TABA YA KUITUTA 23
“Libizo Lahao Likeniswe”
“Wena Jehova, libizo lahao liina kuya kuile.”—SAMU 135:13.
PINA 10 Mulumbeke Jehova, Mulimu Waluna!
ZELUKA ITUTA *
1-2. Ki litaba mañi za butokwa zebatabela kubuisana Lipaki za Jehova ni batu?
KACENU, kaufelaa luna lwaamiwa mwa litaba za butokwa hahulu, ili taba ya bubusi bwa Jehova ni taba ya kukeniswa kwa libizo lahae. Ka kuba Lipaki za Jehova, lwatabelanga kubuisana ni batu babañwi ka za litaba za butokwa zeo. Nihakulicwalo, hakutalusi kuli taba ya bubusi bwa Jehova ni ya kukeniswa kwa libizo lahae ki litaba zepeli zeshutana.
2 Kaufelaa luna lwaziba kuli libizo la Mulimu liswanela kukeniswa. Hape lwaziba kuli bubusi bwa Jehova buswanela kuboniswa kuli ki bona bobulukile hahulu. Litaba zepeli zeo kaufela ki za butokwa.
3. Libizo la Jehova liamañi?
3 Mane halubulela za libizo la Jehova lutalusa lika kaufela zeama Mulimu waluna, kukopanyeleza cwalo ni mwabuseza. Kacwalo, halubulela kuli taba ya kukeniswa kwa libizo la Jehova ki yona ya butokwa hahulu, hape lutalusa kuli puso ya Jehova ni yona iswanela kuboniswa kuli ki yona yelukile hahulu. Libizo la Jehova liswalisana hahulu ni mwabuseza ka kuba Mubusi Yamaata Kaufela. Mubone mbokisi yeli, “ Zeamiwa Mwa Taba ya Butokwa Hahulu.”
4. Liñolo la Samu 135:13 litalusa cwañi libizo la Mulimu, mi ki lipuzo mañi zeluka nyakisisa mwa taba ye?
4 Libizo la Jehova liipitezi. (Mubale Samu 135:13.) Ki kabakalañi libizo la Mulimu halili la butokwa hahulu? Libizo leo nelisinyizwe cwañi lwapili? Mulimu ulikenisa cwañi? Mi lukona kutusa cwañi kuli libizo leo likeniswe? Halunyakisiseñi lipuzo zeo.
BUTOKWA BWA LIBIZO
5. Batu babañwi bakona kubuza puzo mañi habautwa kuli libizo la Mulimu liswanela kukeniswa?
5 “Libizo lahao likeniswe.” (Mat. 6:9) Jesu naabonisize kuli kukeniswa kwa libizo la Mulimu ki yeñwi ya litaba za butokwa hahulu zeluswanela kulapelela. Kono cwale manzwi anaabulezi Jesu ao atalusañi? Kukenisa kutalusa kuzwisa masila nto yesilafezi. Kono babañwi bakona kubuza kuli, ‘Ki kabakalañi libizo la Jehova halitokwa kukeniswa hailifo likenile kale?’ Kuli lualabe puzo yeo, lutokwa kuziba zeliama libizo la mutu.
6. Ki kabakalañi libizo halili la butokwa hahulu?
6 Libizo haki linzwi feela lelikona kuñolwa fa pepa kamba kupundiwa. Bibele ibulela kuli: “Sesiswanela ki kuketa libizo lelinde kufita bufumu bobuñata.” (Liprov. 22:1; Muek. 7:1) Ki kabakalañi libizo halili la butokwa hahulu cwalo? Kabakala kuli liama libubo la muñaa lona kamba mwaangelwa ki batu. Kacwalo, sa butokwa haki molibonahalela libizo haliñolwa fa pepa kamba molibizezwa, kono sa butokwa hahulu nikufita ki muñaa libizo leo ni mwaangelwa ki batu.
7. Batu basinyize cwañi libizo la Mulimu?
7 Batu hababulela litaba za buhata ka za Jehova, batahisa kuli abe ni libubo lelimaswe. Mi batu hababulela litaba zemaswe zeo, basinya Jehova libizo. Libizo la Mulimu ni libubo lahae nelisinyizwe lwapili mwa simu ya Edeni. Halunyakisiseñi zelukona kuituta kwa taba yeo.
