ບົດຄວາມສຶກສາທີ 23
“ຂໍໃຫ້ຊື່ຂອງພະອົງເປັນທີ່ເຄົາລົບນັບຖືຢູ່ສະເໝີ”
“ໂອ້ພະເຢໂຫວາ ນາມຊື່ພະອົງຕັ້ງຢູ່ເປັນນິດ.”—ເພງ. 135:13
ເພງ 10 ສັນລະເສີນພະເຢໂຫວາພະເຈົ້າຂອງພວກເຮົາ
ໃຈຄວາມສຳຄັນ *
1-2. ພະຍານພະເຢໂຫວາສົນໃຈເລື່ອງຫຍັງແດ່?
ປະເດັນສຳຄັນທີ່ເຮົາກຳລັງປະເຊີນໃນປັດຈຸບັນນັ້ນຄື ສິດໃນການປົກຄອງຂອງພະເຢໂຫວາແລະການເຮັດໃຫ້ຊື່ຂອງພະອົງເປັນທີ່ເຄົາລົບນັບຖື. ພະຍານພະເຢໂຫວາຖືວ່າເລື່ອງນີ້ເປັນເລື່ອງສຳຄັນ. ເນື່ອງຈາກວ່າສິດໃນການປົກຄອງຂອງພະເຢໂຫວາແລະການເຮັດໃຫ້ຊື່ຂອງພະອົງເປັນທີ່ເຄົາລົບນັບຖືກ່ຽວຂ້ອງກັນ ດັ່ງນັ້ນ ເຮົາຈຶ່ງບໍ່ແຍກສອງປະເດັນນີ້ອອກຈາກກັນ.
2 ເຮົາທຸກຄົນເຫັນວ່າຊື່ຂອງພະເຢໂຫວາຕ້ອງເປັນທີ່ເຄົາລົບນັບຖື ແລະເຮົາຮູ້ວ່າສິດໃນການປົກຄອງຂອງພະເຢໂຫວາຫຼືວິທີການປົກຄອງຂອງພະອົງຕ້ອງໄດ້ຮັບການພິສູດວ່າເປັນສິ່ງທີ່ດີທີ່ສຸດ. ດັ່ງນັ້ນສອງປະເດັນນີ້ເປັນສິ່ງທີ່ເຮົາຄວນເອົາໃຈໃສ່ເປັນພິເສດ.
3. ຊື່ຂອງພະເຢໂຫວາລວມເຖິງຫຍັງແດ່?
3 ທີ່ຈິງ ຊື່ເຢໂຫວາໝາຍເຖິງທຸກສິ່ງກ່ຽວກັບພະເຈົ້າ ເຊິ່ງລວມເຖິງ ວິທີທີ່ພະອົງປົກຄອງນຳ. ຖ້າເຮົາບອກວ່າການເຮັດໃຫ້ຊື່ຂອງພະເຢໂຫວາເປັນທີ່ເຄົາລົບນັບຖືເປັນປະເດັນທີ່ສຳຄັນທີ່ສຸດ ດັ່ງນັ້ນ ການປົກຄອງຂອງພະອົງກໍຕ້ອງໄດ້ຮັບການພິສູດວ່າດີທີ່ສຸດຄືກັນ. ຊື່ຂອງພະເຢໂຫວາກ່ຽວຂ້ອງກັບວິທີທີ່ພະອົງປົກຄອງ.—ເບິ່ງຂອບ “ ປະເດັນທີ່ສຳຄັນທີ່ສຸດ.”
4. ຄຳເພງ 135:13 ອະທິບາຍຊື່ຂອງພະເຈົ້າແນວໃດ ແລະເຮົາຈະຕອບຄຳຖາມຫຍັງໃນບົດຄວາມນີ້?
4 ຊື່ຂອງພະເຢໂຫວາສຳຄັນຫຼາຍແທ້ໆ. (ອ່ານຄຳເພງ 135:13) ເປັນຫຍັງຊື່ນີ້ຈຶ່ງສຳຄັນ? ຊື່ນີ້ຖືກໃສ່ຮ້າຍແນວໃດ? ພະເຈົ້າຈະເຮັດໃຫ້ຊື່ຂອງພະອົງເປັນທີ່ເຄົາລົບນັບຖືແນວໃດ? ແລະເຮົາມີສ່ວນທີ່ຈະຊ່ວຍປົກປ້ອງຊື່ຂອງພະອົງແນວໃດ? ຂໍໃຫ້ເຮົາມາເບິ່ງຄຳຕອບຂອງຄຳຖາມເຫຼົ່ານີ້ນຳກັນ.
