1-2. Sɔɔŋ sala tiɔɔŋ kuɛɛ cho yɛ ŋ sɔvɛ le Seiyaa Chɛhowaa?

SƆƆŊ sɔviɔŋ pum cho ŋ piiliaŋ hau naa woŋ. Sɔɔŋ muŋ cho kpuluŋgumayɛi Chɛhowɛi a bɛɛle diola ndɔlaŋ la nɔ mi la sɔla leŋ ni. Naa Seiyaa Chɛhowaa, ŋ kaala bɔɔ suɛi a sɔɔŋ sɔviɔŋ muŋ okɔɔ. Kɛ baa teŋgeŋndo cho pa kpuluŋgumayɛi Chɛhowɛi tɛɛŋ a bɛɛle diola ndɔlaŋ la nɔ mi la sɔla leŋ? Sako.

² Baabuiyo mala naa le sinaa maa diola Mɛlɛkalaŋ la nɔ mi la sɔla bɛɛleŋ. Nduyɛ, ŋ pɛɛku niŋ vɛlɛ maa waŋnda nɔ ma sina maa ndu cho kpuluŋgumaa ni ɔɔ ndu nɔ dioo ni le waa masaa waŋchieeya choo. Sɔɔŋ sala tiɔɔŋndoŋ muŋ kpou piiliaŋ naa nduyɛ, ŋ nɔ miŋ dɔu kɔllo o muŋ.

3. Yɛɛ diola Chɛhowalaŋ la piiliaŋ yɛ?

³ O kpeekpei niŋ, diolaŋ ndaŋ Chɛhowa, la piiliaŋ nyɛ o nyɛ a Mɛlɛka naa okɔɔ hali masale ndɔleŋ bɛɛ. Lelaŋ, te diola Chɛhowalaŋ la nɔ pɛ mi la sɔla bɛɛleŋ, mɛɛ waŋnda kpou nɔ ma sina maa masale ndɔleŋ le hiou wa le sɔvɛ. Chɛhowa cho Kpuluŋgumaa le chieeŋndo kpou ni, nduyɛ diola ndɔlaŋ la chiɛɛliaŋ a kpuluŋgumayɛi nduɛi. Tofa kɔfoo hoo “ Sɔɔŋ Chiɛɛliaŋ a Suɛi Sɔvɛi Heiyo.”

4. Yɛɛ Sam 135:​13 dimi yɛ a diola Mɛlɛkalaŋ okɔɔ nduyɛ, nyunala kuɛɛ naŋ cho yɛ yaasiaa o buŋgɛi hei niŋ?

⁴ Diola Chɛhowalaŋ la cho bɔɔ teŋgeŋ. (Nuawɔ Sam 135:​13.) Yɛɛ tosa yɛ mi diola Mɛlɛkalaŋ la wa la sɔvɛ? Vɛɛ la sɔla yɛ tɔɔ wɔɔŋndo o tasela ndɔ? Vɛɛ Mɛlɛka cho yɛ tɔɔ wɔɔŋndo hoo faŋaa o diola ndɔlaŋ choo? Nduyɛ, vɛɛ naŋ mala yɛ ndu le hei tosaa? Ŋ yaasiaŋndɔ nyunalaŋ ndaŋ.

5. Yɛɛ waŋnda apum dimi yɛ te a tuei pɛ maa diola Mɛlɛkalaŋ la nɔ mi la sɔla bɛɛleŋ?

⁵ ‘Maa waŋnda kpou ke diola numndaŋ bɛɛleŋ.’ (Maa. 6:​9) Nyɛ tase Chiisu dimul buɛiyaa nduaa le ma piɛi le ndu wo cho hoo ni. Kɛ yɛɛ Chiisu ndoo yiyaŋ yɛ? Nyɔɔ bɛɛleŋ kioo cho chuaa ndu o sɔvɛ nduyɛ ma bii ndu o diandaa ni. Kɛ mi waŋnda apum dimi maa diola Mɛlɛkalaŋ la cho nyɛ lebɛɛ nduyɛ mi la wa la diandaa. Lelaŋ, ‘bɛɛle yɛɛ la nɔ yɛ mi la sɔla vɛlɛ?’ Le nyunaa hoo mulioo, mɛɛ miŋ sina le nyɛ diolaŋ la simndo.

