STƆDI ATIKUL 23
“Lɛ Ɔlman Tek Yu Nem as Sɔntin we Oli”
“O Jiova, yu nem go de sote go.”—SAM 135:13, NWT.
SIŊ 10 Prez Wi Gɔd, Jiova!
WETIN WI GO LAN? *
1-2. Us tɔpik dɛn impɔtant to Jiova Witnɛs dɛn?
TIDE, tu impɔtant tɔpik dɛn de we de afɛkt wi; dat na di rayt we Jiova gɛt fɔ rul ɛn fɔ pul badnem pan am. As Jiova Witnɛs dɛn, wi lɛk fɔ tɔk bɔt dɛn tɔpik dɛn ya. Bɔt di rayt we Gɔd gɛt fɔ rul ɛn fɔ mek in nem oli nɔto tu difrɛn tin.
2 Wi ɔl dɔn kam fɔ si se wi nid fɔ pul badnem pan Gɔd. Wi dɔn lan bak se wi fɔ pruv se di rayt we Jiova gɛt fɔ rul ɔ di we aw i de rul na di bɛst. So ɔltu dɛn tɔpik dɛn ya impɔtant.
3. Wetin Jiova in nem tinap fɔ?
3 Fɔ tru, di nem Jiova tinap fɔ ɔltin bɔt wi Gɔd, ivin di we aw i de rul. So if wi de se fɔ pul badnem pan Jiova na impɔtant tɔpik, dat min bak se wi fɔ pruv se di we aw i de rul na di bɛst. Jiova in nem rili gɛt sɔntin fɔ du wit di rayt we i gɛt fɔ rul as di ɔlmayti.—Luk di bɔks we gɛt di taytul “ Wetin-ɛn-Wetin De pan Dis Impɔtant Tɔpik?”
4. Wetin Sam 135:13, (NWT) tɔk bɔt Gɔd in nem? Us kwɛstyɔn dɛn wi go ansa insay dis atikul?
4 Di nem Jiova rili spɛshal. (Rid Sam 135:13, NWT.) Wetin mek Gɔd in nem rili impɔtant? Aw dɛn bin lay pan am fɔs? Aw Gɔd mek in nem oli? Ɛn aw wisɛf go ɛp fɔ tɔk fɔ in nem? Wi de kam ansa dɛn kwɛstyɔn dɛn de.
NEM NA TIN WE IMPƆTANT
5. Wetin sɔm kin tink bɔt we dɛn yɛri se wi fɔ mek Gɔd in nem oli?
5 “Lɛ ɔlman tek yu nem as sɔntin we oli.” (Mat. 6:9, NWT) Jizɔs bin se na di tin dat we impɔtant pas ɔl we wi fɔ pre fɔ. Bɔt wetin Jizɔs bin min? Fɔ mek sɔntin oli min fɔ mek am klin. Bɔt sɔm go de tink se, ‘Jiova in nem nɔ ɔlrɛdi oli ɛn klin?’ Fɔ ansa da kwɛstyɔn de, wi nid fɔ tink bɔt wetin nem tinap fɔ.
6. Wetin de mek nem impɔtant?
6 Nem nɔto jɔs wɔd we dɛn de kɔl ɔ rayt na pepa. Di Baybul se: “Gud nem bɛtɛ pas jɛntri.” (Prɔv. 22:1; Ɛkli. 7:1) Wetin mek nem na tin we rili impɔtant? Na bikɔs i gɛt sɔntin fɔ du wit udat di pɔsin bi ɛn aw ɔda pipul dɛn tink bɔt di wan we gɛt di nem. So di we aw dɛn de rayt ɔ kɔl pɔsin in nem nɔto in impɔtant, bɔt di tin we rili impɔtant na wetin ɔda pipul dɛn de tink bɔt we dɛn si ɔ yɛri di nem.
