1-2. Dahaka mai anina bada herevadia be Iehova ena Witnes taudia ese idia laloa bada?

HARI inai negai, ita ese inai mai anina bada herevadia ita laloa be namo​—Iehova ena lohia siahuna bona Iena ladana hahelagaia karana. Ita be Iehova ena Witnes taudia dainai mai moale ida unai gaudia ita herevalaia. To, namo lasi ita laloa, Dirava ena lohia siahuna bona iena ladana hahelagaia karana be gau idaudia rua.

² Ita ibounai ita diba Dirava ena ladana ita hahelagaia be namo. Danu, ita dibaia gauna ta be Iehova ena lohia siahuna, eiava lohia dalana be hereadae. Unai gaudia rua be mai anina bada.

3. Inai ladana Iehova ese dahaka ia hahedinaraia?

³ Oibe, inai ladana Iehova be iseda Dirava ena kara ibounai ia herevalaia, iena lohia dalana danu. Unai dainai bema ita gwau Iehova ena ladana ita hahelagaia karana be mai anina bada, vadaeni Iehova ena lohia dalana be hereadae ita hamomokania karana be mai anina bada danu. Iehova ena ladana ese ena lohia dalana ia hahedinaraia, badina ia be siahu ibounai Lohiabadana.​—Maua itaia: “ Mai Anina Bada Herevana Bona Ena Kahana Ma Haida.”

4. Salamo 135:13 ese Dirava ena ladana be edena bamona ia herevalaia, bona edena henanadai do ita haerelaidia?

⁴ Inai ladana Iehova be idau momokani. (Salamo 135:13 duahia.) Dahaka dainai Dirava ena ladana be mai anina bada? Matamanai edena dala ai iena ladana idia hadikaia? Edena dala ai Dirava ese iena ladana ia hahelagaia? Bona edena dala ai iena ladana ita gimaia diba? Mani unai henanadai edia haere ita tahua.

5. Ma haida ese Dirava ena ladana hahelagaia karana be edena bamona idia laloa?

⁵ Iesu ia gwau: “Ibounai ese oiemu ladana do idia hahelagaia.” (Mat. 6:9) Iseda guriguri ai unai ita gwauraia guna be mai anina bada. To, Iesu ena hereva ena anina be dahaka? Gau ta ita hahelagaia ena anina be, unai gauna be ia helaga bona ia goeva. To, reana haida idia laloa, ‘Iehova ena ladana be ia helaga bona ia goeva vadaeni, ani?’ Unai ita haerelaia totona, ta ena ladana ese ia hahedinaraia gaudia ita laloa be namo.

6. Dahaka dainai ta ena ladana be mai anina bada?

⁶ Ta ena ladana be pepa dekenai idia torea eiava idia gwauraia herevana ta sibona lasi. Baibel ia gwau: “Tau ta ena ladana namona ese davana bada muramura mai bonana namo ia hereaia noho.” (Had. 7:1; Aon. 22:1) Dahaka dainai ta ena ladana be mai anina bada? Badina unai ese ta ena kara, eiava ma haida ese unai ladana ia abia tauna idia laloa dalana ia hahedinaraia. Unai dainai pepa dekenai ta ena ladana idia torea eiava idia gwauraia dalana be gau badana lasi. To, mai anina bada gauna be unai be daika ena ladana, bona ma haida ese unai ladana idia duahia eiava idia kamonai neganai dahaka lalohadai idia abia.

7. Edena dala ai taunimanima ese Dirava ena ladana idia hadikaia?

⁷ Taunimanima ese Iehova idia gwauraia koikoi neganai, idia ura ma haida do idia laloa ia be tau dikana. Unai bamona idia karaia neganai, iena ladana idia hadikaia. Nega ginigunana ta ese Dirava ena ladana bona iena kara idia gwauraia dika karana be Eden umana ai ia vara. Unai kara amo dahaka ita dibaia?

