ARTIKLE YA KULONGOKA 23
“Nkumbu ya nge vanda santu”
“O Yehova, nkumbu ya nge ke zinga ntangu nyonso.”—NKU. 135:13.
NZIMBU 10 Louons Jéhovah notre Dieu!
YINA BETO KE LONGOKA *
1-2. Wapi bima zole yina batemwe ya Yehova ke zolá kuzonzila?
BUBU yayi, beto ke na mantwala ya bima zole ya mfunu yayi: bunene ya Yehova mpe kunwanina nkumbu ya yandi. Beto batemwe ya Yehova, beto ke zolá mingi kuzonzila bima zole yayi. Mpe samu na bunene ya Nzambi, mpe kusukula nkumbu ya yandi ke bima yina ke kwelaná.
2 Beto nyonso me zaba ti, beto me lunga kukatula salete yina ba losá na nkumbu ya Nzambi. Beto longoká mpe ti faso Yehova ke yalá me lutila mbote na nyonso. Beto zolá tula ntima mpe dikebi na bima zole yayi.
3. Yinki zola zonza kuzonzila nkumbu ya Yehova?
3 Beto zaba ti, si beto me zonzila nkumbu ya Nzambi, beto me zonzila mpe faso ya yandi ya kuyala. Na yawu, si beto me zonza ti kusukula nkumbu ya Yehova ke kima yina me lutila nene, beto ke na zonzá mpe ti, beto me ndima na kulakisa ti faso ya kuyala ya Yehova me lutila mbote. Nkumbu ya Yehova, Mfumu yina me lutila nene, ke ya kukwelana na faso ya yandi ya kuyala.—Tala tablo “ Yinki ke na kati ya kyuvu ya nene.”
4. Nkunga 135:13 ke zonzá yinki na nkumbu ya Nzambi, mpe na wapi byuvu beto ke kuzwa bamvutu na artikle yayi?
4 Nkumbu ya Yehova ke ve faso bankumbu ya nkaka. (Tanga Nkunga 135:13.) Samu na yinki? Wa faso mpe wapi mbala ya ntete yina ba losá salete na nkumbu ya Nzambi? Wa’ faso Nzambi ke na sukulak’ yawu? Mpe wa’ faso beto lenda nwanina nkumbu ya yandi? Beto ke kuzwa bamvutu na byuvu yayi.
NKUMBU KE KWANDI MFUNU?
5. Yinki bantu mingi ke yufulá ntangu ba ke kuwá ti “Nkumbu ya nge vanda santu”?
5 “Nkumbu ya nge vanda santu.” (Mat. 6:9) Yesu zonzá ti ya ke kima ya ntete yina beto zolá lomba ntangu beto ke sambilaka. Kasi, yinki Yesu zolá zonza? Kukumisa kima santu zola zonza kukatula yawu salete to kusukula yawu. Bantu mingi lenda zonza: Nkumbu ya Yehova ke ve salete, samu na yinki kusosa kusukula yawu? Na kuzwa mvutu, beto sosa kuzaba ntete yinki nkumbu lenda longa beto.
6. Yinki ke salá ti nkumbu vanda na valere?
6 Nkumbu ke ve kaka mot yina bantu lenda sonika na papiye, to yina bantu lenda bokila, kasi tala yina Biblia ke longá: “Nkumbu ya mbote me lutila kitoko na bimvwama mingi.” (Bin. 22:1; Lon. 7:1) Samu na yinki nkumbu ke na valere mingi? Samu ti nkumbu ke lakisá faso bantu ya nkaka ke tadilá muntu ya kuzwa yawu. Na yawu, faso bantu ke soniká to ke bokilá nkumbu ke ve mambu, kasi ni yina ya ke salá bantu na ntima to yina ba ke kanisá, ntangu ba ke kuwá to ke tangá nkumbu yango.
7. Wa faso ba bebisá nkumbu ya Nzambi?
7 Ntangu bantu ke zonzá luvunu na nkumbu ya Yehova, ba ke bebisá faso bantu zolá tadila yawu; mpe ntangu bantu ke ndimá luvunu yina, ya ke natá bawu na kufinga Nzambi mpe na kulosa salete na nkumbu ya yandi. Mbala ya ntete yina ba losá salete na nkumbu ya Nzambi ke ni na Jardin d’Éden. Beto tala yinki beto lenda longoka na faso ba bebisá nkumbu ya Nzambi.
