CHIHANDE CHAKULINANGULA 23
“Lijina Lyove Lipwenga Lyajila”
“Ove Yehova, lijina lyove nalipwangako lika haya myaka yosena.”—SAMU 135:13.
MWASO 10 Twalisenu Yehova Kalunga Ketu
VYUMA NATUSHIMUTWILA *
1-2. Vihande muka vyapwa vyavilemu chikuma kuli Vinjiho jaYehova?
MAKUMBI ANO, chihande chachilemu chikuma kuli etu shina chakuhakwila wata waYehova nakulingisa lijina lyenyi lipwenga lyajila. Etu Vinjiho jaYehova, twazanga kushimutwila havihande kanevi. Chihande chakuhakwila wata waYehova chatambukila hamwe nachihande chakujilika lijina lyenyi.
2 Tuvosena twatachikiza ngwetu twatela kufumisa katombo halijina lyaKalunga. Twalinangula nawa ngwetu wata waYehova chipwe ngwetu chiyulo chenyi chikiko kaha chamwenemwene. Shikaho vihande vyosenevi vivali vyapwa vyavilemu.
3. Nge natuvuluka lijina lyaYehova kaha tuli nakulumbununa vyuma muka?
3 Hakwamba ngwetu lijina lyaYehova, tuli nakulumbununa vyuma vyavivulu hali Kalunga kuhakilako vene najila eji kuyulilangamo. Shikaho nge twamona ngwetu kufumisa katombo halijina lyaKalunga chapwa chachilemu chikuma, kaha twatela kumona nawa ngwetu chiyulo chenyi chikiko kaha chamwenemwene. Lijina lyenyi lyatambukila hamwe najila eji kuyulilangamo hakupwa ikiye mwata wangolo josena.—Talenu lipwata lyakwamba ngwavo, “ Vihande Vyaliweza muChihande Chachinene.”
4. Uno chisoneka chaSamu 135:13 chahanjika ika halijina lyaKalunga, kaha vihula muka natushimutwila?
4 Lijina lyaYehova lyapwa lyakulipwila. (Tangenu Samu 135:13.) Vyuma muka vyalingisa lijina lyaKalunga kupwa lyalilemu? Uno vaputukile kulisaula ngachilihi? Uno Kalunga eji kulilingisanga ngachilihi kupwa lyajila? Kaha etu natuhasa ngachilihi kuhakwila lijina lyenyi? Tushimutwilenu havihula kanevi.
VYUMA VYALINGISA LIJINA LYAKALUNGA KUPWA LYALILEMU
5. Chihula muka tunahase kulihulisa hachihande chakulingisa lijina lyaKalunga kupwa lyajila?
5 “Lijina lyove lipwenga lyajila.” (Mateu 6:9) Chuma kana chikiko ahanjikile Yesu ngwenyi tuvangilenga kuvuluka hakulomba. Uno awa mazu alumbununa ika? Kujilika chuma chalumbununa kuchilingisa kupwa chajila, chipwe chitoma. Oloze vatu vamwe vanahase kulihulisa ngwavo, ‘Uno natulingisa ngachilihi lijina lyaYehova kupwa lyajila chipwe litoma, okunyi lyapwa lyehi lyajila kaha nawa litoma?’ Hakukumbulula chihula kana, kuvanga tunatachikiza ngwetu lizu lijina lyalumbununa vyuma vyavivulu.
6. Uno chuma muka chalingisa lijina kupwa lyalilemu?
6 Lijina kalyapwa kaha lizu mwavuluka mutu chipwe lize mwasonekako. Mbimbiliya yamba ngwayo: “Lijina lyamwaza linawahe kuhambakana luheto lwaluvulu.” (Vishi. 22:1; Kwambu. 7:1) Mwomwo ika lijina lyapwila lyalilemu? Mwomwo lyalumbununa nawa puho yamutu, chipwe ngwetu vyuma veji kushinganyekanga vatu hali mwenya-lijina kana. Shikaho, mwenya-lijina ikiye wamulemu navyuma lyemanyinako lijina kana, keshi omwo veji kulisonekanga chipwe kulivulukako.
