DISOLO YA KULONGUKA 23
“Zina na Nge Kuvanda ya Santu”
“O Yehowa, zina na nge ke zingaka kimakulu.”—NK. 135:13.
NKUNGA 10 Kumisa Yehowa, Nzambi na Beto!
MAMBU YINA DISOLO YAI KE TUBILA *
1-2. Inki mambu Bambangi ya Yehowa ke zolaka kutubila mingi?
MAMBU ya kuluta mfunu bubu yai sambu na beto yonso kele luyalu ya Yehowa mpi lukumu ya zina na yandi. Bambangi ya Yehowa ke zolaka kutubila mingi luyalu ya Yehowa mpi zina na yandi. Kansi, luyalu ya Nzambi mpi kusantisa zina na yandi kele mambu zole ya kele ti kuwakana.
2 Beto yonso me bakisaka nde Nzambi fwete katula mambu yonso ya mbi yina bantu me tubaka sambu na zina na yandi. Beto me bakisaka mpi nde bigangwa yonso fwete bakisa nde luyalu ya Yehowa disongidila mutindu na yandi ya kuyala kele ya kuluta mbote. Yai kele mambu zole ya beto fwete simba na mabanza mpi kutudila dikebi mingi.
3. Zina Yehowa ke tendula nki?
3 Ya kieleka, zina Yehowa ke tendula mambu yonso ya me tala Nzambi na beto, yo ke tadila mpi mutindu na yandi ya kuyala. Yo yina, kana beto ke ndima pwelele nde kukatula mambu yonso ya mbi yina bantu me tubaka sambu na zina ya Nzambi kele—diambu ya ntete ya mfunu, yo ta monisa nde beto ke ndimaka nde luyalu na yandi kele ya kuluta mbote. Zina ya Yehowa me kangamaka ngolo ti mutindu na yandi ya kuyala sambu yandi kele Mfumu mpi Nkwa-Ngolo Yonso.—Tala lupangu “ Mambu ya Kuluta Mfunu.”
4. Inki mambu Nkunga 135:13 ke tuba sambu na zina ya Nzambi mpi disolo yai ta pesa bamvutu na nki bangiufula?
4 Zina Yehowa kele mfunu mingi kuluta. (Tanga Nkunga 135:13.) Sambu na nki? Inki mutindu Satana tubaka mambu ya mbi sambu na zina ya Nzambi na mbala ya ntete? Inki mutindu Nzambi ke pesa zina na yandi lukumu? Inki mutindu beto lenda nwanina zina yina? Beto baka bamvutu ya bangiufula yai.
MFUNU YA ZINA
5. Inki ngiufula beto lenda kudiyula ntangu beto ke tubila kuzantisama ya zina ya Nzambi?
5 “Zina na nge kuvanda ya santu.” (Mat. 6:9) Yai kele diambu ya ntete yina Yezu songaka beto na kutubila ntangu beto ke samba. Mambu yina Yezu tubaka ke tendula nki? Kusantisa kima mosi ke tendula kukumisa yo bunkete, mpembe mpi kutula yo ve mvindu. Bantu ya nkaka lenda kudiyula nde: Keti ‘zina ya Yehowa ke vandaka ve dezia bunkete, mpembe mpi ya kukonda mvindu?’ Sambu na kusadisa bo na kubakisa mambu mbote, beto fwete zaba ntete, zina ke tendulaka nki.
6. Inki ke pesaka zina lukumu?
6 Zina kele ve kaka bisono yina bo me vukisa mpi ke sonika na mukanda to ke binga. Biblia ke tuba nde: “Zina ya mbote kele mbote kuluta kimvwama mingi.” (Bing. 22:1; Lon. 7:1) Sambu na nki zina me luta bimvwama na mbalu? Sambu yo ke monisaka lukumu ya muntu, mutindu bantu ya nkaka ke tadilaka munkwa-zina yina. Yo yina mutindu bantu ke sonikaka zina ya muntu to ke bingaka yo kele ve mfunu mingi, kima ya mfunu kele munkwa-zina mpi mambu yina bantu ke yindulaka ntangu bo ke wa zina yango.
