1, 2. ¿Kasa tü waashajaʼawaikalü achiki sümaa wayuu?

MAAʼULU yaa, shia waaʼinmaainjatka maʼin sütüjaanüin aaʼu niain neʼe Jeʼwaa anain süpüla aluwatawaa otta shiʼnnaajünüin nünülia sümaa kojutuin nia atumawaa. Kamalainshaatasü wamüin waya aküjaliikana pütchi nüchiki Jeʼwaa waashajaain süchiki tia sümaa wayuu. Nnojotpejeʼe naatawalin tia piamasükat pütchi, shiajiraʼaya neʼe.

² Watüjaaitpa aaʼu wayakana wapüshuaʼa kojutuinjachin Jeʼwaa atumawaa. Jee müsia, wayaawata aaʼu niain neʼe Jeʼwaa anakai süpüla aluwatawaa saaʼu kasakat süpüshuaʼa. Jülüjainjatü maʼin waaʼin tia piamasükat kasa.

3. ¿Kasa pansaaka amaa nünülia Jeʼwaa?

³ Tü nünüliakat Jeʼwaa pansaasü sümaa tü nukuwaʼipakat otta sümaa tü sukuwaʼipakalü aluwatawaa nutuma. Jamüshiijaʼa waashajaale süchiki kojutuinjatüin atumawaa tü sünainpünaakat nünülia Jeʼwaa, shia waashajaaka achiki niain neʼe anain süpüla aluwatawaa. Tü nünüliakat Jeʼwaa pansaasü sümaa sukuwaʼipa aluwatawaa nutuma saaʼu kasakat süpüshuaʼa (paashajeʼera tü pütchikat « Waneirua kasa watüjaainjatka aaʼu palajana»).

4. (1) ¿Jamüsü sünüiki Salmo 135:13 süchiki nünülia Maleiwa? (2) ¿Kasa wekirajaainjatka anain sünain ekirajaayakat tüü?

⁴ Nnojotsü eein wanee anüliee anaʼleeka maʼin suulialeʼeya nünülia Jeʼwaa (paashajeʼera Salmo 135:13). ¿Jamüsü anaʼleeka maʼin shia? ¿Jarat tü palajatkat sukua süküjünüin alawaa nüchiki Jeʼwaa? ¿Kasa naaʼinraka Maleiwa süpüla kojutuinjachin nia atumawaa? ¿Kasa waaʼinrajatka süpüla wasoutuin naaʼu Maleiwa? Wekirajaajeerü anain tia sünain ekirajaayakat tüü.

5. ¿Kasa eeka süpüla nüsakirüin anain wanee wayuu süchiki kojutuinjachin Jeʼwaa atumawaa?

⁵ Naashin Jesuu, eesü wanee kasa nnojoluinjatka motuin waaʼin wachuntapa nümüin Maleiwa. «Kasataalejeseʼe shiʼraajüin wayuu tü pünüliakat otta kojutuin pia sutuma», müshi nia (Mat. 6:9, TNM). Eeshiijaʼa eekai namüin: «¿Jamakaʼa wachuntuinjatka tia nümüin? ¿Nnojotsüsaʼa eʼnnaajünüin nünülia Jeʼwaa sümaa kojutuin nia atumawaa?». Wayaawateerü aaʼu tia watüjaale saaʼu tü sünainpünaakat nünülia Jeʼwaa.

6. ¿Kasa anaʼleeka atuma naaʼin wanee wayuu?

⁶ Anuu sünüiki tü Wiwüliakat süchiki nünülia wanee wayuu: «Shia anaka aluʼu anale pütchi nüchiki wanee wayuu suulialeʼeya washirüin nia» (Prov. 22:1; Ecl. 7:1). Saashin tü Wiwüliakat, nünülia wanee wayuu shia tü eʼnnaajünakalü anainjee nia jee shia tü namakat na waneinnua nüchiki. Jamüsüjaʼa waapapa nünülia wanee wayuu, aashin shiain antajaain wekiiruʼumüin tü sümakat wayuu nüchiki jee tü eʼnnaajünakalü anainjee nia. Anale süshajia otta suchuntia nünülia wanee wayuu, anasü naaʼin sutuma tia, shiapejeʼe anaʼleein atuma naaʼin müleka anale sünüiki wayuu nüchiki.

