1-2. Aikpɛyi ɛlā nyá gē he Ācɛ Ocijali Ku Ujehofa ɔtu a?

AƐLĀ ō cɛgbá nɛhi yɔ lɛ ɛjɛɛji alɔ icɛ. É lɛ ō ya mla íkwu ku ɔcɛ́ ō ce ku Ujehofa mla iye ku nu ō le tiihɔ. Abɔ alɔ wɛ Ācɛ Ocijali Ku Ujehofa a, ó gē he alɔ ɔtu nɛhi ō kɛla lɛyikwu aikpɛyi nyā. Amáŋ, íkwu ku ɔcɛ́ ō ce ku Ɔwɔico mla iye ku nu ō le tiihɔ wɛ aɛlā ɛyɛɛyɛyi nɛɛ? Ehee.

² Alɔ le má ɛ, ka iye ku Ɔwɔico cɛgbá ō le ya tiihɔ piii. Alɔ klla le nwu duu ɛ, ɛgɛ nōó cɛgbá ō le mafu ka íkwu ku ɔcɛ́ ō ce ku Ujehofa, amāŋ ka ɔwɛ ō lé ɔcɛ́ ku nu lɔhi fiyɛ duu a. Aɛlā nyā cɛgbá nɛɛnɛhi.

3. Ɔdi nɛ iye ku Ujehofa lɛ ō ya mla ɔ a?

³ Ku ɛlā ɔkwɛyi a, iye ku Ujehofa lɛ ō ya mla ɔdā doodu lɛyikwu Ɔwɔico ku alɔ, mla ɔwɛ ō lé ɔcɛ́ ku nu duu. Ó lɛ a, ɔdaŋ ku alɔ ka ō lɛ iye ku Ujehofa tu yeŋee ŋma ɛjɛɛji ɛca wɛ ɔdā nōo cɛgbá fiyɛ a nɛɛ, ayika alɔ klla yɔ i ka ka alɔ cika ō mafu piii ku ɔwɛ ō lé ɔcɛ́ ku Ujehofa wɛ ɔwɛ nōo lɔhi fiyɛ duu a. Iye ku Ujehofa tɛɛma lɔɔlɔhi kwu ɔwɛ ō lé ɔcɛ́ ku nu, abɔ ó wɛ ɔcɛ nōo lɛ Íkwu fiyɛ duu a.—Má ikpati nōo kahinii: “ Aɔdā Nōo Wɛ Ipu Ɛlā Nōo Cɛgba Nɛhi A.”

4. Ɔdi nɛ ɔkpá ku Aíjē Kú Ɛ̄gbā 135:13 ka lɛyikwu iye ku Ɔwɔico a, aɔka nyá nɛ alɔ gáā cila ipu ikpɛyi ɛlā nyā a?

⁴ Iye nōo wɛ Ujehofa a cɛgbá nɛɛnɛhi. (Jé Aíjē Kú Ɛ̄gbā 135:13.) Ɔdiya nɛ iye ku Ɔwɔico cɛgbá nɛɛnɛhi a? Ɛgɛnyá néē kɛmgbɛ ba ɔ aflɛyi a? Ɛgɛnyá nɛ Ɔwɔico ya ku iye ku nu kóō le tiihɔ a? Ɛgɛnyá nɛ alɔ a lɔfu ya kóō le tu yeŋee a? Babanya alɔ géē cila ohi ku aɔka nyā.

5. Ɔka nyá nɛ ācɛ ōhī lɔfu da ɔdaŋ ka é le po ka iye ku Ɔwɔico cika ō le ya tiihɔ a?

