TULUN-AN NGA ARTIKULO 23
“Pakabalaanon ang Imo Ngalan”
“O Jehova, ang imo ngalan magapabilin sa wala sing katubtuban.”—SAL. 135:13.
AMBAHANON 10 Dayawon si Jehova nga Aton Dios!
ANG BINAGBINAGON SA SINI NGA ARTIKULO *
1-2. Ano nga mga topiko ang nanamian sang mga Saksi ni Jehova?
ANG pagkasoberano ni Jehova kag ang pagpakabalaan sa iya ngalan importante gid nga mga hulusayon sa aton subong. Bilang mga Saksi ni Jehova, nanamian kita nga istoryahan ini nga mga topiko. Pero, ang pagkasoberano bala sang Dios lain naman nga hulusayon sa pagpakabalaan sa iya ngalan? Indi.
2 Natun-an naton tanan nga dapat pakabalaanon ang ngalan sang Dios. Natun-an man naton nga dapat pamatud-an nga ang pagkasoberano ni Jehova, ukon ang iya paagi sang paggahom, amo ang pinakamaayo. Gani importante gid ining duha ka hulusayon.
3. Ano ang nalakip sa ngalan ni Jehova?
3 Ang matuod, nalakip sa ngalan ni Jehova nga Dios ang tanan nga parte sa iya, kag lakip sa sini ang iya paagi sang paggahom. Gani kon magsiling kita nga ang pagpakabalaan sa ngalan ni Jehova amo ang pinakaimportante nga hulusayon, buot silingon sini nga dapat man pamatud-an nga ang paagi sang paggahom ni Jehova amo ang pinakamaayo. Naangot pirme sa ngalan ni Jehova ang iya paagi sang paggahom bilang Soberano nga labing gamhanan.—Tan-awa ang kahon nga “ Ang Nalakip sa Importante Gid nga Hulusayon.”
4. Ano ang ginsiling sang Salmo 135:13 parte sa ngalan sang Dios, kag ano nga mga pamangkot ang sabton naton sa sini nga artikulo?
4 Pinasahi ang ngalan ni Jehova. (Basaha ang Salmo 135:13.) Ngaa importante gid ang ngalan sang Dios? Paano ini una nga ginpasipalahan? Paano ini pakabalaanon sang Dios? Kag paano naton mapangapinan ang iya ngalan? Sabton naton ini nga mga pamangkot.
KON NGAA IMPORTANTE GID ANG NGALAN
5. Ano ang mahimo ipamangkot sang iban parte sa pagpakabalaan sa ngalan sang Dios?
5 “Pakabalaanon ang imo ngalan.” (Mat. 6:9) Nagsiling si Jesus nga isa ini sa mga dapat naton ipangamuyo. Pero ano ang buot silingon ni Jesus? Kon ginapakabalaan mo ang isa ka butang, ginahimo mo ini nga matinlo ukon putli. Pero ang iban mahimo mamangkot, ‘Ngaa pakabalaanon pa ang ngalan ni Jehova kay balaan naman ini nga daan?’ Para masabat ini, hibaluon naton kon ano ang nalakip sa isa ka ngalan.
6. Ano ang pinakaimportante sa isa ka ngalan?
6 Ang isa ka ngalan puede isulat ukon ihambal. Pero indi lang amo sina ang nalakip sa isa ka ngalan. Talupangda ang ginasiling sang Biblia: “Ang maayo nga ngalan mas maayo nga pilion sangsa madamo nga manggad.” (Hulu. 22:1; Man. 7:1) Ngaa amo gid sini kaimportante ang ngalan? Bangod nalakip sa ngalan sang isa ang iya reputasyon ukon ang pagkilala sang iban sa iya. Gani ang pinakaimportante amo ang ginapamensar sang mga tawo kon makita nila ukon mabatian ang isa ka ngalan, indi kon paano ini ginasulat ukon ginahambal.
