1-2. Бона Шәʹдед Йаһоԝа пьрсед лапә фәрз кʹижан ьн?

ИРО әм бәр пьрсәкә фәрз сәкьнинә, кʹижан кӧ пирозкьрьна наве Хԝәдева у изьна һʹӧкӧмәтийа ԝива гьредайи йә. Әм Шәʹдед Йаһоԝа, һʹьз дькьн дәрһәԛа ван тʹемед һʹәԝас шеԝьр кьн. Ле әм фьрԛийе накьнә ортʹа ван дӧ пьрса, демәк изьна сәрԝертийа Хԝәде у пирозкьрьна наве ԝи, чьмки әԝ һәрд тьшт һәвва гьредайи нә.

² Әм гьшк жи заньн, ԝәки наве Хԝәде гәрәке жь беһӧрмәткьрьне паԛьж бә. Әм ӧса жи фәʹм дькьн, ԝәки гәрәке бе избаткьрьне кӧ тʹәне Йаһоԝа йә һʹӧкӧмдар, демәк тʹәне сәрԝертийа ԝи лапә баш ә. Әм гәрәке дина хԝә бьдьнә ԝан һәрдӧ пьрса, чьмки әв пьрс гәләк фәрз ьн.

3. Наве Йаһоԝа диса чь те һʹәсабе?

³ Әԝ йәк кӧ чь те һʹәсабе наве Йаһоԝа, мәрʹа һәр тьшти дәрһәԛа Хԝәдейе мә у ӧса жи сәрԝертийа ԝи, әʹйан дькә. Һәрге әм дьбежьн ԝәки пьрса лапә фәрз бона мә әԝ һәйә пирозкьрьна наве Хԝәде, демәк бь ве йәке әм ӧса жи дьбежьн, ԝәки гәрәке изьна һʹӧкӧмәтийа ԝи бе избаткьрьне. Наве Хԝәде, Йаһоԝа, гьредайи йә тʹәви ве йәке, кӧ әԝ ча Хԝәдейе Һьмзор һʹӧкӧмәтийе дькә. (Бьньһерʹә чаргошә бь наве « Чь те Һʹәсабе Наве Йаһоԝа Паԛьж бә».)

4. Кʹьтеба Зәбур 135:13-да дәрһәԛа наве Хԝәде чь те готьне, у ве готареда әме щабед кʹижан пьрса пебьһʹәсьн?

⁴ Наве Йаһоԝа гәләк мәхсус ә. (Бьхунә Зәбур 135:13.) Ле пьрс пешда тен. Чьрʹа наве Хԝәде ӧса фәрз ә? Кʹәнге щара пешьн сәр наве Хԝәде бӧхдан һатә авитьне? Ча Хԝәде наве хԝә паԛьж дькә? Әм ча дькарьн наве ԝи бьпарезьн? Ԝәрә щабед ԝан пьрса пебьһʹәсьн.

5. Дәрһәԛа пирозкьрьна наве Хԝәде, дьбәкә чь пьрс бал мә пешда бе?

⁵ «Наве тә пироз бә» (Мәт. 6:9). Иса гот, кӧ йа лапә фәрз бона чь жи әм гәрәке дӧа бькьн, әԝ һәйә пирозкьрьна  наве Хԝәде. Ле әв гьлийед Иса чь тенә һʹәсабе? Тьштәки пироз кьн, те һʹәсабе паԛьж кьн. Ле һьнә мәрьв дьбәкә бьфькьрьн: «Нә наве Йаһоԝа ида пироз у паԛьж ә?» Сәва щаба ве пьрсе бьдьн, әм гәрәке фәʹм кьн кӧ нав чь те һʹәсабе.

6. Ԛимәте нав чьда нә?

⁶ Нав тʹәне хәбәр нинә, кʹижан дькарьн бьньвисьн йан жи бежьн. Дина хԝә бьдьне Кʹьтеба Пироз чь дьбежә: «Наве ԛәнщ жь һәбука пʹьрʹ ԛәнщтьр ә» (Мәтʹлк. 22:1; Ԝаиз 7:1). Ле чьрʹа ԛимәте нав ӧса мәзьн ә? Чьмки наве мәрьв дьдә кʹьфше кӧ әв мәрьв кʹе йә у дәрһәԛа ԝи чь дьфькьрьн. Ләма жи фәрз нинә әԝ нав ча те ньвисаре йан ча те готьне, ле фәрз әԝ ә кӧ чахе мәрьв әви нави дьбьһен йан жи ԝи мәрьви дьвиньн, дәрһәԛа ԝи чь те һʹьше ԝан.

