တၢ်မၤလိ ၂၃
“မ်နမံၤဘၣ်တၢ်ပာ်စီဆှံတက့ၢ်”
“ယွၤဧၢ, နမံၤအိၣ်ဝဲ လီၤစိၤလီၤထီလီၤ.”—စံးထီၣ်ပတြၢၤ ၁၃၅:၁၃.
တၢ်သးဝံၣ် ၁၀ စံးပတြၢၤ ပကစၢ်ယွၤ, ယဟိဝၤ
တၢ်မၤလိအံၤ အတၢ်တိာ်ပာ် *
၁-၂. ဒ်ပမ့ၢ် ယဟိဝၤပှၤအုၣ်အသးအသိး တၢ်ဂ့ၢ်အရ့ဒိၣ်လၢ ပတဲသကိးအီၤမုာ်မးန့ၣ် မ့ၢ်မနုၤလဲၣ်.
ကစၢ်ယွၤ အိၣ်ဒီးတၢ်ခွဲးတၢ်ယာ်လၢကပၢတၢ် ဒီးအမံၤတဘၣ် တၢ်ဒုၣ်ဒွဲၣ်စံးအၢအီၤတဂ့ၤအဂီၢ်န့ၣ် မ့ၢ်တၢ်လၢအရ့ဒိၣ် ဒိၣ်မးလီၤ. ဒ်ပမ့ၢ် ယဟိဝၤပှၤအုၣ်အသးအသိး ပတဲသကိး တၢ်ဂ့ၢ်တဖၣ်အံၤ မုာ်ဒိၣ်မးလီၤ. ကစၢ်ယွၤအိၣ်ဒီး တၢ်ခွဲးတၢ်ယာ် လၢကပၢတၢ် ဒီးအမံၤကဘၣ်တၢ်ပာ်စီဆှံအီၤန့ၣ် မ့ၢ်တၢ်ဂ့ၢ်လၢ အဘၣ်ထွဲလိာ်အသးလီၤ.
၂ ပဝဲခဲလၢာ် ပသ့ၣ်ညါဘၣ်လၢ ကစၢ်ယွၤအမံၤန့ၣ် ကဘၣ်တၢ်ပာ်စီဆှံအီၤလီၤ. တကးဒံးဘၣ် ပကဘၣ်သ့ၣ်ညါလၢ ယဟိဝၤယွၤ အတၢ်ပၢန့ၣ် မ့ၢ်တၢ်ပၢလၢ အဂ့ၤကတၢၢ်လီၤ. တၢ်ဂ့ၢ်ခံမံၤအံၤန့ၣ် အရ့ဒိၣ်ဝဲ ခံမံၤလၢာ်လီၤ.
၃. ယဟိဝၤယွၤအမံၤန့ၣ် ဘၣ်ထွဲလိာ်အသးဒီး တၢ်ဂ့ၢ်မနုၤလဲၣ်.
၃ ယဟိဝၤယွၤအမံၤန့ၣ် ဘၣ်ထွဲလိာ်အသးဒီး တၢ်ဂ့ၢ်ကိးမံၤဒဲးလၢ အဘၣ်ဃးဒီးအီၤလီၤ. လၢတၢ်ဂ့ၢ်အံၤအကျါန့ၣ် ပၣ်ဃုာ်ဒီး အတၢ်ပၢအခွဲးလီၤ. အဃိ ပမ့ၢ်တဲလၢ ပှၤကဘၣ်ပာ်စီဆှံ ကစၢ်ယွၤအမံၤ မ့ၢ်တၢ်လၢအရ့ဒိၣ်ကတၢၢ်န့ၣ် အခီပညီမ့ၢ်ဝဲ ပတဲစ့ၢ်ကီးလၢ ပှၤကဘၣ်သ့ၣ်ညါလၢ ယဟိဝၤယွၤအတၢ်ပၢ မ့ၢ်တၢ်ပၢလၢ အဂ့ၤကတၢၢ်လီၤ. ယဟိဝၤယွၤအမံၤဒီး အတၢ်ခွဲးတၢ်ယာ်လၢ ကပၢတၢ်ဒ် သ့ၣ်တၢ်လၢာ်ကစၢ်အသိးန့ၣ် ဘၣ်ထွဲလိာ်အသး သပှၢ်ကတၢၢ်လီၤ.—ကွၢ်တၢ်လွံၢ်နၢၣ် လၢအခိၣ်တီမ့ၢ်ဝဲ “ တၢ်ဂ့ၢ်တဖၣ်လၢ အဘၣ်ထွဲဒီး တၢ်ဂ့ၢ်လၢ အရ့ဒိၣ်တခါ” တက့ၢ်.
၄. ဘၣ်ဃးဒီး ကစၢ်ယွၤအမံၤန့ၣ် စံးထီၣ်ပတြၢၤ ၁၃၅:၁၃ ပာ်ဖျါထီၣ်ဝဲ ဒ်လဲၣ်, ဒီးလၢတၢ်မၤလိအံၤအပူၤ ပကတဲသကိး တၢ်သံကွၢ်မနုၤတဖၣ်လဲၣ်.
၄ ယဟိဝၤယွၤအမံၤန့ၣ် မ့ၢ်မံၤအလီၤဆီကတၢၢ်လီၤ. (ဖး စံးထီၣ်ပတြၢၤ ၁၃၅:၁၃ တက့ၢ်.) ဘၣ်မနုၤအဃိ ကစၢ်ယွၤအမံၤန့ၣ် မ့ၢ်တၢ်လၢ အရ့ဒိၣ်ဒိၣ်မးလဲၣ်. ကစၢ်ယွၤအမံၤန့ၣ် ဘၣ်တၢ်ဒုၣ်ဒွဲၣ်စံးအၢအီၤ အဆိကတၢၢ်တဘျီဒ်လဲၣ်. ကစၢ်ယွၤ ပာ်စီဆှံအမံၤဒ်လဲၣ်. ဒီးပပာ်စီဆှံ ကစၢ်ယွၤအမံၤ ကသ့ဒ်လဲၣ်. ခဲအံၤ ပကတဲသကိး တၢ်သံကွၢ်တဖၣ်အံၤ အတၢ်စံးဆၢန့ၣ်လီၤ.
