1-2. Yaˬhoˉvaˬ ve Shaˉhkiˆhkanˍ ve chaw awˬ pon a yeˇ uiˍ jaˇ ve aˬ htoꞈ ma le?

 Ngaˬ hui a yeˇ uiˍ jaˇ ve awˬ lawn gʼa hpuˇ chehˇ ve yoˬ. Chi lehˬ Gʼuiˬ sha uˉ peunˍ keunˍ ve a hkaw˗anˬ cawˬ leh Gʼuiˬ sha ve awˬ meh htaꞈ yawˆ yan te piˇ tuˬ gʼa te ve yoˬ. Ngaˬ hui Yaˬhoˉvaˬ ve Shaˉhkiˆhkanˍ ve chaw hpehꞈ ve pa taw, awˬ lawn chi htaꞈ a yeˇ yuˬ ve yoˬ. Yaꞈ hkʼaˇ, Gʼuiˬ sha uˉ peunˍ keunˍ ve a hkaw˗anˬ cawˬ leh, yawˇ ve awˬ meh htaꞈ yawˆ yan te piˇ lawˬ tuˬ ve chi teˇ gʼaˇ teˇ lawn hpehꞈ ve laˇ? Maˇ heˆ.

² Gʼuiˬ sha ve awˬ meh htaꞈ maˇ gʼa nyi cha tuˬ leh yawˇ ve awˬ meh htaꞈ hkʼaˬ htaˆ kaꞈ yawˆ yan te piˇ lawˬ tuˬ ngaˬ hui shiˍ ve yoˬ. Yaˬhoˉvaˬ lehˬ teˇ ceuˬ le le htaꞈ uˉ peunˍ tuˬ a hkaw˗anˬ cawˬ leh yawˇ uˉ peunˍ ve daꞈ jaˇ ve awˬ hkʼaˇ hpehꞈ ve tehꞈ hpeuꞈ maw laˇ ve htaꞈ ngaˬ hui kaꞈ gʼa shiˍ cawˇ ve yoˬ. Chi ve nyiˇ lawn a yeˇ uiˍ jaˇ ve pa taw, ngaˬ hui gʼa na gʼa cawˇ ve yoˬ.

3. Yaˬhoˉvaˬ ve awˬ meh aˬ htoꞈ ma htaꞈ caˉ daꞈ ve le?

³ Awˬ tehˬ kʼo, Yaˬhoˉvaˬ ve awˬ meh lehˬ, yawˇ htaꞈ caˉ daꞈ ve teˇ ceuˬ le le htaꞈ kʼoˆ gaˇ ve yoˬ. Yawˇ ve awˬ meh lehˬ yawˇ uˉ peunˍ ve htaꞈ kaꞈ caˉ daꞈ ve yoˬ. Chi htaꞈ pa taw, yawˇ ve awˬ meh htaꞈ maˇ gʼa nyi cha tuˬ leh hkʼaˬ htaˆ kaꞈ yawˆ yan te piˇ lawˬ tuˬ, chi yawˇ uˉ peunˍ ve daꞈ jaˇ ve awˬ hkʼaˇ hpehꞈ ve tehꞈ hpeuꞈ maw laˇ ve yoˬ. Yaˬhoˉvaˬ ve awˬ meh leh kanˇ paˆ uiˍ jaˇ ve Gʼuiˬ sha uˉ peunˍ ve chi lehˬ, teˇ gʼaˇ teˇ lawn hpehꞈ ve maˇ heˆ.—Awˇ ceˍ awˇ fa “ A yeˇ uiˍ jaˇ ve awˬ lawn aˬ htoꞈ ma htaꞈ caˉ daꞈ ve le?”

4. Chiˇ mvuh ve liꞈ 135:13 hkʼaw Gʼuiˬ sha ve awˬ meh htaꞈ hkʼaˬ hkʼe kʼoˆ taˍ ve le? Awˬ lawn chi ve hkʼaw hkʼawꞈ laˇ hkawˇ aˬ htoꞈ ma cawˬ ve le?

⁴ Yaˬhoˉvaˬ ve awˬ meh lehˬ daꞈ jaˇ. (Chiˇ mvuh ve 135:13 gʼaw sheˍ.) Yaꞈ hkʼaˇ, awˬ meh chi aˬ htoꞈ ma te a yeˇ uiˍ jaˇ ve le teˇ geh nyi sheˍ. Awˬ meh chi awˉ lawˉ teˇ pawˆ htaˇ, hkʼaˬ hkʼe te she pfuhˍ piˇ ve le? Yawˇ ve awˬ meh htaꞈ hkʼaˬ htaˆ kaꞈ yawˆ yan te piˇ lawˬ tuˬ hkʼaˬ hkʼe te ve le? Ngaˬ hui yawˇ ve awˬ meh htaꞈ hkʼaˬ hkʼe te haꞈ shaˉ gʼa tuˬ le? Teˇ geh nyi sheˍ.