7. Uno vatu vanapihisanga ngachilihi lijina lyaKalunga?
7 Nge vatu navahanjika makuli hali Yehova, vali nakulingisa vatu vamumone kupwa wamupi. Kaha kulinga chuma kana chapwa kupihisa lijina lyenyi. Lwola lwatete vapihishile lijina lyaKalunga napuho yenyi yamwaza shina kukuputuka chakuyoya chavatu. Achitalenu havyuma natulinangula kuchuma kana.
OMWO VAPUTUKILE KUSAULA LIJINA LYAKALUNGA
8. Alama naEve vatachikijile vyuma muka, kaha echi chaneha vihula muka?
8 Alama naEve vatachikijile ngwavo lijina lyaKalunga ikiye Yehova, kaha vatachikijile nawa navyuma vyeka vyakupandama kuli ikiye. Vatachikijile ngwavo ikiye Tengi uze avahanyine kuyoya, nakuvahana nawa Palachise limbo lyamwaza naulo wakukupuka. (Kupu. 1:26-28; 2:18) Uno vatwalileho lika kushinganyeka havyuma vyosenevi vyamwaza avalingililile Yehova tahi? Kutala vazangilenga lika Mwenya-lijina lyaYehova nakumusakwilila tahi? Muchano wasolokele hatoma omu muka-kole waKalunga ejile nakuveseka.
9. Kweseka naKuputuka 2:16, 17 na 3:1-5, vyuma muka Yehova alwezele valunga napwevo vakulivanga, kaha Satana alumwine ngachilihi muchano?
9 Tangenu Kuputuka 2:16, 17 na 3:1-5. Satana azachishile linoka nakuhulisa Eve ngwenyi: “Uno Kalunga nambe chikupu ngwenyi kamwatela kulya kumitondo yoseneyi yili mumilembako nyi?” Chihula kana chapwile nakusolola makuli amapi aze apwile nge ulembe. Kalunga avalwezele ngwenyi vanahase kulya kumitondo yosena, kufumisako kaha mutondo umwe. Shikaho Alama naEve vapwile navyakulya vyavivulu. (Kupu. 2:9) Yehova atwama nazumbu chikupu. Chipwe ngocho, avakanyishile kulya kumutondo umwe kaha. Ngocho chihula ahulishile Satana chalumwine muchano. Asolwele kwijiva nge Kalunga apwa walifwi. Shikaho, Eve pamo alihulishile ngwenyi, ‘Uno Kalunga natuminyi vyuma vimwe vyamwaza tahi?’
10. Satana asawile ngachilihi lijina lyaKalunga, kaha chanehele ukalu muka?
10 Halwola kana Eve amwene Yehova kupwa Muka-kumuyula. Akumbulwile Satana namazu aze amulwezele Kalunga. Amulwezele ngwenyi kavatela nakukwata kumutondo kanako. Kaha atachikijile nawa vyuma navifumamo nge navahona kwononoka kulushimbi kana. Oloze Satana amulwezele ngwenyi: “Kufwa kamweshi kufwako.” (Kupu. 3:2-4) Aha jino Satana ahanjikile makuli. Asawile jino lijina lyaKalunga hatoma, kaha chapwile nakulumbununa nge alwezele Eve ngwenyi Yehova apwa muka-kwonga. Ngocho Satana apwile jino liyavolo, chipwe ngwetu muka-lusongi. Eve vamuhungumwishile chikupu, mwomwo etavilile vyuma amulwezele Satana. (Chimo. 1, 2:14) Afwelelele chikuma Satana kuhambakana Yehova. Echi chikiko chamulingishile asakule kulinga chuma chachipi chikuma. Asakwile kulikanga kuli Yehova, ngocho alile muhako wakumutondo uze amukanyishile Yehova. Kutwala muze, ahanyineko naAlama.—Kupu. 3:6.