⁵ “Yá ká ācɛ kéē lɛ ojīlīmā ce iyē otīihɔ kú uwɔ.” (Umát.  6:9) Ujisɔsi ka ɔdā éyi nōo cɛgbá fiyɛ duu nɛ alɔ cika ō gbɔɔkɔ lɛyikwu ɔ a yɔ a. Amáŋ ɔdi wɛ ɛyi ɛlā ku Ujisɔsi a? Ō lɛ odee ya tiihɔ wɛ ō ya ku ɔdā ɔɔma kóō le yeŋee. Ācɛ ōhī lɔfu da ɔka kahinii: ‘Iye ku Ujehofa i tiihɔ klla le yeŋee gbɔbu ŋ nɛɛ?’ O ya ku alɔ cila ɔka nyā, alɔ cika ō jé ɔdā nōo wɛ ipu iye ō lé a.

6. Ɔdi gē ya ku iye kóō cɛgbá nɛhi a?

⁶ Iye i wɛ ikpɛla nɛ ɔcɛ gē ta tu ɔkpá amāŋ hi tɛɛcɛ anca ŋ. Má ɛlā nɛ Ubáyíbu ka a: “Iyē olɔhi ō lé mla ojīlīmā cɛgbá nɛ̄hi fíyɛ́ agbénú nɛ̄hi ō lɛ á.” (Aíit. 22:1; Ɔ̄cok. 7:1) Ɔdiya nɛ iye cɛgbá nɛhi a? Ohigbu ka ó lɛ ō ya mla ɔwɛ nɛ ācɛ gē gbɛla lɛyikwu ɔcɛ nōo lé iye ɔɔma a. Ohigbu ɛnyā, ɛgɛ néē ta iye taajɛ amāŋ hi iye lɛ a, i wɛ ɔdā nōo cɛgbá fiyɛ duu a ŋ. Amáŋ ɔdā nōo cɛgbá fiyɛ duu a, wɛ ɔdā nɛ ācɛ gē gbɛla eko duuma néē lɛ iye ɔɔma má amāŋ lɛ ɔ po a.

7. Ɛgɛnyá nɛ ācɛ ya kéē biya iye ku Ɔwɔico ɛ ma?

⁷ Eko duuma nɛ ācɛ lɛ ɛkɛmgbɛ ka ba Ujehofa, é yɔ i ya ku ācɛ kéē gbɛla aɔdobɔbi lɛyikwu ɔ. Eko duuma nɛ ācɛ kē gbɔɔ ō má aɔdobɔbi nyā, é géē gbɔɔ ō ŋmo Ɔwɔico ɛpɔbi klla biya iye ku nu. Eko aflɛyi nɛ ɔcɛ éyi kɛla obɔbi lɛyikwu Ɔwɔico, klla ya ku ācɛ kéē gbɛla obɔbi lɛyikwu ɔ a wɛ ipu ɛhɔ ku Idɛn. Alɔ leyi yɛ ɔdā nɛ alɔ lɔfu nwu ŋma anu a.

8. Ɔdi nɛ Adam mɛmla Iifu jé a, aɔka ɔhá nyá nɛ alɔ kē lɔfu da a?

⁸ Adam mɛmla Iifu jé ka iye ku Ɔwɔico wɛ Ujehofa, é klla jé aɔdā ō cɛgbá alɛwa ɔhá lɛyikwu ɔ. Ocabɔ mafu, é jé ka anu ya uwa, je oyeeyi lɛ uwa, ɛga ō heyifuu nɛhi néē lā mla obiye nōo jila iye lɛ uwa a. (Ohút. 1:26-28; 2:18) Amáŋ é géē gɔbu yɔ i gbɛla lɛyikwu ɛjɛɛji ɔdā nɛ Ujehofa ya lɛ uwa a nɛɛ? É géē yɔ i ya ku ihɔtu ku uwa lɛ Ujehofa kóō yɔ i lɔfu, ku ɔdā nɛ ó klla je lɛ uwa a kóō jɛ uwa eyī fiyɛ? Ohi a gáā teyi peee eko nɛ olɛla ku Ɔwɔico gáā ya uwa ojama a.

9. Oŋma ɛlā nōo yɔ ipu Ohútu 2:16, 17 mla 3:1-5 a, ɔdi nɛ Ujehofa da ɔba mla ɔnyā aflɛyi a, ɛgɛnyá nɛ Ebilii ya kē gbɛla ɔdā nōó kpaakpa ŋ ma lɛyikwu Ujehofa a?