5. Gʼuiˬ sha ve awˬ meh htaꞈ caˉ daꞈ ve laiˉ gʼaˇ htawˇ dawˇ nawˬ dawˇ cawˬ ve aˬ htoꞈ ma le?

⁵ Gʼuiˬ sha˗oˬ, “nawˬ ve awˬ meh htaꞈ yawˆ yan te piˇ lawˬ˗oꞈ.” (Maꞈhtehˍ 6:9) Yeˍsuˆ kʼoˆ ve, ngaˬ hui bon lawˬ htaˇ chi a yeˇ uiˍ jaˇ ve pa taw, gʼa kʼoˆ cawˇ ve yoˬ. Yaꞈ hkʼaˇ, yawˇ hkʼaˬ hkʼe kʼoˆ gaˇ ve le? Awˉ lawˉ peuˇ ve tawˇ lehˬ “yawˆ yan te piˇ lawˬ˗oꞈ.” Chi ve tcuhˉ kuiˬ lehˬ daꞈ kehˬ ve htaꞈ kʼoˆ gaˇ ve yoˬ. Laiˉ gʼaˇ htawˇ dawˇ nawˬ dawˇ cawˬ ve, ‘Yaˬhoˉvaˬ ve awˬ meh daꞈ kehˬ˗oˬ ve maˇ heˆ laˇ, aˬ htoꞈ ma te daꞈ kehˬ tuˬ kʼawꞈ te cawˇ ve le?’ Na hkawˇ chi htaꞈ hkʼawꞈ tuˬ, awˬ meh chi aˬ htoꞈ ma htaꞈ caˉ daꞈ ve ngaˬ hui gʼa dawˇ nyi cawˇ ve yoˬ.

6. Awˬ meh a yeˇ uiˍ˗aw laˇ?

⁶ Awˬ meh lehˬ liꞈ mehˆ laiˉ mehˆ pawnˇ daꞈ leh bvuhꞈ leh kʼoˆ tawˆ la ve ceh maˇ heˆ. Chaw teˇ gʼaˇ ve awˬ meꞈ awˬ hponˇ htaꞈ kaꞈ caˉ daꞈ ve yoˬ. Liꞈ hpu hkʼaw kʼoˆ ve, “hpu shi mawˇ jeˬ htaꞈ leuˆ yuˬ tcuh laˇ ve kʼo, daꞈ ve awˬ meh htaꞈ leuˆ yuˬ˗oꞈ.” (Tawˇ naˉ ve 22:1; Cuˇ yiˍ piˇ ve 7:1) Chi htaꞈ pa taw, awˬ meh bvuhꞈ ve leh kʼoˆ tawˆ la ve a yeˇ uiˍ jaˇ ve maˇ heˆ. Awˬ meh oˇ ve htaꞈ mawˬ leh gʼa kaˇ htaˇ, shu hkʼaˬ hkʼe dawˇ ve a yeˇ uiˍ jaˇ.

7. Chaw yaˇ awˉ lawˉ peuˇ teˇ ca Gʼuiˬ sha ve awˬ meh htaꞈ hkʼaˬ hkʼe te luˬ piˇ ve le?

⁷ Chaw yaˇ Yaˬhoˉvaˬ htaꞈ caˉ daꞈ ve heˍ htaˇ, shu Yaˬhoˉvaˬ htaꞈ maˇ daꞈ ve hpawˇ dawˇ tuˬ te ve yoˬ. Chi lehˬ Gʼuiˬ sha ve awˬ meh htaꞈ te luˬ piˇ ve yoˬ. Chaw yaˇ awˉ lawˉ peuˇ ve teˇ ca lehˬ Gʼuiˬ sha ve awˬ meh htaꞈ te luˬ leh she pfuhˍ piˇ ve yoˬ. Awˬ lawn chi ve ngaˬ hui htaꞈ aˬ htoꞈ ma maˍ laˇ ve le? Teˇ geh nyi sheˍ.