6. Yɛɛ tosa yɛ mi diolaŋ la wa nyɛ sɔvɛ bɛndu?

⁶ O cho ko diom nda veelu mi waŋndo chɛl lo le cho diolaŋ te. Baabuiyo dimi aa: “Diola kɛndɛlaŋ la hiou naŋɔɔ a sullo.” (Pulɔ. 22:​1; Ikili. 7:​1) Le yɛɛ diolaŋ la cho yɛ nyɛ sɔvɛ bɛndu? Kanifuule, la sim le tɔɔ waŋndo a nyɛ waŋnda yiyaŋ a wana koŋ okɔɔ wo. Lelaŋ, o cho mɛɛ nda poonyiaa diola waŋndo a mɛɛ nda veelu laŋ yɛ le cho suɛi le. Kɛ te waŋnda tuei pɛ diola laŋ, nyɛ nda yiyaŋ a wana koŋ okɔɔ wo cho suɛi sɔvɛi ni.

7. Vɛɛ waŋnda tɛɛmbuu yɛ diola Mɛlɛkalaŋ?

⁷ Te waŋnda dimi pɛ choolaŋ a Chɛhowa okɔɔ, mɛɛ tɔɔ nda wa ndu koŋ tɛɛmbuuwo ni. Te a tosa yɛ hei pɛ, mɛɛ diola ndɔlaŋ nda wa laŋ tɛɛmbuuwo ni. Teleŋ Mɛlɛka toosiaa waŋchieeyaa tasiaa wo o kandu tɔɔ wɔɔŋndo sɔlaa ni. Ŋ yaasiaŋndɔ miŋ che nyɛ naŋ pɛɛku o hei niŋndo.

8. Yɛɛ Adam nda Ifi ndaa sina yɛ nduyɛ, nyunala kuɛɛ naŋ nyuna yɛ?

⁸ Adam nda Ifi ndaa sina maa diola Mɛlɛkalaŋ la cho Chɛhowa ni. Nduyɛ, ndaa sina vɛlɛ sɔɔŋ sɔviɔŋ tau a ndu okɔɔ. Ndaa sina maa ndu toosiaa nda ni mbo ke nda yoomoo a Kpele Hɛnɛkiɔɔ. Ndaa sina vɛlɛ maa ndu bɔŋa nda o nɔɔ niŋ ni. (Chɛ. 1:​26-28; 2:​18) Kɛ baa ma hiau pa lachi a yiyaŋndo a sɔɔŋ kɛndɛŋ Chɛhowa tosal nda woŋ okɔɔ? Baa ma hiau pa lachi a kaalaa chɔmndo a balika melaa le wana nɔ diola laŋndo? Nyɛ yɔŋnuŋ a teleŋ yaamɔɔnɔ Mɛlɛkaa tɔɔndaŋ nda wo ke naa mulioo le nyunalaŋ ndaŋ.

9. A mɛɛ Chɛnɛsee 2:​16, 17 a 3:​1-5 dimi yɛ, yɛɛ Chɛhowa ndoo dimullɛ Adam nda Ifi nduyɛ, vɛɛ Setana ndoo muli yɛ tonyaa balaŋ amakɔɔ?

⁹ Nuawɔ Chɛnɛsee 2:​16, 17 a 3:​1-5. Mi Setana soliŋ kɛuwo kpeku le suɛi naa Ifi cha. Mbo  nyuna ndu aa: “Baa Mɛlɛka dimi ma dimiaa aa, ‘yɔmnde o kpeloo hoo niŋ kinɛi la dia le?’” Setana ndoo yeema mbo tɛɛmbuu Chɛhowa tɔɔ. Le saboo hoo o muli nyunaa balaŋ amakɔɔ ni. Yɔmndo opilɛ kpe Mɛlɛka ndoo kɛɛlu nda dioo ni kɛ o cho yɔmnde kpou le. Yɔmii kɛndɛi wa loŋ tau i ndaa nɔla ma de nduyɛ ma tuei yeela ve. (Chɛ. 2:​9) A tonya, Chɛhowa nɔ bɔɔ kɛndɛi. Komɔɔ yɔmndo opilɛ kpe o dimi ni maa a dia le. Le hei, mi nyuna Setana nyuna koŋ ndo muli tonyaa balaŋ amakɔɔ. Mi Setana tosa ma yiyaŋ pɛŋ maa Mɛlɛka cho wana ikɛndɛ le. Naapum mi Ifi yiyaŋ dɔɔ aa, ‘Le yɛɛ mi Mɛlɛka viŋnuŋ ya kɔl?’