ကစၢ်ယွၤအမံၤန့ၣ် မ့ၢ်တၢ်လၢ အရ့ဒိၣ်မး
၅. ဖဲပှၤတနီၤနီၤ နၢ်ဟူဝဲလၢ ကစၢ်ယွၤ အမံၤကဘၣ် တၢ်ပာ်စီဆှံအီၤအခါ အဝဲသ့ၣ် ကဆိကမိၣ်ဘၣ်ဝဲ တၢ်မနုၤလဲၣ်.
၅ ယ့ၣ်ၡူးတဲဝဲလၢ ပကဘၣ် ဃ့ထုကဖၣ်လၢ ကစၢ်ယွၤအ “မံၤ” က “ဘၣ်တၢ်ပာ်စီဆှံအီၤ” န့ၣ် မ့ၢ်တၢ်လၢ အရ့ဒိၣ်မးလီၤ. (မးသဲ ၆:၉) ယ့ၣ်ၡူးအတၢ်ကတိၤအံၤ အခီပညီ မ့ၢ်မနုၤလဲၣ်. တၢ်ကတိၤလၢအမ့ၢ် ပပာ်စီဆှံ တၢ်တမံၤမံၤန့ၣ် အခီပညီမ့ၢ်ဝဲ ပပာ်အီၤ ကဆှဲကဆှီလီၤ. ဘၣ်ဆၣ် ပှၤတနီၤနီၤ ကဆိကမိၣ်ဝဲလၢ ‘ကစၢ်ယွၤအမံၤန့ၣ် စီဆှံပာ်စၢၤဝဲလံဒၢး. ဘၣ်မနုၤအဃိ ကဘၣ်တၢ်ပာ်စီဆှံ အီၤဒံးလဲၣ်.’ ဒ်သိးပကသ့ၣ်ညါ အတၢ်စံးဆၢအဂီၢ် အဆိကတၢၢ်န့ၣ် ပကဘၣ်သ့ၣ်ညါလၢ တၢ်လၢမံၤတဖျၢၣ်အံၤန့ၣ် အဘၣ်ထွဲဒီး တၢ်ဂ့ၢ်မနုၤလဲၣ်.
၆. ဘၣ်မနုၤအဃိ မံၤန့ၣ် မ့ၢ်တၢ်အရ့ဒိၣ်မးလဲၣ်.
၆ တၢ်လၢမံၤန့ၣ် တမ့ၢ်ထဲ တၢ်ကတိၤလၢ ပှၤကွဲးလီၤအီၤလၢလံာ်ပူၤ မ့တမ့ၢ် ပှၤကိးသီၣ်အီၤန့ၣ်ဘၣ်. လံာ်စီဆှံ တဲဝဲလၢ “ပှၤဃုထၢ အမံၤဂ့ၤအသၣ်ဂ့ၤန့ၣ် အလီၢ်အိၣ်ဒိၣ်န့ၢ် တၢ်ထူးဒိၣ်တၢ်တီၤ အါတက့ၢ်လီၤ.” (ကတိၤဒိ ၂၂:၁; စံၣ်တဲၤတဲလီၤတၢ် ၇:၁) ဘၣ်မနုၤအဃိ မံၤတဖျၢၣ်အံၤန့ၣ် အရ့ဒိၣ်ထဲန့ၢ်ညါလဲၣ်. မ့ၢ်လၢမံၤန့ၣ် အဘၣ်ထွဲလိာ်အသးဒီး နၤအဃိ ပာ်ဖျါထီၣ်ဝဲလၢ နမ့ၢ်ပှၤဒ်လဲၣ် ဒီးပှၤထံၣ်နၤဒ်လဲၣ်န့ၣ်လီၤ. ပှၤကိးသီၣ် နမံၤဒ်လဲၣ် ဒီးပှၤကွဲးလီၤ နမံၤဒ်လဲၣ်န့ၣ် တမ့ၢ်တၢ်လၢ အရ့ဒိၣ်ဘၣ်. တၢ်လၢအရ့ဒိၣ်ကတၢၢ်န့ၣ် မ့ၢ်ဝဲဖဲ ပှၤနၢ်ဟူနမံၤ မ့တမ့ၢ် ထံၣ်ဘၣ်ဝဲ နမံၤအခါ ပှၤဆိကမိၣ်လၢ နမ့ၢ်ပှၤဒ်လဲၣ် တဂၤလဲၣ်န့ၣ်လီၤ.
၇. ပှၤတဲဟးဂီၤ ကစၢ်ယွၤအမံၤ လၢကျဲဒ်လဲၣ်.
၇ ဖဲပှၤတဲလံၣ်တဲလီ ယဟိဝၤယွၤအဂ့ၢ်အခါ မ့ၢ်ဒၣ်အဝဲသ့ၣ်မၤဟးဂီၤ ယဟိဝၤယွၤ အမံၤဂ့ၤသၣ်ဂ့ၤလီၤ. ဖဲပှၤဟီၣ်ခိၣ်ဖိ ထံၣ်ဘၣ်ဒီး တၢ်အၢတၢ်သီအခါ အဝဲသ့ၣ်ပာ်တၢ်ကမၣ်လၢ ကစၢ်ယွၤအလိၤ ဒီးတဲဟးဂီၤဝဲ ကစၢ်ယွၤအမံၤလီၤ. ကစၢ်ယွၤအမံၤ ဒီးအမံၤဂ့ၤသၣ်ဂ့ၤန့ၣ် ဘၣ်တၢ်ဒုၣ်ဒွဲၣ်စံးအၢအီၤ အဆိကတၢၢ်တဘျီဖဲဧ့ၤဒ့ၣ်တၤသၣ် အလီၢ်န့ၣ်လီၤ. လၢတၢ်န့ၣ်အဃိ ပသ့ၣ်ညါဘၣ် တၢ်မနုၤလဲၣ်.
ကစၢ်ယွၤအမံၤန့ၣ် ဘၣ်တၢ်ဒုၣ်ဒွဲၣ်စံးအၢအီၤ အဆိကတၢၢ်တဘျီဒ်လဲၣ်
၈. နီၢ်အံၣ်အု ဒီးစီၤအၤဒၣ် သ့ၣ်ညါဝဲတၢ်မနုၤလဲၣ် ဒီးပကသံကွၢ် တၢ်သံကွၢ်အဂၤမနုၤလဲၣ်.