MONE LISINYELIZWE LIBIZO LA MULIMU LWAPILI
8. Ki lika mañi zene baziba bo Adama ni Eva, mi ki lipuzo mañi zelukona kubuza?
8 Bo Adama ni Eva nebaziba libizo la Jehova, mi nebaziba litaba zeñata za butokwa ka za hae. Nebaziba kuli Jehova ki yena Mubupi, ki yena yabafile bupilo, lihae labona lelinde lelili Paradaisi, ni linyalo labona lelipetahalile. (Gen. 1:26-28; 2:18) Kono kana nebazwezipili kunahanisisa lika kaufela zanaa baezelize Jehova? Kana nebazwezipili kubonisa lilato ku Jehova ni kuitebuha zanaa baezelize? Likalabo za lipuzo zeo nelizibahalile ka nako yebalikiwa ki sila sa Mulimu.
9. Ka kuya ka liñolo la Genese 2:16, 17 ni la Genese 3:1-5, Jehova naabuleleziñi Adama ni Eva, mi Satani naakopamisize cwañi niti?
9 Mubale Genese 2:16, 17 ni Genese 3:1-5. Satani naaitusisize noha kubuza Eva kuli: “Kana luli Mulimu naaize musike mwaca kwa likota kaufela za mwa simu?” Puzo yeo ibonisa kuli Satani naabulezi taba ya buhata ka za Mulimu, ili kutahisa kuli Eva akale kukakanya Mulimu. Kono Mulimu yena naabulezi kuli nebakona kuca kwa likota kaufela, kwandaa kota iliñwi. Bo Adama ni Eva nebanani likota zeñata za mifuta-futa kone bakona kufumana lico. (Gen. 2:9) Kaniti luli, Jehova unani bufani. Niteñi, Mulimu naahanisize Adama ni Eva kuca kwa kota iliñwi feela. Kacwalo, puzo yanaabuzize Satani neikopamisize niti. Puzo yeo neibonisa inge kuli Mulimu haana bufani. Mwendi Eva naaipuzize kuli, ‘Kana kunani nto yeñwi yende yasalati kunifa Mulimu?’
10. Satani naasinyize cwañi Mulimu libizo kusina kupata-pata, mi ki lika mañi zenezwile mwateñi?
10 Satani hanaabuzize puzo yeo, Eva naasaanga Jehova kuli ki Mubusi wahae. Naaalabile Satani ka kutalusa taelo yeutwahala yanaa bafile Mulimu. Eva naabulezi kuli mane nebasa swaneli nihaiba kuswala kota yeo. Naaziba kuli hane bakatula mulao wa Mulimu, nebaka shwa. Kono Satani naaalabile kuli: “Kushwa, hamuna kushwa.” (Gen. 3:2-4) Fa cwale, Satani naasabuleli ka kupata-pata. Naasinyize Mulimu libizo, ili kutahisa kuli Eva aange Jehova kuli ki lihata. Kabakaleo, Satani aba Diabulosi, kamba lisawana. Eva naapumilwe hahulu; naalumezi zanaa mubulelezi Satani. (1 Tim. 2:14) Akala kusepa hahulu Satani kufita kusepa Jehova. Kabakaleo, Eva aeza katulo yemaswe hahulu ka bunolo. Aiketela kutula mulao wa Jehova. Akala kuca kwa muselo wanaa muhanisize Jehova. Hasamulaho, Adama ni yena aeza nto yeswana.—Gen. 3:6.
11. Ki lika mañi zene baswanela kueza bo Adama ni Eva, kono ki lika mañi zene bapalezwi kueza?
11 Halulikeñi kunyakisisa zanaaswanela kubulela Eva ku Satani. Luungeñi kuli kambe naamualabile cwana: “Hani kuzibi, kono Jehova Ndate namuziba, namulata mi nimusepile. Ufile na ni Adama lika kaufela zelunani zona. Wena ukona kubulela cwañi lika zemaswe cwalo ka za hae? Zwa!” Jehova naakataba hahulu kuutwa mwanaa hae wamusizana yasepahala, habulela cwalo! (Liprov. 27:11) Kono Eva naasina lilato lelituna ku Jehova; Adama ni yena naasina lilato. Bakeñisa kuli Adama ni Eva nebasina lilato lelicwalo ku Ndataa bona, nebapalezwi kuyemela libizo lahae, Satani hanaabulezi litaba za buhata ka za Mulimu.
12. Ki lika mañi zanaaezize Satani zenetahisize kuli Eva asike asepa Mulimu, mi bo Adama ni Eva nebapalezwi kuezañi?
12 Sina feela molunyakisiselize kwamulaho, Satani naakalile kusinya Mulimu libizo ka kubulela litaba zenetahisize kuli Eva asike asepa Mulimu. Naamukwashekile kuli mane Eva akala kunahana kuli Jehova naasi Mulimu yomunde. Mi Adama ni Eva bapalelwa kuyemela libizo la Jehova ni libubo lahae. Kabakaleo, neku babezi bunolo kuutwa Satani, mi bafulalela Ndataa bona. Ni kacenu, Satani upuma batu ka nzila yeswana. Usinya Jehova libizo ka kubulela litaba za buhata ka za hae. Batu babalumela litaba za buhata zahasanya Satani kubabelanga bunolo kuhana puso ya Jehova yelukile.