ເປັນຫຍັງຊື່ຈຶ່ງສຳຄັນ?
5. ເມື່ອຄິດເຖິງການເຮັດໃຫ້ຊື່ຂອງພະເຢໂຫວາເປັນທີ່ເຄົາລົບນັບຖືເຮົາອາດສົງໄສເລື່ອງຫຍັງ?
5 ເມື່ອພະເຢຊູອະທິດຖານ ເພິ່ນເວົ້າເຖິງຊື່ຂອງພະເຢໂຫວາກ່ອນສິ່ງອື່ນທັງໝົດໂດຍເວົ້າວ່າ “ຂໍໃຫ້ຊື່ຂອງພະອົງເປັນທີ່ເຄົາລົບນັບຖືຢູ່ສະເໝີ.” (ມທ. 6:9) ພະເຢຊູໝາຍຄວາມວ່າແນວໃດ? ເພື່ອຈະເຮັດໃຫ້ສິ່ງໃດສິ່ງໜຶ່ງເປັນທີ່ເຄົາລົບນັບຖືສິ່ງນັ້ນຕ້ອງຂາວສະອາດແລະບໍ່ມີຕຳໜິ. ແຕ່ເຮົາອາດຈະສົງໄສວ່າ ‘ຊື່ຂອງພະເຢໂຫວາກໍເປັນທີ່ເຄົາລົບນັບຖື ຂາວສະອາດ ແລະບໍ່ມີຕຳໜິຢູ່ແລ້ວບໍ່ແມ່ນຫວາ?’ ແຕ່ເພື່ອຈະໄດ້ຄຳຕອບ ເຮົາຕ້ອງເຂົ້າໃຈວ່າຊື່ເຢໂຫວາກ່ຽວຂ້ອງກັບຫຍັງແດ່?
6. ເປັນຫຍັງຊື່ຈຶ່ງສຳຄັນ?
6 ຊື່ຂອງຄົນໃດຄົນໜຶ່ງບໍ່ໄດ້ເປັນພຽງຄຳທີ່ຂຽນໃສ່ເຈ້ຍຫຼືເປັນສຽງທີ່ເວົ້າອອກມາເທົ່ານັ້ນ. ຂໍໃຫ້ສັງເກດສິ່ງທີ່ຄຳພີໄບເບິນບອກວ່າ: “ຊື່ສຽງອັນດີກໍປະເສີດກວ່າຊັບສົມບັດຫຼາຍ.” (ສຸພາ. 22:1; ຜູ້ປ. 7:1) ເປັນຫຍັງຊື່ຈຶ່ງສຳຄັນຫຼາຍ? ກໍເພາະວ່າມັນລວມເຖິງຊື່ສຽງແລະວິທີທີ່ຄົນອື່ນຄິດກ່ຽວກັບຜູ້ນັ້ນ. ດັ່ງນັ້ນ ວິທີຂຽນແລະສິ່ງທີ່ເວົ້າອອກມານັ້ນບໍ່ແມ່ນສິ່ງທີ່ສຳຄັນ ແຕ່ສິ່ງທີ່ສຳຄັນທີ່ສຸດກໍຄືຄົນອື່ນຄິດແນວໃດເມື່ອໄດ້ຍິນຊື່ນັ້ນ.
7. ຜູ້ຄົນພະຍາຍາມທຳລາຍຊື່ສຽງຂອງພະເຢໂຫວາແນວໃດ?
7 ເມື່ອຜູ້ຄົນເວົ້າຕົວະກ່ຽວກັບພະເຢໂຫວາເຂົາເຈົ້າກໍກຳລັງທຳລາຍຊື່ສຽງຂອງພະອົງ. ຕອນທີ່ເຂົາເຈົ້າພະຍາຍາມທຳລາຍຊື່ສຽງຂອງພະອົງ ເຂົາເຈົ້າກໍກຳລັງໃສ່ຮ້າຍຊື່ຂອງພະອົງນຳ. ມີການເລີ່ມໃສ່ຮ້າຍຊື່ຂອງພະເຢໂຫວາແລະທຳລາຍຊື່ສຽງຂອງພະອົງຕອນຢູ່ໃນສວນເອເດນ. ຂໍໃຫ້ເຮົາມາເບິ່ງເລື່ອງນີ້ນຳກັນ.
ຊື່ຂອງພະເຢໂຫວາຖືກໃສ່ຮ້າຍແນວໃດ?
