1-2. Yininke musinke ya kara nomulyo koNombangi daJehova?

KOSILI sininke simwe esi sina kara nomulyo naina kwetu. Aso kuna kara kupongora edina lyaKarunga ntani nokulikida asi upangeli wendi yiwo wouwa po. NgoNombangi daJehova, ose kwa hara kuzogera yininke oyo. Nye kupongora edina lyaKarunga ntani nokulikida asi upangeli wendi yiwo wouwa po, kapi ya lisiga nawa-nawa.

² Natuvenye twa yi dimburura asi edina lyaKarunga va hepa kulipongora. Ntani twa lironga hena asi vantu va hepa kuyilikida asi upangeli waJehova yiwo wouwa po. Yininke nayinye oyo yivali, mulyo unene kwetu.

3. Yisinke ya hamena mo medina lyaKarunga?

³ Edina Jehova, kututantera yininke yoyinzi kuhamena Karunga, kukwatera mo nkedi zendi zokupangera. Yipo nye, nsene tu tanta asi tuna hara kupongora edina lyaKarunga, eyi kutanta hena asi ose tuna hara kulikida asi nkedi zendi zokupangera yizo zongwa po. Edina Jehova, kwa likwatakana nomonkedi omu a pangere.—Tara kakende “ Eyi ya hamena mo mokupongora edina lyaKarunga.”

4. Yisinke azi uyunga Episarome 135:13, kuhamena edina lyaKarunga ntani mapuro musinke natu ka limburura mosirongwa esi?

⁴ Edina lyaKarunga kwa likarera. (Resa Episarome 135:13.) Morwasinke edina lyaKarunga lya karera nomulyo? Ngapi omu va li nyatekere? Ngapi omu Karunga a pongora edina lyendi? Ntani ngapi omu natu pongora edina lyaKarunga? Tu zeni tu ka zogere mapuro ogo.

5. Yisinke ava lipura vamwe apa ava zuvhu asi edina lyaKarunga va hepa kulipongora?

⁵ “Edina lyoge ava li pongore.” (Mat. 6:9) Jesus kwa uyungire asi esi kuna kara sininke somulyo twa hepa kutumbura momakanderero getu. Nye yisinke ga tembe Jesus apa ga uyungire nonkango odo? Kupongora sininke kutanta asi kusininka sikare sina zere. Nye vamwe kuvhura va lipure asi ‘edina lyaKarunga nani kapisi lyapongoka ntani kwa zera ndi?’ Mokugwana elimbururo, twa hepa kugazadara ko eyi ya hamena mo medina lyomuntu.

6. Yisinke ayi ninkisa edina li kare nomulyo?

⁶ Yinzi ya hamena mo medina lyomuntu kupitakana tupu kulitumbura ndi kulitjanga posipepa. Bibeli kutanta asi: “Edina lya fumana lya pitakana emona lyenzi.” (Yis. 22:1; Muud. 7:1) Morwasinke edina lya karera nomulyo gwangoso? Morwa edina lyomuntu kwa hamena mo eyi ava gazara wopeke kuhamena muntu ogu ga kara nedina olyo. Yipo nye, monkedi omu ava li tjanga nomu ava litumbura, kapisi yiyo ya kara nomulyo po, nye yomulyo po kuna kara eyi ava gazara vantu apa ava mono ndi ava zuvhu edina olyo.

7. Ngapi omu vantu va nyateka edina lyaKarunga?

⁷ Apa vantu ava uyunga yimpempa kuhamena Jehova, awo kuninkisa wopeke va gazare yininke yoyidona kuhamena Jehova. Ntani ayo kunyatekesa edina lyendi. Satana yige ga hovere kuuyunga yimpempa kuhamena Jehova kutundilira mosipata saEdeni. Koneka eyi natu lirongera ko kweyi ga uyungire Satana.

