1-2. Makahi abetakota phala o Jimbangi ja Jihova?

O MAKA abetakota utwene mudibhananawu mu izuwa yalelu, o usobha wa Jihova ni kuzelesa o dijina dyê. Kuma tu Jimbangi ja Jihova, twawabhela kuzwela o maka yâ akatunda. Maji o kwila o maka a ungana wa Jihova ni akuzelesa o dijina dyê, maka kadifu? Kana.

² Etwenyoso twejiya kwila o dijina dya Nzambi abhingi kudizelesa kulusebhu. Twejiya we kwila, o ungana wa Jihova, kifwa; o ukexilu wê wakutumina, wene o wabeta dingi kota. Kyenyikiphe o maka ayadi yâ abetakota.

3. O dijina Jihova dyalungu ni ihi?

³ Mukidi o dijina Jihova, dyalungu ni ima yoso ibhanga Nzambi yetu, kala o ukexilu wê wakutumina. Kyenyikiphe se twamba twixi o dijina Jihova adizelese kulusebhu lwoso, twamuzwela we kwila, o ukexilu wa Jihova wakutumina, wene wabeta dingi kota. O dijina Jihova, dyalungu ni ukexilu wê wakutumina kuma mwene o Ngana mutenyayoso.—Tala o kaxa “ Ima Yalungu ni Maka Abetakota.”

4. Jisálamu 135:13 dijimbulula kyebhi o dijina dya Nzambi? Ibhwidisu yebhi itwanda dilonga mumbandu yiyi?

⁴ O dijina Jihova, dijina dyakatunda. (Tanga Jisálamu 135:13.) Ima yahi ibhangesa o dijina dya Nzambi kukala dijina dyakatunda? Kyebhi o dijina didi kyadisebhulula muveji yadyanga? Kyebhi Nzambi kyene mudizelesa, ni kyebhi kitutena kukwatekesa mu kuzokela o dijina dyê? Twanda dilonga o ibhwidisu yiyi.

5. Kyoso o athu kyevwa maka alunguni kuzelesa o dijina dya Nzambi a di bhanga kibhwidisu kyebhi?

⁵ ‘Dijina dyé a di zelese.’ (Mat. 6:9) Jezú wambe kwila yâ ene o maka abetakota utwatokala kutumbula mu misambu yetu. Maji o izwelu yiyi ya Jezú ilombolola ihi? Kuzelesa kima kilombolola kukikitula kikôla mba kukiyukisa. Maji o athu atena kudibhwidisa, o dijina dya Nzambi dijina dikôla kyá, dyazele kyá, dyayuka kyá?’ Phala kutambwijila twatokala kubanza se dijina dya muthu dyalungu ni ihi.

6. Ihi ibhangesa o dijina kukala ni valolo?

⁶ O dijina dya muthu kikizwelu ngó kyatena kusoneka ni kutumbula, kana. Tala izwela o Bibidya: “Kota kukala ni dijina dyawabha . . . kwindi o kusola nzungule ya jimbongo.” (Jisa. 22:1; Ndo. 7:1) Mukonda dyahi o dijina dyambote dyala ni valolo yavulu? Mukonda o dijina dya muthu, dyalungu ni wendelu wê, kifwa; kyebhi o athu amukwa kyatala o muthu wavu o dijina didi. Kyenyekiphe o ukexilu wasoneka o dijina mba kyebhi kyaditumbula, kikyene o kima kyabetakota. Maji kyabeta mwene kota o kixinganeku kiza mukilunji kya athu kyoso kyatala ni kwivwa o dijina didi.

7. Kyebhi o athu kyaxidisa o dijina dya Nzambi?

⁷ Kyoso o athu kyazwela makutu alungu ni Jihova, ene amusota kubhangesa o athu kuxinganeka ima yayibha yalungu ni Jihova. Kyoso o athu kyamona o ima yiyi yayibha, ene asota kutatela Nzambi ni kuxidisa o dijina dyê. O dijina dya Nzambi ni wendelu wê wambote asoto ku uxidisa muveji yadyanga mu njaludi ya edene. Tumone se ihi itudilonga mukitatelu kiki.