8. ອາດາມກັບເອວາຮູ້ຫຍັງກ່ຽວກັບພະເຢໂຫວາ ແລະມີຄຳຖາມຫຍັງເກີດຂຶ້ນ?
8 ອາດາມກັບເອວາຮູ້ຈັກຊື່ຂອງພະເຢໂຫວາແລະຮູ້ຄວາມຈິງກ່ຽວກັບເລື່ອງຂອງພະອົງ. ເຂົາເຈົ້າຮູ້ວ່າພະເຢໂຫວາເປັນຜູ້ສ້າງ ເປັນຜູ້ໃຫ້ຊີວິດແລະສ້າງບ່ອນຢູ່ທີ່ເປັນອຸທິຍານໃຫ້ກັບເຂົາເຈົ້າ ແລະໃຫ້ເຂົາເຈົ້າມີຄູ່ຊີວິດທີ່ດີ. (ຕົ້ນ. 1:26-28; 2:18) ແຕ່ເຂົາເຈົ້າຄິດເຖິງສິ່ງທີ່ດີທີ່ພະເຢໂຫວາເຮັດເພື່ອເຂົາເຈົ້າບໍ? ແລະເຂົາເຈົ້າໄດ້ເພີ່ມຄວາມຮັກທີ່ມີຕໍ່ພະເຢໂຫວາບໍ? ເຮົາຈະຮູ້ຄຳຕອບເຫຼົ່ານີ້ເມື່ອເຂົາເຈົ້າຖືກທົດສອບຈາກສັດຕູຂອງພະເຈົ້າ.
9. ຕາມຕົ້ນເດີມ 2:16, 17; 3:1-5 ພະເຢໂຫວາບອກຫຍັງກັບມະນຸດຄູ່ທຳອິດ ແລະຊາຕານໄດ້ບິດເບືອນຄວາມຈິງແນວໃດ?
9 ອ່ານຕົ້ນເດີມ 2:16, 17; 3:1-5. ຊາຕານໃຊ້ງູມາເວົ້າກັບເອວາໂດຍຖາມວ່າ: “ຈິງຫຼືພະເຈົ້າໄດ້ບອກຫ້າມວ່າພວກເຈົ້າຢ່າຊູ່ກິນໝາກໄມ້ທຸກຢ່າງໃນສວນນີ້ຫຼື?” ຊາຕານໃຊ້ຄຳຖາມທີ່ເປັນຄຳຕົວະເຊິ່ງເຮັດໃຫ້ເອວາຄິດບໍ່ດີກ່ຽວກັບພະເຈົ້າ. ແຕ່ຄວາມຈິງແລ້ວພະເຈົ້າບອກວ່າເຂົາເຈົ້າສາມາດກິນໝາກໄມ້ທຸກຕົ້ນໄດ້ຍົກເວັ້ນຕົ້ນດຽວ. ອາດາມກັບເອວາສາມາດກິນໝາກໄມ້ໄດ້ຫຼາຍຊະນິດ. (ຕົ້ນ. 2:9) ເຫັນໄດ້ວ່າພະເຢໂຫວາເປັນພະເຈົ້າທີ່ໃຈກວ້າງອີ່ຫຼີ. ພະອົງຫ້າມບໍ່ໃຫ້ອາດາມກັບເອວາກິນກໍມີພຽງແຕ່ຕົ້ນດຽວ. ດັ່ງນັ້ນ ເຫັນໄດ້ແຈ້ງວ່າຊາຕານເວົ້າບິດເບືອນຄວາມຈິງ ມັນເຮັດໃຫ້ເອວາຄິດວ່າພະເຢໂຫວາເປັນພະເຈົ້າທີ່ໃຈແຄບ. ດັ່ງນັ້ນ ເອວາອາດສົງໄສວ່າ ‘ຍັງມີສິ່ງດີອື່ນໆອີກບໍທີ່ພະເຈົ້າຫວງໄວ້?’
10. ຊາຕານໃສ່ຮ້າຍພະເຢໂຫວາແນວໃດ ແລະຜົນເປັນແນວໃດ?
