1-2. Egbeju nya ẹla iyina à tị́ baba ha Alibeenu nya iJihova?

ẸLA ọkpọnchị ọhẹ ji kọ guhi wuu alẹ, kọ ri eji ọkpakpa nya iJihova bala ịgọgọ ọ-chị ju ẹnyị nyamwụ. Ọ kaa háahị ahị Alibeenu nya iJihova nyọka ya ẹla u-uhye nya egbeju nya ala ịkpịpyọ-kpịpyọ ịwẹ. Tị wẹẹ, eji ọkpakpa nya Ohe Oluhye bala ịgọgọ ọ-chị ju ẹnyị nyamwụ á ri ẹla imiiye ị-datị hi awụlẹ ka.

² Ọng myị́ ọng nyahị wẹ ka jẹ́ nyori ẹnyị nya Ohe Oluhye baba nyọka chị ịgọgọ ju. Ịnyịnyị ahị wẹ ka jẹ nyori eji ọkpakpa nya iJihova lee ụgbẹyị nyamwụ ka chehe gede-gede nyori ọwa à hágụ wuu lẹ. Ẹla ịwẹ baba nyahị ọ-ka kụ ẹhị yẹ rige-rige.

3. Ịyẹ à tị́ juwa ẹ-epwụ nya ẹnyị nya iJihova?

³ O ri ịnyịlẹhị, ẹnyị nya iJihova gu ẹla myị́ ẹla ọla ẹga nya Ohe nyahị, tụ́ ụgbẹyị ọlẹ kọ́ kaa bwu kpeji. Lẹ kori kahị ya nyori ọ-chị ịgọgọ ju ẹnyị nya iJihova nya-à ri ẹla ọlẹ kọ baba gụ wuu aalẹ, ahị tịtị wẹẹ ya ịnyịnyị nyori ọ baba ká angịnyị ka jẹ́ nyori ụgbẹyị ọlẹ kọ́ kaa bwu kpeji nya-à hágụ wuu lẹ. Ẹnyị nya iJihova bala ụgbẹyị ọlẹ kọ kaa kpeji lala Agụgụ Ọtụka dori wu awụlẹ.—Yẹ akpa ọlẹ kọ ri “ Apa nya Ẹla Ọkpọnchị.”

4. Ányị Eje Ọnyịịla 135:13 à tị́ chabwọ nya ẹnyị nya iJihova? Ịtọ ẹla iyina ahị tị́ ka wẹ a-ang ọjẹ́jẹ ọlẹ?

⁴ Ẹnyị nya iJihova datị hi ẹnyị ịkịla. (Wa Eje Ọnyịịla 135:13.) Ịyẹ tị́ du ká ẹnyị nya Ohe Oluhye baba lụmẹ ịịwẹ? Ányị ị tị́ bwu bịrọọ ụka nya ọgbanyẹ-ọgbanyẹ? Ányị Ohe Oluhye à tị́ bwu chị ịgọgọ jwoo? Ányị ahị tị́ ka bwu chẹkpẹ ju ẹnyị nyamwụ? Ahị kụ ehị yẹ ịtọ ẹla ịwẹ wẹẹ.

5. Ịtọ ẹla oyina angịhyẹ à tị́ ka tọ wo myị́ ụka kị wo nyori ẹnyị nya Ohe Oluhye baba nyọka chị ịgọgọ ju?

⁵ “Chị ịgọgọ ju ẹnyị nyang.” (Mat. 6:9) IJisọsị ya nyori ẹla ọwẹ nyị ri ang ọhẹ lẹpwụ nya ang ịlẹ kị baba gụgụ wuu kahị ka  raabwọ chajị nyaa. Ma, ịyẹ à tị́ ri etu nya omyi ẹla nya iJisọsị ọwẹ? Ọ-ka chị ịgọgọ ju ang ri ọ-ka họ ká ang ka la cheri-cheri lee ọ-la kpeng-kpeng. Ma angịhyẹ ka tọ wo myị́ nyori, ‘Ẹnyị nya iJihova á la cheri-cheri lee ọ-la kpeng-kpeng ene-ene lẹka?’ Nyọka wẹ ịtọ ẹla ọwẹ, ahi baba nyọka kụ irya nya ang ọlẹ ká ẹnyị ri.

6. Ịyẹ tị́ du ká ẹnyị baba?