၈ နီၢ်အံၣ်အု ဒီးစီၤအၤဒၣ် သ့ၣ်ညါဝဲကစၢ်ယဟိဝၤယွၤအမံၤ ဒီးအဝဲသ့ၣ် သ့ၣ်ညါတၢ်ဂ့ၢ်အရ့ဒိၣ်အါမး ဘၣ်ဃးဒီး ကစၢ်ယွၤအဂ့ၢ်န့ၣ် လီၤ. အဝဲသ့ၣ် သ့ၣ်ညါဝဲလၢ ကစၢ်ယွၤမ့ၢ် တၢ်ဘၣ်တ့ကစၢ်, ပှၤလၢအဟ့ၣ်လီၤအီၤ သးသမူ, အဟ့ၣ်လီၤ တၢ်အိၣ်တၢ်ဆိးအလီၢ် လၢအဃံအလၤ ဒီးအသးသမူတံၤသကိး လၢအဂ့ၤကတၢၢ်လီၤ. (၁ မိၤၡ့ ၁:၂၆-၂၈; ၂:၁၈) မ့ၢ်အဝဲသ့ၣ် ဆဲးဆိကမိၣ်ဝဲ တၢ်လၢယဟိဝၤယွၤ မၤန့ၢ်အဝဲသ့ၣ် ကိးမံၤဒဲးဧါ. မ့ၢ်အဝဲသ့ၣ် မၤဒိၣ်ထီၣ် အတၢ်အဲၣ် ဒီးတၢ်စံးဘျုးစံးဖှိၣ် လၢယဟိဝၤယွၤ အဖီခိၣ်ဧါ. ပသ့ၣ်ညါဘၣ် အဝဲသ့ၣ် အတၢ်ပာ်သူၣ်ပာ်သး လီၤတံၢ်လီၤဆဲး ဖဲကစၢ်ယွၤ အဒုၣ်အဒါ လ့ပစီ အဝဲသ့ၣ်အခါန့ၣ်လီၤ.
၉. ဒ် ၁ မိၤၡ့ ၂:၁၆, ၁၇ ဒီး ၃:၁-၅ ပာ်ဖျါထီၣ်ဝဲအသိး ယဟိဝၤယွၤတဲဝဲ နီၢ်အံၣ်အု ဒီးစီၤအၤဒၣ်ဒ်လဲၣ် ဒီးဒ်သိး အဝဲသ့ၣ် ကဆိကမိၣ်ကမၣ် ယဟိဝၤယွၤအဂီၢ် မုၣ်ကီၤလံၢ် မၤဝဲဒ်လဲၣ်.
၉ ဖး ၁ မိၤၡ့ ၂:၁၆, ၁၇ ဒီး ၃:၁-၅ တက့ၢ်. ကစၢ်ယွၤ ဟ့ၣ်အခွဲးလၢ နီၢ်အံၣ်အု ဒီးစီၤအၤဒၣ် ကအီၣ်ဝဲကယဲၢ် သ့ၣ်ခဲလၢာ်အသၣ်လီၤ. ကစၢ်ယွၤတြီအဝဲသ့ၣ်လၢ တဘၣ်အီၣ် ထဲသ့ၣ်တထူၣ်ဧိၤ အသၣ်လီၤ. အဃိ သ့ၣ်သၣ်လၢ နီၢ်အံၣ်အု ဒီးစီၤအၤဒၣ် အီၣ်ဝဲသ့န့ၣ် အိၣ်ဝဲအကလုာ်ကလုာ်လီၤ. (၁ မိၤၡ့ ၂:၉) ယဟိဝၤယွၤန့ၣ် မ့ၢ်ယွၤလၢ အသးအိၣ်ဟ့ၣ်တၢ်ညီလီၤ. ဘၣ်ဆၣ် မုၣ်ကီၤလံၢ် သူဝဲဂုၢ်တဘိ ဒီးသံကွၢ်ဝဲ နီၢ်အံၣ်အုလၢ “ကယဲၢ်သ့ၣ်အိၣ်လၢ တၤသၣ်အလီၢ်ပူၤ တထံးလၢ်လၢ်န့ၣ် ယွၤမၤလိာ်သု, အီၣ်အီၤတဂ့ၤန့ၣ်, သပှၢ်တၢၢ်ဧါ.” မုၣ်ကီၤလံၢ် သူဝဲတၢ်သံကွၢ် ဒ်သိးနီၢ်အံၣ်အု ကစးထီၣ်ဆိကမိၣ်ကမၣ်ဝဲ ကစၢ်ယွၤန့ၣ်လီၤ. မုၣ်ကီၤလံၢ် အတၢ်သံကွၢ်အံၤ ကဒုးဆိကမိၣ် နီၢ်အံၣ်အု ဒီးစီၤအၤဒၣ်လၢ သ့ၣ်လၢကစၢ်ယွၤတပျဲလၢ အဝဲသ့ၣ်ကအီၣ်ဝဲန့ၣ် အိၣ်ဝဲတထူၣ်လီၤ. အဃိ အဝဲသ့ၣ် ကဆိကမိၣ်လၢ ကစၢ်ယွၤန့ၣ် တမ့ၢ်ပှၤလၢ အသးအိၣ်ဟ့ၣ်တၢ်ညီဘၣ်န့ၣ်လီၤ. ဘၣ်သ့ၣ်သ့ၣ် နီၢ်အံၣ်အု ကဆိကမိၣ်ဝဲလၢ ‘တၢ်အဂ့ၤလၢ ကစၢ်ယွၤတဟ့ၣ်ယၤဘၣ်န့ၣ် အိၣ်တမံၤမံၤဒံးဧါ.’
၁၀. မုၣ်ကီၤလံၢ် တဲဟးဂီၤ ကစၢ်ယွၤအမံၤဒ်လဲၣ် ဒီးတၢ်ကဲထီၣ်အသးဒ်လဲၣ်.