⁹ Jé Ohútu 2:16, 17 mla 3:1-5. Ebilii ya kóō lɛbɛɛka ɛgwa yɔ i kɛla lɛ Iifu a, anu ó da ɔka kahinii: “Ɔ́wɔicō da aá ka aá  kóō híī lé īkpō kú ɔcí dúúmā kú ɛhɔ̄ nyā ŋ́ ɔkwɔ̄ɔ̄kwɛ̄yi nɛɛ?” Ó lɛ ɛkɛmgbɛ obɔbi nɛhi lɛyikwu Ɔwɔico nōo yɔ ipu ɔka nɛ Usetan da a, ɔɔma kē ya ku Iifu kóō gbɔɔ ō gbɛla ɔdobɔbi lɛyikwu Ɔwɔico. Ɔdā nɛ Ɔwɔico da uwa a wɛ ka é lɔfu lé ikpɔci doodu ku ɛhɔ a gla, amáŋ ɔci eyí foofunu néē cika ō lɛ abɔ kwu ɔ ŋ ma. Adam mla Iifu lɔfu lé ikpo ku ɔci ɛyɛɛyɛyi alɛwa ku ɛhɔ a gla. (Ohút. 2:9) Ó wɛ ɔkwɛyi ku Ujehofa gē nwulabɔ i bi. Amáŋ, Ɔwɔico ka ó lɛ ɔci éyi nɛ Adam mla Iifu i cika ō lé ikpo ku nu ŋ. Ó lɛ a, ɔka nɛ Usetan da a ya ku ɔkwɛyi a kóō le gbaji. Ɔka a ya kóō lɛbɛɛka Ɔwɔico i gē nwula abɔ ŋ ma. Iifu lɔfu da iyi nu ɔka kahinii, ‘Ó lɛ ɔdā ō lɔhi éyi nɛ Ɔwɔico yɔ i le tayinu ŋma ɛgiyi um nɛɛ?’

10. Ɛgɛnyá nɛ Ebilii kɛmgbɛ ba iye ku Ɔwɔico lɛ a, ɔdi kē bɛɛcɛ ŋma anu a?

¹⁰ Eko nɛ Usetan da ɔka nyā a, Iifu gē lɛyitaajɛ lɛ Ujehofa kpɔ ɛ. Ó lɛ ɛjɛɛji ɔdā nɛ Ujehofa da uwa a kpo ka lɛ Ebilii. Ó klla ka ku aa i cika ō lɛ abɔ kwu ɔci a ŋ duudu. Iifu jé gbɔbu lɛyikwu ahɔ̄ ō pi ku Ɔwɔiɔo, ku uwa géē kwū ɔdaŋ kē lɛyitaajɛ lɛ íne ku nu ŋ. Amáŋ Ebilii da ɔ kahinii: “Ó wɛ ɔkwɛ̄yi ŋ́, aá í gáā kwú ŋ́.” (Ohút. 3:2-4) Ebilii i kɛla ipu ula gɛ ŋ. Babanya, ó gbɔɔ ō kɛmgbɛ ba iye ku Ɔwɔico caa ɛ, yɔ i da Iifu ka Ujehofa wɛ ɔcɛ ō kɛmgbɛ. Ɔwɛ ɛgɛnyá nɛ Ebilii je piya Usetan amāŋ ɔcɛ ō kɛmgbɛ a. Ebilii lɛ Iifu plla bɔbibɔbi, Iifu a kē cɛla nu. (1 Utím. 2:14) Iifu lɛ ɔtuce Ebilii fiyɛ Ujehofa. Ɔɔma ya ɛɛ nōó kē tɔɔtɛ lɛ Iifu kóō miya ō ya ɔdā nōó kpaakpa ŋ. Ó le miya ō ya ikpɛyi olɔfu ta Ujehofa. Ó gbɔɔ ō lé ikpo ku ɔci nɛ Ujehofa da ɔ kóō hii lé ŋ ma. Igbihaajɛ a, ó kē lɛ ōhī je lɛ Adam kóō lé duu.—Ohút. 3:6

11. Ɔdi nɛ adā mla ɛ́nɛ́ alɔ aflɛyi géē yɛ i ya a, amáŋ ɔdi néē kē ya ŋ ma?