8. Yisinke va divire oAdamu naEva, ntani mapuro musinke ayi retesa po?

⁸ Adamu naEva va divire asi edina lyaKarunga yilyo Jehova ntani va divire yininke yoyinzi kumuhamena. Awo va yi divire asi Jehova yige ga va sita ntani yige ga va pa eparu nembo lyewa lyoParadisa ntani nomulikwali gokusikilira mo. (Gen. 1:26-28; 2:18) Nye awo va twikilire kugazadara ko koyininke eyi ga va ruganena Jehova ndi? Awo va twikilire kuhara Jehova nokulikida rupandu kwendi ndi? Eyi va rugene apa za va hetekere nkore zaKarunga, kwa likidire eyi ya kere momutjima gwawo.

9. Kuliza naGenesis 2:16, 17 ntani 3:1-5, yisinke ga tanterere Jehova valikwali wokuhova ntani ngapi Satana ga va ninkisire va gazare yininke yoyidona kuhamena Jehova?

 ⁹ Resa Genesis 2:16, 17 ntani 3:1-5. Satana kwa ruganesere ezoka mokupura Eva asi: “Enye sili Karunga ga mu tantera asi walye omu li yiyimwa yokoyitji eyi ya kara mosikunino ndi?” Epuro eli ga pulire Satana Eva, kwa kere mo yimpempa kuhamena Karunga. Ntani ayo kwa ninkisire Eva a gazare yininke yoyidona kuhamena Karunga. Karunga kwa pere Adamu naEva yitji yenyango lyokulisiga-siga. (Gen. 2:9) Yosili, Jehova age Karunga gougavi. Nye age kwa pangerere Adamu naEva va dire kulya kositji simwe tupu. Yimpempa yaSatana kwa va ninkisire va gazare asi Jehova kapisi Karunga gougavi. Eva nampo kwa gazarere asi Karunga nampo kwa va horekera yininke yoyiwa.

10. Ngapi omu Satana ga nyatekere edina lyaKarunga ntani yitundwamo musinke yakere?

¹⁰ Eva kwa kere mulimburukwi apa Satana ga mu pulire epuro. Age kwa tanterere Satana eyi ga va tanterere Jehova. Age kwa tente hena asi awo kapi vava pulisilire nampili kuguma kositji oso. Eva ga yi divire asi Karunga kwa va tanterere asi nsene va dira kulimburukwa awo nga va fa. Nye Satana kwa tanterere Eva asi: “Ndangako asi ngomu fe one.” (Gen. 3:2-4) Apa Satana ga uyungire nonkango odo, age kwa nyatekere edina lyaKarunga. Ntani age kwa tanterere Eva asi Karunga munayimpempa. Eyi kwa ninkisire Satana a kare muzonaguli ndi munayimpempa. Eva kwa mu kumbagerere ntani age kwa pulire eyi ga uyungire Satana. (1 Tim. 2:14) Age kwa huguvarere Satana kupitakana Jehova. Ano eyi yiyo ya mu ninkisire a ture po etokoro lyedona. Age kwa tokwere kudira kulimburukwa Jehova. Makura yipo ga lire kenyango eli ga va silikire Karunga. Ano konyima, Eva kwa pere ko Adamu enyango.—Gen. 3:6.

11. Yisinke ngano va rugene oAdamu naEva?

¹¹ Gazara kuhamena eyi ngano Eva ga tanterere Satana. Ngano yige gumwe, age ngano kwa tente asi: “Ame kapi na ku diva, nye na diva Otate Jehova ntani ame kwa va hara nokuvahuguvara. Awo kwa tu pa nayinye eyi twa kara nayo. Nyove yilye nye o ka va rundire? Zende kwi!” Jehova ngano ga hefe pokuzuvha nonkango odo kuna kudiuyunga munwendi ogu ga here. (Yis. 27:11) Nye Adamu naEva, kapi va here Jehova. Mokumona asi awo kapi va here Jehova, awo kapi ya va tompokere mokupopera edina lyaJehova va dire kulinyateka.