10 ຕອນທີ່ຊາຕານຖາມຄຳຖາມນີ້ເອວາຍັງເຊື່ອຟັງພະເຢໂຫວາຢູ່. ລາວຕອບຊາຕານໂດຍເວົ້າສິ່ງທີ່ພະເຢໂຫວາສັ່ງໄວ້. ລາວຍັງເວົ້າຕື່ມວ່າເຂົາເຈົ້າບໍ່ຄວນແມ່ນແຕ່ຈະໄປຈັບໝາກໄມ້ນັ້ນ. ລາວຮູ້ວ່າຖ້າບໍ່ເຊື່ອຟັງພະເຢໂຫວາລາວກໍຈະຕາຍ. ແຕ່ຊາຕານພັດບອກວ່າ: “ພວກເຈົ້າຈະບໍ່ຕາຍດອກ.” (ຕົ້ນ. 3:2-4) ຕອນນີ້ຊາຕານບໍ່ພຽງແຕ່ບອກວ່າພະເຢໂຫວາເວົ້າຕົວະ ແຕ່ມັນໃສ່ຮ້າຍພະອົງແລະເຮັດໃຫ້ເອວາຄິດວ່າພະອົງເວົ້າຕົວະ. ນີ້ເຮັດໃຫ້ຊາຕານກາຍເປັນມານຮ້າຍຫຼືຜູ້ໃສ່ຮ້າຍ ແລະເອວາກໍເຊື່ອຟັງຊາຕານ ລາວຖືກຫຼອກແທ້ໆ. (1 ຕມ. 2:14) ເອວາເຊື່ອຊາຕານຫຼາຍກວ່າພະເຢໂຫວາ ນີ້ຈຶ່ງເຮັດໃຫ້ລາວເລືອກທີ່ຈະບໍ່ເຊື່ອຟັງພະເຢໂຫວາແບບງ່າຍໆ ລາວເລີ່ມກິນໝາກໄມ້ທີ່ພະອົງຫ້າມແລ້ວກໍເອົາໃຫ້ອາດາມກິນນຳ.—ຕົ້ນ. 3:6
11. ອາດາມກັບເອວາຄວນຈະເຮັດຫຍັງຕອນທີ່ຊາຕານຕົວະ ແຕ່ເຂົາເຈົ້າພັດບໍ່ໄດ້ເຮັດຫຍັງ?
11 ລອງຄິດເບິ່ງວ່າເອວາຄວນຈະຕອບຊາຕານແນວໃດ? ລາວອາດຈະເວົ້າໃນທຳນອງທີ່ວ່າ: “ເຈົ້າແມ່ນໃຜຄືມາເວົ້າແບບນີ້ ຂ້ອຍຮູ້ຈັກພໍ່ຂອງຂ້ອຍດີ ຂ້ອຍຮັກແລະໄວ້ໃຈເພິ່ນ ທຸກຢ່າງທີ່ຂ້ອຍມີກໍມາຈາກເພິ່ນ ເປັນຫຍັງເຈົ້າຄືມາເວົ້າໃສ່ຮ້າຍເພິ່ນຈັ່ງຊີ້? ໜີແມ໋ະ!” ພະເຢໂຫວາຄົງຈະພູມໃຈຫຼາຍແທ້ໆທີ່ໄດ້ຍິນຄຳນີ້ຈາກລູກສາວທີ່ຮັກ! (ສຸພາ. 27:11) ແຕ່ເອວາບໍ່ມີຄວາມຮັກທີ່ໝັ້ນຄົງຕໍ່ພະເຢໂຫວາ ແມ່ນແຕ່ອາດາມກໍບໍ່ມີຄວາມຮັກແບບນີ້ຄືກັນ. ທັງອາດາມແລະເອວາບໍ່ໄດ້ຮັກພໍ່ ເຂົາເຈົ້າຈຶ່ງບໍ່ໄດ້ເວົ້າປົກປ້ອງພະເຢໂຫວາ.
12. ຊາຕານໄດ້ເຮັດໃຫ້ເອວາສົງໄສແນວໃດ ແລະທັງອາດາມກັບເອວາບໍ່ໄດ້ເຮັດສິ່ງໃດ?
12 ຄືດັ່ງທີ່ເຮົາຮູ້ ຊາຕານໄດ້ທຳລາຍຊື່ສຽງຂອງພະເຢໂຫວາໂດຍເຮັດໃຫ້ເອວາສົງໄສວ່າພະເຢໂຫວາເປັນພະເຈົ້າແບບໃດແທ້ໆ. ທັງອາດາມກັບເອວາບໍ່ໄດ້ປົກປ້ອງຊື່ຂອງພະເຢໂຫວາແລະຊື່ສຽງຂອງພະອົງ. ເຂົາເຈົ້າເຊື່ອຟັງຊາຕານແລະກະບົດຕໍ່ພະເຈົ້າ. ຊາຕານໃຊ້ວິທີຄ້າຍໆກັນນີ້ໃນທຸກມື້ນີ້ ມັນທຳລາຍຊື່ສຽງຂອງພະເຢໂຫວາໂດຍໃສ່ຮ້າຍພະອົງ. ຄົນທີ່ເຊື່ອຄຳຕົວະຂອງຊາຕານມັກບໍ່ຍອມຮັບການປົກຄອງຂອງພະເຢໂຫວາ.