၁၀ ဖဲမုၣ်ကီၤလံၢ် သံကွၢ်နီၢ်အံၣ်အု တၢ်သံကွၢ်အဆၢကတီၢ်န့ၣ် နီၢ်အံၣ်အု ဒိကနၣ် ယဟိဝၤယွၤ အကလုၢ်ဒံးလီၤ. ဖဲန့ၣ်အဆၢကတီၢ် အဝဲတဲဆၢက့ၤဝဲ မုၣ်ကီၤလံၢ်လၢ တၢ်လၢကစၢ်ယွၤ တဲဘၣ်အီၤတဖၣ်န့ၣ်လီၤ. အဝဲတဲဝဲလၢ အဝဲသ့ၣ် တကြၢးဖီၣ်ဘူး သ့ၣ်ဝဲန့ၣ်ဘၣ်. ဒီးအဝဲသ့ၣ်ညါဝဲလၢ အမ့ၢ်တဒိကနၣ် ကစၢ်ယွၤအကလုၢ်ဘၣ်န့ၣ် အကဘၣ်သံလီၤ. ဘၣ်ဆၣ် မုၣ်ကီၤလံၢ်တဲအီၤလၢ “သုတသံဒီး သုတသံဘၣ်ဘၣ်လီၤ.” (၁ မိၤၡ့ ၃:၂-၄) တဘျီအံၤန့ၣ် မုၣ်ကီၤလံၢ် ဒုၣ်ဒွဲၣ်စံးအၢ ကစၢ်ယွၤအမံၤ ဒီးတဲဝဲလိၤလိၤလၢ ယဟိဝၤယွၤမ့ၢ် ပှၤလၢအလံၣ်တၢ်လီၤ. အဃိ မုၣ်ကီၤလံၢ် ကဲထီၣ်ဝဲ ပှၤလၢအတဲဟးဂီၤပှၤအဂ့ၢ်လီၤ. မ့ၢ်လၢနီၢ်အံၣ်အုန့ၣ် အဝဲနာ်န့ၢ်ဝဲ မုၣ်ကီၤလံၢ်အဃိ ဘၣ်တၢ်လံၣ်န့ၢ်လီန့ၢ်အီၤလီၤ. (၁ တံၤမသ့း ၂:၁၄) နီၢ်အံၣ်အုနာ်န့ၢ် မုၣ်ကီၤလံၢ်အါန့ၢ်ဒံး အနာ်ယဟိဝၤယွၤအဃိ ညီထီၣ်ဒိၣ်မးလၢ အကဆၢတဲာ်တၢ်လၢ အကမၣ်လီၤ. အဝဲဆၢတဲာ်လီၤအသးလၢ အတဒိကနၣ် ယဟိဝၤယွၤ အကလုၢ်လၢၤဘၣ်လီၤ. အဝဲအီၣ်ဝဲသ့ၣ်သၣ် လၢယဟိဝၤယွၤ တပျဲလၢ အကအီၣ်ဝဲဘၣ်န့ၣ်လီၤ. ဒီးလၢခံ အဝဲဒုးအီၣ် စီၤအၤဒၣ်စ့ၢ်ကီးလီၤ.—၁ မိၤၡ့ ၃:၆.
၁၁. ပမိၢ်ပပၢ် အဆိကတၢၢ်ခံဂၤ ကြၢးမၤဝဲတၢ်မနုၤလဲၣ် ဘၣ်ဆၣ်အဝဲသ့ၣ် မၤကမၣ်ဘၣ်တၢ်ဒ်လဲၣ်.
၁၁ နီၢ်အံၣ်အု ကြၢးတဲဆၢက့ၤ မုၣ်ကီၤလံၢ်ဒ်လဲၣ်. ထံၣ်တမှံကွၢ်လၢ အဝဲတဲဆၢက့ၤ မုၣ်ကီၤလံၢ်လၢ “ယတသ့ၣ်ညါနၤဘၣ်. ယသ့ၣ်ညါ ယပၢ်ယဟိဝၤယွၤ, ယအဲၣ်အီၤ ဒီးယနာ်အီၤ, အဝဲဟ့ၣ်လီၤယၤဒီးယဝၤ တၢ်ကိးမံၤဒဲးလီၤ. ဘၣ်မနုၤအဃိ နတဲဟးဂီၤအီၤဒ်အံၤလဲၣ်, ဟးထီၣ်ကွံာ်မ့ၢ်ယံၤ” တက့ၢ်. ယဟိဝၤယွၤ မ့ၢ်နၢ်ဟူဘၣ်ဝဲလၢ နီၢ်အံၣ်အု တဲဆၢက့ၤဝဲဒ်န့ၣ်န့ၣ် အဝဲကသးခုဒိၣ်မးလီၤ. (ကတိၤဒိ ၂၇:၁၁) ဘၣ်ဆၣ် နီၢ်အံၣ်အု ဒီးစီၤအၤဒၣ် တအိၣ်ဒီး တၢ်အဲၣ်လၢအတီလၢ ယဟိဝၤယွၤအဖီခိၣ်ဘၣ်. ခီဖျိလၢအဝဲသ့ၣ် အတၢ်အဲၣ်တအိၣ်လၢ အပၢ်အဖီခိၣ် လၢလၢပှဲၤပှဲၤဘၣ်အဃိ ကစၢ်ယွၤအမံၤန့ၣ် ဘၣ်တၢ်ဒုၣ်ဒွဲၣ်စံးအၢအီၤလီၤ
၁၂. မုၣ်ကီၤလံၢ် မၤဒ့ဒီ နီၢ်အံၣ်အုအသးဒ်လဲၣ် ဒီးနီၢ်အံၣ်အု ဒီးစီၤအၤဒၣ် တမၤဝဲ တၢ်မနုၤလဲၣ်.
၁၂ ဒ်ပတဲသကိးတ့ၢ်အသိး မုၣ်ကီၤလံၢ် စးထီၣ်တဲဟးဂီၤဝဲ ယဟိဝၤယွၤ အမံၤဂ့ၤသၣ်ဂ့ၤခီဖျိ အမၤဝဲဒ်သိး နီၢ်အံၣ်အု ကသးဒ့ဒီလၢ ယဟိဝၤယွၤ အဖီခိၣ်လီၤ. အဃိ ဖဲမုၣ်ကီၤလံၢ် တဲလံၣ်တဲလီဝဲ ကစၢ်ယွၤ အဂ့ၢ်အခါ နီၢ်အံၣ်အု ဒီးစီၤအၤဒၣ် တမၤဝဲဒ်သိး ကစၢ်ယွၤအမံၤ ကဘၣ်တၢ်ပာ်စီဆှံအီၤ အဂီၢ်လၢၤဘၣ်. ခီဖျိလၢ အဝဲသ့ၣ်နာ်ဝဲ မုၣ်ကီၤလံၢ်အဃိ အဝဲသ့ၣ်ထီဒါ ကစၢ်ယွၤလီၤ. မုၢ်မဆါတနံၤအံၤစ့ၢ်ကီး မုၣ်ကီၤလံၢ် ဆဲးမၤဝဲ ဒ်န့ၣ်အသိးလီၤ. အဝဲမၤဟးဂီၤ ယဟိဝၤယွၤအမံၤ ခီဖျိအတဲလံၣ်တဲလီဝဲ ကစၢ်ယွၤအဂ့ၢ်လီၤ. ဒီးပှၤလၢအနာ်န့ၢ် မုၣ်ကီၤလံၢ် အတၢ်လံၣ်တၢ်လီတဖၣ်န့ၣ် အဝဲသ့ၣ်တတူၢ်လိာ် ယဟိဝၤယွၤ အတၢ်သိၣ်တၢ်သီ လၢအတီအလိၤတဖၣ်လၢၤဘၣ်.