7. Inki mutindi bantu fingisaka zina ya Nzambi?
7 Ntangu bantu ke tubaka mambu ya luvunu sambu na Yehowa, bo ke bebisaka lukumu na yandi mpi ke pusaka bantu na kumona nde yandi kele mbi. Zina ya Nzambi mpi lukumu na yandi bebaka na mbala ya ntete na kilanga ya Edeni. Beto tadila mambu yina beto lenda longuka na mambu yina salamaka.
MUTINDU BO FINGAKA ZINA YA NZAMBI NA MBALA YA NTETE
8. Inki mambu Adami ti Eva zabaka mpi nki bangiufula yo ke basisa?
8 Adami ti Eva zabaka zina ya Yehowa mpi mambu mingi ya mfunu ya me tala munkwa-zina yango. Bo zabaka nde yandi muntu gangaka bo, pesaka bo luzingu, Paladisu ya kitoko mpi nkwelani ya mbote ya kukuka. (Kuy. 1:26-28; 2:18) Keti bo landaka kusadila mayele na bo ya kukuka sambu na kuyindula mambu ya mbote yina Yehowa sadilaka bo? Keti bo landaka kukumisa kinduku na bo ti Yehowa ngolo mpi kumonisila yandi ntonda? Mvutu monanaka pwelele ntangu mbeni ya Nzambi kusaka bo.
9. Inki Yehowa zabisaka bankwelani ya ntete yina Kuyantika 2:16, 17; 3:1-5 ke tubila, inki mutindu Satana sobaka kieleka na diambu yango?
9 Tanga Kuyantika 2:16, 17; 3:1-5. Satana salaka yonso sambu Eva kuyindula nde yandi ke solula ti nioka. Satana yulaka Eva nde: “Keti Nzambi tubaka kibeni nde beno fwete dia ve mbuma ya konso nti yina kele na kilanga?” Ngiufula yai vandaka ti luvunu mosi ya kubumbana yina vandaka bonso ndikila. Kieleka kele nde, Nzambi tubaka nde bo dia bambuma ya banti yonso, kansi bo dia ve bambuma ya nti mosi mpamba. Yo kele pwelele nde Adami ti Eva vandaka ti bambuma mingi mpenza ya kudia. (Kuy. 2:9) Ya kieleka, Yehowa ke kabaka. Yandi songaka Adami ti Eva na kudia ve bambuma ya nti mosi kaka mpamba. Ngiufula ya Satana sobaka kieleka. Satana zolaka nde bo mona nde Yehowa ke kabaka ve. Ziku Eva kudiyulaka nde, ‘Nzambi me buyisaka beto kima ya kitoko ya mutindu yai?’
10. Inki mutindu Satana tubaka mambu ya mbi sambu na zina ya Nzambi mpi nki mambu yo me nataka?
10 Tii na ntangu yina, Eva vandaka kuzaba nde Yehowa kele Mfumu na yandi. Eva songaka Satana na pwelele yonso mambu yina Nzambi songaka bo. Yandi yikaka nkutu nde bo lenda ve kusimba nti yina. Eva zabaka nde kana bo zitisa ve nsiku yina, bo ta fwa. Kansi Satana vutudilaka yandi nde: “Beno ta fwa ve ata fioti.” (Kuy. 3:2-4) Satana bumbaka diaka ve bangindu na yandi, yandi vwezaka pwelele zina ya Nzambi, na bunkufi, yandi monisaka Eva nde Yehowa kele muntu ya luvunu. Yo yina, Satana kumaka diabulu to muntu ya luvunu. Satana kusaka kibeni Eva mpi Eva kwikilaka luvunu yina. (1 Tim. 2:14) Eva tudilaka Satana ntima mingi kansi Yehowa ve. Yo yina, Eva bakaka lukanu ya kuluta mbi na luzingu na yandi, lukanu ya kuzitisa ve nsiku yina Yehowa pesaka bo. Yandi diaka mbumba yina Yehowa buyisaka, na nima, yandi pesaka mpi Adami.—Kuy. 3:6.