FASO MPE MBALA YA NTETE YINA BA LOSÁ SALETE NA NKUMBU YA NZAMBI
8. Yinki Adam na Eve zabá, mpe wapi byuvu beto lenda yufula?
8 Adam na Eve zabá ti nkumbu ya Nzambi ke Yehova, mpe ba zabá dyaka mambu mingi yina me tadila Nzambi. Ba zabá ti ni yandi yidiká bawu, ni yandi pesá bawu luzingu, mpe paradis, kisika ya kitoko yina ba vandá zinga, mpe ni yandi kwelisá bawu. (Kub. 1:26-28; 2:18) Kasi, ba zolá sadila kwandi mayela ya bawu na kukanisa ntangu nyonso na bima ya mbote yina Yehova salá samu na bawu? Ba zolá kontinye kwandi na kukulisa luzolo ya bawu mpe na kuvutula matondo na Yehova? Bamvutu na byuvu yayi zabaná pwelele ntangu enemi ya Nzambi meká bawu.
9. Faso me zonza Kubanda 2:16, 17; 3:1-5, wapi musiku Yehova pesá na Adam na Eve, mpe yinki natá bawu na kukanisa yimbi na nkumbu ya Yehova?
9 Tanga Kubanda 2:16, 17; 3:1-5. Satan sadilá nyoka samu na kuyufula Eve kyuvu yayi: “Nzambi zonzá kwandi ti beno kudya ve bambuma ya bayinti nyonso yina ke na [kati] ya jardin?” Kyuvu yayi vandá bumba luvunu yina losá salete na nkumbu ya Nzambi. Ya natá Eve na kukanisa mambu ya yimbi na nkumbu ya Nzambi. Nzambi zonzá na bawu na kudya bambuma ya bayinti nyonso, kasi yandi niminá bawu kaka bambuma ya yinti mosi. Adam na Eve vandá na bambuma ya bayinti mingi ya kudya. (Kub. 2:9) Ntembe ve, Yehova ke kabulaka. Nzambi niminá Adam na Eve kaka bambuma ya yinti mosi. Kasi kyuvu ya Satan yayi tengimisá tsyeleka ya musiku yina Yehova pesá bawu. Satan natá bawu na kukanisa ti Nzambi ke na munimi. Ntangu ya nkaka, Eve kanisá, ‘Ya lenda vanda na kima yina Yehova ke na niminá beto?’
10. Wa’ faso Satan losá salete na nkumbu ya Nzambi, mpe wapi mbuma ya butaka?
10 Ntangu Satan yufulá kyuvu yina, Eve vandá landa ntete musiku ya Yehova. Yandi zonzá na Satan musiku yango faso Yehova pesilak’ yawu. Eve bwelá dyaka, ata kusimba ya mpamba, beto lenda simba ve yawu. Eve zabá ti, si yandi landa ve musiku yina, yandi ke kufwa. Kasi Satan vutulá: “Beno ke kufwa ve.” (Kub. 3:2-4) Satan zonzá ve kaka ti Yehova vuná bawu. Kasi, Yehova ke muntu ya luvunu. Ni faso yina ange yayi kumá Dyabulu, to muntu ya luvunu. Satan vuná Eve mbala mosi, mpe Eve ndimá luvunu ya yandi. (1Tim. 2:14) Eve kwikilá na mambu yina satan zonzá na yandi kulutila yina Yehova zonzá na yandi. Ni yawu natá Eve na kuzwa desizion ya kulutila yimbi. Yandi mangá na kulanda musiku ya Yehova. Mpe yandi kudya mbuma yina Yehova niminak’ yandi na kudya. Na manima, yandi pesá ndambu na Adam.—Kub. 3:6.
