchea monan dubhav ghalun  tankam to fottoita. Udharonnak, Jehova tancho Rochnnar nhoi mhunn to lokanchea monant ghalunk proitn korta ani Dev asa mhunn lok mantat zalear tachea dorjea pormonnem jielear ekleak svotontrtai mellona ani tem sarkem nhoi mhunn chintunk Soitan proitn korta. Jehova lokank ifernant zolloita toslo, fatra kallzacho ani krur Dev mhunn pasun to lokank xikoita. Lok osleo fotti patieunk lagtat tednam Jehovachi nitichi razvottki nakarunk tankam sompem zata. Aplo nas zata tea meren, Soitan Devachem nanv pidd’ddear korit ravtolo. Ani tumi Jehovak nakarunk, to proitn korit ravtolo. Punn taka ies mellttolo kai?

16. Tumi kitem korunk zata, jem Adanv ani Even korunk na?

¹⁶ Aplem nanv povitr korunk Jehova oporipurnn munxank uzar korta. Tor eke toren Adanv ani Even jem korunk na, tem tumi korunk xoktat. Fott marun Devachem nanv pidd’ddear kortat ani opman kortat toslea lokam modem tumi jietat zalear pasun Jehova povitr, nitivont, boro ani mogall asa hem sot sangonk tumkam ek sondhi asa. (Iz. 29:23) To tumcho Raza zalolo tumkam zai mhunn tumi dakhounk xoktat. Fokot Jehovachich razvottki purnn toren nitivontponn, xanti ani khuxalkai haddttoli mhunn lokank somzonk tumi modot korunk xoktat.—St. 37:9, 37; 146:5, 6, 10.

17. Jezun aplea Bapache nanv koxem kollit kelem?

¹⁷ Ami Jehovachem nanv povitr korunk modot kortat tednam ami Jezu Kristachi dekh ghetat. (Juanv 17:26) Jezun fokot aplea Bapachem nanvuch sangon nhoi, punn to koslo tem lokank xikoun pasun tannem tachi vollokh dili. Udharonnak, Jehova ek krur Dev, to lokam thaun chodd opekxa korta, to munxam thaun pois asa, ani taka lokanche churchure disona, oxem Farizev sangtale. Punn te sangtat tem chukichem asa mhunn Jezun sanglem. Aplo Bap somjikaiecho, pasiens ani mog dakhoupi ani bhogxita toslo mhunn lokamnim zannam zaunk Jezun tankam modot keli. Tea bhair, aplea Bapache gunn tannem sompurnn toren aplea jivitant dakhoun, Jehovak zannam zaunk tannem lokank modot keli.—Juanv 14:9.

18. Jehovachem nanv pidd’ddear korunk sangloleo fotti chukicheo mhunn ami koxem dakhounk zata?

¹⁸ Jezu bhaxen, ami Jehova vixim jem zannant tem lokank sangonk zai. Dev kitlo  mogall ani doiall tea vixim ami tankam xikounk zai. Oxem kelolean, Jehovachem nanv pidd’ddear korunk sangloleo fotti chukicheo mhunn ami dakhoitat. Dev povitr asa mhunn manun gheunk ami lokank modot kortat tednam ami Jehovachem nanv povitr kortat. Ami pasun Jehovachi dekh gheunk zata. Ani hem ami oporipurnn aslear pasun korunk zata. (Ef. 5:1, 2) Amchea utramnim ani korneamnim ami lokank Jehovachi vollokh ditat tednam, tachem nanv povitr korunk ami modot kortat. Deva vixim aslolem chukichem chintop pois korunk ani lokank tache vixim sot zannam zaunk ami modot kortat tednam ami Devachem nanv povitr kortat. Toxench oporipurnn munxamnim pasun Devak visvaxi ravonk zata mhunn ami dakhoun ditat.—Job 27:5.

19. Ami xikoitat tednam amcho mukhel dhei kitem asonk zai mhunn Izaias 63:7 dakhoita?

¹⁹ Jehovachem nanv povitr korunk ami anik kitem tori korunk zata. Ami dusreank Bible-antlean sotam xikoitana Devacho raz-odhikar mhunnche Jehovakuch ho vixv cholouncho odhikar asa dekhun ami tache kaide manun gheunk zai, hacher choddxe pavtti zor ditat. Punn amcho Bap Jehovacho mog korunk ani taka visvaxi ravonk lokank modot korop, ho amcho mukhel dhei zaun asa. Ami Jehovachea borea gunnancher ani to koslo Dev zaun asa hacher ami zor diunchi goroz asa. (Izaias 63:7 vachat.) Oxem kelolean lok Devacho mog korunk ani tacheo adnea pallunk pavtolo ani te Devak sodanch visvaxi ravtole.

20. Fuddlea lekhant ami kitem bhasabhas kortolim?

²⁰ Lok Devachem nanv aikotat tednam tachem vixim borem chintunk ani tachea lagim soronk zai zalear amchem xikovop ani amchi vagnnunk koxi asonk zai? Hea prosnacho zobab ami fuddlea lekhant polloitolim.