⁶ Ẹnyị á ba o-omyi ẹla ọlẹ kị da ụ-ụpwụ ịịwẹ lee ọ-wụrụ la ọnụ kem ka. Wo ẹla ọlẹ ká ịBayịbụụ ya lẹẹ: “Ẹnyị ọnyịịla hagụ ụdụ.” (Etu 22:1; Ọngọ. 7:1) Ịyẹ tị́ du ká ẹnyị baba ịịwẹ? Ang odudu ri, o gu ẹhị ọlẹ ká angịnyị kaa kpa yẹ ọngịnyị bala irya ọlẹ kị kaa la u-uhye nya ọngọlẹ kọ la ẹnyị ọọwa. Lẹ, a-abwọlẹ kị da ẹnyị ọọwa ụ-ụpwụ lee abwọlẹ kị kaa bwu wụrwọọ à ri ẹla lụmẹ ka; ẹla ọlẹ kọ baba gụ ri irya ọlẹ ká angịnyị kaa kụ ụka kị yẹ lee o-wo ẹnyị ọọwa.

7. Ányị angịnyị à tị́ maga nyọka bịrị ẹnyị nya Ohe Oluhye?

⁷ Ụka ká angịnyị á me ọnọọkịla ba iJihova, ị wẹẹ maga nyọka họ ká angịkịla ka la irya ọtịpyọ ẹ-ẹga nyamwụ ịnyị. Kori ká angịnyị á lirya ọtịpyọ ọlịnyị lẹ aalẹ, ẹnyị nya Ohe Oluhye ị wẹẹ tịtọ nyọka bịrị lẹlẹ. Ụka ọhọhẹ ọlẹ ká ọngọhẹ ya ẹla ọtịpyọ ba Ohe Oluhye bala ọ-maga ká angịnyị ka lirya ọtịpyọ ẹ-ẹga nyamwụ ri ẹpwụ nya iku nya Ịdẹn. Ahị kụ ẹhị yẹ ịngịhyẹ ọlẹ kahị jẹ́ bwu ụwa wẹẹ.

8. Ẹlịyẹ Adam bala Iivu à tị́ jẹ́? Ịtọ ẹla ịkịla iyina ahị tị́ ka tọ myị́?

⁸ Adam bala Iivu jẹ́ ẹnyị nya iJihova bala ẹlịlẹhị chajị nyamwụ Ọwa ọngọlẹ kọ la ẹnyị ọọwa. Ị jẹ́ nyori ọwa à ri Ọngọ Họ Ang Myị́ Ang Wuu lẹ. Ọ ya ọhịhị bala ẹga ọnyịịla-ọnyịịla ọlẹ kị ka kụ haa, ọ myịmyị haa nya ahụ bala ọrụ ịlẹ kị la kpẹẹkpẹẹ. (Ọmwụ. 1:26-28; 2:18) Ma, ị ka kịnyaa la ọ-kụ irya u-uhye nya ang ịlẹ ká iJihova họ haa wẹẹ? Ị ka kịnyaa la ọ-ju ọháha nyaa ẹ-ẹga nya iJihova ọngịrị, bala ọ-mẹjẹ nyori ang ọlẹ kọ họ haa myaa lẹhị? Ọwẹwẹ nya ịtọ ẹla ịwẹ la gbagbịla ụka ká oluji nya Ohe Oluhye maa yẹ.

9. Jaabwọ ká ụ-ụpwụ nya Ọmwụ Ọdada 2:16, 17 bala 3:1-5 ya, ányị iJihova à tị́ byi Adam bala Iivu? Ányị Olegu Onyobyi à tị́ pyị ẹla ọọwa anyoko?