10. Vɛɛ Setana tɛɛmbuu yɛ diola Mɛlɛkalaŋ, nduyɛ yɛɛ wa yɛ fulamakɔɔlioo?

¹⁰ Ifi wa wɔ Chɛhowa diikɔŋndo a teleŋ Setana nyuna ndu wo. Mbo mulul Setana maa yɔmndo opilɛ kpe Chɛhowa kɛɛlu nda dioo ni, kɛ o cho yɔmnde kpou le. Mbo dimul ndu pɛŋ maa pilaŋndo bɛɛ a nɔ ma pilaŋ yɔm koŋ te. Ifi ndoo sina maa mi Mɛlɛka dimul nda maa te a de yɔm koŋ pɛ a cho wu. Kɛ mi Setana dimul ndu aa: “La dio bɛɛ la vi le.” (Chɛ. 3:​2-4) Setana kindiŋ lɛ le suɛi hei balaŋ miŋgi amakɔɔ le. Kɛ diola Mɛlɛkalaŋ kpeekpei o wa niŋ tɛɛmbuuwo ni. O dimi niŋ, dimullo o wa koŋ Ifi ni maa wana lachoowaa Mɛlɛka cho ni. Hei tosa ni mi Setana simnuŋ nyina wɔɔŋndo ɔɔ wana lachoowaa. Mbo hui Ifi okoŋ, mbo laalaŋ nyɛ o dimul ndu wo. (1 Timo. 2:​14) Mi Ifi duau tiindaŋndo o Setana niŋ mbo hiau Chɛhowa. Mbo kɛɛsiaa le Chɛhowa kiɔɔ diikɔŋndo nduyɛ kɛɛsiaa wɔɔŋndo pila wa hoo ni. Mbo dia yɔm Chɛhowa kɛɛlu nda maa a dia le wo. Okoŋ, mbo ke Adam o tiŋ.—Chɛ. 3:​6.

11. Yɛɛ Adam nda Ifi ndaa nɔ yɛ ma tosa, kɛ yɛɛ nda dema yɛ le tosaa?

¹¹ Yiyaŋndɔ a nyɛ Ifi ndoo nɔ mbo dimul Setana wo okɔɔ. Ŋ dimi wɔ maa mi ndoo mulul ndu aa: “I sina wana ŋ cho wo le, kɛ I sina Finya nuu Chɛhowa. I kaala ndu nduyɛ ndu ya tiindaŋ ni. Nyɛ o nyɛ naŋ nɔ naa pɔnɔ nuu ndu ke naa ni. Le yɛɛ ma tɛɛmbuu Finya nuu tɔɔ? Faŋaŋ ya o hɔl!” Chɛhowa wa kɔl naŋɔɔ tau te ndoo tuei pɛ mi chua ndɔ kaalaa ndoo mulul Setana lende! (Pulɔ. 27:​11) Kɛ Ifi ndoo nɔ kaala kpeekpei le Chɛhowa le, nduyɛ Adam bɛɛ ndoo nɔ ndu le. Le mɛɛ ndaa nɔ kaala waa naa le Finya nda le yɛ, a kindiŋ le tɔɔ wɔɔŋndo faŋaa o diola ndɔlaŋ choo le.

