1-2. Yehowa Sakse ni a matu gara lam gaw grai ahkyak ai kun?

ANHTE gaw grai ahkyak ai lam hte hkrum nga ai. Dai gaw awmdawm ahkang hte san seng chyoi pra ai lam re. Yehowa Sakse ni gaw, dai lam hpe chye mayu ai. Karai a awmdawm ahkang hte shi a amying san seng chyoi pra ai lam gaw kaga ga rai kun? N re.

² Karai a amying jahpoi asawng hkrum nga ai kaw nna, san seng chyoi pra wa ai hpe mu wa na re. Yehowa a awmdawm ahkang (sh) uphkang ai lam gaw kaja htum re ai hpe sakse madun ra ai hpe mung chye wa na re. Dai lam lahkawng yan gaw grai ahkyak ai.

3. Yehowa ngu ai amying hta hpa ni lawm ai kun?

³ Yehowa ngu ai amying hta, shi a uphkang ai lam hte hpawn, shi hte seng ai lam yawng lawm ai. Yehowa a amying jahpoi asawng hkrum nga ai kaw nna san seng hkra galaw ai gaw ahkyak htum re ai ngu tsun yang, shi a uphkang ai lam mung kaja htum re ai ngu tsun nga ai re. Chyahtum chyalai n-gun rawng ai Awmdawm Ahkang Madu hku nna Yehowa uphkang nga ai gaw shi a amying hte mung seng ai.​—“ Grai Ahkyak Ai Hta Lawm Ai Lam” ngu ai lawk hpe yu u.

4. Shakawn 135:13 hta Karai a amying hpe gara hku tsun da ai kun? Gara ga san ni a mahtai hpe chye lu na kun?

⁴ Yehowa ngu ai amying gaw laklai ai. (Shakawn 135:13 hpe hti u.) Karai a amying gaw hpa majaw ahkyak ai kun? Gara hku jahpoi asawng hkrum wa ai kun? Gara hku san seng hkra shi bai galaw na kun? Shi a amying hpe makawp maga na matu anhte gara hku karum ya mai na kun? Mahtai hpe yu yu ga.

5. Karai a amying san seng chyoi pra ra ai ngu tsun ai shaloi nkau mi gara hku san chye ai kun?

⁵ “Na a amying nsang chyoi pra nga lit ga.” (Mat 6:9) Dai gaw ahkyak ai majaw, dai ga hte Yesu akyu hpyi hpang wa ai. Hpa lachyum kun? San seng hkra galaw ai ngu ai gaw chyoi pra hkra, mara n rawng hkra galaw ai re. ‘Yehowa a amying gaw san seng chyoi pra ngut chyalu n re i?’ ngu nna nkau san chye ai. Mahtai lu na matu dai amying hta hpa ni lawm ai hpe chye ra ai.

6. Amying a ahkyak ai lam gaw hpa rai kun?

⁶ Amying ngu ai hta maisau pa langai hta ka da ai (sh) nsen shapraw nna shaga ai hta n-ga lawm ai. Chyum Laika hta, ‘Arawng lu ai amying hpe, sut gan hta grau lata mai ai’ ngu tsun ai. (Gsh 22:1; Hpj 7:1) Amying gaw hpa majaw ahkyak ai kun? Amying lu da ai wa hpe kaga ni gara hku mu ai lam lawm ai majaw re. Dai amying hpe maisau pa hta ka da ai (sh) nsen shapraw nna shaga ai gaw ahkyak htum n re. Ahkyak ai gaw, dai amying hpe na dat ai, mu dat ai shaloi, kaga ni a mu mada lam re.

7. Karai a amying hpe masha ni gara hku gasat ai kun?

⁷ Yehowa hte seng nna masu ai ni gaw, shi a arawng sadang hpe jahpoi nna, amying hten hkra galaw ai re. Karai a amying hte arawng sadang hpe jahpoi ai gaw, Edin sun hta hpang ai re. Dai lam kaw nna hpa chye lu ai hpe yu yu ga.