⁹ Wa Ọmwụ Ọdada 2:16, 17 bala 3:1-5.  Olegu Onyobyi họ lala ilo nya-à wẹẹ ya ẹla bwula ọ-ta Iivu ịtọ ẹla wo yẹkẹẹ: “Ohe Oluhye yẹkẹẹ, anụ nyị ri ugbe nya okoji ọhẹ-lọhẹ ọlẹpwụ nya ẹrụ ọlẹ kpong-kpong ka-á?” Ịtọ ẹla ọwẹ ju ọnọọkịla ẹ-ẹpwụ lala ẹhwa ọlẹ ká ọngịnyị ka jẹ́-ẹ yẹ lẹhị ka. Ẹla ọlẹ ká Ohe Oluhye ya kpangga ri yẹkẹẹ, ị ka ri egbe nya ekeji ịkịla wuu myị́, kẹnẹ-kẹnẹ ka hi ookpokpo. Egbe nya ekeji juwa lụmẹ-lụmẹ ịlẹ ká Adam bala Iivu ka jẹ́-ẹ ri jaabwọ kọ háa. (Ọmwụ. 2:9) IJihova ri ọngọ pyẹ ụbwọ maa hu ha ịnyịlẹhị. Ma, ugbe okoji ọhẹ juwa ọlẹ ká Ohe Oluhye da Adam bala Iivu ehile nyị ri ka. Lẹ, ịtọ ẹla nya Olegu Onyobyi pyị ẹlịlẹhị anyoko. Olegu Onyobyi tọ ịtọ ẹla ọọwa ụ-ụgbẹyị ọlẹ kọ lala o-ri Ohe Oluhye nyị ri ọngọ lujwo. Iivu ka kụ irya myị́ nyori, ‘Ịngịhyẹ ọnyịịla ọhẹ juwa ọlẹ ká Ohe Oluhye wẹẹ ya kpịbaa him?’

10. Ányị Olegu Onyobyi à tị́ bịrị ẹnyị nya Ohe Oluhye? Ịyẹ à tị́ ri ocheju nyọọwa?

¹⁰ Ụka ká Olegu Onyobyi tọ ịtọ ẹla ọwẹ, Iivu ju ihi nya iJihova wẹẹ. Ọ byi Olegu Onyobyi ẹla ọlẹ ká Ohe Oluhye ya. Ọ dọmwụ ya nyori Ohe nyị ya ịwa nyị yụbwọ gwoo kpong-kpong ka. Ọ jẹ́ ẹla ọlẹ ká Ohe Oluhye ya nyị ka họ taa kori kị ju ihi nya omyi ẹla nyamwụ ka, kọ ri igu ogbugbu. Ma, Olegu Onyobyi wẹ byoo yẹkẹẹ: “Ọ me ọnụ, ó-ri kanụ ri ugbe nya okoji ọwẹ, ánụ juwa ka gbu ịlẹhị ka.” (Ọmwụ. 3:2-4) Ugbẹnyị lẹ, Olegu Onyobyi á kpa ijẹẹhị kaka. Ọ wẹẹ bịrị ẹnyị nya Ohe Oluhye bwula o-byi Iivu kpụrụrụ nyori iJihova nyị ri ọlọnọọkịla. Ụka ọwẹ ọ ri Olegu Onyobyi lee ọngọ bịrị ọngịnyị ẹẹ. Olegu Onyobyi pịrị Iivu ju myị́ lee ọ-dọọ lụgbaa; ọwa ịnyịnyị tị myị jwoo. (1 Tim. 2:14) Ọ dahịhilọọ gụ iJihova. Ọọwa à du kọ chịkpẹẹ ha Iivu nyọka cheje ọlẹ kọ tịpyọ gụ ịkịla wuu lẹ. Ọ cheje nyọka ji ẹkpẹ da iJihova. Ọ dọmwụ nyọka ri ugbe nya okoji ọlẹ ká Ohe Oluhye dọọ ehile nyị ri ka. Nyọlẹ kọ họ ịnyị kpá, ọ ya họ Adam ịnyịnyị.—Ọmwụ. 3:6.

11. Ẹlịyẹ Adam bala Iivu à tị́ ka họ ịnọ? Ịyẹ ị tị́ jẹ́ họ ka?

¹¹ Kụ irya pyịnyẹng u-uhye nya ẹla ọlẹ ká Iivu chịla nyọka wẹ Olegu Onyobyi ịnọ wẹẹ. Kori ko ya ị-ịlẹ bẹẹ: “Am-m jẹ́ng koo, m̀ tị jẹ́ iJihova Adam-am. Ọ hám, m̀ tị dahịhilọọ. Ọwa à ya ang ịlẹ kám bala Ayịbam la hahị lẹ. À tị́ ri owo ká ka ya ẹla ọtịpyọ nyamwụ? Tụ́ kele him pyii!” Ịnọ ọ tị ka kpụ iJihova ịpyọ lụmẹ kori kọ ka wo omyi ẹla ọlịịwẹ bwu ẹga nya ọnyị nyamwụ! Ọ ka mẹjẹ nyori ọ dayị kpẹẹkpẹẹ ha adamwụ. (Etu 27:11) Ma Iivu á la ọháha o-gbu enyi-ka ẹ-ẹga nya iJihova ka; Adam á tị la ka ịnyịnyị. Nyọlẹ ká Adam bala Iivu á la ọháha ọlịịwẹ ka wẹẹ, ị́ jẹ́ ku ido rụ hi ẹnyị nya Ohe Oluhye myị́ ka.