7. Чь щурʹәйи мәрьв наве Хԝәде хьраб дькьн?

⁷ Чахе мәрьв дәрһәԛа Йаһоԝа дәрәԝа дьбежьн, әԝана наве ԝи әʹрде дьхьн. Әԝ те һʹәсабе пе ԝан бӧхдана наве ԝи хьраб дькьн. Щара әʹԝльн бахче Еденеда сәр наве Хԝәде бӧхдан һатә авитьн. Ԝәрә шеԝьр кьн кӧ әм дәрһәԛа ве йәке чь педьһʹәсьн.

8. Адәм у Һеԝайе дәрһәԛа чь заньбун, у кʹижан пьрс пешда тен?

⁸ Адәм у Һеԝайе заньбун кӧ наве Хԝәде Йаһоԝа йә. Әԝана ӧса жи дәрһәԛа ԝи тьштед фәрз заньбун, мәсәлә кӧ әԝ Әʹфьрандар ә, йе кӧ жийин, мала щьнәти у зәԝаща беԛьсур дабу ԝан (Дәстп. 1:26-28; 2:18). Ле гәло әԝана сәр һʹәму ԛәнщийед кӧ Йаһоԝа бона ԝан кьрьбу, дьфькьрин? Гәло ԝана бәрдәԝам дькьрьн һʹьзкьрьн у рʹазибуна хԝә һьндава Йаһоԝа бьдьн кʹьфше? Әԝ йәк әʹйан бу гава дьжмьне Хԝәде әԝана щерʹьбандьн.

9. Ль гора Дәстпебун 2:16, 17 у 3:1-5, Йаһоԝа чь готә Адәм у Һеԝайе, ле Шәйтʹан чь шьк кьрә дьле ԝан?

⁹ Бьхунә Дәстпебун 2:16, 17; 3:1-5. Шәйтʹан бь сайа мәʹр пьрс да Һеԝайе: «Рʹасти Хԝәде готийә ԝәки жь һʹәму даред бахчә гәрәке нәхԝьн?» Ве пьрседа дәрәԝәкә вәшарти һәбу, кӧ мина жәʹре бу. Бь рʹасти Хԝәде ԝанрʹа гот кӧ жь һʹәму даред бахчәда дькарьн бьхԝьн, тʹәне жь йәке нәхԝьн. Бахчәда гәләк щурʹә дар һәбун, жь кʹижана Адәм у Һеԝайе  дькарьбун бьхԝарана (Дәстп. 2:9). Бәле, Йаһоԝа йәки мәрʹд ә. Әԝи готә Адәм у Һеԝайе, ԝәки тʹәне жь дарәке изьна ԝан тʹӧнә бьхԝьн. Ле әв пьрса Шәйтʹан шьк кьрә дьле ԝан. Әԝи ӧса хәбәр да, кӧ йанчь Хԝәде мәрʹд нинә. Ләма жи дьԛәԝьмә һʹьше Һеԝайерʹа фькьрәкә ӧса дәрбаз бу: «Дьбәкә Хԝәде тьштәки баш жь мьн вәдьшерә?»

10. Шәйтʹан ча бӧхдан авитә сәр наве Хԝәде, у ахьрийа ве йәке чь бу?

¹⁰ Һеԝа һе гӧрʹа Йаһоԝада бу чахе Шәйтʹан әв пьрс да ԝе. Әԝе тʹәмийа Хԝәде йа зәлал, Шәйтʹанрʹа ԝәкʹьланд. Әԝе һәла һе жи сәрда зедә кьр, ԝәки әԝана гәрәке ԛә дәст нәдьнә ве даре. У ӧса жи әԝе гот кӧ һәрге әԝана гӧрʹа ве тʹәмийа Хԝәде нәкьн, ԝе бьмьрьн. Ле сәр ве йәке Шәйтʹан жерʹа гот: «На, һун тʹӧ щар намьрьн» (Дәстп. 3:2-4). Шәйтʹан ида нә кӧ бьнва дәрәԝ дькьр, ле әʹйан бӧхдан авитә сәр наве Хԝәде у готә Һеԝайе, ԝәки Йаһоԝа йәки дәрәԝин ә. Ӧса Шәйтʹан бу дьжмьн, йане бӧхданбеж. Һеԝа хальфи у баԝәрийа хԝә Шәйтʹан ани (1 Тимтʹ. 2:14). Әԝе һе зедә итʹбарийа хԝә ԝи ани, нә кӧ Йаһоԝа, ләма жи сафикьрьна лапә хьраб кьр. Һеԝайе гӧрʹа Йаһоԝа нәкьр у бәре даре хԝар, кʹижан кӧ Йаһоԝа ԛәдәхә кьрьбу, у паше Адәмрʹа жи да (Дәстп. 3:6).