JEHOVA UKENISA LIBIZO LAHAE
13. Liñolo la Ezekiele 36:23 lilutusa cwañi kuutwisisa taba ya butokwa hahulu yefumaneha mwa Bibele?
13 Kana Jehova ukatuhelela kuli libizo lahae lisinyiwe ka nzila yecwalo asaezi sesiñwi? Batili! Bibele mutumbi ilutusa kuziba zaezize Jehova zebonisa kuli litaba zemaswe zenebulezwi ka za hae mwa simu ya Edeni, haki za niti. (Gen. 3:15) Mane taba ya butokwa hahulu yefumaneha mwa Bibele lukona kuitalusa cwana ka bukuswani: Jehova ukenisa libizo lahae ni kutahisa kozo ni kuluka fa lifasi ka kuitusisa Mubuso obusiwa ki Mwanaa hae. Mwa Bibele, kunani litaba zelutusa kuutwisisa mo Jehova akeniseza libizo lahae.—Mubale Ezekiele 36:23.
14. Muhato wanaangile Jehova hanaakwenuhezwi mwa simu ya Edeni utusize cwañi kuli libizo lahae likeniswe?
14 Satani ulikile mwakonela kaufela kuli apaleliswe Jehova kupeta mulelo wahae. Nihakulicwalo, Satani upalezwi. Litaba zelubala mwa Bibele libonisa zaezize Jehova, mi libonisa kuli Jehova ki Ndate yalilato ni Mubusi yomunde. Ki niti kuli Jehova uutwile hahulu butuku kwa pilu kabakala zaezize Satani ni baswalisana ni bona kuli bakwenuhele Mulimu. (Samu 78:40) Nihakulicwalo, Jehova ubonisize butali, pilu-telele, ni katulo yelukile kuli atatulule taba ya buhata yanaabulezi Satani. Hape ubonisize maata ahae amatuna mwa linzila zeshutana-shutana. Sa butokwa nikufita kikuli ubonisa lilato mwa lika kaufela zaeza. (1 Joa. 4:8) Jehova uzwezipili kusebeza kuli akenise libizo lahae.
Satani naabulelezi Eva litaba za buhata ka za Jehova mi kuzwa fela kwamulaho, Diabulosi uzwezipili kusawana Mulimu (Mubone maparagilafu 9, 10, ni 15) *
15. Ki lika mañi zasweli kueza Satani kacenu kuli asinye Mulimu libizo, mi kueza cwalo kutahisizeñi?
15 Ni kacenu, Satani uzwelapili kusinya Mulimu libizo. Upuma batu kuli bakale kunahana kuli Mulimu haana maata, katulo yelukile, butali, ni lilato. Ka mutala, Satani ulikanga kukolwisa batu kulumela kuli Jehova haki yena yabupile lika kaufela. Mi haiba batu balumela kuli Mulimu uteñi, Satani ubapumanga kuli bakale kulumela kuli batu babalatelela likuka za Mulimu habana tukuluho, ni kuli likuka zahae halisika luka. Mane uluta batu tuto ya buhata ya kuli Jehova ki Mulimu yasituhu ni yalunya, yacisanga batu mwa lihele. Mi haiba batu balumela litaba za buhata zeo, kukona kubabela bunolo kuhana puso ya Jehova yelukile. Satani ukazwelapili kusinya Mulimu libizo kufitela nako yakayundiswa, mi ukabata kuli ni mina mukwenuhele Jehova. Kana ukakona kupeta mulelo wahae?
ZEMUKONA KUEZA KULI MUYEMELE BUBUSI BWA JEHOVA NI LIBIZO LAHAE
16. Ki lika mañi zemukona kueza zene bapalezwi kueza bo Adama ni Eva?
16 Jehova ufile batu babasika petahala kolo ya kukenisa libizo lahae. Kacwalo, mwakona kueza zene bapalezwi kueza bo Adama ni Eva. Nihaike kuli batu babañata mwa lifasi babulela litaba za buhata ka za Jehova ni kushwaula libizo lahae, mina mwakona kuliyemela ni kuluta batu niti ya kuli Jehova ki Mulimu yakenile, yalukile, yomunde, ni yalilato. (Isa. 29:23) Mwakona kubonisa kuli muyemela bubusi bwahae. Mwakona kutusa batu kulemuha kuli ki puso feela ya Jehova yeli yelukile mi ki yona feela yekatahisa kuli batu kaufela babe ni tabo ni kupila mwa kozo.—Samu 37:9, 37; 146:5, 6, 10.