8. Adamu bona Heva be dahaka idia diba, bona edena henanadai idia vara?

⁸ Adamu bona Heva be Iehova ena ladana bona iena kara idia diba namonamo. Idia diba Iehova be Havaraia Tauna, idia dekenai mauri bona noho gabuna hairaina ia henia, bona idia be goevadae taudia. (Gen. 1:26-28; 2:18) To, edia lalona goevana idia gaukaralaia Iehova ese idia totona ia karaia gau namodia ibounai idia laloa dobu totona, a? Idia ese Iehova dekenai lalokau bona tanikiu karana idia hahedinaraia, a? Dirava ena inai tauna ese idia ia tohoa neganai, ia vara gauna amo haere ita diba.

9. Genese 2:16, 17 bona 3:1-5 ai, Iehova ese Adamu bona Heva dekenai dahaka ia gwau, bona Satani ese edena dala ai unai hereva ia mogea?

 ⁹ Genese 2:16, 17 bona 3:1-5 duahia. Satani be gaigai ta ia gaukaralaia bena Heva ia nanadaia: “Momokani, uma gabu ena au huahua ta ania lasi taravatu Dirava ese ia atoa o lasi?” Satani ese Heva ia koia bena Dirava dekenai ia laloa kerere. Dirava ia gwau au ibounai edia huahua idia ania diba, to au tamona sibona ena huahua do idia ania lasi. Adamu bona Heva be au idauidau momo edia huahua idia ania diba. (Gen. 2:9) Oibe, Iehova be hariharibada Diravana. To, Dirava ese Adamu bona Heva ia hamaoroa au tamona ena huahua do idia ania lasi. Unai dainai Satani ena henanadai ese unai hereva momokani ia mogea. Satani ena henanadai amo ia hahedinaraia toana be Dirava be mataganigani tauna. Reana Heva ia laloa, ‘Dirava be gau namona ta ia hunia noho, a?’

10. Edena dala ai Satani ese Dirava ena ladana ia hadikaia, bona dahaka ia vara?

¹⁰ Satani ese unai henanadai ia henia neganai, Heva be Iehova ia badinaia noho. Heva ese Satani dekenai Dirava ena taravatu ia gwauraia lou. Danu ia gwau, unai au huahua do idia dogoatao lasi. Heva ia diba Dirava ena taravatu idia badinaia lasi neganai do idia mase. To, Satani ia gwau: “Dohore umui mase lasi.” (Gen. 3:2-4) Satani be ia hunia lasi, to maoromaoro Heva dekenai ia hahedinaraia Iehova be koikoi tauna, bona Dirava ena ladana ia hadikaia. Unai amo Satani be diabolo eiava ladana hadikaia tauna ai ia lao. Heva be Satani ese ia koia bona ena hereva ia abia dae. (1 Tim. 2:14) Ia ese Iehova ia laloa bada lasi, to Satani ia abidadama henia. Unai dainai ia auka lasi abia hidi kererena ia karaia, bona ena lalona ia hadaia Iehova ia gwau-edeede henia totona. Bena Heva ese Iehova ia taravatua au huahua ia ania matamaia. Unai murinai Adamu dekenai taina ia henia ia ania totona.​—Gen. 3:6.

11. Adamu bona Heva be dahaka idia karaia diba, to idia karaia lasi?

¹¹ Heva be Satani dekenai inai bamona bema ia hereva: “Lau be oi lau diba lasi, to egu Tamana, Iehova lau diba. Ia lau lalokau henia bona lau abidadama henia. Ia ese lau bona Adamu dekenai gau ibounai ia henia. Oi be maoro lasi unai koikoi herevadia oi gwauraia! Oi siri!” Iehova be do ia moale bada, bema ena lalokau natuna kekenina be unai bamona ia hereva! (Aon. 27:11) To, Heva be Iehova dekenai noho hanaihanai lalokauna ia hahedinaraia lasi; Adamu danu be unai bamona ia karaia. Adamu bona Heva be edia Tamana idia lalokau henia lasi dainai, iena ladana idia hadikaia herevadia idia koua lasi.

12. (a) Edena dala ai Satani ese Heva ena lalona dekenai daradara ia havaraia? (b) Adamu bona Heva be dahaka idia karaia lasi?