7. ¿Kasa saaʼinraka wayuu shiiʼiree mojeein pütchi nüchiki Jeʼwaa?

⁷ Aküjünüsü alawaa nüchiki Jeʼwaa süpüla mojuinjatüin pütchi nüchiki. Aküjünüsü tü palajatkat alawaa nüchiki Jeʼwaa chaa suluʼu tü apainkat Edén. ¿Kasa watüjaka sünainjee tü alatakat soʼu tia? Anashii wekirajaale sünain.

8. (1) ¿Kasa nütüjaaka aaʼu Adán sümaa Eva? (2) ¿Kasa eeka süpüla wasakirüin anain waaʼin?

⁸ Nütüjaa aaʼu Adán sümaa Eva Jeʼwaain nünülia Maleiwa. Akaʼaya naya, natüjaa aaʼu niain Jeʼwaa kakumajalain kasa süpüshuaʼa, nia aapaka kataa oʼuu namüin, nia aapaka tü apain kepiapuʼukalü aluʼu naya otta anasü nakuwaʼipa sünain kasaalüü süka lotuin nakuwaʼipa piamaleʼeya (Gén. 1:26-28; 2:18). Jülüja waaʼin tüü: ¿Ayatüsüche jülüjain naaʼin Adán sümaa Eva süpüshuaʼa tü kasa anasü naaʼinrakat Jeʼwaa napüleerua? ¿Kooʼomüinsüche naalin Jeʼwaa napüla? ¿Talatüsüche naaʼin sutuma tü naapakat Jeʼwaa namüin? Atüjaana aaʼu tia wanaa sümaa suuʼulakünüin naaʼin nutuma chi nüʼünüükai Maleiwa.

9. (1) ¿Kasa nümaka Jeʼwaa nümüin Adán sümaa Eva saashin Génesis 2:16, 17? (2) ¿Jamüsü nünüiki Satanaa sümüin Eva shiiʼiree nimeejeein shia saashin Génesis 3:1-5?

 ⁹ (Paashajeʼera Génesis 2:16, 17; 3:1-5). Yootushi Satanaa sümaa Eva sükajee wanee wüi, müshi nia sümüin: «¿Jamüsü taaʼin nünüiki Maleiwa jümüin? ¿Shiimüinsaʼaya nümüin jümüin nnojoliinjanain jiküin süchon tü wunuʼuliakat süpüshua yaakat suluʼu tü apainkat?». Nüsakirayaain neʼe Eva Satanaa süpüla nimeejüin shia. Niiʼiratüin sukuwaʼipa tü nümakat Jeʼwaa, süka jamüin, waneesiain neʼe tü wunuʼu nnojoluinjatkat neküin achon naashin Jeʼwaa. Wainmapejeʼe tü wunuʼulia eekat süpüla neküin achon Adán sümaa Eva (Gén. 2:9). Watta maʼin saalii kasa naapaka Jeʼwaa namüin. Waneesia neʼe tü wunuʼu nüpülajakat noulia. Sükajee tü nümakat Satanaa sümüin Eva, jeʼiyeshi Jeʼwaa naashin. Eesüjaʼa süsakirüle saaʼin Eva shiimainrejeʼe nnojoluin naapüin Jeʼwaa kasa anasü namüin.

10. (1) ¿Kasa alawaa nümaka Satanaa nüchiki Jeʼwaa? (2) ¿Kasa alataka sünainjee naʼalain Satanaa?