8. Ihi yejidile Ada ni Eva? Ibhwidisu yebhi imoneka?

⁸ Ada ni Eva ejidile kwila o dijina dya Nzambi, Jihova. Ejidile we ima yavulu yalungu ni mwene. Ene amwijidile kala mubhangi, amwijidile we kala yo wa abhele o mwenyu, yo wa abhana o dibhata dyayuka, o palayizu, yo wa abhana o dikaza dyayuka. (Dim. 1:26-28; 2:18) Sumbala ni kilunji kyayuka, ene kasuluka ni kuxinganeka mu ima yambote ya abhele Jihova. Ene kasuluka mukubandekesa o henda mba o kisakidilu kyâ kwa Jihova. O kidi kiki kyadimonekena kyoso o nguma ya Nzambi kya alola.

9. Kala kilondeksa Dimatekenu 2:16, 17 ni 3:1-5, ihi yambele Jihova kudikaza dyadyanga? Kyebhi Satanaji kyalungulula o kidi?

 ⁹ Tanga Dimatekenu 2:16, 17 ni 3:1-5. Bhukaxi ka nyoka, Satanaji webhwidisa kwa Eva: “Kifwa Nzambi wamikidika kudya kumixi yoso ya díbhya?” Mu kibhwidisu kiki kyabhange Satanaji, mwexile makutu alungu ni Nzambi. Eva wamateka kuxinganeka ima yayibha yalungu ni Nzambi. Mukidi Nzambi wa atangela phala kudya ku mixi yoso mu njaludim, maji wafidisa kudya kumuxi umoxi ngó. Mu Njaludim mwexile ibundu yanzungule phala Ada ni Eva kudya. (Dim. 2:9) Jihova Nzambi mukwa kubhana, maji wafidisa Ada ni Eva phala kadye ku muxi umoxi ngó. Mukikiphe o kibhwidisu kya Satanaji kyalungulula o kidi, kyabhangesa Eva kuxinganeka kwila, Nzambi kimukwa kubhana. Eva nange wadibhwidisa, ‘O kwila Nzambi wamutuswekela kima kyambote?’

10. Kyebhi Satanaji kyaxidisa o dijina dya Nzambi se kubhana jihonda? Ihi yabhiti?

¹⁰ Kyoso Satanaji kyabhange o kibhwidisu kiki, Eva wexile hanji mubelesela Jihova. Mwene watambwijila Satanaji mukutumbula o ijila yabhele Nzambi. Mwene wabandekesa kwila katokalele né ngo kukwata ku muxi wofidise. Mwene wejidile kyambote o idimwinu ya Nzambi yakwila, o kukamba kubelesela kweji kwabhekela kalunga. Maji Satanaji watambwijila: “Makutu, ki mwanda kufwa.” (Dim. 3:2-4) Bhabha Satanaji kabhana dingi jihonda. Kindala mwene wexile muxidisa o dijina dyambote dya Nzambi, mukwambela kwa Eva kuma, Jihova wexile mukwa makutu. Kyenyiki, Satanaji wakituka Dyabu mba mukwakutatela makutu. Bhofelebhofele Eva amunganala yu waxikina mu izwelu ya Satanaji. (1 Tim. 2:14) Mwene wadyelela dingi mu kilunji kyê, muveji dya kudidyelela kwa Jihova. Kiki kyabhangesa Eva kusola kyayibha. Mwene wasolo kubhukumukina Jihova. Eva wadi kukibundu kya afidisile, mukusuluka wabhana kwa Ada.—Dim. 3:6.

11. Ihi yatokalele kubhanga Ada ni Eva? Maji ihi yalembwa kubhanga?

¹¹ Xinganeka ngó! Kyebhi Eva kyatokalele kutambwijila Satanaji? Xinganeka kwila Eva watambwijila kiki kwa Satanaji: “Eme kingakwijiya, maji ngejiya kyambote Tata yami, Jihova, ngamuzolo, ngamudyelela ni muxima wami woso. Mwene wangibhana Ada, wangibhana yoso ingalanayu. Mukonda dyahi wamumutatela o ima yiyi yayibha? “Tunda bhabha!” Sé phata, Jihova wejisanguluka kyavulu mukwívwa o izwelu yiyi ya fiyele yamon’ê yakazola! (Jisa. 27:11) Maji kikale Eva, kikale Ada, kexile ni henda ya ufiyele kwa Jihova. Mukonda dya kukamba o henda yiyi kwa tata yâ, Ada ni Eva alembwa kuzokela o dijina dya Nzambi ku itatelu ya Satanaji.