11. Yinki Adam na Eve zolá sala, mpe yinki ba lembaná na kusala?
11 Kanisa fioti na yina Eve zolá zonza na Satan. Kanisa ntete, si Eve zonzá faso yayi: “Mu me zaba ve nani nge kele, mu zaba Tata ya munu, Yehova, yina mu ke tulá ntima. Yandi pesá beto na Adam bima nyonso yina beto ke na yawu nsatu. Wa’ faso, nge lenda kuzwa kuraje ya kuzonza mambu ya faso yayi na nkumbu ya yandi. Katuka kuna!” Kanisa na kilengi yina ya zolá sala Yehova, na kuwa faso mwana ya yandi ke lakisá ti na luzolo nyonso yandi ke ya kukangama na yandi! (Bin. 27:11) Kasi Eve vandá ve na luzolo ya kukangama na Yehova; bakala ya yandi Adam mpe vandá ve na luzolo ya faso yina. Samu ba vandá ve na luzolo ya ngolo na Tata ya bawu, Adam na Eve lembaná na kunwanina Yehova, ntangu Satan zonzá luvuvu na nkumbu ya yandi.
12. Wa’ faso Satan kotisá ntembe na ntima ya Eve, mpe yinki Adam na Eve lembaná na kusala?
12 Faso beto talak’ yawu, Satan bandá na kukotisa ntembe na ntima ya Eve. Yandi natá Eve na kukanisa ti Yehova ke ve Tata ya luzolo, mpe Satan losá salete na nkumbu ya Yehova. Kasi Adam na Eve lembaná na kunwanina nkumbu ya Yehova na mantwala ya Satan, yina zonzá luvunu na nkumbu ya Yehova. Bawu mosi solá na kuwa luvunu ya Satan, mpe kubalukila Tata ya bawu. Bubu yayi mpe, Satan ke kaka na sadilá luvunu ya faso yina. Yandi ke bebisá nkumbu ya Yehova ntangu yandi ke losá salete na zulu ya yawu. Mpe ya ke ve mpasi na ba yina ke ndimá luvunu ya satan na kubika banzila ya mbote ya Yehova.
YEHOVA KE NA SUKULÁ NKUMBU YA YANDI
13. Faso me lakisa Ezekiele 36:23, yinki Biblia ke zonzá na bunkufi?
13 Yehova salá kwandi kima na kunwanina nkumbu ya yandi na luvunu ya faso yina? Ee, tii bubu yayi yandi ke salá kima! Biblia nyonso ke na zonzilá yinki Yehova ke na salá na kusukula nkumbu ya yandi yina ba bebisá na Jardin d’Éden. (Kub. 3:15) Na bunkufi, Biblia nyonso ke zonzá mambu yayi: Yehova ke na sadilá Kimfumu yina mwana ya yandi ke na yalá samu na kusukula nkumbu ya yandi, mpe kuvutula mambu ya mbote mpe kizunu na zulu ya ntoto. Biblia ke zonzilá bamambu yina lenda sadisa beto na kuzaba faso Yehova ke na sukulá nkumbu ya yandi.—Tanga Ezekiele 36:23.
14. Wa’ faso mvutu yina Yehova pesá na mambu yina lutá na Jardin d’Éden ke sukulá nkumbu ya yandi?
14 Satan ke na salá nyonso na kukanga Yehova nzila ya kulungisa dikanisi ya yandi. Kasi, yandi ke na lendá ve. Biblia ke na lakisá yinki Yehova salá, samu na kulakisa ti yandi ke kaka Tata ya luzolo, mpe Mfumu yina me lutila mbote. Ya tsyeleka, yintu ngolo ya Satan na ba yina landak’ yandi, salá mpasi mingi na ntima ya Yehova. (Nku. 78:40) Yehova bakilá bisombolo yayi na mayela nyonso, na ntima ya yinda, mpe na faso ya kulunga. Yehova lakisá na bafaso mingi ti yandi ke Nzambi ya Kulutila-Ngolo. Yina me lutila nyonso ke ni luzolo yina Yehova ke lakisá na nyonso yina yandi ke salá. (1 Yoa. 4:8) Yehova ke lemba ata fioti ve na kusukula nkumbu ya yandi.