8. Adam yan Ewa hpa hpe chye ai kun? Gara ga san ni pru wa ai kun?

⁸ Adam yan Ewa gaw, Karai a amying Yehowa re ai hpe chye ai. Karai hte seng ai ahkyak ai lam law law hpe mung chye ai. Hpan Madu, asak Madu, Hparadisu nta hte hkum tsup ai ningrum ningtau hpe jaw ai wa hku nna chye da ai. (Nin 1:26-28; 2:18) Raitim, Yehowa galaw ya ai lam yawng hpe matut nna myit na kun? Chyeju dum myit, tsawra myit rawt jat hkra galaw na kun? Karai a hpyen gaw shan hpe chyam dinglik ai shaloi, dai ga san ni a mahtai pru wa ai.

9. Ningpawt 2:16, 17 hte 3:1-5 hku nga yang Yehowa gaw Adam yan Ewa hpe hpa tsun ai kun? Satan gaw tengman ai lam hpe nhtan shai hkra gara hku galaw ai kun?

 ⁹ Ningpawt 2:16, 17 hte 3:1-5 hpe hti u. Satan gaw lapu hpe akyu jashawn nna, Ewa hpe ndai ga san san ai: “Ndai sun hta tu ai hpun mahkra hta na, nan n sha lu na rai myit dai, nga nna Karai Kasang gaja wa tsun a ni?” Dai ga san hta ntuk hte bung ai masu ga lawm ai. Karai tsun ai gaw, hpun langai hta lai nna, hpun yawng mayawng kaw na sha mai ai ngu tsun ai. (Nin 2:9) Yehowa gaw nhpaw n ya jaw ya ai wa re. Raitim, hpun langai a namsi hpe n sha na matu hkum pat da ai. Dai majaw, Satan a ga san gaw tengman ai lam hte nhtan shai nga ai. Gam jaw gam ya n kam ai wa ngu shadu hkra shi galaw dat ai. ‘Karai Kasang gaw kaja ai lama ma hpe makoi da ai kun?’ ngu nna Ewa myit wa chye ai.

10. Satan gaw Karai a amying hpe gara hku sari jahpoi wa ai kun? Hpa byin wa ai kun?

¹⁰ Dai aten hta, Ewa gaw Yehowa hpe Uphkang Madu hku nna naw hkap la ai. Satan hpe Karai a lam matsun ni tsun dan ai. Hpun hpe hkra pyi n hkra ging ai ngu tsun shalawm ai. Karai a sadi jaw ga hpe n madat yang, si na hpe shi chye ai. Raitim, Satan gaw, “nan gaja wa n si” ai ngu bai tsun ai. (Nin 3:2-4) Satan gaw masu wa ai. Yehowa a amying hpe sari jahpoi nna, masu ai wa re ngu shadu mat hkra, Ewa hpe tsun wa ai. Satan gaw nhkru ai nat, sari jahpoi ai wa byin mat ai. Ewa gaw hkalem hkrum nna, Satan hpe grau kam mat ai. (1 Tm 2:14) N kaja ai dawdan lam jahkrat nna, Yehowa a ga n madat wa ai. N sha na matu Yehowa hkum pat da ai namsi hpe sha kau ai. Adam hpe mung jaw sha ai.​—Nin 3:6.

11. Adam yan Ewa hta gara ahkaw ahkang nga ai kun? Shan hpa n galaw wa ai kun?

¹¹ Satan hpe Ewa ndai hku bai tsun ai ngu myit yu ga: “Nang kadai re ai hpe ngai n chye ai. Raitim, Nye Wa Yehowa hpe gaw chye ai. Shi hpe ngai tsawra ai. Shi hpe kam ai. An hta nga ai yawng mayawng hpe shi jaw da ai. Shi hte seng nna n kaja ai hku tsun gwi ai i? Pru mat wa u!” Dai zawn sadi dung ai ga ni hpe tsawra ai kasha tsun ai shaloi, Yehowa grai kabu na re. (Gsh 27:11) Raitim, Adam yan Ewa gaw Yehowa hpe tsawra myit n madun wa ai. Dai majaw, kawa a amying jahpoi asawng hkrum nga ai hpe n makawp maga lu wa ai.