8. Aˍdanˍ leh Eˇvaꞈ Gʼuiˬ sha htaꞈ caˉ daꞈ ve aˬ htoꞈ ma shiˍ ve le? Aˬ htoꞈ ma na hkawˇ cawˬ la ve le?

⁸ Aˍdanˍ leh Eˇvaꞈ Gʼuiˬ sha ve awˬ meh Yaˬhoˉvaˬ tehꞈ shiˍ ve yoˬ. Leh yawˇ htaꞈ caˉ daꞈ ve, a yeˇ uiˍ ve awˬ tehˬ ve laiˉ ceuˬ kaꞈ shiˍ ve yoˬ. Yawˇ hpanˍ shehˍ hpaˇ hpehꞈ ve tehꞈ yawˇ hui shiˍ ve yoˬ. A shaꞈ, Paˍraˍdiˇsuˆ hkʼaw daꞈ jaˇ ve yehˬ, biˇ jaˇ ve awˬ ca leh yawˇ hui htaꞈ laiˉ ceuˬ piˇ ve kaꞈ yawˇ hui shiˍ ve yoˬ. (Awˬ hkuiˉ puiˍ 1:26-28; 2:18) Yaˬhoˉvaˬ yawˇ hui awˬ pon te piˇ ve teˇ ceuˬ le le htaꞈ yawˇ hui dawˇ nyi tuˬ laˇ? Yawˇ huiˉ maˬ Yaˬhoˉvaˬ te piˇ ve teˇ ceuˬ le le htaꞈ awˬ hpfuhˇ shiˍ leh yawˇ htaꞈ hkʼaˬ htaˆ kaꞈ haꞈ tuˬ laˇ? Gʼuiˬ sha ve canˇ paˍ yawˇ hui htaꞈ ca lawˇ nyi la htaˇ, oˇ ve teˇ yanˇ awˬ lawn chi htaꞈ caˉ daꞈ ve hkʼawꞈ piˇ ve ngaˬ hui hkʼa tawˍ lehˆ gʼa mawˬ ve yoˬ.

9. Awˬ hkuiˉ puiˍ liꞈ 2:16, 17 leh 3:1-5 hkʼaw kʼoˆ taˍ ve hkʼe, chaw yaˇ awˉ lawˉ teˇ ca htaꞈ Yaˬhoˉvaˬ hkʼaˬ hkʼe kʼoˆ piˇ ve le? Saˍtanˍ awˬ tehˬ ve htaꞈ hkʼaˬ hkʼe faˉ taˍ ve le?

 ⁹ Awˬ hkuiˉ puiˍ liꞈ 2:16, 17 leh 3:1-5 gʼaw sheˍ. Saˍtanˍ vuiˬ htaꞈ cuˇ leh Eˇvaꞈ geh yaw daꞈ tcuh ve yoˬ. Vuiˬ Eˇvaꞈ htaꞈ na piˇ ve, “hko hkʼaw lo cawˬ ve iˉ shiˍ teˇ hpaˍ htaꞈ maˇ gʼa caˇ tehꞈ Gʼuiˬ sha kʼoˆ laˇ taˍ ve laˇ?” Na hkawˇ chi ve lehˬ heˍ ve naˆ tsuhˇ awˬ tawꞈ ma faˉ taˍ ve hkʼe hpehꞈ ve yoˬ. Awˬ tehˬ kʼo, suhˆ cehˬ teˇ cehˬ ve awˬ shiˍ htaꞈ ceh tiˉ Gʼuiˬ sha taˇ caˇ tehꞈ kʼoˆ piˇ taˍ ve yoˬ. Oˇ ve teˇ yanˇ lehˬ yawˇ hui dawˇ cawˇ ve iˉshiˍ laiˉ ceuˬ htaꞈ leuˆ caˇ gʼa ve yoˬ. (Awˬ hkuiˉ puiˍ 2:9) Yaˬhoˉvaˬ lehˬ piˇ gaˇ puiˉ ve Gʼuiˬ sha hpehꞈ ve yoˬ. Yaꞈ hkʼaˇ, Saˍtanˍ lehˬ awˬ tehˬ ve htaꞈ faˉ taˍ ve yoˬ. Yaˬhoˉvaˬ lehˬ maˇ piˇ gaˇ puiˉ ve Gʼuiˬ sha hkʼe hpehꞈ ve tehꞈ Saˍtanˍ kʼoˆ ve yoˬ. Hkʼe te leh Eˇvaꞈ ‘daꞈ ve awˬ ceuˬ Yaˬhoˉvaˬ ngaˬ hui htaꞈ maˇ peꞈ laˇ gaˇ ve cawˬ ve le naˍ?’ tehꞈ htawˇ dawˇ nawˬ dawˇ cawˬ ve yoˬ.