ယဟိဝၤယွၤ ပာ်စီဆှံအမံၤဒ်လဲၣ်
၁၃. ယဃ့းစက့လး ၃၆:၂၃ ပာ်ဖျါထီၣ်ဝဲ လံာ်စီဆှံ အတၢ်ဂ့ၢ်မိၢ်ပှၢ်ဒ်လဲၣ်.
၁၃ မ့ၢ်လၢယဟိဝၤယွၤအမံၤ ဘၣ်တၢ်တဲဟးဂီၤအီၤ လၢဧ့ၤဒ့ၣ်တၤသၣ်လီၢ်ပူၤအဃိ အဝဲမၤဝဲဒ်လဲၣ်. လံာ်စီဆှံဒီဘ့ၣ် ပာ်ဖျါထီၣ်ဝဲ တၢ်လၢယဟိဝၤယွၤ မၤဝဲဒ်သိး အမံၤကဘၣ် တၢ်ပာ်စီဆှံအီၤ အဂီၢ်န့ၣ်လီၤ. (၁ မိၤၡ့ ၃:၁၅) အဃိ ပတဲသ့လၢ လံာ်စီဆှံဒီဘ့ၣ် အတၢ်ဂ့ၢ်မိၢ်ပှၢ်န့ၣ် မ့ၢ်ဝဲယဟိဝၤယွၤ ကပာ်စီဆှံအမံၤ ခီဖျိလၢ အဘီအမုၢ်လၢ အဖိခွါကပၢဝဲ ဒီးကဒုးအိၣ်ထီၣ်က့ၤ တၢ်တီတၢ်လိၤ ဒီးတၢ်ဃူတၢ်ဖိး လၢဟီၣ်ခိၣ်ချၢန့ၣ်လီၤ. လံာ်စီဆှံ ပာ်ဖျါထီၣ်န့ၢ်ပှၤ တၢ်ဂ့ၢ်လၢ အကမၤစၢၤပှၤဒ်သိး ပကသ့ၣ်ညါလၢ ယဟိဝၤယွၤ ပာ်စီဆှံအမံၤ ဒ်လဲၣ်န့ၣ်လီၤ.—ဖး ယဃ့းစက့လး ၃၆:၂၃ တက့ၢ်.
၁၄. ယဟိဝၤယွၤ မၤတၢ်ဒ်သိး အမံၤကဘၣ် တၢ်ပာ်စီဆှံအီၤ အဂီၢ်ဒ်လဲၣ်.
၁၄ ဒ်သိးယဟိဝၤယွၤ အတၢ်ဘၣ်သး သုတလၢထီၣ်ပှဲၤထီၣ်တဂ့ၤအဂီၢ် မုၣ်ကီၤလံၢ်ကမၤဝဲ တၢ်ကိးမံၤဒဲးလၢ အမၤဝဲသ့လီၤ. ဘၣ်ဆၣ် အဝဲမၤဝဲတန့ၢ် နီတဘျီဘၣ်. လံာ်စီဆှံ ပာ်ဖျါထီၣ်ဝဲ တၢ်လၢယဟိဝၤယွၤ မၤတ့ၢ်ဝဲတဖၣ် ဒီးတၢ်သ့ၣ်တဖၣ်န့ၣ် ပာ်ဖျါထီၣ်ဝဲလၢ ယဟိဝၤယွၤမ့ၢ် ပၢ်လၢအပှဲၤဒီး တၢ်အဲၣ်တၢ်ကွံ ဒီးပှၤပၢတၢ် လၢအဂ့ၤကတၢၢ်န့ၣ်လီၤ. ခီဖျိလၢ မုၣ်ကီၤလံၢ် ဒီးပှၤလၢအပိာ်အခံတဖၣ် ထီဒါကစၢ်ယွၤအဃိ ယဟိဝၤယွၤ အသးဘၣ်ဒိဝဲ ဒိၣ်မးလီၤ. (စံးထီၣ်ပတြၢၤ ၇၈:၄၀) ဘၣ်ဆၣ် ယဟိဝၤယွၤ မၤဘၣ်ထီၣ်က့ၤ တၢ်ဂ့ၢ်ကီတဖၣ်အံၤလၢ တၢ်ကူၣ်သ့, တၢ်သူၣ်စူၤသးစူၤ ဒီးတၢ်တီတၢ်လိၤအပူၤလီၤ. အဝဲပာ်ဖျါထီၣ်ဝဲ အစိအကမီၤလၢ ကျဲအါဘိလီၤ. တကးဒံးဘၣ် တၢ်လၢအမၤဝဲ တမံၤဂ့ၤတမံၤဂ့ၤန့ၣ် ပာ်ဖျါထီၣ်ဝဲလၢ အအိၣ်ဒီး တၢ်အဲၣ်တၢ်ကွံလီၤ. (၁ ယိၤဟၣ် ၄:၈) ယဟိဝၤယွၤ မၤတၢ်ဒ်သိး အမံၤကဘၣ် တၢ်ပာ်စီဆှံအီၤအဂီၢ် ထီဘိလီၤ.