11. Vyuma muka vatelelele kulinga visemi jetu vakulivanga, kaha vahonene kulinga ika?
11 Achishinganyekenu havyuma atelelele kuhanjika Eve kuli Satana. Pamo atelelele kuhanjika ngwenyi: “Kanda nauhanjika vyuma vyavipi hali Kalungako. Ami kangwakwijivako, oloze ngwatachikiza Tata Yehova. Ngwamuzanga nakumufwelela. Ami nalunga lyami Alama natuhane vyuma vyosena tuli navyo. Fumaha tatawenu!” Twafwelela ngwetu kachi Yehova evwile kuwaha kwivwa mwanenyi mwahanjika mazu kana. (Vishi. 27:11) Chaluvinda, Alama naEve kavazangile Yehovako. Echi chavalingishile vahone kuhakwila lijina lyaSevo lize asawile Satana.
12. Uno Satana alingishile ngachilihi Eve ahuhwasane chiyulo chaYehova, kaha Alama naEve vahonene kulinga ika?
12 Nganomu tunashimutwila, Satana aputukile kulingisa Eve ahuhwasane Yehova, numba nge atamo kuyula nyi chiku. Amuhulishile vihula vize vyamulingishile ahuhwasane Mwenya-lijina lyaYehova. Alama naEve vahonene kuhakwila lijina lyaYehova. Echi chavalingishile vevwilile kuvyuma vyamakuli ahanjikile Satana. Namakumbi ano, Satana eji kuzachisanga kafuta kokamwe. Afwila kusaula lijina lyaYehova. Vatu vaze veji kwivwililanga makuli enyi veji kukananga chiyulo chaYehova.
YEHOVA EJI KULINGISANGA LIJINA LYENYI KUPWA LYAJILA
13. Uno chisoneka chaEzekele 36:23 chasolola ngwacho muMbimbiliya mwatwama chihande muka chachinene chikuma?
13 Uno Yehova eji kwechelelanga lijina lyenyi valisaule chakuhona kulihakwila tahi? Chiku. Mbimbiliya yosena yatwama navyakutalilaho vyakusolola omwo Yehova nahakwilanga lijina lyenyi kuvyuma vyamakuli vamuvangijikilile muEtene. (Kupu. 3:15) Kuhanjika mukavatu, muMbimbiliya mwatwama chihande chachinene chikuma chakwamba ngwacho, Yehova eji kulingisanga lijina lyenyi kupwa lyajila kuhichila muWangana uze vayula kuli Mwanenyi, mangana akalingise hamavu hakapwe kwoloka nakuunda. MuMbimbiliya mwatwama mijimbu yize yeji kutukafwanga tutachikize omwo Yehova eji kulingisanga lijina lyenyi lipwenga lyajila.—Tangenu Ezekele 36:23.
14. Uno mujila akwililemo Yehova kukulikanga chapwile muEtene, chalingisa ngachilihi lijina lyenyi kupwa lyajila?
14 Satana nakilikita hakumina ngolo jenyi josena mangana ahonese Yehova kutesamo vyuma vyenyi ajina, oloze nahono. Mbimbiliya yasolola jijila Yehova nalingishilangamo lijina lyenyi lipwenga lyajila, kaha nawa yasolola nge ikiye kaha apwa wakulitulaho. Kuhanjika muchano, kulikanga chaSatana navaze veji kumukundwizanga cheji kwivwisanga Yehova kukola kumuchima. (Samu 78:40) Chipwe ngocho, Yehova asaka kuvatula chihande kana mujila yamangana nachiyulo, kaha nawa namuchima wakutalilila chikoki. Nasololanga nawa ngolo jenyi mujijila jajivulu. Chachinenenyi, eji kulinganga vyuma vyosena muzangi. (Yowa. 1, 4:8) Yehova ali nakutwalaho lika kuzata mangana alingise lijina lyenyi kupwa lyajila.
