ORUPA RWOMAKONḒONONENO 23
“Ena roye ngari yapurwe”
“Ena roye, Muhona, ri karerera ngaaruhe.”—EPS. 135:13.
EIMBURIRO 10 Tangeye Jehova, Mukuru wetu!
OMAPU KU MATU KATARA *
1-2. Omapu yeṋe nge ri omananḓengu kOvahongonone va Jehova?
EṰE ndino tu norupa momapu omananḓengu nga, ousemba wa Mukuru womananeno nokuyapura ena re. OtjOvahongonone va Jehova, eṱe twa suvera okuhungira ohunga nomapu omananḓengu ngo. Hapo ousemba wa Mukuru womananeno nokuyapura ena re oviṋa vivari mbya panguka? Kako, katjiperi.
2 Eṱe atuhe tu muna kutja ena ra Mukuru ma ri sokuyapurwa. Eṱe wina twe rihonga kutja ousemba wa Jehova womananeno poo omuano me honapara mau sokurira omusembasemba. Kunao omapu ayeevari nga omananḓengu.
3. Ena ra Jehova rikamburira mo ye?
3 Ena ra Jehova rikamburira mo oviṋa avihe ohunga na Mukuru wetu nomuano me honapara. Kunao indu tji matu tja okuyapura ena ra Jehova epu enanḓengu, wina matu tja omuano Jehova me honapara mau sokurira omusembasemba. Ena ra Jehova rikamburira mo omuano eye me honapara otja ngu ri Ombara nomunamasaaehe.—Lesa okawongo nga “ Omapu omananḓengu.”
4. Epsalme 135:13 ri tja vi ohunga nena ra Mukuru nu omapuriro yeṋe ngu maye ka zirwa morupa ndwi?
4 Ena ndi Jehova, ena enanḓengu tjinene. (Lesa Epsalme 135:13.) Ongwaye ena ra Mukuru tji ri ri enanḓengu? Oro ra yambururwa vi rutenga? Mukuru we ri yapura vi? Nu eṱe matu yenene vi okuvatera okuyapura ena re? Ngatu hungirire komapuriro ngo.
OUNANḒENGU WENA
5. Ovikeṋa tjiva mbi mape ya ovandu ave pura indu tjiva zuu kutja ena ra Mukuru ri sokuyapurwa?
5 “Ena roye ngari yapurwe.” (Mat. 6:9) Jesus wa tja, ihi matji sokurira otjiṋa otjinanḓengu tji matu sokukumbira. Hapo Jesus aa hee tjike? Okuyapura otjiṋa ku heya okutjikohorora. Posi yokutja tjiva mape ya ave pura kutja, ‘Ena ra Jehova ka yapuke rukuru?’ Kutja tu zire epurire ndo, matu hepa okuripura kutja ena rikamburira mo ye.
6. Otjikwaye tji tji tjita kutja ena ri rire enanḓengu?
6 Ena kambo ndi tjangwa pombapira uriri poo nda rukirwa okuisanewa. Tara ku imbi Ombeibela mbi i hungira: “Ena ewa oro enanḓengu poutumbe auhe.” (Omiano 22:1; Omuzuv. 7:1) Ongwaye ena tji ri ri enanḓengu nao? Mena rokutja ena rikamburira mo omuano mbu u tjiukwa i varwe. Kunao, ena mu ri tjangwa pombapira poo nandarire omuano mbu ri isanewa ka mburi omunahepero, nungwari otjiṋa otjinanḓengu omuano ovandu mu ve ripura indu tji va munu poo tji va zuu ena ndo.
7. Ovandu va yamburura vi ena ra Mukuru?
7 Indu ovandu tji mave kora ovizeze ohunga na Jehova, ve tjita kutja varwe ve ute okukara noumune ouvi ohunga na ye. Indu ovandu tji va munu oviṋa ovivi ama vi tjitwa ve uta okuyandja ondjo ku Mukuru nokuyamburura ena re. Otjikando otjitenga omundu tja yamburura Mukuru nokukondja kutja ovandu ve ute okukara noumune ouvi ohunga na ye yari motjikunino tja Eden. Tara koviṋa mbi matu rihongo ohunga nomuano Mukuru ma yambururwa.
OMUANO OMUTENGA ENA RA MUKURU MU RA YAMBURURWA
8. Adam na Eva aave tjiwa ye nu omapuriro yeṋe ngu matu yenene okupura?
8 Adam na Eva aave tjiwa kutja ena ra Mukuru o Jehova, nu wina aave tjiwa oviṋa ovingi ovinanḓengu ohunga na ye. Otjotjihorera, owo aave tjiwa kutja eye ongweve uta, ongweve pa omuinyo, ongweve pa omaturiro omawa okutura mo norukupo oruwa. (Gen. 1:26-28; 2:18) Hapo owo aave ripurire koviṋa avihe oviwa Jehova mbye ve tjitira? Hapo owo aave kurisa orusuvero nokuraisa ondangi ku Jehova? Omaziriro komapuriro ngo ya rira omakahu indu omunavita na Mukuru tje ve rora.