11. Адәм у Һеԝайе ча дькарьбун щаба Шәйтʹан бьдана?

¹¹ Бьфькьрьн кӧ Һеԝайе ча гәрәке щаба Шәйтʹан бьда. Бьдьнә бәр чʹәʹве хԝә һәрге әԝе ӧса бьгота: «Әз ньзаньм тӧ кʹе йи, ле әз Баве хԝә Йаһоԝа заньм у әз ԝи һʹьз дькьм у итʹбарийа хԝә ԝи тиньм. Әԝи һәр тьшт да мьн у Адәм. Тә ча изьн да хԝә кӧ дәрһәԛа ԝи тьштед хьраб бежи? Дури мьн һәрʹә!» Бьдьнә һʹәсабе хԝә, Йаһоԝа ԝе чьԛас шабуйа һәрге әԝи жь ԛиза хԝәйә һʹьзкьри, әԝ гьли бьбьһиста! (Мәтʹлк. 27:11) Ле Һеԝайе у ӧса жи Адәм бь дьл у щан Йаһоԝа һʹьз нәдькьрьн. Һʹьзкьрьна ԝан һьндава Йаһоԝа кем бу, ләма жи ԝана наве ԝи жь бӧхдан хԝәй нәкьрьн.

12. Мире-щьна ча шьк кьрә дьле Һеԝайе, у Адәм у Һеԝайе чь гәрәке бькьрана ле нәкьрьн?

¹² Ча мә шеԝьр кьр, дәстпекеда Шәйтʹан шьк кьрә дьле Һеԝайе. Әԝи ӧса кьр, ԝәки Һеԝа дӧдьли бә кӧ әԝ Кәс наве кʹижани Йаһоԝа йә, ԛәнщ ә. Адәм у Һеԝайе гәрәке наве Йаһоԝа жь бӧхдана бьпарьстана, ле ԝана әв йәк нәкьрьн. Ӧса ԝана рʹе да Шәйтʹан, ԝәки сәр ԝан һʹӧкӧм кә, кӧ мьԛабьли Баве хԝә һәрʹьн. Иро жи Мире-щьна әве методе дьдә хәбате. Әԝ бӧхдана давежә сәр наве Хԝәде у ԝи беһӧрмәт дькә. У мәрьвед кӧ дькʹәвьнә бәр байе дәрәԝед Мире-щьна, нормед Йаһоԝайә рʹаст инкʹар дькьн.

13. Һәзәԛел 36:23 әʹламәтийа сәрәкә йа Кʹьтеба Пироз ча әʹйан дькә?

¹³ Гәло Йаһоԝа тьштәки дькә, сәва наве хԝә жь бӧхдана паԛьж кә? Бәле, әԝ дькә!  Тʹәмамийа Кʹьтеба Пироз дина мә дьдә сәр ԝе йәке, кӧ Йаһоԝа чь дькә ԝәки наве хԝә жь бӧхданед кӧ бахче Еденеда сәр ԝи һатә авитьне, паԛьж кә (Дәстп. 3:15). Әм дькарьн бежьн, ԝәки әʹламәтийа сәрәкә йа Кʹьтеба Пироз әԝ ә: Йаһоԝа бь сайа Пʹадшатийе, кʹижанеда кӧрʹе ԝи сәрԝертийе дькә, наве хԝә паԛьж дькә у ԝе диса рʹастийе у әʹдьлайе вәгәрʹинә сәр әʹрде. Әʹламәтийа жь Кʹьтеба Пироз али мә дькә фәʹм бькьн, ԝәки ча Йаһоԝа наве хԝә пироз дькә. (Бьхунә Һәзәԛел 36:23.)

14. Йаһоԝа чь кьр, чахе наве ԝи һатә беһӧрмәткьрьне?