Satana avangijikilile Yehova, kaha natwalengaho lika kumusaula hamyaka yayivulu (Talenu palangalafu 9-10, 15) *
15. Satana ali nakusaula ngachilihi lijina lyaKalunga makumbi ano, kaha vyuma muka vinafumumo?
15 Namakumbi ano Satana achili nakusaula lijina lyaKalunga. Eji kulingisanga vatu vahuhwasane ngwavo Kalunga katwama nangoloko, kaha chiyulo chenyi chachipi, katwama nawa namangana nazangiko. Chakutalilaho, Satana eji kulingisanga vatu vashinganyeke ngwavo Yehova keshi ikiye Tengiko. Kaha vaze vafwelela ngwavo Kalunga kwatwama, Satana eji kuvalingisanga vashinganyeke ngwavo jishimbi jaKalunga japwa jajikalu, kaha nawa kajapwa janganyoko. Aneha nawa kunangula chakwamba ngwavo Yehova apwa Kalunga waukenya uze eji kwochanga vatu mukakahya kahelo. Kahomu vatu veji kufwelelanga makuli kana, cheji kuvalingisanga jino vakane kuvayula kuli Kalunga. Satana mwatwalaho kuzachisa makuli enyi hakusaka kuhungumwisa vavavulu, kuhakilako vene nayenu, swi nakulwola luze navakamufumisako. Kutala mwafukila tahi?
VYUMA MUKA MWATELA KULINGA?
16. Vyuma muka munahase kulinga vize Alama naEve vahonene kulinga?
16 Yehova ahana vatu vakuhona kukupuka lisesa lyakuhakwila lijina lyenyi lyajila. Echi chalumbununa nge munahase kulinga chuma ahonene kulinga Alama napuwenyi Eve. Numba tuhu tuli mukaye muze munazale navatu vaze veji kusaulanga lijina lyaKalunga nakumuvangijikila vyuma vyamakuli, munahase kuhanjika muchano hali Kalunga ngwenu apwa wajila, wakwoloka, wamwaza kaha nawa wazangi. (Isa. 29:23) Munahase kukundwiza chiyulo chenyi, nakusolola ngwenu chikiko kaha chiyulo chamwaza, chize nachikalingisa vyuma vyakuyoya vikatwame mukuunda nakuwahilila.—Samu 37:9, 37; 146:5, 6, 10.
17. Uno Yesu alingishile ngachilihi lijina lyaIse valitachikize?
17 Nge natuhakwila lijina lyaYehova, kaha tuli nakulondezeza Yesu Kulishitu. (Yowa. 17:26) Yesu anangwile vatu vatachikize lijina lyaIse Yehova hakulivulukanga nakuhakwila puho yaIse. Chakutalilaho, asopolwele vaFwaliseu vaze vahanjikilenga vyuma vyamakuli hali Yehova nakulingisa vatu vashinganyeke ngwavo apwa wamukalu muchima, wamukalu kusuulwisa, kaha nawa katwama nakekeko. Yesu nawa akafwile vatu vamone ngwavo Ise apwa wamwashi muchima, nakutalilila chikoki, wazangi kaha nawa apwa muka-kukonekela. Vatu vatachikijile nawa omwo apwa Yehova, hakumona vyuma alingilenga Yesu mukuyoya chenyi.—Yowa. 14:9.
18. Vyuma muka twatela kulinga mangana tusolole ngwetu vyuma vavangijikila Yehova vyapwa vyamakuli?
18 Nayetu tunahase kulweza vatu vyuma twatachikiza hali Yehova, nakuvanangula vamone chikupu ngwavo Kalunga atwama nazangi nalikoji. Nge natulinga ngocho, kaha natutomesa lijina lyaYehova lize vanapihisanga vatu. Ngocho natulingisa vatu vamonenga lijina lyaYehova kupwa lyajila. Numba tuhu katwakupukako, oloze tunahase kulondezeza Yehova. (Efwe. 5:1, 2) Vilinga vyetu nahanjikiso yetu vyatela kusolola omwo apwa Yehova, kahechi nachikafwa vatu vajilike lijina lyenyi. Kaha nawa natuhakwila lijina lyaYehova hakukafwa vatu vechenga kufwelela vyuma vyakuhenga vize vavanangula kutalisa kulijina kana. * Natusolola nawa ngwetu navatu vakuhona kukupuka vanahase kupwa lika vakulonga.—Yopa 27:5.