¹¹ Gbɛla ligii lɛyikwu ɔdā nɛ Iifu géē yɛ i da Ebilii ɛ. Gbɛla ka ó géē yɛ i kɛla ɛgɛnyā lɛ Ebilii kahinii: “Ń jé ɔcɛ nɛ a wɛ a ŋ, amāŋ n jé Adā um Ujehofa, n kē yihɔtu nu klla kpɔtuce ɔ. Anu je ɛjɛɛji ɔdā nɛ ami mla Adam lɛ a lɛ alɔ a. A jama jama ka ɔdobɔbi duuma lɛyikwu ɔ gɛ ŋ. Nyɛɛ ŋma amanya!” Ó lɛ aafu ŋ, Ujehofa géē yɛ i gweeye nɛɛnɛhi ō po ɛdɔ ɛlā ɛgɔɔma ŋma ɛgiyi ɔyi nu nɔnɔya nōo yihɔtu nu a! (Aíit. 27:11) Amáŋ Iifu amāŋ ka Adam i lɛ ɛdɔ ihɔtu ɛgɔɔma lɛ Ujehofa ŋ. Abɔɔ é lɛ ɛdɔ ihɔtu ɔɔma lɛ Adā uwa ŋ ma, Adam mla Iifu i ka olɔhi ku nu eko néē yɔ i kɛmgbɛ ba iye ku nu gla ŋ.

12. Ɛgɛnyá nɛ Ebilii ya ku Iifu kóō gbɔɔ ō lɛ aafu ipu ɔtu a, ɔdi nɛ Adam mla Iifu i kē ya ŋ ma?

¹² Ɛgɛ nɛ alɔ má ɔ a, Ebilii gbɔɔ ō kɛmgbɛ ba Ujehofa, ŋma lɛ ō ceyitikwu ya ku Iifu kóō gbɔɔ ō gbɛla, ɔdaŋ ku Ujehofa wɛ Adā olɔhi ɔkwɔɔkwɛyi. Ɛnyā ya, Adam mla Iifu i ka olɔhi ku Ujehofa eko néē yɔ i kɛmgbɛ ba iye ku nu gla gɛ ŋ. Ɛnyā ya kóō tɔɔtɛ lɛ uwa ō jahɔ ta Ebilii jaa gbeeko néē lɛ ikpɛyi olɔfu ya ta Adā uwa. Ebilii gē bi ula ɔɔma le yuklɔ icɛ duu. Ó gē biya iye ku Ujehofa  ŋma lɛ ō kɛmgbɛ ba ɔ. Ācɛ nōo gē kpɔtuce ɛkɛmgbɛ ku Ebilii a, gē ta ɔcɛ́ ō ce ku Ujehofa nōo le kpaakpa a.

13. Ɛgɛnyá nɛ Isíkɛ̄lu 36:23 mafu ɛlā ō kpɔcii nōo yɔ ipu Ubáyíbu a?

