1-2. Anni ira nga topiko i kuruga importante para ta Saksi ira ni Jehova?

EGGA i dua nga importante nga isyu nga meparubang nittam​—soberania na Dios anna pamakasanto ta ngaganna. Bilang Saksi ira ni Jehova, kakayà tam nga paguruvovugan danatun nga interesante nga topiko. Ngem i soberania kari na Dios anna i pamakasanto ta ngaganna ay madduma nga isyu? Ari.

² Ammu tam ngamin nga mawag tu mapakasanto onu mapakarenuan i ngagan na Dios. Ammu tam gapa nga mawag nga mapakurug tu kapianan i soberania onu i pammaguray ni Jehova. Yatutta parehu nga importante yaw nga dua nga isyu.

3. Anni i nelagum ta ngagan ni Jehova?

³ Kakuruganna, konektadu ta ngagan ni Jehova i ngamin nga gannug meyannung ta Dios tam, nelagum ngana i pammagurena. Yatutta nu kagiattam nga i pinaka-importante nga isyu ay i pamakasanto ta ngagan ni Jehova, kakkagiattam gapa nga mawag tu mapakurug nga kapianan i pammagurena. Konektadu gafu i ngagan ni Jehova ta pammagurena bilang makapangngua-sa-ngamin nga Soberano.​—Innan i kahon nga “ Anni i Nelagum ta Importante nga Isyu?”

4. Anni i kagian na Salmo 135:13 meyannung ta ngagan na Dios, anna anni ira nga pakkiavu i tabbagattam taw nga artikulo?

⁴ Nerumu-ruma i ngagan ni Jehova. (Bibbigan i Salmo 135:13.) Ngatta kuruga importante i ngagan na Dios? Anni i ollu nga pamara-parake tatun? Kunnasi nga pakasantowan na Dios yatun? Anna kunnasi tam makoffun tapenu medefensa i ngaganna? Tabbagattam danatun nga pakkiavu.

5. Anni i posible nga iyavu na karuan nu maginnada nga mawag tu mapakasanto i ngagan na Dios?

⁵ “Mapakasanto paray i ngagammu.” (Mat. 6:9, NW ) Yatun i kinagi ni Jesus nga tadday ta pinaka-importante nga gannug nga  mawag tu ipakimallo tam. Ngem anni i kebalinan na kinagi ni Jesus? Tapenu mapakasanto i tadday nga gannug, mapabbalin yatun tu sagradu onu marenu. Baka iyavu na karuan, ‘Ari kari nga sagradu onu marenu ngana i ngagan ni Jehova?’ Tapenu matabbag yatun ammuattam labbi nu anni i nelagum ta tadday nga ngagan.

6. Ngatta importante i tadday nga ngagan?

⁶ I ngagan ay ari laman nga uvuvog nga metura onu mevuya. Innan nu anni i kagian na Biblia: “I makasta nga ngagan ay mas nakuan nga pilian anne ta sobra nga kinariku.” (Prov. 22:1; Ecl. 7:1) Ngatta kuruga importante i tadday nga ngagan? Megafu ta nelagum tatun i reputasion, i nononopan na totolay meyannung ta makangngagan tatun. Yari tu ari tu i ketura onu i kevuya na tadday nga ngagan i pinaka-importante, nu ari, nu anni i nonopan na totolay nu maginnada onu masingadda yatun nga ngagan.

7. Kunnasi nga zinara-daral na totolay i ngagan na Dios?

⁷ Nu makkagi i totolay tu kinaladdug meyannung kani Jehova, dara-daraladda i reputasionna. Nu daraladda i reputasionna, dara-daraladda gapa i ngaganna. I ollu nga panara-daral ta ngagan na Dios anna ta reputasionna ay nesimmu ta hardin na Eden. Ikonsidera tam nu anni i magigiammu tam tatun.