12. Vɛɛ Setana luei yɛ Ifi kiisaŋndo o kɔl, nduyɛ yɛɛ Adam nda Ifi dema yɛ le tosaa?

¹² A mɛɛ naŋ yaasiaa yɛ, Setana kindiŋ fɛŋ le choolaŋ dimioo a Chɛhowa okɔɔ le Ifi kiisaŋndo lueiyo o kɔl. Mbo tosa mi Ifi nɔ yiyaŋ wɔɔŋndo a Chɛhowa okɔɔ. Le hei, mi Adam nda Ifi dema le tɔɔ wɔɔŋndo faŋaa o diola Chɛhowalaŋ choo. Ma yaŋ nilaŋ o nyɛ Setana dimul nda wo okoŋ, ma kɛɛ le Finya nda diikɔŋndo. Nɛila waa naa Setana cho hau soliŋndo kpeku ni. Mbo dimi choolaŋ a Chɛhowa okɔɔ le diola ndɔlaŋ tɛɛmbuuwo. Nduyɛ te waŋnda laalaŋ dɔɔ pɛ choola ndɔlaŋ, o wa tɛtɛlɛ le ma kɛɛ masale Chɛhowaleŋ.

13. Vɛɛ Isikiaa 36:​23 chɔm yɛ naa yooŋgu kpeekpei cho o Baabuiyo niŋndo?

¹³ Baa mi Chɛhowa chɛl pa le mi diola ndɔlaŋ la hiou lachi a tɔɔ wɔɔŋndo sɔlaa o kindiŋ le ndu faŋaa le? Sako, o chɛl te! Chɛhowa tosa niŋ sɔɔŋ tau le tɔɔ wɔɔŋ o sɔla o kpeloo Idɛŋ niŋndo faŋaa o diola ndɔlaŋ choo. A hei okɔɔ pɛŋ Baabuiyo kpou cho suɛi ni. (Chɛ. 3:​15) Ŋ nɔla pɛŋ miŋ liima yooŋgu kpeekpei cho o Baabuiyo niŋndo bolle pilɛ o nɛiyo hoo choo: Chɛhowa cho tosaa mi diola ndɔlaŋ la wa bɛɛleŋ sɔlaa. Masale Po ndɔɔ o cho soliŋndo kpeku ni le hei tosaa. Nduyɛ, Masaleŋ ndeŋ o cho vɛlɛ hunɔɔ soliŋ kpeku ni le sɔɔŋ siɛɛndoo o chieeŋndo choo mi kɔl nyuloo wa. Baabuiyo mala naa le sinaa mɛɛ Chɛhowa cho tosaa mi diola ndɔlaŋ la wa bɛɛleŋ sɔlaa yɛ.​—Nuawɔ Isikiaa 36:​23, NWT.

14. Vɛɛ Chɛhowa cho yɛ biyɔɔ simul o sɔla o kpeloo niŋ Idɛŋndo nduyɛ, vɛɛ hei tosa yɛ mi diola ndɔlaŋ la wa bɛɛleŋ sɔlaa?

¹⁴ Setana tosa niŋ nyɛ o nyɛ le halikpeŋ hɛnaŋ Chɛhowaa yɔŋnuŋ te. Kɛ lepilɛ bɛɛ o sɔla wɔ batiuwaa le. Baabuiyo mala naa le sinaa mɛɛ Chɛhowa cho kɔlaŋ a sɔɔŋ biyɔɔ yɛ nduyɛ, hei chɔm maa wana o wana cho maa Chɛhowa Mɛlɛka le. I cho tonya maa mbo tambu kɔl le mɛɛ Setana simul ndu mi wanaa bɔɔbɔɔ wa ndu tolɔɔ kɔɔli yɛ. (Sam 78:​40) Kɛ o cho simul hiou Chɛhowa mayoomu le o cho le. O cho taasi ndɔɔ, biuwɔŋ ndɔɔ, a sandii nduɛi soliŋndo kpeku le simullo hoo biyɔɔ o nɛi bɛnda wo choo. O chɔm niŋ vɛlɛ o nɛila bɔɔbɔɔ niŋ maa wana o wana nɔ kpaaya maa ndu le. Nduyɛ i hiou kpou ve, o chɔm niŋ vɛlɛ kpendekele maa kaalaa nyindu ndu ni le nyɛ o nyɛ tosaa. (1 Chɔŋ 4:​8) Chɛhowa cho hiouwɔɔ lachi a tosaa le mi diola ndɔlaŋ la sɔla bɛɛleŋ.