¹³ Ujehofa géē lɔtu ɛkɛmgbɛ ɛgɛnyā klla lɛ okonu kla lɛyikwu ɔ? Ehee, ó gáā ya lɛ a gboogboo ŋ! Ɛjɛɛji aɔkpá ku Ubáyíbu kɛla lɛyikwu ɔdā nɛ Ujehofa ya, o ya ɛɛ kóō mafu ka ɛkɛmgbɛ néē ka ba ɔ ipu ɛhɔ ku Idɛn a i wɛ ɔkwɛyi ŋ. (Ohút. 3:15) Alɔ kóō lɔfu ka ka ɛlā okpɔcii nɛ Ubáyíbu yɔ i ka a wɛ kahinii: Ujehofa bi Ajɔɔcɛ ku nu le ya ku iye ku nu kóō le tiihɔ. Ajɔɔcɛ nyā nɛ Ɔyi nu wɛ ɔcɛ́ ku nu a klla géē ya ku ɔdā okpaakpa mɛmla ɛbɔ kóō gáā yɔ ipu ɛcɛ. Ó lɛ aɛlā ɛyɛɛyɛyi nōo yɔ ipu Ubáyíbu nōo ta alɔ abɔ má ɛgɛ nɛ Ujehofa bi le ya ku iye ku nu kóō le tiihɔ a.—Jé Isíkɛ̄lu 36:23.

14. Ɛgɛnyá nɛ ɔdā nɛ Ujehofa ya ohigbu ikpɛyi olɔfu nōo ya ipu Idɛn a, ya ku iye ku nu kóō le tiihɔ a?

¹⁴ Ebilii lɛ ɛjɛɛji ɔdā nɛ ó ya gla a ya ɛ, o ya kóō lɛ Ujehofa ci ŋma ō ya ococɛ ku nu jila. Amáŋ Ebilii ó gē lɛyi lɛ ɔ eko doodu ŋ. Ubáyíbu lɛ ɔdā nɛ Ujehofa ya a da alɔ klla mafu ka ɔkwɔɔkwɛyi, Ujehofa wɛ Adā nōo yihɔtu alɔ klla wɛ ɔcɛ́ nōo lɔhi fiyɛ duu a. Ku ɔkwɛyi a ba, ikpɛyi olɔfu nɛ Ebilii mla ɛjɛɛji ācɛ nōo gē yɛce ɔ a gē ya tu Ujehofa a, yɔ i je ɔtu nobi lɛ ɔ nɛɛnɛhi. (Aíjē 78:40) Amáŋ, Ujehofa bi ijeeyi, ɔtoole mla okpaakpa le ya odee lɛyikwu ɛlā ɛkɛmgbɛ nyā ɛ. Ó klla lɛ ɔfu ku nu nōo fiyɛ duu a mafu ɔwɛ alɛwa ɛ. Ofiyɛ duu a, ó gē mafu ihɔtu ipu ɛjɛɛji ɔdā nɛ ó gē ya a. (1 Ujɔ́n. 4:8) Ujehofa yɔ i yuklɔ eko doodu, o ya ku iye ku nu kóō le tiihɔ.

15. Ɛgɛnyá nɛ Ebilii yɔ i kɛmgbɛ ba iye ku Ɔwɔico icɛ a, ɔdi kē bɛɛcɛ ŋma anu a?

¹⁵ Ebilii yɔ i kɛmgbɛ ba iye ku Ɔwɔico jaa kwu icɛ kpɔ. Ó gē ya ku ācɛ kéē lɛ ɔtu ō bɛɛpa lɛyikwu ɔfu ku Ɔwɔico, okpaakpa ku nu, ijeeyi mla ihɔtu ku nu. Ocabɔ mafu, Ebilii gē ya ku ācɛ kéē kpɔtuce ka ó wɛ Ujehofa ya ɛjɛɛji odee a ŋ. Ɔdaŋ ku ācɛ kē cɛ ka Ɔwɔico yɔ ɔkwɔɔkwɛyi, Ebilii gē dɔka ō ya ku alɔ gbɛla ka aine ku Ɔwɔico i gē jɛga lɛ  alɔ amāŋ lɔhi lɛ alɔ ŋ. Ó klla gē nwu ācɛ ka Ujehofa wɛ Ɔwɔico nōo bɔbi ɔtu, nōo klla gē je ācɛ ta ipu ɔla kéē yi piyoo. Ɔdaŋ ka é lɛ ɔtu kpoce ɛdɔ ɛkɛmgbɛ ɛgɔɔma, ɛnyā géē ya ɔ tɔɔtɛ lɛ uwa ō ta ɔcɛ́ ō ce ku Ujehofa nōo le kpaakpa a. Ebilii géē yɔ i ceyitikwu kɛmgbɛ ba iye ku Ujehofa gɔbu, klla géē yɔ i ya ku a ta ɔcɛ́ ō ce ku nu, jaa gbeeko nɛ Ujehofa kwu u cataajɛ. Ó géē lɛyi lɛ ɔ?