12. Ányị Olegu Onyobyi à tị́ ya ịwẹẹ ju ịtọ ọ-ọkịlẹtụ nya Iivu? Ịyẹ Adam bala Iivu à tị́ họ bwula ọọwa mẹ?

¹² Jaabwọ kahị yẹ wẹ, Olegu Onyobyi dọmwụ nyọka bịrị ẹnyị nya iJihova bwula ọ-họ ká Iivu ka da ịwẹẹ kori ká iJihova á ri adịda ọnyịịla. Ọọwa lẹ, Adam bala Iivu à chẹkpẹ ju ọnọọkịla nya Olegu Onyobyi ọkọkọ nya ẹnyị  nya iJihova lẹlẹ. Ọwẹ du kọ chaa kpẹẹ nyọka ke ụrụ la Olegu Onyobyi bala ọ-ka la egbeju ọngịrị ta Adaa. Olegu Onyobyi kaa kpa ijẹẹhị ịlịnyịịnyị alẹ. Ọ bịrị ẹnyị nya iJihova bwula ọ-chị ala bọọ. Ọ kaa chịkpẹẹ nyọka pịrị angịlẹ kị ye ọnọọkịla nya Olegu Onyobyi myị rụ hi eji ọkpakpa ọkpẹẹkpẹẹ nya iJihova.

13. Ányị ụpwụ nya Isikẹlụ 36:23 à tị́ ya ẹla ọkpọnchị ọlẹpwụ nya ị-ịBayịbụụ?

¹³ IJihova hu ẹla ọwẹ ujiji la ọ-ya abwọọbwọhẹ ka? Ehe, ọ hu ujiji ka! Ẹla ọlẹ kị da ju ụ-Ụpwụ Ịgọgọ wuu ya ẹla u-uhye nya abwọlẹ ká iJihova họ nyọka mẹjẹ nyori ẹla ọlẹ kị ya ba ẹnyị nyamwụ á ri ẹlịlẹhị ka. (Ọmwụ. 3:15) Ịnyịlẹhị, ahị ka jẹ́-ẹ chị ẹla ọlụpwụ ịgọgọ kpii ụ-ụgbẹyị ọlẹ myị: iJihova chị ịgọgọ ju ẹnyị nyamwu bwula Ịpyị-Adịrahụ ọlẹ ká ọnyị nyamwụ kpa ụ-ụbwọ, du kọ wẹẹ ka kpa abwẹla ọnyịịla bala okpunyi wẹ odehe ọlẹ. Ẹla ọlẹ kọ ju ị-ịBayịbụụ dahị ụbwọ nyọka jẹ́ jaabwọ ká iJihova chị ịgọgọ ju ẹnyị nyamwụ.—Wa Isikẹlụ 36:23.

14. Ányị abwọlẹ ká iJihova wẹ ẹla u-uhye nya ẹla ọlẹ kị chị bọọ i-iku nya Iden à tị chị ịgọgọ ju ẹnyị nyamwụ?

¹⁴ Olegu Onyobyi họ ang myị́ ang ọlẹ kọ ka jụ họ myị́ nyọka hu iJihova abwọ la ọ-họ irya nyamwụ jịra. Ma, ọ́ tị jwọọ họ myị́ kpong-kpong ka. ỊBayịbụụ ya jehi ang ọlẹ ká iJihova họ, ọọwa tị mẹjẹ nyori ọngọngọhẹ á lala iJihova Ohe Oluhye ka. Ẹlịlẹhị ri, egbeju ọngịrị nya Olegu Onyobyi bala angịlẹ kị chị ẹkpẹ jwoo ta iJihova olujwo nyịlẹhị-ịlẹhị. (Eje. 78:40) Ma, ọ tị kpa ẹla ọjẹ́jẹ, ugbodu ojuju bala ẹla ọ-họ kpakpa, wẹ ẹla ọọwa. Ọ mẹ ọngịrị ọtụka nyamwụ jẹ a-agbẹyị lụmẹ-lụmẹ ịnyịnyị. Ọlẹ kọ tị gụgụ wuu ri, ọháha kụrụ ang myị́ ang ọlẹ kọ kaa họ wuu.(1 Jọn. 4:8) IJihova wẹẹ họ ụkụrwọ la ọmwịịnyọ ka nyọka chị ịgọgọ ju ẹnyị nyamwụ.