ພະເຢໂຫວາເຮັດໃຫ້ຊື່ຂອງພະອົງເປັນທີ່ເຄົາລົບນັບຖືແນວໃດ?
13. ຕາມເອເຊກຽນ 36:23 ເນື້ອໃນຫຼັກຂອງຄຳພີໄບເບິນເວົ້າເຖິງຫຍັງ?
13 ພະເຢໂຫວາຍອມຮັບຄຳໃສ່ຮ້າຍນັ້ນໂດຍບໍ່ໄດ້ປົກປ້ອງຕົວເອງບໍ? ບໍ່. ຄຳພີໄບເບິນເວົ້າເຖິງສິ່ງທີ່ພະເຢໂຫວາເຮັດເພື່ອພິສູດວ່າການໃສ່ຮ້າຍພະອົງຕອນທີ່ຢູ່ສວນເອເດນບໍ່ແມ່ນຄວາມຈິງ. (ຕົ້ນ. 3:15) ທີ່ຈິງ ເຮົາອາດສະຫຼຸບເນື້ອໃນຫຼັກຂອງຄຳພີໄບເບິນຄື: ໂດຍທາງການປົກຄອງຂອງເມຊີ ພະເຢໂຫວາເຮັດໃຫ້ຊື່ຂອງພະອົງເປັນທີ່ເຄົາລົບນັບຖື ແລະຟື້ນຟູໂລກນີ້ໃຫ້ມີຄວາມສະຫງົບສຸກແລະຍຸຕິທຳ. ຖ້າເຮົາອ່ານຄຳພີໄບເບິນເຮົາກໍຈະເຂົ້າໃຈວ່າພະເຢໂຫວາເຮັດໃຫ້ຊື່ຂອງພະອົງເປັນທີ່ເຄົາລົບນັບຖືແນວໃດ.—ອ່ານເອເຊກຽນ 36:23
14. ວິທີທີ່ພະເຢໂຫວາຈັດການກັບການທ້າທາຍໃນສວນເອເດນໄດ້ພິສູດຫຍັງ?
14 ຊາຕານພະຍາຍາມຂັດຂວາງຄວາມຕ້ອງການຂອງພະເຢໂຫວາເລື້ອຍໆ ແຕ່ມັນກໍເຮັດບໍ່ສຳເລັດຈັກເທື່ອ. ເຖິງວ່າການກະບົດຂອງຊາຕານແລະຄົນທີ່ເລືອກຢູ່ຝ່າຍມັນໄດ້ເຮັດໃຫ້ພະເຢໂຫວາຮູ້ສຶກເສຍໃຈ (ເພງ. 78:40) ແຕ່ຄຳພີໄບເບິນບອກໃຫ້ເຮົາຮູ້ວິທີທີ່ພະເຢໂຫວາໄດ້ເຮັດຕໍ່ກັບການທ້າທາຍນີ້ແລະພິສູດວ່າພະເຢໂຫວາມີຄວາມຮັກແລະການປົກຄອງຂອງພະອົງດີທີ່ສຸດ. ພະເຢໂຫວາຈັດການກັບການທ້າທາຍນີ້ດ້ວຍຄວາມສະຫຼາດ ອົດທົນ ແລະຍຸຕິທຳ. ພະອົງຍັງໄດ້ສະແດງລິດເດດໃນຫຼາຍໆດ້ານ ແລະທີ່ສຳຄັນທີ່ສຸດພະອົງໄດ້ສະແດງຄວາມຮັກຕໍ່ທຸກສິ່ງທີ່ພະອົງໄດ້ເຮັດ. (1 ຢຮ. 4:8) ພະເຢໂຫວາບໍ່ໄດ້ເຊົາໃນການເຮັດໃຫ້ຊື່ຂອງພະອົງເປັນທີ່ເຄົາລົບນັບຖື.
ຊາຕານຕົວະເອວາກ່ຽວກັບພະເຢໂຫວາ ແລະມັນກໍພະຍາຍາມໃສ່ຮ້າຍພະເຢໂຫວາມາຕະຫຼອດເປັນເວລາຫຼາຍພັນປີ (ເບິ່ງຂໍ້ 9-10, 15) *
15. ຊາຕານໄດ້ໃສ່ຮ້າຍຊື່ຂອງພະເຈົ້າແນວໃດໃນທຸກມື້ນີ້ ແລະຜົນເປັນແນວໃດ?