7. Paano ginapasipalahan sang mga tawo ang ngalan sang Dios?
7 Kon ang mga tawo nagasugid sing indi matuod parte kay Jehova, ginaguba nila ang iya reputasyon. Kag kon ginaguba nila ang iya reputasyon, ginapasipalahan nila ang iya ngalan. Sa hardin sang Eden una nga ginpasipalahan ang ngalan sang Dios kag ginguba ang iya reputasyon. Binagbinagon naton kon ano ang matun-an naton sa sini.
KON PAANO UNA NGA GINPASIPALAHAN ANG NGALAN SANG DIOS
8. Ano ang nabal-an ni Adan kag ni Eva, kag ano ang mahimo naton ipamangkot?
8 Nabal-an ni Adan kag ni Eva nga Jehova ang ngalan sang Dios, kag madamo pa sila sing nabal-an parte sa iya. Nabal-an nila nga sia ang ila Manunuga, ang naghatag sa ila sang kabuhi, sang Paraiso nga ila ginaistaran, kag sang perpekto nga tiayon. (Gen. 1:26-28; 2:18) Pero, gamiton bala nila ang ila perpekto nga panghunahuna para pamalandungan pirme ang tanan nga ginhimo ni Jehova para sa ila? Padayon bala nila nga palanggaon kag pasalamatan si Jehova? Nasabat ini nga mga pamangkot sang gintilawan sila sang kaaway sang Dios.
9. Suno sa Genesis 2:16, 17 kag 3:1-5, ano ang ginsiling ni Jehova sa una nga mag-asawa, kag ano ang ginhimo ni Satanas para maghunahuna sila sing indi husto kay Jehova?
9 Basaha ang Genesis 2:16, 17 kag 3:1-5. Paagi sa isa ka man-ug, ginpamangkot ni Satanas si Eva: “Matuod gid bala nga nagsiling ang Dios nga indi kamo magkaon sang bunga sang tanan nga kahoy sa hardin?” Ang pamangkot ni Satanas may kabutigan nga indi bal-anon, pareho sa hilo nga ginbutang sa pagkaon. Ang matuod, nagsiling ang Dios nga puede nila makaon ang bunga sang tanan nga kahoy magluwas lang sa isa. Hunahunaa kon daw ano kadamo nga klase sang prutas ang puede nila kaunon. (Gen. 2:9) Maalwan gid si Jehova. Pero, nagsiling ang Dios kay Adan kag kay Eva nga indi nila pagkaunon ang bunga sang isa ka kahoy. Gani paagi sa pamangkot ni Satanas, ginapagua niya nga indi maalwan ang Dios. Mahimo nagpalibog si Eva, ‘May maayo bala nga butang nga ginadingot ang Dios sa akon?’
10. Paano direkta nga ginpasipalahan ni Satanas ang ngalan sang Dios, kag ano ang nangin resulta?
10 Sang ginpamangkot ni Satanas si Eva, makita naton sa iya sabat nga ginatuman pa niya si Jehova. Ginsugid niya kay Satanas kon ano gid ang ginsugo sang Dios. Nagsiling pa gani si Eva nga indi nila dapat pagtandugon ang kahoy. Kabalo sia sang ginsiling sang Dios nga kon indi sila magtuman, mapatay sila. Pero nagsiling sa iya si Satanas: “Indi kamo mapatay.” (Gen. 3:2-4) Direkta na nga ginpasipalahan ni Satanas ang ngalan sang Dios, nga daw pareho lang nga ginsilingan niya si Eva nga butigon si Jehova. Bangod sa ginhimo ni Satanas, nangin yawa sia ukon manugpasipala. Nagpati si Eva kay Satanas, gani nadaya gid sia. (1 Tim. 2:14) Mas nagsalig sia kay Satanas sangsa kay Jehova. Gani sala gid ang nangin desisyon ni Eva. Wala niya gintuman si Jehova. Ginkaon niya ang bunga sang kahoy nga ginsiling ni Jehova nga indi niya pagkaunon. Dayon ginhatagan niya si Adan.—Gen. 3:6.