9. Otja ku Genesis 2:16, 17 no 3:1-5, ovikwaye Jehova mbya raera kovakupasane ovatenga, nu Satan wa rundurura vi ouatjiri mbo?
9 Lesa Genesis 2:16, 17 na 3:1-5. Mokutjita kutja pe munike aayo onyoka ondjaai hungire, Satan wa pura Eva kutja, “Indu Ndjambi otja hee, tjiri, kutja aamu ri komiti ngamwa avihe motjikunino?” Epuriro ndo ra ri notjizeze tji tjari tjimuna owanga mbwa horekwa. Otjiperi kutja Mukuru we ve raera kutja owo mave yenene okurya komiti avihe motjikunino pendje nomuti umwe. Adam na Eva atja ve yenena okurya komiti omingi pekepeke motjikunino. (Gen. 2:9) Oukahu kutja, Jehova omuharupu. Posi yokutja, Mukuru wa tja Adam na Eva kave nousemba wokurya komuti umwe motjikunino. Kunao epuriro Satan nda pura ra tjita kutja ouatjiri u munike aayo otjizeze. Satan wa tjita kutja pe munike aayo Mukuru omuruvandu. Eva mape ya ee ripura kutja, ‘hapo pe notjiṋa otjiwa Mukuru tje hi nokuvanga kutja mbi kare natjo?’
10. Omomuano uṋe Satan ma yamburura ena ra Mukuru nu kwa kongorera tjike?
10 Indu Satan tja pura epuriro ndo, oruveze ndo Eva wa ri nonḓuviro ku Jehova. Eye wa raera Satan imbi Mukuru mbya hungira. Eye wina wa tja kave sokuṱuna ko komuti mbo. Eye aa tjiwa kutja okuhina okukara nonḓuviro kerakiza ra Mukuru maku yeta onḓiro. Posi yokutja Satan wa tja: “Kamambo! Indee uri, kamaamu ṱu!” (Gen. 3:2-4) Satan kaa hee kutja Jehova wa kora ovizeze. Eye wa yamburura ena ra Mukuru mokuraera Eva kutja Jehova omunavizeze. Mena ranao, Satan ope zokuisanewa Omudiaboli poo omuyamburure. Eva tjiri wa wovisiwa mokukambura mu Satan. (1 Tim. 2:14) Eye wa kambura mu Satan pendje nokukambura mu Jehova. Iho tja tjita kutja iri re oupupu ku Eva okutoora omukambo omuvi mbwo. Eye wa toorora okuhinokukara nonḓuviro ku Jehova. Nu wa rya komuti Jehova mbwe ve tjaera kutja ave ha ri ko. Kombunda ya nao eye wa yandja ku Adam.—Gen. 3:6.
11. Ovanene vetu ovatenga aave sokutjita vi, nu otjikeṋa tji ve ha tjitire?
11 Ripura nomuano Eva ma tja zira Satan. Andakuzu wa zira nai: “Ami hi kui me tjiwa Tate Jehova, ami mbe mu suvera nu mbi nongamburiro mu ye. Eye we tupa oviṋa avihe ami na Adam mbi tuna vyo. Ko nokuṱohoṋi okuhungira oviṋa ovivi ohunga na ye? Ka wondje twende!” Tjiri Jehova atja kara nondjoroka okuzuva omambo omaṱakame ngo okuza komuatje we omukazona. (Omiano 27:11) Posi yokutja Eva kaari norusuvero oruṱakame ku Jehova nu nandarire Adam. Mena rokuhinorusuvero ndwo ku Ihe, Adam na Eva kave toṋene okuyapura ena re.
12. Omomuano uṋe Satan ma tjita kutja Eva ma ute okukeyakeya, nu Adam na Eva aave sokutjita ye?
12 Otja tji twa munu, Satan wa tjita kutja Eva ma keyakeye. Satan wa yamburura ena ra Jehova mokukondja okutjita kutja Eva ma ute okukara nomakeyakeyero ohunga na Jehova. Kunao Adam na Eva kave toṋene okuyapura ena ra Jehova. Iho tja tjita kutja tji rire oupupu kuwo okupuratena ku Satan nokupirukira Mukuru. Ndino Satan u ungurisa omiano otjingevyo. Eye u zunḓa nokuyamburura ena ra Jehova. Irira oupupu kovandu mba mbe kambura movizeze vya Satan okunakaura ousemba wa Jehova womananeno.