Satan zonzá luvunu na nkumbu ya Yehova, mpe tii bubu yayi, yandi ke kaka na losá salete na nkumbu ya Nzambi (Tala baparagrafe 9-10, 15) *
15. Wa’ faso Satan ke na losá salete na nkumbu ya Nzambi bubu yayi, mpe wapi bambuma ya ke na butaka?
15 Tii bubu yayi, Satan ke kaka na losá salete na nkumbu ya Nzambi. Yandi ke natá bantu na kusala ntembe ti Yehova ke na ngolo, ke muntu ya mbote, ke na mayela, mpe ke na luzolo. Na kifwani, Satan ke natá bantu na kundima ti, ni Yehova ve yidiká bima nyonso. Mpe si bantu me ndima ti Nzambi kele, yandi ke nata bawu na kukanisa ti misiku ya Nzambi ke ngolo mpe ya kutengama. Satan ke longá bantu ti Yehova ke muntu ya yimbi, ke na ntima ngolo, ti yandi ke yoká bantu na dibenga ya tiya. Ntangu bantu ke kwikilá na luvunu ya faso yayi, ya ke kumá dyaka ve mpasi na bawu na kulosa misiku ya Yehova. Tii ntangu Yehova ke kufwa yandi, Satan ke lemba ve na kulosa salete na nkumbu ya Yehova, mpe na kusosa kunata nge mpe na kubalukila Yehova. Kasi yandi ke lenda?
YINKI NGE ME BONGA NA KUSALA SAMU NA KUPESA MVUTU NA KYUVU YAYI
16. Wa’ faso nge lenda sala yina Adam na Eve lembaná na kusala?
16 Yehova me pesa nzila na bantu ya masumu na kusukula nkumbu ya yandi. Na yawu, nge lenda sala yina Adam na Eve lembaná na kusala. Ata beto ke na zingá na yinza yina bantu mingi ke na fingá mpe ke na losá salete na nkumbu ya Yehova, nge ke na bweso ya kutelama samu na kunwanina nkumbu ya Yehova, mpe ya kuzonza na bantu ti yandi ke santu, yandi ke ya kulunga, yandi ke mbote mpe na luzolo. (Iza. 29:23) Nge lenda lakisa ti nge zola Yehova vanda mfumu ya nge. Nge lenda sadisa bantu na kuzaba ti kaka ni Yehova lenda yala na faso ya mbote, mpe kaka faso ya yandi ya kuyala lenda natina kizunu mpe kilengi na bantu, mpe na bima nyonso yina yandi yidikaka.—Nku. 37:9, 37; 146:5, 6, 10.
17. Na wa’ faso Yesu lakisá bantu nkumbu ya Tata ya yandi?
17 Beto ke landá kifwani ya Yesu ntangu beto ke nwaniná nkumbu ya Yehova. (Yoa. 17:26.) Yesu suká ve kaka na kulakisa bantu nkumbu ya Yehova, kasi yandi sadisá mpe bantu na kuzaba mbote-mbote nani Yehova kele. Na kifwani, yandi mangá pwelele malongi ya bafarizien yina vandá basisa Yehova faso muntu ya ntima ngolo, yina ke lombá beto bima yina beto lenda sala ve, muntu yina ke ntama na beto, mpe muntu yina ke tondá ve. Yesu sadisá bantu na kubakila Tata ya yandi faso muntu yina ke lombá ve bima yina me lutila ngolo ya beto, muntu yina ke na ntima ya yinda, yina ke na luzolo mpe muntu yina ke lemvokilaka. Yesu sadisá mpe bantu na kuzaba Tata ya yandi, na faso ya mbote yina yandi landá bifu ya Yehova na luzingu ya yandi.—Yoa. 14:9.