မုၣ်ကီၤလံၢ် လံၣ်န့ၢ်လီန့ၢ်နီၢ်အံၣ်အု ဘၣ်ဃးဒီး ယဟိဝၤယွၤအဂ့ၢ် ဒီးအိၣ်လံအနံၣ်လၢ အကယၤတဖၣ်အတီၢ်ပူၤ အဝဲဆဲးတဲလံၣ်တဲလီဒံးဝဲ ကစၢ်ယွၤအဂ့ၢ် (ကွၢ်လံာ်အဆၢ ၉-၁၀, ၁၅) *
၁၅. ဆၢကတီၢ်ခဲအံၤ မုၣ်ကီၤလံၢ် တဲဟးဂီၤ ကစၢ်ယွၤအမံၤ ဒ်လဲၣ်, ဒီးတၢ်ကဲထီၣ်အသးဒ်လဲၣ်.
၁၅ မုၢ်မဆါတနံၤအံၤ မုၣ်ကီၤလံၢ် ဒုၣ်ဒွဲၣ်စံးအၢဒံး ကစၢ်ယွၤအမံၤလီၤ. မုၣ်ကီၤလံၢ် မၤဝဲဒ်သိး ပှၤကသးဒ့ဒီလၢ ကစၢ်ယွၤ အိၣ်ဒီးတၢ်စိတၢ်ကမီၤ, တၢ်တီတၢ်လိၤ, တၢ်ကူၣ်သ့ ဒီးတၢ်အဲၣ်သ့ၣ်တဖၣ်န့ၣ်လီၤ. အဒိ မုၣ်ကီၤလံၢ် ဂုာ်ကျဲးစၢးဝဲဒ်သိး ပှၤသုတနာ်လၢ ယဟိဝၤယွၤ မ့ၢ်တၢ်ဘၣ်တ့ကစၢ်တဂ့ၤ အဂီၢ်လီၤ. ဒီးပှၤမ့ၢ်နာ် ကစၢ်ယွၤန့ၣ် အဝဲမၤဝဲဒ်သိး ပှၤကဆိကမိၣ်လၢ ကစၢ်ယွၤအတၢ်ဘျၢတဖၣ်န့ၣ် ဃံးဒိၣ်မး ဒီးအတတီတလိၤဘၣ်. ဒီးဒုးနာ်န့ၢ် ပှၤဂၤစ့ၢ်ကီးလၢ ယဟိဝၤယွၤ မ့ၢ်ပှၤအၢပှၤသီ လၢအမၤနးမၤဖှီၣ်ပှၤဂၤလၢ လရာ်မ့ၣ်အူအပူၤလီၤ. ဖဲပှၤနာ်ဝဲ တၢ်လံၣ်တၢ်လီတဖၣ်အံၤအခါ တညီလၢ အဝဲသ့ၣ်ကနာ်န့ၢ် ယဟိဝၤယွၤ အတၢ်သိၣ်တၢ်သီလၢ အတီအလိၤလၢၤဘၣ်. တချုးလၢ ယဟိဝၤယွၤ ကမၤဟးဂီၤ မုၣ်ကီၤလံၢ်ဒံးဘၣ်န့ၣ် မုၣ်ကီၤလံၢ် ကဆဲးတဲလံၣ်တဲလီ ယဟိဝၤယွၤအဂ့ၢ် ဒီးကဂုာ်ကျဲးစၢးဝဲဒ်သိး ပကပာ်တ့ၢ်ကွံာ် ယဟိဝၤယွၤအဂီၢ်လီၤ. ဘၣ်ဆၣ် မုၣ်ကီၤလံၢ်အတၢ်မၤ ကကဲထီၣ်လိၣ်ထီၣ်ဝဲဧါ.
ပအိၣ်ဒီး မူဒါဒ်လဲၣ်
၁၆. တၢ်ခွဲးတၢ်ယာ်လၢ နီၢ်အံၣ်အု ဒီးစီၤအၤဒၣ် တပာ်လုၢ်ပာ်ပှ့ၤဝဲတဖၣ်န့ၣ် နပာ်လုၢ်ပာ်ပှ့ၤအီၤ ကသ့ဒ်လဲၣ်.
၁၆ ယဟိဝၤယွၤ ဟ့ၣ်ပှၤဟီၣ်ခိၣ်ဖိတဖၣ် တၢ်ခွဲးတၢ်ယာ် လၢအကပာ်စီဆှံအမံၤလီၤ. အဃိ တၢ်ခွဲးတၢ်ယာ်လၢ နီၢ်အံၣ်အု ဒီးစီၤအၤဒၣ် တပာ်လုၢ်ပာ်ပှ့ၤဝဲန့ၣ် ပပာ်လုၢ်ပာ်ပှ့ၤအီၤလီၤ. ဟီၣ်ခိၣ်အံၤ ပှဲၤဝဲဒီး ပှၤလၢအတဲလံၣ်တဲလီ ဒီးဒုၣ်ဒွဲၣ်စံးအၢ ယဟိဝၤယွၤအမံၤ ဘၣ်ဆၣ် ပအိၣ်ဒီးတၢ်ခွဲးတၢ်ယာ်လၢ ပကတဲဘၣ်ပှၤဂၤ တၢ်မ့ၢ်တၢ်တီလၢ ဘၣ်ဃးဒီး ယဟိဝၤယွၤအမံၤ ဒီးတဲဘၣ်အဝဲသ့ၣ်လၢ ယဟိဝၤယွၤမ့ၢ် ပှၤစီပှၤဆှံ, ပှၤတီပှၤလိၤ, ပှၤဂ့ၤပှၤဝါ ဒီးပှၤလၢအပှဲၤဒီး တၢ်အဲၣ်တၢ်ကွံလီၤ. (ယၡါယၤ ၂၉:၂၃) ပဆီၣ်ထွဲမၤစၢၤ ကစၢ်ယွၤ အတၢ်ပၢသ့ဝဲလီၤ. ဒီးပဒုးသ့ၣ်ညါဘၣ်ပှၤဂၤလၢ ထဲဒၣ်ယဟိဝၤယွၤအတၢ်ပၢန့ၣ် မ့ၢ်တၢ်ပၢလၢ အတီအလိၤ ဒီးအကဒုးအိၣ်ထီၣ် တၢ်ဃူတၢ်ဖိး ဒီးတၢ်သူၣ်ခုသးခု လၢအတၢ်ဘၣ်တ့ ခဲလၢာ်အဂီၢ်လီၤ.—စံးထီၣ်ပတြၢၤ ၃၇:၉, ၃၇; ၁၄၆:၅, ၆, ၁၀.
၁၇. ဒ်သိး ကစၢ်ယွၤအမံၤ ကဘၣ်တၢ်ပာ်စီဆှံအီၤအဂီၢ် ယ့ၣ်ၡူးမၤဝဲဒ်လဲၣ်.