¹² Ita itaia vadaeni, Satani be Iehova ena ladana ia hadikaia bona Heva ena lalona dekenai daradara ia havaraia, unai amo do ia laloa Iehova be Tamana dikana. Bena Adamu bona  Heva ese Iehova ena ladana namona idia hahelagaia lasi. Unai dainai ia auka lasi Satani ena hereva idia abia dae bona edia Tamana idia gwau-edeede henia. Hari, Satani be unai dala ia gaukaralaia noho. Ia be hereva koikoidia amo Iehova ena ladana ia hadikaia noho. Bona unai hereva koikoidia idia abia dae taudia ia veria diba, Iehova ena lohia dalana maorona idia dadaraia totona.

13. Edena dala ai Esekiela 36:23 ese Baibel ena hereva badana ia hahedinaraia?

¹³ Iehova be ena ladana idia hadikaia neganai gau ta ia karaia lasi, a? Lasi! Ia be kara ta ia karaia. Baibel ena sivarai ibounai ese ia hahedinaraia Iehova be kara ta ia karaia vadaeni, unai ese ia hahedinaraia Eden umana ai ia totona idia gwauraia herevadia be koikoi. (Gen. 3:15) Baibel ena hereva badana be inai: Iehova be ena Natuna ese ia lohiaia Basileiana amo Iena ladana do ia hahelagaia, bona tanobada dekenai kara maoromaoro bona maino do ia havaraia lou. Baibel ena hereva ese ita idia durua unai amo ita laloparara Iehova be edena dala ai ena ladana do ia hahelagaia.​—Esekiela 36:23 duahia.

14. Iehova ese Eden umana ai ia vara gwau-edeede karana ia hamaoromaoroa dalana ese edena dala ai iena ladana ia hahelagaia?

¹⁴ Satani be ia gaukara goada noho, ia ura Iehova ia koua ena ura ia hagugurua lasi totona. To Satani be hanaihanai ia kwalimu lasi. Baibel ese Iehova ia karaia gaudia ia hahedinaraia, bona ia hamomokania ta be Iehova Dirava bamona lasi. Oibe, Satani ena gwau-edeede karana bona ia idia badinaia taudia ese Iehova ena lalona idia hahisia bada. (Sal. 78:40) To, Iehova be mai aonega, haheauka, bona hahemaoro goevana ida iena ladana idia hadikaia karana ia hamaoromaoroa. Danu, ia ese dala idauidau ai ena siahu bada ia hahedinaraia. Mai anina bada gauna be ia karaia gaudia ibounai dekenai ena lalokau ia hedinarai. (1 Ioa. 4:8) Iehova be ia gaukara noho ena ladana ia hahelagaia totona.

15. Satani be edena dala ai Dirava ena ladana ia hadikaia noho, bona unai ese dahaka ia havaraia?

¹⁵ Hari, Satani be Iehova ena ladana ia do hadikaia noho. Taunimanima ia koia noho  unai amo idia ese Dirava ena siahu, hahemaoro goevana, aonega, bona lalokau karana idia daradaralaia. Hegeregere, Satani ese taunimanima ia koia noho unai amo do idia abia dae Iehova be Havaraia Tauna lasi. Danu, bema taunimanima idia abia dae Dirava ia noho, Satani ia ura idia ia koia unai amo do idia laloa Dirava be kara auka tauna bona Iena taravatu be idia auka. Danu, Satani ese taunimanima ia koia bona ia gwau Dirava be dagedage tauna bona hel lahina lalonai taunimanima ia hahisia noho. Taunimanima be unai bamona koikoi herevadia abia dae neganai, ia auka lasi Iehova ena lohia dalana maorona idia dadaraia totona. Satani ia do mauri noho lalonai, ia ese Iehova ena ladana do ia hadikaia noho, bona do ia hekwarahi oi ia veria danu Iehova oi dadaraia totona. Satani do ia kwalimu, a?