15. Vɛɛ Setana cho yɛ hau diola Mɛlɛkalaŋ tɛɛmbuu wo nduyɛ, yɛɛ cho yɛ fulamakɔɔlioo?

¹⁵ Setana cho wɔ tuŋ diola Mɛlɛkalaŋ tɛɛmbuu wo. Mbo hui waŋnda le ma laalaŋ maa Mɛlɛka nɔ kpaaya le, o cho wana sandu le, o nɔ taasi le, nduyɛ maa o nɔ pɛŋ kaala le waŋchieeya le. Le taamaseliiyo, Setana cho kindiŋndo le tosaa mi waŋnda laalaŋ maa o cho Chɛhowa le toosiaa nyɔɔŋ te. Te o yɔŋ yɛ pɛ mi waŋnda laalaŋ maa Mɛlɛka cho, mbo tosa le ma yiyaŋ maa sawala Mɛlɛkalaŋ la kendu bɔɔ biyɔɔ nduyɛ maa la bɛnda le. O cho hau  waŋnda pɛɛkoo maa mi Chɛhowa lom wanaa dɛnɛ wɔɔŋnda o yiŋndeŋ niŋ. O cho hei tosaa le halikpeŋ ma laalaŋ maa wana kɔl vesɛiyo Chɛhowa cho ni. Te waŋnda laalaŋ pɛ choola waa naa, i wa tɛtɛlɛ le ma mulul Chɛhowa kɔɔ nduyɛ ma kɛɛ masale ndɔleŋ. Setana cho hiouwɔɔ lachi a choolaŋ pɛŋgɛlaa a Chɛhowa okɔɔ haaa mbo huŋ sɔla tambei. Nduyɛ, o cho kindiŋ le num huiyo ma mal Chɛhowa piɛiyo. Kɛ baa o cho pa batiuwaa sɔla?

16. Vɛɛ ŋ nɔla yɛ ma tosa nyɛ Adam nda Ifi dema le tosaa wo?

¹⁶ Mi Chɛhowa chɛl le mi waŋchieeya lahakiaa mala ndu le mi diola ndɔlaŋ la sɔla diondɔɔ ɔɔ bɛɛleŋ. O dimi niŋ, a tiuba ma tosa nyɛ Adam nda Ifi dema le tosaa wo. Wanaa cho o chieeŋndo niŋ nda a bɔɔbɔɔ nɔ lebɛɛ le diola Chɛhowalaŋ te nduyɛ ma tɛɛmbuu laŋ tɔɔ. Kɛ num a nɔla ma sim le tonya cho a Chɛhowa okɔɔ wo. A nɔla ma mala waŋnda ma sina mɛɛ kpɛ o cho wana diandaa a wana sakpo yɛ. Okoŋ, ma chɔm nda vɛlɛ maa o cho wana kɛndɛ nduyɛ o nɔ kaalaa le waŋchieeya. (Aisaya 29:​23) A nɔla vɛlɛ ma toolu masale ndɔleŋ. A tosa hei te a mala pɛ waŋnda ma sina maa masale ndɔleŋ kinɛi le cho masale sakpo leŋ ni. Nduyɛ maa, leŋ koni le tiuba ni mi le hiŋ a kɔl nyuloo le mi waŋchieeya a nyaa yoomaa kpou wa a nyaale.—Sam 37:​9, 37; 146:​5, 6, 10.

17. Vɛɛ Chiisu faŋa yɛ tɔɔ wɔɔŋndo o diola Finya ndɔlaŋ choo?

¹⁷ Te ŋ kindiŋ pɛ kpoke le tɔɔ wɔɔŋndo faŋaa o diola Chɛhowalaŋ choo, mɛɛ taamasi Chiisu wo naŋ cho koŋ tolɔɔ kɔɔli ni. (Chɔŋ 17:​26) Chiisu mala ko waŋnda ma sina diola Finya ndɔlaŋ te kɛ, mbo mala nda vɛlɛ le sinaa wana suu Chɛhowa cho wo. Le taamaseliiyo, mi pɛɛkula Falisiiya la tosa mi waŋnda yiyaŋ maa Chɛhowa cho wana kɔl tuu a wana la ŋgɛbɛ ŋgɛbɛ. Nduyɛ maa o nɔ pɛŋ kaala a inyiɛɛ le wana le. Kɛ mi Chiisu chɔm kpendekele maa hei cho tonya le. Mbo mala waŋnda le sinaa maa Finya ndɔ cho wana kɔl tuu le. Kɛ maa o cho wana biuwaŋ, o kaala waŋchieeya, nduyɛ maa mbo mal wana haki. Mbo mala nda vɛlɛ ma sina maa Chɛhowa cho wana kɛndɛ a mɛɛ o tol taamasi ndɔɔ kɔɔli le waŋnda biyɔɔ nyɛkɛndɛi yɛ.​—Chɔŋ 14:​9.