11. Yo lombaka nde bibuti ya ntete kusala nki, kansi nki bo salaka ve?
11 Inki mambu yo lombaka nde Eva kuzabisa Satana? Yindula fioti nde Eva songaka Satana nde: “Mono ke zaba nge ve, kansi mono ke zaba Yehowa, Tata na mono mpi mono ke zolaka yandi mingi mpi ke tudilaka yandi ntima. Yandi me pesaka mono ti Adami bima yonso yina beto kele na yo. Sambu na nki nge ke tubila yandi mambu ya mbi ya mutindu yai? Katuka awa!” Yehowa zolaka kusepela mingi kuwa mambu ya mbote yina ke basika na munoko ya mwana na yandi ya nkento! (Bing. 27:11) Kansi Eva vandaka ve kuzola Nzambi na ntima na yandi ya mvimba, Adami mpi kiteso mosi. Zola ya fioti yina bo vandaka na yo sambu na Tata na bo salaka nde bo kotila yandi ve na ntwala ya muntu yina vandaka kutuba mambu ya luvunu sambu na yandi.
12. Inki mutindu Satana kunaka badute na ntima ya Eva, mpi nki Adami ti Eva salaka ve?
12 Mutindu beto me mona yo, Satana yantikaka na kukuna badute na mabanza ya Eva. Yandi pusaka Eva na kusosa kuzaba kana munkwa-zina yai Yehowa kele muntu ya nki mutindu. Yo yina Adami ti Eva nwaninaka ve zina mpi lukumu ya Yehowa. Bo ndimaka mambu yina Satana songaka bo mpi bo zitisaka ve nsiku ya Tata na bo. Bubu yai Satana ke sadilaka mpi mayele ya mutindu mosi. Yandi ke vwezaka zina ya Yehowa ntangu yandi ke tubaka mambu ya luvunu sambu na zina yango. Bantu yina ke kwikilaka luvunu ya Satana ke buyaka kibeni kundima nde Yehowa ke yalaka na mutindu ya kuluta mbote.
YEHOWA KE SANTISA ZINA NA YANDI
13. Inki mutindu Ezekiele 36:23 ke tubila na bunkufi nsangu ya Biblia?
13 Keti Yehowa ke ndimaka nde bantu kutuba mambu ya mbi ya mutindu yina sambu na zina na yandi? Ata fioti ve! Biblia ke tubila mambu yina Yehowa me salaka sambu na kumonisa nde mambu ya mbi yina bo ke tubaka sambu na zina na yandi banda na Edeni kele ya luvunu. (Kuy. 3:15) Ya kieleka, beto lenda tuba nde na bunkufi nsangu ya Biblia kele nde Yehowa ke santisa zina na yandi na nzila ya Kimfumu ya Mwana na yandi mpi ke vutula lunungu mpi ngemba na ntoto. Biblia ke tubila mambu yina lenda sadisa beto na kubakisa mutindu Yehowa ke santisaka zina na yandi.—Tanga Ezekiele 36:23.
14. Inki mutindu mvutu yina Yehowa me pesaka na kukolama ya Edeni ke santisaka zina na yandi?
14 Satana ke salaka bikesa sambu lukanu ya Yehowa kulungana ve. Kansi yandi ke kukaka ve mpi ta kuka ve ata fioti. Masolo ya Biblia ke monisa mambu yina Yehowa me salaka mpi yo ke monisa nde muntu mosi ve lenda fwanana ti Yehowa Nzambi. Ya kieleka, Yehowa waka mpasi mingi ntangu Satana mpi bantu yina landaka yandi kolamaka. (Nk. 78:40) Ata mpidina, yandi ke yidikaka diambu yango na mayele, na ntima-nda mpi na lunungu. Yandi me monisaka mpi na mitindu mingi nde yandi kele Nkwa-Ngolo Yonso. Diambu ya mfunu kuluta kele nde zola na yandi ke monanaka na mambu yonso yina yandi ke salaka. (1 Yoa. 4:8) Yehowa ke salaka yonso sambu na kusantisa zina na yandi.