7. Aw pipul dɛn dɔn atak Gɔd in nem?
7 We pipul dɛn de tɔk lay lay tin dɛn bɔt Jiova, dɛn de tray fɔ mek ɔda pipul dɛn tink bad bɔt am. We dɛn du dat, dɛn de atak udat Jiova bi ɛn tray fɔ mek i gɛt badnem. Di fɔs tɛm we pɔsin atak Gɔd in nem ɛn tray fɔ mek pipul dɛn tink bad bɔt am, na insay di gadin we bin de na Idɛn. Lɛ wi si wetin wi go lan frɔm dis atak.
AW DƐN BIN ATAK GƆD IN NEM FƆS?
8. Wetin Adam ɛn Iv bin no? Us ɔda kwɛstyɔn dɛn wi kin aks?
8 Adam ɛn Iv bin no se Gɔd in nem na Jiova, ɛn dɛn bin no bɔku impɔtant tin dɛn bɔt am. Dɛn bin no se na in Mek ɔltin, na In gi dɛn layf, na in gi dɛn fayn ples fɔ de, ɛn pafɛkt pɔsin fɔ mared to. (Jɛn. 1:26-28; 2:18) Bɔt dɛn go kɔntinyu fɔ yuz dɛn pafɛkt maynd fɔ tink bɔt ɔl wetin Jiova dɔn du fɔ dɛn? Dɛn go kɔntinyu fɔ sho se dɛn gɛt tɛnki ɛn dɛn gladi fɔ di Pɔsin we gɛt di nem? Wi ebul fɔ sabi di ansa to dɛn kwɛstyɔn dɛn de we Gɔd in ɛnimi bin tɛst dɛn.
9. Akɔdin to Jɛnɛsis 2:16, 17 ɛn 3:1-5, wetin Jiova bin tɛl Adam ɛn Iv? Aw Setan bin twis di tru?
9 Rid Jɛnɛsis 2:16, 17 ɛn 3:1-5. Setan bin yuz snek fɔ tɔk to Iv. I bin aks Iv se: “Fɔ tru tru PAPA GƆD tɛl una se, una nɔ fɔ it di frut dɛn pan ɔl di tik dɛn na di fam?” Da kwɛstyɔn de bin gɛt kɔni kɔni lay we fiba pɔyzin. Wetin Gɔd bin tɛl dɛn na dat, dɛn fɔ it pan ɔl di tik dɛn, apat frɔm wan. Adam ɛn Iv go mɔs dɔn gɛt bɔku ɔda tik dɛn we dɛn fɔ it frɔm. (Jɛn. 2:9) Jiova rili gɛt fri an. Bɔt Gɔd bin dɔn tɛl Adam ɛn Iv se wan tik de we dɛn nɔ fɔ it frɔm. So Setan in kwɛstyɔn bin twis di tru. Setan mek i tan lɛk se Gɔd nɔ gɛt fri an. Sɔntɛm Iv go dɔn de tink se, ‘Fɔ se gud tin de we Gɔd nɔ de mek a gɛt?’
10. Aw Setan bin lay pan Gɔd ɛn mek i gɛt badnem? Wetin bin apin afta dat?
10 We Setan bin aks Iv da kwɛstyɔn de, Iv bin stil de si Jiova as in Rula. I bin ansa Setan bay we i tɛl am di kɔrɛkt tin we Gɔd bin dɔn tɛl dɛn. Iv bin ivin tɛl am se dɛn nɔ fɔ tɔch di tik. I bin no se Gɔd dɔn wɔn dɛn se if dɛn nɔ obe, dɛn go day. Bɔt Setan tɛl am se: “Una nɔ go day.” (Jɛn. 3:2-4) Setan nɔ bin de mek kɔni kɔni igen. Naw, i bin de gi Gɔd badnem bay we i bin de tɛl Iv se Jiova de lay. Na so Setan tek bi dɛbul ɛn pɔsin we de lay. Setan bin lay pan Iv, ɛn Iv bin biliv am. (1 Tim. 2:14) I bin biliv Setan pas Jiova. Dat bin mek i izi fɔ mek Iv disayd fɔ du bad tin. I bin disayd nɔ fɔ obe Jiova. I bigin fɔ it frut pan di tik we Jiova bin dɔn tɛl dɛn nɔ fɔ it pan. Afta dat, i bin gi Adam fɔ it.—Jɛn. 3:6.