10. Saˍtanˍ Gʼuiˬ sha ve awˬ meh htaꞈ hkʼaˬ hkʼe she pfuhˍ piˇ ve le? Leh hkʼaˬ hkʼe hpehꞈ la ve le?

¹⁰ Awˉ lawˉ htaˇ, Eˇvaꞈ Yaˬhoˉvaˬ hkawˇ na leh uˉ peunˍ shehˍ hpaˇ hpehꞈ ve tehꞈ dawˇ ve yoˬ. Yaˬhoˉvaˬ Eˇvaꞈ htaꞈ hkʼa tawˍ lehˆ kʼoˆ piˇ taˍ ve awˬ lawn Eˇvaꞈ Saˍtanˍ htaꞈ kʼawꞈ kʼoˆ piˇ ve yoˬ. “Ngaˬ huiˉ maˬ lehˬ suhˆ cehˬ oˇ ve htaꞈ htawˇ kaꞈ maˇ htawˇ cawˇ” tehꞈ Eˇvaꞈ kʼoˆ ve yoˬ. Gʼuiˬ sha kʼoˆ laˇ ve htaꞈ maˇ na yuˬ ve kʼo, suh˗e tuˬ ve tehꞈ Eˇvaꞈ shiˍ taˍ ve yoˬ. Yaꞈ hkʼaˇ, Saˍtanˍ kʼoˆ ve, “nawˬ hui maˇ suh taˬ.” (Awˬ hkuiˉ puiˍ 3:2-4) Chi teˇ hkui Saˍtanˍ Eˇvaꞈ htaꞈ Gʼuiˬ sha heˍ ve tehꞈ hteˇ˗ehꞈ kʼoˆ piˇ ve yoˬ. Saˍtanˍ Gʼuiˬ sha ve awˬ meh htaꞈ she pfuhˍ piˇ ve yoˬ. Saˍtanˍ chi hkʼe te ve pa taw, maˇ shawˍ maˇ caˆ kʼoˆ leh she pfuhˍ paˍ hpehꞈ la ve yoˬ. Hkʼe te leh Eˇvaꞈ kaꞈ Saˍtanˍ hkawˇ na ve yoˬ. (1 Tiˆmoˉseˍ 2:14) Eˇvaꞈ lehˬ Yaˬhoˉvaˬ hkawˇ aꞈ kehˉ Saˍtanˍ hkawˇ na ve yoˬ. Yawˇ Yaˬhoˉvaˬ hkawˇ maˇ na leh chi hkʼe dawˇ cheˆ ve yaꞈ jaˇ. Yawˇ Yaˬhoˉvaˬ taˇ caˇ tehꞈ kʼoˆ piˇ ve iˉ shiˍ htaꞈ caˇ leh Aˍdanˍ htaꞈ kaꞈ caˍ piˇ ve yoˬ.—Awˬ hkuiˉ puiˍ 3:6.

11. Aˍdanˍ leh Eˇvaꞈ aˬ htoꞈ ma te cawˇ ve le? Leh yawˇ huiˉ maˬ aˬ htoꞈ ma maˇ te ve le?

¹¹ Awˬ tehˬ kʼo, Eˇvaꞈ hkʼaˬ hkʼe hkʼawꞈ piˇ cawˇ ve le, leh Eˇvaꞈ chi hkʼe kʼoˆ ve kʼo, hkʼaˬ hkʼe hpehꞈ la tuˬ le? Dawˇ nyi sheˍ. “Nawˬ a shu hpehꞈ ve ngaˬ maˇ shiˍ. Yaꞈ hkʼaˇ, ngaˬ ve Awˬ pa Yaˬhoˉvaˬ htaꞈ hkʼa dehꞈ shiˍ ve yoˬ. Ngaˬ Yaˬhoˉvaˬ htaꞈ haꞈ leh gʼaˇ va ve yoˬ. Gʼuiˬ sha lehˬ ngaˬ leh Aˍdanˍ htaꞈ teˇ ceuˬ le le peꞈ laˇ ve yoˬ. Nawˬ ngaˬ ve Awˬ pa htaꞈ aˬ htoꞈ ma te chi hkʼe kʼoˆ haˆ ve le? Kʼai loˬ!” Yaˬhoˉvaˬ ve yaˇ miˇ yawˇ htaꞈ haꞈ leh ka tiꞈ yeˬ ve hkʼaw chi hkʼe kʼoˆ piˇ htaˇ, yawˇ hkʼaˬ hkʼe taw ha lehˬ ve dawˇ nyi sheˍ. (Tawˇ naˉ ve 27:11) Aˍdanˍ leh Eˇvaꞈ Yaˬhoˉvaˬ htaꞈ maˇ haꞈ leh ka tiꞈ maˇ yeˬ. Gʼuiˬ sha ve awˬ meh htaꞈ she pfuhˍ piˇ htaˇ, yawˇ huiˉ maˬ Gʼuiˬ sha ve awˬ meh htaꞈ maˇ haꞈ shaˉ.

12. Saˍtanˍ Eˇvaꞈ htaꞈ htawˇ dawˇ nawˬ dawˇ cawˬ tuˬ aˬ htoꞈ ma te piˇ ve le? Chi Aˍdanˍ leh Eˇvaꞈ aˬ htoꞈ ma maˇ te tuˬ te piˇ ve le?