Satana zabisaka Eva mambu ya luvunu sambu na Yehowa mpi na nsungi ya bamvula mingi, yandi ke landa kutuba mambu ya mbi sambu na Nzambi (Tala baparagrafe 9-10, 15) *
15. Inki mutindu Satana ke vwezaka zina ya Nzambi bubu yai mpi nki mambu yo ke basisaka?
15 Bubu yai, Satana ke landaka kaka kutuba mambu ya mbi sambu na zina ya Nzambi. Yandi ke pusaka bantu mingi na kukwikila ve nde Nzambi kele Nkwa-ngolo Yonso, kele lunungu, mayele mpi zola. Mu mbandu, yandi ke sosaka kundimisa bantu nde Yehowa ve muntu gangaka bima. Kana bantu ke ndima nde Nzambi kele, Satana ke sosaka kundimisa bo nde Nzambi mpi bansiku na yandi kele ngolo mpi mbote ve. Diaka, yandi ke longa bantu nde Yehowa kele ntima-mbi, nku mpi yandi ke yokaka bantu na tiya ya ngolo. Bantu ya ke kukwikila mambu yai, ke buyaka kundima nde Yehowa ke yalaka na mutindu ya kuluta mbote. Na ntwala nde Satana kufwa, yandi ta landa kutuba mambu ya mbi sambu na Yehowa mpi ta sala yonso sambu nge yambula Yehowa. Keti nge ta bika nde yandi nunga?
MAMBU YA NGE FWETE SALA SAMBU NA KUPESA ZINA YA NZAMBI LUKUMU
16. Inki mambu nge lenda sala yina Adami ti Eva salaka ve?
16 Yehowa ke pesaka bantu ya kukonda kukuka nswa ya kupesa zina na yandi lukumu. Ya kieleka, nge lenda baka lukanu ya kulanda ve mbandu ya Adami ti Eva. Ata beto ke zinga na ntoto yai ya me fuluka ti bantu yina ke vweza mpi ke fingisa zina ya Yehowa, nge kele ti dibaku ya kusonga bo kieleka nde Yehowa kele santu, Nzambi ya lunungu, ya mbote mpi ya zola. (Yez. 29:23) Nge lenda monisa nde nge ke zolaka luyalu na yandi. Nge lenda ndimisa bantu nde luyalu ya Yehowa mpamba me luta mbote mpi yo ta natila bantu ngemba mpi kiese ya kieleka.—Nk. 37:9, 37; 146:5, 6, 10.
17. Inki Yezu zabisaka bantu zina ya Tata na yandi?
17 Kana beto ke nwanina zina ya Yehowa, beto ke landa mbandu ya Yezu Kristu. (Yoa. 17:26) Yezu zabisaka bantu zina ya Tata na yandi. Yandi vandaka kusadila zina yango mpi kunwanina lukumu ya Yehowa. Mu mbandu, yandi monisaka pwelele nde mambu yina Bafarize vandaka kutuba sambu na kumonisa Yehowa bonso muntu ya nku, ya ke lombaka beto mambu mingi, ya kele ntama ti bantu, mpi yandi me konda mawa vandaka luvunu. Yezu sadisaka bantu na kubakisa nde Tata na yandi kele muntu ya mbote, ya ntima-nda, ya zola mpi ke lolulaka bantu. Diaka, konso kilumbu, yandi vandaka kulanda mbandu ya bikalulu ya Yehowa na mutindu ya kukuka sambu na nzila na yandi bantu kumona bikalulu ya Tata na yandi.—Yoa. 14:9.
18. Inki mutindu beto lenda katula mvindu mpi kufinga yina bo ke fingaka Yehowa?
18 Bonso Yezu, beto lenda longa bantu mambu ya beto ke zaba sambu na Yehowa nde yandi kele Nzambi ya mbote mpi ya zola. Kana beto sala mutindu yina beto ta katula mvindu mpi mafingu yina bantu me tulaka na zina na yandi. Beto ke santisaka zina na yandi ntangu beto ke kumisaka yo santu na meso mpi na bantima na bo. Beto fwete landa mbandu ya Yehowa. (Baef. 5:1, 2) Kana beto ke tuba mambu ya mbote mpi ke monisa bikalulu ya mbote, yo ta sadisa bantu na kuzaba mbote Yehowa mpi ta pesa zina na yandi lukumu. Beto ta pesa zina ya Nzambi lukumu kana beto ke sadisa bantu na kukatula bangindu ya mbi yina bo kele na yo sambu na Nzambi. * Kana beto sala mpidina, yo ta monisa nde bantu ya kukonda kukuka lenda bikala ya kwikama na Nzambi.—Yobi 27:5.