11. Ano kuntani ang ginhimo sang aton una nga mga ginikanan?
11 Hunahunaa kon ano kuntani ang ginsiling ni Eva kay Satanas. Ano abi kon amo ini ang ginsiling niya: “Indi ta ka kilala, pero kilala ko ang akon Amay nga si Jehova. Palangga ko sia kag nagasalig ako sa iya. Ginhatagan niya kami ni Adan sang tanan namon nga kinahanglanon. Sin-o ka para pakalainon si Jehova? Palayo ka!” Sigurado nga nalipay gid si Jehova kon amo ini ang nabatian niya sa iya matutom kag mahigugmaon nga anak. (Hulu. 27:11) Pero wala sing mainunungon nga gugma si Adan kag si Eva sa ila Amay nga si Jehova. Gani wala nila mapangapinan ang iya ngalan sa pagpasipala ni Satanas.
12. Ano ang gusto ni Satanas nga duhaduhaan ni Eva, kag ano ang wala ginhimo ni Adan kag ni Eva?
12 Natun-an naton nga ginsugdan ni Satanas ang pagguba sa reputasyon ni Jehova paagi sa pagpaduhaduha kay Eva kon bala maayo nga Amay si Jehova. Wala ginpangapinan ni Adan kag ni Eva ang ngalan kag reputasyon ni Jehova. Bangod sini, nagpati sila dayon kay Satanas kag nagrebelde sa ila Amay. Amo man ini gihapon nga mga paagi ang ginagamit ni Satanas subong. Ginaguba ni Satanas ang reputasyon ni Jehova paagi sa pagpasipala sa iya ngalan. Ang mga tawo nga nagapati sa mga kabutigan ni Satanas madali maimpluwensiahan nga isikway ang matarong nga paggahom ni Jehova.
GINAPAKABALAAN NI JEHOVA ANG IYA NGALAN
13. Ano ang ginasiling sang Ezequiel 36:23 parte sa panguna nga mensahe sang Biblia?
13 Balewala lang bala kay Jehova nga ginapasipalahan ang iya ngalan? Indi! Ginasugid sang bilog nga Biblia kon ano ang ginhimo ni Jehova para pamatud-an nga indi matuod ang malain nga mga ginsiling parte sa iya sa hardin sang Eden. (Gen. 3:15) Ang matuod, puede naton masumaryo ang panguna nga mensahe sang Biblia sing subong sini: Pakabalaanon ni Jehova ang iya ngalan kag ipasag-uli niya ang pagkamatarong kag kalinong sa duta paagi sa Ginharian nga ginagamhan sang iya Anak. Ginabuligan kita sang Biblia nga mahangpan kon paano ginapakabalaan ni Jehova ang iya ngalan.—Basaha ang Ezequiel 36:23.
14. Ngaa ang paagi sang pagsolbar ni Jehova sang pagrebelde sa Eden nagapakabalaan sa iya ngalan?
14 Ginahimo gid ni Satanas ang tanan para indi matuman ang katuyuan ni Jehova. Pero wala gid sia nagamadinalag-on. Ginapakita sang Biblia kon ano ang ginhimo ni Jehova, kag ginapamatud-an sini nga si Jehova isa ka mapinalanggaon nga Amay kag pinakamaayo nga Manuggahom. Sang nagrebelde si Satanas kag ang tanan nga nagdampig sa iya, nasakitan gid si Jehova. (Sal. 78:40) Pero ginsolbar niya ini paagi sa pagpakita sang kaalam, pasensia, kag katarungan. Ginpakita man niya ang iya indi matupungan nga gahom sa madamo nga paagi. Labaw sa tanan, nagpakita sia sang gugma sa tanan niya nga ginahimo. (1 Juan 4:8) Padayon nga ginapakabalaan ni Jehova ang iya ngalan.