¹² Eˇvaꞈ htawˇ dawˇ nawˬ dawˇ cawˬ la tuˬ, Saˍtanˍ te piˇ ve htaꞈ ngaˬ hui mawˬ ve yoˬ. Yaˬhoˉvaˬ daꞈ ve Awˬ pa hpehꞈ ve le naˍ tehꞈ, Saˍtanˍ Eˇvaꞈ htaꞈ htawˇ dawˇ nawˬ dawˇ cawˬ tuˬ te piˇ ve yoˬ. Hkʼe te leh Aˍdanˍ leh Eˇvaꞈ Gʼuiˬ sha ve awˬ meh htaꞈ maˇ haꞈ shaˉ. Yawˇ huiˉ maˬ Saˍtanˍ hkawˇ na leh Awˬ pa htaꞈ hpfuhˆ tuˬ sha jaˇ. Chi beuꞈ teˇ co˗e kaꞈ Saˍtanˍ yawˇ yehˇ jaw ve awˬ hkʼaˇ hkʼe yehˇ leh Saˍtanˍ Gʼuiˬ sha ve awˬ meh htaꞈ te luˬ leh she pfuhˍ piˇ ve yoˬ. Saˍtanˍ hkawˇ na ve chaw lehˬ Gʼuiˬ sha uˉ peunˍ ve awˬ hawˉ lo maˇ chehˇ tuˬ sha jaˇ.

13. Yeˍsaˍkeˍlaˆ liꞈ 36:23 hkʼaw, Liꞈ hpu hkʼaw ve awˬ lawn lonˉ maˬ hkʼa tawˍ lehˆ hkʼaˬ hkʼe kʼoˆ laˇ taˍ ve le?

¹³ Yaˬhoˉvaˬ ve awˬ meh htaꞈ she pfuhˍ piˇ ve yawˇ yeunˇ hkanˍ leh taꞈ iˉ chehˇ taˍ ve laˇ? Maˇ heˆ. Yaˬhoˉvaˬ hkʼaˬ hkʼe te tuˬ, yawˇ ve awˬ meh htaꞈ maˇ gʼa nyi cha tuˬ, leh hkʼaˬ htaˆ kaꞈ yawˆ yan te piˇ lawˬ tuˬ, Liꞈ hpu teˇ kʼoˆ hkʼa peu˗eˬ hkʼaw ngaˬ hui htaꞈ kʼoˆ laˇ ve yoˬ. (Awˬ hkuiˉ puiˍ 3:15) Liꞈ hpu teˇ kʼoˆ hkʼa peu˗eˬ hkʼaw awˬ lawn lonˉ ma lehˬ, yawˇ ve Yaˇ uˉ peunˍ ve mvuhˇ miˬ awˬ hawˉ lo Yaˬhoˉvaˬ yawˇ ve awˬ meh htaꞈ yawˆ yan te piˇ lawˬ tuˬ leh, miˬ guiˬ hkʼoˆ ve chaw hkʼa peu˗eˬ dawˇ sha gawˬ lehˍ ve cawˬ tuˬ, leh hteˇ ve cawˇ ve teˇ pawˆ kʼawꞈ cawˬ tuˬ yawˇ te tuˬ yoˬ. Yaˬhoˉvaˬ yawˇ ve awˬ meh htaꞈ hkʼaˬ hkʼe te yawˆ yan te piˇ lawˬ tuˬ Liꞈ hpu hkʼaw ngaˬ hui shiˍ tuˬ kʼoˆ laˇ taˍ ve yoˬ.—Yeˍsaˍkeˍlaˆ 36:23 gʼaw sheˍ.

14. Eˍdenˍ hko hkʼaw hpfuhˆ peuˬ hkʼawꞈ nawˉ Yaˬhoˉvaˬ yawˇ ve awˬ meh htaꞈ yawˆ yan te piˇ lawˬ tuˬ hkʼaˬ hkʼe te ve le?