Twasaka kukafwa vatu tweji kunangulanga Mbimbiliya vatachikize omwo apwa Yehova navilinga vyenyi vyamwaza (Talenu palangalafu 18-19) *
19. Uno mukanda waIsaya 63:7 watukafwa ngachilihi tumone chuma chachilemu twatela kulinga hakunangula?
19 Kuli vyuma vyeka twatela kulinga mangana tulingise lijina lyaYehova kupwa lyajila. Omu tweji kunangulanga vatu vyawata waKalunga, tweji kuvalwezanga ngwetu atamo kuyula vyuma vyosena atenga. Kaha chapwa chakwoloka kulinga ngocho. Oloze chuma chachilemu chikuma twatela kufwila kulinga shina kukafwa vatu vazange Yehova uze apwa Setu, nakupwa vakushishika kuli ikiye. Twatela nawa kuvalweza vilinga vyaYehova vyamwaza nakuvalumbunwina omwo apwa Mwenya-lijina kana. (Tangenu Isaya 63:7.) Nge natuvanangula mujila kaneyi, kaha natuvakafwa vazange Yehova nakumwononoka mwomwo navafwila jino kupwa vakushishika kuli ikiye.
20. Vyuma muka natushimutwila muchihande chinakavangizaho?
20 Uno vyuma muka twatela kulinga mangana vilinga vyetu nakunangula chetu vihane kavumbi kulijina lyaYehova nakulingisa vatu vapandame kuli ikiye? Chihande chinakavangizaho nachishimutwila hachihula kana.
MWASO 2 Lijina Lyove Yove Yehova
^ par. 5 Uno chihande muka chapwa chachilemu kuli vangelo navatu? Mwomwo ika chihande kana chapwila chachilemu, kaha chakwata ngachilihi hali etu? Kutachikiza mwakukumbulwila evi vihula, navihula vyeka nachitukafwa tuzamise usoko wetu naYehova.
^ par. 18 Lwola lumwe mumikanda yetu tunasonekangamo ngwetu lijina lyaYehova kavatela kulihakwilako mwomwo kakweshi mutu ahana Yehova mulonga hakupwa nalijina kanako. Oloze muchano kana vawalumwine hakuliwana chamwaka himwaka chaliuka chamu 2017. Hakuliwana kana, cheyamani ambile ngwenyi: “Kuhanjika mukavatu, kachapwa chakuhengako kuhanjika ngwetu twatela kulombanga lijina lyaYehova valihakwile, mwomwo lijina lyenyi chipwe ngwetu puho yenyi vatela chikupu kuyihakwila.”—Talenu polongalamu yaJanuary 2018 ha jw.org®. Talenu haze vanavuluka ngwavo CHISETE > JW BROADCASTING®.
^ par. 62 MAZU AKULUMBUNUNA MUVWIMBIMBI: Liyavolo asawile Kalunga hakulweza Eve ngwenyi Kalunga apwa muka-makuli. Hamyaka yayivulu, Satana nakundwizanga vishinganyeka vyamakuli vyakufwana nge kunangula chakwamba ngwavo Kalunga apwa waukenya, kaha nawa keshi ikiye atengele vatuko.
^ par. 64 MAZU AKULUMBUNUNA MUVWIMBIMBI: Ou ndumbwetu ali nakushindakanya havilinga vyaKalunga omu ali nakunangula mutu Mbimbiliya.