Nagbutig si Satanas kay Eva parte kay Jehova, kag padayon nga ginapasipalahan sang Yawa ang Dios sa sulod sang ginatos ka tuig (Tan-awa ang parapo 9-10, 15) *
15. Paano ginapasipalahan ni Satanas ang ngalan sang Dios subong, kag ano ang resulta sini?
15 Ginapasipalahan gihapon ni Satanas ang ngalan sang Dios subong. Ginadaya niya ang mga tawo para magduhaduha sila kon bala ang Dios gamhanan gid man, matarong, maalam, kag mahigugmaon. Halimbawa, ginapapati ni Satanas ang mga tawo nga indi si Jehova ang Manunuga. Kag kon nagapati naman sila nga may Dios, ginatinguhaan ni Satanas nga papatihon sila nga estrikto katama ang Dios kag indi makatarunganon ang iya mga kasuguan. Ginatudlo pa gani niya sa mga tawo nga si Jehova mapintas nga Dios kay ginasunog niya ang mga tawo sa impierno. Gani kon magpati sila sa sini nga mga kabutigan, sigurado gid nga isikway nila ang matarong nga paggahom ni Jehova. Mientras indi pa malaglag si Satanas, padayon niya nga pasipalahan si Jehova, kag tinguhaan gid niya nga isikway mo man si Jehova. Mapatalikod ka ayhan niya?
KON PAANO KA NADALAHIG SA IMPORTANTE GID NGA HULUSAYON
16. Ano ang wala ginhimo ni Adan kag ni Eva nga puede mo himuon?
16 Wala ginpakabalaan ni Adan kag ni Eva ang ngalan ni Jehova. Pero ginhatagan ni Jehova sang pribilehiyo ang indi perpekto nga mga tawo sa pagpakabalaan sa iya ngalan. Buot silingon, mahimo mo ang wala ginhimo ni Adan kag ni Eva. Puede mo mapangapinan ang ngalan ni Jehova kag isugid sa mga tawo nga balaan sia, matarong, maayo, kag mahigugmaon bisan pa ginapasipalahan sang kalabanan nga tawo ang ngalan ni Jehova. (Isa. 29:23) Mapakita mo nga sia ang imo Manuggahom. Mabuligan mo ang mga tawo nga mahangpan nga matarong gid ang paggahom ni Jehova kag amo lamang ini ang makahatag sang kalinong kag kalipay sa tanan nga tinuga.—Sal. 37:9, 37; 146:5, 6, 10.
17. Paano ginpakilala ni Jesus ang ngalan sang iya Amay?
17 Kon ginapangapinan naton ang ngalan ni Jehova, ginailog naton ang halimbawa ni Jesucristo. (Juan 17:26) Ginpakilala ni Jesus ang ngalan sang iya Amay paagi sa paggamit sini nga ngalan kag pagtudlo sa mga tawo kon ano gid nga sahi sang Dios si Jehova. Halimbawa, wala gid nag-ugyon si Jesus sa mga Fariseo kay daw ginapagua nila nga si Jehova mapintas, indi mapinasensiahon, wala nagaulikid, kag wala sing kaluoy. Gintudluan ni Jesus ang mga tawo nga ang iya Amay makatarunganon, mapinasensiahon, mahigugmaon, kag mapinatawaron. Bangod gin-ilog gid niya sing perpekto ang mga kinaiya sang iya Amay, nabuligan niya ang mga tawo nga makilala kon ano nga sahi sang Dios si Jehova.—Juan 14:9.