15 ຊາຕານຍັງໃສ່ຮ້າຍຊື່ຂອງພະເຈົ້າໃນທຸກມື້ນີ້. ມັນເຮັດໃຫ້ຜູ້ຄົນສົງໄສກ່ຽວກັບລິດອຳນາດ ຄວາມຍຸຕິທຳ ສະຕິປັນຍາ ແລະຄວາມຮັກຂອງພະເຢໂຫວາ. ຕົວຢ່າງເຊັ່ນ: ມັນເຮັດໃຫ້ຜູ້ຄົນເຂົ້າໃຈວ່າພະເຢໂຫວາບໍ່ແມ່ນຜູ້ສ້າງ ແລະເຖິງແມ່ນວ່າຜູ້ຄົນເຊື່ອວ່າພະເຈົ້າມີແທ້ ມັນກໍຈະເຮັດໃຫ້ເຂົາເຈົ້າເຊື່ອວ່າມາດຕະຖານຂອງພະເຢໂຫວາເຂັ້ມງວດໂພດແລະບໍ່ຍຸຕິທຳ. ຊາຕານເຖິງຂັ້ນສອນຜູ້ຄົນໃຫ້ຮູ້ວ່າພະເຢໂຫວາເປັນພະເຈົ້າທີ່ໂຫດຮ້າຍເຊິ່ງທໍລະມານຜູ້ຄົນໃນນະລົກ. ເມື່ອເຂົາເຈົ້າເຊື່ອຄຳຕົວະນີ້ເຂົາເຈົ້າກໍໄດ້ປະຕິເສດການປົກຄອງຂອງພະເຢໂຫວາ. ຊາຕານຍັງໃສ່ຮ້າຍພະເຢໂຫວາຕໍ່ໄປແລະພະຍາຍາມເຮັດໃຫ້ພວກເຮົາຫັນໜີຈາກພະເຢໂຫວາຈົນກວ່າທີ່ພະເຢໂຫວາຈະທຳລາຍມັນ. ແຕ່ແຜນຂອງຊາຕານສຳເລັດບໍ?
ເຈົ້າມີສ່ວນແນວໃດໃນປະເດັນທີ່ສຳຄັນນີ້?
16. ເຈົ້າສາມາດເຮັດຫຍັງໄດ້ແດ່ທີ່ອາດາມກັບເອວາບໍ່ໄດ້ເຮັດ?
16 ພະເຢໂຫວາຍອມໃຫ້ມະນຸດທີ່ບໍ່ສົມບູນແບບມີສ່ວນໃນການເຮັດໃຫ້ຊື່ຂອງພະອົງເປັນທີ່ເຄົາລົບນັບຖື. ນີ້ໝາຍຄວາມວ່າເຈົ້າສາມາດເຮັດໃນສິ່ງທີ່ອາດາມກັບເອວາບໍ່ໄດ້ເຮັດ. ເຖິງວ່າຜູ້ຄົນໃນໂລກນີ້ຈະໃສ່ຮ້າຍແລະໝິ່ນປະໝາດຊື່ຂອງພະເຢໂຫວາ ແຕ່ເຈົ້າກໍມີໂອກາດທີ່ຈະປົກປ້ອງຊື່ສຽງຂອງພະອົງໂດຍບອກວ່າພະອົງເປັນພະເຈົ້າທີ່ດີ ບໍລິສຸດ ຍຸຕິທຳ ແລະມີຄວາມຮັກ. (ເອຊາ. 29:23) ເຈົ້າສາມາດສະໜັບສະໜູນການປົກຄອງຂອງພະເຢໂຫວາໂດຍຊ່ວຍຜູ້ຄົນໃຫ້ເຂົ້າໃຈວ່າມີພຽງແຕ່ການປົກຄອງຂອງພະອົງເທົ່ານັ້ນທີ່ຖືກຕ້ອງຊອບທຳແລະຈະນຳຄວາມສຸກມາໃຫ້ທັງມະນຸດແລະທູດສະຫວັນ.—ເພງ. 37:9, 37; 146:5, 6, 10
17. ພະເຢຊູເຮັດໃຫ້ຄົນອື່ນຮູ້ຈັກຊື່ຂອງພະເຢໂຫວາແນວໃດ?