¹⁰ Soʼu tia, kojutpuʼushi Jeʼwaa sümüin Eva süka niain Laülaain saaʼu. Süküjainjeseʼe nümüin Satanaa tü nümakat Maleiwa nümüin Adán otta sümüin shiakat. Akaʼaya shia, süküjaleʼinya nümüin nnojoluinjatüin nepettüin tia wunuʼu apülajünakat noulia. Sütüjaatüjülia aaʼu Eva outajanain naya naashin Jeʼwaa neküle süchon tia wunuʼukot. Anuuka nünüiki Satanaa sümüin: «Nnojo. Nnojotsü shiimüin tia. Nnojoleena jia ouktüin» (Gén. 3:2-4). Mojusü maʼin tü nümakat Satanaa nüchiki Jeʼwaa, süka jamüin, alaain Jeʼwaa naashin. Müshijeseʼe Yolujaa nümünaleeichipain amüin Satanaa suluʼujeereʼeya tia. Emeejünüsü Eva nutuma Satanaa (1 Tim. 2:14). Nia neʼe sunoujaka anüiki Satanaa nuulialeʼeya Jeʼwaa, müsüjeseʼe mojuin maʼin tü saaʼinrakat: nnojotsü oonooin sümaa nünüiki Jeʼwaa, shiküin süchon tü wunuʼu apülajünakat noulia otta shikirüin Adán (Gén. 3:6).

11. ¿Kasaje anaka süpüla naaʼinrüin Adán sümaa Eva shiʼipajee naʼalain Satanaa?

¹¹ Anasüjeʼe maʼin mayürülüje sünüiki Eva niʼipajee Satanaa: «¿Joujaisaʼa teʼraajüin pia? Nnojotsüsaʼa tacheküin müinjatüin pünüiki nüchiki chi tashikai Jeʼwaa. ¿Maalinyaasai nia tapüla paaʼinruʼu? Nia teʼraajaka maʼin otta aishi nia tapüla, nia toonooka amaa anüiki otta nia aapaka nümüin Adán otta tamüin tayakat süpüshuaʼa tü eekat wamaʼana. ¡Puʼuna yaajee!». Talatüsüjeʼe maʼin naaʼin Jeʼwaa matüjürüle sünüiki Eva nümüin Satanaa. Niʼrüinje Jeʼwaa alin nia süpüla otta jüüjüüin shia nümüin (Prov. 27:11). Nnojoipejeʼe alin Jeʼwaa süpüla Eva otta nüpüla Adán, müshiijeseʼe nnojoliin nasoutuin naaʼu.

12. (1) ¿Kasa naaʼinraka Satanaa süpüla wainmajüinjatüin saaʼin Eva? (2) ¿Kasa wayu tü nnojotkat naaʼinrüin Adán otta Eva?

¹² Süpüla mojuinjatüin nünüiki Satanaa nüchiki Jeʼwaa, niʼitaain palajana suluʼu shikii Eva maalin shia nüpüla Jeʼwaa. Wainmajüsü saaʼin Eva suluʼujee tia. Nnojotsü asoutuin shia naaʼu Jeʼwaa. Jee müshia Adán, wanaawashi nia sümaa. Nanoujaka naʼalain Satanaa  otta eʼrüliijaashii naya wayumüin nümüin Jeʼwaa, chi Nashikai. Maaʼulu yaa, ayatüsia nimeejüin wayuu Satanaa maʼaka nimeejüin Eva. Wainma alawaa nüküjaka Satanaa nüchiki Jeʼwaa. Nayasaʼa na wayuu anoujakana sünain tia alawaakat, nayoutuin niain Jeʼwaa laülaain naaʼu.

13. ¿Jamüsü sünüiki Ezequiel 36:23 süchiki tü saashajaakat maʼin achiki tü Wiwüliakat?

¹³ ¿Kasakaʼa naaʼinrüin Jeʼwaa sutuma mojuin pütchi nüchiki? Nüshajirüin Jeʼwaa suluʼu tü Wiwüliakat tü naaʼinrakat süpüla sütüjaanüin aaʼu alawaain tü nümakat Satanaa nüchiki suluʼu tü apainkat Edén (Gén. 3:15). Anuu tü saashajaakat maʼin achiki tü Wiwüliakat: kojuteechi Jeʼwaa atumawaa, eejeerü jimataa aaʼin otta anaa akuwaʼipaa nutuma yaa saaʼu tü Mmakat. Naaʼinreerü tia sükajee tü Aluwataaya niʼitaakat najapuluʼu chi Nüchonkai. Aküjünüsü suluʼu tü Wiwüliakat süchiki tü naaʼinrakat Jeʼwaa süpüla kojutuinjachin nia atumawaa (paashajeʼera Ezequiel 36:23).