15. Ányị Olegu Onyobyi à tị́ wẹẹ chị ala ba ẹnyị nya Ohe Oluhye alẹ? Ịyẹ à tị́ ri ocheju nyọọwa?

¹⁵ Olegu Onyobyi jam chị ala ba Ohe Oluhye daalẹ wẹẹ. Ọ maga nyọka họ ká angịnyị ka la ịwẹẹ ọdada kori ká Ohe Oluhye á la ọngịrị, kaa họ ẹla kpẹẹkpẹẹ, jẹ́ ẹla, bala ọ-la ọháha. Ọ-chụ pwokwita, Olegu Onyobyi maga nyọka  pịrị angịnyị ju kị ka myị nyori i-iJihova à họ ang myị́ ang wuu ka. Kori ká angịnyị á tị myị nyori Ohe ji, ọ kaa maga nyọka daa lụgbaa kị ka myị nyori, Ohe Oluhye bala ehile nyamwụ á kaa ya iwe da ha angịnyị nyọka họ ang ọlẹ kọ taa ka, bala o-ri ị́ la kpakpa ka. Ọ dọmwụ kaa mẹjẹ angịnyị nyori, iJihova nyị ri Ohe ọ-la ọkịlẹtụ ọnyọọngịrị ọlẹ kọ kaa ya alịhọbịrị ju ka ẹpwụ nya obwila. Ụka kị ye ịnịịkịla ịwẹ myị lẹ, ọ ka chaa kpẹẹ nyọka pwa ju eji ọkpakpa nya iJihova lẹlẹ. Gbee da ụka ọlẹ ká iJihova ka ta Olegu Onyobyi ayịreji, ịịwẹ ọ ka kịnyaa la ọ-me ịnịịkịla ba iJihova lẹlẹ, ọ tị ka maga nyọka họ ká ahụ ịnyịnyị ka ji ẹkpẹ da iJihova. Ọ ka họọ myị́?

16. Ẹlịyẹ a tị́ ka jẹ́-ẹ họ ká Adam bala Iivu pwa la ọhọhọ?

¹⁶ IJihova ya iwe ha angịnyị ehe kị ka la ụpa ẹ-ẹpwụ nyọka chị ịgọgọ ju ẹnyị nyamwụ. Chajị nyọọwa lẹ, à la iwe nyọka họ ang ọle ká Adam bala Iivu pwa la ọhọhọ. Nanana nyori ahị jam ẹ-ẹpwụ nya odehe ọlẹ kọ myị̀ la angịlẹ kị kaa chị ala ba ẹnyị nya iJihova, à la iwe nyọka dayị rịrị ya ẹlịlẹhị ọlẹ kọ ka mẹjẹ nyori iJihova la ịgọgọ, ri ọlabwẹla ọnyịịla, hiigu, bala ọ-la ọháha. (Ayị. 29:23) À ka jẹ́-ẹ mẹjẹ nyori à myị ọnụ ju eji ọkpakpa nyamwụ myị́. À ka jẹ́-ẹ da angịnyị ụbwọ nyọka jẹ́ ịnyịnyị nyori, eji ọkpakpa nya iJihova la kpẹẹkpẹẹ, bala o-ri ọ ka kpa okpunyi bala ọkẹkẹnị wẹ angịnyị ehe wuu.—Eje. 37:9, 37; 146:5, 6, 10.

17. Ányi iJisọsị à tị́ họ nyọka mẹ ẹnyị nya Adamwụ jẹ?

¹⁷ Ụka kahị chị ẹkpẹ ju ẹnyị nya iJihova, ahị wẹẹ gbịla iJisọsị ịKịrayịsị. (Jọn. 17:26) IJisọsị chị ẹnyị nya Adamwụ ehe bwula ọ-kaa wụrwọọ ụka kọ juwa ya ẹla, bala ọ-mẹjẹ angịnyị ụma nya ọngọlẹ ká iJihova ri. Ọ-chụ pwokwita, ọ kaa pwa ju ala iFarisii ịlẹ kị họ ká angịnyị kaa yẹ iJihova lala ọngọ kpa angịnyị nmaa-nmaa, hu olo olilo chụ angịnyị, ji lụrụ, bala ọ-kaa yẹ ahyẹẹrwẹrwa ka. IJisọsị da angịnyị ụbwọ kị ka jẹ́ nyori Adamwụ ri ọngọlẹ kọ jẹ́-ẹ yẹ ẹla ẹkpẹ imiiye, ju ugbodu, la ọháha, bala ọ-kaa hịnyọhi. Ọ myịmyị da angịnyị ụbwọ kị ka jẹ́ iJihova bwula ụgbẹyị ọlẹ kọ kaa gbịla abwụma nya Adamwụ olepwoohe ẹnụ myị́ ẹnụ ẹ-ẹpwụ nya ọhịhị nyamwụ.—Jọn. 14:9.