၁၇ ဒ်သိးကစၢ်ယွၤအမံၤ ကဘၣ်တၢ်ပာ်စီဆှံအီၤအဂီၢ် ပကွၢ်လိမၤဒိး ယ့ၣ်ၡူးသ့ဝဲလီၤ. (ယိၤဟၣ် ၁၇:၂၆) ယ့ၣ်ၡူးဒုးသ့ၣ်ညါ ပှၤဂၤလၢ အပၢ်အမံၤ ခီဖျိအသူဝဲ အပၢ်အမံၤ တကးဒံးဘၣ် အသိၣ်လိပှၤဂၤလၢ ယဟိဝၤယွၤ အဂ့ၢ်လီၤ. ဘၣ်ဆၣ် ပှၤဖၤရံၤၡဲတဖၣ် တမၤဝဲဒ်န့ၣ်ဘၣ်. အဒိ ပှၤဖၤရံၤၡဲတဖၣ် မၤဝဲဒ်သိး ပှၤကထံၣ်လၢ ယဟိဝၤယွၤ မ့ၢ်ပှၤအၢပှၤသီ, ပှၤလၢအမၢဆူၣ်ပှၤဂၤ, တသူၣ်အိၣ်သးအိၣ်ပှၤဂၤဘၣ် ဒီးအတၢ်သးကညီၤ တအိၣ်ဘၣ်န့ၣ်လီၤ. မ့မ့ၢ်ယ့ၣ်ၡူးန့ၣ် မၤစၢၤပှၤဂၤ ဒ်သိးပှၤကထံၣ်လၢ ကစၢ်ယွၤမ့ၢ်ပှၤလၢ အနၢ်ပၢၢ်စၢၤပှၤဂၤ, အအိၣ်ဒီး တၢ်သူၣ်စူၤသးစူၤ, တၢ်အဲၣ်တၢ်ကွံ ဒီးပျၢ်ကွံာ်ပှၤဂၤ အတၢ်ကမၣ်န့ၣ်လီၤ. ဒီးအဝဲမၤစၢၤပှၤဂၤ ဒ်သိးအဝဲသ့ၣ် ကသ့ၣ်ညါထီၣ် ယဟိဝၤယွၤ ခီဖျိအပာ်ဖျါထီၣ် အပၢ်အတၢ်ဂ့ၤတၢ်ဝါ လၢအတၢ်အိၣ်မူပူၤ ကိးနံၤဒဲးလီၤ.—ယိၤဟၣ် ၁၄:၉.
၁၈. မုၣ်ကီၤလံၢ် အတၢ်လံၣ်တၢ်လီလၢ ဘၣ်ဃးဒီး ကစၢ်ယွၤန့ၣ် ပပာ်ဖျါထီၣ် ကသ့ဒ်လဲၣ်.
၁၈ ဒ်ယ့ၣ်ၡူးအသိး ပတဲဘၣ်ပှၤဂၤ လၢယဟိဝၤယွၤအဂ့ၢ် ဒီးသိၣ်လိအဝဲသ့ၣ်လၢ ယဟိဝၤယွၤမ့ၢ် ကစၢ်လၢအအိၣ်ဒီး တၢ်အဲၣ်တၢ်ကွံ ဒီးတၢ်သးကညီၤလီၤ. ပမ့ၢ်မၤဒ်န့ၣ်န့ၣ် မ့ၢ်ဒၣ်ပပာ်ဖျါထီၣ်လၢ မုၣ်ကီၤလံၢ်မ့ၢ် ပှၤလၢအလံၣ်တၢ်လီတၢ်ဒီး ခဲၣ်သူၣ်ခဲၣ်ဂီၤဝဲ ဘၣ်ဃးဒီး ယဟိဝၤယွၤအဂ့ၢ်လီၤ. ဖဲပမၤစၢၤပှၤဂၤဒ်သိး အဝဲသ့ၣ် ကထံၣ်ကစၢ်ယွၤအမံၤ ဒ်တၢ်စီဆှံအသိးအခါန့ၣ် မ့ၢ်ဒၣ်ပပာ်စီဆှံ ကစၢ်ယွၤအမံၤလီၤ. ပကွၢ်လိမၤဒိးစ့ၢ်ကီး ယဟိဝၤယွၤသ့လီၤ. ပမ့ၢ်ပှၤတလၢတပှဲၤဘၣ် သနာ်က့ ပမၤဒ်န့ၣ်သ့လီၤ. (အ့းဖ့းစူး ၅:၁, ၂) ပတၢ်ကတိၤ ဒီးတၢ်မၤတဖၣ် မ့ၢ်ပာ်ဖျါထီၣ်န့ၢ်ပှၤဂၤလၢ ယဟိဝၤယွၤ မ့ၢ်ပှၤနီၢ်နီၢ်ဒ်လဲၣ် တဂၤလဲၣ်န့ၣ် မ့ၢ်ဝဲပပာ်ဖျါထီၣ်လၢ ပပာ်စီဆှံအမံၤန့ၣ်လီၤ. ဒ်သိးကစၢ်ယွၤအမံၤ ကပူၤဖျဲးဒီး တၢ်ဒုၣ်ဒွဲၣ်စံးအၢအဂီၢ် ပမၤအီၤသ့ ခီဖျိပမၤစၢၤပှၤဂၤဒ်သိး အကသ့ၣ်ညါထီၣ် တၢ်မ့ၢ်တၢ်တီလၢ ဘၣ်ဃးဒီး ကစၢ်ယွၤအဂ့ၢ်န့ၣ်လီၤ. တကးဒံးဘၣ် ပမ့ၢ်မၤဒ်န့ၣ်န့ၣ် ပပာ်ဖျါထီၣ်လၢ ပှၤဟီၣ်ခိၣ်ဖိလၢ အတလၢတပှဲၤဘၣ်န့ၣ် ဆဲးတီဒီး ကစၢ်ယွၤသ့လီၤ.—ယိၤဘး ၂၇:၅.