14. ¿Kasa naaʼinraka Jeʼwaa süpüla sütüjaanüin aaʼu alawaain tü münakat nüchiki suluʼu tü apainkat Edén?

¹⁴ Nüchajaain maʼin sukuwaʼipa Satanaa shiiʼiree nnojoluin nikeraajüin Jeʼwaa tü keeʼireekat naaʼin, isapejeʼe tia nüchiki Satanaa. Ashajünüsü suluʼu tü Wiwüliakat tü kasa naaʼinrüitkat Jeʼwaa otta wayaawata aaʼu sünainjee tia alin wayuu nüpüla sümaa niain neʼe anain süpüla aluwatawaa. Mojusü naaʼin Jeʼwaa sutuma niʼrüijaain wayumüin Satanaa jee na nümaajanakana (Sal. 78:40). Mayaainjeʼe müin tia, nüchajaain Jeʼwaa sukuwaʼipa süpüla nunouteʼerüin tü kasakalüirua sümaa lotuin sukuwaʼipa otta anain sukuwaʼipa nutuma. Jee wainmairü kasa naaʼinraka ayaawatünaka anainjee pülain maʼin nia. Shiapejeʼe jaʼyain naaʼu aipüralin maʼin nia wayuu (1 Juan 4:8). Ayatüsia nukumajüin Jeʼwaa sukuwaʼipa süpüla sütüjaanüin aaʼu alawaain tü münakat nüchiki suluʼu tü apainkat Edén.

15. (1) ¿Kasa ayataka naaʼinrüin Satanaa maaʼulu süpüla nunoujirüin wayuu sünain alawaa nüchiki Jeʼwaa? (2) ¿Kasa eeka sünainjee tia?

¹⁵ Ayatüshia Satanaa maaʼulu sünain aküjaa alawaa nüchiki Jeʼwaa. Nüchajaain maʼin  sukuwaʼipa süpüla wainmajüin saaʼin wayuu saaʼu pülain Jeʼwaa, lotuin sukuwaʼipa tü kasa naaʼinrakat, kekiin maʼin nia otta alin wayuu nüpüla. Nüchajaainya sukuwaʼipa süpüla nunoujirüin wayuu sünain nnojoluin eein Jeʼwaa. Niasaʼa chi eekai nunoujain nünain Jeʼwaa, nunoujireein nia Satanaa sünain wainmain maʼin kasa nüpülajaka Jeʼwaa nuulia otta nnojoluin lotuin sukuwaʼipa tü kasa nuluwataakalü anain. Mojulaashi maʼin Jeʼwaa naashin Satanaa sümaa naʼajüin wayuu saʼaka siki chaa shiinaluʼu tü mmakat. Chi eekai nunoujain sünain tü naʼalainkat Satanaa, eeshijaʼa niyouteechire süchiki niain Jeʼwaa laülaain naaʼu. Sümaʼinruʼu eein Satanaa, ayateechi nia aküjain alawaa nüchiki Jeʼwaa otta ayateerü nüchajaain sukuwaʼipa süpüla pükayalaain nuulia Jeʼwaa. ¿Nuunteetche naaʼinrüin tia?

16. ¿Kasa waaʼinrajatka süpüla nnojoluin washatüin nukuwaʼipa Adán sümaa Eva?

¹⁶ Aʼyataajiraashii waya nümaa Jeʼwaa süpüla kojutuinjachin nia atumawaa. Müshiijeseʼe eein süpüla waaʼinrüin tü nnojotkat naaʼinrüin Adán sümaa Eva, eeshii süpüla wasoutuin naaʼu Jeʼwaa. Mayaainjeʼe wainmain na mojukana anüiki nüchiki Jeʼwaa otta na aküjakana alawaa nüchiki, eeshii süpüla wasoutuin naaʼu Jeʼwaa sükajee waküjain wulein nukuwaʼipa, lotuin nukuwaʼipa, anamiain maʼin nia otta aipüralin nia wayuu (Is. 29:23). Eeshii süpüla weeʼiyatüin sükajee wakuwaʼipa anashiin wamüin niain Jeʼwaa aluwataain waaʼu, eeshii süpüla waküjain sümüin wayuu shiain neʼe lotuin akuwaʼipa nuluwataaya Maleiwa, shiain neʼe eejeetka atuma jimataa aaʼin otta talataa aaʼin (Sal. 37:9, 37; 146:5, 6, 10).