17 ເມື່ອເຮົາປົກປ້ອງຊື່ສຽງຂອງພະເຢໂຫວາ ເຮົາກໍກຳລັງເຮັດຕາມຕົວຢ່າງຂອງພະເຢຊູຄລິດ. (ຢຮ. 17:26) ພະເຢຊູເຮັດໃຫ້ຄົນອື່ນຮູ້ຈັກຊື່ຂອງພະເຢໂຫວາໂດຍບໍ່ພຽງແຕ່ເວົ້າເຖິງຊື່ເທົ່ານັ້ນ ແຕ່ຍັງປົກປ້ອງຊື່ສຽງຂອງພະອົງນຳ. ຕົວຢ່າງ ພະເຢຊູໄດ້ຫັກລ້າງຄຳສອນຂອງພວກຟາຣິຊາຍທີ່ເຮັດໃຫ້ເບິ່ງຄືວ່າພະເຢໂຫວາເຂັ້ມງວດເກີນໄປ ຮຽກຮ້ອງສິ່ງທີ່ເຮັດບໍ່ໄດ້ ຢູ່ຫ່າງໄກຈາກມະນຸດ ແລະບໍ່ມີຄວາມເມດຕາ. ພະເຢຊູຊ່ວຍຄົນອື່ນໃຫ້ເຫັນວ່າພະເຢໂຫວາມີເຫດຜົນ ມີຄວາມອົດທົນ ມີຄວາມຮັກ ແລະພ້ອມທີ່ຈະໃຫ້ອະໄພ. ນອກຈາກນັ້ນ ພະເຢຊູຍັງຊ່ວຍໃຫ້ຄົນອື່ນເຂົ້າໃຈວ່າພະເຢໂຫວາມີນິດໄສແບບໃດໂດຍເຮັດຕາມຕົວຢ່າງຂອງພະເຢໂຫວາແລະສະແດງຄຸນລັກສະນະຂອງພະອົງໃນຊີວິດປະຈຳວັນ.—ຢຮ. 14:9
18. ເຮົາສາມາດລົບລ້າງຄຳຕົວະແລະການໃສ່ຮ້າຍພະເຢໂຫວາໄດ້ແນວໃດ?
18 ຄືກັບພະເຢຊູ ເຮົາສາມາດບອກຜູ້ຄົນກ່ຽວກັບພະເຢໂຫວາ. ເມື່ອເຮົາເຮັດແບບນີ້ເຂົາເຈົ້າກໍຈະຮູ້ຈັກພະເຢໂຫວາແລະເຄົາລົບນັບຖືຊື່ຂອງພະອົງ. ເຮົາຍັງສາມາດສອນຜູ້ຄົນໃຫ້ຮູ້ວ່າພະເຢໂຫວາເປັນພະເຈົ້າທີ່ມີຄວາມຮັກແລະຄວາມເມດຕາກະລຸນາ ໂດຍວິທີນີ້ເຮົາກໍລົບລ້າງຄຳຕົວະແລະການໃສ່ຮ້າຍພະເຢໂຫວາ. ເຖິງວ່າເຮົາເປັນມະນຸດທີ່ບໍ່ສົມບູນແບບ ແຕ່ເຮົາກໍສາມາດຮຽນແບບພະເຢໂຫວາໄດ້. (ອຟຊ. 5:1, 2) ເຮົາຍັງສາມາດເຮັດໃຫ້ຜູ້ຄົນເຫັນວ່າພະເຢໂຫວາເປັນພະເຈົ້າແບບໃດແທ້ໆໂດຍທາງຄຳເວົ້າແລະການກະທຳຂອງເຮົາ. ໂດຍວິທີນີ້ເຮົາກໍກຳລັງເຮັດໃຫ້ຊື່ຂອງພະເຢໂຫວາເປັນທີ່ເຄົາລົບນັບຖື. * ນອກຈາກນັ້ນ ເຮົາຍັງສາມາດຊ່ວຍຜູ້ຄົນໃຫ້ເຂົ້າໃຈຄວາມຈິງກ່ຽວກັບພະເຢໂຫວາ ແລະພິສູດໃຫ້ເຫັນວ່າມະນຸດທີ່ບໍ່ສົມບູນແບບກໍສາມາດຮັກສາຄວາມສັດຊື່ຕໍ່ພະເຢໂຫວາໄດ້.—ໂຢບ 27:5
ເຮົາຢາກຊ່ວຍນັກສຶກສາໃຫ້ເຂົ້າໃຈວ່າພະເຢໂຫວາເປັນພະເຈົ້າທີ່ມີຄວາມຮັກແລະກະລຸນາ (ເບິ່ງຂໍ້ 18-19) *
19. ເອຊາອີ 63:7 ຊ່ວຍເຮົາໃຫ້ເຫັນວ່າເປົ້າໝາຍຫຼັກຂອງການສອນຂອງເຮົາແມ່ນຫຍັງ?