11. Wetin wi fɔs mama ɛn papa fɔ dɔn du, bɔt wetin dɛn nɔ bin du?
11 Tink smɔl bɔt wetin Iv bin fɔ dɔn tɛl Setan. Imajin se Iv bin fɔ dɔn tɛl Setan se: “A nɔ no yu, bɔt a no mi Papa, Jiova, ɛn a lɛk ɛn abop pan am. I dɔn gi mi ɛn Adam ɔl di tin dɛn we wi gɛt. Wetin mek yu de tɔk dɛn kayn tin dɛn de bɔt am? Kɔmɔt na ya!” Jiova bin fɔ dɔn rili gladi fɔ yɛri dɛn fayn wɔd dɛn de frɔm in galpikin we i lɛk! (Prɔv. 27:11.) Bɔt Iv nɔ bin lɛk fɔ de biɛn Jiova ɛn Adam sɛf nɔ bin want fɔ du dat. Bikɔs Adam ɛn Iv nɔ lɛk dɛn Papa, dat bin mek dɛn nɔ bin ebul fɔ tɔk fɔ in nem we Setan lay pan am.
12. Aw Setan bin mek Iv bigin fɔ dawt na in maynd? Wetin Adam ɛn Iv nɔ bin du?
12 As wi dɔn si, Setan bin mek Iv bigin fɔ dawt na in maynd. I bin mek i dawt di Pɔsin we gɛt di nem Jiova. Adam ɛn Iv nɔ bin tɔk fɔ Jiova in nem ɛn udat i bi. Dɛn mek am izi fɔ lisin to Setan ɛn dɛn tɔn dɛn bak pan dɛn Papa. Na di sem tatiks Setan de yuz tide. I de atak Jiova in nem bay we i de lay pan am ɛn mek i gɛt badnem. I kin izi fɔ mek pipul dɛn we biliv di lay we Setan de lay, nɔ gri fɔ mek Jiova rul dɛn.
JIOVA MEK IN NEM OLI
13. Aw Izikɛl 36:23 tɔk bɔt di men mɛsej na di Baybul?
13 Yu tink se Jiova go alaw mek dɛn lay pan am ɛn nɔ du natin bɔt dat? Nɔ, i nɔ go du dat! Di wan ol Baybul tɔk bɔt wetin Jiova dɔn de du fɔ pruv se di bad tin dɛn we dɛn tɔk bɔt am na Idɛn, nɔto tru. (Jɛn. 3:15) Infakt, wi go se di men mɛsej we de insay di wan ol Baybul na dis: Jiova de yuz di Kiŋdɔm we in Pikin de rul fɔ mek in nem oli, fɔ mek pipul dɛn du wetin rayt, ɛn fɔ mek pis de na di wan ol wɔl. Di Baybul gɛt tin dɛn we de ɛp wi fɔ ɔndastand aw Jiova de mek in nem oli.—Rid Izikɛl 36:23.
14. Aw di tin dɛn we Jiova dɔn du we dɛn tɔn dɛn bak pan am na Idɛn, dɔn mek in nem oli?
14 Setan dɔn du ɔl wetin i ebul fɔ stɔp Jiova fɔ mek wetin I want nɔ bi. Bɔt i nɔ ebul. Di Baybul sho wetin Jiova dɔn du, ɛn dat de sho se nɔbɔdi nɔ de we tan lɛk Jiova Gɔd. Fɔ tru, we Setan ɛn ɔl di wan dɛn we de biɛn am tɔn dɛn bak pan Jiova, dat bin mek Jiova fil am. (Sam 78:40) Bɔt Jiova dɔn tek tɛm sɔlv dis prɔblɛm bay we i peshɛnt, gɛt sɛns, ɛn du tin di rayt we. I dɔn yuz difrɛn we dɛn fɔ sho se i gɛt pawa pas ɔlman. Wetin pas ɔl na dat, i de sho se i gɛt lɔv pan ɔl di tin dɛn we i de du. (1 Jɔn 4:8) Jiova dɔn de kɔntinyu fɔ wok fɔ mek in nem oli.