12. Kyebhi Satanaji kyakunu jiphata mukilunji kya Eva? Ada ni Eva alembwa kubhanga ihi?

¹² Kala kitwamono, Satanaji wamateka kukuna jiphata mukilunji kya Eva. Mwene wabhange yoso phala kuxidisa o dijina dya Jihova.  Ada ni Eva alembwa kuzokela o dijina dya Nzambi ni wendelu wê wambote kumakutu aphulu a Satanaji. Ene evu Satanaji, kyenyiki abhukumukina Jihova tata yâ. Lelu we Satanaji wene mukalakala ni jindunge jiji. Mwene ubhanga yoso phala kuxidisa o dijina dya Jihova. O athu axikina mumakutu a Satanaji adituna o unguvulu wayuka wa Jihova.

13. Kala kilondekesa Izekiyele 36:23 yebhi o njimbu yabetakota ya Bibidya?

¹³ O kwila Jihova wabhange kima phala kuzelesa o dijina dyê kulusebhu? Xe, mwene wabhange! O Bibidya yoso itutangela yabhange Jihova phala kulondekesa kwila, o ima yoso yayibha yamutatela mu njaludim ya edene, ima yamakutu. (Dim. 3:15) Mukidi, tutena kujimbulula o njimbu yoso ya Bibidya mu izwelu yiyi: Jihova uzelesa o dijina dyê bhukaxi ka utuminu wamonê anga ubheka dingi o kuyuka ni kutuluka mu ixi. Mu Bibidya mwala milongi itukwatekesa kutendela se kyebhi Jihova kyandatenesa o kikalakalu kyakuzelesa o dijina dyê.—Tanga Izekiyele 36:23.

14. Kyebhi o ukexilu wa Jihova kudibhana ni kibhukumukinu kyabhiti mu edene kyazelesa o dijina dyê?

¹⁴ Satanaji wene mubhanga yoso phala kufidisa Jihova kukumbidila o vondadi yê. Maji muveji joso wene mulembwa. O musoso wa Bibidya ulondekesa yoso yabhange Jihova, ulondekesa kwila, seku muthu wasoko ni Jihova Nzambi. Mukidi, o kibhukumukinu kya Satanaji ni oso enemusola o mbandu yê kyene mulwalesa kyavulu Jihova. (Jisá. 78:40) Maji mwene wene mudibhana ni maka yâ, ni unjimu, mwanyu ni kuyuka. Mwene walondekesa we o kutena kwê kwonene, mu mawukexilu avulu. O kyabeta dingi kota o henda yê idimonekena mu ima yoso yene mubhanga. (1 Nzwá 4:8) Jihova wene mukalakala kyavulu phala kuzelesa o dijina dyê.

15. Kyebhi Satanaji kyene muxidisa o dijina dya Nzambi lelu, ni ihi yene mubhita?

¹⁵ Satanaji wamubhanga hanji yoso phala kuxidisa o dijina dya Nzambi mu izuwa yalelu. Mwene unganala o athu mukwabhangesa kuxinganeka kwila Nzambi kala ni kutena, kala ni kuyuka, kala ni unjimu, kala ni henda. Mukifika, Satanaji usota kuxikinisa athu kwila  Jihova kimwene wabhange o ima yoso. Se o athu axikina kwila kwene Nzambi, Satanaji usota kwa xikinisa kwila o itumu ya Nzambi ya mwakatula o ufolo, ki itumu yayuka. Kate mwene ulonga o athu kwila Jihova ki Nzambi ya henda, kindanda, utakula o athu mukididi kyatubhya. Kyoso o athu kyaxikina mumakutu yâ a phulu, ene abhanga o kima kyamukwa—adituna o unguvulu wayuka wa Jihova. Ku hádya Jihova wandabwika Satanaji. Maji kate kibhixila o kithangana kiki, Satanaji wandasuluka hanji ni kuxidisa o dijina dya Jihova, wandasota kukubhangesa we kudituna Jihova. O kwila mwene wandatena?