¹⁴ Yaˬhoˉvaˬ ve a loˍ maˇ biˇ la gʼa tuˬ Saˍtanˍ te gʼa ve hkʼe teˇ ceuˬ le le te ve yoˬ. Yaꞈ hkʼaˇ, te maˇ gʼa. Yaˬhoˉvaˬ hkʼaˬ hkʼe te ve le, leh yawˇ aꞈ kehˉ uiˍ ve maˇ cawˬ tehꞈ Liꞈ hpu hkʼaw hpeuꞈ maw laˇ ve yoˬ. Gʼuiˬ sha lehˬ ngaˬ hui htaꞈ haꞈ leh daꞈ jaˇ ve uˉ peunˍ shehˍ hpaˇ hpehꞈ ve yoˬ. Saˍtanˍ hpfuhˆ ve leh yawˇ hpawˇ chehˇ ve chaw Yaˬhoˉvaˬ nyi ma luˬ tuˬ te piˇ ve yoˬ. (Chiˇ mvuh ve 78:40) Yaꞈ hkʼaˇ, Gʼuiˬ sha lehˬ awˬ lawn chi ve htaꞈ cuˇ yiˍ cawˬ ve, yeunˇ hkanˍ ve, leh hteˇ ve cawˇ ve hkʼaw gu tuˬ yoˬ. Chi hkʼoˆ kaꞈ, Yaˬhoˉvaˬ yawˇ ve kanˇ paˆ uiˍ jaˇ ve tehꞈ laiˉ hpawˇ lo hpeuꞈ maw laˇ sheˍ ve yoˬ. A yeˇ uiˍ jaˇ ve lehˬ Yaˬhoˉvaˬ teˇ ceuˬ le le haꞈ ve hkʼaw te ve tehꞈ hpeuꞈ maw laˇ ve yoˬ. (1 Yoˇhanˬ 4:8) Yaˬhoˉvaˬ yawˇ ve awˬ meh htaꞈ yawˆ yan te piˇ lawˬ tuˬ te ve chi maˇ jehˇ jaw.

15. Chi beuꞈ teˇ co˗e Saˍtanˍ Gʼuiˬ sha ve awˬ meh htaꞈ hkʼaˬ hkʼe she pfuhˍ piˇ ve le? Leh hkʼaˬ hkʼe hpehꞈ la ve le?

¹⁵ Chi beuꞈ teˇ co˗e kaꞈ Saˍtanˍ Gʼuiˬ sha ve awˬ meh htaꞈ she pfuhˍ chehˇ sheˍ. Gʼuiˬ sha lehˬ kanˇ paˆ, hteˇ ve cawˇ ve, cuˇ yiˍ cawˬ leh ngaˬ hui htaꞈ awˬ tehˬ haꞈ ve laˇ, chaw yaˇ htawˇ dawˇ nawˬ dawˇ cawˬ tuˬ Saˍtanˍ heˍ chehˇ sheˍ ve yoˬ. Tawˇ pa haˉ te kʼo, Yaˬhoˉvaˬ hpanˍ shehˍ hpaˇ hpehꞈ ve maˇ heˆ tehꞈ chaw yaˇ yonˍ tuˬ Saˍtanˍ te chehˇ sheˍ. Gʼuiˬ sha cawˬ ve tehꞈ yonˍ ve chaw htawˇ, Gʼuiˬ sha maˇ hteˇ maˇ cawˇ ve tehꞈ yawˇ hui yonˍ tuˬ te piˇ leh Gʼuiˬ sha ve awˬ liˇ awˬ hkʼaˇ gʼaꞈ te tuˬ haˍ jaˇ tehꞈ Saˍtanˍ kʼoˆ ve yoˬ. Yaˬhoˉvaˬ lehˬ haiˬ jaˇ ve Gʼuiˬ sha hpehꞈ leh chaw yaˇ htaꞈ aˬ miˍ buiˬ hpfuh hkʼaw hkanˍ tcuh ve, maˇ ha kʼaˉ puiˉ ve tehꞈ Saˍtanˍ maˍ ve yoˬ.  Saˍtanˍ Yaˬhoˉvaˬ ve awˬ meh htaꞈ luˬ tuˬ te ve chaw yaˇ yonˍ htaˇ, chaw yaˇ kaꞈ Gʼuiˬ sha uˉ peunˍ ve hteˇ ve cawˇ ve htaꞈ maˇ haꞈ yuˬ. Yaˬhoˉvaˬ Saˍtanˍ htaꞈ maˇ te luˬ piˇ sheˍ ve ceh ceh yawˇ htaꞈ she pfuhˍ piˇ leh heˍ chehˇ sheˍ. Nawˬ htaꞈ kaꞈ heˍ laˇ tuˬ yoˬ. Nawˬ Gʼuiˬ sha htaꞈ baˬ taˉ tuˬ Saˍtanˍ coˇ caˇ leh te ve yoˬ. Nawˬ dawˇ kʼo, Saˍtanˍ te gʼa˗aw laˇ?