18. Ányị ahị tị́ ka bwu hịlẹ ibyi hi ẹnyị nya iJihova?

¹⁸ Lala iJisọsị, ahị ka jẹ́-ẹ mẹ ang ịlẹ kahị jẹ́ chajị nya iJihova jẹ angịnyị, nyori Ohe Oluhye  ri Ọngọ la ọháha bala ọlọnahị. Ụka kahị họ ịnyị, ahị wẹẹ hịlẹ ibyi hi ẹnyị nya iJihova. Bwula ọọwa, ahị chị ịgọgọ ju ẹnyị nya iJihova, họ kọ la cheri-cheri i-irya bala ọkịlẹtụ nya angịnyị. Ahị ka jẹ́-ẹ gbịla iJihova ịnyịnyị. Ahị ka jẹ́-ẹ họ ịnyị nanana nyori áhị la kpẹẹkpẹẹ ka. (Efe. 5:1, 2) Ụka ká omyi ẹla bala abwẹla nyahị á mẹjẹ angịnyị ụma nya ọngọlẹ ká iJihova ri kpangga lẹ aalẹ, ahị dụbwọ chị ịgọgọ ju ẹnyị nyamwụ lẹ. Ahị ka chị ịgọgọ ju ẹnyị ọwẹ ụka kahị da angịnyị ụbwọ nyọka jẹ́ ẹlịlẹhị chajị nya Ohe Oluhye. Ahị ka myịmyị-ị̀ mẹjẹ nyori, ọngịnyị ọlẹ kọ la kpẹẹkpẹẹ-ka, ka jẹ́-ẹ godayị giri-giri ha iJihova.—Job. 27:5.

19. Ányị Ayịsaya 63:7 à tị́ dahị ụbwọ nyọka jẹ́ ẹla ọkpọnchị ọlẹ kahị kaa mẹjẹ?

¹⁹ Ang ọkịla ọlẹ kahị ka họ nyọka chị ịgọgọ ju ẹnyị nya iJihova à lẹẹ lẹ. Ụka kahị mẹ ẹlịlẹhị ọla ịBayịbụụ jẹ angịkịla, ahị kaa ya ẹla u-uhye nya eji ọkpakpa nya Ohe Oluhye, nyori iJihova à chịla nyọka kpeji odehe tụ́ epwoohe lẹ. Ẹlẹwẹ tị ri ẹlịlẹhị. Ịnyịlẹhị lẹ, ọ baba nyọka mẹ ehile nya Ohe Oluhye jẹ, ẹla ọkpọnchị nyahị tị ri ọ-ka da angịnyị ụbwọ kị ka wẹ ka la ọháha ẹ-ẹga nya Adahị iJihova, bala ọ-ka dayị giri-giri họọ. Lẹ ahị baba nyọka ya ẹla u-uhye nya abwụma ịnyịịla-ịnyịịla nya iJihova, ya ọnụ rịrị u-uhye nya ụma nya ọngọlẹ kọ ri ẹnyị ọwẹ. (Wa Ayịsaya 63:7.) Kori kahị mẹ ang jẹ ịnyị, ahị ka jẹ́-ẹ da angịkịla ụbwọ kị ka la ọháha ẹ-ẹga nya iJihova bala ọ-ka jwoo ihi chajị nyori ị tịtọ kị ka dayị giri-giri họọ.

20. Ẹlịyẹ ahị tị́ wẹẹ ka kụ ẹhị yẹ a-ang ọjẹ́jẹ ọkịla?

²⁰ Ányị ahị tị́ ka họ ká abwẹla bala ang ọmẹjẹ nyahị ka da angịnyị ụbwọ nyọka la irya ọnyịịla ẹ-ẹga nya iJihova ụka kị wo ẹnyị nyamwụ bala ọ-ka tụ jwoo chwẹẹ? Ang ọjẹ́jẹ ọkịla ka wẹ ịtọ ẹla ọwẹ.