12. Satan gaw Ewa a myit hta ntsen ai myit ni hpe gara hku bang ya ai kun? Adam yan Ewa hpa n galaw wa ai kun?

¹² Satan gaw, Yehowa a arawng sadang hpe jahpoi asawng ai hku nna, Ewa a myit hta ntsen ai myit nga wa hkra galaw wa ai. Adam yan Ewa gaw Yehowa a amying hte arawng sadang hpe n makawp maga wa ai. Dai majaw, Satan a ga madat na matu hte shan  a kawa hpe gumlau na matu loi mat ai. Ya mung, Satan gaw dai zawn ladat hpe sha lang nga ai. Shi a masu ga hpe kam ai ni gaw Yehowa a ding hpring ai uphkang lam hpe aloi sha nyet kau ma ai.

13. Ezekela 36:23 gaw Chyum Laika a madung lam hpe gara hku dan dawng shangun ai kun?

¹³ Sari jahpoi ai hpe hpa mung n galaw ai sha Yehowa hkam sharang wa ai kun? N re. Shi hte seng nna Edin sun hta tsun wa ai gaw n jaw ai hpe sakse madun wa sai lam Chyum Laika hta mu lu ai. (Nin 3:15) Chyum Laika hta, Yehowa gaw shi a amying chyoi pra hkra galaw na hte seng nna, chye na hkra karum ya lu ai lam ni lawm ai. Chyum Laika a madung shiga hpe anhte ndai hku kadun dawk lu tsun ai: Yehowa gaw Kasha uphkang ai Mungdan hku nna shi a amying san seng hkra galaw na, ginding aga hpe ding hpring ai hte simsa lam bai galaw ya na.​—Ezekela 36:23 hpe hti u.

14. Yehowa gaw Edin sun hta amying jahpoi hkrum ai shaloi gara hku bai htang wa ai kun?

¹⁴ Yehowa a yaw shada lam n awng dang hkra, galaw lu ai lam yawng hpe Satan galaw ai. Raitim, shi hkrat sum nga ai. Chyum Laika hta Yehowa galaw ai lam ni hpe madun da ai. Dai gaw Yehowa hte bung ai kadai mung n nga ai hpe madun nga ai. Gumlau ai Satan hte shi hpang hkan ai ni a majaw, Yehowa grai hkra machyi ai. (Shk 78:40) Raitim, manghkang hpe hpaji rawng ai, tara rap ra ai, myit galu ai hku hparan wa ai. Chyahtum chyalai n-gun atsam hpe mung lam amyu myu hku madun wa ai. Shi galaw ai lam yawng hta tsawra myit madun wa ai. (1 Yh 4:8) Shi a amying chyoi pra hkra galaw ai hpe kadai mung pat shingdang n lu ai.

15. Dai ni aten hta Satan gaw Karai a amying hpe gara hku sari jahpoi nga ai kun? De a majaw hpa byin nga ai kun?

¹⁵ Satan gaw dai ni aten du hkra, Karai a amying hpe jahpoi asawng nga ai. Karai Kasang gaw atsam nga ai, tara rap ra ai, nyan hpaji hte tsawra myit nga ai hpe masha ni  ntsen wa hkra shi galaw ai. Ga shadawn, Yehowa hpe Hpan Madu n re ai ngu masha ni kam hkra shakut nga ai. Karai hpe kam ai ni hpe chyawm gaw, Karai Kasang gaw tara n rap ra ai, Shi a tsang madang ni gaw tara ja ai ngu myit hkra shakut nga ai. Yehowa gaw tsawra myit n rawng ai Karai re ai majaw, ngarai hta zingri ai ngu nna pyi sharin ya ai. Dai hpe kam ai ni gaw, Yehowa a ding hpring ai uphkang lam hpe nyet kau ai. Satan n jahten hkrum dingsa, matut nna sari jahpoi na, nang hpe mung Yehowa hte tsan mat hkra shakut na re. Shi awng dang na kun?