¹⁴ Мире-щьна ԛә чь кьр у чь накә сәва ԛьрара Йаһоԝа нәйе сери. Ле әԝ тʹьме дьдә дәр. Кʹьтеба Пироз дьдә кʹьфше кӧ Йаһоԝа пьрса кӧ Мире-щьна пешда анибу, ча сафи кьр. У әԝ йәк избат дькә, ԝәки әԝ бь рʹасти Бавәки бь һʹьзкьрьн ә у Сәрԝере лапи баш ә. Бәле, мьԛабьлибуна Мире-щьна у пьштгьред ԝи, дьле Йаһоԝа гәләк ешандьн (Зәб. 78:40). Рʹаст ә наве Йаһоԝа һатә беһӧрмәткьрьне, ле йәкә Әԝи билани, сәбьр у һәԛийа хԝә да кʹьфше. Йаһоԝа бь гәләк щурʹа әʹйан кьр, ԝәки Әԝ Хԝәдайе Һьмзор ә. Ле йа лапә фәрз әԝ ә, кӧ һʹәму кьред ԝида һʹьзкьрьна ԝи те кʹьфше (1 Йуһʹн. 4:8). Бәле, Йаһоԝа тʹьме наве хԝә пироз дькә.

15. Шәйтʹан иро ча бӧхдана давежә Хԝәде, ԝәки наве ԝи бехә, у әԝ йәк ча сәр мәрьва һʹӧкӧм дьбә?

¹⁵ Шәйтʹан һʹәта рʹожа иро жи пе бӧхдана наве Хԝәде беһӧрмәт дькә. Әԝ шьке дькә дьле мәрьва, кӧ Йаһоԝа ԛәԝат, һәԛ, билан у бь һʹьзкьрьн ә. Мәсәлә, Шәйтʹан һʹәму тьшти дькә, ԝәки мәрийа бьдә баԝәркьрьне кӧ Әʹфьрандар тʹӧнә йә. Ле әԝ мәрьвед кӧ Хԝәде баԝәр дькьн, Шәйтʹан дьхԝазә ԝана бьдә баԝәркьрьне, ԝәки Хԝәде у нормед ԝи һәԛ ниньн у азайа мәрьва синор дькьн. Әԝ һәла һе жи һин дькә, кӧ Йаһоԝа Хԝәдеки берʹәʹм ә у мәрьва щәʹньмеда дьшәԝьтинә. Чахе мәрьв ԝан дәрәԝа баԝәр дькьн, ида нормед Йаһоԝайи һәԛ инкʹар дькьн. Мире-щьна һʹәта кӧ нәһатийә кʹӧтакьрьне, ԝе бәрдәԝам кә бӧхдана бавежә Йаһоԝа у  чьԛас дькарә ӧса бькә, ԝәки әм пьшта хԝә бьдьнә Баве хԝә. Ле әԝ ԝе бькарьбә бьгьһижә нета хԝә йан на?

16. Тӧ чь дькари бьки чь кӧ Адәм у Һеԝайе нәкьрьн?

¹⁶ Йаһоԝа изьне дьдә мәрьвед нәԛәданди, кӧ әԝана жи алийе хԝәда чь дькарьн бькьн, ԝәки наве ԝи бе пирозкьрьне. Ләма жи чь кӧ Адәм у Һеԝайе нәкьрьн, әм дькарьн бькьн. Рʹаст ә әм дьжин дьнйакә ӧсада, кʹидәре мәрьв наве Йаһоԝа беһӧрмәт дькьн, ле мәщала мә һәйә, ԝәки наве ԝи бьпарезьн у дәрһәԛа ԝи рʹастийе бежьн, кӧ Әԝ пироз, һәԛ, ԛәнщ у бь һʹьзкьрьн ә (Иша. 29:23). Әм дькарьн пьштгьрийа сәрԝертийа ԝи бькьн. Әм дькарьн али мәрьва бькьн, ԝәки фәʹм кьн кӧ тʹәне сәрԝертийа Йаһоԝа рʹаст у һәԛ ә, у тʹәне әԝ дькарә әʹдьлайе у бәхтәԝарийе инсанәтерʹа бинә (Зәб. 37:9, 37; 146:5, 6, 10).

17. Иса ча наве Баве хԝә әʹйан кьр?