17. ¿Kasa naaʼinraka Jesuu süpüla nusoutuin naaʼu Jeʼwaa?

¹⁷ Wasoutule naaʼu Jeʼwaa nia washataka akuwaʼipa Jesuu (Juan 17:26, TNM). Nnojotsü nüküjain neʼe Jesuu kasaichin nünülia chi Nüshikai, nikirajüin wayuu sünain tü shiimainkat nüchiki. Jamüsüjaʼa soʼu naküjain na fariseokana wainmain tü kasa nuluwataakalü anain Jeʼwaa, ichein nia süchiirua tü nümakat, mojulaain nia otta müliain wayuu nutuma, nüküjain Jesuu namüin na wayuukana nütüjaain saaʼu chi Nüshikai tü isakat wachiki jee tü wountakat, nnojoluin kashapajaaralin nia, alin wayuu nüpüla sümaa sümülialaain naaʼin saalin wayuu. Akaʼaya Jesuu, ayatüsü nukuwaʼipa chi Nüshikai  nutuma, müshijeseʼe niʼraajünüin maʼin Jeʼwaa sünainjee nukuwaʼipa Jesuu (Juan 14:9).

18. ¿Kasa waaʼinrajatka süpüla sütüjaanüin aaʼu alawaain neʼe tü namakat na nüʼünüükana Maleiwa?

¹⁸ Washateerü nukuwaʼipa Jesuu waküjale sümüin wayuu tü watüjaakalü aaʼu nüchiki Jeʼwaa maʼaka saaʼin aipüralin maʼin nia wayuu sümaa anamiain maʼin nia. Waaʼinrüle tia, atüjaaneerü aaʼu alawaain neʼe tü namakat na nüʼünüükana Jeʼwaa. Sünainjee tia, natüjaajeerü aaʼu na wayuukana anain maʼin tü kasa sünainpünaakat nünülia Maleiwa. Mayaapejeʼe nnojoluin lotuin wakuwaʼipa, eesü süpüla washatüin nukuwaʼipa Jeʼwaa (Éf. 5:1, 2). Shiʼrapa wayuu wakuwaʼipa otta saapapa wanüiki, shiʼraajeerü nukuwaʼipa Jeʼwaa otta kojuteechi nia sümüin. Asouteena waya naaʼu Jeʼwaa wekirajüle wayuu sünain tü shiimainkat nüchiki. Jee müsia, atüjaaneerü aaʼu eein süpüla woonooin waneepia sümaa nünüiki Jeʼwaa mayaainjeʼe waleʼeruʼuin tü kaainjalaakat (Job 27:5).

19. ¿Kasa wekirajaka apüla wayuu sünain tü Wiwüliakat saashin Isaías 63:7?

¹⁹ Eesü wane kasa waaʼinrajatka süpüla kojutuinjachin Jeʼwaa atumawaa. Wekirajawaitpa wayuu sünain tü Wiwüliakat, waküjawalin namüin niain neʼe Jeʼwaa anakai süpüla aluwatawaa saaʼu kasakat süpüshuaʼa. Nnojotpejeʼe shiain wekirajüin maʼin apüla wayuu tia, wekirajüin naya süpüla alinjachin Jeʼwaa napüla otta noonooinjanain waneepia sümaa nünüiki. Müsüjeseʼe waküjainjatüin maʼin sümüin wayuu süchiki anain maʼin nukuwaʼipa Jeʼwaa (paashajeʼera Isaías 63:7). Waaʼinrüle tia, aijeechi maʼin Jeʼwaa napüla na wayuukana otta oonoweena naya sümaa nünüiki saaʼu waneepieein naya nümaa.

20. ¿Kasa wekirajaajeetka anain sünain tü wane ekirajaayakat?

²⁰ Sünain tü wane ekirajaayakat, wekirajaajeerü anain pütchikat tüü: ¿Kasa waaʼinrajatka süpüla anainjatüin sünüiki wayuu nüchiki Jeʼwaa shiʼrapa wakuwaʼipa otta sukuwaʼipa wekirajia?