Beto fwete sadisa balongoki ya Biblia na kubakisa nde Yehowa kele mbote mpi yandi kele ti bikalulu ya mbote (Tala baparagrafe 18-19) *
19. Inki mutindu Yezaya 63:7 ke sadisa beto na kuzaba mambu ya mfunu yina beto fwete longa bantu?
19 Beto tadila dilongi ya nkaka ya mfunu yina beto lenda sadila. Ntangu beto ke longaka bantu bakieleka ya Biblia, mbala mingi beto ke tubilaka luyalu ya Nzambi, beto ke tubaka nde Yehowa kele ti nswa ya kuyala zulu ti ntoto, mambu yina beto ke tubaka kele kibeni kieleka. Kansi, ntangu beto ke monisa mfunu ya bansiku ya Nzambi, lukanu na beto kele ya kusadisa bantu ya nkaka na kuzola Yehowa, Tata na beto mpi kubikala ya kwikama na yandi. Diaka, beto fwete monisa mpi bantu pwelele bikalulu na yandi ya mbote, kubenda dikebi na bo na kimuntu ya Nzambi mpi na ntendula ya zina na yandi. (Tanga Yezaya 63:7.) Kana beto ke longa mutindu yai, beto ta sadisa bantu na kuzola Yehowa mpi kulemfukila yandi sambu bo kangama ngolo na yandi.
20. Inki beto ta tubila na disolo yina ke landa?
20 Inki lenda sadisa beto na kuzaba nde bikalulu mpi malongi na beto ke pesaka zina ya Yehowa lukumu mpi ke bendaka bantu na yandi? Disolo yina ke landa ta pesa mvutu na ngiufula yai.
NKUNGA 2 Zina na Nge Yehowa
^ par. 5 Inki kele diambu ya kuluta mfunu sambu na bigangwa yonso ya mayele? Sambu na nki yo kele mfunu mingi mpi sambu na nki yo ke tadila beto? Kana beto me baka mvutu na bangiufula yai, yo ta sadisa beto na kukumisa ngolo kinduku na beto ti Yehowa.
^ par. 18 Ntete mikanda na beto vandaka kutuba nde: “beto lenda ve kunwanina zina ya Nzambi sambu muntu mosi ve me buyaka nde Nzambi me fwana ve na kuvanda ti zina yina. Kansi, na lukutakanu ya nsuka-mvula ya 2017, bo tendulaka mbote-mbote kibeni diambu yai. Ntwadisi ya lukutakanu tubanda nde: “Yo kele mbi ve na kutuba nde beto fwete samba sambu na kunwanina zina ya Yehowa sambu bantu kupesa yo lukumu yina me fwana.”—Tala manaka ya JW Télédiffusion ya Yanuari 2018 na jw.org®. Kota na BIBLIOTEKE mpi na JW TÉLÉDIFFUSION. (Kifalansa)
^ par. 62 NTENDULA YA BIFWANISU: Diabulu tubaka mambu ya luvunu sambu na Nzambi ntangu yandi songaka Eva nde Nzambi kele muntu ya luvunu. Na nsungi ya bamvula mingi, Satana me kotisaka na mabanza ya bantu bangindu mingi ya luvunu, mu mbandu yandi me pusaka bantu na kuyindula nde Nzambi kele nku mpi yandi ve muntu gangaka bantu.
^ par. 64 NTENDULA YA BIFWANISU: Mpangi-bakala mosi ke longuka Biblia ti muntu, yandi ke benda mingi dikebi ya muntu yina na bikalulu ya Nzambi.