¹⁷ Чахе әм наве Йаһоԝа дьпарезьн, әм чʹәʹв дьдьнә Иса Мәсиһ (Йуһʹн. 17:26). Иса наве Баве хԝә әʹйан кьр нә тʹәне бь ԝе йәке, кӧ наве ԝи дьда хәбате, ле ӧса жи дәрһәԛа ԝи гьли дькьр, ԝәки әԝ бь рʹасти Хԝәдеки ча нә. Мәсәлә, әԝи дәрәԝед Ферьсийа әшкәрә дькьр, йед кӧ бь щурʹә-щурʹә метода, Йаһоԝа әʹйан дькьрьн ча йәки сәрт, гәләк тьшт дәʹԝа дькә, хԝә жь мәрьва дур дьгьрә у берʹәʹм ә. Иса али мәрьва дькьр ԝәки әԝана бьвиньн, кӧ Баве ԝи йәки һәԛ у билан ә, бь сәбьр у һʹьзкьрьн ә у һазьр ә бьбахшинә. Хенщи ве йәке Иса бь тʹәмами чʹәʹв дьда һʹӧнӧред Баве хԝә, у бь ве йәке жи дьда кʹьфше, кӧ бь рʹасти Йаһоԝа Хԝәдеки чаԝа нә (Йуһʹн. 14:9).

18. Әм ча дькарьн әʹйан кьн, кӧ әԝ дәрәԝ у бӧхданед һьндава Йаһоԝа, пʹучʹ ьн?

¹⁸ Мина Иса, әм жи дькарьн дәрһәԛа Йаһоԝа мәрьварʹа гьли кьн у ԝана һин кьн, ԝәки Әԝ Хԝәдеки бь һʹьзкьрьн у ԛәнщ ә. Чахе әм ӧса дькьн, әм әʹйан дькьн ԝәки әԝ дәрәԝ у бӧхданед һьндава Йаһоԝа, пʹучʹ ьн. Наве Йаһоԝа бь ԝи щурʹәйи жи пироз дьбә чахе әм али мәрьва дькьн, ԝәки әԝана Йаһоԝа һʹьш у дьле хԝәда пироз кьн. Рʹаст ә әм нәԛәданди нә, ле йәкә әм жи дькарьн чʹәʹв бьдьнә Йаһоԝа (Әфәс. 5:1, 2). Чахе  әм бь хәбәрдан у шьхӧлед хԝә мәрьварʹа дьдьнә кʹьфше кӧ Йаһоԝа бь рʹасти йәки чаԝа нә, бь ве йәке әм наве ԝи пироз дькьн. Әм ӧса жи наве Хԝәде пироз дькьн гава али мәрьва дькьн кӧ занәбуна нәрʹаст дәрһәԛа Йаһоԝа, жь сәре хԝә дәрхьн. * Әм баԝәр ьн кӧ мәрьвед нәԛәданди дькарьн Йаһоԝарʹа амьн бьминьн (Иб. 27:5).

19. Ль гора Ишайа 63:7, чахе әм мәрьва һин дькьн нета мәйә сәрәкә гәрәке чь бә?

¹⁹ Әм диса бь щурʹәки дьн жи дькарьн наве Йаһоԝа пироз кьн. Чахе әм мәрьва Кʹьтеба Пироз һин дькьн, әм дьдьнә кʹьфше ԝәки тʹәне изьна Йаһоԝа һәйә сәрԝертийе сәр тʹәмамийа дьнйайе бькә. Рʹаст ә фәрз ә мәрьва дәрһәԛа ԛанунед Хԝәде һин кьн, ле нета мәйә сәрәкә әԝ ә, ԝәки али ԝан бькьн, кӧ Йаһоԝа Баве мә һʹьз бькьн у ԝирʹа амьн бьминьн. Ләма жи ԝе баш бә, ԝәки әм дина мәрьва бьдьнә сәр һʹӧнӧред Йаһоԝа, у ԝанрʹа бьдьнә кʹьфше, ԝәки йе кӧ әԝ нав сәр ә, кәсәки ча нә. (Бьхунә Ишайа 63:7.) Ӧса әме али ԝан бькьн, ԝәки жь һʹьзкьрьне гӧрʹа Йаһоԝа бькьн у ԝирʹа һʹәта хьлазийе амьн бьминьн.

20. Готара дьнда әме чь шеԝьр кьн?

²⁰ Әм ча дькарьн тедәрхьн кӧ пе рʹабун-рʹуньштьна хԝә у бь щурʹе һинкьрьне, әм наве Йаһоԝа һӧрмәт дькьн у али мәрьва дькьн кӧ незики ԝи бьн? Готара дьнда әме щаба ве пьрсе пебьһʹәсьн.