16. Aˍdanˍ leh Eˇvaꞈ maˇ gʼa te ve awˬ ceuˬ nawˬ aˬ htoꞈ ma gʼa te ve le?

¹⁶ Ngaˬ hui maˇ biˇ ve chaw hpehꞈ ve htawˇ, Yaˬhoˉvaˬ ve awˬ meh htaꞈ yawˆ yan te piˇ lawˬ tuˬ yawˇ te tcuh laˇ ve yoˬ. Aˍdanˍ leh Eˇvaꞈ maˇ gʼa te ve awˬ ceuˬ nawˬ gʼa te ve yoˬ. Miˬ guiˬ chi hkʼoˆ lo Yaˬhoˉvaˬ ve awˬ meh htaꞈ maˇ shawˍ maˇ caˆ kʼoˆ leh she pfuhˍ piˇ ve cawˬ maˇ jaˇ ve htawˇ, Yaˬhoˉvaˬ lehˬ daꞈ jaˇ ve Gʼuiˬ sha hpehꞈ ve, daꞈ kehˬ ve Gʼuiˬ sha hpehꞈ ve, hteˇ ve cawˇ ve Gʼuiˬ sha hpehꞈ ve, leh chaw yaˇ htaꞈ awˬ tehˬ haꞈ ve Gʼuiˬ sha hpehꞈ ve tehꞈ ngaˬ hui shu htaꞈ kʼoˆ maˍ piˇ gʼa ve yoˬ. (Iˉsaˍyaˆ 29:23) Nawˬ Yaˬhoˉvaˬ uˉ peunˍ ve hpawˇ chehˇ leh yawˇ uˉ peunˍ ve daꞈ jaˇ ve leh hteˇ ve cawˇ ve tehꞈ shu shiˍ tuˬ kʼoˆ piˇ ve yoˬ. Chi ve ceh tiˉ dawˇ sha gawˬ lehˍ ve cawˬ tuˬ te laˇ gʼa ve yoˬ.—Chiˇ mvuh ve 37:9, 37; 146:5, 6, 10.

17. Yeˍsuˆ Awˬ pa Yaˬhoˉvaˬ ve awˬ meh htaꞈ shu shiˍ tuˬ hkʼaˬ hkʼe te ve le?

¹⁷ Ngaˬ hui Yaˬhoˉvaˬ ve awˬ meh htaꞈ haꞈ shaˉ htaˇ, Yeˍsuˆ hkʼe gʼaꞈ te chehˇ ve yoˬ. (Yoˇhanˬ 17:26) Yeˍsuˆ Awˬ pa Yaˬhoˉvaˬ ve awˬ meh htaꞈ shu shiˍ tuˬ, awˬ meh ceh yehˇ ve maˇ heˆ. Yaꞈ hkʼaˇ, yawˇ Yaˬhoˉvaˬ ve awˬ meh htaꞈ haꞈ shaˉ leh Yaˬhoˉvaˬ hkʼaˬ hkʼe ve Gʼuiˬ sha hpehꞈ ve shu shiˍ tuˬ kaꞈ maˍ piˇ ve yoˬ. Yaˬhoˉvaˬ lehˬ, chehˇ vuiˇ jaˇ ve, haiˬ jaˇ ve, nyiˉ piˇ jaˇ ve, leh maˇ ha kʼaˉ puiˉ ve Gʼuiˬ sha hpehꞈ ve tehꞈ Hpaˍriˍsehˇ hui kʼoˆ htaˇ, Yeˍsuˆ yawˇ hui geh gʼawˬ daꞈ ve yoˬ. Yaꞈ hkʼaˇ, Yeˍsuˆ ve Awˬ pa awˬ hkʼaˇ ca ve, yeunˇ hkanˍ puiˉ ve, chaw yaˇ htaꞈ haꞈ leh venˇ baˆ hpehˇ laˇ puiˉ ve, Gʼuiˬ sha hpehꞈ ve tehꞈ chaw yaˇ dawˇ tuˬ Yeˍsuˆ te maˍ piˇ ve yoˬ. Yeˍsuˆ a shaꞈ teꞈ ve teˇ co˗e Yaˬhoˉvaˬ htaꞈ hkʼa dehꞈ henˇ yuˬ gʼa ve pa taw, chaw yaˇ Yaˬhoˉvaˬ htaꞈ shiˍ daꞈ tuˬ yawˇ ga laˇ gʼa ve yoˬ.—Yoˇhanˬ 14:9.