16. Ɔdi nɛ Adam mla Iifu ta ō ya, nɛ a ya gla a?

¹⁶ Ujehofa jɛga lɛ alɛɛcɛ nōó jila iye ŋ ma, kéē tabɔ ya ku iye ku nu kóō le tiihɔ. Ɛnyā mafu ku a lɔfu yā ɔdā nɛ Adam mla Iifu ta ō ya a. Icɛ, alɔ lā ipu ɛcɛ nōo le mu mla ācɛ nōo gē kɛmgbɛ klla gē ka ɔdobɔbi lɛyikwu iye ku Ujehofa. Naana a, a lɛ ɛnɛɛnɛ ɛga ō cɛtra iye ku Ujehofa klla da ācɛ ka Ujehofa tiihɔ, le kpaakpa, lɔhi, klla wɛ Ɔwɔico ku ihɔtu. (Ayis. 29:23) A mafu ku a dɔka ku Ujehofa kóō wɛ Ɔcɛ́ ku uwɔ gla. A lɔfu ta ācɛ abɔ jé ka ɔcɛ́ ō ce ku Ujehofa foofunu le kpaakpa a, ka anu foofunu klla gáā bi ɛbɔ mla eeye gē lɛ ɛjɛɛji ɔdā nɛ ó ya a.—Aíjē 37:9, 37; 146:5, 6, 10.

17. Ɛgɛnyá nɛ Ujisɔsi ya ku ācɛ kéē jé iye ku Adā nu a?

¹⁷ Ɔdaŋ ku alɔ gē ka olɔhi ku iye ku Ujehofa, ayika alɔ gē yɛce ocabɔ ku Ujisɔsi Ukraist. (Ujɔ́n. 17:26.) Ujisɔsi i ya ka ācɛ kóō jé iye ku Adā nu ŋma lɛ ō bi iye a lɛ yuklɔ foofunu ŋ, amáŋ ó klla nwu ācɛ ɛlā ɔkwɛyi lɛyikwu ɔcɛ nɛ Ujehofa wɛ ɔkwɔɔkwɛyi a duu. Ocabɔ mafu, ó ta ɛlā ku ācɛ Ufarisii nōo ya ku ācɛ kéē gbɛla ka Ujehofa lɔnɔ ɔtu, gē cɛgbá ɔdā nōo fiyɛ alɔ ɔfu a ŋma ɛgiyi alɔ, ka ó yɔ ligbo ŋma ɛgiyi alɔ, ka ó klla gē menyinyi ɔcɛ ŋ. Ujisɔsi ta ācɛ abɔ kéē má Adā nu ka ó wɛ ɔcɛ ō jijeeyi nɛhi, ɔcɛ ō lɛ ɔtoole mla ihɔtu, nōo klla gē je yɛɛhi. Ó klla ta ācɛ abɔ kéē jé Ujehofa oŋma lɛ ɛgɛ nɛ ó ya ɛgbla ku uce ō ya ku Adā nu ipu oyeeyi ku nu ɛ̄cī doodu a.—Ujɔ́n. 14:9.

18. Ɔdi nɛ alɔ géē ya nōo géē mafu ka ɛlā obɔbi nɛ aolɛla gē ka lɛyikwu Ujehofa i wɛ ɔkwɛyi ŋ ma?