16. Edena dala ai Adamu bona Heva ese idia karaia lasi gauna oi karaia diba?

¹⁶ Iehova ese goevadae lasi taudia ia abia dae iena ladana idia hahelagaia totona. Unai dainai oi ese Adamu bona Heva idia karaia lasi gauna oi karaia diba. Herevana Iehova ena ladana idia hadikaia taudia momo huanai oi noho, to inai hereva momokanidia oi gwauraia diba: Iehova be helaga, ia kara maoromaoro, ia kara namo, bona lalokau ia hahedinaraia. (Isa. 29:23) Oi hahedinaraia Iehova be emu Lohia. Taunimanima oi hadibaia Iehova ena lohia dalana sibona be maoromaoro bona ia havaraia gaudia ibounai dekenai maino bona moale do ia mailaia.​—Sal. 37:9, 37; 146:5, 6, 10.

17. Edena dala ai Iesu ese Tamana ena ladana ia gwauraia hedinarai?

¹⁷ Iehova ena ladana ita gwauraia hedinarai neganai, unai be Iesu Keriso ena haheitalai ita badinaia. (Ioa. 17:26) Iesu be ma haida dekenai ena Tamana ena ladana ia gwauraia hedinarai sibona lasi, to Iehova ena kara ia hadibadia danu. Hegeregere, ia ese Farisea taudia edia hereva ia hakoikoia badina idia gwau Iehova be dagedage, kara auka, hebogahisi lasi, bona taunimanima amo ia daudau Diravana. To, Iesu ese taunimanima ia hadibaia iena Tamana be ma haida ia laloa bada, ia haheauka, lalokau ia hahedinaraia bona dika ia gwauatao. Danu, Iesu ena dina ta ta maurina ai Tamana ena kara ia tohotohoa goevagoeva, unai amo taunimanima ia durua Iehova idia dibaia totona.​—Ioa. 14:9.

18. Edena dala ai Iehova ena ladana idia hadikaia herevadia ita hakoikoia diba?

 ¹⁸ Iesu bamona, taunimanima ita hadibaia Iehova be lalokau bona hebogahisi Diravana. Unai bamona ita karaia neganai, Iehova ena ladana idia hadikaia herevadia ita hakoikoia. Iehova ena ladana ita hahelagaia neganai, taunimanima do idia diba ia be helaga. Ita ese Iehova ita tohotohoa diba. Herevana ita be goevadae lasi, to unai ita karaia diba. (Efe. 5:1, 2) Iseda hereva bona kara amo taunimanima dekenai Iehova ena kara ita hahedinaraia neganai, iena ladana ita hahelagaia unai. Taunimanima ese Iehova ena ladana dekenai idia abia lalohadai kereredia amo idia ita ruhaia neganai, Iehova ena ladana ita hahelagaia. Danu ita hamomokania goevadae lasi taudia be Dirava idia badinaia noho diba.​—Iobu 27:5, NWT.

19. Isaia 63:7 ena hereva bamona, ma haida ita hadibaia neganai, iseda tahua gauna be dahaka?

¹⁹ Mani ita badinaia diba dalana ma ta ita laloa. Ma haida dekenai Baibel ena hereva momokani ita hadibaia neganai, nega momo Dirava ena lohia siahuna ita herevalaia, bona ita hahedinaraia Iehova be mai ena maoro inai tanobada do ia lohiaia, bona unai be momokani. Idia dekenai Dirava ena taravatu ita hadibaia be mai anina bada, to iseda tahua gauna be ita ura ma haida ita durua iseda Tamana, Iehova, idia lalokau henia bona idia badinaia totona. Unai dainai namona be Iehova ena kara namodia ita herevalaia, bona ita hahedinaraia ia be edena bamona Diravana. (Isaia 63:7 duahia.) Unai dala amo, ma haida do ita durua Iehova do idia kamonai bona lalokau henia totona, badina idia ura ia idia badinaia.

20. Stadi atikol 24 ese edena henanadai do ia haerelaia?

²⁰ Edena dala ai iseda kara bona hadibaia dalana ese Iehova ena ladana ia hahelagaia bona ma haida ia veria Iehova kahirakahira idia lao totona? Stadi atikol 24 ese unai henanadai do ia haerelaia.