JEHOVA MA YAPURA ENA RE
13. Esekiel 36:23 ri ṋunisa vi ombuze onanḓengu yOmbeibela?
13 Hapo Jehova u yakura omayambururiro ngo nokuhina okutjita otjiṋa? Kako katjiperi. Omatjangwa aehe wOmbeibela ye tu raera kutja Jehova wa tjita tjike okuraisa kutja oviṋa avihe ovivi mbya hungirwa ohunga na ye motjikunino tja Eden kawatjiri. (Gen. 3:15) Kombanda ya nao, matu yenene okutwapo ombuze yOmbeibela onanḓengu momuano mbwi, Jehova ma yapura ena re mokupitira mOuhona mbu mau honaparerwa po i Omuna we nokuyeta ohange nousemba kombanda yehi. Ombeibela i nondjivisiro ndji mai tu vatere okuzuva nawa omuano Jehova mu ma yapura ena re nondoṋeno.—Lesa Esekiel 36:23.
14. Omukambo Jehova mbwa toora komapirukiro motjikunino tja Eden kwa yapura vi ena re?
14 Satan wa kondja nomasa okutjaera Jehova okuyenenisa ondando ye. Posi yokutja Satan ka toṋene mozongondjero ze nḓo. Ombeibela i raisa imbi Jehova mbya tjita, nu wina i raisa kutja Jehova tjiri o Ihe worusuvero nomuhonapare omusembasemba. Otjiperi kutja omapirukiro wa Satan na imba mbe rikuta kuna ye va hihamisa Jehova tjinene. (Eps. 78:40) Nandarire nao, Eye wa tjinda omapirukiro ngo nounongo nomuretima nousemba. Eye wina wa raisa omasa we momiano omingi pekepeke. Kombanda yaavihe, wa raisa orusuvero mu avihe mbye tjita. (1 Joh. 4:8) Jehova u kayenda komurungu okuyapura ena re.
Satan wa kora ovizeze ku Eva ohunga na Jehova nu oure wozombura ozengi Omudiaboli wa kayenda komurungu okuyamburura Mukuru (Lesa oparagrafa 9-10, 15) *
15. Satan u yamburura vi ena ra Mukuru ndino nu ku kongorera ye?
15 Satan ngamba u kayenda komurungu okuyamburura ena ra Mukuru ndino. U tjita kutja ovandu ve kare nomakeyakeyero kutja, Mukuru omunamasa, we ura nousemba, onongo nu u norusuvero. Otjotjihorera, Satan u kondja okutjita kutja ovandu ve kare noumune wokutja Jehova ka ngwa uta oviṋa avihe. Nu indu ovandu tji ve kambura mu Mukuru, Satan u kondja okutjita kutja ve kambure kutja omirari vya Mukuru omizeu okuvikongorera nu kamisemba. Eye wina u honga ovandu kutja Jehova ke notjari nu o Mukuru ngu nyosa ovandu motjovasengwa. Indu tji va kambura movizeze mbyo, irira oupupu kuwo okunakaura ousemba wa Jehova womananeno. Ngunda Jehova e hiya yandeka Satan oparukaze, Satan ma kayenda komurungu okuyamburura Jehova neye ma kondjo okutjita kutja u pirukire Jehova wina. Hapo eye ma toṋa?
OVE U NORUPA MOMBATA NDJI
16. Otjikeṋa tji mo yenene okutjita Adam na Eva tji ve ha tjitire?
16 Jehova u yandjera ovandu mbe heri ohomonena okukara norupa okuyapura ena re. Kunao ove mo yenene okutjita imbi Adam na Eva mbi ve ha tjitire. Nandarire kutja u hupa mouye mbwe ura ovandu mbe yamburura nokuzunḓa ena ra Jehova, ove mo yenene okuyapura ena re nokuraera ovandu kutja Jehova omuyapuke, omusemba, omuwa nu u norusuvero. (Jes. 29:23) Ove mo yenene okuyandja oruvara kouhonapare we. Mo yenene okuvatera ovandu okutjiwa kutja ouhonapare wa Jehova ombu ri ousembasemba, nu owo auyerike ombu mau yeta ohange nondjoroka koviutwa avihe.—Eps. 37:9, 37; 146:5, 6, 10.
17. Omomuano uṋe Jesus ma tjiukisa ena ra Ihe?
17 Indu tji matu yapura ena ra Jehova, eṱe tu kongorera otjihorera tja Jesus Kristus. (Joh. 17:26) Jesus ka tjiukisire ena ra Ihe mokuriungurisa uriri nungwari we ritjiukisa mokuhonga ovandu kutja Jehova omundu ngu ri vi. Otjotjihorera, eye kaai kumwe nomahongero wOvafarisei mbaave hongo kutja, Jehova o Mukuru ngu hi nakonatja, ngu ṋiṋikiza, ngu ri kokure novandu nu ngu hi notjari. Jesus wa vatera ovandu okumuna kutja Ihe u rikendera ovandu, u nomuretima, we ura norusuvero nu u isira. Omuano maa horere kovikaṋena vya Ihe okuura kwa vatera ovandu okutjiwa Jehova.—Joh. 14:9.