18. Paano naton mapamatud-an nga indi matuod ang malain nga ginasiling sang mga nagapamatok kay Jehova?
18 Pareho kay Jesus, masugid man naton sa mga tawo ang aton nabal-an parte kay Jehova, kag tudluan sila nga mahigugmaon kag mainayuhon gid sia nga Dios. Kon himuon naton ini, ginapamatud-an naton nga indi matuod ang malain nga ginasiling sang mga nagapamatok kay Jehova. Ginapakabalaan naton ang ngalan ni Jehova paagi sa pagbulig sa mga tawo nga tamdon ini nga balaan. Mailog man naton si Jehova bisan pa indi kita perpekto. (Efe. 5:1, 2) Paagi sa aton mga ginahambal kag mga ginahimo, mapakita naton sa mga tawo kon ano nga sahi sang Dios si Jehova, gani mapakabalaan naton ang iya ngalan. Ginabindikar naton ang iya ngalan paagi sa pagbulig sa mga tawo nga mabal-an ang kamatuoran parte sa Dios. * Ginapamatud-an man naton nga ang indi perpekto nga mga tawo puede mangin matutom sa Dios.—Job 27:5.
Gusto naton buligan ang aton mga ginatudluan sang Biblia nga mahangpan nga si Jehova mainayuhon kag mahigugmaon (Tan-awa ang parapo 18-19) *
19. Suno sa Isaias 63:7, ano gid ang dapat naton itudlo sa iban?
19 May mahimo pa kita para mapakabalaan ang ngalan ni Jehova. Kon nagatudlo kita sang mga kamatuoran sa Biblia sa iban, masami nga ginapaathag gid naton ang parte sa pagkasoberano sang Dios, nga si Jehova ang may kinamatarong nga maggahom sa uniberso. Importante gid man nga itudlo sa ila ang mga kasuguan sang Dios, pero mas importante nga buligan naton sila nga higugmaon ang aton Amay nga si Jehova kag mangin matutom sa iya. Gani dapat naton ipaathag sing maayo ang dalayawon nga mga kinaiya ni Jehova, kag kon ano nga sahi sang Dios si Jehova. (Basaha ang Isaias 63:7.) Kon himuon naton ini, mabuligan naton ang iban nga higugmaon si Jehova kag tumanon sia bangod gusto nila mangin matutom sa iya.
20. Ano ang binagbinagon naton sa masunod nga artikulo?
20 Paano naton masigurado nga ang aton mga ginahimo kag paagi sang pagtudlo makabulig sa iban nga dayawon si Jehova kon mabatian nila ang iya ngalan, kag magapalig-on sa ila nga mangin suod sa iya? Sabton ini nga pamangkot sa masunod nga artikulo.
AMBAHANON 2 Jehova ang Imo Ngalan
^ par. 5 Ano nga hulusayon ang importante gid sa mga tawo kag mga anghel? Ngaa importante ini, kag paano kita nadalahig sa sini? Kon mahangpan naton ang mga sabat sa sini nga mga pamangkot, magabakod pa gid ang aton kaangtanan kay Jehova.
^ par. 18 Kon kaisa, ang aton mga publikasyon nagasiling nga indi na kinahanglan ibindikar ang ngalan ni Jehova. Ngaa? Bangod wala man sing may nagsiling nga indi takus si Jehova nga magdala sang iya ngalan. Pero gin-athag ini sa annual meeting sang 2017. Ang tsirman nagsiling: “Indi sala nga ipangamuyo ang pagbindikar sa ngalan ni Jehova kay kinahanglan ibindikar ang iya reputasyon.”—Tan-awa ang Enero 2018 nga programa sa jw.org®. Buksi ang LIBRARY > JW BROADCASTING®.
^ par. 62 MGA PIKTYUR: Ginapasipalahan sang Yawa ang Dios, kag ginasilingan niya si Eva nga ang Dios butigon. Sa sulod sang ginatos ka tuig, ginpalapnag ni Satanas ang mga kabutigan, pareho sang panudlo nga ang Dios mapintas kag wala Niya gintuga ang tawo.
^ par. 64 PIKTYUR: Ginapaathag sing maayo sang isa ka brother sa iya ginatudluan sang Biblia ang parte sa mga kinaiya sang Dios.