Setan bin lay to Iv bɔt Jiova, ɛn fɔ lɔng tɛm i dɔn kɔntinyu fɔ de lay pan Gɔd (Luk na paregraf 9 ɛn 10, 15) *
15. Aw Setan de pwɛl Gɔd in nem tide? Wetin kin apin?
15 Setan de stil pwɛl Gɔd in nem tide? Yɛs, i de tray fɔ mek pipul dɛn dawt if Gɔd pawaful, if i de du wetin rayt, if i gɛt sɛns, ɛn if i lɛk wi. Fɔ ɛgzampul, Setan de tray fɔ mek pipul dɛn biliv se Jiova nɔto di Wan we mek wi. Ɛn if pipul dɛn biliv se Gɔd de, Setan de tray fɔ mek dɛn biliv se Gɔd ɛn In lɔ dɛn nɔ de alaw wi fɔ du ɔltin ɛn i nɔ rayt. Setan de ivin tich pipul dɛn se Jiova nɔ de sɔri fɔ wi ɛn In na Gɔd we wikɛd, i de bɔn pipul dɛn na ɛl faya. We dɛn biliv dɛn kayn lay lay tin dɛn de, dɛn go mɔs tray fɔ du ɔda tin; dat na, dɛn nɔ go gri fɔ mek Jiova rul dɛn. Setan go kɔntinyu fɔ pwɛl Gɔd in nem ɛn i go mek yu in tagɛt bak sote dɛn dɔnawe wit am. I go ebul?
WETIN YU GO DU PAN DIS PRƆBLƐM?
16. Wetin yu go ebul fɔ du we Adam ɛn Iv nɔ bin du?
16 Jiova de alaw mɔtalman we nɔ pafɛkt fɔ ɛp fɔ mek in nem oli. Dat min se yu go ebul fɔ du wetin Adam ɛn Iv nɔ bin du. Pan ɔl we di wɔl ful-ɔp wit pipul dɛn we de lay ɛn tɔk bad bɔt Jiova in nem, yu gɛt chans fɔ tinap ɛn tɔk di tru fɔ se Jiova oli, i de du wetin rayt, i de du gud, ɛn i de du tin wit lɔv. (Ayz. 29:23) Yu kin sho se yu want fɔ mek i rul yu. Yu kin ɛp ɔda pipul dɛn fɔ no se, na Jiova in rul nɔmɔ na in go mek pis ɛn gladi-at de ɔlsay na di wɔl.—Sam 37:9, 37; 146:5, 6, 10.
17. Aw Jizɔs bin mek pipul dɛn no in Papa in nem?
17 We wi tɔk fɔ Jiova in nem, wi de falamakata Jizɔs Krays. (Jɔn 17:26, NWT.) Jizɔs nɔ bin jɔs mek pipul dɛn no in Papa in nem bay we i bin de kɔl am, bɔt i bin de tich pipul dɛn bɔt udat Jiova rili bi. Fɔ ɛgzampul, i nɔ bin de gri wit di Faresi dɛn, we dɛn bin de mek i tan lɛk Jiova na pɔsin we strikt pasmak, we de fos pipul dɛn fɔ du wetin i want, we nɔ gɛt sɔri-at, ɛn i nɔ pɔsibul fɔ mek wi go nia am. Jizɔs bin ɛp pipul dɛn fɔ si in Papa as pɔsin we de ɔndastand, i de peshɛnt, i de du tin wit lɔv, ɛn i de fɔgiv. I bin de ɛp pipul dɛn fɔ no Jiova bak bay di we aw i bin de falamakata in kwaliti dɛn fayn fayn wan pan ɔl wetin i bin de du.—Jɔn 14:9.