18. Yɛɛ naŋ nɔ yɛ miŋ tosa le choolaŋ a tɔɔ wɔɔŋndo faŋaa o diola Chɛhowalaŋ choo?

¹⁸ Maa Chiisu, naa bɛɛ nɔ miŋ dimul waŋnda nyɛ naŋ sina a Chɛhowa okɔɔ wo. Ŋ nɔ miŋ mala nda ma sina maa o kaala naa nduyɛ maa  Mɛlɛka nɔ kɛndɛiyo o cho ni. Te ŋ tosa pɛ hei, mɛɛ choolaŋ a tɔɔ wɔɔŋndo naŋ wa koŋ faŋaa o diola Chɛhowalaŋ choo ni. Okoŋ, diola Chɛhowalaŋ la nɔla mi la sɔla bɛɛleŋ, nduyɛ mi waŋnda kpou sina maa Mɛlɛka diandaa o cho ni. Ŋ nɔ miŋ chua vɛlɛ kaala Chɛhowalaŋ. Mi che bɛɛ wanaa lahakiaa naŋ cho ni, kɛ ŋ nɔla miŋ tosa hei. (Ɛfi. 5:​1, 2) Kaa naa a nyɛ naŋ dimi wo nɔla mbo piiliaŋ waŋnda tau. O nɔla mbo mala nda ma sina wana suu Chɛhowa cho wo nduyɛ ma ke diola ndɔlaŋ bɛɛleŋ. Ŋ nɔ vɛlɛ miŋ chɔm waŋnda kpendekele maa Chɛhowa nɔ di le mbo nɔ diola o nɔ laŋ. Ŋ tosa hei te ŋ mala nda pɛ ma sina tonya cho a diola * ndɔlaŋ okɔɔ wo. Ŋ nɔla vɛlɛ miŋ chɔm maa wanaa lahakiaa bɛɛ nɔla ma lo o tiindaŋ ndaa choo.​—Choobu 2:​3.

19. Vɛɛ Aisaya 63:​7 mala yɛ naa le sinaa nyɛ kpeekpei naŋ nɔ miŋ tosa wo te ŋ wa pɛ waŋnda Baabuiyo pɛɛkoo?

¹⁹ Ŋ nɔla vɛlɛ miŋ tosa nyɛ cheleŋ le mi diola Chɛhowalaŋ la sɔla bɛɛleŋ. Te ŋ wa pɛ waŋnda Baabuiyo pɛɛkoo, nyɛ naŋ kɛsi lepum kɔllo choo tau wo cho kpuluŋgumayɛi Chɛhowɛi ɔɔ di o nɔ le waa masa wo ni. Le hei, miŋ mala nda le ma sina sawala Mɛlɛkalaŋ. Hei cho suɛi wɔɔŋ te. Kɛ a koŋ kpou, nyɛ kpeekpei naŋ nɔ miŋ mala nda ma tosa wo cho kaalaa nɔɔ le Chɛhowa pila ni nduyɛ ma chɔm lo lechoo wo o ndu lo. Le mi hei yɔŋnuŋ, mɛɛ miŋ mala nda ma sina suliŋnda Chɛhowalaŋ a wana suu o cho wo. (Nuawɔ Aisaya 63:​7.) Te ŋ pɛɛku pɛ waŋnda o nɛiyo hoo choo, a cho Chɛhowa kaala nduyɛ ma diikuŋ ndu a kɔllo kpou.

20. Yɛɛ naŋ cho yɛ yaasiaa o buŋgɛi cho lachi ve niŋ?

²⁰ Vɛɛ kaa naa a nyɛ naŋ pɛɛku waŋnda wo mala yɛ nda le ma nɔ yiyaŋ kɛndɔɔ a Chɛhowa okɔɔ? Ŋ cho nyunaa hoo muli o buŋgɛi cho lachi ve niŋ.