¹⁸ Bɛɛka Ujisɔsi a, alɔ lɔfu da ācɛ ɔhá ɔdā nɛ alɔ jé lɛyikwu Ujehofa, mɛmla ō nwu uwa ka Ɔwɔico wɛ Adā ihɔtu nōo gbonɛnɛ nɛhi. Abɔ alɔ gē ya lɛ a, ó géē wa i ta ācɛ eyī peee ku ɛkɛmgbɛ néē yɔ i ka ba Ujehofa a. Alɔ géē yɔ i lɛ iye ku Ujehofa ya tiihɔ, klla ya kóō le tiihɔ ipu ɔtu ku ɛjɛɛji ācɛ. Alɔ lɔfu  gbla Ujehofa ya duu. Ɛnyā tɔɔtɛ naana nɛ alɔ i jila iye ŋ ma. (Āfi. 5:1, 2) Ɔdaŋ ka ɔwɛ nɛ alɔ gē kɛla amāŋ gē ya uce, gē mafu lɛ ācɛ ɛdɔ ɔcɛ nɛ Ujehofa wɛ ɔkwɔɔkwɛyi a, ó géē tabɔ ya ku iye ku nu kóō le tiihɔ. Alɔ géē ya ku iye a kóō le tiihɔ, ɔdaŋ ku alɔ gē nyɔ gáā nwu ācɛ ɔkwɛyi lɛyikwu Ujehofa. * Oŋma ō ya ɛgɛnyā, alɔ géē mafu ka alɔ nōó jila iyē ŋ ma, lɔfu hayi kpaakpa lɛ Ujehofa.—Ujób. 27:5.

19. Ɛgɛnyá nɛ ɔkpá ku Ayisáya 63:7 ta alɔ abɔ má ɔdā ō kpɔcii nōo cika ō ya ku alɔ nwu ācɛ ɛlā a?

¹⁹ Ó lɛ ɔdā ɔhá nɛ alɔ lɔfu ya, o ya ɛɛ ku iye ku Ɔwɔico kóō le tiihɔ. Eko duuma nɛ alɔ yɔ i nwu ācɛ ɛlā ɔkwɛyi ŋma Ubáyíbu, alɔ gē ya ka ɛlā lɛyikwu ɔcɛ́ ō lé ku Ɔwɔico kóō ta uwa eyī peee, kéē wa i jé ku Ujehofa foofunu lɛ íkwu ō lé ɔcɛ́ ikpɛyi ku ɔdā doodu a. Ɔɔma kē wɛ ɔkwɛyi. Naana nōó cɛgbá ku alɔ nwu uwa íne ku Ɔwɔico a, ɔdā nɛ alɔ bi ɔtu kpɔcii a wɛ ō ta ācɛ ɔhá abɔ kéē wa i yihɔtu Adā alɔ Ujehofa, klla gba ɔ ɛ̄gbā kpaakpa. Ó lɛ a, alɔ cɛgbá ō da uwa lɛyikwu aɛnɛɛnɛ uce ō ya ku Ujehofa, mla ō da uwa ɛdɔ ɔcɛ nōo le iye ɔɔma wɛ a. (Jé Ayisáya 63:7.) Abɔ alɔ gē nwu ɛlā ɔwɛ ɛgɛnyā a, alɔ gáē ta ācɛ ɔhá abɔ kéē wa i yihɔtu ku Ujehofa klla lɛyitaajɛ lɛ ɔ, ohigbu kē dɔka ō gba ɔ ɛ̄gbā kpaakpa.

20. Ɔdi nɛ alɔ gáā kɛla lɛyikwu ɔ ipu ikpɛyi ɛlā nōo gboce ɛnyā a?

²⁰ Ó lɛ a, ɛgɛnyá nɛ alɔ géē ya ku uce ō ya ku alɔ mla ɛlā nɛ alɔ gē nwu ācɛ a, kóō ya kéē gbɛla ɔdā ō lɔhi lɛyikwu Ujehofa, eko duuma néē le iye ku nu po a? Ɛgɛnyá nōó kē i ya ku ācɛ ɔhá kē wa i jé ɔ a? Ikpɛyi ɛlā nōo gboce ɛnyā géē cila ɔka ɔɔma.