18. Aw wi go ebul fɔ chenj di bad tin dɛn we pipul dɛn dɔn tɔk bɔt Jiova?
18 Lɛk Jizɔs, wi kin tɛl pipul dɛn bɔt wetin wi no bɔt Jiova, wi kin tich dɛn se In na Gɔd we gud, ɛn i de du tin wit lɔv. We wi du dat, wi de chenj di lay ɛn badnem we pipul dɛn de put pan Jiova. Wi de mek Jiova in nem oli na pipul dɛn maynd ɛn dɛn at. Wisɛf kin falamakata Jiova. I pɔsibul fɔ mek wi du dat pan ɔl we wi nɔ pafɛkt. (Ɛfi. 5:1, 2) We wi tɔk ɛn du tin dɛn we de sho pipul dɛn udat Jiova rili bi, wi de ɛp fɔ mek in nem oli. Wi de ɛp fɔ pul badnem pan am bay we wi de ɛp pipul dɛn fɔ no di tru bɔt Gɔd. * Wi de sho bak se i pɔsibul fɔ mek mɔtalman we nɔ pafɛkt kɔntinyu fɔ fetful to Gɔd.—Job 27:5.
Wi want fɔ ɛp wi Baybul studɛnt dɛn fɔ ɔndastand Jiova in fayn kwaliti dɛn (Luk na paregraf 18 ɛn 19) *
19. Aw Ayzaya 63:7 ɛp wi fɔ no wetin mɔ wi fɔ pe atɛnshɔn pan we wi de tich pipul dɛn?
19 Wan ɔda tin de we wi kin du fɔ mek Jiova in nem oli. We wi kin tich pipul dɛn di tru tin dɛn na di Baybul, wi kin tɔk mɔ fɔ se na Jiova gɛt di rayt fɔ rul, na in gɛt rayt fɔ rul na ɛvin ɛn di wan ol wɔl, ɛn dat kɔrɛkt. Bɔt pan ɔl we i impɔtant fɔ tich pipul dɛn Gɔd in lɔ dɛn, di men tin we wi fɔ pe atɛnshɔn pan na fɔ ɛp dɛn fɔ lɛk Jiova wi Papa ɛn fɔ kɔntinyu fɔ de biɛn am. So wi nid fɔ de tɔk mɔ bɔt Jiova in fayn kwaliti dɛn ɛn di kayn Pɔsin we i rili bi. (Rid Ayzaya 63:7.) We wi tich ɔda pipul dɛn da kayn we de, wi de ɛp dɛn fɔ lɛk Jiova ɛn obe am bikɔs dɛn want fɔ kɔntinyu fɔ de biɛn am.
20. Wetin wi go tɔk bɔt insay di nɛks atikul?
20 Aw wi go mek shɔ se wetin wi de tich ɛn wetin wi de du, de ɛp ɔda pipul dɛn fɔ tink bɔt gud tin we dɛn yɛri Jiova in nem ɛn want fɔ kam nia am? Di nɛks atikul go ansa da kwɛstyɔn de.
SIŊ 2 Jiova Na Yu Nem
^ par. 5 Us tɔpik impɔtant fɔ ɔl mɔtalman ɛn di enjɛl dɛn? Wetin mek dis tɔpik impɔtant, ɛn aw i de afɛkt wi ɔl? We wi ɔndastand di ansa to dɛn kwɛstyɔn dɛn de ɛn ɔda wan dɛn, dat go ɛp wi fɔ gɛt tayt padi biznɛs wit Jiova.
^ par. 18 Sɔntɛnde, wi dɔn de rid na wi buk ɛn magazin dɛn se wi nɔ nid fɔ vindiket Jiova in nem bikɔs nɔbɔdi nɔ ɛva tɔk se Gɔd nɔ gɛt di rayt fɔ gɛt di nem, Jiova. Bɔt wi bin gɛt nyu ɔndastandin di tɛm fɔ wi 2017 anwal mitin. Di chiaman bin se: “Fɔ mek am klia, i nɔ rɔŋ fɔ tɔk se wi fɔ pre fɔ vindiket Jiova in nem bikɔs wi nid fɔ pul di bad tin dɛn pan in nem fɔ udat i bi.”—Luk di Janwari 2018 program na jw.org®. Luk ɔnda LAYBRI > JW TV®.