18. Ovikwaye mbi matu yenene okutjita okuraisa kutja oviṋa ovivi ovapirukire mbi va hungira ohunga na Jehova kawatjiri?
18 Tjimuna Jesus, matu yenene okuraera ovandu imbi mbi matu tjiwa ohunga na Jehova, nokuhonga ovandu kutja Jehova o Mukuru worusuvero. Indu tji twa tjiti nao tu pirukira ovizeze nondjambu ndja tjitwa ku Jehova. Tu yapura ena ra Jehova mokutjita kutja ri rire eyapuke momitima namourizemburuka wovandu. Eṱe wina matu yenene okuhorera ku Jehova. Eṱe matu yenene okutjita nao nandarire kutja kaweṱe ohomonena. (Ef. 5:1, 2) Indu omambo novitjitwa vyetu tji mavi raisa kovandu kutja Jehova omundu nguri vi, tu yapura ena re. Tu yapura ena ndo mokuvatera ovandu okutjiwa ouatjiri ohunga na Mukuru. * Eṱe wina tu raisa kutja ovandu mbe heri ohomonena mave yenene okurira ovaṱakame ku Mukuru.—Job 27:5.
Eṱe tu vanga okuvatera ovahongwa vetu wOmbeibela okutjiwa ovikaṋena vya Jehova vyorusuvero (Lesa oparagrafa 18-19) *
19. Omomuano uṋe Jesaja 63:7 mu ri tu vatera okutjiwa kutja ombuze onanḓengu yomahongero wetu ooiṋe?
19 Pena otjiṋa tjarwe tji matu yenene okutjita okuyapura ena ra Jehova. Indu tji matu hongo ovandu varwe ouatjiri wOmbeibela, tu ṋunisa kutja Jehova ongu nousemba okuhonaparera po ehi nu iho tjiri ouatjiri. Nandarire kutja otjiṋa otjinanḓengu okuhonga omatwako wa Mukuru, ondando yetu onene okuvatera ovandu kutja ve suvere Jehova nokutja ve rire ovaṱakame kuye. Kunao tu tjiukisa ovikaṋena vya Jehova oviwa, nokuṋunisa kutja ena re ri heya ye. (Lesa Jesaja 63:7.) Indu tji matu hongo momuano mbo tu vatera varwe okusuvera Jehova nokukara nonḓuviro kuye, mena rokutja owo ve vanga okukara nouṱakame kuye.
20. Matu ka hungirira ku ye morupa ndu ma ru kongorere ko?
20 Hapo matu tjiwa vi kutja ovitjitwa vyetu nomuano mutu honga mau vatere vi varwe okukara noumune ouwa ohunga na Jehova nokutumbuka kuye? Orupa ndu maru kongorere ko ma ru ziri epuriro ndo.
EIMBURIRO 2 Jehova ena roye
^ par. 5 Epu riṋe ndi ri enanḓengu kovandu novaengeli? Ongwaye epu ndo tji riri enanḓengu, nu omomuano uṋe mu tu norupa? Okuzuva nawa omaziriro komapuriro ngo, maku tu vatere okupamisa oupanga wetu kuna Jehova.
^ par. 18 Povikando tjiva omambo yetu aaye tja ena ra Jehova ka ri nokuhepa okuyapurwa mena rokutja ka pe nomundu ngwa rora okutja Mukuru ke nousemba okukara nena ndi Jehova. Posi yokutja pombongarero ndji tjitwa rumwe mombura, mombura ndji 2017 omazuviro ngo ya zengururwa. Omuhaamise wombongarero wa tja: “Oukahu kutja ka navi tji matu kumbu kutja ena ra Jehova ri yapurwe mena rokutja omuano mbwe tjiukwa ombu mau sokuyapurwa.”—Tarera oprograma ya Januari 2018 ko jw.org®. Twende korupa rOtjiingirisa ndwi LIBRARY > JW BROADCASTING®.
^ par. 62 OMAKAHURURIRO WOVIPERENDERO: Omudiaboli wa yamburura Mukuru, mokuraera Eva kutja Mukuru u novizeze. Moure wozombura ozengi, Satan wa handjaura ovizeze tjimuna omahongero wokutja Mukuru kenatjari nokutja Eye kamemene ovandu.
^ par. 64 OMAKAHURURIRO WOVIPERENDERO: Omurumendu omukambure ma hungirire kovikaṋena vya Mukuru otja tji ma hongo omuhongwa we wOmbeibela.