18. Yinki beto lenda sala na kulakisa ti mambu yina ba zonzá na nkumbu ya Yehova ke luvunu?
18 Faso Yesu, beto mpe lenda lakisa na bantu ti Yehova ke tata ya luzolo yina ke na ntima ya mbote. Ntangu beto ke salá faso yina, beto ke sukulá nkumbu ya Yehova, na luvunu mpe na salete yina ba losilak’ yawu; beto ke kumisak’ yawu santu na makanisi mpe na bantima ya bantu. Beto mpe lenda landa kifwani ya Yehova. Ata beto vanda bantu ya masumu, beto lenda sala yawu. (Ef. 5:1, 2) Beto ke kumisá nkumbu ya Yehova santu, na ndyatulu mpe na nzonzolo ya beto ya mbote. Beto ke nwaniná nkumbu ya Nzambi, ntangu beto ke sadisá bantu na kukatula makanisi ya yimbi yina ba ke na yawu na Nzambi. * Beto ke lakisá mpe ti bantu ya masumu lenda vanda ya kukangama na Nzambi.—Yobi 27:5.
Beto zolá sadisa ba yina ke longoká Biblia na beto na kuzaba ti Yehova ke muntu ya mbote yina ke na luzolo (Tala baparagrapfe 18-19) *
19. Wa’ faso Izaya 63:7 ke na sadisá beto na kuzaba kima ya ntete yina beto zolá longa?
19 Ya ke na bima ya nkaka, yina beto lenda sala na kusukula nkumbu ya Yehova. Ntangu beto ke longá bantu Biblia, beto ke zonzilá mingi-mingi bunene ya Nzambi, ti kaka Yehova me bonga na kuyala zulu na ntoto, mpe ata muntu lenda sala ntembe na yawu. Beto zaba ti ya ke mbote na kulonga bantu misiku ya Nzambi, kasi kima ya ntete yina beto zolá sala, ni kusadisa bantu na kuzola Yehova, Tata ya beto, mpe kuvanda ya kukangama na yandi. Beto ke na nsatu ya kuzonzila mingi bifu ya mbote ya Yehova, mpe ya kulakisa wa’ faso ya muntu Yehova kele. (Tanga Izaya 63:7.) Ntangu beto ke longá faso yina, beto ke sadisá bantu ya nkaka na kuzola Yehova, na kulanda misiku ya yandi, samu ti ba ke na nsatu ya kuvanda ya kukangama na yandi.
20. Yinki beto ke zonzila na artikle yina ke landa?
20 Kasi, wa’ faso ndyatulu ya beto mpe faso ya beto ya kulonga ke sadisa bantu ya nkaka na kubakila nkumbu ya Yehova na faso mosi ya mbote, mpe na kuvanda pene-pene na yandi? Artikle yina ke landa ke pesa mvutu na kyuvu yayi.
NZIMBU 2 Ton nom est Jéhovah
^ par. 5 Wapi kyuvu ke mfunu na bantu mpe na ba-ange? Samu na yinki ya ke mfunu mpe samu na yinki ya me tala beto? Kuzwa bamvutu na byuvu yayi ke sadisa beto na kukulisa kindiku ya beto na Yehova.
^ par. 18 Bantangu ya nkaka, beto vandá zonza na mikanda ya beto ti, nkumbu ya Nzambi ke ve na nsatu ba “nwanina yawu”. Samu na yinki? Samu ti, ya ke na ata muntu yina me zonza ti Nzambi me bonga ve kuvanda na nkumbu Yehova. Kasi na Assemblée Générale ya 2017, beto kuzwá malongi ya malu-malu yina me change faso ya beto ya kutadila. Ntwadisi ya Assemblée zonzá: “Ya ke ve yimbi na kuzonza ti beto zolá sambila samu na kunwanina nkumbu ya Yehova. Ni nsangu ya yimbi yina me mwangana na nkumbu ya yandi, ke nata beto na kunwanina yawu.”—Tala emision ya janvier 2018 na JW.org®. Kota na BIBLIOTEK > JW TÉLÉDIFFUSION®.
^ par. 62 YINA BAFOTO KE NA ZONZILAKA: Satan losá salete na nkumbu ya Nzambi ntangu yandi zonza na Eve ti Nzambi ke muntu ya luvunu. Bamvula mingi me luta, Satan ke kaka na mwangisa luvunu ntangu yandi ke longá ti Yehova ke na ntima ngolo, ni Yehova ve yidika bantu.
^ par. 64 YINA BAFOTO KE NA ZONZILAKA: Ntangu yandi ke na longá Biblia na muntu, mpangi mosi ya bakala ke na zonzilá bifu ya mbote ya Yehova.