12. Ngapi omu Satana ga pukisire Eva ntani yisinke va dilire kurugana o Adamu naEva?

¹² Ngomu tuna yi zogere, Satana kwa ninkisire Eva a tameke kukara nomagazaro gepuko kuhamena Jehova. Apa Satana ga yi rugene oyo, age kwa nyatekesere edina lyaJehova. Adamu naEva, kapi va poperere edina lyaJehova yipo a dire kulinyateka  Satana. Awo kwa purakenene eyi ga va tanterere Satana va dire kulimburukwa Guhyawo. Satana kuna kurugana yininke yokulifana neina. Age kuuyunga yininke yoyimpempa kuhamena Jehova ntani nokunyatekesa edina lyendi. Vantu ava ava purakene yimpempa yaSatana, kuvaninkisa va dire kulimburukwa Jehova.

13. Ngapi omu Hesekiyeli 36:23, azi tu vatere tu kwate egano mbudi ezi za kara moBibeli?

¹³ Jehova kutarerera vantu va nyateke edina lyendi ga hana kurugana ko yuma ndi? Hawe! Bibeli kututantera eyi ga rugana Jehova, yipo a zerese edina lyendi koyimpempa eyi ga uyungire Satana mosikunino saEdeni. (Gen. 3:15) Ayo kumoneka asi ezi yizo mbudi za kara moBibeli: Azo kututantera omu Jehova nga ka pongora edina lyendi kupitira moUhompa ou a pangere Munwendi ntani nokukaretesa po uhungami nombili pevhu. MoBibeli mwa kara mauzera aga aga tu vatere tu kwate egano omu Jehova nga ka pongora edina lyendi.—Resa Hesekiyeli 36:23.

14. Ngapi eyi ga rugana Jehova kutunda apa va mu rwanesere mosikunino saEdeni ya pongora edina lyendi?

¹⁴ Satana kwa kondja unene mokuninkisa Jehova yipo a dire kusikisa mo sitambo sendi. Nye ayo kapi ya mu tompoka. Bibeli kulikida eyi ga rugana Jehova ntani azo kulikida hena asi Jehova yige Guhya geharo ntani mupangeli po gomuwa. Eyi ga rugana Satana nava ava mukwatesa ko, kwa koresa unene Jehova komutjima. (Epis. 78:40) Nye eyi ga rugana Jehova kwa likida asi age ga kara nounongo, nelididimiko ntani nouhungami. Ntani age kwa yi likida mononkedi dokulisiga-siga asi age ga kara nononkondo. Nye unene po age kwa likida eharo mwanayinye eyi ga rugana. (1 Joh. 4:8) Jehova kwa twikira kurugana unene yipo a pongore edina lyendi.

15. Ngapi omu Satana ana kunyateka edina lyaKarunga naina ntani yisinke sitambo sendi?

¹⁵ Satana simpe kuna kutwikira kunyateka edina lyaJehova naina. Age kuninkisa  vantu va dire kupura asi Jehova ga kara nononkondo, nounongo ntani age Guhya geharo. Pasihonena age kuninkisa vantu va pure asi Karunga kapisi yige ga sita yininke. Ntani apa vantu ava pura asi Karunga yipo ga kara, Satana kuhetekera ko kuvaninkisa va gazare asi nompango daKarunga udigu kudilimburukwa. Ntani age kuronga vantu asi Karunga kwato nkenda ntani kuhwika vantu momundiro gwanarunye. Apa vantu ava pura yimpempa oyo, ayo kuvaninkisa va dire kutambura upangeli waJehova. Posiruwo esi Satana vana dili kumuzonagura po, age nga twikira kunyateka edina lyaJehova ntani nga kondja a kuninkise o sige Jehova. Ayo nga yi mu tompoka ndi?