16. Ihi yutena o kubhanga yakambe o kubhanga Ada ni Eva?

¹⁶ Jihova wehela athu akwa ituxi kumukwatekesa kuzelesa o dijina dyê. Mukidi, eye utena kubhanga o kima kyakambe o kubhanga Ada ni Eva. Sumbala twala bhukaxi ka athu axidisa ni kusebhulula o dijina dya Jihova, maji eye wala ni ujitu wakuzokela o dijina dya Jihova ni kuzwela ku athu kwila, Jihova ukôla, muthu wayuka, muthu wambote, mukwa henda. (Iza. 29:23) Eye utena kukwatekesa o athu kutendela kwila o utuminu wa Jihova wene ngó wayuka, wene ngó wandabhekela paze mba kutululuka ni kuzediwa phala o ibhangelu yoso ya Nzambi.—Jisá. 37:9, 37; 146:5, 6, 10.

17. Kyebhi Jezú kyejidisa o dijina dya Tat’ê?

¹⁷ Kyoso ki tuzokela o dijina dya Jihova, twamukayela o phangu ya Jezú Kidistu. (Nzwá 17:26) Jezú kejidisa ngó o dijina dya tata yê, mukuditumbula, maji walongo o athu kwijiya se Jihova mukidi nanyi. Mukifika, mwene kakayela o kixinganeku kya jifalizewu, exile mulonga kwila Jihova kindanda, wala dikanga dya athu, kimukwa henda. Jezú wakwatekesa o athu kumona kwila, Jihova utendela o athu, mukwa mwanyu, mukwa henda, mukwa kuloloka. Mwene wakwatekesa o athu kwijiya Jihova, mukukayela o idifwa yê mu kizuwa ni kizuwa.—Nzwá 14:9.

18. Ihi itutena o kubhanga phala kulondekesa kwila o ima yayibha yene muzwela o jinguma yalungu ni Jihova makutu?

¹⁸ Etu twejiya kwila, Jihova Nzambi ya henda, mukwakubhanga mbote. Kyenyikiphe, kala Jezú, twatokala kutangela o ima itwejiya yalungu ni Jihova kwakwetu. Kyoso kitubhanga kiki, twamutolola o makutu ni lusebhu  kudijina dya Jihova. Etu tuzelesa o dijina dya Jihova mukuta mukilunji ni mumuxima wa athu kwila, dyene dijina dikôla. Etu we tutena kukayela o phangu ya Jihova, sumbala tu akwa ituxi. (Efe. 5:1, 2) Kyoso kitulondekesa ku athu o ukexilu wakidi wa Jihova bhukaxi ka izwelu ni ibhangelu yetu, twamukwatekesa kuzelesa o dijina dyê. Tuzelesa o dijina dya Jihova mu kukwatekesa o athu kwijiya o kidi kyalungu ni Nzambi. * Tulondekesa we kwila, o athu akambe o kuyuka atena kukala fiyele kwa Nzambi.—Jobe 27:5.

19. Kala kilondekesa Izaya 63:7 yebhi o mbambe yetu yabetakota mukulonga o athu?

¹⁹ Sayi dingi kima kyengi kitwatokala o kubhanga phala kukwatekesa kuzelesa o dijina dya Jihova. Kyoso kitulonga o kidi kya Bibidya kwakwetu, twene mutumbula muveji javulu o ungana wa Nzambi, ni kwila, Jihova wala ni ujitu wa kutumina o ngongo yoso. Kiki kidi mwene. Majiphe sumbala kima kyambote kwalonga o ijila ya Nzambi, o mbambe yetu yabetakota o kukwatekesa akwetu kuzola Jihova, Tat’êtu, ni kumukala fiyele ni muxima woso. Kyenyikiphe, twabhingi kujimbulula o idifwa ya Jihova, o ukexilu wê wambote walungu ni dijina dyê. (Tanga Izaya 63:7.) Se tulonga mu ukexilu yú, twanda kwatekesa akwetu kuzola, Jihova ni kumubelesela mukonda amesena kumukala fiyele ni muxima woso.

20. Ihi itwanda dilonga mumbandu yakayela?

²⁰ Kyebhiphe kitutena kukwatekesa akwetu kuzukama kwa Jihova bhukaxi kawendelu wetu wambote ni ukexilu wetu wakulonga? O mbandu yakayela yanda tambwijila o kibhwidisu kiki.