8. Anni i ammu ni Adan anni Eva, anna anni ira nga pakkiavu i awayya tam paga iyavu?

⁸ Ammu ni Adan anni Eva i ngagan nga Jehova, anna i ngamin nga importante nga gannug meyannung ta makangngagan tatun. Ammuda nga yayya i Namaratu nira, nangiyawa ta inangoda, ta makakkasta nga Paraiso nga paddianadda, anna i perfekto nga pagatawada. (Gen. 1:26-28; 2:18) Ngem tulu-tuloy kari nga usadda i perfekto nga nonoda tapenu monag nga pannonopan i ngamin nga kingngua ni Jehova para nira? Tulu-tuloy kari nga padakalladda i aya anna appresasiodda ta Persona nga irepresenta natun nga ngagan? Nabbalin tu manawag i tabbag natun ira turi ta sinenta ira na kalaban na Dios.

9. Segun ta Genesis 2:16, 17 anna 3:1-5, anni i nikagi ni Jehova ta ollu nga magatawa, anna kunnasi nga kinillu ni Satanas i kinakurug?

⁹ Bibbigan i Genesis 2:16, 17 anna 3:1-5. Niyusa ni Satanas i tadday nga iraw tapenu iyavu yaw kani Eva: “Kurug kari nga kinagi na  Dios nga ari kamu kuman ta vunga na kada kayu ta hardin?” Egga i kivuna nga kinaladdug natun nga pakkiavu. Yatutta nannono tu negatibo si Eva meyannung ta Dios. Kinagi na Dios nga awayyada kuman ta ngamin nga kayu ngem egga laman i tadday nga negamma. Siguradu nga napakaru i awayya nga kanan da Adan anni Eva. (Gen. 2:9) Wan kurug tu minangngiyawa si Jehova. Ngem nigamma na Dios nga kanan da Adan anni Eva i vunga na tadday nga kayu. Yatutta kinillu na pakkiavu ni Satanas i kinakurug. Pinalawan ni Satanas nga gittana ari tu minangngiyawa i Dios. Posible nga nanono ni Eva, ‘Egga kari i iyeyetu na Dios nga mapia niakan?’

10. Kunnasi nga direkta nga pinara-parake ni Satanas i ngagan na Dios, anna anni i resulta natun?

¹⁰ Turi ta niyavu ni Satanas yaw, tuttuttulan paga ni Eva si Jehova. Sinabbagna paga lagu si Satanas gukaban na pangivuyà ta manawag nga dob na Dios. Kinagina paga lagu nga ariadda nakuan vuluvuga nga siggeran i kayu. Ammuna i abiso na Dios nga mattuppal ta patay i ari pamarulo. Ngem kinagi ni Satanas: “Siguradu nga ari kamu matay.” (Gen. 3:2-4) Ari ngana laman nga palawanan ni Satanas nga laddug si Jehova. Direkta ngana nga paraketanna i ngagan na Dios, nga gittana kakkagianna kani Eva nga laddug si Jehova. Nabbalin gafu si Satanas nga tadday nga diablo onu minammara-parake. Interamente nga nelogo si Eva; kinurugna si Satanas. (1 Tim. 2:14) Mas nattalo yayya kani Satanas anne kani Jehova. Megafu tatun, nakangngua si Eva tu kitarrake nga desision. Dinesisionna nga ari tuttulan si Jehova. Kiminan yayya ta vunga nga nigamma ni Jehova nisa. Tapus niddanna gapa si Adan.​—Gen. 3:6.

11. Anni nakuan i kingngua na ollu nga magana tam, ngem anni i ariadda nakua?

¹¹ Anni nakuan i nitabbag ni Eva kani Satanas? Imajinan nga kunnaw i nitabbagna: “Ariattaka ammammu, ngem ammammù i Yamà, si Jehova. Ayatan anna pattalakkakku yayya. Yayya i nangiyawa nikami ni Adan ta ngamin nga egga nikami. Sinni ka gapa tapenu makkagi tu marake meyannung nisa? Manaw ka tawe!” Fermi nakuan i ayayya ni Jehova nga makaginna tatun ira nga kagian na anana! (Prov. 27:11) Ngem awan tu matalo nga aya ni Eva para kani Jehova; maski gapa si Adan. Megafu ta kurang ira tu kunnatun nga pangaya ta Yamada, ariadda nedefensa i ngaganna kontra ta pamara-parake.