16. Yisinke no rugana eyi va dilire kurugana oAdamu naEva?

¹⁶ Jehova kwa gava mpito kovantu wokudira kusikilira mo yipo va mu vatere mokupongora edina lyendi. Yipo nye, ose kuvhura tu rugane eyi va dilire kurugana oAdamu naEva. Nampili ngomu twa kara mouzuni ou wa zura vantu ava ava nyateke edina lyaKarunga, ose kuvhura tu popere edina lyendi pokutantera vantu asi Jehova ga pongoka, age kwa hara uhungami, muwa ntani ga tu hara. (Jes. 29:23) Ove kuvhura o yi likide asi ono hara Jehova a kare mupangeli goge. Ove kuvhura o vatere vantu va kwate egano asi upangeli waJehova yiwo wouwa po ntani yiwo welike ngau reta mbili noruhafo.—Epis. 37:9, 37; 146:5, 6, 10.

17. Ngapi omu Jesus ga divisire edina lyaKarunga?

¹⁷ Apa atu popere edina lyaKarunga, ose kuhonena Jesus Kristusa. (Joh. 17:26) Jesus kwa divisire edina lyoGuhwe pokuliruganesa ntani apa ga rongere vantu kuhamena Jehova. Pasihonena age kwa lisigire noVafalisayi ava va likidire asi Jehova kwato nkenda ntani kwa likara ure novantu. Jesus kwa vaterere vantu va dimburure asi Jehova kwa kara nelididimiko, age kwa va hara ntani kuvagusira po nonzo dawo. Jesus kwa vaterere vantu va dive Jehova kupitira monkedi omu nga honene yikara yoGuhwe.—Joh. 14:9.

18. Yisinke natu rugana mokuyilikida asi yininke yoyidona eyi ava uyunga vantu kuhamena Jehova kapisi usili?

¹⁸ Ngwendi Jesus, nose kuvhura tu tantere vantu eyi twa diva kuhamena  Jehova. Kuvhura tu va ronge asi age Karunga geharo ntani gonkenda. Nsene tu yi rugana oyo, ose ngatu likida asi yininke yoyidona eyi ava uyunga vantu kuhamena Jehova kapisi usili. Ntani ngatu vatera vantu va dimburure asi Jehova kwa pongoka. Nampili ngomu twa dira kusikilira mo, nose kuvhura hena tu honene Jehova. (Efe. 5:1, 2) Nsene tu likida vantu omu ga kara Jehova kupitira mononkango detu nomoyirugana yetu, ose nga tu pongora edina lyaKarunga nokulizeresa. Ose hena kupongora edina lyaKarunga apa atu vatere vantu va dive usili kuhamena Karunga. * Ose kuvhura kuyilikida hena asi vantu wokudira kusikilira mo kuvhura kulimburukwa Jehova.—Joba. 27:5.

19. Kuliza naJesaya 63:7, sitambo musinke natu kara naso ngomu tuna kuronga vantu Bibeli?

¹⁹ Koyili yimwe eyi twa hepa kurugana yipo tu pongore edina lyaKarunga. Apa atu rongo vantu Bibeli, ose kudemenena mokulikida asi Jehova yige mupangeli po gouhunga. Ayo kuna kara usili. Nampili ngomu ya kara nomulyo kuronga wopeke nompango daKarunga, nye sitambo setu sosinene po kuna kara sokuvatera wopeke va hare Guhyetu gemeguru nokumulimburukwa. Yipo nye, nsene kuna kuronga wopeke kuhamena Jehova, ya kara nomulyo tu demenene koyikara yendi yipo wopeke va dive asi age muntu musinke. (Resa Jesaya 63:7.) Nsene tu ronga vantu monkedi zangoso, ose ngatu va vatera va hare Jehova ntani nokukara neharo lyokumulimburukwa.

20. Yisinke ngatu ka zogera mosirongwa sokukwama ko?

²⁰ Ngapi omu natu vatera wopeke yipo va gazare yininke yoyiwa kuhamena Jehova, kupitira monkedi omu atu paruka ntani nomonkedi omu atu rongo? Sirongwa sokukwama ko ngasi ka gava elimbururo kepuro olyo.