19 ເຮົາສາມາດເຮັດອີກຢ່າງໜຶ່ງເພື່ອເຮັດໃຫ້ຊື່ຂອງພະເຢໂຫວາເປັນທີ່ເຄົາລົບນັບຖືເຊັ່ນ: ຕອນທີ່ເຮົາສຶກສາຄຳພີໄບເບິນໃຫ້ກັບຄົນອື່ນເຮົາມັກຈະເນັ້ນວ່າພະເຢໂຫວາມີສິດທີ່ຈະປົກຄອງເອກະພົບທັງໝົດ. ເຖິງວ່າເຮົາຄວນຈະເນັ້ນກົດໝາຍຂອງພະເຢໂຫວາ ແຕ່ເປົ້າໝາຍຂອງເຮົາກໍຄືຊ່ວຍຄົນອື່ນໃຫ້ຮັກພະເຢໂຫວາແລະພັກດີຕໍ່ພະອົງ. ເຮົາຕ້ອງຊ່ວຍຄົນອື່ນໃຫ້ເຫັນຄຸນລັກສະນະທີ່ດີຂອງພະເຢໂຫວາ ໂດຍເນັ້ນວ່າພະອົງເປັນພະເຈົ້າແບບໃດແທ້ໆ. (ອ່ານເອຊາອີ 63:7) ເມື່ອເຮົາສອນຜູ້ຄົນແບບນີ້ ເຮົາກໍຈະຊ່ວຍເຂົາເຈົ້າໃຫ້ຮັກແລະເຊື່ອຟັງພະເຢໂຫວາຍ້ອນເຂົາເຈົ້າຢາກພັກດີຕໍ່ພະອົງ.
20. ເຮົາຈະຕອບຄຳຖາມຫຍັງໃນບົດຄວາມຕໍ່ໄປ?
20 ແລ້ວເຮົາຈະແນ່ໃຈໄດ້ແນວໃດວ່າການປະພຶດແລະການສອນຂອງເຮົາຈະເຮັດໃຫ້ຄົນອື່ນເຫັນວ່າພະເຢໂຫວາເປັນພະເຈົ້າທີ່ດີ ແລະຢາກມາຮູ້ຈັກພະອົງ? ເຮົາຈະຕອບຄຳຖາມນີ້ໃນບົດຄວາມຕໍ່ໄປ.
ເພງ 2 ຊື່ຂອງພະອົງຄືເຢໂຫວາ
^ ຂໍ້ 5 ທັງມະນຸດແລະທູດສະຫວັນກຳລັງປະເຊີນໜ້າກັບປະເດັນຫຍັງ? ເປັນຫຍັງປະເດັນນີ້ຈຶ່ງສຳຄັນ? ແລະເຮົາແຕ່ລະຄົນມີສ່ວນແນວໃດໃນການແກ້ໄຂປະເດັນນີ້? ການຮູ້ຄຳຕອບສຳລັບຄຳຖາມນີ້ແລະຄຳຖາມອື່ນໆຈະຊ່ວຍເຮົາໃຫ້ໃກ້ຊິດກັບພະເຢໂຫວາຫຼາຍຂຶ້ນ.
^ ຂໍ້ 18 ເບິ່ງລາຍການໂທລະທັດ JW ປະຈຳເດືອນມັງກອນ 2018 ໃນເວັບໄຊ jw.org®. ເຂົ້າໄປທີ່ ໜັງສືແລະສື່ຕ່າງໆ > ລາຍການໂທລະທັດ JW.
^ ຂໍ້ 62 ຄຳອະທິບາຍຮູບພາບ: ຊາຕານໃສ່ຮ້າຍພະເຢໂຫວາໂດຍບອກເອວາວ່າພະອົງເວົ້າຕົວະ. ເປັນເວລາດົນນານມາແລ້ວທີ່ຊາຕານໄດ້ສົ່ງເສີມຄຳສອນທີ່ຜິດໆເຊັ່ນ: ຄຳສອນທີ່ວ່າພະເຈົ້າໂຫດຮ້າຍ ແລະບໍ່ໄດ້ສ້າງມະນຸດ.
^ ຂໍ້ 64 ຄຳອະທິບາຍຮູບພາບ: ຕອນທີ່ພີ່ນ້ອງຊາຍຄົນໜຶ່ງນຳການສຶກສາ ລາວເນັ້ນເຖິງຄຸນລັກສະນະທີ່ດີຂອງພະເຈົ້າ.