12. Kunnasi nga nangimula si Satanas tu padduda ta nono ni Eva, anna anni i ari nga nakua da Adan anni Eva?

¹² Gitta na nagigiammu tam pinegafuanan ni Satanas nga daralan i reputasion ni Jehova gukaban na pangimula tu padduda ta nono nu Eva nu talaga kari nga mapia nga Yama si Jehova. Megafu tatun, ari nga nedefensa da Adan anni Eva i ngagan anna i reputasion ni Jehova. Mas mabi ngana laman para nira nga ginnan si Satanas anna marrebelde kontra ta Yamada. Kunnatun gapa ira nga taktika i usu-usan ni Satanas ta maddaggun. Dara-daralanna i ngagan ni Jehova gukaban na pamara-parake  tatun. Oras tu kurugan na totolay i kinaladdug ira ni Satanas, mabi ngana laman nga pammanakitadda i Dios bilang mammagureda.

13. Kunnasi nga isumario na Ezekiel 36:23 i pinakamensahe na Biblia?

¹³ Pagurayan ngana laman kari ni Jehova i kunnatun nga pamara-parake anna awan vuluvuga tu kuanna tapenu idefensa i baggina? Ari! Mabibbig ta interu nga Biblia nu anni i kingngua ni Jehova tapenu pakurugan nga ari tu fustu i ngamin nga marake nga gannug nga nekagi meyannung nisa ta hardin na Eden. (Gen. 3:15) Kakuruganna, mesumario tam i pinakamensahe na Biblia ta kunnaw: Pakasantowan ni Jehova i ngaganna anna itolina i kinatunung anna imammo ta davvun gukaban na Pappatulan nga immagurayan na Anana. Makoffun i mabibbig tam ta Biblia tapenu malippawa tam nu kunnasi nga ituttuppal ni Jehova i pamakasanto ta ngaganna.​—Bibbigan i Ezekiel 36:23.

14. Kunnasi nga mapakasanto i ngagan ni Jehova ta kingnguana ta rebelyon ta Eden?

¹⁴ Kingngua ni Satanas i ngamin nga mawayyana tapenu pagimmangan si Jehova ta pangituppal ta gakkagna. Ngem kanayun nga ari mavviktoria si Satanas. Ipasingan na Biblia nu anni i kingngua ni Jehova anna pakurugan natun nga si Jehova ay kurug nga minaggiddu nga Yama anna i kapianan nga Mammaguray. Kurug tu fermi nga natakitan si Jehova ta rebelyon ni Satanas anna na ngamin nga pimmanig nisa. (Sal. 78:40) Ngem nangipasingan si Jehova tu kinasirib, pappasa-pasensia, anna hustisia tapenu marubang yaw nga pamara-parake ta ngaganna. Aru gapa i kingnguana tapenu mepasingan i pakapangnguana. Pinaka-importante ta ngamin, kanayun nga masingi-singan i ayana ta ngamin nga kukukuanna. (1 Juan 4:8) Ari magiggimmang si Jehova nga pakasantowan i ngaganna.

15. Kunnasi nga para-paraketan ni Satanas i ngagan na Dios ta maddaggun, anna anni i resultana?

¹⁵ Adde ta maddaggun, para-paraketan lagapa ni Satanas i ngagan na Dios. Ilologona i totolay tapenu madduda ira nu talaga kari nga makapangngua, patas, masirib, anna minaggiddu i Dios. Angngariganna, kukkumbinsian  ni Satanas i totolay nga ari tu si Jehova i Namaratu. Anna nu kurugan na totolay nga egga i Dios, kayà ni Satanas nga nonopadda nga kuruga istrikto anna ari nga patas i Dios anna i estandartena ira. Ituttudduna paga ta totolay nga awan tu allo ni Jehova anna vayolente yayya megafu ta tuggianna i totolay ta umafa-afi nga infiernu. Nu kurugadda i kunnatun nga pamara-parake, alistu laman para nira nga pammanakitan i matunung nga pammaguray ni Jehova. Adde ta ari paga madaral si Satanas, tulu-tuloy lagapa i pamara-parakena anna purueban naka gapa nga itallikug kani Jehova. Makuana kari yatun?