16. Adam yan Ewa n lu galaw ai gara lam hpe nang galaw lu ai kun?

¹⁶ Yehowa gaw shi a amying san seng hkra galaw ai hta lawm na matu, n hkum tsup ai masha ni hpe ahkang jaw da ai. Adam yan Ewa n lu galaw ai lam hpe nang lu galaw ai. Mungkan hta Yehowa a amying hpe sari jahpoi ai masha ni hte hpring nga tim, Yehowa gaw chyoi pra ai, ding hpring ai, kaja ai, tsawra myit nga ai ngu tsun dan na matu nang hta ahkaw ahkang nga ai. (Esa 29:23) Shi a uphkang lam hpe nang madi shadaw lu ai. Dai uphkang lam sha ding hpring nna, hkrung mahkrung yawng hpe ngwi pyaw simsa lam jaw lu ai hpe masha ni chye na hkra karum ya lu ai.​—Shk 37:9, 37; 146:5, 6, 10.

17. Yesu gaw shi kawa a amying hpe gara hku chye hkra galaw ya wa ai kun?

¹⁷ Yehowa a amying hpe makawp maga ai gaw, Yesu a kasi hpe hkan sa ai re. (Yhn 17:26) Yesu gaw Kawa a amying hpe masha ni chye hkra galaw ai sha n-ga, kawa a arawng sadang hpe mung makawp maga wa ai. Ga shadawn, Hparishe ni gaw Yehowa hpe mazut ai, n dang di ai hpe galaw shangun ai, grai tsan gang ai, matsan dum myit n nga ai ngu shadu hkra galaw ai. Raitim, Kawa gaw rap ra ai, myit galu ai, matsan dum myit nga ai, mara raw ya ai Karai re ai hpe chye hkra Yesu karum ya wa ai. Shi a prat hkrun lam hta Kawa a atsam ningja ni hpe htep lahti hkan sa nna, Yehowa a lam chye hkra karum ya wa ai.​—Yhn 14:9.

18. Yehowa hte seng ai masu ga ni, sari jahpoi ai ga ni hpe anhte gara hku ningdang kau lu na kun?

¹⁸ Yesu zawn, anhte mung masha ni hpe Yehowa a lam tsun dan lu ai. Karai gaw tsawra myit nga nna, matsan dum chye ai hpe  sharin ya lu ai. Dai gaw Yehowa hte seng ai masu ga ni, sari jahpoi ga ni hpe ningdang kau ai re. Yehowa a amying chyoi pra ai hpe masha ni chye hkra galaw ai hku nna, shachyoi shapra ya lu ai. Anhte n hkum tsup nga tim, Yehowa hpe kasi la lu ai. (Ehp 5:1, 2) Yehowa gaw gara zawn Karai re ai hpe chye hkra anhte a galaw hkawm sa ai lam hte madun ai, Karai hte seng nna chye na shut ai lam ni hpe sharai ya ai gaw, dai amying hpe shachyoi shapra ya ai re. * Dai hku nna, sadi dung ai lam madun lu ai.​—Yob 27:5.

19. Esaia 63:7 hku nga yang anhte sharin ya ai a madung lam gaw hpa byin ging ai kun?

¹⁹ Anhte galaw lu ai kaga lam langai hpe yu yu ga. Ninggawn tawa hpe up na ahkang gaw Yehowa kaw sha nga ai. Chyum Laika sharin ya ai shaloi, Karai a awmdawm ahkang hpe anhte chyahkring hkring ahkyak shatai tsun dan ai. Karai a tara ni hpe sharin ya ai gaw, Yehowa hpe tsawra na matu hte sadi dung lu na matu re. Yehowa gaw gara zawn Karai re ai hpe ahkyak shatai tsun dan na matu, shi a atsam ningja ni hpe dan dawng hkra tsun dan ra ai. (Esaia 63:7 hpe hti u.) Dai hku sharin ya ai gaw, Yehowa hpe kaga ni tsawra wa hkra, sadi dung mayu wa hkra, anhte karum ya nga ai re.

20. Hpang na sumhpa hta hpa lam hkaja lu na kun?

²⁰ Anhte a sharin ya ai lam ni hte akyang lailen gaw, Yehowa a amying hpe shagrau lu ai. Shi hpang de kaga ni sit sa na matu mung karum ya lu ai. Dai lam hpe hpang na sumhpa hta hkaja lu na re.