17. Jesu naazibahalize cwañi libizo la Ndatahe?
17 Haluyemela libizo la Jehova, lulikanyisa mutala wa Jesu Kreste. (Joa. 17:26) Jesu naazibahalize libizo la Ndatahe isiñi feela ka kuitusisa lona kono hape ni ka kuluta batu mwainezi Jehova luli. Ka mutala, naahanyelize litaba zene baluta Bafalisi zenebonisa inge kuli Jehova ki Mulimu yabuhali, yataata, yasina taba ni batu, ni yasina makeke. Jesu naalutile batu kuli Ndatahe ki Mulimu yanani kutwisiso, yanani pilu-telele, yalilato, ni yalata kuswalela. Hape naatusize batu kuziba mwainezi Jehova ka kulikanyisa Ndatahe ni kubonisa tulemeno twanani tona mwa bupilo bwahae kaufela.—Joa. 14:9.
18. Ki lika mañi zelukona kueza kuli lubonise kuli litaba zemaswe zebabulela balwanisi ka za Jehova haki za niti?
18 Sina Jesu, ni luna lwakona kutusa batu kuziba mwainezi Jehova luli, ka kubaluta kuli ki Mulimu yalilato ni yasishemo. Halueza cwalo, luhanyeza litaba za buhata zebaluta batu ka za Jehova. Lukenisa libizo la Jehova ka kutusa batu kuunga libizo leo kuba lelikenile. Sina Jesu, ni luna lwakona kulikanyisa Jehova. Lwakona kueza cwalo kusina taba kuli halusika petahala. (Maef. 5:1, 2) Haiba zelubulela ni zelueza litusa batu kuziba mwainezi Jehova luli, lukakenisa libizo lahae. Lukenisa libizo leo ka kulukulula batu kwa lituto za buhata. Hape lukenisa libizo la Jehova ka kuzwelapili kusepahala ku Mulimu nihaike kuli lu batu babasika petahala.—Jobo 27:5.
Luswanela kutusa batu boluituta ni bona Bibele kuziba kuli Jehova ki Mulimu yasishemo ni yalilato (Mubone paragilafu 18 ni 19) *
19. Liñolo la Isaya 63:7 lilutusa cwañi kuziba zeluswanela kukoñomekanga haluluta batu?
19 Kunani lika zeñwi hape zelukona kueza kuli lukenise libizo la Jehova. Haluluta batu litaba za mwa Bibele, hañata lukoñomekanga za bubusi bwa Mulimu, kuli ki Jehova feela yanani tukelo ya kubusa mwa pupo kaufela, mi taba yeo ki ya niti. Nihaike kuli lutokwa kuluta batu milao ya Mulimu, sa butokwa nikufita kikuli lubatuse kulata Jehova, yena Ndataa luna, ni kusepahala ku yena. Kacwalo, lutokwa kukoñomekanga tulemeno twanani tona Jehova, ni kutusa batu kuziba mwainezi luli. (Mubale Isaya 63:7.) Haiba luluta batu ka nzila yecwalo, luka batusa kulata Jehova ni kumukuteka kabakala kuli balata kusepahala ku yena.
20. Lukanyakisisañi mwa taba yetatama?
20 Lukona kukenisa cwañi libizo la Jehova ni kutusa batu kuziba niti ka za hae ka lika zelubulela ni zelueza? Puzo yeo ikaalabiwa mwa taba yetatama.
PINA 2 Jehova ki Lona Libizo Lahao
^ para. 5 Ki taba mañi ya butokwa yebatalimana ni yona batu ni mangeloi? Ki kabakalañi taba yeo haili ya butokwa, mi iluama cwañi? Kuziba likalabo za lipuzo zeo kuka lutusa kutiisa silikani saluna ni Jehova.
^ para. 61 LITABA ZETALUSA SISWANISO: Diabulosi naasawanile Mulimu ka kutaluseza Eva kuli Mulimu ki lihata. Ka lilimo-limo, Satani uzwezipili kuluta batu lituto za buhata, zecwale ka tuto ya kuli Mulimu unani situhu, ni ya kuli Mulimu naasika bupa batu.
^ para. 63 LITABA ZETALUSA SISWANISO: Muzwale yaituta Bibele ni mutu yomuñwi ukoñomeka tulemeno twanani tona Mulimu.