16. Anni i makuam nga ari nakua da Adan anni Eva?

¹⁶ Maski imperfekto i totolay, ipamavulun lagapa ni Jehova nga mapeggan ira tu papel ta pamakasanto ta ngaganna. Yari tu makuam i ari nga nakua da Adan anni Eva. Maski paga egga ittam ta mundo nga napannu tu tolay nga minammara-parake anna manara-daral ta ngagan ni Jehova, egga i oportunidad tam tapenu idefensa i ngaganna anna kagian ta totolay nga masanto, matunung, mapia, anna minaggiddu yayya. (Isa. 29:23) Awayyam masuportan i pammagurena. Awayyam moffunan i totolay tapenu malippawada nga i pammaguray ni Jehova i interamente nga matunung anna yatun laman i makeyawa tu imammo anna pagayayya ta ngamin nga pinaratu.​—Sal. 37:9, 37; 146:5, 6, 10.

17. Kunnasi nga nipakannammu ni Jesus i ngagan na Yamana?

¹⁷ Kada idefensa tam i ngagan ni Jehova, tuttulattam i ehemplo ni Jesu-Cristo. (Juan 17:26) Nipakannammu ni Jesus i ngagan na Yamana ari laman gukaban na pangiyusa tatun nga ngagan, nu ari, gukaban na pangidefensa ta reputasion ni Jehova. Angngariganna, kinontrana i Fariseo ira nga makkakkagi nga si Jehova ay vayolente, istrikto, mariga marannian, anna awan tu allona. Zinuffunan ni Jesus i totolay tapenu masingadda nga minangngalippawa, minappasensia, minaggiddu, anna minammakoma i Yamana. Zinuffunanna paga i totolay nga mammuan si Jehova gukaban na perfekto nga pinamarigna ta kualidad ira na Yamana ta inaggaw nga pattolena.​—Juan 14:9.

18. Anni i kuattam tapenu mapakurug nga mali i kinaladdug anna pamara-parake meyannung kani Jehova?

¹⁸ Kagitta ni Jesus, mekagi tam ta totolay nu anni i ammu tam meyannung kani  Jehova anna metuddu tam nira nga minaggiddu anna masippo yayya nga Dios. Nu kuattam yatun, mapakurug tam nga mali i kinaladdug anna pamara-parake meyannung kani Jehova. Mapabbalittam nga masanto i ngagan ni Jehova gukaban na panguffun ta totolay tapenu imammatadda yatun bilang masanto. Maparigattam gapa si Jehova. Posible yatun maski nu imperfekto ittam. (Efe. 5:1, 2) Nu masingan na totolay ta uvovug anna annangngua tam i makakkasta nga reputasion ni Jehova, makoffun ittam ta pamakasanto ta ngaganna. Medefensa tam yatun nga ngagan gukaban na panguffun ta totolay nga mammuan i kinakurug meyannung ta Dios. * Mapakurug tam paga nga mapattalupaddian na imperfekto nga totolay i integridadda.​—Job 27:5.

19. Kunnasi ittam moffunan na Isaias 63:7 tapenu masingan nu anni nakuan i pinakagakkag na panuddu tam?

¹⁹ Egga paga i makua tam tapenu mapakasanto i ngagan ni Jehova. Kada ituddu tam ta tanakuan i kinakurug ira ta Biblia, maruddu nga ipatalatto tam i soberania na Dios, nga egga i kepangngattan ni Jehova nga mammaguray ta uniberso, anna fustu gapa yaw. Anna maski importante nga ituddu tam nira i dorob na Dios, i pinakagakkag na panuddu tam ay tapenu moffunan ira nga ayatan i Yama tam nga si Jehova anna mattalupaddian nga matalo nisa. Mawag gafu nga ipatalatto tam i makkarasta nga kualidad ni Jehova anna ipasingan i klase na Persona nga irepresenta na ngagan nga Jehova. (Bibbigan i Isaias 63:7.) Nu kunnatun i panuddu tam, moffunattam i tanakuan nga ayatadda si Jehova anna tuttuladda yayya megafu ta kayàda i mabbalin tu matalo nisa.

20. Anni i ikonsidera tam ta tumunug nga artikulo?

²⁰ Kunnasi tam gafu masiguradu nga makoffun ta tanakuan i annangngua anna panuddu tam tapenu manonoda i makasta ira nga gannug meyannung kani Jehova nu maginnada i ngaganna anna umaranni nisa i tanakuan? Matabbag yatun ta tumunug nga artikulo.