ပအဲၣ်ဒိး မၤစၢၤပပှၤမၤလိလံာ်စီဆှံဖိ ဒ်သိးအဝဲသ့ၣ် ကနၢ်ပၢၢ်ထီၣ်ဝဲလၢ ယဟိဝၤယွၤ မ့ၢ်ပှၤလၢအအိၣ်ဒီး တၢ်အဲၣ်တၢ်ကွံ ဒီးတၢ်သးကညီၤ (ကွၢ်လံာ်အဆၢ ၁၈-၁၉) *
၁၉. ဒ် ယၡါယၤ ၆၃:၇ ပာ်ဖျါထီၣ်ဝဲအသိး ဖဲပသိၣ်လိပှၤဂၤ လံာ်စီဆှံအခါ ပတၢ်တိာ်ပာ်န့ၣ် ကြၢးမ့ၢ်မနုၤလဲၣ်.
၁၉ တကးဒံးဘၣ် ပပာ်စီဆှံ ယဟိဝၤယွၤအမံၤသ့ဝဲလီၤ. ဖဲပသိၣ်လိပှၤဂၤ လၢလံာ်စီဆှံ တၢ်မ့ၢ်တၢ်တီအခါ ပတဲဘၣ်အဝဲသ့ၣ်ထီဘိလၢ ယဟိဝၤယွၤအိၣ်ဒီး တၢ်ခွဲးတၢ်ယာ်လၢ ကပၢတၢ်သပှၢ်ကတၢၢ်လီၤ. ပကဘၣ်သိၣ်လိ အဝဲသ့ၣ်လၢ ကစၢ်ယွၤ အတၢ်သိၣ်တၢ်သီန့ၣ် မ့ၢ်တၢ်လၢအရ့ဒိၣ် ဘၣ်ဆၣ် ပတၢ်တိာ်ပာ်န့ၣ် မ့ၢ်ဝဲပကမၤစၢၤ အဝဲသ့ၣ် ဒ်သိးအကအဲၣ် ပပၢ်ယဟိဝၤယွၤ ဒီးအကတီဒီးအီၤလီၤ. လၢတၢ်န့ၣ်အဃိ ပကဘၣ်တဲဖျါထီၣ် ယဟိဝၤယွၤ အတၢ်ဂ့ၤတၢ်ဝါတဖၣ် ဒီးယဟိဝၤယွၤ မ့ၢ်ပှၤဒ်လဲၣ်တဂၤလဲၣ်န့ၣ် မ့ၢ်တၢ်လၢ အရ့ဒိၣ်ဒိၣ်မးလီၤ. (ဖး ယၡါယၤ ၆၃:၇ တက့ၢ်.) ဖဲပသိၣ်လိ အဝဲသ့ၣ်အခါ ပမၤစၢၤအဝဲသ့ၣ်ဒ်သိး ကအဲၣ်ကစၢ်ယွၤ ဒီးဒိကနၣ်အကလုၢ် မ့ၢ်လၢအဝဲသ့ၣ် အဲၣ်ဒိးတီဒီးကစၢ်ယွၤ အဃိလီၤ.
၂၀. တၢ်မၤလိလၢခံတခါန့ၣ် ပကတဲသကိး တၢ်ဂ့ၢ်မနုၤလဲၣ်.
၂၀ ဒ်သိးပတၢ်သကဲာ်ပဝး ဒီးတၢ်လၢပသိၣ်လိအီၤတဖၣ် ကမၤစၢၤပှၤဂၤဒ်သိး အဝဲသ့ၣ် ကဆိကမိၣ်ဝဲ ယဟိဝၤယွၤအဂ့ၢ် လၢအဂ့ၤတခီ ဒီးကသုးဘူးအသးဆူ ကစၢ်ယွၤအအိၣ်အဂီၢ် ပမၤကသ့ဒ်လဲၣ်. တၢ်မၤလိ လၢခံတခါန့ၣ် ပကတဲသကိး တၢ်သံကွၢ်တဖျၢၣ်အံၤ အတၢ်စံးဆၢလီၤ.
တၢ်သးဝံၣ် ၂ ယဟိဝၤမ့ၢ်နမံၤ
^ လံာ်အဆၢ. 5 လၢပှၤဟီၣ်ခိၣ်ဖိ ဒီးမူခိၣ်ကလူးတဖၣ်အဂီၢ် တၢ်ဂ့ၢ်လၢ အရ့ဒိၣ်ကတၢၢ်န့ၣ် မ့ၢ်မနုၤလဲၣ်. ဘၣ်မနုၤအဃိ တၢ်ဂ့ၢ်အံၤ မ့ၢ်တၢ်လၢ အရ့ဒိၣ်လဲၣ် ဒီးတၢ်ဂ့ၢ်အံၤ အဘၣ်ထွဲဒီးပှၤဒ်လဲၣ်. ပမ့ၢ်သ့ၣ်ညါ တၢ်သံကွၢ်တဖၣ်အံၤ အတၢ်စံးဆၢန့ၣ် ကမၤစၢၤပှၤဒ်သိး ပတၢ်ရ့လိာ်သးဒီး ယဟိဝၤယွၤ ကဂၢၢ်ကျၢၤထီၣ် အဂီၢ်လီၤ.
^ လံာ်အဆၢ. 61 တၢ်တဲဖျါထီၣ်တၢ်ဂီၤ အခီပညီ– မုၣ်ကီၤလံၢ် တဲလံၣ်တဲလီ ကစၢ်ယွၤအဂ့ၢ် ဒီးတဲဘၣ်နီၢ်အံၣ်အု လၢကစၢ်ယွၤမ့ၢ် ပှၤလီတၢ်လီၤ. လၢအနံၣ်လၢ အကယၤအတီၢ်ပူၤ မုၣ်ကီၤလံၢ် ဒုးအိၣ်ထီၣ် တၢ်သိၣ်လိလၢအကမၣ် ဒ်သိးဒီးကစၢ်ယွၤမ့ၢ် ပှၤလၢအအၢအသီ ဒီးအတတ့လီၤ ပှၤဟီၣ်ခိၣ်ဖိဘၣ်န့ၣ်လီၤ.
^ လံာ်အဆၢ. 63 တၢ်တဲဖျါထီၣ်တၢ်ဂီၤ အခီပညီ– ဖဲဒီပုၢ်ဝဲၢ်တဂၤ သိၣ်လိလံာ်စီဆှံအခါ အတဲဖျါထီၣ်ဝဲ ကစၢ်ယွၤအတၢ်ဂ့ၤတၢ်ဝါ လၢတၢ်သူၣ်ဆူၣ်သးဆူၣ်အပူၤလီၤ.