18. Heˍ ve leh Yaˬhoˉvaˬ htaꞈ she pfuhˍ piˇ ve awˬ tehˬ maˇ heˆ tehꞈ ngaˬ hui hkʼaˬ hkʼe te hpeuꞈ maw piˇ gʼa tuˬ le?

¹⁸ Yeˍsuˆ hkʼa shuˍ, Yaˬhoˉvaˬ htaꞈ caˉ daꞈ ve awˬ lawn, Yaˬhoˉvaˬ nyi ma daꞈ ve Gʼuiˬ sha hpehꞈ ve, chaw yaˇ htaꞈ hkʼaˬ hkʼe taw haꞈ ve shiˍ tuˬ, ngaˬ hui maˍ piˇ ve yoˬ. Ngaˬ hui chi hkʼe te htaˇ, heˍ ve leh Yaˬhoˉvaˬ htaꞈ she pfuhˍ piˇ ve awˬ tehˬ maˇ heˆ tehꞈ ngaˬ hui hpeuꞈ maw piˇ chehˇ ve yoˬ. Yaˬhoˉvaˬ ve daꞈ kehˬ ve awˬ meh htaꞈ shu yawˆ yan tuˬ ngaˬ hui  ga piˇ chehˇ ve yoˬ. Chi hkʼoˆ kaꞈ, ngaˬ hui maˇ biˇ ve chaw hpehꞈ ve htawˇ, Yaˬhoˉvaˬ htaꞈ henˇ yuˬ gʼa ve yoˬ. (Eˇfeˇsuꞈ 5:1, 2) Chaw yaˇ Yaˬhoˉvaˬ hkʼaˬ hkʼe ve Gʼuiˬ sha hpehꞈ ve tehꞈ shiˍ tuˬ ngaˬ hui kʼoˆ ve leh te ve hpeuꞈ maw piˇ ve yoˬ. Ngaˬ hui chi hkʼe te htaˇ, Gʼuiˬ sha ve awˬ meh yawˆ yan te piˇ lawˬ tuˬ ngaˬ hui ga piˇ chehˇ ve yoˬ. Yawˇ hui yonˍ jaw ve awˬ tehˬ ve maˇ heˆ tehꞈ shiˍ tuˬ, leh Gʼuiˬ sha ve awˬ meh htaꞈ maˇ gʼa nyi cha tuˬ ngaˬ hui ga piˇ ve yoˬ.  * Chi hkʼoˆ kaꞈ, maˇ biˇ ve chaw yaˇ htawˇ, Gʼuiˬ sha htaꞈ ka tiꞈ yeˬ gʼa ve tehꞈ ngaˬ hui hpeuꞈ maw piˇ gʼa ve yoˬ.—Yawˇbaˆ 27:5.

19. Iˉsaˍyaˆ liꞈ 63:7 hkʼaw kʼoˆ taˍ ve hkʼe, ngaˬ hui shu htaꞈ Liꞈ hpu maˍ piˇ htaˇ, yawˇ hui kaꞈ aˬ htoꞈ ma te la tuˬ dawˇ law taˍ gʼa ve le?

¹⁹ Ngaˬ hui Yaˬhoˉvaˬ ve awˬ meh htaꞈ yawˆ yan te piˇ lawˬ tuˬ awˬ nu ve teˇ hkʼaˇ cawˬ sheˍ ve yoˬ. Liꞈ hpu hkʼaw awˬ tehˬ ve shu htaꞈ ngaˬ hui maˍ piˇ htaˇ, Gʼuiˬ sha uˉ peunˍ keunˍ ve a hkaw˗anˬ cawˬ ve tehꞈ shu htaꞈ maˍ piˇ ve yoˬ. Yaˬhoˉvaˬ lehˬ mvuhˇ naw ma miˬ naˆ ma hkʼoˆ uˉ peunˍ keunˍ ve a hkaw˗anˬ cawˬ ve tehꞈ ngaˬ hui maˍ piˇ gaˇ ve yoˬ. Gʼuiˬ sha ve awˬ liˇ awˬ hkʼaˇ a yeˇ uiˍ ve htaꞈ gʼaꞈ te cawˇ ve ngaˬ hui maˍ piˇ ve htawˇ, chaw yaˇ Yaˬhoˉvaˬ htaꞈ haꞈ leh ka tiꞈ yeˬ tuˬ ngaˬ hui dawˇ law taˍ ve yoˬ. Yaˬhoˉvaˬ ve te hkʼaˇ dawˇ hkʼaˇ daꞈ jaˇ ve leh Yaˬhoˉvaˬ hkʼaˬ hkʼe ve Gʼuiˬ sha hpehꞈ ve kaꞈ ngaˬ hui kʼoˆ maˍ piˇ ve yoˬ. (Iˉsaˍyaˆ 63:7 gʼaw sheˍ.) Ngaˬ hui shu htaꞈ chi hkʼe maˍ piˇ ve kʼo, yawˇ hui kaꞈ Yaˬhoˉvaˬ htaꞈ ka tiꞈ yeˬ gaˇ ve pa taw, Yaˬhoˉvaˬ htaꞈ haꞈ leh na yuˬ tuˬ ngaˬ hui ga piˇ chehˇ ve yoˬ.

20. Gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?

²⁰ Shu Gʼuiˬ sha ve awˬ meh htaꞈ gʼa kaˇ htaˇ, ngaˬ hui te ve leh maˍ piˇ ve awˬ ceuˬ shu Gʼuiˬ sha htaꞈ cawˇ ve hkʼaw nyi tuˬ ngaˬ hui hkʼaˬ hkʼe gʼa te cawˇ ve le? Gʼuˇ suhˍ teˇ lawn hkʼaw hkʼawꞈ laˇ tuˬ yoˬ.